IL-KUMMISSJONI EWROPEA

Brussell, 18.1.2019

COM(2019) 16 final

Rakkomandazzjoni għal

DEĊIŻJONI TAL-KUNSILL

li tawtorizza l-ftuħ ta’ negozjati għal ftehim mal-Istati Uniti tal-Amerka dwar it-tneħħija ta’ tariffi għal prodotti industrijali

MEMORANDUM TA’ SPJEGAZZJONI

1.IL-KUNTEST TAR-RAKKOMANDAZZJONI

•Ir-raġunijiet għar-rakkomandazzjoni u l-objettivi tagħha

Fil-25 ta’ Lulju 2018, il-President tal-Kummissjoni Ewropea u l-President tal-Istati Uniti tal-Amerka laħqu ftehim biex ivaraw fażi ġdida fir-relazzjoni kummerċjali bejn l-Istati Uniti u l-Unjoni Ewropea, bil-ħsieb li jiġi ffaċilitat il-kummerċ u tiġi evitata eskalazzjoni tat-tensjonijiet kummerċjali.

Fil-25 ta’ Lulju 2018 ġiet adottata Dikjarazzjoni Konġunta li tipprevedi t-tneħħija tat-tariffi għall-prodotti industrijali; żieda fil-kooperazzjoni dwar kwistjonijiet u standards regolatorji; il-faċilitazzjoni tal-kummerċ tal-fażola tas-sojja; u żieda fil-kummerċ tal-gass naturali likwifikat (linquified natural gas, LNG) sabiex l-Unjoni Ewropea tkun tista’ tiddiversifika aħjar il-provvista tagħha tal-enerġija. Qablu wkoll li jingħaqdu flimkien biex jipproteġu aħjar lill-kumpaniji Ewropej u tal-Istati Uniti minn prattiki kummerċjali globali inġusti u biex jaħdmu mill-qrib ma’ sħab tal-istess fehma biex jirriformaw l-Organizzazzjoni Dinjija tal-Kummerċ (World Trade Organisation, WTO).

Twaqqaf Grupp ta’ Ħidma Eżekuttiv biex imexxi 'l quddiem din l-aġenda konġunta, u talab inter alia biex jiġu identifikati miżuri fuq medda qasira ta’ żmien biex jiġu ffaċilitati l-iskambji kummerċjali. Ġie miftiehem li matul il-proċess ta’ implimentazzjoni tad-Dikjarazzjoni Konġunta, l-Unjoni Ewropea u l-Istati Uniti jirrispettaw bis-sħiħ l-ispirtu ta’ dan il-ftehim, sakemm waħda mill-partijiet ma ttemmx in-negozjati. Iż-żewġ naħat qablu wkoll li jridu jsolvu l-kwistjonijiet tariffarji tal-azzar u tal-aluminju.

Il-Kummissjoni Ewropea hija impenjata li timplimenta b'rieda tajba d-Dikjarazzjoni Konġunta tal-25 ta’ Lulju 2018. Il-Kummissjoni għandha tissospendi n-negozjati mal-Istati Uniti, jekk l-Istati Uniti ma jirrispettawx l-impenn li sar fil-25 ta’ Lulju 2018 biex jastjenu milli jadottaw miżuri ġodda, kontra l-UE skont it-Taqsima 232 tal-Att dwar l-Espansjoni tal-Kummerċ. Il-Kummissjoni tista’ wkoll tissospendi n-negozjati jekk l-Istati Uniti jadottaw restrizzjonijiet kummerċjali kontra l-esportazzjonijiet tal-UE abbażi tat-Taqsima 301 tal-Att dwar il-Kummerċ tal-1974 jew taħt kwalunkwe liġi simili oħra tal-Istati Uniti.

L-għan tan-negozjati dwar l-eliminazzjoni tat-tariffi se jkun li jelimina d-dazji kollha għall-prodotti industrijali fuq bażi reċiproka, bil-għan li tinkiseb eliminazzjoni sostanzjali ta’ tariffi wara d-dħul fis-seħħ u tneħħija gradwali ta’ tali tariffi fuq perjodu ta’ żmien qasir. Il-prodotti industrijali jinkludu l-prodotti kollha minbarra dawk inklużi fl-Anness I tal-Ftehim tad-WTO dwar l-Agrikoltura. Jistgħu jkunu kkunsidrati s-sensittivitajiet partikolari ta’ ċerti prodotti. F’dan ir-rigward, l-UE hija lesta li tqis is-sensittivitajiet potenzjali tal-Istati Uniti għal ċerti prodotti tal-karozzi.

L-UE u l-Istati Uniti huma l-akbar u l-aktar ekonomiji integrati fid-dinja, bi storja komuni twila ta’ kummerċ u b’livell simili ta’ żvilupp ekonomiku. L-Istati Uniti hija d-destinazzjoni ewlenija tal-esportazzjoni tal-UE għall-prodotti industrijali u hija t-tieni l-akbar esportatur ta’ prodotti industrijali lejn l-UE (wara ċ-Ċina). Il-kummerċ fil-merkanzija bejn l-UE u l-Istati Uniti ammonta għal EUR 633 biljun fl-2017, magħmul l-aktar minn prodotti industrijali (EUR 598 biljun, li minnhom EUR 166 biljun huma għall-kummerċ tal-makkinarju u tat-tagħmir). Madwar 4.7 miljun impjieg fl-UE huma assoċjati mal-produzzjoni għall-esportazzjonijiet lejn l-Istati Uniti. Il-merkanzija industrijali tammonta għall-biċċa l-kbira tal-kummerċ tagħna ta’ merkanzija mal-Istati Uniti (94 % tal-esportazzjonijiet tal-UE u 95 % tal-importazzjonijiet). Il-kummerċ tal-merkanzija bejn l-UE u l-Istati Uniti ilu jikber b’mod konsistenti matul dawn l-aħħar 10 sena.

B’mod ġenerali, kemm l-UE u kif ukoll l-Istati Uniti għandhom tariffi baxxi fuq il-prodotti industrijali. Il-medji sempliċi tar-rati tat-tariffa tal-pajjiż l-aktar favorit applikati fuq il-prodotti nonagrikoli huma 4.2% u 3.1% rispettivament. Filwaqt li l-livelli tat-tariffi applikati huma relattivament baxxi, id-daqs enormi tar-relazzjoni kummerċjali tagħna jfisser li l-eliminazzjoni tat-tariffi kollha tal-prodotti industrijali se jkollha impatt importanti fuq in-negozji u l-konsumaturi fuq iż-żewġ naħat tal-Atlantiku.

Analiżi interna bil-mudell ta’ ekwilibriju ġenerali komputabbli MIRAGE turi li l-eliminazzjoni ta’ tariffi fuq prodotti industrijali tkun ta’ benefiċċju għaż-żewġ sħab kważi l-istess f’termini ta’ żieda fil-kummerċ bilaterali. L-esportazzjonijiet tal-UE ta’ prodotti lejn l-Istati Uniti jiżdiedu b’10 %, l-esportazzjonijiet tal-Istati Uniti lejn l-UE jiżdiedu bi 13 %.

It-tneħħija ta’ tariffi fuq prodotti industrijali għandha b’mod partikolari tirriżulta f’benefiċċji ekonomiċi importanti għal intrapriżi ta’ daqs żgħir u medju (SMEs) li huma affettwati b’mod sproporzjonat mill-kostijiet tat-tqegħid tal-prodott fis-suq. Tnaqqis fil-kostijiet, anki permezz tal-eliminazzjoni tat-tariffi, jista’ jgħin biex l-esportazzjonijiet mill-SMEs isiru aktar kompetittivi, biex b’hekk jagmlu d-differenza bejn li jesportaw jew le.

•Konsistenza mad-dispożizzjonijiet eżistenti fil-qasam ta’ politika

•Konsistenza ma' politiki oħra tal-Unjoni

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

Sussidjarjetà (għall-kompetenza mhux esklużiva)

•Proporzjonalità

•Għażla tal-istrument

3.IR-RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post / kontrolli tal-idoneità tal-leġiżlazzjoni eżistenti

•Evalwazzjonijiet ex post / kontrolli tal-idoneità tal-leġiżlazzjoni eżistenti

Mhux applikabbli

•Konsultazzjonijiet mal-partijiet ikkonċernati

Saru ammont konsiderevoli ta’ konsultazzjonijiet mal-partijiet ikkonċernati dwar il-gwadanji possibbli mill-eliminazzjoni tat-tariffi mill-2012. Ġew organizzati diversi seduti u laqgħat ta’ Djalogu tas-Soċjetà Ċivili. Dan minbarra d-dibattiti pubbliċi fil-Parlament Ewropew u fl-Istati Membri tal-UE jew organizzati minnhom.

•Ġbir u użu tal-għarfien espert

F’attivitajiet ta’ konsultazzjoni preċedenti mill-2012 ’l hawn, diġà nġabar għarfien espert konsiderevoli dwar il-gwadanji possibbli mit-tneħħija tat-tariffi bejn l-UE u l-Istati Uniti (ara l-links u d-dokumenti fis-sit web li ġej:

http://trade.ec.europa.eu/doclib/cfm/doclib_section.cfm?sec=146 .

•Valutazzjoni tal-impatt

Minħabba l-imperattiv politiku li nimxu ’l quddiem malajr sabiex jitnaqqsu t-tensjonijiet kummerċjali bejn l-UE u l-Istati Uniti, kif ġie espress mill-President tal-Kummissjoni wara l-laqgħa tiegħu mal-President tal-Istati Uniti, u kif kien endorsjat mill-Kunsill Ewropew fil-laqgħa informali tiegħu tas-16 ta’ Mejju 2018 f’Sofija, il-proċess formali tal-valutazzjoni tal-impatt ġie abbandunat. 

•Drittijiet fundamentali

4.IMPLIKAZZJONIJIET GĦALL-BAĠIT

5.ELEMENTI OĦRA

•Aspetti proċedurali

Il-Kummissjoni se tinnegozja f’isem l-UE. F’konformità mal-Artikolu 218(4) tat-TFUE, huwa ssuġġerit li l-Kunsill tal-Unjoni Ewropea jaħtar il-Kumitat tal-Politika Kummerċjali bħala l-kumitat li f'konsultazzjoni miegħu għandhom isiru n-negozjati.

Il-Parlament Ewropew se jinżamm informat fl-istadji kollha tal-proċedura, konformi mal-Artikolu 218(10) TFUE.

Il-Kummissjoni se tagħmel din ir-Rakkomandazzjoni u l-anness tagħha pubbliċi immedjatament wara l-adozzjoni tagħhom.

Il-Kummissjoni tirrakkomanda li d-direttivi tan-negozjati jkunu disponibbli għall-pubbliku immedjatament wara li jiġu adottati mill-Kunsill.

Rakkomandazzjoni għal

DEĊIŻJONI TAL-KUNSILL

li tawtorizza l-ftuħ ta’ negozjati għal ftehim mal-Istati Uniti tal-Amerka dwar it-tneħħija ta’ tariffi għal prodotti industrijali

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikoli 207 (3) u (4), l-ewwel subparagrafu flimkien mal-Artikolu 218(3) u (4) tiegħu,

Wara li kkunsidra r-Rakkomandazzjoni mill-Kummissjoni Ewropea,

ADOTTA DIN ID-DEĊIŻJONI:

Artikolu 1

Il-Kummissjoni hija b’dan awtorizzata li tiftaħ negozjati, f’isem l-Unjoni Ewropea, mal-Istati Uniti tal-Amerka għal ftehim dwar l-eliminazzjoni ta’ tariffi għal prodotti industrijali.

Artikolu 2

In-negozjati għandhom jitwettqu abbażi ta' direttivi ta' negozjati tal-Kunsill li ġew stipulati fl-Anness.

Artikolu 3

Il-Kummissjoni għandha twettaq in-negozjatib'konsultazzjoni ma' [l-isem tal-kumitat speċjali għandu jiddaħħal mill-Kunsill].

Artikolu 4

Din id-Deċiżjoni u l-Anness tagħha se jiġu ppubblikati immedjatament wara l-adozzjoni tagħhom.

Artikolu 5

Din id-Deċiżjoni hija indirizzata lill-Kummissjoni.

Magħmul fi Brussell,

(1)    L-Artikolu 21, il-paragrafu 2 (e) TUE

(2)     http://trade.ec.europa.eu/doclib/docs/2015/october/tradoc_153846.pdf

IL-KUMMISSJONI EWROPEA

Brussell, 18.1.2019

COM(2019) 16 final

ANNESS

ta' [...]

Rakkomandazzjoni għal Deċiżjoni tal-Kunsill

li tawtorizza l-ftuħ ta’ negozjati għal ftehim mal-Istati Uniti tal-Amerka dwar it-tneħħija ta’ tariffi għal prodotti industrijali

ANNESS

DIRETTIVI GĦAN-NEGOZJAR TA’ FTEHIM MAL-ISTATI UNITI TAL-AMERIKA DWAR IT-TNEĦĦIJA TA’ TARIFFI GĦAL PRODOTTI INDUSTRIJALI

Natura u Kamp tal-Applikazzjoni tal-Ftehim

1.Il-Ftehim għandu jinkludi dispożizzjonijiet dwar l-eliminazzjoni ta’ tariffi għal prodotti industrijali 1 , bejn il-Partijiet, biex b’hekk jipprovdi għall-eliminazzjoni reċiproka tat-tariffi.

2.Il-Ftehim jenħtieġ li jkun kompletament konsistenti mar-regoli u l-obbligi tal-Organizzazzjoni Dinjija tal-Kummerċ (World Trade Organisation, WTO).

Objettivi

3.L-objettiv tal-Ftehim huwa li jiżdied il-kummerċ bejn l-Unjoni Ewropea u l-Istati Uniti bil-ħsieb li jiġu ġġenerati opportunitajiet ekonomiċi ġodda li joħolqu l-impjiegi u t-tkabbir b’riżultat ta’ aċċess akbar għas-suq minħabba l-eliminazzjoni reċiproka tat-tariffi għall-prodotti industrijali.

Kontenut tal-Ftehim

Dazji u rekwiżiti oħra rigward l-importazzjonijiet u l-esportazzjonijiet 

4.L-għan tal-Ftehim jenħtieġ li jkun li jelimina d-dazji kollha għall-prodotti industrijali fuq bażi reċiproka, bil-għan li tinkiseb eliminazzjoni sostanzjali ta’ tariffi wara d-dħul fis-seħħ u tneħħija gradwali ta’ tali tariffi f’perjodu ta’ żmien qasir. Jenħtieġ li jitqiesu s-sensittivitajiet partikolari għal ċerti prodotti skont id-Dikjarazzjoni Konġunta tal-25 ta’ Lulju 2018. Id-dazji doganali, it-taxxi, it-tariffi, jew l-imposti kollha fuq l-esportazzjonijiet u r-restrizzjonijiet kwantitattivi jew ir-rekwiżiti ta’ awtorizzazzjoni fuq esportazzjonijiet lill-Parti l-oħra li mhumiex ġustifikati b’eċċezzjonijiet skont il-Ftehim jenħtieġ li jiġu aboliti skont l-applikazzjoni tal-Ftehim. Il-Ftehim jenħtieġ li jkun mingħajr ħsara għad-dritt ta’ kull Parti li tieħu miżuri xierqa ta’ salvagwardja, anti-dumping jew kumpensatorji skont il-Ftehim tad-WTO.

Regoli ta’ oriġini 

5.In-negozjati jenħtieġ li jimmiraw lejn ir-rikonċiljazzjoni tal-approċċi tar-regoli ta’ oriġini tal-Unjoni Ewropea u tal-Istati Uniti inkluż il-proċeduri ta’ oriġini b’mod li jiġi ffaċilitat il-kummerċ bejn il-Partijiet u li jqis l-aħħar żviluppi fir-regoli preferenzjali tal-oriġini tal-Unjoni Ewropea u l-interessi tal-operaturi ekonomiċi tal-Unjoni Ewropea.

Qafas istituzzjonali 

6.Il-Ftehim jenħtieġ li jistabbilixxi struttura istituzzjonali għall-monitoraġġ tal-implimentazzjoni tal-Ftehim.

Soluzzjoni għat-tilwim 

7.Il-Ftehim jenħtieġ li jinkludi mekkaniżmu xieraq għas-soluzzjoni tat-tilwim biex jiġi żgurat li l-Partijiet josservaw regoli maqbula b’mod reċiproku.

Dispożizzjonijiet finali

8.Il-Ftehim jenħtieġ li jinkludi dispożizzjoni li tippermetti lill-Unjoni Ewropea li tissospendi b’mod unilaterali l-applikazzjoni ta’ konċessjonijiet jew obbligi sostanzjalment ekwivalenti, jekk l-Istati Uniti jadottaw kwalunkwe miżura kontra l-Unjoni Ewropea, taħt it-Taqsima 232 tal-Att dwar l-Espansjoni tal-Kummerċ, it-Taqsima 301 tal-Att dwar il-Kummerċ tal-1974 jew taħt kwalunkwe liġi simili oħra tal-Istati Uniti.

9.Il-Ftehim jenħtieġ li jkun awtentiku bl-istess mod fil-lingwi uffiċjali kollha tal-Unjoni Ewropea u għandu jinkludi klawżola lingwistika f’dan is-sens.

It-twettiq tan-negozjati

10.Il-Kummissjoni għandha tissospendi n-negozjati mal-Istati Uniti, jekk l-Istati Uniti ma jirrispettawx l-impenn li sar fil-25 ta’ Lulju 2018 biex jastjenu milli jadottaw miżuri ġodda, kontra l-Unjoni Ewropea skont it-Taqsima 232 tal-Att dwar l-Espansjoni tal-Kummerċ tal-1962, matul in-negozjati. Il-Kummissjoni tista’ wkoll tissospendi n-negozjati jekk l-Istati Uniti jadottaw restrizzjonijiet kummerċjali kontra l-esportazzjonijiet tal-Unjoni Ewropea abbażi tat-Taqsima 301 tal-Att dwar il-Kummerċ tal-1974 jew taħt kwalunkwe liġi simili oħra tal-Istati Uniti.

11.Qabel il-konklużjoni tan-negozjati, il-Kummissjoni se tikkonferma li l-Istati Uniti neħħew kwalunkwe miżura fuq l-esportazzjonijiet tal-azzar u l-aluminju li joriġinaw mill-Unjoni Ewropea skont it-Taqsima 232 tal-Att dwar l-Espansjoni tal-Kummerċ tal-Istati Uniti tal-1962.

(1)    Il-prodotti industrijali jinkludu l-prodotti kollha minbarra dawk inklużi fl-Anness I tal-Ftehim tad-WTO dwar l-Agrikoltura.