This document is an excerpt from the EUR-Lex website
Document 52021PC0456
Recommendation for a COUNCIL DECISION authorising the opening of negotiations on behalf of the European Union for the conclusion of an Implementing Protocol to the Fisheries Partnership Agreement between the European Union and the Republic of Mauritius
Rakkomandazzjoni għal DEĊIŻJONI TAL-KUNSILL li tawtorizza l-ftuħ ta’ negozjati f’isem l-Unjoni Ewropea għall-konklużjoni ta’ Protokoll ta’ Implimentazzjoni tal-Ftehim ta’ Sħubija dwar is-Sajd bejn l-Unjoni Ewropea u r-Repubblika ta’ Mauritius
Rakkomandazzjoni għal DEĊIŻJONI TAL-KUNSILL li tawtorizza l-ftuħ ta’ negozjati f’isem l-Unjoni Ewropea għall-konklużjoni ta’ Protokoll ta’ Implimentazzjoni tal-Ftehim ta’ Sħubija dwar is-Sajd bejn l-Unjoni Ewropea u r-Repubblika ta’ Mauritius
COM/2021/456 final
IL-KUMMISSJONI EWROPEA
Brussell, 5.8.2021
COM(2021) 456 final
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati f’isem l-Unjoni Ewropea għall-konklużjoni ta’ Protokoll ta’ Implimentazzjoni tal-Ftehim ta’ Sħubija dwar is-Sajd bejn l-Unjoni Ewropea u r-Repubblika ta’ Mauritius
{SWD(2021) 221 final} - {SWD(2021) 222 final}
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet għall-proposta u l-objettivi tagħha
Il-Kummissjoni tipproponi li jiġi nnegozjat Protokoll ta’ Implimentazzjoni ġdid tal-Ftehim ta’ Sħubija dwar is-Sajd mar-Repubblika ta’ Mauritius 1 , f’konformità mal-bżonnijiet tal-flotta tal-Unjoni, mar-Regolament (UE) Nru 1380/2013 dwar il-Politika Komuni tas-Sajd 2 (ir-Regolament dwar il-PKS) u mal-Konklużjonijiet tal-Kunsill tad-19 ta’ Marzu 2012 3 dwar Komunikazzjoni tal-Kummissjoni dwar id-Dimensjoni Esterna tal-Politika Komuni tas-Sajd 4 .
•Konsistenza mad-dispożizzjonijiet eżistenti fil-qasam ta’ politika
Il-Ftehim ta’ Sħubija dwar is-Sajd attwali ma’ Mauritius daħal fis-seħħ fit-28 ta’ Jannar 2014 għal perjodu ta’ sitt snin u jista’ jiġġedded b’mod taċitu għal perjodi addizzjonali ta’ tliet snin. Il-Protokoll ta’ Implimentazzjoni attwali ta’ erba’ snin 5 beda japplika fit-8 ta’ Diċembru 2017 u se jiskadi fis-7 ta’ Diċembru 2021. Dan jiffissa l-opportunitajiet tas-sajd għall-flotta tal-Unjoni u l-kontribuzzjoni finanzjarja korrispondenti li l-Unjoni u s-sidien tal-bastimenti tal-UE jeħtiġilhom jħallsu. Jipprovdi opportunitajiet tas-sajd għat-tonn u għall-ispeċijiet li jpassu ħafna għall-bastimenti tal-UE minn erba’ Stati Membri (Spanja, Franza, l-Italja u l-Portugall).
Il-kontribuzzjoni finanzjarja pubblika annwali tal-UE lil Mauritius tammonta għal EUR 220 000 għall-aċċess, flimkien ma’ ammonti speċifiċi ta’ EUR 220 000 għall-appoġġ tal-politika tas-sajd u ta’ EUR 135 000 għall-appoġġ għall-implimentazzjoni tal-politika marittima u l-ekonomija tal-oċeani.
Il-Kummissjoni tipproponi li tinnegozja Protokoll ta’ Implimentazzjoni ġdid, filwaqt li tqis għalkollox ir-Regolament dwar il-PKS 6 .
L-UE żviluppat network ta’ ftehimiet bilaterali ta’ sħubija dwar is-sajd sostenibbli (SFPAs) fl-Oċean Indjan, pereżempju mas-Seychelles u ma’ Madagascar. Il-Ftehimiet ta’ Sħubija dwar is-Sajd Sostenibbli jgħinu għall-promozzjoni tal-objettivi tal-PKS fil-livell internazzjonali u jiżguraw li l-attivitajiet tas-sajd tal-flotta tal-UE ’l barra mill-ilmijiet tal-Unjoni jissejsu fuq l-istess prinċipji u l-istess standards li japplikaw skont id-dritt tal-Unjoni. Barra minn hekk, il-Ftehimiet ta’ Sħubija dwar is-Sajd Sostenibbli jrawmu l-kooperazzjoni xjentifika bejn l-UE u s-sħab tagħha, jippromwovu t-trasparenza u s-sostenibbiltà sabiex ir-riżorsi tas-sajd jiġu ġestiti aħjar u jinkoraġġixxu l-governanza billi jappoġġaw il-monitoraġġ, il-kontroll u s-sorveljanza tal-attivitajiet tal-flotot nazzjonali u barranin u billi jipprovdu l-fondi biex jiġi miġġieled is-sajd illegali, mhux irrappurtat u mhux irregolat (is-sajd IUU) u biex jingħata kontribut għall-iżvilupp sostenibbli tal-industrija lokali tas-sajd. Il-ftehimiet ta’ Sħubija dwar is-Sajd Sostenibbli jsaħħu l-pożizzjoni tal-UE fl-organizzazzjonijiet internazzjonali u reġjonali tas-sajd — fil-każ ta’ Mauritius, il-Kummissjoni għat-Tonn tal-Oċean Indjan (IOTC) 7 .
•Konsistenza ma’ politiki oħra tal-Unjoni
In-negozjar ta’ Protokoll ġdid ma’ Mauritius huwa konformi mal-azzjoni esterna tal-UE fil-pajjiżi Afrikani, tal-Karibew u tal-Paċifiku (il-pajjiżi AKP) u, b’mod partikolari, mal-objettivi tal-Unjoni f’dak li għandu x’jaqsam mal-ħarsien tal-prinċipji demokratiċi u tad-drittijiet tal-bniedem. Hija wkoll konformi mal-Ftehim interim ta’ Sħubija Ekonomika (FSE) li qed jiġi applikat minn Mauritius, mis-Seychelles, miż-Żimbabwe, minn Madagascar u minn Comoros, u li l-ambitu tiegħu qed jiġi estiż għal kwistjonijiet oħra relatati mal-kummerċ bħall-kummerċ u l-iżvilupp sostenibbli.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Il-bażi ġuridika għad-deċiżjoni jipprovdiha l-Artikolu 218 tat-Trattat dwar il-Funzjonament tal-Unjoni Ewropea (it-TFUE), li jistabbilixxi l-proċedura għan-negozjar u għall-konklużjoni ta’ ftehimiet bejn l-UE u pajjiżi terzi u li jinsab fit-Titolu V, (il-ftehimiet internazzjonali), tal-Ħames Parti (l-azzjoni esterna tal-Unjoni) ta’ dak it-Trattat.
•Is-sussidjarjetà (għall-kompetenza mhux esklużiva)
Mhux applikabbli (kompetenza esklużiva).
•Proporzjonalità
Id-deċiżjoni hija proporzjonali mal-objettiv.
•Għażla tal-istrument
L-istrument huwa previst fl-Artikolu 218(3) u (4) tat-TFUE.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Fl-2021, il-Kummissjoni wettqet evalwazzjoni ex post tal-Protokoll attwali u evalwazzjoni ex ante tat-tiġdid possibbli tiegħu. Il-konklużjonijiet tagħha huma mogħtija b’mod separat f’dokument ta’ ħidma tal-persunal.
Mill-evalwazzjoni ħareġ li s-setturi tas-sajd tal-UE huma bla dubju interessati fil-possibbiltà tas-sajd f’Mauritius u li t-tiġdid tal-Protokoll huwa fl-interess taż-żewġ Partijiet. Barra minn hekk, it-tiġdid se jgħin biex jissaħħu l-monitoraġġ, il-kontroll u s-sorveljanza u se jikkontribwixxi għat-titjib tal-governanza tal-attivitajiet tas-sajd fir-reġjun.
Għall-UE, huwa importanti li jinżamm strument li jippermetti kooperazzjoni settorjali b’saħħitha ma’ attur strateġiku fil-livell sottoreġjonali, u b’mod aktar ġenerali, li tissaħħaħ ir-relazzjoni ma’ Mauritius. Dan se jgħin ukoll lill-UE tibni alleanzi fil-qafas tal-IOTC. Għall-flotta tal-UE, inkluż ir-reġjuni ultraperiferiċi tagħha fl-Oċean Indjan, dan ifisser li jinżamm l-aċċess għal żona importanti tas-sajd taħt il-ġurisdizzjoni ta’ Mauritius għall-użu ta’ strateġiji ta’ qbid f’qafas legali internazzjonali pluriennali. Barra minn hekk, l-importanza ta’ Mauritius f’termini tal-ipproċessar tat-tonn maqbud fl-Oċean Indjan u l-esportazzjonijiet ta’ prodotti tat-tonn lejn l-UE tikkontribwixxi għar-rilevanza tal-protokoll il-ġdid previst, kemm għall-industrija tas-sajd tal-UE kif ukoll għall-pajjiż sieħeb. Għall-awtoritajiet ta’ Mauritius, l-għan hu li jinżammu r-relazzjonijiet mal-UE, parzjalment biex tissaħħaħ il-governanza tal-oċeani kif ukoll biex jibbenefikaw mill-appoġġ settorjali speċifiku li jipprevedi opportunitajiet ta’ finanzjament pluriennali.
•Konsultazzjonijiet mal-partijiet ikkonċernati
Matul l-evalwazzjoni tagħha, il-Kummissjoni kkonsultat lill-Istati Membri, lir-rappreżentanti tal-industrija, lill-organizzazzjonijiet internazzjonali tas-soċjetà ċivili u lill-amministrazzjoni tas-sajd u lis-soċjetà ċivili fi’ Mauritius. Saru wkoll konsultazzjonijiet fil-qafas tal-laqgħat tal-Kunsill Konsultattiv għall-Flotta ta’ Distanzi Twal.
•Ġbir u użu tal-għarfien espert
Mhux applikabbli.
•Valutazzjoni tal-impatt
Mhux applikabbli.
•Idoneità regolatorja u simplifikazzjoni
Mhux applikabbli.
•Drittijiet fundamentali
Id-direttivi ta’ negozjati (proposti bħala anness tad-deċiżjoni) jirrakkomandaw l-inklużjoni ta’ klawżola dwar il-konsegwenzi tal-ksur tad-drittijiet tal-bniedem u tal-prinċipji demokratiċi.
4.IMPLIKAZZJONIJIET BAĠITARJI
L-implikazzjonijiet baġitarji ta’ protokoll ġdid jinkludu l-ħlas ta’ kontribuzzjoni finanzjarja lil Mauritius. L-allokazzjonijiet baġitarji f’termini ta’ approprjazzjonijiet ta’ impenn u ta’ pagament ikollhom jiġu inklużi kull sena fil-linja baġitarja għall-Ftehimiet ta’ Sħubija dwar is-Sajd Sostenibbli (08 05 01) u jkunu kompatibbli mal-ipprogrammar finanzjarju tal-qafas finanzjarju pluriennali (QFP) 2022–2027. L-ammonti għall-impenji u għall-pagamenti huma stabbiliti fil-proċedura baġitarja annwali, inkluż il-linja ta’ riżerva għall-protokolli li jkun għad iridu jidħlu fis-seħħ fil-bidu tas-sena 8 .
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar
In-negozjati mistennija jinbdew fit-tielet trimestru tal-2021.
•Spjegazzjoni fid-dettall tad-dispożizzjonijiet speċifiċi tal-proposta
Il-Kummissjoni tirrakkomanda:
·li l-Kunsill jawtorizza lill-Kummissjoni tiftaħ u tmexxi negozjati għall-konklużjoni ta’ Protokoll ġdid tal-Ftehim ta’ Sħubija dwar is-Sajd Sostenibbli mar-Repubblika ta’ Mauritius;
·li l-Kummissjoni tinħatar bħala n-negozjatur tal-UE f’dan il-kuntest;
·li n-negozjati jsiru f’konsultazzjoni mal-kumitat speċjali, f’konformità mat-TFUE;
·li l-Kunsill japprova d-direttivi ta’ negozjati fl-anness.
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati f’isem l-Unjoni Ewropea għall-konklużjoni ta’ Protokoll ta’ Implimentazzjoni tal-Ftehim ta’ Sħubija dwar is-Sajd bejn l-Unjoni Ewropea u r-Repubblika ta’ Mauritius
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 218(3) u (4) tiegħu,
Wara li kkunsidra r-rakkomandazzjoni tal-Kummissjoni Ewropea,
Billi jenħtieġ li jinfetħu n-negozjati bil-għan li jiġi konkluż Protokoll ta’ Implimentazzjoni ġdid tal-Ftehim ta’ Sħubija dwar is-Sajd mar-Repubblika ta’ Mauritius 9 ,
ADOTTAT DIN ID-DEĊIŻJONI:
Artikolu 1
Il-Kummissjoni b’dan hija awtorizzata tinnegozja Protokoll ta’ Implimentazzjoni ġdid tal-Ftehim ta’ Sħubija dwar is-Sajd Sostenibbli mal-Gvern tar-Repubblika ta’ Mauritius f’isem l-Unjoni.
Artikolu 2
Id-direttivi ta’ negozjati huma stabbiliti fl-Anness.
Artikolu 3
In-negozjati għandhom jitwettqu b’konsultazzjoni mal-Grupp ta’ Ħidma tal-Kunsill dwar il-Politika Esterna tas-Sajd.
Artikolu 4
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 5.8.2021
COM(2021) 456 final
ANNESS
tar-
Rakkomandazzjoni għal
Deċiżjoni tal-Kunsill
li tawtorizza l-ftuħ ta’ negozjati f’isem l-Unjoni Ewropea għall-konklużjoni ta’ Protokoll ta’ Implimentazzjoni tal-Ftehim ta’ Sħubija dwar is-Sajd bejn l-Unjoni Ewropea u r-Repubblika ta’ Mauritius
{SWD(2021) 221 final} - {SWD(2021) 222 final}
ANNESS
Direttivi ta’ negozjati
–L-objettiv tan-negozjati huwa li jiġi konkluż Protokoll ta’ Implimentazzjoni tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Repubblika ta’ Mauritius skont ir-Regolament (UE) Nru 1380/2013 dwar il-Politika Komuni tas-Sajd u l-konklużjonijiet tal-Kunsill tad-19 ta’ Marzu 2012 dwar il-Komunikazzjoni tal-Kummissjoni tat-13 ta’ Lulju 2011 dwar id-Dimensjoni Esterna tal-Politika Komuni tas-Sajd;
–Jenħtieġ li l-Protokoll ta’ Implimentazzjoni jiddefinixxi l-qafas ġenerali għall-attivitajiet tas-sajd tal-bastimenti tal-UE fl-ilmijiet ta’ Mauritius u għall-kooperazzjoni tal-UE ma’ Mauritius fil-qasam tas-sajd;
–Sabiex jiġi promoss is-sajd sostenibbli u responsabbli filwaqt li jiġu żgurati benefiċċji reċiproċi għall-UE u għal Mauritius, jenħtieġ li l-objettivi tan-negozjati tal-Kummissjoni jkunu bbażati kif ġej:
·jiġu żgurati l-aċċess għall-bastimenti tal-flotta tal-UE għaż-żona tas-sajd ta’ Mauritius, u l-awtorizzazzjonijiet li dawn il-bastimenti jeħtieġu biex jistadu f’dik iż-żona u, b’hekk, l-iżvilupp, fost l-oħrajn, tan-network ta’ Ftehimiet ta’ Sħubija dwar is-Sajd Sostenibbli li l-operaturi tal-UE għandhom għad-dispożizzjoni tagħhom fl-Oċean Indjan;
·jitqiesu l-aħjar parir xjentifiku disponibbli u l-pjanijiet ta’ ġestjoni rilevanti adottati mill-Organizzazzjonijiet Reġjonali tal-Ġestjoni tas-Sajd (RFMO) sabiex tiġi żgurata s-sostenibbiltà ambjentali tal-attivitajiet tas-sajd u l-promozzjoni tal-governanza tal-oċeani fil-livell internazzjonali. Jenħtieġ li l-attivitajiet tas-sajd ikunu mmirati esklussivament lejn ir-riżorsi disponibbli, filwaqt li titqies il-kapaċità tas-sajd tal-flotta lokali kif ukoll titqies b’mod speċjali n-natura migratorja ferm tal-istokkijiet ikkonċernati;
·jinkiseb sehem xieraq mir-riżorsi tas-sajd li jkun konformi għalkollox mal-interessi tal-flotta tal-UE, fejn ikun hemm flotot barranin oħra interessati f’dawn ir-riżorsi wkoll, u jiġu applikati l-istess kundizzjonijiet tekniċi għall-flotot barranin kollha;
·jiġi żgurat li l-aċċess għas-sajd jissejjes fuq l-attività storika tal-flotta tal-UE fir-reġjun u fuq dik li mistennija jkollha fil-ġejjieni, fid-dawl tal-aħjar valutazzjonijiet xjentifiċi disponibbli u l-aktar aġġornati u tal-interessi tar-reġjuni ultraperiferiċi tal-UE;
·jitwaqqaf djalogu biex tissaħħaħ il-politika settorjali bil-ħsieb li tiġi mħeġġa l-implimentazzjoni ta’ politika tas-sajd responsabbli, f’rabta mal-objettivi tal-iżvilupp ta’ Mauritius, partikolarment fir-rigward tal-governanza tas-sajd, tal-ġlieda kontra s-sajd illegali, mhux irrappurtat u mhux irregolat, tal-kontroll, il-monitoraġġ u s-sorveljanza tal-attivitajiet tas-sajd u tal-għoti tal-pariri xjentifiċi. u tiġi promossa l-attività ekonomika;
·tiddaħħal klawżola dwar il-konsegwenzi f’każ li jinkisru d-drittijiet tal-bniedem u l-prinċipji demokratiċi.
·jiġi żgurat li l-protokoll se jikkontribwixxi għall-promozzjoni tat-tkabbir sostenibbli u ta’ xogħol deċenti b’rabta mal-attivitajiet tas-sajd, filwaqt li jitqiesu l-Konvenzjonijiet rilevanti tal-Organizzazzjoni Internazzjonali tax-Xogħol (ILO);
·tiddaħħal klawżola dwar in-nondiskriminazzjoni bejn il-flotot, u dwar it-trasparenza.
–B’mod partikolari, jenħtieġ li l-protokoll jistabbilixxi dawn li ġejjin:
·l-opportunitajiet tas-sajd li l-bastimenti tal-UE se jingħataw;
·il-kumpens finanzjarju u l-kundizzjonijiet biex dan jitħallas;
·il-mekkaniżmi għall-implimentazzjoni tal-appoġġ settorjali.