This document is an excerpt from the EUR-Lex website
Document 52020PC0472
Proposal for a COUNCIL DECISION on the position to be taken on behalf of the European Union as regards the amendments to the Annexes of the European Agreement concerning the International Carriage of Dangerous Goods by Road (ADR) and to the Annexed Regulations to the European Agreement concerning the International Carriage of Dangerous Goods by Inland Waterways (ADN)
Proposta għal DEĊIŻJONI TAL-KUNSILL dwar il-pożizzjoni li trid tittieħed f’isem l-Unjoni Ewropea fir-rigward tal-emendi għall-Annessi tal-Ftehim Ewropew dwar it-Trasport Internazzjonali ta’ Oġġetti Perikolużi bit-Triq (ADR) u għar-Regolamenti Annessi tal-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (ADN)
Proposta għal DEĊIŻJONI TAL-KUNSILL dwar il-pożizzjoni li trid tittieħed f’isem l-Unjoni Ewropea fir-rigward tal-emendi għall-Annessi tal-Ftehim Ewropew dwar it-Trasport Internazzjonali ta’ Oġġetti Perikolużi bit-Triq (ADR) u għar-Regolamenti Annessi tal-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (ADN)
COM/2020/472 final
IL-KUMMISSJONI EWROPEA
Brussell, 31.8.2020
COM(2020) 472 final
2020/0226(NLE)
Proposta għal
DEĊIŻJONI TAL-KUNSILL
dwar il-pożizzjoni li trid tittieħed f’isem l-Unjoni Ewropea fir-rigward tal-emendi għall-Annessi tal-Ftehim Ewropew dwar it-Trasport Internazzjonali ta’ Oġġetti Perikolużi bit-Triq (ADR) u għar-Regolamenti Annessi tal-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (ADN)
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li trid tittieħed f’isem l-Unjoni fir-rigward tal-emendi għall-Annessi tal-Ftehim Ewropew dwar it-Trasport Internazzjonali ta’ Oġġetti Perikolużi bit-Triq (ADR) u għar-Regolamenti Annessi mal-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (ADN), kif applikabbli mill-1 ta’ Jannar 2021, b’rabta mat-tmiem tal-perjodu ta’ waqfien previst li fih il-membri tal-partijiet kontraenti tal-Grupp ta’ Ħidma dwar it-Trasport ta’ Oġġetti Perikolużi (WP.15) u l-Kumitat Amministrattiv tal-ADN jistgħu joġġezzjonaw għall-emendi proposti għall-edizzjoni tal-2021.
2.Kuntest tal-proposta
L-Annessi u r-Regolamenti msemmija hawn fuq, magħrufa l-aktar bħala l-Annessi tal-ADR u r-Regolamenti Annessi mal-ADN, jirregolaw it-trasport internazzjonali ta’ oġġetti perikolużi bit-triq u fuq passaġġi tal-ilma interni, rispettivament, bejn il-membri tal-Kummissjoni Ekonomika għall-Ewropa tan-Nazzjonijiet Uniti (UNECE) li huma wkoll Partijiet Kontraenti tal-ADR u l-ADN.
L-iżvilupp tat-trasport ta’ oġġetti perikolużi bit-triq u fuq passaġġi tal-ilma interni, kemm fl-Unjoni kif ukoll bejn l-Unjoni u l-pajjiżi ġirien, huwa komponent ewlieni tal-politika komuni Ewropea dwar it-trasport u jiżgura t-tħaddim tajjeb tal-oqsma industrijali kollha li jipproduċu jew li jużaw prodotti kklassifikati bħala perikolużi skont l-ADR u l-ADN. Għalhekk, l-adattament għall-progress tekniku u xjentifiku ta’ dawn il-ftehimiet huwa essenzjali biex jippermetti l-iżvilupp tat-trasport u tas-setturi industrijali assoċjati fil-katina ekonomika. L-emendi għandhom l-għan li jallinjaw l-ADR u l-ADN mar-Regolamenti Mudell tan-NU, li jinkludu definizzjonijiet ġodda, kriterji ta’ klassifikazzjoni u numri NU, rekwiżiti tal-ippakkjar / tat-tikkettar, l-aġġornament ta’ standards applikabbli u ta’ dispożizzjonijiet tekniċi kif ukoll korrezzjonijiet editorjali.
Id-dispożizzjonijiet internazzjonali relatati mat-trasport ta’ oġġetti perikolużi huma stabbiliti f’diversi organizzazzjonijiet internazzjonali bħall-UNECE, l-Organizzazzjoni Intergovernattiva għat-Trasport Internazzjonali bil-Ferrovija (OTIF) u diversi korpi speċjalizzati tan-Nazzjonijiet Uniti. Minħabba li r-regoli jridu jkunu kompatibbli ma’ xulxin, ġiet żviluppata sistema internazzjonali kumplessa għall-koordinazzjoni u l-armonizzazzjoni bejn l-organizzazzjonijiet involuti f’dan ix-xogħol. Id-dispożizzjonijiet jiġu adattati wara ċiklu ta’ sentejn.
2.1.Il-Ftehim Ewropew dwar it-Trasport Internazzjonali ta’ Oġġetti Perikolużi bit-Triq (ADR)
Il-Ftehim Ewropew dwar it-Trasport Internazzjonali ta’ Oġġetti Perikolużi bit-Triq (ADR) għandu l-għan li jirregola t-trasport internazzjonali ta’ oġġetti perikolużi bit-triq bejn l-Istati Membri tal-UNECE u stati oħrajn li japplikaw l-ADR (il-partijiet kontraenti tal-ADR). L-ADR daħal fis-seħħ fid-29 ta’ Jannar 1968.
L-Unjoni Ewropea mhijiex parti tal-Ftehim, iżda l-Istati Membri tagħha kollha huma partijiet kontraenti ta’ dan il-Ftehim.
2.2.Il-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (ADN)
Il-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (ADN) għandu l-għan li jirregola t-trasport internazzjonali ta’ oġġetti perikolużi fuq passaġġi tal-ilma interni bejn l-Istati Membri tal-UNECE li japplikaw l-ADN (il-partijiet kontraenti tal-ADN). L-ADN daħal fis-seħħ fit-28 ta’ Frar 2008.
L-Unjoni Ewropea mhijiex parti tal-Ftehim, iżda 13 mill-Istati Membri tagħha huma partijiet kontraenti ta’ dan il-Ftehim.
2.3.Il-Grupp ta’ Ħidma dwar it-Trasport ta’ Oġġetti Perikolużi (WP.15) u l-Kumitat Amministrattiv tal-ADN
Il-grupp ta’ Ħidma dwar it-Trasport ta’ Oġġetti Perikolużi (WP.15) u l-Kumitat Amministrattiv tal-ADN u l-Kumitat tas-Sikurezza tal-ADN (WP.15/AC.2) huma l-korpi stabbiliti b’konformità mal-UNECE sabiex jiddeċiedu dwar l-emendi għall-ADR u għall-ADN. Dawn il-korpi huma magħmula mir-rappreżentanti tal-Istati Membri tal-UNECE li japplikaw l-ADR u l-ADN. Kull parti kontraenti tal-ADR u tal-ADN għandha vot wieħed.
Skont il-Kapitolu VII - “Votazzjoni” tat-Termini ta’ Referenza u r-Regoli ta’ Proċedura tad-WP.15, huma biss dawk li jipparteċipaw bis-sħiħ li jkollhom vot wieħed kull wieħed fid-WP.15 u d-deċiżjonijiet ta’ dan il-korp għandhom prinċipalment jittieħdu b’kunsens. Il-Grupp ta’ Ħidma WP.15 jivvota b’turija tal-idejn.
Skont l-Artikolu 17(7) tal-ADN, kull Parti Kontraenti rappreżentata fis-sessjoni tal-Kumitat Amministrattiv tal-ADN għandu jkollha vot wieħed.
L-emendi adottati matul il-perjodu ta’ sentejn 2018-2020 jinkludu serje wiesgħa ta’ adattamenti għall-progress tekniku u xjentifiku.
Għall-ADR, id-WP.15 ħa d-deċiżjoni dwar dawn l-emendi proposti f’kull waħda mis-sessjonijiet imsemmija fit-taqsima 2.4 hawn taħt. Għall-ADN, il-Kumitat Amministrattiv iddeċieda dwar l-emendi fl-24 sessjoni tiegħu f’Ġinevra, fil-31 ta’ Jannar 2020.
Skont l-Artikolu 14 tal-ADR, ladarba tiġi deċiża mid-WP.15, kwalunkwe emenda proposta għall-Annessi tal-ADR għandha titqies bħala aċċettata sakemm, fi żmien tliet xhur mid-data li fiha s-Segretarju Ġenerali tan-Nazzjonijiet Uniti jiċċirkolaha, mill-inqas terz tal-Partijiet Kontraenti jew ħamsa minnhom jekk terz jaqbeż dik iċ-ċifra, ma jkunux taw notifika bil-miktub lis-Segretarju Ġenerali bl-oġġezzjoni tagħhom għall-emenda proposta.
Skont l-Artikolu 20 tal-ADN, ladarba tiġi deċiża mill-Kumitat Amministrattiv tal-ADN, l-emendi għandhom jitqiesu bħala aċċettati sakemm, fi żmien tliet xhur mid-data li fiha s-Segretarju Ġenerali tan-Nazzjonijiet Uniti jiċċirkolaha, mill-inqas terz tal-Partijiet Kontraenti jew ħamsa minnhom jekk terz jaqbeż dik iċ-ċifra, ma jkunux taw notifika bil-miktub lis-Segretarju Ġenerali bl-oġġezzjoni tagħhom għall-emenda proposta.
L-emendi li qed jiġu adottati mid-WP.15, kif ippreżentati fid-dokumenti li jinsabu fl-Anness ta’ din il-proposta, intbagħtu lis-Segretarju Ġenerali tan-Nazzjonijiet Uniti sabiex ikunu jistgħu jiġu nnotifikati lill-Partijiet Kontraenti tal-ADR fl-1 ta’ Lulju 2020 għall-aċċettazzjoni f’konformità mal-proċedura stipulata fl-Artikolu 14 tal-ADR u huma disponibbli online 1 .
L-emendi adottati mill-Kumitat Amministrattiv tal-ADN, kif ippreżentati fid-dokumenti li jinsabu fl-Anness ta’ din il-proposta, ġew innotifikati mis-Segretarju Ġenerali tan-Nazzjonijiet Uniti lill-Partijiet Kontraenti tal-ADN fl-1 ta’ Lulju 2020 għall-aċċettazzjoni f’konformità mal-proċedura stipulata fl-Artikolu 20 tal-ADN u huma disponibbli online 2 .
Sat-30 ta’ Settembru 2020, is-Segretarju Ġenerali tan-Nazzjonijiet Uniti, fil-kapaċità tiegħu bħala depożitarju, jista’ jirċievi oġġezzjonijiet għall-emendi għall-ADR u l-ADN kif adottati fis-sessjonijiet imsemmija fil-punt 2.3 ta’ hawn fuq.
2.4.L-atti previsti tad-WP.15 u tal-Kumitat Amministrattiv tal-ADN
L-iskop tal-atti previsti huwa li jadattaw l-Annessi tal-ADR u r-Regolamenti annessi tal-ADN għall-progress tekniku u xjentifiku.
B’mod partikolari, l-eżenzjoni applikabbli għal-loggers tad-data u għall-apparat ta’ lokalizzazzjoni tal-merkanzija li jaħdem bil-batteriji ġiet iċċarata, iddaħħlu definizzjonijiet ġodda eż. “rata tad-doża” jew ġew emendati d-definizzjonijiet eżistenti eż. “Temperatura tad-dekompożizzjoni li taċċellera waħedha (SADT)” u “Temperatura tal-polimerizzazzjoni li taċċellera waħedha (SAPT)”. Ir-regoli applikabbli għall-klassifikazzjoni ta’ oġġetti perikolużi ġew iċċarati fiż-żewġ ftehimiet, b’mod partikolari fir-rigward tal-isplussivi, tal-materjal radjuattiv, tas-sustanzi korrużivi eċċ. Iddaħħlu bosta entrati ġodda fil-lista ta’ oġġetti perikolużi, eż. UN 0511 DETONATURI, ELETTRONIĊI programmabbli għall-blasting, UN 3549 SKART MEDIKU, KATEGORIJA A, LI JAFFETTWA LILL-BNIEDEM, solidu jew SKART MEDIKU, KATEGORIJA A, LI JAFFETTWA LILL-ANNIMALI biss, solidu. Saru diversi emendi għad-dispożizzjonijiet speċjali dwar l-imballaġġ, u ġew previsti regoli ġodda għal: l-imballaġġ użat għal kombinament ta’ batteriji tal-litju li jinsab fit-tagħmir u batteriji tal-litju li jiġu ppakkjati mat-tagħmir, in-nitroċelluloża u t-tagħbija mħallta ta’ sustanzi splussivi u oġġetti.
Matul il-preparazzjoni ta’ dawn l-emendi ġew ikkonsultati firxa kbira ta’ esperti mis-settur pubbliku u privat. Matul l-iżvilupp ta’ dawn l-emendi saru l-laqgħat tekniċi li ġejjin:
– fis-Sottokumitat ta’ Esperti dwar it-Trasport ta’ Oġġetti Perikolużi tal-ECOSOC tan-NU:
(1) fil-51 sessjoni tiegħu f’Ġinevra, mit-3 sas-7 ta’ Lulju 2017;
(2) fit-52 sessjoni tiegħu f’Ġinevra, mis-27 ta’ Novembru sas-6 ta’ Diċembru 2017;
(3) fit-53 sessjoni tiegħu f’Ġinevra, mill-25 ta’ Ġunju sal-4 ta’ Lulju 2018;
(4) fl-54 sessjoni tiegħu f’Ġinevra, mis-26 ta’ Novembru sal-4 ta’ Diċembru 2018;
– fil-Laqgħa Konġunta tal-Kumitat ta’ Esperti tar-RID tal-OTIF-UNECE u d-WP.15:
(1) fis-sessjoni tiegħu tal-ħarifa tal-2018 f’Ġinevra, mis-17 sal-21 ta’ Settembru 2018;
(2) fis-sessjoni tiegħu tar-rebbiegħa tal-2019 f’Bern, mit-18 sat-22 ta’ Marzu 2019;
(3) fis-sessjoni tiegħu tal-ħarifa tal-2019 f’Ġinevra, mis-17 sas-26 ta’ Settembru 2019;
– għall-ADR, fid-WP.15:
(1) fil-105 sessjoni tiegħu f’Ġinevra, mis-6 sad-9 ta’ Novembru 2018,
(2) fil-106 sessjoni tiegħu f’Ġinevra, mit-13 sas-17 ta’ Mejju 2019,
(3) fil-107 sessjoni tiegħu f’Ġinevra, mill-11 sal-15 ta’ Novembru 2019,
(4) fil-108 sessjoni tiegħu f’Ġinevra, mill-11 sal-15 ta’ Mejju 2020. Din is-sessjoni ġiet posposta minħabba l-kriżi tal-COVID-2019; madankollu, l-Istati Membri ġew ikkonsultati fi proċedura bil-miktub mill-President tal-WP.15 u mis-Segretarjat tal-UNECE dwar l-emendi editorjali li għad kellhom bżonn jiddaħħlu fl-ADR 2021. Minħabba l-iskadenza tas-15 ta’ Mejju 2020 għall-kummenti, fit-8 ta’ Mejju 2020 il-Kummissjoni organizzat vidjokonferenza. L-Istati Membri rċevew b’mod pożittiv il-proposti għall-emendi editorjali u kien hemm qbil unanimu dwar il-proposta finali magħmula bil-miktub mis-Segretarjat tal-UNECE.
– għall-ADN, fil-Kumitat tas-Sikurezza tal-ADN (WP.15/AC.2):
(1)fit-33 sessjoni tiegħu f’Ġinevra, mis-27 sal-31 ta’ Awwissu 2018,
(2)fl-34 sessjoni tiegħu f’Ġinevra, mill-21 sal-25 ta’ Jannar 2019,
(3)fil-35 sessjoni tiegħu f’Ġinevra, mis-26 sat-30 ta’ Awwissu 2019,
(4)fis-36 sessjoni tiegħu f’Ġinevra, mis-27 sal-31 ta’ Jannar 2020,
u l-Kumitat Amministrattiv tal-ADN fl-24 sessjoni tiegħu f’Ġinevra, fil-31 ta’ Jannar 2020.
Waqt dawn il-laqgħat, il-Kumitati ta’ Esperti analizzaw u pproċessaw il-proposti individwali għall-emendi. Ħafna drabi, l-azzjoni rakkomandata ġiet maqbula b’mod unanimu. Ċerti proposti ġew rakkomandati mill-maġġoranza tal-esperti.
Sakemm l-emendi proposti għall-Annessi tal-ADR, kif innotifikati mis-Segretarju Ġenerali tan-Nazzjonijiet Uniti, ma jitqisux miċħuda skont l-Artikolu 14(3) fi żmien tliet xhur mid-data tan-notifika, jiġifieri fl-1 ta’ Ottubru 2020, l-emendi inkwistjoni jidħlu fis-seħħ fl-1 ta’ Jannar 2021.
Sakemm l-emendi proposti għar-Regolament Annessi tal-ADN ma jitqisux miċħuda skont l-Artikolu 20(5) fi żmien tliet xhur mid-data tan-notifika, jiġifieri fl-1 ta’ Ottubru 2020, l-emendi inkwistjoni jidħlu fis-seħħ fl-1 ta’ Jannar 2021.
3.Pożizzjoni li trid tittieħed f’isem l-Unjoni
L-Unjoni Ewropea mhijiex parti kontraenti tal-ADR u l-ADN. Madankollu, il-fatt li l-Unjoni Ewropea ma tiħux sehem fi ftehim internazzjonali ma jipprekludihiex milli teżerċita l-kompetenza tagħha billi tistabbilixxi, permezz tal-istituzzjonijiet tagħha, pożizzjoni li trid tittieħed f’isimha fil-korp stabbilit permezz ta’ dan il-Ftehim, b’mod partikolari permezz tal-Istati Membri li huma partijiet kontraenti ta’ dak il-ftehim li jaġixxu b’mod konġunt fl-interess tagħha (ara s-sentenza l-Ġermanja vs Il-Kunsill, C-399/12 (“OIV”), il-paragrafu 52 u l-każistika msemmija).
Bħalissa hemm 52 Parti Kontraenti tal-ADR, u l-Istati Membri kollha tal-UE huma partijiet kontraenti ta’ dan il-Ftehim. Hemm ukoll 18-il Parti Kontraenti tal-ADN, u 13-il Stat Membru tal-UE huma partijiet kontraenti ta’ dan il-Ftehim.
Mill-1 ta’ Jannar 1997 l-Unjoni Ewropea applikat id-dispożizzjonijiet tal-ADR għat-trasport bit-triq ta’ oġġetti perikolużi fit-territorju tal-UE, inizjalment skont id-Direttiva tal-Kunsill 94/55/KE tal-21 ta’ Novembru 1994 dwar l-approssimazzjoni tal-liġijiet tal-Istati Membri fir-rigward tat-trasport tal-merkanzija perikoluża bit-triq 3 . Fl-2008, id-Direttiva 94/55/KE ġiet sostitwita bid-Direttiva 2008/68/KE 4 li ssegwi l-prinċipji tal-predeċessur tagħha. Mill-1 ta’ Jannar 2009, l-Unjoni Ewropea applikat id-dispożizzjonijiet tal-ADN għat-trasport ta’ oġġetti perikolużi mill-passaġġi fuq l-ilma interni.
L-Artikolu 4 tad-Direttiva 2008/68/KE, rigward pajjiżi terzi, jistabbilixxi li “t-trasport ta’ oġġetti perikolużi bejn l-Istati Membri u pajjiżi terzi għandu jiġi awtorizzat kemm-il darba jkun konformi mar-rekwiżiti tal-ADR, l-RID jew l-ADN, ħlief jekk ikun indikat mod ieħor fl-Annessi”.
Barra minn hekk, l-emendi msemmijin hawn fuq se jkollhom inċidenza fuq it-tħaddim tad-Direttiva 2008/68/KE fir-rigward tal-Artikolu 8 tagħha. Skont dik id-dispożizzjoni, il-Kummissjoni għandha s-setgħa li tadatta l-Anness I, it-Taqsima I.1 u l-Anness III, it-Taqsima III.1 tad-Direttiva 2008/68/KE għall-progress xjentifiku u tekniku, “partikolarment sabiex jitqiesu l-emendi għall-ADR, (...) u għall-ADN”.
4.Bażi ġuridika
4.1.Bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (it-TFUE) jipprevedi deċiżjonijiet li jistabbilixxu l-“pożizzjonijiet li għandhom jiġu adottati f’ isem l-Unjoni f’ sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
L-Artikolu 218(9) tat-TFUE japplika irrispettivament minn jekk l-Unjoni hijiex membru tal-korp jew parti tal-ftehim 5 .
Il-kunċett ta’ “atti li jkollhom effetti legali” jinkludi l-atti li jkollhom effetti legali bis-saħħa tar-regoli tad-dritt internazzjonali li jirregolaw is-sede kkonċernata. Jinkludi wkoll strumenti li ma jkollhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mill-korp leġiżlattiv tal-Unjoni” 6 .
4.1.2.Applikazzjoni għal dan il-każ
Id-WP.15 huwa korp stabbilit bi ftehim, jiġifieri l-Ftehim Ewropew dwar it-Trasport Internazzjonali ta’ Oġġetti Perikolużi bit-Triq (ADR).
Il-Kumitat Amministrattiv tal-ADN huwa korp stabbilit bi ftehim, jiġifieri l-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (ADN).
L-atti li ġew adottati mid-WP.15 u mill-Kumitat Amministrattiv tal-ADN jikkostitwixxu atti li jkollhom effetti legali. Bil-kundizzjonijiet deskritti hawn fuq, l-atti adottati se jkunu vinkolanti skont id-dritt internazzjonali f’konformità mal-Artikolu 14 tal-ADR u l-Artikolu 20 tal-ADN u huma kapaċi jinfluwenzaw b’mod deċiżiv il-kontenut tal-leġiżlazzjoni tal-UE, speċifikament id-Direttiva 2008/68/KE. Dan huwa minħabba li l-Artikolu 1 jagħmel obbligatorju l-użu ta’ dawn ir-regoli għat-trasport bit-triq u għat-trasport fuq passaġġi tal-ilma interni ta’ oġġetti perikolużi fl-Istati Membri u bejniethom u l-Artikolu 4 tad-Direttiva 2008/68/KE rigward il-pajjiżi terzi jistabbilixxi li “t-trasport ta’ oġġetti perikolużi bejn l-Istati Membri u pajjiżi terzi għandu jiġi awtorizzat kemm-il darba jkun konformi mar-rekwiżiti tal-ADR, l-RID jew l-ADN, ħlief jekk ikun indikat mod ieħor fl-Annessi”.
L-att previst ma jissupplimentax jew ma jemendax il-qafas istituzzjonali tal-Ftehim.
Għalhekk, il-bażi ġuridika proċedurali għad-deċiżjoni proposta hija l-Artikolu 218(9) tat-TFUE.
4.2.Bażi ġuridika sostantiva
4.2.1.Prinċipji
Il-bażi ġuridika sostantiva biex tittieħed deċiżjoni skont l-Artikolu 218(9) tat-TFUE tiddependi primarjament mill-objettiv u l-kontenut tal-att previst li dwaru tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawn l-għanijiet jew il-komponenti jkun jista’ jiġi identifikat bħala dak ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) tat-TFUE trid tkun imsejsa fuq bażi ġuridika sostantiva waħda, jiġifieri dik rikjesta mill-għan jew mill-komponent ewlieni jew predominanti.
4.2.2.Applikazzjoni għal dan il-każ
L-objettiv ewlieni u l-kontenut tad-Deċiżjoni għandhom x’jaqsmu mat-trasport ta’ oġġetti perikolużi bit-triq u fuq passaġġi tal-ilma interni. Għalhekk, il-bażi ġuridika sostantiva tad-Deċiżjoni proposta hija l-Artikolu 91 tat-TFUE.
4.3.Konklużjoni
Il-bażi ġuridika tad-Deċiżjoni tal-Kunsill proposta għandha tkun l-Artikolu 91 tat-TFUE, flimkien mal-Artikolu 218(9) tat-TFUE.
5.Pubblikazzjoni tal-att previst
Għal raġunijiet ta’ trasparenza u ta’ referenza xierqa, id-deċiżjonijiet tal-Grupp ta’ Ħidma dwar it-Trasport ta’ Oġġetti Perikolużi (WP.15) u tal-Kumitat tas-Sikurezza tal-ADN għandhom jiġu ppubblikati f’Il-Ġurnal Uffiċjali tal-Unjoni Ewropea, filwaqt li jissemma meta jidħlu fis-seħħ.
2020/0226 (NLE)
Proposta għal
DEĊIŻJONI TAL-KUNSILL
dwar il-pożizzjoni li trid tittieħed f’isem l-Unjoni Ewropea fir-rigward tal-emendi għall-Annessi tal-Ftehim Ewropew dwar it-Trasport Internazzjonali ta’ Oġġetti Perikolużi bit-Triq (ADR) u għar-Regolamenti Annessi tal-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (ADN)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 91 flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Ftehim Ewropew dwar it-Trasport Internazzjonali ta’ Oġġetti Perikolużi bit-Triq (“ADR”) daħal fis-seħħ fid-29 ta’ Jannar 1968. Il-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (“ADN”) daħal fis-seħħ fit-28 ta’ Frar 2008.
(2)Skont l-Artikolu 14 tal-ADR, kwalunkwe Parti Kontraenti tista’ tipproponi emenda waħda jew aktar għall-Annessi ta’ dak il-Ftehim u, għaldaqstant, il-Grupp ta’ Ħidma dwar it-Trasport ta’ Oġġetti Perikolużi (“WP.15”) jista’ jadotta emendi għall-Annessi tal-ADR. Skont l-Artikolu 20 tal-ADN, il-Kumitat tas-Sikurezza u l-Kumitat Amministrattiv jistgħu jadottaw emendi għar-Regolamenti Annessi tal-ADN.
(3)L-emendi adottati matul il-perjodu ta’ sentejn 2018-2020 mid-WP.15 u mill-Kumitat Amministrattiv tal-ADN dwar it-trasport ta’ oġġetti perikolużi bit-triq u fuq passaġġi tal-ilma interni ġew innotifikati lill-partijiet kontraenti tal-ADR u tal-ADN fl-1 ta’ Lulju 2020.
(4)Huwa xieraq li tiġi stabbilita l-pożizzjoni li trid tittieħed f’isem l-Unjoni fir-rigward ta’ dawk l-emendi għall-ADR u għall-ADN, peress li dawk l-atti se jkunu kapaċi li jinfluwenzaw b’mod deċiżiv il-kontenut tad-dritt tal-Unjoni, jiġifieri d-Direttiva 2008/68/KE tal-Parlament Ewropew u tal-Kunsill 7 . Dik id-Direttiva tistabbilixxi rekwiżiti għat-trasport ta’ oġġetti perikolużi bit-triq, bil-ferrovija jew fuq passaġġi tal-ilma interni fl-Istati Membri jew bejniethom, billi tirreferi għall-ADR u għall-ADN. L-Artikolu 4 ta’ dik id-Direttiva jipprevedi li t-trasport ta’ oġġetti perikolużi bejn l-Istati Membri u pajjiżi terzi għandu jiġi awtorizzat kemm-il darba jkun konformi mar-rekwiżiti tal-ADR, tal-RID jew tal-ADN, ħlief jekk ikun indikat mod ieħor fl-Annessi. Barra minn hekk, skont l-Artikolu 8 tad-Direttiva 2008/68/KE, il-Kummissjoni għandha s-setgħa li tadatta l-Anness I, it-Taqsima I.1 u l-Anness III, it-Taqsima III.1 ta’ dik id-Direttiva għall-progress xjentifiku u tekniku, b’mod partikolari sabiex jitqiesu l-emendi għall-ADR, għall-RID u għall-ADN.
(5)L-Unjoni mhijiex parti kontraenti tal-ADR u tal-ADN. Madankollu, dan il-fatt ma jipprekludihiex milli teżerċita l-kompetenza tagħha billi tistabbilixxi, permezz tal-istituzzjonijiet tagħha, pożizzjoni li trid tittieħed f’isimha fis-sede stabbilit permezz ta’ dak il-ftehim, b’mod partikolari permezz tal-Istati Membri li huma partijiet kontraenti tal-imsemmi ftehim li jaġixxu b’mod konġunt fl-interess tagħha.
(6)L-Istati Membri kollha huma partijiet kontraenti tal-ADR u japplikawh, u 13-il Stat Membru huma partijiet kontraenti u japplikaw l-ADN.
(7)L-emendi adottati jikkonċernaw standards tekniċi jew preskrizzjonijiet tekniċi uniformi, u għandhom l-objettiv li jiżguraw it-trasport effiċjenti u sikur ta’ oġġetti perikolużi filwaqt li jqisu l-progress xjentifiku u tekniku fis-settur u l-iżvilupp ta’ sustanzi ġodda u oġġetti li jippreżentaw periklu matul it-trasport tagħhom. L-iżvilupp tat-trasport ta’ oġġetti perikolużi bit-triq u fuq passaġġi tal-ilma interni, kemm fl-Unjoni kif ukoll bejn l-Unjoni u l-pajjiżi ġirien tagħha, huwa komponent ewlieni tal-politika komuni tat-trasport u jiżgura t-tħaddim tajjeb tal-oqsma industrijali kollha li jipproduċu jew li jużaw prodotti kklassifikati bħala perikolużi skont l-ADR u l-ADN.
(8)L-emendi proposti huma kollha ġġustifikati u ta’ benefiċċju, u għalhekk jenħtieġ li jiġu appoġġati mill-Unjoni.
(9)Il-pożizzjoni tal-Unjoni trid tiġi espressa mill-Istati Membri tal-Unjoni li huma partijiet kontraenti tal-ADR u tal-ADN, filwaqt li jaġixxu b’mod konġunt,
ADOTTA DIN ID-DEĊIŻJONI:
Artikolu 1
Il-pożizzjoni li trid tittieħed f’isem l-Unjoni fir-rigward tal-emendi adottati mill-Grupp ta’ Ħidma dwar it-Trasport ta’ Oġġetti Perikolużi (WP.15) u mill-Kumitat Amministrattiv tal-ADN għall-Annessi tal-ADR u għar-Regolamenti Annessi tal-ADN, rispettivament, kif imsemmi fl-Anness ta’ din id-Deċiżjoni, hija stipulata f’dak l-Anness.
Bidliet minuri għal din il-pożizzjoni jistgħu jiġu miftiehma mingħajr deċiżjoni ulterjuri tal-Kunsill, f’konformità mal-Artikolu 2.
Artikolu 2
Il-pożizzjoni msemmija fl-Artikolu 1 għandha tiġi espressa, b’mod konġunt, mill-Istati Membri tal-Unjoni li huma Partijiet Kontraenti tal-ADR u tal-ADN.
Artikolu 3
Id-deċiżjonijiet tal-Grupp ta’ Ħidma dwar it-Trasport ta’ Oġġetti Perikolużi (WP.15) u tal-Kumitat tas-Sikurezza tal-ADN għandhom jiġu ppubblikati f’Il-Ġurnal Uffiċjali tal-Unjoni Ewropea, filwaqt li jissemma meta jidħlu fis-seħħ.
Artikolu 4
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 31.8.2020
COM(2020) 472 final
ANNESS
tal-
Proposta għal Deċiżjoni tal-Kunsill
dwar il-pożizzjoni li trid tittieħed f’isem l-Unjoni Ewropea fir-rigward tal-emendi għall-Annessi tal-Ftehim Ewropew dwar it-Trasport Internazzjonali ta’ Oġġetti Perikolużi bit-Triq (ADR) u għar-Regolamenti Annessi tal-Ftehim Ewropew dwar it-Trasport Internazzjonali ta’ Oġġetti Perikolużi fuq Passaġġi tal-Ilma Interni (ADN)
ANNESS
|
Proposta |
Dokument ta’ Referenza |
Notifika |
Ħruġ |
Kummenti |
Pożizzjoni tal-UE |
|
1. |
ECE/TRANS/WP.15/249 |
C.N.274.2020.TREATIES-XI.B.14 |
Abbozz tal-emendi għall-Annessi A u B tal-ADR |
Kunsens tekniku fi ħdan il-Grupp ta’ Ħidma dwar it-Trasport ta’ Oġġetti Perikolużi – WP.15. |
Qbil mal-emendi. |
|
2. |
ECE/TRANS/WP.15/249/Add.1 |
C.N.274.2020.TREATIES-XI.B.14 |
Abbozz tal-emendi għall-Annessi A u B tal-ADR – Addendum |
Kunsens tekniku fi ħdan il-Grupp ta’ Ħidma dwar it-Trasport ta’ Oġġetti Perikolużi – WP.15. |
Qbil mal-emendi. |
|
3. |
ECE/TRANS/WP.15/249/Corr.1 |
C.N.274.2020.TREATIES-XI.B.14 |
Abbozz tal-emendi għall-Annessi A u B tal-ADR – Rettifika |
Kunsens tekniku fi ħdan il-Grupp ta’ Ħidma dwar it-Trasport ta’ Oġġetti Perikolużi – WP.15. |
Qbil mal-emendi. |
|
4. |
ECE/ADN/54 |
C.N.273.2020.TREATIES-XI.D.6 |
Abbozz tal-emendi għar-Regolamenti annessi tal-ADN |
Kunsens tekniku fil-Kumitat Amministrattiv tal-ADN. |
Qbil mal-emendi. |