IL-KUMMISSJONI EWROPEA

Brussell, 28.10.2020

COM(2020) 673 final

2020/0306(COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jistabbilixxi l-Ambjent ta’ Tieqa Unika tal-Unjoni Ewropea għad-Dwana u li jemenda r-Regolament (UE) Nru 952/2013

{SEC(2020) 360 final} - {SWD(2020) 237 final} - {SWD(2020) 238 final} - {SWD(2020) 239 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Ir-raġunijiet għall-proposta u l-objettivi tagħha

L-ambjent tal-kummerċ internazzjonali qed jevolvi kontinwament. Regoli ġodda qed jiġu imposti kontinwament biex jirregolaw il-moviment ta’ merkanzija bejn il-fruntieri u jiżguraw is-sikurezza u s-sigurtà. Il-Kodiċi Doganali tal-Unjoni 1 (KDU) jipprovdi l-bażi legali għal ambjent doganali modern u elettroniku. Skont l-Artikolu 3 tal-KDU, l-awtoritajiet doganali huma inkarigati li jiżguraw is-sigurtà u s-sikurezza tal-Unjoni Ewropea (UE) u r-residenti tagħha, u l-protezzjoni tal-ambjent b’kooperazzjoni mill-qrib ma’ awtoritajiet oħra fejn xieraq, filwaqt li jinżamm bilanċ bejn il-kontrolli doganali u l-faċilitazzjoni tal-kummerċ leġittimu. Dan ir-rwol tad-dwana jinkludi l-infurzar ta’ aktar minn 60 att legali mhux doganali tal-UE 2 fil-fruntieri esterni tal-UE relatati ma’ politiki speċifiċi applikati f’diversi oqsma, bħas-saħħa u s-sikurezza, il-protezzjoni tal-ambjent, is-sajd u l-agrikoltura, is-sorveljanza tas-suq u l-konformità tal-prodotti 3 u l-wirt kulturali, fost l-oħrajn. Dawn l-atti jimponu obbligi differenti għall-importazzjoni, l-esportazzjoni jew it-tranżitu tal-merkanzija l-aktar sensittivi li jaffettwaw madwar 39.7 miljun dikjarazzjoni doganali kull sena. Dawn jiġġeneraw obbligi onerużi ta’ rapportar għan-negozjanti li fil-biċċa l-kbira tal-każijiet jeħtieġu dokumenti addizzjonali minbarra d-dikjarazzjoni doganali.

F’dawn l-aħħar snin, l-inizjattivi “tieqa unika” kisbu momentum bħala mod ta’ simplifikazzjoni tal-proċess ta’ żdoganar għad-dħul fil-fruntieri fi ħdan u madwar l-UE. Il-kunċett ta’ tieqa unika jrid jinftiehem bħala soluzzjoni diġitali għall-iskambju ta’ informazzjoni elettronika bejn l-awtoritajiet tal-gvern differenti u bejn dawn tal-aħħar u l-operaturi ekonomiċi. Fl-2008, l-Istati Membri u l-Kummissjoni impenjaw ruħhom li jippromwovu ambjent doganali elettroniku fl-UE 4 billi jagħmlu ħilithom biex jistabbilixxu qafas ta’ servizzi ta’ tieqa unika. Id-Dikjarazzjoni ta’ Venezja tal-2014 5  ipproponiet pjan ta’ azzjoni progressiv biex jiġi implimentat Ambjent ta’ Tieqa Unika tal-UE għad-Dwana u biex jiġi żviluppat il-qafas legali tagħha. Dan kien imtenni fil-Komunikazzjoni tal-2016 mill-Kummissjoni dwar l-Iżvilupp tal-Unjoni Doganali tal-UE u l-Governanza tagħha 6  li ħabbret il-pjanijiet tal-Kummissjoni biex tesplora soluzzjoni fattibbli għall-iżvilupp u l-ħolqien ta’ Ambjent ta’ Tieqa Unika tal-UE għad-Dwana. L-approċċ kien appoġġjat mill-Konklużjonijiet tal-Kunsill ECOFIN tat-23 ta’ Mejju 2017 7 . L-Ewwel Rapport Biennali dwar il-Progress fl-Iżvilupp tal-Unjoni Doganali tal-UE u l-Governanza tagħha 8  ffoka wkoll fuq oqsma ta’ prijorità deskritti fil-Konklużjonijiet tal-Kunsill u ħabbar il-pjan tal-Kummissjoni li tkompli taħdem lejn Ambjent ta’ Tieqa Unika tal-UE għad-Dwana.

F’konformità ma’ dawn il-prijoritajiet, il-Kummissjoni nediet proġett pilota fl-2015, it-Tieqa Unika tal-UE għad-Dwana-Dokument Veterinarju Komuni għad-Dħul (CSW-CVED tal-UE). Il-proġett ġie amministrat b’mod konġunt mid-Direttorat Ġenerali għat-Tassazzjoni u l-Unjoni Doganali (DĠ TAXUD) u d-Direttorat Ġenerali għas-Saħħa u s-Sikurezza Alimentari (DĠ SANTE) biex jippermetti l-verifika awtomatizzata mid-dwana ta’ tliet formalitajiet regolatorji mhux doganali ppreżentati bid-dikjarazzjoni doganali bħala evidenza ta’ konformità. Inizjalment ħames amministrazzjonijiet doganali tal-Istati Membri pparteċipaw f’dan il-proġett pilota fuq bażi volontarja. Is-suċċessur tiegħu, is-Sistema ta’ Skambju ta’ Ċertifikati tat-Tieqa Unika tal-UE għad-Dwana (CSW-CERTEX tal-UE), espanda l-kamp ta' applikazzjoni tar-rekwiżiti regolatorji u introduċa funzjonalitajiet ġodda, bħalma huma l-ġestjoni tal-kwantità 9 . L-għadd ta’ Stati Membri parteċipanti żdied minn ħamsa għal disgħa, u qed jiġu koperti aktar oqsma ta’ politika.

Il-proġett pilota CSW-CERTEX tal-UE rnexxielu jindirizza l-ħtieġa li jiġi żgurat ambjent diġitali xieraq għall-partijiet kollha involuti fil-kummerċ internazzjonali. Billi pprovda soluzzjoni ċentralizzata, dan il-proġett pilota naqqas il-ħtieġa li l-Istati Membri parteċipanti jiżviluppaw is-soluzzjonijiet tagħhom stess, u b’hekk jiġġeneraw ekonomiji ta’ skala. Il-proċess awtomatizzat għall-verifika tal-konformità mar-rekwiżiti regolatorji mhux doganali kellu impatti pożittivi ħafna fuq l-operazzjonijiet tan-negozju, b’mod partikolari fuq it-tnaqqis tal-piżijiet amministrattivi, it-trattament ugwali tal-operaturi ekonomiċi u l-ġlieda kontra l-attivitajiet frodulenti. Minkejja s-suċċess tiegħu, il-benefiċċji mixtieqa tal-proġett pilota ma jistgħux jitwettqu mingħajr il-parteċipazzjoni tal-Istati Membri kollha. F’diversi Stati Membri mhux parteċipanti, l-awtoritajiet doganali u l-awtoritajiet kompetenti sħab ikomplu jaħdmu fuq bażi frammentata, u dan joħloq ostaklu sinifikanti għal proċess effiċjenti ta’ żdoganar tal-merkanzija. Din is-sitwazzjoni hija kkumplikata aktar minħabba l-inizjattivi nazzjonali emerġenti ta’ tieqa unika, li għadhom iżolati u huma kkaratterizzati minn modalitajiet differenti bbażati fuq il-livell tal-arkitettura doganali eżistenti tal-IT, il-prijoritajiet u l-istrutturi tal-ispejjeż. Il-problemi eżistenti x’aktarx li ma jitjibux mingħajr azzjoni mill-UE, l-aktar minħabba li r-rekwiżiti regolatorji kkonċernati jinvolvu l-moviment ta’ merkanzija bejn il-fruntieri u għalhekk iridu jiġu ssodisfati fil-livell tal-UE. 

Il-pandemija tal-COVID-19 enfasizzat aktar minn qatt qabel l-importanza li jiġi stabbilit qafas aktar b’saħħtu għall-Unjoni Doganali u li t-twettiq tal-formalitajiet doganali u mhux doganali tal-UE jiġu ffaċilitati aktar biex jiġi appoġġat l-irkupru ekonomiku. Għal dan il-għan, iż-żieda fid-diġitalizzazzjoni tal-formalitajiet regolatorji doganali u mhux doganali tal-Unjoni applikabbli għall-kummerċ internazzjonali tiftaħ opportunitajiet ġodda għall-Istati Membri biex itejbu l-kooperazzjoni diġitali. F’konformità mal-linji gwida politiċi tal-President von der Leyen 10 , din il-proposta se tistabbilixxi l-kundizzjonijiet xierqa għall-kollaborazzjoni diġitali bejn l-awtoritajiet doganali u l-awtoritajiet kompetenti sħab biex jimplimentaw kif xieraq l-aspetti esterni ta’ ħafna politiki tas-suq intern u biex inaqqsu l-piż amministrattiv tal-kummerċ. Aspett wieħed ta’ dan il-qafas ta’ kollaborazzjoni diġitali joħloq oneru għall-awtoritajiet regolatorji biex l-operaturi ekonomiċi jkunu jistgħu jippreżentaw f’punt uniku kemm id-data doganali kif ukoll dik mhux doganali tal-UE meħtieġa għall-iżdoganar tal-merkanzija. Dan se jwassal għal tnaqqis fid-duplikazzjoni, fil-ħin u fl-ispejjeż tal-konformità għall-operaturi ekonomiċi.

Din il-proposta hija l-ewwel pass fl-implimentazzjoni ta’ pjan ta’ azzjoni usa’ 11 mniedi f’Settembru 2020, f’konformità sħiħa mal-viżjoni fit-tul tal-Kummissjoni li l-Unjoni Doganali tasal għal-livell li jmiss. Approċċ bħal dan huwa mtenni wkoll fit-Tieni Rapport Biennali tal-2020 li jakkumpanja l-Komunikazzjoni tal-Kummissjoni lill-Parlament Ewropew, lill-Kunsill u lill-Kumitat Ekonomiku u Soċjali Ewropew biex l-Unjoni Doganali tittieħed fil-Livell li Jmiss: Pjan ta’ Azzjoni 12 .

Fl-indirizzar tal-problemi identifikati li jaffettwaw il-proċess tal-iżdoganar tal-merkanzija (b’mod partikolari koordinazzjoni insuffiċjenti u interoperabbiltà frammentata bejn l-awtoritajiet kompetenti doganali u sħab), il-proposta se ssegwi tliet objettivi speċifiċi:

1.tiddefinixxi qafas ta’ governanza għal kooperazzjoni msaħħa bejn l-awtoritajiet kompetenti doganali u sħab u tiżviluppa soluzzjonijiet interoperabbli 13 fejn ikun ta’ benefiċċju u xieraq;

2.ittejjeb il-prattiki ta’ ħidma bejn l-awtoritajiet regolatorji involuti fil-kummerċ internazzjonali biex jippermettu proċessi aktar awtomatizzati, elettroniċi u integrati biex jittrattaw l-iżdoganar tal-merkanzija; u

3.tiddetermina qafas ta’ armonizzazzjoni tad-data u tippermetti l-użu mill-ġdid ta’ data biex jitwettqu l-formalitajiet differenti meħtieġa mill-awtoritajiet doganali u dawk mhux doganali għall-kummerċ internazzjonali.

Dawn l-objettivi se jintlaħqu bil-bini fuq il-proġett pilota eżistenti, CSW-CERTEX tal-UE, żviluppat mid-DĠ TAXUD, u l-użu tiegħu jsir obbligatorju fl-Istati Membri kollha billi tiġi stabbilita bażi ġuridika. Dan se jiffaċilita l-kondiviżjoni tal-informazzjoni u jiżviluppa qafas għall-kooperazzjoni diġitali bejn l-awtoritajiet kompetenti doganali u sħab dwar għadd ta’ formalitajiet regolatorji li għalihom id-data meħtieġa għall-iżdoganar tal-merkanzija hija pprovduta mill-awtoritajiet kompetenti sħab rilevanti kollha fis-sistemi elettroniċi tal-UE. Il-konnessjonijiet bejn is-CSW-CERTEX tal-UE u s-sistemi elettroniċi futuri tal-UE li jimmaniġġjaw il-formalitajiet mhux doganali se jiġu stabbiliti progressivament ladarba l-leġiżlazzjoni mhux doganali rispettiva tal-UE u l-aspetti operazzjonali jkunu fis-seħħ. L-ambjent regolatorju tal-UE integrat bis-sħiħ iwassal benefiċċji fit-tul lill-UE f’oqsma multipli.

•Konsistenza mad-dispożizzjonijiet ta’ politika eżistenti fil-qasam tal-politika

Din il-proposta hija konsistenti mal-għan tal-KDU li jistabbilixxi ambjent doganali modern u elettroniku u li jippromwovi l-kooperazzjoni diġitali bejn id-dwana u l-awtoritajiet governattivi differenti fl-oqsma kollha tal-politika. Tikkomplementa wkoll il-proġetti estensivi tad-dwana elettronika deskritti fil-Programm ta’ Ħidma tal-KDU 14 , u hija konformi mal-Pjan Strateġiku Pluriennali għad-Dwana elettronika (MASP-C), li jiżgura l-ippjanar operazzjonali u l-iskeda ta’ żmien tal-implimentazzjoni tal-proġetti kollha tal-IT tad-Dwana elettronika. 

L-aktar inizjattiva rilevanti tal-UE f’dan il-qasam, is-CSW-CERTEX tal-UE, hija biss volontarja u l-ambitu tagħha huwa limitat. Il-proposta se tibni fuq din is-soluzzjoni pilota eżistenti u tagħmilha obbligatorja għall-Istati Membri kollha li jiskambjaw id-data dwar għadd ta’ formalitajiet regolatorji li għalihom l-Istati Membri kollha jipprovdu l-informazzjoni rilevanti dwar l-iżdoganar fis-sistemi elettroniċi tal-UE. Il-benefiċċji mixtieqa ta’ dan il-proġett f’termini ta’ kisbiet fl-effiċjenza, infurzar u tnaqqis ta’ frodi u żbalji se jitwettqu biss jekk jipparteċipaw l-Istati Membri kollha.

•Konsistenza ma’ politiki oħrajn tal-Unjoni

Il-firxa tal-inizjattiva, li titratta l-kummerċ internazzjonali u hija ffukata fuq id-dwana u firxa wiesgħa ta’ formalitajiet regolatorji mhux doganali meħtieġa għall-importazzjoni, l-esportazzjoni jew it-tranżitu tal-merkanzija, tagħmel l-allinjament tagħha ma’ politiki oħra tal-UE partikolarment importanti. Kif spjegat fl-ewwel taqsima, il-politika tal-UE ta’ livell għoli timmira li tistabbilixxi Ambjent ta’ Tieqa Unika tal-UE għad-Dwana f’konformità mal-aġenda usa’ tal-Kummissjoni biex iżżid id-diġitalizzazzjoni u tissimplifika l-proċessi tal-iżdoganar. F’dan il-qafas, l-Ambjent ta’ Tieqa Unika tal-UE għad-Dwana jsegwi l-objettivi tal-Pjan ta’ Azzjoni tal-UE dwar il-Gvern elettroniku 2016-2020 15 , li jfittex li jżid l-effiċjenza tas-servizzi pubbliċi billi jneħħi l-ostakli diġitali eżistenti, inaqqas il-piżijiet amministrattivi u jtejjeb il-kwalità tal-interazzjonijiet bejn l-amministrazzjonijiet nazzjonali. L-inizjattiva hija wkoll konsistenti mad-Dikjarazzjoni ta’ Tallinn 16 , li tistabbilixxi objettivi dwar l-interazzjonijiet diġitali b’mod awtomatiku bejn il-pubbliku ġenerali u n-negozji u l-prinċipji ta’ darba biss u interoperabbli 17 b’mod awtomatiku. Żvilupp sinifikanti f’dan ir-rigward kien ir-Regolament eIDAS 18 , li stabbilixxa struttura legali ġdida għall-identifikazzjoni elettronika, il-firem, is-siġilli u d-dokumenti fl-UE kollha.

Qed jiġu stabbiliti inizjattivi relatati addizzjonali fil-livell tal-UE fir-rigwards tal-massimizzazzjoni tal-potenzjal ta’ tkabbir tal-ekonomija diġitali f’konformità mal-viżjoni usa’ tal-Komunikazzjoni tal-Kummissjoni msejħa “Insawru l-futur diġitali tal-Ewropa” 19 biex jiġu promossi t-trasformazzjoni diġitali u l-interoperabbiltà tal-amministrazzjonijiet pubbliċi madwar l-Ewropa. Pereżempju, ir-Regolament ta’ Implimentazzjoni dwar is-sistema tal-ġestjoni tal-informazzjoni għall-kontrolli uffiċjali 20 jsemmi b’mod speċifiku l-Ambjent ta’ Tieqa Unika tal-UE għad-Dwana bħala l-qafas xieraq għall-kooperazzjoni u l-kondiviżjoni mingħajr xkiel tal-informazzjoni bejn l-awtoritajiet doganali u tal-gvern responsabbli għaċ-ċertifikazzjoni tal-konformità mar-rekwiżiti regolatorji applikabbli għall-qasam ta’ politika tas-saħħa tal-bniedem, tal-annimali u tal-pjanti. Atti legali oħra jindirizzaw l-Ambjent ta’ Tieqa Unika tal-UE għad-Dwana bħala interfaċċja possibbli bejn is-sistemi tal-IT eżistenti. B’mod partikolari, ir-Regolament (UE) 2019/1020 dwar is-sorveljanza tas-suq u l-konformità tal-prodotti 21  jirreferi għall-użu volontarju tal-Ambjent ta’ Tieqa Unika tal-UE għad-Dwana għall-iskambju ta’ data bejn l-awtoritajiet doganali u dawk tas-sorveljanza tas-suq matul il-proċess tal-iżdoganar tal-merkanzija. Dawn l-iskambji jaqgħu barra mill-ambitu ta’ dan il-proġett, li jkopri l-użu obbligatorju tas-CSW-CERTEX tal-UE mill-Istati Membri kollha.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

Il-bażi ġuridika biex taġixxi l-UE hija pprovduta bl-Artikoli 33, 114 u 207 tat-Trattat dwar il-Funzjonament tal-Unjoni Ewropea 22  (TFUE). L-Artikoli 33 u 114 tat-TFUE jagħtu lill-Parlament Ewropew u lill-Kunsill id-dritt li jieħdu miżuri biex isaħħu l-kooperazzjoni doganali bejn l-Istati Membri u bejn dawn tal-aħħar u l-Kummissjoni biex jiżguraw il-funzjonament tajjeb tas-suq intern. B’mod partikolari, din il-proposta tfittex li tiżgura l-implimentazzjoni xierqa tal-aspetti esterni ta’ firxa wiesgħa ta’ politiki tas-suq intern. L-Artikolu 207 tat-TFUE jibni fuq il-premessa li l-kamp ta' applikazzjoni tal-inizjattiva jestendi lil hinn mill-kooperazzjoni bejn l-awtoritajiet doganali biex jinkludi l-faċilitazzjoni tal-kummerċ u l-protezzjoni kontra l-kummerċ illeċitu bħala aspett importanti tal-politika kummerċjali. Dawn it-tliet artikoli tat-TFUE jikkostitwixxu wkoll il-bażi legali għall-KDU, li hija emendata permezz ta’ dan l-att.

•Sussidjarjetà (għal kompetenza mhux esklużiva)

L-istruttura regolatorja kumplessa u l-introduzzjoni kontinwa ta’ regoli ġodda li jirregolaw ir-rekwiżiti regolatorji għall-iżdoganar tal-merkanzija wasslu għal koordinazzjoni insuffiċjenti u interoperabbiltà frammentata bejn id-dwana u l-awtoritajiet kompetenti responsabbli minn dawn ir-rekwiżiti. Dan jikkonċerna mhux biss l-Unjoni Doganali, iżda wkoll is-suq intern f’firxa ta’ oqsma ta’ politika relatati ma’ operazzjonijiet transfruntiera regolati mid-dritt tal-UE. Dawn il-problemi transnazzjonali b’mod inerenti se jillimitaw il-benefiċċji tad-diġitalizzazzjoni u l-modernizzazzjoni gradwali tal-proċessi relatati mal-iżdoganar ta’ merkanzija speċifika soġġetta għar-rekwiżiti regolatorji mhux doganali tal-UE f’diversi oqsma ta’ politika. Barra minn hekk, l-inizjattivi nazzjonali se jkunu ftit minħabba l-limitazzjonijiet tar-riżorsi, filwaqt li s-soluzzjoni pilota volontarja, CSW-CERTEX tal-UE, se titlef il-momentum jekk ma tiġix segwita minn azzjoni obbligatorja. Għalhekk, l-UE tinsab f’pożizzjoni tajba biex twettaq azzjoni ta’ koordinazzjoni, tnaqqas il-frammentazzjoni u tiġġenera ekonomiji ta’ skala, b’mod partikolari minħabba r-responsabbiltà tagħha għall-Unjoni Doganali u l-applikazzjoni effettiva tar-regoli fis-suq intern.

L-objettivi tal-proposta jistgħu jintlaħqu aħjar fil-livell tal-UE għal bosta raġunijiet. Soluzzjoni ċentralizzata (CSW-CERTEX tal-UE) biex jiġu ffaċilitati l-kooperazzjoni diġitali u l-iskambji ta’ informazzjoni bejn ambjenti nazzjonali ta’ tieqa unika għad-dwana u sistemi mhux doganali tal-Unjoni, flimkien maż-żieda fid-diġitalizzazzjoni tal-formalitajiet mhux doganali tal-Unjoni, se jrendu oqsma doganali u mhux doganali interoperabbli, inaqqsu l-piżijiet amministrattivi għall-partijiet ikkonċernati milquta kollha u jiġġeneraw ekonomiji ta’ skala sostanzjali. L-azzjoni tal-UE hija mistennija wkoll li tagħti benefiċċji diretti lill-formalitajiet regolatorji fejn il-kwantitajiet ta’ merkanzija awtorizzata jistgħu jinqasmu f’dikjarazzjonijiet doganali multipli permezz tal-introduzzjoni ta’ ġestjoni awtomatizzata tal-kwantità fil-livell tal-UE.

L-azzjoni tal-UE f’dan il-qasam se ttejjeb ukoll il-funzjonament tas-suq intern billi ttejjeb u tarmonizza l-infurzar doganali tar-rekwiżiti mhux doganali tal-UE imposti fuq il-kummerċ internazzjonali tal-merkanzija. Dan iġib valur miżjud ċar għall-interazzjoni bejn l-awtoritajiet kompetenti doganali u sħab u l-operaturi ekonomiċi. Fl-aħħar mill-aħħar, l-intervent tal-UE se jiġġenera impatti ekonomiċi pożittivi permezz ta’ aktar effiċjenza u faċilitazzjoni tal-kummerċ, u benefiċċji soċjali u ambjentali minħabba koordinazzjoni mtejba u l-ġestjoni tar-riskju fil-fruntiera. Dan se jwassal għal konformità u infurzar aħjar tar-rekwiżiti mhux doganali tal-UE mfassla biex jipproteġu s-saħħa u s-sikurezza pubblika u se jtejjeb is-sigurtà u jipproteġi l-benesseri tal-annimali u l-ambjent madwar l-UE.

•Proporzjonalità

F’konformità mal-prinċipju tal-proporzjonalità, l-kamp ta' applikazzjoni ta’ din il-proposta huwa limitat għal formalitajiet regolatorji mhux doganali stipulati fil-leġiżlazzjoni tal-UE li għalihom hemm fis-seħħ sistema elettronika tal-UE biex tinħażen l-informazzjoni rilevanti meħtieġa mid-dwana biex tiġi vverifikata l-konformità mal-miżuri rispettivi. L-interkonnessjoni ta’ dawn is-sistemi mal-ambjenti nazzjonali ta’ tieqa unika għad-dwana permezz tas-CSW-CERTEX tal-UE u l-iskambji ta’ informazzjoni diġitali stabbiliti fil-proposta huma meħtieġa biex jittejjeb u jiġi żgurat infurzar konsistenti ta’ dawn il-formalitajiet regolatorji madwar l-UE. Dan huwa partikolarment il-każ meta l-leġiżlazzjoni tippermetti li l-kwantitajiet awtorizzati ta’ merkanzija jinqasmu f’dikjarazzjonijiet doganali multipli li jistgħu jiġu ppreżentati madwar l-UE, jew tipprojbixxi l-importazzjonijiet jew l-esportazzjonijiet ta’ merkanzija soġġetta għall-kwoti wara li jintlaħaq ċertu limitu. Filwaqt li l-awtoritajiet doganali jeħtieġ li jivverifikaw il-kwantitajiet użati fl-iżdoganar tal-kunsinni preċedenti, il-kontrolli manwali jieħdu ħafna ħin u mhumiex preċiżi biżżejjed. Dawn il-problemi ma jistgħux jitjiebu mingħajr azzjoni ġdida tal-UE, parzjalment minħabba li huma relatati mal-formalitajiet tal-UE. Barra minn hekk, ir-regoli previsti f’din il-proposta għall-armonizzazzjoni tal-ambjenti nazzjonali ta’ tieqa unika għad-dwana huma meħtieġa biex jinkisbu kundizzjonijiet ekwi għall-operaturi ekonomiċi fit-twettiq tar-rekwiżiti regolatorji kkonċernati. Kif sab id-Dokument ta’ Ħidma tal-Persunal dwar ir-rapport tal-Valutazzjoni tal-Impatt, l-ispejjeż relatati mal-miżuri proposti huma proporzjonati mal-objettivi ta’ politika li jridu jintlaħqu.

•L-għażla tal-istrument

L-għażla tal-istrument hija Regolament tal-Parlament Ewropew u tal-Kunsill biex tiġi żgurata l-applikazzjoni uniformi tal-konformità regolatorja madwar l-UE.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet/Kontrolli tal-idoneità ex post tal-leġiżlazzjoni eżistenti

Mhux applikabbli

•Konsultazzjonijiet mal-partijiet ikkonċernati

Ir-rispons inġabar mill-partijiet ikkonċernati li ġejjin:

•L-awtoritajiet doganali tal-Istati Membri;

•L-awtoritajiet kompetenti sħab (jiġifieri l-Kummissjoni u l-awtoritajiet jew l-aġenziji kompetenti sħab tal-Istati Membri) li jiddependu fuq id-dwana biex tikkontrolla jew timplimenta l-politiki tagħhom fil-fruntiera. Dawn jinkludu awtoritajiet veterinarji, sanitarji, fitosanitarji, agrikoli u tas-sajd, ambjentali u farmaċewtiċi;

•L-operaturi ekonomiċi li jittrattaw il-moviment transfruntier tal-merkanzija, kemm jekk bħala kumpaniji individwali kif ukoll jekk rappreżentati minn assoċjazzjonijiet nazzjonali, Ewropej u/jew internazzjonali tal-kummerċ u tan-negozju, inklużi manifatturi, negozji importaturi/esportaturi, kumpaniji tat-trasport bil-baħar u tat-trasport, operaturi tal-port u tal-ajruport, eċċ.;

•Organizzazzjonijiet internazzjonali tal-kummerċ u tad-dwana bħall-Kummissjoni Ekonomika għall-Ewropa tan-Nazzjonijiet Uniti (UNECE), l-Organizzazzjoni Dinjija Doganali (WCO) u l-Organizzazzjoni Dinjija tal-Kummerċ (WTO);

•Gruppi oħra interessati bħal akkademiċi/riċerkaturi, konsulenti professjonali u l-pubbliku ġenerali.

Twettqu attivitajiet estensivi ta’ konsultazzjoni pubblika u mmirata, bid-data tiddaħħal fir-rapport tal-valutazzjoni tal-impatt. Il-konsultazzjoni pubblika tnediet fid-9 ta’ Ottubru 2018 u damet sas-17 ta’ Jannar 2019. Il-kwestjonarju kien disponibbli onlajn fil-lingwi uffiċjali kollha tal-UE 23 , li kien jikkonsisti f’24 mistoqsija li ffukaw fuq il-profili ta’ dawk li wieġbu, l-esperjenzi ta’ operazzjonijiet transfruntiera, u l-opinjoni dwar miżuri potenzjali ta’ politika. Is-sommarju tal-konsultazzjoni ġie ppubblikat fuq is-sit web Europa 24 . Il-konsultazzjoni wriet qbil mifrux dwar l-eżistenza u s-serjetà tal-problemi identifikati u laqgħet il-possibbiltà ta’ azzjoni tal-UE biex dawn jiġu indirizzati. B’kollox, waslu 371 tweġiba valida, li ħafna minnhom irrappreżentaw in-negozji. L-objettivi potenzjali ta’ inizjattiva ġdida kienu kkunsidrati importanti minn aktar minn 90 % ta’ dawk li wieġbu. Il-bidliet kollha proposti li rriżultaw minn azzjoni ġdida tal-UE kienu mistennija li jkollhom impatti pożittivi ħafna fuq l-operazzjonijiet tan-negozju, b’mod partikolari fuq it-tnaqqis tal-piżijiet amministrattivi, it-trattament ugwali tal-operaturi ekonomiċi u l-ġlieda kontra l-attivitajiet frodulenti.

Ħafna mill-ġbir tad-data sar fil-qafas tal-grupp ta’ proġett Dwana 2020 biex jiġi studjat qafas possibbli għall-iżvilupp ta’ Ambjent ta’ Tieqa Unika tal-UE għad-Dwana inkluż il-kuntest legali. Imniedi f’Diċembru 2016, il-grupp tal-proġett kompla jiltaqa’ regolarment sa Ġunju 2019, u għaqqad flimkien l-għarfien espert tad-delegati tad-dwana u tal-IT minn 19-il amministrazzjoni tal-Istati Membri u sitt rappreżentanti tal-assoċjazzjonijiet kummerċjali. Prinċipalment, il-grupp tal-proġetti analizza u ddiskuta kwistjonijiet u xejriet relatati mal-kunċett ta’ tieqa unika fil-livell tal-UE u dak nazzjonali biex jivvaluta d-differenza bejn is-sitwazzjoni attwali li qed jiffaċċjaw l-amministrazzjonijiet u l-operaturi ekonomiċi u l-prospetti tagħha għall-futur. Fost ir-riżultati tiegħu, il-grupp tal-proġett ikkollabora mill-qrib biex jiżviluppa d-definizzjoni tal-problema u l-objettivi tal-politika u l-għażliet tal-politika li ttieħdu bħala parti mir-rapport tal-valutazzjoni tal-impatt.

Inġabret ukoll data addizzjonali f’seminar ta’ livell għoli dwar l-Ambjent ta’ Tieqa Unika tal-UE għad-Dwana ospitat mill-Presidenza Rumena f’Mejju 2019 bil-parteċipazzjoni ta’ amministrazzjoni għolja mill-amministrazzjonijiet doganali nazzjonali, il-pajjiżi kandidati, rappreżentanti ta’ assoċjazzjonijiet kummerċjali u kelliema ewlenin mill-organizzazzjonijiet tad-Dwana u l-Protezzjoni tal-Fruntieri tal-Istati Uniti u organizzazzjonijiet internazzjonali. Saru serje ta’ workshops biex tiġi indirizzata r-rilevanza tal-għażliet ta’ politika fil-kuntest ta’ gvern għal gvern u negozju għal gvern, bi stħarriġ informali mwettaq biex tinkiseb reazzjoni dwar l-għażliet ta’ politika identifikati.

•Ġbir u użu ta’ għarfien espert

L-attivitajiet ta’ konsultazzjoni ppermettew il-ġbir kemm ta’ data kwalitattiva kif ukoll ta’ data kwantitattiva, li ġew ipproċessati u analizzati sistematikament bl-użu ta’ tekniki xierqa. Id-data kwalitattiva (inkluż it-tweġibiet għall-intervisti) ġiet riveduta u analizzata minn angoli differenti u ppreżentata fil-forma narrattiva. Id-data kwantitattiva (inkluż it-tweġibiet tal-istħarriġ u ċ-ċifri pprovduti mill-partijiet ikkonċernati) ġiet ipproċessata bl-użu tal-Excel, u analizzata bl-użu ta’ metodi statistiċi bħall-għadd tal-frekwenza, it-tabulazzjonijiet trasversali u x-xejriet sempliċi. Ir-riżultati kienu ppreżentati bħala tabelli, ċarts u graffs.

•Valutazzjoni tal-impatt

Ġie ppreparat rapport tal-valutazzjoni tal-impatt 25  biex jinforma d-deċiżjoni tal-Kummissjoni dwar l-għażla ta’ politika preferuta għall-proposta u jappoġġja l-implimentazzjoni tagħha. Grupp ta’ tmexxija bejn is-servizzi li fih ipparteċipaw id-Direttorati Ġenerali (DĠ) rilevanti tal-Kummissjoni, appoġġja l-ħidma preparatorja. Id-Direttorat Ġenerali responsabbli għat-Tassazzjoni u l-Unjoni Doganali ppreżenta l-valutazzjoni tal-impatt għall-valutazzjoni tal-kwalità lill-Bord tal-Iskrutinju Regolatorju (RSB) fit-13 ta’ Marzu 2020. Wara l-laqgħa tad-29 ta’ April 2020, l-RSB ħareġ opinjoni negattiva fil-5 ta’ Mejju 2020, li tissuġġerixxi bosta oqsma għal aktar titjib. Dawn inkludew aktar artikolazzjoni tal-viżjoni tal-inizjattiva, l-iżvilupp ta’ analiżi aktar kompluta tal-għażliet ta’ politika (speċjalment għal bażijiet ta’ data nazzjonali ċentralizzati), li tipprovdi ġustifikazzjoni għall-għażla skartata li tkopri punt ta’ dħul uniku fil-livell tal-UE għall-formalitajiet regolatorji kollha, u li tispjega kif il-kriterji tal-ġudizzju ġew ippeżati mal-analiżi tal-impatt. Ir-rapport rivedut ġie sottomess mill-ġdid fit-18 ta’ Ġunju 2020 u l-RSB ħareġ opinjoni pożittiva fil-15 ta’ Lulju 2020. Ir-rakkomandazzjonijiet finali għat-titjib inkludew aktar indirizzar tal-inċertezzi potenzjali fir-riżultati tal-analiżi tal-benefiċċju nett u l-integrazzjoni tal-fehmiet tal-gruppi tal-partijiet ikkonċernati dwar l-għażliet vijabbli fil-kriterji tal-valutazzjoni.

Il-valutazzjoni tal-impatt hija bbażata fuq evidenza minn firxa wiesgħa ta’ sorsi, li ġiet analizzata bl-użu tal-metodi tas-soltu għar-riċerka soċjali u ekonomika. Ġew identifikati tmien għażliet ta’ politika, li jaqgħu fi tliet kategoriji wiesgħa, li jistgħu jiġu ppakkjati biex jiffurmaw għażla ta’ politika:

• Kategorija I (għażliet 1-4; kombinazzjoni ta’ għażliet possibbli): għażliet għal gvern għal gvern biex jiffaċilitaw il-kondiviżjoni tal-informazzjoni u l-kooperazzjoni diġitali bejn l-awtoritajiet kompetenti tad-dwana u s-sħab. Kull għażla għandha kamp ta' applikazzjoni differenti. Għażla 1 tagħmel is-CSW-CERTEX tal-UE obbligatorju u tkopri r-rekwiżiti regolatorji tal-UE li għalihom l-informazzjoni rilevanti relatata mad-dwana hija disponibbli fil-livell tal-UE għall-Istati Membri kollha, u tipprovdi funzjonalità awtomatizzata tal-ġestjoni tal-kwantità. Għażla 2 tkopri r-rekwiżiti regolatorji tal-UE li għalihom l-informazzjoni hija disponibbli fil-livell nazzjonali. Għażla 3 tkopri r-rekwiżiti regolatorji nazzjonali, u Għażla 4 id-dokumenti tal-pajjiżi terzi.

• Kategorija II (għażliet 5-7; hija possibbli għażla waħda biss): għażliet għal negozju għal gvern, kooperazzjoni mmirata lejn it-titjib tal-interazzjonijiet tal-operaturi ekonomiċi mal-awtoritajiet. Għażla 5 tistabbilixxi portal komuni għall-ġestjoni tal-formalitajiet mhux doganali tal-Unjoni. Għażla 6 tistabbilixxi twieqi uniċi fil-livell nazzjonali biex jipprovdu lill-operaturi ekonomiċi b’punti ta’ dħul uniku armonizzati biex iwettqu l-formalitajiet doganali u mhux doganali. Għażla 7 tistabbilixxi punt ta’ dħul uniku fil-livell tal-UE biex jiġu ssodisfati r-rekwiżiti doganali u mhux doganali.

• Kategorija III (għażla 8): għażla trasversali biex jiġi ssimplifikat il-mod kif l-awtoritajiet kompetenti tad-dwana u tas-sħab jidentifikaw l-operaturi ekonomiċi. Din tkun tiddependi fuq l-użu estiż tas-sistema eżistenti tar-Reġistrazzjoni u tal-Identifikazzjoni tal-Operaturi Ekonomiċi (EORI), jew għar-reġistrazzjoni u l-validazzjoni (8i) jew biss għall-validazzjoni (8ii).

L-Għażliet 1, 2, 6, 7 u 8(ii) inżammu għal analiżi fil-fond abbażi ta’ eżerċizzju ta’ skrinjar. L-analiżi tal-impatt identifikat impatti ta’ natura simili għall-għażliet kollha. L-impatti ekonomiċi diretti jkunu jikkonsistu f’implimentazzjoni ta’ darba u spejjeż rikorrenti, u ffrankar minn piżijiet amministrattivi mnaqqsa għall-partijiet ikkonċernati milquta kollha. It-tisħiħ tal-kooperazzjoni u l-iffaċilitar tal-kondiviżjoni tal-informazzjoni bejn l-awtoritajiet responsabbli għall-iżdoganar tal-merkanzija jippermettu wkoll titjib fil-proċessi tal-ġestjoni tar-riskju u jnaqqsu l-każijiet ta’ frodi u żbalji umani. Dan imbagħad jiġġenera konformità u infurzar aħjar tal-leġiżlazzjoni mhux doganali, u benefiċċji soċjali u ambjentali relatati.

Il-pakketti differenti ta’ għażliet tqabblu f’termini ta’ effikaċja (jiġifieri l-infurzar tar-rekwiżiti regolatorji rilevanti u l-faċilitazzjoni tal-kummerċ), l-effiċjenza, il-koerenza ma’ politiki oħra u l-proporzjonalità biex tiġi identifikata l-għażla ppreferuta. Dan wera li l-akbar benefiċċji nkisbu minn pakketti li jinkludu kemm l-għażliet tal-Kategorija I kif ukoll tal-Kategorija II, filwaqt li l-Għażla 8(ii) iżżid b’mod inkrementali ma’ kwalunkwe pakkett. L-Għażliet 1 u 6 instabu li kienu kosteffettivi, koerenti u proporzjonati, filwaqt li l-Għażliet 2 u (speċjalment) 7 kienu problematiċi f’dawn l-aspetti minħabba l-kumplessità u l-ispejjeż għoljin tagħhom. Il-pakkett preferut huwa għalhekk l-Għażliet 1+6+8(ii).

•Idoneità regolatorja u simplifikazzjoni

Mhux applikabbli

•Id-drittijiet fundamentali

L-implimentazzjoni armonizzata tal-leġiżlazzjoni tal-UE fil-qasam tal-konformità regolatorja se tgħin biex tiggarantixxi t-trattament ugwali tal-operaturi ekonomiċi madwar l-UE, filwaqt li ttejjeb it-trasparenza tal-attivitajiet doganali rilevanti. Il-formalitajiet doganali fihom kemm data personali kif ukoll data kummerċjalment sensittiva. Kwalunkwe rekwiżit ta’ data kummerċjali u teknika taħt l-inizjattiva se jiżgura kopertura wiesgħa tal-ipproċessar ta’ data personali bħala dritt fundamentali tal-bniedem skont ir-Regolament (UE) 2016/679 26 u r-Regolament (UE) 2018/1725 27 .

4.IMPLIKAZZJONIJIET BAĠITARJI

Ir-riżorsi finanzjarji u umani meħtieġa huma inklużi fid-dikjarazzjoni finanzjarja mehmuża.

5.ELEMENTI OĦRAJN

•Il-pjanijiet għall-implimentazzjoni u l-arranġamenti għall-monitoraġġ, l-evalwazzjoni u r-rapportar

Il-Kummissjoni se tiżgura li jkun hemm arranġamenti fis-seħħ biex jimmonitorjaw u jevalwaw il-funzjonament ta' Ambjent ta’ Tieqa Unika tal-UE għad-Dwana. Il-monitoraġġ regolari se jiddependi kemm jista’ jkun fuq sorsi fil-livell tal-UE, bħal rapporti diżaggregati dwar il-prestazzjoni tal-Unjoni Doganali u r-riżultati u l-istatistika tan-negozju u tal-IT tas-CSW-CERTEX tal-UE. L-amministrazzjonijiet doganali nazzjonali se jiġu kkonsultati biex jiġi ddeterminat jekk u sa liema punt se jkun possibbli wkoll li jintużaw sorsi oħra.

Sal-31 ta’ Diċembru 2027 u kull tliet snin wara dan, il-Kummissjoni jenħtieġ li tippreżenta lill-Parlament Ewropew u lill-Kunsill rapport dwar il-funzjonament tal-Ambjent ta’ Tieqa Unika tal-UE għad-Dwana, inkluża evalwazzjoni ġenerali tas-sistema CSW-CERTEX tal-UE. Minħabba li xi elementi tal-kooperazzjoni diġitali mhux se jkunu applikabbli bis-sħiħ fiż-żmien tal-ewwel evalwazzjoni, l-enfasi se tkun li jiġi evalwat il-progress, jiġu identifikati oqsma għal titjib u jiġu proposti rakkomandazzjonijiet għall-futur. It-tieni evalwazzjoni se tieħu approċċ aktar kumulattiv. Il-Kummissjoni se tevalwa l-funzjonament tal-Ambjent ta’ Tieqa Unika tal-UE għad-Dwana fid-dawl tal-kollaborazzjoni diġitali mtejba bejn id-dwana u l-awtoritajiet kompetenti sħab involuti fl-iżdoganar tal-merkanzija, biex tiżgura proċessi simplifikati għall-operaturi ekonomiċi u l-infurzar effiċjenti tal-formalitajiet mhux doganali tal-UE. 

L-indikaturi tal-monitoraġġ huma mistennija li jinġabru fejn possibbli fuq bażi kontinwa mis-sistema CSW-CERTEX tal-UE. Għall-finijiet ta’ evalwazzjoni, l-istatistika annwali se tkun ikkumpilata u mqabbla bejn is-snin suċċessivi. Fejn ikun possibbli, jista’ jintuża paragun mas-sitwazzjoni ta’ referenza kkunsidrata bħala x-xejra jew il-medja tat-tliet snin li jippreċedu d-dħul fl-applikazzjoni.

•Spjegazzjoni dettaljata tad-dispożizzjonijiet speċifiċi tal-proposta

Il-proposta għal Regolament għandha l-istruttura li ġejja:

Kapitolu I - Dispożizzjonijiet Ġenerali

Il-Kapitolu I jistabbilixxi d-dispożizzjonijiet ġenerali għal dan ir-Regolament, inkluż is-suġġett tiegħu u d-definizzjonijiet tat-termini ewlenin. Dan jistabbilixxi l-Ambjent ta’ Tieqa Unika tal-UE għad-Dwana bħala sett integrat ta’ servizzi elettroniċi interoperabbli pprovduti fil-livell tal-UE u dak nazzjonali. Dawn is-servizzi huma maħsuba biex jgħinu fit-twettiq u l-infurzar tal-formalitajiet mhux doganali tal-Unjoni meħtieġa għat-tqegħid tal-merkanzija taħt proċedura doganali partikolari sabiex jiffaċilitaw il-kummerċ u jipproteġu aktar lill-Unjoni. L-objettivi ġenerali u speċifiċi tal-proposta leġiżlattiva jiddefinixxu l-ambitu tal-Ambjent ta’ Tieqa Unika tal-UE għad-Dwana u jistabbilixxu l-kuntest għar-regolazzjoni tas-servizzi elettroniċi li se jiżguraw il-funzjonament preċiż u effiċjenti tagħha.

B’mod aktar konkret, dan jinvolvi: 1) il-ħolqien ta’ sistema ċentrali tal-UE għall-interkonnessjoni tal-ambjenti nazzjonali ta’ tieqa unika għad-dwana u s-sistemi mhux doganali tal-UE, li tippermetti l-kooperazzjoni diġitali bejn l-awtoritajiet regolatorji involuti fl-iżdoganar tal-merkanzija, 2) l-armonizzazzjoni tal-ambjenti nazzjonali ta’ tieqa unika għad-dwana u l-funzjonalitajiet tagħhom, u 3) l-istabbiliment ta’ regoli speċifiċi għall-kooperazzjoni amministrattiva diġitali.

Kapitolu II - Sistema ta’ Skambju ta’ Ċertifikati tat-Tieqa Unika tal-UE għad-Dwana (CSW-CERTEX TAL-UE)

Il-Kapitolu II jistabbilixxi d-dispożizzjonijiet għas-Sistema ċentrali ta’ Skambju ta’ Ċertifikati tat-Tieqa Unika tal-UE għad-Dwana (CSW-CERTEX tal-UE). Dan jipprevedi li s-CSW-CERTEX tal-UE tiġi stabbilita bħala interfaċċja f’ħin reali bejn l-ambjenti nazzjonali ta’ tieqa unika għad-dwana u s-sistemi mhux doganali tal-UE.

Is-CSW-CERTEX tal-UE se tiġi żviluppata u miżmuma flimkien mill-Kummissjoni u l-Istati Membri. Din se tkopri l-formalitajiet mhux doganali tal-UE diġitalizzati fil-livell tal-UE, li għalihom l-informazzjoni rilevanti meħtieġa mid-dwana għall-iżdoganar hija pprovduta mill-awtoritajiet kompetenti sħab kollha f’sistema tal-UE. Dawn il-formalitajiet huma speċifikati fl-Anness 28 tar-Regolament u jistgħu jiġu emendati permezz ta’ atti delegati. Il-Kummissjoni se tgħaqqad is-CSW-CERTEX tal-UE mas-sistemi rispettivi mhux doganali tal-UE, u l-Istati Membri se jqabbduha mal-ambjenti nazzjonali ta’ tieqa unika għad-dwana.

Id-data personali skambjata bejn l-ambjent nazzjonali ta’ tieqa unika għad-dwana u s-sistemi mhux doganali tal-UE se tiġi pproċessata fis-CSW-CERTEX tal-UE mingħajr ma tinħażen. Dan l-ipproċessar se jsir għal żewġ għanijiet prinċipali: biex tiġi ffaċilitata l-kondiviżjoni tal-informazzjoni bejn is-sistemi nazzjonali għad-dwana u s-sistemi mhux doganali tal-UE, u biex issir trasformazzjoni tad-data, fejn meħtieġ, biex il-proċessi jitmexxew bla xkiel bejn l-oqsma diġitali doganali u dawk mhux doganali. Il-kategoriji tas-suġġetti tad-data li jeħtieġu pproċessar ta’ data personali jinkludu persuni fiżiċi, inkluż persunal awtorizzat tad-dwana, awtoritajiet kompetenti sħab jew kwalunkwe korp iċċertifikat ieħor li l-informazzjoni tiegħu tinsab fid-dikjarazzjoni doganali jew id-dokumenti ta’ sostenn meħtieġa biex jissodisfaw il-formalitajiet kollha mhux doganali tal-UE koperti mis-CSW-CERTEX tal-UE. Il-kategorija addizzjonali ta’ suġġetti tad-data tinkludi l-persunal tal-Kummissjoni u kwalunkwe fornitur terz li jaġixxi f’ismu involut f’attivitajiet operazzjonali u ta’ manutenzjoni relatati mas-CSW-CERTEX tal-UE. Il-Kummissjoni u l-Istati Membri se jkunu kontrolluri konġunti tal-ipproċessar tad-data personali fis-CSW-CERTEX tal-UE f’konformità mar-Regolamenti (UE) 2016/679 u (UE) 2018/1725. 

Kapitolu III - Ambjenti Nazzjonali ta’ Tieqa Unika għad-Dwana

Il-Kapitolu III jistabbilixxi d-dispożizzjonijiet għall-komponenti nazzjonali tal-Ambjent ta’ Tieqa Unika tal-UE għad-Dwana, li, għall-finijiet ta’ dan ir-Regolament, jissejħu ambjenti nazzjonali ta’ tieqa unika għad-dwana. Kull Stat Membru se jkun responsabbli għall-iżvilupp, l-implimentazzjoni u ż-żamma tal-funzjonament preċiż u effiċjenti tal-ambjenti nazzjonali ta’ tieqa unika għad-dwana.

Sabiex jiġu żgurati l-konformità u l-infurzar armonizzati tar-rekwiżiti regolatorji mhux doganali tal-UE, l-ambjenti nazzjonali ta’ tieqa unika għad-dwana se jiffukaw biex jippermettu lill-awtoritajiet doganali jivverifikaw awtomatikament dawn il-formalitajiet, u jippermettu lill-awtoritajiet kompetenti sħab iwettqu ġestjoni tal-kwantità tal-merkanzija awtorizzata abbażi tar-rilaxx tagħha mid-dwana.

Sabiex il-proċessi ta’ konformità jkomplu jiġu allinjati u jiġi ffaċilitat il-kummerċ, l-ambjenti nazzjonali ta’ tieqa unika għad-dwana se jsiru mezz ta’ komunikazzjoni uniku fejn l-operaturi ekonomiċi se jissodisfaw il-formalitajiet doganali rilevanti u formalitajiet speċifiċi mhux doganali tal-UE meħtieġa għat-tqegħid tal-merkanzija taħt proċeduri doganali. Dan il-mekkaniżmu ta’ faċilitazzjoni se jippermetti lill-operaturi ekonomiċi jissottomettu f’punt uniku kemm id-data doganali kif ukoll dik mhux doganali tal-UE meħtieġa mill-awtoritajiet multipli involuti fl-iżdoganar tal-merkanzija. Dan se jwassal għal tnaqqis fid-duplikazzjoni, fil-ħin u fl-ispejjeż tal-konformità għall-operaturi ekonomiċi. Il-formalitajiet mhux doganali tal-UE soġġetti għal din il-miżura ta’ faċilitazzjoni speċifika huma subsett tal-formalitajiet ġenerali elenkati fl-Anness li se jiġu identifikati mill-Kummissjoni permezz ta’ atti ta’ implimentazzjoni li jsegwu l-valutazzjoni ta’ sett ta’ kriterji rilevanti għall-faċilitazzjoni tal-kummerċ kif ukoll il-fattibbiltà legali u teknika. L-ambjenti nazzjonali ta’ tieqa unika għad-dwana jistgħu jservu wkoll ta’ pjattaformi għall-kontrolli rispettivi “ta’ koordinazzjoni”, li jipprovdu soluzzjoni ta’ punt uniku ta’ servizz f’konformità mal-Artikolu 47(1) tar-Regolament (UE) Nru 952/2013.

L-ipproċessar tad-data personali fl-ambjent nazzjonali ta’ tieqa unika għad-dwana se jsir skont ir-Regolament (UE) 2016/679. Kull Stat Membru se jkun l-uniku kontrollur tal-operazzjonijiet tal-ipproċessar tad-data fl-ambjent rispettiv tagħhom u se jinnotifika lill-Kummissjoni f’każ ta’ kwalunkwe ksur ta’ data personali li jikkomprometti s-sigurtà, il-kunfidenzjalità, id-disponibbiltà jew l-integrità tad-data personali. 

Kapitolu IV – Kooperazzjoni Diġitali: Skambju ta’ Informazzjoni u Regoli Proċedurali Oħra

Il-Kapitolu IV fih id-dispożizzjonijiet ewlenin għall-funzjonament effiċjenti tal-ambjent ta’ Tieqa Unika tal-UE għad-Dwana. Dan il-kapitolu huwa maqsum fi tliet taqsimiet prinċipali li jikkorrispondu għal aspetti differenti tal-kooperazzjoni diġitali u l-kondiviżjoni tal-informazzjoni bejn id-dwana, l-awtoritajiet kompetenti sħab u l-operaturi ekonomiċi kif spjegat hawn taħt.

It-Taqsima 1 tistabbilixxi regoli għall-iskambju ta’ informazzjoni bejn l-ambjenti nazzjonali ta’ tieqa unika għad-dwana u s-sistemi mhux doganali tal-UE pproċessati permezz tas-CSW-CERTEX tal-UE applikabbli għall-formalitajiet kollha mhux doganali tal-UE elenkati fl-Anness. Dawn l-iskambji ta’ informazzjoni se jservu l-iskopijiet li ġejjin:

1.jagħmlu d-data rilevanti disponibbli għall-awtoritajiet doganali biex jinfurzaw aħjar il-politiki regolatorji mhux doganali permezz tal-verifika awtomatizzata ta’ dawn il-formalitajiet;

2.jipprovdu d-data rilevanti lill-awtoritajiet kompetenti sħab sabiex ikunu jistgħu jimmonitorjaw u jiddeterminaw il-kwantità li jifdal ta’ merkanzija awtorizzata li ma tkunx tħassret mid-dwana fl-iżdoganar ta’ kunsinni oħra;

3.jiffaċilitaw l-integrazzjoni tal-proċeduri doganali u mhux doganali tal-UE għal proċess kompletament awtomatizzat tal-iżdoganar tal-merkanzija, li jappoġġja l-implimentazzjoni ta’ soluzzjonijiet ta’ “punt uniku ta’ servizz”;

4.jippermettu l-kondiviżjoni awtomatizzata tad-data bejn id-dwana u l-awtoritajiet kompetenti sħab preskritti mil-leġiżlazzjoni tal-UE. 

Fejn meħtieġ, is-CSW-CERTEX tal-UE se twettaq ukoll trasformazzjoni tad-data għal skopijiet ta’ interoperabbiltà tas-sistema u tan-negozju.

It-Taqsima 2 tistabbilixxi dispożizzjonijiet addizzjonali li japplikaw biss għas-subsett tal-formalitajiet mhux doganali tal-UE koperti mis-CSW-CERTEX tal-UE, li jenħtieġ li jiġu identifikati mill-Kummissjoni billi jiġi vvalutat jekk ġewx issodisfati sett ta’ kriterji rilevanti. Il-miżuri ta’ faċilitazzjoni addizzjonali għal dawn il-formalitajiet speċifiċi jeħtieġu li l-ambjenti nazzjonali ta’ tieqa unika għad-dwana jsiru mezz ta’ komunikazzjoni uniku fejn l-operaturi ekonomiċi jissodisfaw kemm il-formalitajiet doganali kif ukoll dawk mhux doganali tal-UE. Din is-soluzzjoni se tissimplifika l-proċeduri tal-iżdoganar u tindirizza l-problemi ewlenin, bħall-ħtieġa li tiġi ppreżentata informazzjoni simili lil awtoritajiet multipli permezz ta’ sistemi multipli għall-istess movimenti ta’ merkanzija. B’mod partikolari, l-operaturi ekonomiċi se jkunu jistgħu jissottomettu d-data kollha meħtieġa għat-tqegħid tal-merkanzija taħt il-proċeduri doganali u jirċievu feedback elettroniku f’punt uniku mill-awtoritajiet regolatorji involuti.

Il-Kummissjoni se tiddetermina qafas għall-armonizzazzjoni u r-razzjonalizzazzjoni tad-data biex tippermetti l-użu mill-ġdid ta’ data pprovduta minn operaturi ekonomiċi f’konformità mal-“prinċipju ta’ rapportar ta’ darba biss”. B’mod aktar konkret, se tiddefinixxi l-elementi tad-data komuni bejn id-dikjarazzjoni doganali u l-applikazzjoni għad-dokumenti ta’ sostenn u tidentifika l-elementi tad-data addizzjonali li huma meħtieġa biss mil-leġiżlazzjoni mhux doganali tal-UE. Għall-finijiet ta’ dan ir-Regolament, dawn tal-aħħar se jissejħu “sett(ijiet) ta’ data tal-awtorità kompetenti sieħba (PCA)”. Id-data tad-dikjarazzjoni doganali u s-sett(ijiet) ta’ data tal-PCA se jikkostitwixxu dikjarazzjoni integrata li jkun fiha l-informazzjoni kollha relatata mal-iżdoganar meħtieġa biex jitwettqu l-formalitajiet doganali u mhux doganali tal-UE kkonċernati. Fost possibbiltajiet oħra, dan l-approċċ issimplifikat jista’ jippermetti lill-operaturi ekonomiċi jissottomettu flimkien id-data kollha meħtieġa għat-tqegħid tal-merkanzija taħt proċeduri doganali. Minn perspettiva proċedurali u ta’ żmien, dan jista’ jinkiseb skont l-Artikolu 171 tar-Regolament (UE) Nru 952/2013, li jippermetti li d-dikjarazzjoni doganali tiġi ppreżentata qabel il-preżentazzjoni tal-merkanzija. Il-preżentazzjoni tad-dikjarazzjoni doganali flimkien mas-sett(ijiet) ta’ data rilevanti tal-PCA tfisser li l-operatur ekonomiku qed jiddikjara simultanjament il-merkanzija għal proċedura doganali u japplika għad-dokumenti ta’ sostenn meħtieġa.

Is-CSW-CERTEX tal-UE se tgħaddi d-data rilevanti mill-ambjent nazzjonali ta’ tieqa unika għad-dwana għas-sistemi mhux doganali xierqa tal-UE biex tagħmilha disponibbli għall-awtoritajiet kompetenti sħab biex iwettqu d-dmirijiet tagħhom. Meta jirċevuha, l-awtoritajiet kompetenti sħab se jirrevedu l-informazzjoni li ntbagħtitilhom u jipprovdu d-deċiżjonijiet ta’ żdoganar tagħhom lid-dwana permezz tas-CSW-CERTEX tal-UE. Min-naħa l-oħra, l-awtoritajiet tad-dwana se jgħaddu din l-informazzjoni lill-operatur ekonomiku. In-numru EORI se jintuża bħala l-identifikatur għall-kondiviżjoni u l-kontroreferenzi ta’ informazzjoni relatata ma’ dawn l-iskambji. 

Biex jgħinu fl-implimentazzjoni ta’ dan ir-Regolament, fit-Taqsima 3 jiddaħħlu regoli proċedurali addizzjonali dwar il-formalitajiet kollha mhux doganali tal-UE meħtieġa għall-kummerċ internazzjonali. Dawn jinvolvu l-użu tas-sistema ta’ Reġistrazzjoni u Identifikazzjoni tal-Operaturi Ekonomiċi (EORI) mill-awtoritajiet kompetenti sħab u l-ħatra ta’ koordinaturi nazzjonali.

In-numru EORI huwa assenjat lil kull operatur ekonomiku involut f’operazzjonijiet doganali bħala identifikatur għat-tranżazzjonijiet kollha mal-awtoritajiet doganali fl-UE. Il-Kummissjoni żżomm sistema ċentrali tal-EORI sabiex taħżen u tittratta d-data relatata mal-EORI. Sabiex tiġi ffaċilitata l-kollaborazzjoni bejn l-awtoritajiet differenti involuti fil-proċess tal-iżdoganar tal-merkanzija, l-awtoritajiet kompetenti sħab se jingħataw aċċess għas-sistema EORI għall-finijiet ta’ validazzjoni. Dan ifisser li jistgħu jitolbu n-numru EORI mingħand l-operaturi ekonomiċi fil-kuntest tal-formalitajiet tagħhom u jivvalidawh mas-sistema EORI.

Kull Stat Membru se jaħtar awtorità kompetenti bħala l-koordinatur nazzjonali biex tassisti lill-partijiet involuti fil-kwistjonijiet kollha relatati mal-Ambjent ta’ Tieqa Unika tal-UE għad-Dwana. Il-koordinatur nazzjonali se jkun il-punt ta’ kuntatt għall-Kummissjoni, filwaqt li jippromwovi l-kooperazzjoni fil-livell nazzjonali u jiżgura li s-sistemi nazzjonali rispettivi jkunu konnessi mas-CSW-CERTEX tal-UE sabiex dan ir-Regolament jiġi implimentat b’mod effettiv.

Kapitolu V - Spejjeż tas-CSW-CERTEX tal-UE, il-programm ta’ ħidma, u l-monitoraġġ u r-rapportar

Il-Kapitolu V fih id-dispożizzjonijiet relatati mal-allokazzjoni tal-ispejjeż, l-istabbiliment ta’ programm ta’ ħidma, u l-monitoraġġ u r-rapportar.

L-ispejjeż kollha assoċjati mal-iżvilupp, l-integrazzjoni u l-operat tas-CSW-CERTEX tal-UE, inklużi l-interfaċċi tagħha mas-sistemi mhux doganali tal-UE se jitħallsu mill-Kummissjoni, filwaqt li l-Istati Membri se jħallsu l-ispejjeż relatati mal-interfaċċji tas-CSW-CERTEX tal-UE mal-ambjenti nazzjonali ta’ tieqa unika għad-dwana. Sal-31 ta’ Diċembru 2027 u kull tliet snin wara dan, il-Kummissjoni se tippreżenta rapport ta’ valutazzjoni dwar il-funzjonament tal-Ambjent ta’ Tieqa Unika tal-UE għad-Dwana lill-Parlament Ewropew u lill-Kunsill. L-Istati Membri se jkunu responsabbli biex jipprovdu l-informazzjoni meħtieġa biex jipproduċu dan ir-rapport.

Il-Kummissjoni se tħejji programm ta’ ħidma biex tappoġġja l-implimentazzjoni gradwali tad-dispożizzjonijiet assoċjati mal-formalitajiet mhux doganali tal-UE elenkati fl-Anness.

Kapitolu VI – Proċeduri għall-adozzjoni ta’ atti ta’ implimentazzjoni u delegati, emendi għal u dispożizzjonijiet finali

Il-Kapitolu VI jistabbilixxi d-dispożizzjonijiet għall-adozzjoni ta’ atti delegati u ta’ implimentazzjoni skont l-Artikoli 290 u 291 tat-TFUE, żewġ emendi għar-Regolament (UE) Nru 952/2013 u d-dħul fis-seħħ u l-applikazzjoni.

Kif stabbilit fl-Artikolu 3 tar-Regolament (UE) Nru 952/2013, il-missjoni tal-awtoritajiet doganali li jiffaċilitaw il-kummerċ leġittimu u li jiżguraw is-sigurtà u s-sikurezza tal-UE u tar-residenti tagħha, u l-protezzjoni tal-ambjent f’kooperazzjoni mill-qrib ma’ awtoritajiet oħra fejn xieraq hija konformi mal-objettivi ta’ dan ir-Regolament. Għal din ir-raġuni, id-definizzjoni tal-leġiżlazzjoni doganali stabbilita fl-Artikolu 5(2) tar-Regolament (UE) Nru 952/2013 se tiġi emendata biex tinkludi punt (e) ġdid li jirreferenzja dan ir-Regolament u d-dispożizzjonijiet li jissupplimentawh jew jimplimentawh.

It-tieni emenda żżid subparagrafu mal-Artikolu 163(1) li jintroduċi l-preżunzjoni li d-dokumenti ta’ sostenn li jiċċertifikaw il-konformità mal-formalitajiet mhux doganali tal-UE koperti mis-CSW-CERTEX tal-UE huma fil-pussess tad-dikjarant u għad-dispożizzjoni tal-awtoritajiet doganali fil-mument meta tiġi ppreżentata d-dikjarazzjoni doganali. Dan l-obbligu jitqies li ġie ssodisfat billi l-awtoritajiet doganali se jkunu jistgħu jiksbu permezz tas-CSW-CERTEX tal-UE d-data meħtieġa għall-iżdoganar ibbażata fuq l-iskambji ta’ informazzjoni deskritti hawn fuq.

Ir-Regolament se jidħol fis-seħħ 20 jum wara l-pubblikazzjoni tiegħu f’Il-Ġurnal Uffiċjali tal-UE. L-artikoli relatati mal-integrazzjoni fis-CSW-CERTEX tal-UE tal-formalitajiet mhux doganali tal-UE elenkati fl-Anness se japplikaw b’mod progressiv fid-dati speċifikati għal kull formalità f’dak l-Anness. L-artikoli li jikkonċernaw il-miżuri ta’ faċilitazzjoni addizzjonali li jaffettwaw il-formalitajiet speċifiċi mhux doganali tal-UE li jridu jiġu identifikati mill-Kummissjoni permezz ta’ atti ta’ implimentazzjoni se japplikaw mill-1 ta’ Jannar 2031.

L-Anness

L-Anness ta’ dan ir-Regolament se jinkludi l-lista ta’ formalitajiet mhux doganali tal-UE meħtieġa għall-kummerċ internazzjonali tal-merkanzija, li s-sistemi rispettivi tagħhom se jkunu konnessi mas-CSW-CERTEX tal-UE sabiex tiġi skambjata informazzjoni mal-ambjenti nazzjonali ta’ tieqa unika għad-dwana. Din il-lista se jkun fiha s-sistemi mhux doganali tal-UE u l-leġiżlazzjoni rilevanti tal-UE fis-seħħ li tirregola l-formalitajiet koperti minn dan ir-Regolament. Dawn il-formalitajiet se jiġu integrati fl-Ambjent ta’ Tieqa Unika tal-UE għad-Dwana permezz ta’ implimentazzjoni gradwali sat-3 ta’ Marzu 2025. L-Anness jista’ jiġi emendat permezz ta’ atti delegati, bi dritt ta’ oġġezzjoni għall-Parlament Ewropew u għall-Kunsill.

2020/0306 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jistabbilixxi l-Ambjent ta’ Tieqa Unika tal-Unjoni Ewropea għad-Dwana u li jemenda r-Regolament (UE) Nru 952/2013

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikoli 33, 114 u 207 tiegħu,

Wara li kkunsidraw il-proposta mill-Kummissjoni Ewropea,

Wara li l-abbozz tal-att leġiżlattiv intbagħat lill-Parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 29 ,

Waqt li jaġixxu skont il-proċedura leġiżlattiva ordinarja,

Billi:

(1)Il-kummerċ internazzjonali tal-Unjoni huwa soġġett kemm għal-leġiżlazzjoni doganali kif ukoll għal-leġiżlazzjoni mhux doganali tal-Unjoni. Din tal-aħħar hija applikabbli għal merkanzija speċifika f’oqsma ta’ politika bħas-saħħa u s-sikurezza, l-ambjent, l-agrikoltura, is-sajd, il-wirt kulturali u s-sorveljanza tas-suq. Wieħed mill-kompiti prinċipali assenjati lill-awtoritajiet doganali skont ir-Regolament (UE) Nru 952/2013 tal-Parlament Ewropew u tal-Kunsill 30 huwa li jiġu żgurati s-sigurtà u s-sikurezza tal-Unjoni u r-residenti tagħha, u l-protezzjoni tal-ambjent, fejn xieraq, f’kooperazzjoni mill-qrib ma’ awtoritajiet oħra. L-awtoritajiet responsabbli għall-formalitajiet regolatorji mhux doganali tal-Unjoni (“awtoritajiet kompetenti sħab”) u l-awtoritajiet doganali spiss jaħdmu f’sajlos, u joħolqu obbligi onerużi u kumplessi ta’ rapportar għan-negozjanti u proċessi ineffiċjenti ta’ żdoganar tal-merkanzija li jwasslu għal żball u frodi. Sabiex tiġi indirizzata l-interoperabbiltà frammentata bejn id-dwana u l-awtoritajiet kompetenti sħab fil-ġestjoni tal-proċessi tal-iżdoganar tal-merkanzija u sabiex tiġi kkoordinata l-azzjoni f’dan il-qasam, matul is-snin il-Kummissjoni u l-Istati Membri ħadu għadd ta’ impenji biex jiżviluppaw inizjattivi ta’ tieqa unika għall-iżdoganar tal-merkanzija.

(2)Skont l-Artikolu 4(6) tad-Deċiżjoni Nru 70/2008/KE tal-Parlament Ewropew u tal-Kunsill 31 , l-Istati Membri u l-Kummissjoni jridu jagħmlu ħilithom biex jistabbilixxu u jagħmlu operazzjonali qafas ta’ servizzi ta’ tieqa unika. Kif iddikjarat fir-rapport finali dwar l-Evalwazzjoni tal-implimentazzjoni doganali elettronika fl-UE tal-21 ta’ Jannar 2015 32 , filwaqt li ċerti elementi ta’ dik id-Deċiżjoni jibqgħu rilevanti ħafna, partijiet oħra jew ġew sostitwiti jew mhumiex konkreti biżżejjed biex jinkoraġġixxu u jinċentivaw aktar avvanzi, b’mod partikolari fuq l-inizjattiva tat-tieqa unika. B’segwitu għal dan, il-Konklużjonijiet tal-Kunsill tas-17 ta’ Diċembru 2014 dwar l-Implimentazzjoni Elettronika tad-Dwana u tat-Tieqa Unika fl-Unjoni Ewropea 33  approvaw id-Dikjarazzjoni ta’ Venezja tal-15 ta’ Ottubru 2014 34 u stiednu lill-Kummissjoni biex tippreżenta proposta għar-reviżjoni tad-Deċiżjoni Nru 70/2008/KE. 

(3)Fl-1 ta’ Ottubru 2015, il-Kunsill adotta d-Deċiżjoni (UE) 2015/1947 35 li tapprova, f’isem l-Unjoni, il-Ftehim dwar il-Faċilitazzjoni tal-Kummerċ, li daħal fis-seħħ fit-22 ta’ Frar 2017. Dak il-ftehim jirrappreżenta l-aktar sforz estensiv fil-faċilitazzjoni tal-kummerċ u r-riforma doganali taħt l-Organizzazzjoni Dinjija tal-Kummerċ. Fih dispożizzjonijiet li jimmiraw li jtejbu b’mod sinifikanti l-iżdoganar tal-merkanzija u l-kooperazzjoni effettiva bejn id-dwana u awtoritajiet regolatorji oħra dwar kwistjonijiet ta’ faċilitazzjoni tal-kummerċ u konformità doganali. Skont l-Artikolu 10(4) tal-ftehim, il-membri jridu jagħmlu ħilithom biex jistabbilixxu jew iżommu tieqa waħda, li tippermetti lill-kummerċjanti jissottomettu rekwiżiti ta’ dokumentazzjoni u/jew ta’ data għall-importazzjoni, l-esportazzjoni jew it-tranżitu ta’ merkanzija minn punt ta’ dħul uniku lill-awtoritajiet jew l-aġenziji parteċipanti.

(4)Il-faċilitazzjoni tal-kummerċ, u s-sikurezza u s-sigurtà, jikkonċernaw lill-awtoritajiet kollha involuti fil-proċess tal-iżdoganar tal-merkanzija bejn il-fruntieri tal-Unjoni. Iż-żieda rapida fil-kummerċ internazzjonali żiedet il-ħtieġa għal kooperazzjoni u koordinazzjoni aħjar fost dawk l-awtoritajiet. Il-proċess kontinwu ta’ diġitalizzazzjoni jippermetti li din is-sitwazzjoni tiġi indirizzata b’mod aktar effiċjenti billi s-sistemi tad-dwana u tal-awtoritajiet kompetenti sħab jiġu konnessi flimkien u billi jkun possibbli l-iskambju awtomatizzat sistematiku tal-informazzjoni bejniethom. Bħala tali, il-qafas attwali tal-konformità regolatorja mhuwiex biżżejjed biex jappoġġja interazzjoni effettiva bejn id-dwana u l-awtoritajiet kompetenti sħab, li s-sistemi u l-proċeduri tagħhom huma kkaratterizzati minn frammentazzjoni u sensji. Il-proċess tal-iżdoganar tal-merkanzija kkoordinat bis-sħiħ u effiċjenti jeħtieġ ambjent regolatorju tal-Unjoni simplifikat għall-kummerċ internazzjonali li jwassal benefiċċji fit-tul lill-Unjoni u lir-residenti tagħha fl-oqsma kollha ta’ politika.

(5)Il-pjan ta’ azzjoni tal-UE dwar il-gvern elettroniku 2016-2020 stabbilit fil-Komunikazzjoni tal-Kummissjoni tad-19 ta’ April 2016 36 ifittex li jżid l-effiċjenza tas-servizzi pubbliċi billi jneħħi l-ostakli diġitali eżistenti, inaqqas il-piż amministrattiv u jtejjeb il-kwalità tal-interazzjonijiet bejn l-amministrazzjonijiet nazzjonali. F’konformità ma’ din il-viżjoni u l-isforzi usa’ biex jiġu ssimplifikati u diġitalizzati l-proċessi ta’ rapportar għall-kummerċ internazzjonali tal-merkanzija, il-Kummissjoni żviluppat proġett pilota volontarju msejjaħ Tieqa Unika Doganali għall-Iskambju taċ-Ċertifikati tal-Unjoni Ewropea. Dan il-proġett jippermetti lill-awtoritajiet doganali jivverifikaw awtomatikament il-konformità ma’ għadd limitat ta’ formalitajiet mhux doganali, li jippermettu li tiġi skambjata informazzjoni bejn is-sistemi doganali tal-Istati Membri parteċipanti u s-sistemi tal-Unjoni mhux doganali rispettivi li jiġġestixxu formalitajiet mhux doganali. Filwaqt li l-proġett tejjeb il-proċeduri taliżdoganar, in-natura volontarja tiegħu tillimita b’mod ċar il-potenzjal tiegħu li jiġġenera benefiċċji sostanzjali għall-awtoritajiet doganali, l-awtoritajiet kompetenti sħab u l-operaturi ekonomiċi.

(6)Sabiex jinkiseb ambjent kompletament diġitali u proċess effiċjenti għall-iżdoganar tal-merkanzija għall-partijiet kollha involuti fil-kummerċ internazzjonali, huwa meħtieġ li jiġu stabbiliti regoli komuni għal Ambjent ta’ Tieqa Unika tal-Unjoni Ewropea għad-Dwana (Ambjent ta’ Tieqa Unika tal-UE għad-Dwana) armonizzata u integrata. Din is-sistema jenħtieġ li tinkludi sett ta’ servizzi elettroniċi integrati bis-sħiħ ikkonsenjati fil-livell tal-Unjoni u dak nazzjonali biex jiffaċilitaw il-kondiviżjoni tal-informazzjoni u l-kooperazzjoni diġitali bejn id-dwana u l-awtoritajiet kompetenti sħab u biex jissimplifikaw il-proċessi tal-iżdoganar tal-merkanzija għall-operaturi ekonomiċi. Jenħtieġ li l-Ambjent tat-Tieqa Unika Doganali tal-UE jiġi żviluppat f’allinjament mal-possibbiltajiet għal identifikazzjoni u awtentikazzjoni affidabbli offruti mir-Regolament eIDAS 37 u l-prinċipju ta’ darba biss fejn xieraq, kif imtenni fir-Regolament dwar il-Gateway Diġitali Unika 38 . Sabiex jiġi implimentat l-Ambjent ta’ Tieqa Unika tal-UE għad-Dwana, jeħtieġ li tiġi stabbilita, abbażi tal-proġett pilota, sistema ta’ skambju ta’ ċertifikati, is-Sistema ta' Tieqa Unika Doganali għall-Iskambju taċ-Ċertifikati tal-UE (CSW-CERTEX tal-UE), li tgħaqqad flimkien l-ambjenti nazzjonali ta’ tieqa unika għad-dwana u s-sistemi tal-Unjoni mhux doganali li jimmaniġġjaw formalitajiet speċifiċi mhux doganali. Huwa wkoll meħtieġ li jiġu armonizzati l-ambjenti nazzjonali ta’ tieqa unika għad-dwana, li jiġu integrati dawk l-ambjenti fl-Ambjent ta’ Tieqa Unika tal-UE għad-Dwana, u li jiġi stabbilit sett ta’ regoli dwar il-kooperazzjoni amministrattiva diġitali fi ħdan l-Ambjent ta’ Tieqa Unika tal-UE għad-Dwana.

(7)L-iskambji ta’ informazzjoni diġitali permezz tas-CSW-CERTEX tal-UE jenħtieġ li ikopru l-formalitajiet mhux doganali tal-Unjoni stabbiliti fil-leġiżlazzjoni tal-Unjoni li l-awtoritajiet doganali huma fdati jinfurzaw. Dawk il-formalitajiet jimponu obbligi differenti għall-importazzjoni, l-esportazzjoni jew it-tranżitu ta’ ċerta merkanzija, u l-verifika tagħhom permezz ta’ kontrolli doganali hija fundamentalment importanti għall-funzjonament effettiv tal-Ambjent ta’ Tieqa Unika tal-UE għad-Dwana. Is-CSW-CERTEX tal-UE jenħtieġ li tkopri l-formalitajiet regolatorji diġitalizzati stabbiliti fil-leġiżlazzjoni tal-Unjoni u ġestiti minn awtoritajiet kompetenti sħab f’sistemi elettroniċi mhux doganali tal-Unjoni, u jaħżnu l-informazzjoni rilevanti mill-Istati Membri kollha meħtieġa għall-iżdoganar tal-merkanzija. Huwa għalhekk xieraq li jiġu identifikati l-formalitajiet mhux doganali tal-Unjoni li jenħtieġ li jkunu soġġetti għal kooperazzjoni diġitali permezz tas-CSW-CERTEX tal-UE. B’mod partikolari, is-CSW-CERTEX tal-UE jenħtieġ li tkopri r-rekwiżiti sanitarji u fitosanitarji, ir-regoli li jirregolaw l-importazzjoni ta’ prodotti organiċi, ir-rekwiżiti ambjentali fir-rigward tal-gassijiet serra fluworinati u s-sustanzi li jnaqqsu l-ożonu, u l-formalitajiet relatati mal-importazzjoni ta’ beni kulturali.

(8)Jenħtieġ li s-CSW-CERTEX tal-UE tiffaċilita l-kondiviżjoni tal-informazzjoni bejn l-ambjenti nazzjonali ta’ tieqa unika għad-dwana u s-sistemi mhux doganali tal-Unjoni. Dan ifisser li meta operatur ekonomiku jissottometti dikjarazzjoni doganali li teħtieġ il-konformità tal-formalitajiet mhux doganali tal-Unjoni, l-awtoritajiet doganali u l-awtoritajiet kompetenti sħab jistgħu jiskambjaw awtomatikament u b’mod effettiv u jivverifikaw l-informazzjoni meħtieġa għall-proċess tal-iżdoganar tal-merkanzija. Kooperazzjoni u koordinazzjoni diġitali mtejba bejn l-awtoritajiet doganali u l-awtoritajiet kompetenti sħab jenħtieġ li jwasslu għal proċessi mingħajr karti aktar integrati, aktar rapidi u aktar sempliċi għall-iżdoganar tal-merkanzija u infurzar aħjar tal-formalitajiet mhux doganali tal-Unjoni u l-konformità magħhom. 

(9)Il-Kummissjoni, f’kollaborazzjoni mal-Istati Membri, jenħtieġ li tiżviluppa, tintegra, tuża u żżomm is-CSW-CERTEX tal-UE. Sabiex jiġu pprovduti servizzi ta’ tieqa unika xierqa u armonizzati fil-livell tal-Unjoni għall-formalitajiet mhux doganali tal-Unjoni, il-Kummissjoni jenħtieġ li tgħaqqad is-sistemi mhux doganali rispettivi tal-Unjoni mas-CSW-CERTEX tal-UE. L-Istati Membri jenħtieġ li jkunu responsabbli biex jgħaqqdu l-ambjenti nazzjonali tagħhom ta’ tieqa unika għad-dwana mas-CSW-CERTEX tal-UE.

(10)Kwalunkwe pproċessar ta’ data personali fis-CSW-CERTEX tal-UE jenħtieġ li jiffaċilita l-kondiviżjoni tal-informazzjoni bejn is-sistemi nazzjonali għad-dwana u s-sistemi mhux doganali tal-Unjoni mingħajr ebda ħżin ta’ data. Jenħtieġ ukoll li jittrasforma d-data, fejn meħtieġ, biex jippermetti l-iskambju ta’ informazzjoni bejn iż-żewġ dominji diġitali. Il-faċilitajiet tat-teknoloġija tal-informazzjoni użati għat-trasformazzjoni tad-data jenħtieġ li jkunu fl-Unjoni.

(11)Skont it-tip ta’ formalità mhux doganali, l-informazzjoni elettronika li trid tiġi skambjata permezz tas-CSW-CERTEX tal-UE jista’ jkun fiha kategoriji differenti ta’ suġġetti tad-data u d-data personali tagħhom meħtieġa biex jippreżentaw id-dikjarazzjoni doganali jew biex japplikaw għal dokumenti ta’ sostenn. Id-dikjarazzjonijiet doganali jista’ jkun fihom data personali ta’ bosta kategoriji ta’ suġġetti tad-data, inkluż l-esportaturi, l-importaturi, id-destinatarji, u atturi addizzjonali tal-katina tal-provvista. Id-dokumenti ta’ sostenn jista’ jkun fihom l-istess informazzjoni għal kategoriji oħra ta’ suġġetti tad-data, bħall-konsenjaturi, l-esportaturi, id-destinatarji, l-importaturi u d-detenturi tal-liċenzja. It-tielet kategorija ta’ suġġetti tad-data li d-data personali tagħhom tista’ tiġi pproċessata fis-CSW-CERTEX tal-UE tinkludi persunal awtorizzat tal-awtoritajiet doganali, l-awtoritajiet kompetenti sħab jew kwalunkwe korp iċċertifikat ieħor, kif ukoll il-persunal tal-Kummissjoni u kwalunkwe fornitur terz li jaġixxi f’ismu involut f’attivitajiet operazzjonali u ta’ manutenzjoni tas-CSW-CERTEX tal-UE.

(12)Fejn id-data personali hija pproċessata minn żewġ entitajiet jew aktar li flimkien jiddeterminaw l-għan u l-mezzi tal-ipproċessar, dawk l-entitajiet jenħtieġ li jkunu kontrolluri konġunti. Peress li l-Kummissjoni u l-Istati Membri huma responsabbli għall-funzjonament tas-CSW-CERTEX tal-UE, huma jenħtieġ li jkunu kontrolluri konġunti tal-ipproċessar tad-data personali fis-CSW-CERTEX tal-UE f’konformità mar-Regolamenti (UE) 2018/1725 39 u (UE) 2016/679 tal-Parlament Ewropew u tal-Kunsill 40 . 

(13)Iż-żieda fid-diġitalizzazzjoni tal-formalitajiet regolatorji doganali u mhux doganali tal-Unjoni applikabbli għall-kummerċ internazzjonali fetħet opportunitajiet ġodda għall-Istati Membri biex itejbu l-kooperazzjoni diġitali bejn id-dwana u l-awtoritajiet kompetenti sħab. Sabiex jilħqu dawk il-prijoritajiet, bosta Stati Membri bdew jiżviluppaw oqfsa għal ambjenti nazzjonali ta’ tieqa unika għad-dwana. Dawk l-inizjattivi jvarjaw sostanzjalment skont il-livell tal-arkitettura, il-prijoritajiet u l-istrutturi tal-ispejjeż tat-teknoloġija tal-informazzjoni doganali eżistenti. Huwa għalhekk meħtieġ li l-Istati Membri jkunu meħtieġa jistabbilixxu u joperaw ambjenti nazzjonali ta’ tieqa unika għad-dwana għall-formalitajiet mhux doganali tal-Unjoni koperti mis-CSW-CERTEX tal-UE. Dawk l-ambjenti jenħtieg li jikkostitwixxu l-komponenti nazzjonali tal-Ambjent ta’ Tieqa Unika tal-UE għad-Dwana, li jippermettu l-kondiviżjoni elettronika tal-informazzjoni u l-kollaborazzjoni bejn id-dwana, l-awtoritajiet kompetenti sħab u l-operaturi ekonomiċi biex tiġi żgurata l-konformità mal-leġiżlazzjoni doganali u l-infurzar effiċjenti tagħha u l-formalitajiet mhux doganali tal-Unjoni koperti mis-CSW-CERTEX tal-UE. F’konformità ma’ dan l-objettiv, l-ambjenti nazzjonali ta’ tieqa unika għad-dwana jenħtieġ li jippermettu l-verifika awtomatizzata mill-awtoritajiet doganali tal-formalitajiet li fir-rigward tagħhom id-data tiġi trażmessa mis-sistema mhux doganali rispettiva tal-Unjoni permezz tas-CSW-CERTEX tal-UE. Jenħtieġ li l-ambjenti nazzjonali ta’ tieqa unika għad-dwana jippermettu wkoll lill-awtoritajiet kompetenti sħab jimmonitorjaw u jikkontrollaw il-kwantitajiet ta’ merkanzija awtorizzata (“ġestjoni tal-kwantità”) li jkunu ġew rilaxxati mid-dwana permezz tal-Unjoni. Dan jenħtieġ li jiġi żgurat billi tiġi pprovduta l-informazzjoni meħtieġa dwar l-iżdoganar lis-sistemi mhux doganali tal-Unjoni permezz tas-CSW-CERTEX tal-UE. F’termini prattiċi, il-ġestjoni tal-kwantità fil-livell tal-Unjoni hija meħtieġa sabiex ikun jista’ jsir infurzar aħjar tal-formalitajiet regolatorji mhux doganali billi l-konsum tal-kwantitajiet awtorizzati għar-rilaxx tal-merkanzija jiġi mmonitorjat b’mod awtomatiku u konsistenti, u jiġi evitat l-użu eċċessiv jew il-ġestjoni ħażina tagħhom.

(14)Biex ikomplu jiġu ssimplifikati l-proċessi tal-iżdoganar tal-merkanzija għall-operaturi ekonomiċi, l-ambjenti nazzjonali ta’ tieqa unika għad-dwana jenħtieġ li jsiru mezz wieħed ta’ komunikazzjoni mad-dwana u mal-awtoritajiet kompetenti sħab. Il-formalitajiet mhux doganali tal-Unjoni soġġetti għal din il-miżura ta’ faċilitazzjoni addizzjonali huma subsett tal-formalitajiet ġenerali koperti mis-CSW-CERTEX tal-UE. Il-Kummissjoni jenħtieġ li tidentifika dawk il-formalitajiet progressivament billi tivvaluta t-twettiq ta’ sett ta’ kriterji rilevanti għall-faċilitazzjoni tal-kummerċ, filwaqt li tqis il-fattibbiltà legali u teknika tagħhom. Sabiex tkompli tissaħħaħ il-faċilitazzjoni tal-kummerċ, jenħtieġ li jkun possibbli li jintużaw il-ambjenti nazzjonali ta’ tieqa unika għad-dwana bħala pjattaforma għall-koordinazzjoni tal-kontrolli bejn l-awtoritajiet doganali u l-awtoritajiet kompetenti sħab f’konformità mal-Artikolu 47(1) tar-Regolament (UE) Nru 952/2013.

(15)Kull Stat Membru jenħtieġ li jkun il-kontrollur uniku tal-operazzjonijiet tal-ipproċessar tad-data mwettqa fl-ambjent nazzjonali tiegħu ta’ tieqa unika għad-dwana. L-operazzjonijiet tal-ipproċessar tad-data jenħtieġ li jitwettqu f’konformità mar-Regolament (UE) 2016/679. Minħabba li xi data li toriġina mill-ambjent nazzjonali ta’ tieqa unika għad-dwana trid tiġi skambjata ma’ sistemi mhux doganali tal-Unjoni permezz tas-CSW-CERTEX tal-UE, kull Stat Membru jenħtieġ li jkun meħtieġ jinnotifika lill-Kummissjoni f’każ ta’ kwalunkwe ksur ta’ data personali li jikkomprometti s-sigurtà, il-kunfidenzjalità, id-disponibbiltà jew l-integrità tad-data personali pproċessata fis-sistema tiegħu.

(16)Il-proċess tal-iżdoganar tal-merkanzija kkoordinat bis-sħiħ jeħtieġ proċeduri li jappoġġjaw il-kooperazzjoni diġitali u l-kondiviżjoni tal-informazzjoni bejn l-awtoritajiet doganali, l-awtoritajiet kompetenti sħab u l-operaturi ekonomiċi biex jissodisfaw u jinfurzaw il-formalitajiet mhux doganali tal-Unjoni koperti mis-CSW-CERTEX tal-UE. L-interoperabbiltà tfisser il-kapaċità li dawn il-proċessi jitmexxew bla xkiel fis-sistemi u fl-oqsma doganali u mhux doganali mingħajr ma jintilef il-kuntest jew it-tifsira tad-data skambjata. Sabiex tkun tista’ ssir verifika kompletament awtomatizzata tal-formalitajiet mhux doganali tal-Unjoni, is-CSW-CERTEX tal-UE jenħtieġ li tiżgura l-interoperabbiltà teknika kif ukoll tifsira konsistenti. Huwa importanti li t-terminoloġija doganali u dik mhux doganali tiġi allinjata biex jiġi żgurat li d-data u l-informazzjoni skambjati jiġu ppreservati u mifhuma matul l-iskambji bejn is-sistemi mhux doganali tal-Unjoni u l-ambjenti nazzjonali ta’ tieqa unika għad-dwana. Barra minn hekk, biex jiġi żgurat infurzar armonizzat tal-formalitajiet mhux doganali tal-Unjoni fl-Unjoni kollha, jenħtieġ li s-CSW-CERTEX tal-UE tidentifika l-proċeduri doganali li għalihom jistgħu jintużaw id-dokumenti ta’ sostenn abbażi tad-deċiżjonijiet amministrattivi indikati mill-awtorità kompetenti sieħba fid-dokumenti ta’ sostenn. Minn perspettiva teknika, id-data doganali u dik mhux doganali jenħtieġ li ssir kompatibbli mas-CSW-CERTEX tal-UE billi, fejn ikun meħtieġ, il-format jew l-istruttura tagħha jinbidlu mingħajr ma jinbidel il-kontenut tagħha.

(17)Fid-dawl tal-formalitajiet mhux doganali tal-Unjoni koperti, is-CSW-CERTEX tal-UE jenħtieġ li jkollha diversi skopijiet. Jenħtieġ li tagħmel disponibbli d-data rilevanti lill-awtoritajiet doganali biex jinfurzaw aħjar il-politiki regolatorji mhux doganali tal-Unjoni permezz tal-verifika awtomatizzata ta’ dawk il-formalitajiet. Jenħtieġ li tipprovdi d-data rilevanti lill-awtoritajiet kompetenti sħab biex jimmonitorjaw u jiddeterminaw il-kwantità li jifdal ta’ merkanzija awtorizzata li ma tkunx tħassret mid-dwana fl-iżdoganar ta’ kunsinni oħra. Jenħtieġ li tappoġġja wkoll l-implimentazzjoni tal-prinċipju ta’ “punt uniku ta’ servizz” għat-twettiq tal-kontrolli msemmija fl-Artikolu 47(1) tar-Regolament (UE) Nru 952/2013, billi tiffaċilita l-integrazzjoni tal-proċeduri doganali u mhux doganali tal-Unjoni għal proċess kompletament awtomatizzat tal-iżdognanar tal-merkanzija. Xi atti legali tal-Unjoni jistgħu jeħtieġu trasferimenti ta’ data bejn is-sistemi doganali nazzjonali u s-sistema ta’ informazzjoni u komunikazzjoni stabbilita fl-att rilevanti. Jenħtieġ għalhekk li s-CSW-CERTEX tal-UE tippermetti l-kondiviżjoni awtomatizzata tad-data bejn l-awtoritajiet doganali u l-awtoritajiet kompetenti sħab fejn meħtieġ minn dawk l-atti.

(18)Biex jiġi stabbilit mezz ta’ komunikazzjoni uniku mal-awtoritajiet involuti fl-iżdoganar tal-merkanzija, l-ambjenti nazzjonali ta’ tieqa unika għad-dwana jenħtieġ li jippermettu lill-operaturi ekonomiċi jissottomettu d-data meħtieġa mil-leġiżlazzjoni doganali u mil-leġiżlazzjoni mhux doganali tal-Unjoni f’punt wieħed u jirċievu kwalunkwe informazzjoni relatata mill-awtoritajiet involuti direttament minn dak il-punt. Il-mezz uniku ta’ komunikazzjoni jenħtieġ li jintuża biss għall-formalitajiet mhux doganali tal-Unjoni koperti mis-CSW-CERTEX tal-UE u identifikati bħala adatti għal miżuri ta’ faċilitazzjoni addizzjonali. 

(19)Hemm koinċidenza sinifikanti bejn id-data inkluża fid-dikjarazzjoni doganali u d-data inkluża fl-applikazzjoni għad-dokumenti ta’ sostenn. Sabiex ikun jista’ jsir użu mill-ġdid tad-data sabiex l-operaturi ekonomiċi ma jkollhomx għalfejn jipprovdu l-istess data aktar minn darba, huwa meħtieġ li jiġu rrikonċiljati u rrazzjonalizzati r-rekwiżiti tad-data għall-formalitajiet doganali u mhux doganali tal-Unjoni koperti mis-CSW-CERTEX tal-UE. Il-Kummissjoni jenħtieġ li għalhekk tidentifika l-elementi tad-data inklużi kemm fid-dikjarazzjoni doganali kif ukoll fl-applikazzjoni għad-dokumenti ta’ sostenn. Il-Kummissjoni jenħtieġ li tidentifika wkoll l-elementi tad-data li huma meħtieġa biss mil-leġiżlazzjoni mhux doganali tal-Unjoni (“sett(ijiet) ta’ data tal-awtorità kompetenti sieħba (PCA)”). Id-data tad-dikjarazzjoni doganali u s-sett(ijiet) tad-data tal-PCA jenħtieġ li jikkostitwixxu dikjarazzjoni integrata li tinkludi l-informazzjoni kollha relatata mal-iżdoganar meħtieġa biex jitwettqu l-formalitajiet doganali u mhux doganali tal-Unjoni koperti mis-CSW-CERTEX tal-UE.

(20)Sabiex l-operaturi ekonomiċi jkunu jistgħu jwettqu l-formalitajiet doganali u mhux doganali li jaffettwaw l-istess movimenti ta’ merkanzija, l-ambjenti nazzjonali ta’ tieqa unika għad-dwana jenħtieġ li jippermettulhom jippreżentaw id-data kollha meħtieġa minn diversi awtoritajiet regolatorji għat-tqegħid tal-merkanzija taħt proċeduri doganali permezz ta’ dikjarazzjoni integrata. Jenħtieġ li jkun possibbli li tali data tiġi ppreżentata flimkien mad-dikjarazzjoni doganali ppreżentata qabel il-preżentazzjoni mistennija tal-merkanzija lid-dwana, skont l-Artikolu 171 tar-Regolament (UE) Nru 952/2013.

(21)Sabiex tiġi trażmessa l-informazzjoni pprovduta mill-operaturi ekonomiċi fl-ambjenti nazzjonali ta’ tieqa unika għad-dwana lill-awtoritajiet kollha kkonċernati, jenħtieġ li s-CSW-CERTEX tal-UE tippermetti l-iskambji meħtieġa ta’ informazzjoni bejn l-oqsma doganali u dawk mhux doganali. B’mod partikolari, jenħtieġ li s-CSW-CERTEX tal-UE tirċievi d-data meħtieġa biex jitwettqu l-formalitajiet mhux doganali applikabbli tal-Unjoni mill-ambjenti nazzjonali ta’ tieqa unika għad-dwana u tiddistribwiha lis-sistema mhux doganali rispettiva tal-Unjoni. Dan l-iskambju jenħtieġ li jippermetti lill-awtoritajiet kompetenti sħab jirrieżaminaw l-informazzjoni trażmessa lis-sistemi tal-Unjoni mhux doganali rispettivi u jieħdu d-deċiżjonijiet ta’ żdoganar tagħhom li jenħtieġ li jintbagħtu lid-dwana permezz tas-CSW-CERTEX tal-UE. L-awtoritajiet doganali, min-naħa tagħhom, jenħtieġ li jagħmlu din l-informazzjoni disponibbli għall-operaturi ekonomiċi permezz tal-ambjenti nazzjonali ta’ tieqa unika għad-dwana. In-numru EORI jenħtieġ li jintuża bħala l-identifikatur għall-kondiviżjoni u l-kontroreferenzi tal-informazzjoni relatata ma’ dawn l-iskambji. 

(22)Skont l-Artikolu 9 tar-Regolament (UE) Nru 952/2013, in-numru EORI huwa assenjat lil kull operatur ekonomiku involut f’operazzjonijiet doganali bħala identifikatur għat-tranżazzjonijiet kollha mal-awtoritajiet doganali fl-Unjoni. Il-Kummissjoni żżomm sistema ċentrali tal-EORI sabiex taħżen u tittratta d-data relatata mal-EORI. Sabiex tiġi ffaċilitata l-kollaborazzjoni bejn l-awtoritajiet differenti involuti fil-proċess tal-iżdoganar tal-merkanzija, l-awtoritajiet kompetenti sħab jenħtieġ li jkollhom aċċess għas-sistema EORI biex jivvalidaw in-numru EORI li jistgħu jitolbu mill-operaturi ekonomiċi fil-kuntest tal-formalitajiet tagħhom. 

(23)Il-kooperazzjoni mill-qrib bejn il-Kummissjoni u l-Istati Membri hija essenzjali biex jiġu kkoordinati l-attivitajiet kollha assoċjati mal-funzjonament effettiv tal-Ambjent ta’ Tieqa Unika tal-UE għad-Dwana. Minħabba l-ambitu wiesa’ u divers ta’ dawk l-attivitajiet, huwa meħtieġ li kull Stat Membru jaħtar awtorità kompetenti bħala koordinatur nazzjonali. Il-koordinatur nazzjonali jenħtieġ li jkun il-punt ta’ kuntatt għall-Kummissjoni, u jenħtieġ li jippromwovi l-kooperazzjoni fil-livell nazzjonali, filwaqt li jiżgura l-interoperabbiltà tas-sistema. Il-Kummissjoni jenħtieġ li tipprovdi koordinazzjoni fejn meħtieġ, u tgħin biex jiġi żgurat l-infurzar effiċjenti tal-formalitajiet mhux doganali tal-Unjoni.

(24)L-iżvilupp tal-Ambjent ta’ Tieqa Unika tal-UE għad-Dwana jinvolvi diversi spejjeż tal-implimentazzjoni. Huwa importanti li dawk l-ispejjeż jiġu allokati bejn il-Kummissjoni u l-Istati Membri bl-aktar mod xieraq skont it-tip ta’ servizzi pprovduti. Il-Kummissjoni jenħtieġ li ġġarrab spejjeż relatati mal-iżvilupp, il-manutenzjoni u l-operat tal-komponent ċentrali tal-Ambjent ta’ Tieqa Unika tal-UE għad-Dwana, is-CSW-CERTEX tal-UE, u l-interfaċċji tiegħu mas-sistemi mhux doganali tal-Unjoni. L-Istati Membri jenħtieġ li iġarrbu spejjeż relatati mar-rwol tagħhom fl-iżgurar tal-interfaċċji mas-CSW-CERTEX tal-UE u l-iżvilupp, il-manutenzjoni u l-operat tal-ambjenti nazzjonali ta’ tieqa unika għad-dwana.

(25)Huwa meħtieġ ippjanar dettaljat sabiex jiġu integrati b’mod progressiv diversi formalitajiet mhux doganali tal-Unjoni minn oqsma ta’ politika differenti fis-CSW-CERTEX tal-UE. Għal dak il-għan, il-Kummissjoni jenħtieġ li tħejji programm ta’ ħidma biex jiġu inkorporati dawk il-formalitajiet fis-CSW-CERTEX tal-UE u biex jiġu żviluppati konnessjonijiet bejn is-sistemi mhux doganali tal-Unjoni li jipproċessaw dawk il-formalitajiet u s-CSW-CERTEX tal-UE. L-objettiv prinċipali tal-programm ta’ ħidma jenħtieġ li jkun li jappoġġja r-rekwiżiti operazzjonali u l-iskeda ta’ żmien tal-implimentazzjoni ta’ dawn l-attivitajiet. Il-programm ta’ ħidma jenħtieġ li jiġi rivedut regolarment biex jivvaluta l-progress ġenerali fl-applikazzjoni tad-dispożizzjonijiet ta’ dan ir-Regolament.

(26)Il-Kummissjoni jenħtieġ li timmonitorja regolarment il-funzjonament tal-Ambjent ta’ Tieqa Unika tal-UE għad-Dwana biex tevalwa l-prestazzjoni tas-CSW-CERTEX tal-UE u biex tiżgura l-infurzar effiċjenti tal-formalitajiet mhux doganali tal-Unjoni koperti mis-CSW-CERTEX tal-UE. Il-Kummissjoni jenħtieġ li tippreżenta rapporti ta’ valutazzjoni regolari dwar il-funzjonament tal-Ambjent ta’ Tieqa Unika tal-UE għad-Dwana lill-Parlament Ewropew u lill-Kunsill. Dawk ir-rapporti jenħtieġ li jqisu l-progress li jkun sar, jidentifikaw oqsma għat-titjib u jipproponu rakkomandazzjonijiet għall-futur fid-dawl tal-progress li sar lejn kollaborazzjoni diġitali mtejba bejn id-dwana u l-awtoritajiet kompetenti sħab involuti fl-iżdoganar tal-merkanzija biex jiġu żgurati proċessi simplifikati għall-operaturi ekonomiċi u l-infurzar effiċjenti tal-formalitajiet mhux doganali tal-Unjoni.

(27)Biex jiġi żgurat funzjonament effiċjenti u effettiv tal-Ambjent ta’ Tieqa Unika tal-UE għad-Dwana, is-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea (TFUE) jenħtieġ li tiġi ddelegata lill-Kummissjoni fir-rigward ta’ emendi fil-lista ta’ formalitajiet mhux doganali tal-Unjoni koperti mis-CSW-CERTEX tal-UE; l-ispeċifikazzjoni tal-elementi tad-data li jridu jiġu skambjati permezz tas-CSW-CERTEX tal-UE u l-identifikazzjoni tal-elementi tad-data li huma komuni kemm għad-dikjarazzjoni doganali kif ukoll għall-applikazzjoni għad-dokumenti ta’ sostenn flimkien mas-sett tad-data tal-PCA għal kull att rilevanti tal-Unjoni applikabbli għall-formalitajiet mhux doganali tal-Unjoni integrati fis-CSW-CERTEX tal-UE. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet 41 . B’mod partikolari, biex tiġi żgurata parteċipazzjoni ugwali fit-tħejjija tal-atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jkunu qed jittrattaw it-tħejjija tal-atti delegati.

(28)Sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni fir-rigward tal-istabbiliment tar-responsabbiltajiet rispettivi tal-kontrolluri konġunti għall-konformità mal-obbligi skont ir-Regolamenti (UE) 2016/679 u (UE) 2018/1725; l-adozzjoni ta’ regoli speċifiċi għall-iskambju ta’ informazzjoni li jrid jiġi pproċessat permezz tas-CSW-CERTEX tal-UE, inkluż, fejn xieraq, kwalunkwe regola speċifika biex tiġi żgurata l-protezzjoni tad-data personali; id-determinazzjoni tal-formalitajiet mhux doganali tal-Unjoni integrati fis-CSW-CERTEX tal-UE li jistgħu jkunu soġġetti għal kooperazzjoni diġitali addizzjonali; l-adozzjoni ta’ arranġamenti proċedurali għall-iskambji addizzjonali ta’ informazzjoni pproċessati permezz tas-CSW-CERTEX tal-UE, inkluż, fejn xieraq, kwalunkwe regola speċifika li tirregola l-protezzjoni tad-data personali u l-adozzjoni ta’ programm ta’ ħidma biex jappoġġja l-implimentazzjoni tad-dispożizzjonijiet relatati mal-konnessjoni tas-sistemi mhux doganali rilevanti tal-Unjoni mas-CSW-CERTEX tal-UE u l-integrazzjoni tal-formalitajiet mhux doganali rispettivi tal-Unjoni. Dawk is-setgħat jenħtieġ li jiġu eżerċitati skont ir-Regolament (UE) Nru 182/2011 tal-Parlament Ewropew u tal-Kunsill 42 .

(29)Ir-Regolament (UE) Nru 952/2013 jenħtieġ li jiġi emendat sabiex jintegra l-Ambjent ta’ Tieqa Unika tal-UE għad-Dwana fil-kunċett tal-leġiżlazzjoni doganali, u biex jintegra aħjar il-proċeduri doganali u dawk mhux doganali tal-Unjoni billi jippermettilhom joperaw simultanjament. L-ewwel nett, peress li dan ir-Regolament jistabbilixxi mekkaniżmu għall-awtoritajiet doganali biex jinfurzaw il-formalitajiet regolatorji li jaffettwaw il-proċess tal-iżdoganar tal-merkanzija, huwa meħtieġ li jiġi inkluż flimkien mad-dispożizzjonijiet addizzjonali u implimentattivi tiegħu fid-definizzjoni tal-leġiżlazzjoni doganali stabbilita fil-punt 2 tal-Artikolu 5 tar-Regolament (UE) Nru 952/2013. Dan l-approċċ huwa konformi mal-Artikolu 3 tar-Regolament (UE) Nru 952/2013, li jinkariga lill-awtoritajiet doganali bil-kompitu li jiżguraw is-sigurtà u s-sikurezza tal-Unjoni u r-residenti tagħha f’kooperazzjoni mill-qrib ma’ awtoritajiet oħra fejn xieraq, filwaqt li jiffaċilita l-kummerċ. It-tieni nett, l-Artikolu 163(1) tar-Regolament (UE) Nru 952/2013 jistipula li d-dokumenti ta’ sostenn meħtieġa biex jiġu applikati d-dispożizzjonijiet li jirregolaw il-proċedura doganali rilevanti jridu jkunu fil-pussess tad-dikjarant u għad-dispożizzjoni tal-awtoritajiet doganali fil-ħin meta ssir id-dikjarazzjoni doganali. Billi l-awtoritajiet doganali se jkunu jistgħu jiksbu permezz tas-CSW-CERTEX tal-UE d-data meħtieġa assoċjata mal-formalitajiet mhux doganali tal-Unjoni, dan l-obbligu jenħtieġ li jitqies li ġie ssodisfat, u l-Artikolu 163(1) tar-Regolament (UE) Nru 952/2013 jenħtieġ għalhekk li jiġi emendat skont dan.

(30)Il-Kontrollur Ewropew għall-Protezzjoni tad-Data ġie kkonsultat skont l-Artikolu 42(1) tar-Regolament (UE) 2018/1725 u ta opinjoni fi xx/xx/202x.

(31)L-integrazzjoni tal-formalitajiet mhux doganali tal-Unjoni fis-CSW-CERTEX tal-UE teħtieġ l-implimentazzjoni ta’ infrastruttura ġdida tat-teknoloġija tal-informazzjoni biex jiġu stabbiliti konnessjonijiet bejn l-ambjenti nazzjonali ta’ tieqa unika għad-dwana u s-sistemi mhux doganali tal-Unjoni, l-identifikazzjoni tad-data li trid tiġi skambjata, u l-iżvilupp ta’ speċifikazzjonijiet tekniċi u funzjonali. Iż-żmien meħtieġ biex dawn l-iżviluppi jiġu avvanzati fil-livell tal-Unjoni u dak nazzjonali jenħtieġ li għalhekk jitqies għall-applikazzjoni ta’ dan ir-Regolament. Barra minn hekk, l-implimentazzjoni ta’ miżuri addizzjonali ta’ kooperazzjoni diġitali hija mistennija li tieħu sostanzjalment aktar fit-tul peress li teħtieġ identifikazzjoni minn qabel tal-formalitajiet mhux doganali tal-Unjoni kkonċernati flimkien mal-iżviluppi tekniċi rilevanti. Huwa għalhekk meħtieġ li l-applikazzjoni ta’ ċerti dispożizzjonijiet ta’ dan ir-Regolament tiġi differita.

(32)Billi l-objettivi ta’ dan ir-Regolament, jiġifieri l-infurzar aħjar tar-rekwiżiti regolatorji tal-Unjoni bejn il-fruntieri tal-Unjoni u l-faċilitazzjoni tal-kummerċ internazzjonali, ma jistgħux jintlaħqu b’mod suffiċjenti mill-Istati Membri waħedhom minħabba n-natura transfruntiera inerenti tal-moviment tal-merkanzija bejn il-fruntieri u l-kumplessità tiegħu, iżda pjuttost jistgħu jintlaħqu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. Skont il-prinċipju tal-proporzjonalità stabbilit f’dak l-Artikolu, dan ir-Regolament ma jmurx lil hinn minn dak li hu meħtieġ biex jintlaħqu dawk l-objettivi.

ADOTTAW DAN IR-REGOLAMENT:

Kapitolu I
Dispożizzjonijiet ġenerali

Artikolu 1

Suġġett

Dan ir-Regolament jistabbilixxi l-Ambjent ta’ Tieqa Unika tal-Unjoni Ewropea għad-Dwana li tipprovdi sett integrat ta’ servizzi elettroniċi interoperabbli fil-livell tal-Unjoni u dak nazzjonali permezz tas-Sistema ta’ Skambju ta’ Ċertifikati tat-Tieqa Unika tal-Unjoni Ewropea għad-Dwana biex tappoġġja l-interazzjoni u l-iskambju ta’ informazzjoni bejn l-ambjenti nazzjonali ta’ tieqa unika għad-dwana u s-sistemi mhux doganali tal-Unjoni msemmija fl-Anness. 

Huwa jistabbilixxi regoli għall-ambjenti nazzjonali ta’ tieqa unika għad-dwana u regoli dwar il-kooperazzjoni amministrattiva diġitali u l-kondiviżjoni tal-informazzjoni fi ħdan l-Ambjent ta’ Tieqa Unika tal-Unjoni Ewropea għad-Dwana.

Artikolu 2

Definizzjonijiet

Għall-finijiet ta’ dan ir-Regolament, flimkien mad-definizzjonijiet fl-Artikolu 5, il-punti (1), (2), (5), (8), (12), (15) u (16), tar-Regolament (UE) Nru 952/2013, għandhom japplikaw id-definizzjonijiet li ġejjin:

(1) “sistema nazzjonali ta’ tieqa unika għad-dwana” tfisser sett ta’ servizzi elettroniċi pprovduti minn Stat Membru biex jippermettu l-iskambju ta’ informazzjoni bejn is-sistemi elettroniċi tal-awtoritajiet doganali, l-awtoritajiet kompetenti sħab u l-operaturi ekonomiċi;

(2) “awtorità kompetenti sieħba” tfisser kwalunkwe awtorità ta’ Stat Membru jew il-Kummissjoni bis-setgħa li twettaq funzjoni mogħtija fir-rigward tat-twettiq tal-formalitajiet mhux doganali rilevanti tal-Unjoni;

(3) “formalità mhux doganali tal-Unjoni” tfisser kwalunkwe formalità għall-kummerċ internazzjonali tal-merkanzija stabbilita fil-leġiżlazzjoni tal-Unjoni minbarra l-leġiżlazzjoni doganali;

(4) “dokument ta’ sostenn” tfisser kwalunkwe ċertifikat, attestazzjoni, dikjarazzjoni ta’ konformità, liċenzja jew permess maħruġ minn awtoritajiet kompetenti sħab biex jiċċertifikaw li l-formalitajiet tal-Unjoni mhux doganali jkunu ġew sodisfatti;

(5) “ġestjoni tal-kwantità” tfisser l-attività ta’ monitoraġġ u ġestjoni tal-kwantità ta’ merkanzija awtorizzata mill-awtoritajiet kompetenti sħab skont il-leġiżlazzjoni tal-Unjoni mhux doganali bbażata fuq l-informazzjoni pprovduta mill-awtoritajiet doganali dwar l-iżdoganar ta’ kunsinni relatati;

(6) “sistema tal-Unjoni mhux doganali” tfisser kwalunkwe sistema elettronika tal-Unjoni li taħżen informazzjoni mill-awtoritajiet kompetenti sħab rilevanti kollha, li hija meħtieġa mill-awtoritajiet doganali biex jivverifikaw il-konformità mal-formalitajiet tal-Unjoni mhux doganali rispettivi. 

Artikolu 3

L-Ambjent ta’ Tieqa Unika tal-Unjoni Ewropea għad-Dwana

B’dan qed jiġi stabbilit l-Ambjent ta’ Tieqa Unika tal-Unjoni Ewropea għad-Dwana. Dan għandu jinkludi s-Sistema ta’ Skambju ta’ Ċertifikati tat-Tieqa Unika tal-Unjoni Ewropea għad-Dwana, l-ambjenti nazzjonali ta’ tieqa unika għad-dwana u s-sistemi mhux doganali tal-Unjoni msemmija fl-Anness.

Kapitolu II
Sistema ta’ Skambju ta’ Ċertifikati tat-Tieqa Unika tal-Unjoni Ewropea għad-Dwana

Artikolu 4

L-istabbiliment tas-Sistema ta’ Skambju ta’ Ċertifikati tat-Tieqa Unika tal-Unjoni Ewropea għad-Dwana

B’dan qed tiġi stabbilita Sistema elettronika ta’ Skambju ta’ Ċertifikati tat-Tieqa Unika Doganali tal-Unjoni Ewropea għad-Dwana (CSW-CERTEX tal-UE). Is-CSW-CERTEX tal-UE għandha tgħaqqad l-ambjenti nazzjonali ta’ tieqa unika għad-dwana mas-sistemi mhux doganali tal-Unjoni msemmija fl-Anness.

Artikolu 5

Ir-rwoli u r-responsabbiltajiet għas-CSW-CERTEX tal-UE

1.Il-Kummissjoni, f’kollaborazzjoni mal-Istati Membri, għandha tiżviluppa, tintegra u topera s-CSW-CERTEX tal-UE.

2.Il-Kummissjoni għandha tgħaqqad is-sistemi mhux doganali tal-Unjoni msemmija fl-Anness mas-CSW-CERTEX tal-UE u tippermetti li tiġi skambjata informazzjoni dwar il-formalitajiet mhux doganali tal-Unjoni elenkati fl-Anness.

3.L-Istati Membri għandhom jgħaqqdu l-ambjenti nazzjonali ta’ tieqa unika għad-dwana mas-CSW-CERTEX tal-UE u jippermettu li tiġi skambjata informazzjoni dwar il-formalitajiet mhux doganali tal-Unjoni elenkati fl-Anness.

4.Il-Kummissjoni hija mogħtija s-setgħa li tadotta atti delegati skont l-Artikolu 21 li jemendaw l-Anness, b’mod partikolari biex tkopri formalitajiet oħra mhux doganali tal-Unjoni.

Artikolu 6

L-ipproċessar ta’ data personali fis-CSW-CERTEX tal-UE

1.L-ipproċessar ta’ data personali jista’ jsir fis-CSW-CERTEX tal-UE għall-finijiet li ġejjin biss:

(a)biex jippermetti li tiġi skambjata informazzjoni bejn l-ambjenti nazzjonali ta’ tieqa unika għad-dwana u s-sistemi mhux doganali tal-Unjoni msemmija fl-Anness fir-rigward tal-formalitajiet mhux doganali tal-Unjoni elenkati fih;

(b)biex titwettaq it-trasformazzjoni tad-data elenkata fl-Artikolu 10(2), fejn meħtieġ, sabiex ikun jista’ jsir l-iskambju ta’ informazzjoni msemmi f’dan il-paragrafu, il-punt (a).

2.Is-CSW-CERTEX tal-UE tista’ tipproċessa data personali biss fil-kategoriji li ġejjin ta’ suġġetti tad-data:

(a)persuni fiżiċi li l-informazzjoni personali tagħhom tinsab fid-dikjarazzjoni doganali;

(b)persuni fiżiċi li l-informazzjoni personali tagħhom tinsab fid-dokumenti ta’ sostenn, jew fi kwalunkwe evidenza dokumentarja addizzjonali oħra meħtieġa għat-twettiq tal-formalitajiet mhux doganali tal-Unjoni elenkati fl-Anness;

(c)persunal awtorizzat tal-awtoritajiet doganali, l-awtoritajiet kompetenti sħab, l-awtoritajiet ta’ verifika tal-konsenja jew kwalunkwe awtorità rilevanti oħra jew korp awtorizzat li l-informazzjoni personali tiegħu tkun tinsab fi kwalunkwe dokument imsemmi fil-punti (a) u (b);

(d)persunal tal-Kummissjoni u fornituri terzi li jaġixxu f’isem il-Kummissjoni li jwettqu operazzjonijiet relatati mas-CSW-CERTEX tal-UE u attivitajiet ta’ manutenzjoni.

3.Is-CSW-CERTEX tal-UE tista’ tipproċessa biss il-kategoriji li ġejjin ta’ data personali:

(a)l-isem, l-indirizz, il-kodiċi tal-pajjiż u n-numru ta’ identifikazzjoni tal-persuni fiżiċi msemmija fil-paragrafu 2, il-punti (a) u (b), meħtieġa jew mil-leġiżlazzjoni doganali jew mil-leġiżlazzjoni mhux doganali tal-Unjoni biex iwettqu l-formalitajiet rispettivi tagħhom;

(b)l-isem u l-firma tal-persunal awtorizzat imsemmi fil-paragrafu 2, il-punti (c) u (d).

4.Is-CSW-CERTEX tal-UE ma għandha taħżen l-ebda informazzjoni skambjata bejn l-ambjenti nazzjonali ta’ tieqa unika għad-dwana u s-sistemi mhux doganali tal-Unjoni.

5.It-trasformazzjoni tad-data personali msemmija fil-paragrafu 1, il-punt (b), għandha titwettaq bl-użu tal-infrastruttura tat-teknoloġija tal-informazzjoni li tinsab fl-Unjoni.

Artikolu 7

Kontroll konġunt tas-CSW-CERTEX tal-UE

1.Fir-rigward tal-ipproċessar tad-data personali fis-CSW-CERTEX tal-UE, il-Kummissjoni għandha tkun kontrollur konġunt fis-sens tal-Artikolu 28(1) tar-Regolament (UE) 2018/1725, u l-awtoritajiet doganali u l-awtoritajiet kompetenti sħab għandhom ikunu kontrolluri konġunti fis-sens tal-Artikolu 26(1) tar-Regolament (UE) 2016/679.

2.Il-Kummissjoni għandha, permezz ta’ atti ta’ implimentazzjoni, tistabbilixxi r-responsabbiltajiet rispettivi tal-kontrolluri konġunti biex jikkonformaw mal-obbligi skont ir-Regolamenti (UE) 2016/679 u (UE) 2018/1725. Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 22(3) ta’ dan ir-Regolament.

3.Il-kontrolluri konġunti għandhom jiżguraw li:

(a)jaħdmu flimkien biex jipproċessaw it-talba/talbiet magħmula mis-suġġett(i) tad-data fil-ħin;

(b)jassistu lil xulxin fi kwistjonijiet li jinvolvu l-identifikazzjoni u t-trattament ta’ kwalunkwe ksur ta’ data relatat mal-ipproċessar konġunt;

(c)jiskambjaw l-informazzjoni rilevanti meħtieġa biex jinfurmaw lis-suġġetti tad-data skont it-Taqsima 2 tar-Regolament (UE) 2016/679 u t-Taqsima 2 tar-Regolament (UE) 2018/1725;

(d)jiżguraw u jipproteġu s-sigurtà, l-integrità, id-disponibbiltà u l-kunfidenzjalità tad-data personali pproċessata b’mod konġunt skont l-Artikolu 32 tar-Regolament (UE) 2016/679 u l-Artikolu 33 tar-Regolament (UE) 2018/1725.

Kapitolu III
Ambjenti nazzjonali ta’ tieqa unika għad-dwana

Artikolu 8

L-istabbiliment ta’ ambjenti nazzjonali ta’ tieqa unika għad-dwana 

1.L-Istati Membri għandhom jistabbilixxu ambjenti nazzjonali ta’ tieqa unika għad-dwana. Kull Stat Membru għandu jkun responsabbli għall-iżvilupp, l-integrazzjoni u t-tħaddim tal-ambjent tiegħu ta’ tieqa waħda għad-dwana.

2.L-ambjenti nazzjonali ta’ tieqa unika għad-dwana għandhom jippermettu l-iskambju ta’ informazzjoni u kooperazzjoni b’mezzi elettroniċi bejn l-awtoritajiet doganali, l-awtoritajiet kompetenti sħab u l-operaturi ekonomiċi għall-finijiet tal-konformità mal-leġiżlazzjoni doganali u l-infurzar effiċjenti tagħha u l-formalitajiet mhux doganali tal-Unjoni elenkati fl-Anness.

3.L-ambjenti nazzjonali ta’ tieqa unika għad-dwana għandhom jipprovdu b’mod partikolari l-funzjonalitajiet li ġejjin:

(a)jippermettu lill-awtoritajiet doganali jivverifikaw awtomatikament il-konformità mal-formalitajiet mhux doganali tal-Unjoni elenkati fl-Anness abbażi tad-data riċevuta minn sistemi mhux doganali tal-Unjoni għal finijiet ta’ żdoganar tal-merkanzija;

(b)jippermettu lill-awtoritajiet kompetenti sħab iwettqu, fejn applikabbli, ġestjoni tal-kwantità relatata mal-formalitajiet mhux doganali tal-Unjoni elenkati fl-Anness; 

(c)jipprovdu mezz ta’ komunikazzjoni uniku għall-operaturi ekonomiċi biex iwettqu l-formalitajiet doganali rilevanti u l-formalitajiet mhux doganali tal-Unjoni soġġetti għal kooperazzjoni diġitali addizzjonali skont l-Artikolu 12.

4.L-ambjenti nazzjonali ta’ tieqa unika għad-dwana jistgħu jintużaw bħala pjattaforma biex jiġu kkoordinati l-kontrolli skont l-Artikolu 47(1) tar-Regolament (UE) 952/2013.

Artikolu 9

L-ipproċessar tad-data personali fl-ambjenti nazzjonali ta’ tieqa unika għad-dwana

1.L-ipproċessar tad-data personali fl-ambjenti nazzjonali ta’ tieqa unika għad-dwana għandu jsir skont ir-Regolament (UE) 2016/679 b’mod separat mill-operazzjonijiet ta’ pproċessar imsemmija fl-Artikolu 6 ta’ dan ir-Regolament.

2.Kull Stat Membru għandu jkun il-kontrollur uniku tal-operazzjonijiet tal-ipproċessar tad-data li jsiru fambjent ta’ tieqa unika tiegħu għad-dwana.

3.Kull Stat Membru għandu jinnotifika lill-Kummissjoni bi kwalunkwe ksur ta’ data personali li jikkomprometti s-sigurtà, il-kunfidenzjalità, id-disponibbiltà jew l-integrità tad-data personali pproċessata fambjent ta’ tieqa unika tiegħu għad-dwana.

Kapitolu IV
Il-kooperazzjoni diġitali - l-iskambju tal-informazzjoni u regoli proċedurali oħra

Taqsima 1
KOOPERAZZJONI DIĠITALI RELATATA MAL-FORMALITAJIET MHUX DOGANALI TAL-UNJONI

Artikolu 10

Skambju ta’ informazzjoni pproċessat permezz tas-CSW-CERTEX tal-UE

1.Għal kull waħda mill-formalitajiet mhux doganali tal-Unjoni elenkati fl-Anness, is-CSW-CERTEX tal-UE għandha tippermetti li tiġi skambjata informazzjoni bejn l-ambjenti nazzjonali ta’ tieqa unika għad-dwana u s-sistemi mhux doganali rilevanti tal-Unjoni għall-finijiet li ġejjin:

(a)jagħmlu disponibbli d-data rilevanti lill-awtoritajiet doganali biex iwettqu l-verifika awtomatizzata meħtieġa ta’ dawk il-formalitajiet skont ir-Regolament (UE) Nru 952/2013;

(b)jagħmlu disponibbli d-data rilevanti lill-awtoritajiet kompetenti sħab biex iwettqu l-ġestjoni tal-kwantità tal-merkanzija awtorizzata fis-sistemi mhux doganali tal-Unjoni abbażi tal-merkanzija ddikjarata lill-awtoritajiet doganali u rilaxxata minn dawk l-awtoritajiet;

(c)jiffaċilitaw l-integrazzjoni tal-proċeduri bejn id-dwana u l-awtoritajiet kompetenti sħab għal proċess ta’ żdoganar tal-merkanzija awtomatizzat b’mod sħiħ u l-koordinazzjoni tal-kontrolli skont l-Artikolu 47(1) tar-Regolament (UE) Nru 952/2013;

(d)jippermettu kwalunkwe trasferiment awtomatizzat ieħor ta’ data bejn id-dwana u l-awtoritajiet kompetenti sħab rilevanti meħtieġ mil-leġiżlazzjoni tal-Unjoni msemmija fl-Anness.

2.Għal kull waħda mill-formalitajiet tal-Unjoni mhux doganali elenkati fl-Anness, is-CSW-CERTEX tal-UE għandha tipprevedi dan li ġej:

(a)l-allinjament tat-terminoloġija doganali u dik mhux doganali fejn possibbli, u l-identifikazzjoni tal-proċeduri doganali li għalihom jistgħu jintużaw id-dokumenti ta’ sostenn abbażi tad-deċiżjonijiet amministrattivi tal-awtorità kompetenti sieħba indikati fid-dokumenti ta’ sostenn;

(b)il-konverżjoni tal-format tad-data meħtieġa biex jitwettqu l-formalitajiet tal-Unjoni mhux doganali rilevanti f’data kompatibbli mad-dikjarazzjoni doganali u viċe versa mingħajr ma jinbidel il-kontenut tagħha.

3.Il-Kummissjoni hija mogħtija s-setgħa li tadotta atti delegati skont l-Artikolu 21 li jispeċifika l-elementi tad-data li għandhom jiġu skambjati permezz tas-CSW-CERTEX tal-UE f’konformità mal-paragrafu 1 ta’ dan l-Artikolu.

4.Il-Kummissjoni għandha, permezz ta’ atti ta’ implimentazzjoni, tadotta regoli speċifiċi għall-iskambju ta’ informazzjoni msemmi fil-paragrafi 1 u 2, inkluż, fejn xieraq, kwalunkwe regola speċifika biex tiżgura l-protezzjoni ta’ data personali. Dawk l-atti ta’ implimentazzjoni għandhom ikunu adottati f’konformità mal-proċedura konsultattiva msemmija fl-Artikolu 22(2).

Taqsima 2
KOOPERAZZJONI DIĠITALI ADDIZZJONALI RELATATA MAL-FORMALITAJIET MHUX DOGANALI TAL-UNJONI

Artikolu 11

Simplifikazzjoni tat-twettiq tal-formalitajiet doganali u dawk mhux doganali tal-Unjoni

Għall-merkanzija soġġetta għal kwalunkwe waħda mill-formalitajiet mhux doganali tal-Unjoni elenkati fl-Anness, l-ambjenti nazzjonali ta’ tieqa unika għad-dwana għandhom jipprovdu l-funzjonalitajiet li ġejjin:

(a)jippermettu lill-operaturi ekonomiċi jissottomettu l-informazzjoni rilevanti meħtieġa għat-twettiq tal-formalitajiet doganali applikabbli u l-formalitajiet mhux doganali tal-Unjoni;

(b)jagħmlu disponibbli lill-operaturi ekonomiċi r-rispons elettroniku tal-iżdoganar tal-merkanzija mid-dwana u mill-awtoritajiet kompetenti sħab responsabbli għat-twettiq tal-formalitajiet doganali applikabbli u l-formalitajiet mhux doganali tal-Unjoni.

Artikolu 12

Formalitajiet mhux doganali tal-Unjoni soġġetti għal kooperazzjoni diġitali addizzjonali

1.Formalità mhux doganali tal-Unjoni elenkata fl-Anness għandha tkun soġġetta għall-Artikolu 8(3), il-punt (c), l-Artikoli 11 sa 15 u l-Artikolu 16(2) dment li l-Kummissjoni tkun iddeterminat skont il-paragrafu 2 ta’ dan l-Artikolu li tali formalità tissodisfa l-kriterji stabbiliti f’dak il-paragrafu.

2.Il-Kummissjoni għandha, permezz ta’ atti ta’ implimentazzjoni, tiddetermina liema mill-formalitajiet mhux doganali tal-Unjoni elenkati fl-Anness jissodisfaw il-kriterji li ġejjin: 

(a)ikun hemm koinċidenza bejn bosta data meħtieġa għall-applikazzjoni għal dokumenti ta’ sostenn u d-dikjarazzjoni doganali;

(b)in-numru ta’ dokumenti ta’ sostenn maħruġa fl-Unjoni għall-formalità speċifika mhuwiex negliġibbli;

(c)is-sistema korrispondenti mhux doganali tal-Unjoni msemmija fl-Anness tista’ tidentifika l-operatur ekonomiku permezz tan-numru tar-Reġistrazzjoni u tal-Identifikazzjoni tal-Operatur Ekonomiku (EORI);

(d)il-leġiżlazzjoni mhux doganali applikabbli tal-Unjoni tippermetti li tiġi mwettqa l-formalità speċifika permezz tal-ambjenti nazzjonali ta’ tieqa unika għad-dwana skont l-Artikolu 11.

3.Dawk l-atti ta’ implimentazzjoni għandhom ikunu adottati f’konformità mal-proċedura konsultattiva msemmija fl-Artikolu 22(2).

Artikolu 13

L-armonizzazzjoni u r-razzjonalizzazzjoni tad-data

1.Il-Kummissjoni għandha tidentifika d-data komuni bejn id-dikjarazzjoni doganali u l-applikazzjoni korrispondenti għad-dokumenti ta’ sostenn, u tidentifika l-elementi tad-data addizzjonali soġġetti biss għal-leġiżlazzjoni mhux doganali tal-Unjoni.

2.L-elementi addizzjonali tad-data msemmija fil-paragrafu 1 għandhom jiġu identifikati bl-akronimu korrispondenti tal-formalità mhux doganali tal-Unjoni elenkat fl-Anness, segwit mis-suffiss “sett tad-data tal-awtorità kompetenti sieħba (PCA)”.

3.Id-data tad-dikjarazzjoni doganali u l-elementi tad-data addizzjonali msemmija fil-paragrafu 1 meħtieġa biex il-merkanzija tkun taħt proċedura doganali speċifika għandhom jikkostitwixxu dikjarazzjoni integrata, li jkun fiha d-data kollha meħtieġa mid-dwana u mill-awtoritajiet kompetenti sħab għall-iżdoganar tal-merkanzija.

4.Il-Kummissjoni hija mogħtija s-setgħa li tadotta atti delegati skont l-Artikolu 21, li jidentifikaw, minn naħa waħda, l-elementi tad-data li huma komuni kemm għad-dikjarazzjoni doganali kif ukoll għall-applikazzjoni għal dokumenti ta’ sostenn u, min-naħa l-oħra, is-sett ta’ data tal-PCA għal kull wieħed mill-atti rilevanti tal-Unjoni applikabbli għall-formalitajiet mhux doganali tal-Unjoni elenkati fl-Anness.

Artikolu 14

Il-preżentazzjoni ta’ data doganali u mhux doganali tal-Unjoni minn operaturi ekonomiċi

1.Għall-finijiet tal-Artikolu 11(a), l-ambjenti nazzjonali ta’ tieqa unika għad-dwana jistgħu jippermettu lill-operaturi ekonomiċi jissottomettu dikjarazzjoni integrata li jkun fiha s-sett(ijiet) ta’ data tal-PCA flimkien mad-dikjarazzjoni doganali ppreżentata qabel il-preżentazzjoni tal-merkanzija skont l-Artikolu 171 tar-Regolament (UE) Nru 952/2013.

2.Id-dikjarazzjoni integrata ppreżentata skont il-paragrafu 1 għandha tikkostitwixxi kemm id-dikjarazzjoni doganali kif ukoll l-applikazzjoni għal dokumenti ta’ sostenn.

Artikolu 15

Skambju ta’ informazzjoni addizzjonali pproċessat permezz tas-CSW-CERTEX tal-UE

1.Is-CSW-CERTEX tal-UE għandha tippermetti l-iskambji meħtieġa ta’ informazzjoni bejn l-ambjenti nazzjonali ta’ tieqa unika għad-dwana u s-sistemi mhux tal-Unjoni għall-finijiet li ġejjin:

(a)it-trażmissjoni tad-data li ġiet identifikata bħala komuni għad-dikjarazzjoni doganali u l-applikazzjoni korrispondenti għad-dokumenti ta’ sostenn skont l-Artikolu 13(4), kif ukoll is-sett(ijiet) ta’ data tal-PCA applikabbli biex l-awtoritajiet kompetenti sħab ikunu jistgħu jwettqu d-dmirijiet tagħhom għall-formalitajiet rilevanti f’konformità mal-leġiżlazzjoni mhux doganali tal-Unjoni;

(b)it-trażmissjoni lill-operaturi ekonomiċi għall-finijiet tal-Artikolu 11(b) ta’ kwalunkwe feedback mill-awtoritajiet kompetenti sħab imdaħħal fis-sistema(i) mhux doganali applikabbli tal-Unjoni.

2.Meta operatur ekonomiku jkun irreġistrat mal-awtoritajiet doganali skont l-Artikolu 9 tar-Regolament (UE) Nru 952/2013, in-numru EORI għandu jintuża għall-iskambji ta’ informazzjoni msemmija fil-paragrafu 1.

3.Il-Kummissjoni għandha tadotta, permezz ta’ atti ta’ implimentazzjoni, arranġamenti proċedurali għall-iskambji ta’ informazzjoni msemmija fil-paragrafu 1, inkluż, fejn xieraq, kwalunkwe regola speċifika li tirregola l-protezzjoni tad-data personali. Dawk l-atti ta’ implimentazzjoni għandhom ikunu adottati f’konformità mal-proċedura konsultattiva msemmija fl-Artikolu 22(2).

Taqsima 3
REGOLI PROĊEDURALI OĦRA GĦALL-FORMALITAJIET MHUX DOGANALI TAL-UNJONI 

Artikolu 16

L-użu tas-sistema EORI mill-awtoritajiet kompetenti sħab

Fit-twettiq tad-dmirijiet tagħhom, l-awtoritajiet kompetenti sħab għandu jkollhom aċċess għas-sistema EORI stabbilita għall-finijiet tal-Artikolu 9 tar-Regolament (UE) Nru 952/2013, biex jivvalidaw id-data rilevanti dwar l-operaturi ekonomiċi maħżuna f’dik is-sistema.

Artikolu 17

Koordinaturi nazzjonali

Kull Stat Membru għandu jaħtar awtorità kompetenti biex taġixxi bħala koordinatur nazzjonali għall-Ambjent ta’ Tieqa Unika tal-Unjoni Ewropea għad-Dwana. Il-koordinatur nazzjonali għandu jwettaq il-kompiti li ġejjin:

(a)jaġixxi bħala l-punt ta’ kuntatt nazzjonali għall-Kummissjoni għall-kwistjonijiet kollha relatati mal-implimentazzjoni ta’ dan ir-Regolament;

(b)jippromwovi l-kooperazzjoni bejn id-dwana u l-awtoritajiet kompetenti sħab nazzjonali fuq livell nazzjonali u jikkoordina l-attivitajiet relatati mal-konnessjoni bejn l-ambjenti nazzjonali ta’ tieqa unika għad-dwana u s-CSW-CERTEX tal-UE biex jappoġġja l-implimentazzjoni ta’ dan ir-Regolament. 

Kapitolu V
Spejjeż tas-CSW-CERTEX tal-UE, il-programm ta’ ħidma, u l-monitoraġġ u r-rapportar

Artikolu 18

Kostijiet

1.L-ispejjeż assoċjati mal-iżvilupp, l-integrazzjoni u l-operat tas-CSW-CERTEX tal-UE u l-interkonnessjonijiet tagħha mas-sistemi mhux doganali tal-Unjoni għandhom jinġarru mill-Unjoni.

2.Kull Stat Membru għandu jħallas l-ispejjeż imġarrba fir-rigward tal-iżvilupp, l-integrazzjoni u l-operat tal-ambjent nazzjonali tiegħu ta’ tieqa unika għad-dwana u l-konnessjoni tiegħu mas-CSW-CERTEX tal-UE.

Artikolu 19

Programm ta’ Ħidma

Il-Kummissjoni għandha, permezz ta’ atti ta’ implimentazzjoni, tadotta programm ta’ ħidma biex tappoġġja l-implimentazzjoni tad-dispożizzjonijiet ta’ dan ir-Regolament relatati mal-konnessjoni tas-sistemi mhux doganali tal-Unjoni msemmija fl-Anness mas-CSW-CERTEX tal-UE u l-integrazzjoni tal-formalitajiet mhux doganali rispettivi tal-Unjoni. Il-programm ta’ ħidma għandu jinżamm aġġornat. Dawk l-atti ta’ implimentazzjoni għandhom ikunu adottati f’konformità mal-proċedura konsultattiva msemmija fl-Artikolu 22(2).

Artikolu 20

Monitoraġġ u rapportar

1.Il-Kummissjoni għandha timmonitorja regolarment il-funzjonament tal-Ambjent ta’ Tieqa Unika tal-Unjoni Ewropea għad-Dwana.

2.Il-Kummissjoni għandha tevalwa regolarment il-prestazzjoni tas-CSW-CERTEX tal-UE.

3.Sal-31 ta’ Diċembru 2027 u kull tliet snin wara dan, il-Kummissjoni għandha tippreżenta rapport lill-Parlament Ewropew u lill-Kunsill dwar l-implimentazzjoni ta’ dan ir-Regolament. Ir-rapport għandu jinkludi wkoll informazzjoni dwar il-monitoraġġ u l-evalwazzjoni mwettqa skont il-paragrafi 1 u 2, rispettivament.

4.L-Istati Membri għandhom, fuq talba mill-Kummissjoni, jipprovdu kwalunkwe informazzjoni li tkun meħtieġa għar-rapport imsemmi fil-paragrafu 3.

Kapitolu VI
Proċeduri għall-adozzjoni ta’ atti ta’ implimentazzjoni u delegati, emendi għar-Regolament (UE) Nru 952/2013 u dispożizzjonijiet finali

Artikolu 21

Eżerċizzju tad-delega

1.Is-setgħa li tadotta atti delegati hija mogħtija lill-Kummissjoni soġġett għall-kondizzjonijiet stabbiliti f’dan l-Artikolu.

2.Is-setgħa li tadotta atti delegati msemmija fl-Artikoli 5(4), 10(3) u 13(4) għandha tingħata lill-Kummissjoni għal perjodu indeterminat mid-data tad-dħul fis-seħħ ta’ dan ir-Regolament.

3.Id-delega tas-setgħa msemmija fl-Artikoli 5(4), 10(3) u 13(4) tista’ tiġi revokata f’kull ħin mill-Parlament Ewropew jew mill-Kunsill. Id-deċiżjoni li tirrevoka għandha ttemm id-delega tas-setgħa speċifikata f’dik id-deċiżjoni. Din għandha tidħol fis-seħħ l-għada tal-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata fiha. M'għandhiex taffettwa l-validità ta' kwalunkwe att delegat li jkun diġà fis-seħħ.

4.Qabel ma tadotta att delegat, il-Kummissjoni għandha tikkonsulta esperti nnominati minn kull Stat Membru skont il-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet.

5.Hekk kif tadotta att delegat, il-Kummissjoni għandha tinnotifika simultanjament lill-Parlament Ewropew u lill-Kunsill dwaru.

6.L-att delegat adottat skont l-Artikoli 5(4), 10(3) u 13(4) għandu jidħol fis-seħħ biss jekk ma tkun saret ebda oġġezzjoni mill-Parlament Ewropew jew mill-Kunsill fi żmien xahrejn min-notifika ta’ dak l-att lill-Parlament Ewropew u lill-Kunsill jew jekk, qabel ma jiskadi dak il-perjodu, kemm il-Parlament Ewropew kif ukoll il-Kunsill ikunu infurmaw lill-Kummissjoni li ma jkunux se joġġezzjonaw. Dak il-perjodu għandu jiġi estiż b’xahrejn fuq l-inizjattiva tal-Parlament Ewropew jew tal-Kunsill.

Artikolu 22

Proċedura ta’ kumitat

1.Il-Kummissjoni għandha tkun megħjuna mill-Kumitat tal-Kodiċi Doganali stabbilit permezz tar-Regolament (UE) Nru 952/2013. Dak il-kumitat għandu jkun kumitat fis-sens tar-Regolament (UE) Nru 182/2011.

2.Fejn issir referenza għal dan il-paragrafu, għandu japplika l-Artikolu 4 tar-Regolament (UE) Nru 182/2011.

3.Fejn issir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011.

Artikolu 23

Emendi għar-Regolament (UE) Nru 952/2013

Ir-Regolament (UE) Nru 952/2013 huwa emendat kif ġej:

(1) fl-Artikolu 5(2), jiżdied il-punt li ġej:

“(e) ir-Regolament (UE) [...] tal-Parlament Ewropew u tal-Kunsill* u d-dispożizzjonijiet li jissupplimentawh jew jimplimentawh;

*Ir-Regolament (UE) [...] tal-Parlament Ewropew u tal-Kunsill ta’ [data] li jistabbilixxi l-Ambjent ta’ Tieqa Unika tal-Unjoni Ewropea għad-Dwana u li jemenda r-Regolament (UE) Nru 952/2013 (ĠU L […], JJ/XX/SSSS, p. XX).

(2) fl-Artikolu 163(1), jiżdied is-subparagrafu li ġej:

“Id-dokumenti ta’ sostenn għall-formalitajiet tal-Unjoni mhux doganali applikabbli elenkati fl-Anness tar-Regolament (UE) […] għandhom jitqiesu li huma fil-pussess tad-dikjarant u għad-dispożizzjoni tal-awtoritajiet doganali fil-mument meta tkun ippreżentata d-dikjarazzjoni doganali, sakemm dawk l-awtoritajiet ikunu jistgħu jiksbu d-data meħtieġa mis-sistema(i) tal-Unjoni mhux doganali korrispondenti permezz tas-Sistema ta’ Tieqa Unika Doganali għall-Iskambju taċ-Ċertifikati tal-Unjoni Ewropea skont l-Artikolu 10(1), il-punti (a) u (c) ta’ dak ir-Regolament”.

Artikolu 24

Dħul fis-seħħ u applikazzjoni

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

L-Artikolu 5(2) u (3), l-Artikolu 8(3), il-punti (a) u (b), u l-Artikolu 10 għandhom japplikaw għal kull waħda mill-formalitajiet mhux doganali tal-Unjoni elenkati fl-Anness mid-dati stabbiliti fih.

L-Artikolu 8(3), il-punt (c), l-Artikolu 11, l-Artikolu 13(1), (2) u (3), l-Artikolu 14 u l-Artikolu 15(1) u (2) għandhom japplikaw mill-1 ta’ Jannar 2031.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA/TAL-INIZJATTIVA

1.1.Titolu tal-proposta/tal-inizjattiva

1.2.Qasam/oqsma tal-politika kkonċernat(i) fl-istruttura tal-ABM/ABB

1.3.Natura tal-proposta/tal-inizjattiva

1.4.Objettiv(i)

1.5.Raġunijiet għall-proposta/inizjattiva

1.6.Durata u impatt finanzjarju

1.7.Mod(i) ta’ ġestjoni ppjanat(i)

2.MIŻURI TA’ ĠESTJONI

2.1.Regoli dwar il-monitoraġġ u r-rapportar

2.2.Sistema ta’ ġestjoni u kontroll

2.3.Miżuri għall-prevenzjoni tal-frodi u l-irregolaritajiet

3.IMPATT FINANZJARJU STMAT TAL-PROPOSTA/INIZJATTIVA

3.1.Intestatura/i tal-qafas finanzjarju pluriennali u tal-linja/i baġitarja/i tan-nefqa affettwata/i

3.2.L-impatt stmat fuq in-nefqa 

3.2.1.Sommarju tal-impatt stmat fuq in-nefqa

3.2.2.Impatt stmat fuq l-approprjazzjonijiet operazzjonali

3.2.3.Stima tal-impatt fuq l-approprjazzjonijiet ta’ natura amministrattiva

3.2.4.Kompatibbiltà mal-qafas finanzjarju pluriennali attwali

3.2.5.Kontribuzzjonijiet tal-parti terza

3.3.Impatt stmat fuq id-dħul

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA/TAL-INIZJATTIVA

1.1.Titolu tal-proposta/tal-inizjattiva

1.2.Qasam/oqsma ta’ politika kkonċernat(i) fl-istruttura ABM/ABB 43  

1.3.Natura tal-proposta/tal-inizjattiva

☒ Il-proposta/l-inizjattiva hija dwar azzjoni ġdida 

◻Il-proposta/l-inizjattiva hija dwar azzjoni ġdida b’segwitu għal proġett pilota/azzjoni preparatorja 44  

◻ Il-proposta/l-inizjattiva hija dwar l-estensjoni ta’ azzjoni eżistenti 

◻ Il-proposta/l-inizjattiva hija dwar azzjoni diretta mill-ġdid lejn azzjoni ġdida 

1.4.Objettiv(i)

1.4.1.L-objettiv(i) strateġiku/strateġiċi pluriennali tal-Kummissjoni fil-mira tal-proposta/inizjattiva

1.4.2.Objettiv(i) speċifiku/speċifiċi u l-attività/attivitajiet ABM/ABB ikkonċernata/i

1.4.3.Riżultat(i) mistenni(ja) u impatt

Speċifika l-effetti li jenħtieġ li jkollha l-proposta/l-inizjattiva fuq il-benefiċjarji/fuq il-gruppi fil-mira.

1.4.4.Indikaturi tar-riżultati u tal-impatt

Speċifika l-indikaturi għall-monitoraġġ tal-implimentazzjoni tal-proposta/tal-inizjattiva.

1.5.Raġunijiet għall-proposta/inizjattiva

1.5.1.Rekwiżit(i) li għandu/għandhom jiġi/u ssodisfat(i) fi żmien qasir jew fit-tul

(a)il-kooperazzjoni bejn il-Gvernijiet (G2G) (Għażla 1: l-iskambju ta’ informazzjoni G2G dwar il-formalitajiet tal-UE li għalihom l-informazzjoni rilevanti meħtieġa mid-dwana għall-iżdoganar hija disponibbli fis-sistemi elettroniċi tal-UE),

(b)il-kooperazzjoni bejn in-Negozji u l-Gvernijiet (B2G) (Għażla 6: twieqi uniċi nazzjonali armonizzati li jippermettu punt ta’ dħul uniku għall-operaturi ekonomiċi biex iwettqu l-formalitajiet doganali u mhux doganali taħt l-ambitu), u

(c)L-espansjoni tal-użu tar-Reġistrazzjoni u tal-Identifikazzjoni tal-Operaturi Ekonomiċi (EORI) lill-awtoritajiet kompetenti sħab (Għażla 8ii).

1.5.2.Valur miżjud tal-involviment tal-UE

(a)Il-frammentazzjoni u n-nuqqas ta’ interoperabbiltà kontinwi jillimitaw il-benefiċċji tad-diġitalizzazzjoni u l-modernizzazzjoni gradwali tal-proċessi relatati mal-iżdoganar ta’ ċerta merkanzija;

(b)L-inizjattivi nazzjonali jkunu ftit minħabba r-restrizzjonijiet fir-riżorsi, u n-nuqqas ta’ ċerti funzjonijiet ewlenin, bħall-ġestjoni tal-kwantità fil-livell tal-UE;

(c)Il-proġett pilota CSW-CERTEX tal-UE (inizjattiva volontarja) jitlef il-momentum, jekk ma jiġix segwit b’azzjoni obbligatorja. Ħafna mill-awtoritajiet doganali tal-Istati Membri issa drawha, u neħħew ftit ftit il-proċessi preċedenti manwali u dawk ibbażati fuq il-karta, u ma jkunux jistgħu jipproċessaw aktar il-formalitajiet rilevanti mingħajrha.

1.5.3.Lezzjonijiet miksuba minn esperjenzi simili fil-passat

(a)Il-ġestjoni tal-kwantità tal-UE hija meħtieġa biex jingħalqu l-lakuni fl-infurzar u tibqa’ impossibbli mingħajr il-parteċipazzjoni obbligatorja sħiħa tal-Istati Membri kollha;

(b)Ikun meħtieġ titjib fil-konnessjonijiet bejn is-sistemi sabiex ikunu jistgħu jsiru aġġornamenti kontinwi f’ħin reali (aktar milli stħarriġ perjodiku);

(c)Il-ħtieġa kontinwa li l-operaturi ekonomiċi jipprovdu dokumenti stampati flimkien ma’ dawk diġitali tillimita l-benefiċċji li jistgħu jiksbu l-operaturi ekonomiċi; is-soluzzjoni tal-kwistjoni tkun teħtieġ qafas leġiżlattiv li jagħti valur legali lill-firem diġitali.

1.5.4.Kompatibbiltà u sinerġija possibbli ma’ strumenti xierqa oħrajn

1.6.Durata u impatt finanzjarju

◻ Proposta/inizjattiva ta’ durata limitata

–◻    Proposta/inizjattiva fis-seħħ minn [JJ/XX]SSSS sa [JJ/XX]SSSS

–◻    Impatt finanzjarju minn SSSS sa SSSS

☒ Proposta/inizjattiva ta’ durata mhux limitata

–Implimentazzjoni b’perjodu ta’ tnedija mill-2022 sal-2029,

–u wara dan jibda l-operat sħiħ.

1.7.Mod(i) ta’ ġestjoni ppjanat(i) 56  

☒ Ġestjoni diretta mill-Kummissjoni

–☒ mid-dipartimenti tagħha, inkluż mill-persunal tagħha fid-delegazzjonijiet tal-Unjoni;

–◻    mill-aġenziji eżekuttivi

◻ Ġestjoni konġunta mal-Istati Membri

◻ Ġestjoni indiretta billi l-kompiti tal-implimentazzjoni baġitarja jiġu fdati lil:

–◻ pajjiżi terzi jew il-korpi li ħatru;

–◻ organizzazzjonijiet internazzjonali u l-aġenziji tagħhom (jridu jiġu speċifikati);

–◻il-BEI u l-Fond Ewropew tal-Investiment;

–◻ il-korpi msemmija fl-Artikoli 208 u 209 tar-Regolament Finanzjarju;

–◻ korpi tal-liġi pubblika;

–◻ korpi regolati bil-liġi privata b’missjoni ta’ servizz pubbliku sa fejn jipprovdu garanziji finanzjarji adegwati;

–◻ korpi regolati bil-liġi privata ta’ Stat Membru li jkunu fdati bl-implimentazzjoni ta’ sħubija pubblika-privata u li jipprovdu garanziji finanzjarji adegwati;

–◻ persuni fdati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku rilevanti.

–Jekk jiġi indikat iżjed minn mod wieħed ta’ ġestjoni, jekk jogħġbok ipprovdi d-dettalji fit-taqsima “Kummenti”.

Kummenti

2.MIŻURI TA’ ĠESTJONI

2.1.Regoli dwar il-monitoraġġ u r-rapportar

Speċifika l-frekwenza u l-kundizzjonijiet.

2.2.Sistema ta’ ġestjoni u kontroll

2.2.1.Riskju(i) identifikat(i)

2.2.2.Tagħrif li jikkonċerna l-istruttura tas-sistema ta’ kontroll intern

2.2.3.Stima tal-kostijiet u l-benefiċċji tal-kontrolli u valutazzjoni tal-livell mistenni ta’ riskju ta’ żball

2.3.Miżuri għall-prevenzjoni tal-frodi u l-irregolaritajiet

Speċifika l-miżuri ta’ prevenzjoni u ta’ protezzjoni eżistenti jew previsti.

3.IMPATT FINANZJARJU STMAT TAL-PROPOSTA/INIZJATTIVA

3.1.Intestatura/i tal-qafas finanzjarju pluriennali u tal-linja/i baġitarja/i tan-nefqa affettwata/i

·Linji baġitarji eżistenti

Skont l-intestaturi u l-linji baġitarji tal-qafas finanzjarju pluriennali.

·Linji baġitarji ġodda mitlubin

Skont l-intestaturi u l-linji baġitarji tal-qafas finanzjarju pluriennali.

3.2.L-impatt stmat fuq in-nefqa

[Din it-taqsima jenħtieġ li timtela fl-użu tat- tabella ta’ kalkolu dwar data baġitarja ta’ natura amministrattiva (it-tieni dokument fl-anness għal din id-dikjarazzjoni finanzjarja) u mtella’ fuq CISNET għal finijiet ta’ konsultazzjoni interservizz.]

3.2.1.Sommarju tal-impatt stmat fuq in-nefqa

EUR miljun (sa tliet punti deċimali)

Jekk iżjed minn intestatura waħda hija affettwata mill-proposta / inizjattiva:

EUR miljun (sa tliet punti deċimali)

EUR miljun (sa tliet punti deċimali)

3.2.2.Impatt stmat fuq l-approprjazzjonijiet operazzjonali

–◻    Il-proposta/L-inizjattiva ma teħtieġx l-użu ta’ approprjazzjonijiet operazzjonali

–☒    Il-proposta/l-inizjattiva teħtieġ l-użu ta’ approprjazzjonijiet operazzjonali, kif spjegat hawn taħt:

Approprjazzjonijiet ta’impenn f’EUR miljuni (sa tliet punti deċimali)

3.2.3.Stima tal-impatt fuq l-approprjazzjonijiet ta’ natura amministrattiva

3.2.3.1.Sommarju

–◻    Il-proposta/l-inizjattiva ma teħtieġx l-użu ta’ approprjazzjonijiet ta’ natura amministrattiva

–☒    Il-proposta/l-inizjattiva teħtieġ l-użu ta’ approprjazzjonijiet ta’ natura amministrattiva, kif spjegat hawn taħt:

EUR miljun (sa tliet punti deċimali)

L-approprjazzjonijiet meħtieġa għar-riżorsi umani u għal infiq ieħor ta’ natura amministrattiva se jiġu ssodisfati b’approprjazzjonijiet mid-DĠ li diġà jkunu assenjati għall-ġestjoni tal-azzjoni u/jew kienu ġew ridistribwiti fid-DĠ, flimkien, jekk dan ikun neċessarju, ma’ kwalunkwe allokazzjoni addizzjonali li tista’ tingħata lid-DĠ maniġerjali skont il-proċedura annwali ta’ allokazzjoni u fid-dawl tal-limitazzjonijiet baġitarji.

3.2.3.2.Rekwiżiti stmati tar-riżorsi umani

–◻    Il-proposta/inizjattiva ma tirrikjedix l-użu tar-riżorsi umani.

–☒    Il-proposta/l-inizjattiva tirrikjedi l-użu tar-riżorsi umani, kif spjegat hawn taħt:

L-istima li trid tingħata f’unitajiet ekwivalenti għall-full time

XX huwa l-qasam ta’ politika jew it-titolu baġitarju kkonċernat.

Ir-riżorsi umani meħtieġa jiġu mill-persunal tad-DĠ li diġà jkun assenjat għall-immaniġġjar tal-azzjoni u/jew ġie riallokat fid-DĠ, jekk ikun meħtieġ, flimkien ma’ kull allokazzjoni addizzjonali li tista’ tingħata lid-DĠ maniġerjali skont il-proċedura annwali ta’ allokazzjoni u fid-dawl tal-limiti baġitarji.

Deskrizzjoni tal-kompliti li jridu jitwettqu:

3.2.4.Kompatibbiltà mal-qafas finanzjarju pluriennali attwali

–◻    Il-proposta/l-inizjattiva hija kompatibbli mal-qafas finanzjarju pluriennali attwali.

–◻    Il-proposta/l-inizjattiva se tirrikjedi riprogrammazzjoni tal-intestatura rilevanti fil-qafas finanzjarju pluriennali.

–◻    Il-proposta/l-inizjattiva teħtieġ applikazzjoni tal-istrument ta’ flessibbiltà jew reviżjoni tal-qafas finanzjarju pluriennali.

3.2.5.Kontribuzzjonijiet tal-parti terza

–☒Il-proposta/L-inizjattiva ma tipprovdix għal kofinanzjament minn partijiet terzi.

–- Il-proposta/l-inizjattiva tipprevedi l-kofinanzjament stmat ta’ hawn taħt:

Approprjazzjonijiet f’EUR miljuni (aġġustati ’l fuq għal tliet pożizzjonijiet deċimali)

3.3.Impatt stmat fuq id-dħul

–☒    Il-proposta/l-inizjattiva ma għandha l-ebda impatt finanzjarju fuq id-dħul.

–◻    Il-proposta/L-inizjattiva għandha l-impatt finanzjarju li ġej:

–◻    fuq ir-riżorsi proprji

–◻    fuq id-dħul mixxellanju

EUR miljun (sa tliet punti deċimali)

Għad-dħul mixxellanju “assenjat”, speċifika l-linja/i baġitarja/i tan-nefqa affettwata/i.

Speċifika l-metodu biex jiġi kkalkolat l-impatt fuq id-dħul. 

(1)    Ir-Regolament (UE) Nru 952/2013 tal-Parlament Ewropew u tal-Kunsill tad-9 ta’ Ottubru 2013 li jistabbilixxi l-Kodiċi Doganali tal-Unjoni (ĠU L 269, 10.10.2013, p. 1).

(2)    Dan in-numru jirrifletti l-lista uffiċjali ta’ projbizzjonijiet u restrizzjonijiet. Fil-verità, l-għadd ta’ regoli li jridu jiġu infurzati fil-fruntieri esterni tal-UE huwa saħansitra ogħla. Pereżempju, ir-rekwiżiti għas-sorveljanza tas-suq u l-konformità tal-prodott stabbiliti fir-Regolament (KE) Nru 765/2008 (li jrid jiġi sostitwit fl-2021 bir-Regolament (UE) 2019/1020) huma wieħed mis-60 element ta’ projbizzjonijiet u restrizzjonijiet iżda huma relatati mal-infurzar ta’ aktar minn 100 biċċa leġiżlazzjoni tal-UE li jirregolaw il-prodotti.

(3)    Il-konformità tal-prodotti ma tkoprix biss il-konformità mal-leġiżlazzjoni dwar il-konformità tal-prodotti iżda tkopri wkoll rekwiżiti oħra bħalma huma s-sikurezza tal-prodotti u l-aċċessibilità għal persuni b’diżabbiltà.

(4)    Id-Deċiżjoni Nru 70/2008/KE tal-Parlament Ewropew u tal-Kunsill tal-15 ta’ Jannar 2008 dwar ambjent mingħajr karti għad-dwana u l-kummerċ (ĠU L 23, 26/01/2008, p. 21).

(5)    ST-16507/14.

(6)    COM (2016) 813 final.

(7)    7585/1/17 REV 1.

(8)    COM (2018) 524 final.

(9)    L-attività ta’ monitoraġġ u ġestjoni tal-kwantità ta’ merkanzija awtorizzata mill-awtoritajiet kompetenti sħab skont il-leġiżlazzjoni tal-Unjoni mhux doganali bbażata fuq l-informazzjoni pprovduta mill-awtoritajiet doganali dwar l-iżdoganar ta’ kunsinni relatati.

(10)    https://ec.europa.eu/commission/sites/beta-political/files/political-guidelines-next-commission_mt.pdf

(11)    COM (2020) 581 final.

(12)    SWD(2020) 213 finali.

(13)    L-interoperabbiltà hija definita mill-Qafas Ewropew għall-Interoperabbiltà bħala “il-kapaċità tal-organizzazzjonijiet li jinteraġixxu lejn għanijiet komuni ta’ benefiċċju reċiproku u maqbula, li jinvolvu l-kondiviżjoni ta’ informazzjoni u għarfien bejn dawn l-organizzazzjonijiet, permezz tal-proċessi tan-negozju li huma jappoġġaw, bl-iskambju ta’ data bejn is-sistemi tal-ICT tagħhom. https://ec.europa.eu/isa2/sites/isa/files/isa_annex_ii_eif_en.pdf

(14)    Id-Deċiżjoni ta’ Implimentazzjoni tal-Kummissjoni (UE) 2019/2151 tat-13 ta’ Diċembru 2019 li tistabbilixxi l-programm ta’ ħidma relatat mal-iżvilupp u t-tnedija tas-sistemi elettroniċi previsti fil-Kodiċi Doganali tal-Unjoni C/2019/8803.

(15)    COM/2016/0179 final.    

(16)    https://ec.europa.eu/digital-single-market/en/news/ministerial-declaration-egovernment-tallinn-declaration

(17)    Il-Prinċipju ta’ Darba Biss jinvolvi li ċ-ċittadini u n-negozji jipprovdu data varjata darba biss meta jkollhom kuntatt mal-amministrazzjonijiet pubbliċi, filwaqt li l-korpi tal-amministrazzjoni pubblika jieħdu azzjonijiet biex jikkondividu u jużaw mill-ġdid din id-data internament, anke transfruntiera, dejjem f’konformità mar-regolamenti dwar il-protezzjoni tad-data u restrizzjonijiet oħra.

(18)    Ir-Regolament (UE) Nru 910/2014 tal-Parlament Ewropew u tal-Kunsill tat-23 ta’ Lulju 2014 dwar l-identifikazzjoni elettronika u s-servizzi fiduċjarji għal transazzjonijiet elettroniċi fis-suq intern u li jħassar id-Direttiva 1999/93/KE (ĠU L 257, 28.8.2014, p. 73).

(19)    COM (2020) 67 final.

(20)    Ir-Regolament ta’ Implimentazzjoni tal-Kummissjoni (UE) 2019/1715 tat-30 ta’ Settembru 2019 li jistabbilixxi r-regoli għat-tħaddim tas-sistema ta’ ġestjoni tal-informazzjoni għall-kontrolli uffiċjali u l-komponenti tas-sistema tagħha (“ir-Regolament IMSOC”) (ĠU L 261, 14.10.2019, p. 37).

(21)    Ir-Regolament (UE) 2019/1020 tal-Parlament Ewropew u tal-Kunsill dwar is-sorveljanza tas-suq u l-konformità tal-prodotti (ĠU L 169, 25.6.2019, p. 1).

(22)    Il-verżjoni konsolidata tat-Trattat dwar il-Funzjonament tal-Unjoni Ewropea (ĠU C 326, 26.10.2012, p. 47).

(23)    Ħlief l-Irlandiż, minħabba restrizzjonijiet fuq ir-riżorsi.

(24)    https://ec.europa.eu/info/law/better-regulation/have-your-say/initiatives/1739-EU-Single-Window-environment-for-customs

(25)    SWD(2020) xxx final.

(26)    Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1).

(27)    Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).

(28)    B’mod partikolari, is-CSW-CERTEX tal-UE jenħtieġ li tkopri r-rekwiżiti sanitarji u fitosanitarji, ir-regoli li jirregolaw l-importazzjoni ta’ prodotti organiċi, ir-rekwiżiti ambjentali fir-rigward tal-gassijiet serra fluworinati u s-sustanzi li jnaqqsu l-ożonu, u l-formalitajiet relatati mal-importazzjoni ta’ beni kulturali.

(29)    ĠU C [...], [...], p. [...]

(30)    Ir-Regolament (UE) Nru 952/2013 tal-Parlament Ewropew u tal-Kunsill tad-9 ta’ Ottubru 2013 li jistabbilixxi l-Kodiċi Doganali tal-Unjoni (ĠU L 269, 10.10.2013, p. 1).

(31)    Id-Deċiżjoni Nru 70/2008/KE tal-Parlament Ewropew u tal-Kunsill tal-15 ta’ Jannar 2008 dwar ambjent mingħajr karti għad-dwana u l-kummerċ (ĠU L 23, 26.01.2008, p. 21).

(32)    Rapport finali mħejji minn Coffey International Development, Europe Economic Research Ltd u Ramboll Management Consulting fuq talba tal-Kummissjoni.

(33)    ST16507/14.

(34)    Anness għall-Konklużjonijiet tal-Kunsill tas-17 ta’ Diċembru 2014.

(35)    Id-Deċiżjoni tal-Kunsill (UE) 2015/1947 tal-1 ta’ Ottubru 2015 dwar il-konklużjoni, f’isem l-Unjoni Ewropea, tal-Protokoll li jemenda l-Ftehim ta’ Marrakexx li Jistabbilixxi l-Organizzazzjoni Dinjija tal-Kummerċ (ĠU L 284, 30.10.2015, p. 1).

(36)    Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni, Il-Pjan ta’ Azzjoni tal-UE dwar il-Gvern elettroniku għall-2016-2020 - Inħaffu t-trasformazzjoni diġitali tal-amministrazzjoni pubblika, COM(2016) 179 final tad-19 ta’ April 2016.

(37)    Ir-Regolament (UE) Nru 910/2014 tal-Parlament Ewropew u tal-Kunsill tat-23 ta’ Lulju 2014 dwar l-identifikazzjoni elettronika u s-servizzi fiduċjarji għal transazzjonijiet elettroniċi fis-suq intern u li jħassar id-Direttiva 1999/93/KE (ĠU L 257, 28.8.2014, p. 73).

(38)    Regolament (UE) 2018/1724 tal-Parlament Ewropew u tal-Kunsill tat-2 ta’ Ottubru 2018 li jistabbilixxi gateway diġitali unika li tipprovdi aċċess għal informazzjoni, għal proċeduri u għasservizzi ta’ assistenza u ta’ soluzzjoni tal-problemi u li jemenda r-Regolament (UE) Nru 1024/2012 (ĠU L 295, 21.11.2018, p. 1). 

(39)    Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).

(40)    Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1).

(41)    Il-Ftehim Interistituzzjonali bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar it-Tfassil Aħjar tal-Liġijiet (ĠU L 123, 12.5.2016, p. 1).

(42)    Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13).

(43)    ABM: ġestjoni bbażata fuq l-attività; ABB: ibbaġitjar ibbażat fuq l-attività.

(44)    Kif imsemmi fl-Artikolu 54(2)(a) jew (b) tar-Regolament Finanzjarju.

(45)    https://ec.europa.eu/taxation_customs/sites/taxation/files/com_2016_813_en.pdf

(46)     https://ec.europa.eu/info/sites/info/files/strategic-plan-2016-2020-dg-taxud_march2016_en.pdf

(47)     https://ec.europa.eu/digital-single-market/en/news/ministerial-declaration-egovernment-tallinn-declaration  

(48)    Proġett ta’ Skambju ta’ Ċertifikati tat-Tieqa Unika tal-UE għad-Dwana (CSW-CERTEX tal-UE)

(49)    Dikjarazzjoni integrata: l-informazzjoni kollha relatata mal-iżdoganar meħtieġa għat-twettiq tal-formalitajiet doganali u mhux doganali tal-Unjoni li jirregolaw il-kummerċ internazzjonali tal-merkanzija.

(50)    Id-Deċiżjoni Nru 70/2008/KE tal-Parlament Ewropew u tal-Kunsill tal-15 ta’ Jannar 2008 dwar ambjent mingħajr karti għad-dwana u l-kummerċ, ĠU L 23, 26/01/2008, p. 21-26.

(51)     http://data.consilium.europa.eu/doc/document/ST-16507-2014-INIT/mt/pdf    
(Id-Dikjarazzjoni ta’ Venezja hija annessa mal-Konklużjonijiet tal-Kunsill ta’ Diċembru 2014).

(52)    COM (2016) 813 final

(53)    Il-Komunikazzjoni tal-Kummissjoni lill-Kunsill u lill-Parlament Ewropew, “L-Ewwel Rapport Biennali dwar il-Progress fl-Iżvilupp tal-Unjoni Doganali tal-UE u l-Governanza tagħha”, COM/2018/524 final.

(54)    Sistema Esperta u tal-Kontroll tal-Kummerċ (TRACES)

(55)    CHED-A (Dokument Sanitarju Komuni tad-Dħul għall-Annimali) li qabel kien CVED-A – li jrid jiġi implimentat fis-CSW-CERTEX tal-UE sal-aħħar tal-2020.    CHED-P (Dokument Sanitarju Komuni tad-Dħul għall-Prodotti tal-Annimali) li qabel kien CVED-P - li jrid jiġi implimentat fis-CSW-CERTEX tal-UE sal-aħħar tal-2020.    CHED-D (Dokument Sanitarju Komuni tad-Dħul għall-Għalf u għall-Ikel ta’ Oriġini Mhux mill-Annimali) li qabel kien CED – li jrid jiġi implimentat fis-CSW-CERTEX tal-UE sa nofs l-2020.CHED-PP (Dokument Sanitarju Komuni tad-Dħul għall-Pjanti u l-Prodotti mill-Pjanti – li jrid jiġi implimentat fis-CSW-CERTEX tal-UE sa nofs l-2020.    COI (Ċertifikat ta’ Spezzjoni) għall-importazzjonijiet ta’ prodotti organiċi – li se ssir il-migrazzjoni tiegħu fis-CSW-CERTEX tal-UE sal-aħħar tal-2020.    FLEGT (Infurzar tal-Liġi, Tmexxija u Kummerċ fis-Settur Forestali) għall-importazzjonijiet tal-injam – li se ssir il-migrazzjoni tiegħu fis-CSW-CERTEX tal-UE sal-aħħar tal-2020. FGAS (Gassijiet fluworurati b’effett ta’ serra) – li jrid jiġi implimentat fis-CSW-CERTEX tal-UE sal-aħħar tal-2020.ODS (Sustanzi li Jnaqqsu l-Ożonu) - li jrid jiġi implimentat fis-CSW-CERTEX tal-UE sa nofs l-2020.    

(56)    Id-dettalji tal-modi ta’ ġestjoni u r-referenzi għar-Regolament Finanzjarju jinsabu fuq is-sit BudgWeb: http://www.cc.cec/budg/man/budgmanag/budgmanag_en.html

(57)    COM (2018) 442

(58)    Diff. = Approprjazzjonijiet differenzjati / Mhux diff. = Approprjazzjonijiet mhux differenzjati.

(59)    EFTA: Assoċjazzjoni Ewropea tal-Kummerċ Ħieles.

(60)    Pajjiżi kandidati u, meta jkun applikabbli, pajjiżi kandidati potenzjali mill-Balkani tal-Punent.

(61)    Is-Sena N hija s-sena li fiha tibda l-implimentazzjoni tal-proposta/inizjattiva.

(62)    Din tinkludi approprjazzjonijiet sal-2030 inkluża. L-impenn annwali mill-2030 ’il quddiem huwa 2,613

(63)    Assistenza teknika u/jew amministrattiva u nefqa li tappoġġja l-implimentazzjoni ta’ programmi u/jew azzjonijiet tal-UE (li qabel kienu l-linji “BA”), riċerka indiretta, riċerka diretta.

(64)    Is-sena N hija s-sena li fiha tibda l-implimentazzjoni tal-proposta/inizjattiva.

(65)    Assistenza teknika u/jew amministrattiva u nefqa li tappoġġja l-implimentazzjoni ta’ programmi u/jew azzjonijiet tal-UE (li qabel kienu l-linji “BA”), riċerka indiretta, riċerka diretta.

(66)    Spiża annwali

(67)    L-outputs huma prodotti u servizzi li jridu jiġu fornuti (eż.: numru ta’ skambji ta’ studenti ffinanzjati, numru ta’ kilometri ta’ toroq mibnija, eċċ.).

(68)    Kif deskritt fil-punt 1.4.2. “Objettiv(i) speċifiku/speċifiċi…”

(69)    Is-sena N hija s-sena li fiha tibda l-implimentazzjoni tal-proposta/inizjattiva.

(70)    Assistenza teknika u/jew amministrattiva u nefqa li tappoġġja l-implimentazzjoni ta’ programmi u/jew azzjonijiet tal-UE (li qabel kienu l-linji “BA”), riċerka indiretta, riċerka diretta.

(71)    5 fl-2028 (l-aħħar sena tal-fażi ta’ implimentazzjoni) u 4 mill-2029 ’il quddiem (fażi ta’ manutenzjoni)

(72)    3,8 fl-2008 (l-aħħar sena tal-fażi ta’ implimentazzjoni) u 3,5 mill-2029 ’il quddiem (fażi ta’ manutenzjoni)

(73)    AC= Persunal Kuntrattwali; AL = Persunal Lokali; END = Espert Nazzjonali Sekondat; INT = persunal tal-aġenzija; JED = Esperti Subalterni fid-Delegazzjonijiet.

(74)    Sottolimitu għall-persunal estern kopert mill-approprjazzjonijiet operazzjonali (li qabel kienu l-linji “BA”).

(75)    8,8 fl-2008 (l-aħħar sena tal-fażi ta’ implimentazzjoni) u 7,5 mill-2029 ’il quddiem (fażi ta’ manutenzjoni)

(76)    Fir-rigward tar-riżorsi proprji tradizzjonali (id-dazji doganali, l-imposti fuq iz-zokkor), l-ammonti indikati jridu jkunu ammonti netti, jiġifieri l-ammonti gross wara t-tnaqqis ta’ 25 % għall-ispejjeż tal-ġbir.

IL-KUMMISSJONI EWROPEA

Brussell, 28.10.2020

COM(2020) 673 final

ANNESS

tal-Proposta għal

REGOLAMENT TAL-PARLAMENT EWROPEW U TAL-KUNSILL

li jistabbilixxi l-Ambjent ta' Tieqa Unika tal-Unjoni Ewropea għad-Dwana u li jemenda r-Regolament (UE) Nru 952/2013

{SEC(2020) 360 final} - {SWD(2020) 237 final} - {SWD(2020) 238 final} - {SWD(2020) 239 final}

ANNESS

Formalitajiet tal-Unjoni mhux doganali koperti mis-CSW-CERTEX tal-UE

(1)    Ir-Regolament (UE) 2017/625 tal-Parlament Ewropew u tal-Kunsill tal-15 ta' Marzu 2017 dwar il-kontrolli uffiċjali u attivitajiet uffiċjali oħra mwettqa biex jiżguraw l-applikazzjoni tal-liġi tal-ikel u tal-għalf, ta' regoli dwar is-saħħa u t-trattament xieraq tal-annimali, dwar is-saħħa tal-pjanti u dwar prodotti għall-protezzjoni tal-pjanti, li jemenda r-Regolamenti (KE) Nru 999/2001, (KE) Nru 396/2005, (KE) Nru 1069/2009, (KE) Nru 1107/2009, (UE) Nru 1151/2012, (UE) Nru 652/2014, (UE) 2016/429 u (UE) 2016/2031 tal-Parlament Ewropew u tal-Kunsill, ir-Regolamenti tal-Kunsill (KE) Nru 1/2005 u (KE) Nru 1099/2009 u d-Direttivi tal-Kunsill 98/58/KE, 1999/74/KE, 2007/43/KE, 2008/119/KE u 2008/120/KE, u li jħassar ir-Regolamenti (KE) Nru 854/2004 u (KE) Nru 882/2004 tal-Parlament Ewropew u tal-Kunsill, id-Direttivi tal-Kunsill 89/608/KEE, 89/662/KEE, 90/425/KEE, 91/496/KEE, 96/23/KE, 96/93/KE u 97/78/KE u d-Deċiżjoni tal-Kunsill 92/438/KEE (Regolament dwar il-Kontrolli Uffiċjali) (ĠU L 95, 7.4.2017, p. 1).

(2)    Ir-Regolament ta’ Implimentazzjoni tal-Kummissjoni (UE) 2019/1715 tat-30 ta’ Settembru 2019 li jistabbilixxi r-regoli għat-tħaddim tas-sistema ta’ ġestjoni tal-informazzjoni għall-kontrolli uffiċjali u l-komponenti tas-sistema tagħha (ir-Regolament IMSOC) (ĠU L 261, 14.10.2019, p. 37).

(3)    Ir-Regolament tal-Kunsill (KE) Nru 834/2007 tat-28 ta’ Ġunju 2007 dwar il-produzzjoni organika u t-tikkettar ta’ prodotti organiċi u li jħassar ir-Regolament (KEE) Nru 2092/91 (ĠU L 189, 20.7.2007, p. 1).

(4)    Ir-Regolament tal-Kummissjoni (KE) Nru 1235/2008 tat-8 ta’ Diċembru 2008 li jistabbilixxi r-regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar l-arranġamenti għall-importazzjonijiet ta’ prodotti organiċi minn pajjiżi terzi (ĠU L 334, 12.12.2008, p. 25).

(5)    Ir-Regolament (KE) Nru 1005/2009 tal-Parlament Ewropew u tal-Kunsill tas-16 ta' Settembru 2009 dwar sustanzi li jnaqqsu s-saff tal-ożonu (ĠU L 286, 31.10.2009, p. 1).

(6)    Ir-Regolament tal-Kummissjoni (UE) Nru 537/2011 tal-1 ta' Ġunju 2011 dwar il-mekkaniżmu għall-allokazzjoni tal-kwantitajiet ta' sustanzi kkontrollati li jistgħu jintużaw fil-laboratorji u għal skopijiet ta' analiżi fl-Unjoni skont ir-Regolament (KE) Nru 1005/2009 tal-Parlament Ewropew u tal-Kunsill dwar sustanzi li jnaqqsu s-saff tal-ożonu (ĠU L 147, 2.6.2011, p. 4).

(7)    Ir-Regolament (UE) Nru 517/2014 tal-Parlament Ewropew u tal-Kunsill tas-16 ta’ April 2014 dwar gassijiet fluworurati b’effett ta’ serra u li jħassar ir-Regolament (KE) Nru 842/2006 (ĠU L 150, 20.5.2014, p. 195).

(8)    Ir-Regolament ta’ Implimentazzjoni tal-Kummissjoni (UE) Nru 1191/2014 tat-30 ta’ Ottubru 2014 li jiddetermina l-format u l-mezzi għall-preżentazzjoni tar-rapport imsemmi fl-Artikolu 19 tar-Regolament (UE) Nru 517/2014 tal-Parlament Ewropew u tal-Kunsill dwar gassijiet fluworurati b’effett ta’ serra (ĠU L 318, 5.11.2014, p. 5).

(9)    Ir-Regolament (UE) 2019/880 tal-Parlament Ewropew u tal-Kunsill tas-17 ta’ April 2019 dwar l-introduzzjoni u l-importazzjoni ta’ beni kulturali (ĠU L 151, 7.6.2019, p. 1).