IL-KUMMISSJONI EWROPEA

Brussell, 7.12.2018

COM(2018) 817 final

2018/0414(COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolamenti (UE) Nru 1305/2013 u (UE) Nru 1307/2013 fir-rigward ta’ ċerti regoli dwar il-pagamenti diretti u l-appoġġ għall-iżvilupp rurali rigward is-snin 2019 u 2020

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u għanijiet tal-proposta

Il-proposta għandha l-għan li tipprovdi ċ-ċertezza u l-kontinwità fl-għoti ta’ appoġġ lill-bdiewa Ewropej fis-snin 2019 u 2020 billi tadatta żewġ atti leġiżlattivi tal-Politika Agrikola Komuni (PAK).

B’rabta mal-iżvilupp rurali, ċerti emendi għar-Regolament (UE) Nru 1305/2013 (Regolament dwar l-Iżvilupp Rurali) huma meħtieġa biex tiġi żgurata l-kontinwità tal-politika fl-aħħar snin tal-perjodu ta’ programmazzjoni u tranżizzjoni bla xkiel għall-perjodu ta’ programmazzjoni l-ġdid. Dawn l-emendi jikkonċernaw skeda ta’ digressività ġdida għall-eliminazzjoni gradwali tal-pagamenti liż-żoni li qed jiffaċċjaw restrizzjonijiet naturali minbarra ż-żoni muntanjużi (ANC) u l-użu tal-assistenza teknika tal-FAEŻR fuq l-inizjattiva tal-Kummissjoni għall-azzjonijiet li jħejju l-implimentazzjoni tal-PAK futura.

B’rabta mal-pagamenti diretti, uħud mid-dispożizzjonijiet fir-Regolament (UE) Nru 1307/2013 (Regolament dwar il-Pagamenti Diretti) ma jkoprux is-sena kalendarja 2020 peress li l-ispejjeż relatati mas-sena kalendarja 2020 jintefqu fis-sena finanzjarja 2021, li hija l-ewwel sena tal-Qafas Finanzjarju Pluriennali (QFP) 2021-2027. Fiż-żmien tal-adozzjoni tar-Regolament, għalhekk ma kienx possibbli li jsiru impenji relatati mal-QFP futur. Fin-nuqqas ta’ emenda tar-Regolament (UE) Nru 1307/2013, xi Stati Membri jkollhom jiffaċċjaw implikazzjonijiet finanzjarji li jistgħu jfixklu fir-rigward tal-pagamenti diretti fis-sena kalendarja 2020, li jmorru lil hinn minn dawk relatati mal-QFP il-ġdid (QFP 2021–2027). Li kieku ma jiġix emendat, dawk l-Istati Membri jiffaċċaw bidliet importanti fil-pagamenti diretti u fil-pakketti tal-iżvilupp rurali tagħhom b’effetti konsiderevoli fuq il-pagamenti lill-bdiewa taħt iż-żewġ pilastri. Barra minn hekk, jiżdiedu elementi tekniċi oħra, peress li jiffaċilitaw l-implimentazzjoni tal-qafas leġiżlattiv attwali.

•Konsistenza mad-dispożizzjonijiet eżistenti fil-qasam ta’ politika

•Konsistenza ma’ politiki oħra tal-Unjoni

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

L-Artikoli 42 u 43(2) tat-Trattat dwar il-Funzjonament tal-Unjoni Ewropea (TFUE).

•Sussidjarjetà (għall-kompetenza mhux esklużiva)

It-TFUE jipprevedi li l-kompetenza għall-agrikoltura tinqasam bejn l-Unjoni u l-Istati Membri. L-Unjoni teżerċita l-kompetenza tagħha permezz tal-adozzjoni ta’ atti leġiżlattivi varji, biex b’hekk tiddefinixxi u timplimenta politika agrikola komuni tal-UE kif previst fl-Artikoli 38 sa 44 tat-Trattat dwar il-Funzjonament tal-Unjoni Ewropea. Ir-Regolamenti (UE) Nru 1305/2013 u (UE) Nru 1307/2013 jistabbilixxu sistema għall-appoġġ tal-iżvilupp rurali u għall-pagamenti diretti lill-bdiewa. Skont l-Artikolu 39 tat-TFUE, wieħed mill-għanijiet tat-Trattat tal-PAK, fost l-oħrajn, huwa li jiżgura standard tal-għajxien ġust għall-bdiewa u l-inizjattiva proposta hija konformi ma’ dan l-għan. Għaldaqstant, permezz tal-Fond Agrikolu Ewropew ta’ Garanzija (FAEG), il-PAK jiffinanzja l-pagamenti diretti u r-Regolament UE (Nru) 1307/2013 jirregola l-pagamenti fuq il-livell tal-Unjoni. L-appoġġ tal-iżvilupp rurali huwa parti integrali tal-PAK u jikkontribwixxi għall-għanijiet tal-PAK kif stabbiliti fit-Trattat dwar il-Funzjonament tal-Unjoni Ewropea. Il-valur miżjud tal-proposta huwa li din tassigura ċ-ċertezza u l-istabbiltà tal-appoġġ għad-dħul dirett għall-bdiewa Ewropej fis-sena 2020 u li tappoġġja l-iżvilupp rurali fl-aħħar snin tal-perjodu ta’ programmazzjoni attwali. Dawn l-għanijiet jistgħu jinkisbu biss permezz ta’ emenda tar-Regolamenti (UE) Nru 1305/2013 u (UE) Nru 1307/2013 mill-koleġiżlaturi tal-UE.

•Proporzjonalità

•Għażla tal-istrument

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

Il-proposta tiddevja mill-prattika standard kif stipulata fil-linji gwida għal Regolamentazzjoni Aħjar u fis-sett ta’ għodod. Tenħtieġ deroga mill-prattika standard għar-raġunijiet li ġejjin:

- il-proposta hija teknika ħafna fil-kamp ta’ applikazzjoni tagħha;

- l-inizjattiva hija limitata għall-aħħar snin tal-perjodu ta’ programmazzjoni attwali;

- hija ma tintroduċix impenji politiċi ġodda.

Għalhekk, valutazzjoni tal-impatt, konsultazzjoni pubblika u pjan direzzjonali mhumiex xierqa għal din il-proposta. Barra minn hekk, peress li jenħtieġ li l-leġiżlazzjoni tkun fis-seħħ fl-2019, l-adozzjoni mill-koleġiżlaturi hija urġenti.

•Evalwazzjonijiet ex post/kontrolli tal-idoneità tal-leġiżlazzjoni eżistenti

•Konsultazzjonijiet mal-partijiet ikkonċernati

•Ġbir u użu tal-għarfien espert

•Valutazzjoni tal-impatt

•Idoneità regolatorja u simplifikazzjoni

•Drittijiet fundamentali

4.IMPLIKAZZJONIJIET BAĠITARJI

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar

•Dokumenti ta’ spjegazzjoni (għad-direttivi)

•Spjegazzjoni fid-dettall tad-dispożizzjonijiet speċifiċi tal-proposta

·Żvilupp rurali

Il-proposta tagħmilha possibbli biex l-Istati Membri li jimmodifikaw l-iskeda ta’ digressività għall-pagamenti f’żoni li rċevew ħlasijiet bħal dawn fil-perjodu ta’ programmazzjoni preċedenti, filwaqt li fil-perjodu attwali, ma ġewx klassifikati aktar bħala żoni li qed jiffaċċjaw limitazzjonijiet naturali minbarra ż-żoni muntanjużi skont l-Artikolu 31(5) tar-Regolament dwar l-Iżvilupp Rurali. Din il-modifika ssegwi l-estensjoni tal-iskadenza għad-delimitazzjoni ta’ żoni bħal dawn għall-2019, introdotta mir-Regolament (UE) 2017/2393, li jimplika, sal-aħħar tal-perjodu ta’ programmazzjoni attwali, perjodu ta’ adattament iqsar għall-bdiewa li m’għadhomx eliġibbli għal dawn il-pagamenti. Din il-modifika tippermetti li jsir il-kalkolu tal-pagamenti tranżizzjonali għas-snin 2019 u 2020 abbażi tal-livelli ta’ pagament għall-perjodu 2014-2020. Barra minn hekk, jenħtieġ li d-digressività tal-pagamenti tranżizzjonali tkun inqas qawwija għax din jenħtieġ li tiġi stabbilita mill-Istati Membri b’tali mod li l-livell tat-tmiem ikun in-nofs tal-livell tal-bidu.

Il-proposta testendi l-użu tal-assistenza teknika fuq l-inizjattiva tal-Kummissjoni ffinanzjata mill-Fond Agrikolu Ewropew għall-Iżvilupp Rurali (FAEŻR) għal azzjonijiet relatati mal-preparazzjoni tal-PAK futura. Il-proposta tikkonċerna esklużivament il-kamp ta’ applikazzjoni tal-assistenza teknika mingħajr ma timmodifika l-appoġġ finanzjarju.

·Il-flessibilità bejn il-pilastri fis-sena 2020 u t-trasferiment tal-prodott tat-tnaqqis tal-pagamenti diretti għall-Iżvilupp Rurali

Il-proposta tinkludi dispożizzjonijiet dwar il-possibbiltà biex l-Istati Membri jittrasferixxu l-fondi bejn il-pilastri fis-sena kalendarja 2020 (li tikkorrispondi għas-sena finanzjarja 2021). Għall-perjodu 2015-2019, l-Istati Membri kellhom il-possibbiltà li jittrasferixxu ammonti mill-pagamenti diretti għall-iżvilupp rurali u viċi versa. Ir-regoli fis-seħħ ma jistabbilixxux din it-tip ta’ flessibbiltà għas-sena kalendarja 2020/sena finanzjarja 2021. Dan il-mekkaniżmu finanzjarju huwa mekkaniżmu importanti li jipprovdi lill-Istati Membri bil-flessibilità fil-ġestjoni tal-pakketti finanzjarji tagħhom, u jottimizza l-użu tal-fondi disponibbli. L-esperjenza turi li dan il-mekkaniżmu wera l-użu tiegħu bħala għodda effettiva għall-Istati Membri u għaldaqstant ċerti Stati Membri jittrasferixxu ammont sinifikanti bejn iż-żewġ pilastri. Nuqqas ta’ flessibilità bejn il-pilastri fis-sena kalendarja 2020/sena finanzjarja 2021 x’aktarx joħloq tfixkil finanzjarju serju għall-bdiewa f’ċerti Stati Membri, peress li l-effett fuq il-pakketti tagħhom jista’ jkun sinifikanti. Għaldaqstant, il-proposta tappella sabiex it-trasferiment bejn il-pilastri jibqa’ possibbli fis-sena kalendarja 2020 skont l-istess kundizzjonijiet li hemm bħalissa u sabiex il-prodott stmat tat-tnaqqis jibqa’ jiġi trasferit mill-pagamenti diretti għall-iżvilupp rurali.

2018/0414 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolamenti (UE) Nru 1305/2013 u (UE) Nru 1307/2013 fir-rigward ta’ ċerti regoli dwar il-pagamenti diretti u l-appoġġ għall-iżvilupp rurali rigward is-snin 2019 u 2020

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 42 u l-Artikolu 43(2) tiegħu,

Wara li kkunsidraw il-proposta tal-Kummissjoni Ewropea,

Wara li ntbagħat l-abbozz tal-att leġislattiv lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 1 ,

Filwaqt li jaġixxu skont il-proċedura leġiżlattiva ordinarja,

Billi:

(1)Ir-Regolament (UE) Nru 1305/2013 tal-Parlament Ewropew u tal-Kunsill 2 huwa l-qafas legali attwali għall-appoġġ tal-iżvilupp rurali. Huwa jipprevedi appoġġ għaż-żoni li qed jiffaċċjaw restrizzjonijiet naturali minbarra ż-żoni muntanjużi. Filwaqt li titqies l-estensjoni għall-2019 tal-iskadenza għad-delimitazzjoni l-ġdida taż-żoni li qed jiffaċċjaw limitazzjonijiet naturali minbarra żoni muntanjużi permezz tar-Regolament (UE) 2017/2393 tal-Parlament Ewropew u tal-Kunsill 3 u l-perjodu ta’ adattament iqsar għall-bdiewa li mhumiex se jibqgħu eleġibbli għal pagamenti, il-pagamenti tranżizzjonali digressivi li jibdew biss fl-2019 jenħtieġ li jibdew f’livell ta’ mhux aktar minn 80 % tal-pagamenti medji ffissati fil-perjodu ta’ programmazzjoni 2014-2020. Il-livell tal-pagament jenħtieġ li jiġi stabbilit b’tali mod li l-livell tat-tmiem fl-2020 ikun in-nofs tal-livell tal-bidu.

(2)Sabiex tingħata assistenza lill-Istati Membri u lill-partijiet ikkonċernati għat-tħejjija f’waqtha tal-Politika Agrikola Komuni (PAK) futura u sabiex tiġi żgurata tranżizzjoni bla xkiel għall-perjodu ta’ programmar il-ġdid, jenħtieġ li jiġi ċċarat li huwa possibbli li jiġu ffinanzjati attivitajiet marbuta mal-preparazzjoni tal-PAK futura permezz tal-assistenza teknika fuq l-inizjattiva tal-Kummissjoni.

(3)Ir-Regolament (UE) Nru 1307/2013 tal-Parlament Ewropew u tal-Kunsill 4 huwa l-qafas legali attwali għall-pagamenti diretti. Għalkemm il-maġġoranza tad-dispożizzjonijiet tiegħu jistgħu japplikaw sakemm dak ir-Regolament jibqa’ fis-seħħ, dispożizzjonijiet oħra jirreferu b’mod espliċitu għas-snin kalendarji mill-2015 sal-2019 li huma koperti mill-Qafas Finanzjarju Pluriennali 2014-2020. Għal xi dispożizzjonijiet oħra, l-applikabbiltà tagħhom lil hinn mis-sena kalendarja 2019 ma kinitx espliċitament prevista. F’Ġunju 2018, il-Kummissjoni ppreżentat proposta għal Regolament ġdid bil-għan li jissostitwixxi r-Regolament (UE) Nru 1307/2013, iżda biss mill-1 ta’ Jannar 2021. Għalhekk, huwa xieraq li jsiru ċerti aġġustamenti tekniċi lir-Regolament (UE) Nru 1307/2013 sabiex dan ikun jista’ jiġi applikat bla xkiel għas-sena kalendarja 2020.

(4)L-obbligu stipulat fl-Artikolu 11 tar-Regolament (UE) Nru 1307/2013 li titnaqqas il-parti tal-ammont ta’ pagamenti diretti li għandhom jingħataw lil bidwi għal sena kalendarja partikolari li taqbeż EUR 150 000 jkompli japplika sakemm dak ir-Regolament jidħol fis-seħħ. Madankollu, attwalment, dak l-Artikolu jipprevedi biss l-obbligu ta’ notifika għall-Istati Membri rigward id-deċiżjonijiet tagħhom u l-prodott stmat ta’ dan it-tnaqqis għas-snin 2015 sa 2019. Bi ħsieb li tiġi żgurata kontinwazzjoni tas-sistema eżistenti, jenħtieġ li jiġi stipulat li l-Istati Membri għandhom ukoll jinnotifikaw id-deċiżjonijiet tagħhom rigward is-sena 2020 u l-prodott stmat tat-tnaqqis għal dik is-sena.

(5)Il-flessibiltà bejn il-pilastri hija t-trasferiment fakultattiv ta’ fondi bejn il-pagamenti diretti u l-iżvilupp rurali. Skont l-Artikolu 14 tar-Regolament (UE) Nru 1307/2013, l-Istati Membri jistgħu jagħmlu użu minn din il-flessibiltà fir-rigward tas-snin kalendarji 2014 sa 2019. Sabiex jiġi żgurat li l-Istati Membri jkunu jistgħu jżommu l-istrateġija tagħhom stess, il-flessibiltà bejn il-pilastri jenħtieġ tkun disponibbli wkoll għas-sena kalendarja 2020, li tikkorrispondi għas-sena finanzjarja 2021.

(6)Bħala konsegwenza tal-emenda tal-Artikolu 14 tar-Regolament (UE) Nru 1307/2013 fir-rigward tas-sena kalendarja 2020, huwa xieraq li jiġu aġġustati r-referenzi għal dak l-Artikolu fil-kuntest tal-obbligu tal-Istati Membri li jnaqqsu jew iżidu b’mod lineari, il-valur tad-drittijiet għall-pagamenti minħabba fluttwazzjonijiet fil-limitu massimu nazzjonali li rriżultaw min-notifiki tagħhom tal-applikazzjoni tal-flessibiltà bejn il-pilastri.

(7)Għalhekk, ir-Regolamenti (UE) Nru 1305/2013 u (UE) Nru 1307/2013 jenħtieġ li jiġu emendati kif xieraq.

(8)Sabiex tiġi pprovduta l-flessibiltà neċessarja lill-Istati Membri u sabiex tiġi żgurata l-kontinwità tal-politika ta’ żvilupp rurali fl-aħħar snin tal-perjodu ta’ programmazzjoni 2014-2020, jenħtieġ li dan ir-Regolament japplika mill-1 ta’ Marzu 2019,

ADOTTAW DAN IR-REGOLAMENT:

Artikolu 1

Emendi għar-Regolament (UE) Nru 1305/2013

Ir-Regolament (UE) Nru 1305/2013 huwa emendat kif ġej:

(1)fl-Artikolu 31(5), jiddaħħal it-tieni subparagrafu li ġej:

“Permezz ta’ deroga mill-ewwel subparagrafu, fejn il-pagamenti digressivi jibdew biss fis-sena 2019, dawk il-pagamenti għandhom jibdew f’livell ta’ mhux aktar minn 80 % tal-pagament medju stabbilit fil-perjodu ta’ programmazzjoni 2014-2020. Il-livell tal-pagament għandu jiġi stabbilit b’tali mod li l-livell tat-tmiem fl-2020 ikun in-nofs tal-livell tal-bidu.”;

(2)fl-Artikolu 51(1), jiddaħħal it-tieni subparagrafu li ġej:

“Il-FAEŻR jista’ jiffinanzja attivitajiet li jippreparaw għall-implimentazzjoni tal-PAK fil-perjodu ta’ programmazzjoni sussegwenti.”.

Artikolu 2

Emendi għar-Regolament (UE) Nru 1307/2013

Ir-Regolament (UE) Nru 1307/2013 huwa emendat kif ġej:

(1) fl-Artikolu 7, il-paragrafu 2 huwa sostitwit b’dan li ġej:

“2. Għal kull Stat Membru u għal kull sena kalendarja, il-prodott stmat tat-tnaqqis tal-pagamenti imsemmi fl-Artikolu 11 (li jkun rifless fid-differenza bejn il-limitu massimu nazzjonali stabbilit fl-Anness II, li magħhom jiżdied l-ammont disponibbli skont l-Artikolu 58, u l-limitu massimu nett stabbilit fl-Anness III) għandu jsir disponibbli bħala appoġġ tal-Unjoni ffinanzjat skont il-Fond Agrikolu Ewropew għall-Iżvilupp Rurali (FAEŻR).”;

(2)fl-Artikolu 11(6), jiżdied it-tielet subparagrafu li ġej:

“Għas-sena 2020, l-Istati Membri għandhom jinnotifikaw lill-Kummissjoni dwar id-deċiżjonijiet meħuda skont dan l-Artikolu u dwar kwalunkwe prodott stmat tat-tnaqqis sal-31 ta’ Diċembru 2019.”;

(3)L-Artikolu 14 huwa emendat kif ġej:

(a)fil-paragrafu 1, jiżdied is-sitt subparagrafu li ġej:

“Sal-31 ta’ Diċembru 2019, l-Istati Membri jistgħu jiddeċiedu li jagħmlu disponibbli, bħala appoġġ addizzjonali ffinanzjat taħt l-FAEŻR fis-sena finanzjarja 2021, sa 15 % tal-limiti nazzjonali annwali tagħhom għas-sena kalendarja 2020 stipulati fl-Anness II ta’ dan ir-Regolament. B’riżultat ta’ dan, l-ammont korrispondenti ma għandux jibqa’ disponibbli għall-għoti tal-pagamenti diretti. Din id-deċiżjoni għandha tiġi notifikata lill-Kummissjoni sal-31 ta’ Diċembru 2019 u għandha tistipula l-perċentwal magħżul.”;

(b)fil-paragrafu 2, jiżdied is-sitt subparagrafu li ġej:

“Sal-31 ta’ Diċembru 2019, l-Istati Membri jistgħu jiddeċiedu li jagħmlu disponibbli bħala pagamenti diretti sa 15 % jew, fil-każ tal-Bulgarija, l-Estonja, Spanja, il-Latvja, il-Litwanja, il-Polonja, il-Portugall, ir-Rumanija, is-Slovakkja, il-Finlandja u l-Iżvezja sa 25 % tal-ammont allokat għall-appoġġ iffinanzjat taħt l-FAEŻR fis-sena finanzjarja 2021 mil-leġiżlazzjoni tal-Unjoni adottata wara r-Regolament adottat mill-Kunsill skont l-Artikolu 312(2) tat-Trattat dwar il-Funzjonament tal-Unjoni Ewropea. B’riżultat ta’ dan, l-ammont korrispondenti ma għandux jibqa’ disponibbli għall-appoġġ iffinanzjat taħt l-FAEŻR. Din id-deċiżjoni għandha tiġi notifikata lill-Kummissjoni sal-31 ta’ Diċembru 2019 u għandha tistipula l-perċentwal magħżul.”;

(4)fl-Artikolu 22, il-paragrafu 5 huwa sostitwit b’dan li ġej:

“5. Jekk il-limitu massimu għal Stat Membru, stipulat mill-Kummissjoni skont il-paragrafu 1, ikun differenti minn dak tas-sena ta’ qabel bħala riżultat ta’ kwalunkwe deċiżjoni li ttieħdet minn dak l-Istat Membru f’konformità mal-paragrafu 3 ta’ dan l-Artikolu, l-Artikolu 14(1) jew (2), l-Artikolu 42(1), it-tieni subparagrafu tal-Artikolu 49(1), it-tieni subparagrafu tal-Artikolu 51(1), jew l-Artikolu 53, dak l-Istat Membru għandu b’mod lineari jnaqqas jew iżid il-valur tad-drittijiet kollha għall-pagament biex tkun żgurata konformità mal-paragrafu 4 ta’ dan l-Artikolu.”.

Artikolu 3

Dħul fis-seħħ u applikazzjoni

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Huwa għandu japplika mill-1 ta’ Marzu 2019.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

DIKJARAZZJONI FINANZJARJA LEĠIŻLATTIVA

(1)    ĠU C , , p. .

(2)    Ir-Regolament (UE) Nru 1305/2013 tal-Parlament Ewropew u tal-Kunsill tas-17 ta’ Diċembru 2013 dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) u li jħassar ir-Regolament tal-Kunsill (KE) Nru 1698/2005 (ĠU L 347, 20.12.2013, p. 487).

(3)    Ir-Regolament (UE) 2017/2393 tal-Parlament Ewropew u tal-Kunsill tat-13 ta’ Diċembru 2017 li jemenda r-Regolamenti (UE) Nru 1305/2013 dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR), (UE) Nru 1306/2013 dwar il-finanzjament, il-ġestjoni u l-monitoraġġ tal-politika agrikola komuni, (UE) Nru 1307/2013 li jistabbilixxi regoli għal pagamenti diretti lill-bdiewa taħt skemi ta’ appoġġ fil-qafas tal-politika agrikola komuni, (UE) Nru 1308/2013 li jistabbilixxi organizzazzjoni komuni tas-swieq fi prodotti agrikoli u (UE) Nru 652/2014 li jistabbilixxi dispożizzjonijiet għall-ġestjoni tan-nefqa marbuta mal-katina alimentari, mas-saħħa tal-annimali u mat-trattament xieraq tal-annimali, u marbuta mas-saħħa tal-pjanti u mal-materjal riproduttiv tal-pjanti (ĠU L 350, 29.12.2017, p. 15).

(4)    Ir-Regolament (UE) Nru 1307/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi regoli għal pagamenti diretti lill-bdiewa taħt skemi ta’ appoġġ fil-qafas tal-politika agrikola komuni u li jħassar ir-Regolament tal-Kunsill (KE) Nru 637/2008 u r-Regolament tal-Kunsill (KE) Nru 73/2009 (ĠU L 347, 20.12.2013, p. 608).