IL-KUMMISSJONI EWROPEA
Brussell, 28.11.2018
COM(2018) 783 final
2018/0402(NLE)
Proposta għal
DEĊIŻJONI TAL-KUNSILL
li tiddetermina l-kompożizzjoni tal-Kumitat Ekonomiku u Soċjali Ewropew
English
Select your language
Official EU languages:
Access to European Union law
EUR-Lex
Access to European Union law
This document is an excerpt from the EUR-Lex website
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Need more search options? Use the
Advanced search
Document 52018PC0783
Proposal for a COUNCIL DECISION determining the composition of the European Economic and Social Committee
Proposta għal DEĊIŻJONI TAL-KUNSILL li tiddetermina l-kompożizzjoni tal-Kumitat Ekonomiku u Soċjali Ewropew
Proposta għal DEĊIŻJONI TAL-KUNSILL li tiddetermina l-kompożizzjoni tal-Kumitat Ekonomiku u Soċjali Ewropew
COM/2018/783 final
Language
HTML
DOC
PDF
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u għanijiet tal-proposta
L-Artikolu 301 tat-Trattat dwar il-Funzjonament tal-Unjoni Ewropea (TFUE) jistipula li l-għadd ta’ membri tal-Kumitat Ekonomiku u Soċjali Ewropew (iktar ’il quddiem il-“Kumitat”) ma għandux jaqbeż it-350 u li l-Kunsill, li jaġixxi b’mod unanimu fuq proposta tal-Kummissjoni, għandu jadotta deċiżjoni li tistabbilixxi l-kompożizzjoni tal-Kumitat.
L-Artikolu 300(5) TFUE jistipula li r-regoli li jirregolaw in-natura tal-kompożizzjoni tal-Korpi Konsultattivi “għandhom jiġu riveduti f’intervalli regolari mill-Kunsill sabiex jieħdu inkunsiderazzjoni l-iżviluppi ekonomiċi, soċjali u demografiċi fi ħdan l-Unjoni. Il-Kunsill, fuq proposta tal-Kummissjoni, għandu jadotta deċiżjonijiet għal dan il-għan.”
Mill-1 ta’ Lulju 2013, il-kompożizzjoni tal-Kumitat ġiet adattata bl-Artikolu 23(1) tal-Att dwar il-kondizzjonijiet tal-adeżjoni tar-Repubblika tal-Kroazja 1 u l-Artikolu 23(2) kien jistipula żieda temporanja fin-numru ta’ membri tal-Kumitat għal 353 biex titqies l-adeżjoni tar-Repubblika tal-Kroazja. Għall-perjodu 2015-2020, fl-14 ta’ Lulju 2015 il-Kunsill adotta d-deċiżjoni li tiddetermina l-kompożizzjoni tal-Kumitat 2 għall-finijiet ta’ konformità man-numru massimu ta’ 350 previst fit-Trattat. Dan wassal għat-tnaqqis ta’ siġġu wieħed tad-delegazzjonijiet tal-Estonja, Ċipru u l-Lussemburgu rispettivament.
Il-mandat attwali tal-Kumitat Ekonomiku u Soċjali Ewropew se jintemm fl-20 ta’ Settembru 2020. Għaldaqstant, huwa neċessarju li l-Kunsill jadotta deċiżjoni dwar il-kompożizzjoni tal-Kumitat fil-ħin qabel il-Kunsill iniedi l-proċedura għat-tiġdid tal-Kumitat għall-perjodu 2020–2025.
Il-ħruġ tar-Renju Unit mill-Unjoni Ewropea fit-30 ta’ Marzu 2019 se jirriżulta f’24 siġġu battal fil-Kumitat.
Il-Kummissjoni hija tal-fehma li l-bilanċ attwali fil-kompożizzjoni tal-Kumitat jenħtieġ li jinżamm kemm jista’ jkun, peress li huwa r-riżultat ta’ Konferenzi Intergovernattivi suċċessivi.
Għaldaqstant, qed jiġi propost li l-Estonja, Ċipru u l-Lussemburgu jingħataw lura t-tliet siġġijiet li dawn l-Istati Membri tilfu wara l-aħħar deċiżjoni li ddeterminat il-kompożizzjoni tal-Kumitat u li l-bqija tas-siġġijiet battala jitħallew vojta bħala riżerva għal tkabbir possibbli fil-ġejjieni. Konsegwentement, fil-perjodu 2020–2025 il-Kumitat ikun kompost minn 329 membru.
•Konsistenza mad-dispożizzjonijiet eżistenti fil-qasam ta’ politika
Mhux applikabbli
•Konsistenza ma’ politiki oħrajn tal-Unjoni
Il-Kummissjoni tadotta din il-proposta b’mod parallel mal-proposta dwar il-kompożizzjoni tal-Kumitat tar-Reġjuni. Il-paralleliżmu fir-rigward tal-allokazzjoni tas-siġġijiet bejn l-Istati Membri fiż-żewġ Kumitati jrid jinżamm.
It-Trattati ma jistipulaw xejn dwar il-metodu ta’ kompożizzjoni tal-Kumitat Ekonomiku u Soċjali jew tal-Kumitat tar-Reġjuni, dment li l-għadd massimu jkun 350 membru. Dan b’kuntrast għall-kriterji għall-kompożizzjoni tal-Parlament Ewropew li huma stipulati fl-Artikolu 14(2) tat-Trattat dwar l-Unjoni Ewropea. Billi l-Parlament huwa magħmul minn rappreżentanti eletti direttament taċ-ċittadini tal-Unjoni, il-Kumitat jikkonsisti minn rappreżentanti ta’ impjegaturi, impjegati u partijiet oħra li jirrappreżentaw is-soċjetà ċivili (l-Artikolu 300(2) TFUE) Għalhekk, waqt id-determinazzjoni tal-kompożizzjoni l-ġdida tal-Kumitat Ekonomiku u Soċjali Ewropew, jenħtieġ li l-għan ewlieni jkun li l-vuċi tal-impjegaturi, tal-ħaddiema u tas-soċjetà ċivili tinstema’ fil-Kumitat u mhux li jkun hemm rabta diretta bejn id-daqs tad-delegazzjonijiet nazzjonali fi ħdan il-Kumitat u d-daqs tal-popolazzjonijiet rispettivi tal-Istati Membri.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Il-proposta hija bbażata fuq l-Artikolu 301 TFUE li jistipula li deċiżjoni unanima tal-Kunsill tiddetermina l-kompożizzjoni tal-Kumitat.
•Sussidjarjetà (għall-kompetenza mhux esklużiva)
Mhux applikabbli
•Proporzjonalità
Mhux applikabbli
•Għażla tal-istrument
It-tieni paragrafu tal-Artikolu 301 TFUE jistipula li l-Kunsill, li jaġixxi b’mod unanimu fuq proposta tal-Kummissjoni, għandu jadotta deċiżjoni li tistabbilixxi l-kompożizzjoni tal-Kumitat.
3.RIŻULTATI TAL-EVALWAZZJONIJIET EX POST, IL-KONSULTAZZJONIJIET MAL-PARTIJIET IKKONĊERNATI U L-VALUTAZZJONIJIET TAL-IMPATT
•Evalwazzjonijiet ex post / kontrolli tal-idoneità tal-leġiżlazzjoni eżistenti
Mhux applikabbli
•Konsultazzjonijiet mal-partijiet ikkonċernati
Waqt il-preparazzjoni tal-proposta attwali, il-Kummissjoni kienet fi djalogu mill-qrib ma’ rappreżentanti tal-Istati Membri u kellha diversi laqgħat magħhom.
Il-Kumitat Ekonomiku u Soċjali Ewropew bagħat ir-rakkomandazzjoni tiegħu lill-Kummissjoni, abbażi tad-deċiżjoni tal-Bureau tat-18 ta’ Settembru 2018 3 , għar-restituzzjoni tat-tliet siġġijiet li l-Estonja, Ċipru u l-Lussemburgu kienu tilfu fl-2015 u biex l-ebda siġġijiet battala oħra ma jitqassmu mill-ġdid, u b’hekk l-għadd ta’ membri għall-mandat 2020–2025 ġie ffissat għal 329.
•Ġbir u użu tal-kompetenzi
Mhux applikabbli
•Valutazzjoni tal-impatt
Din il-proposta mhijiex akkumpanjata minn valutazzjoni tal-impatt speċifika peress li mhux mistenni li se jkollha impatti ekonomiċi, soċjali u ambjentali sinifikanti.
•L-idoneità regolatorja u s-simplifikazzjoni
Mhux applikabbli
•Drittijiet fundamentali
Mhux applikabbli
4.IMPLIKAZZJONIJIET BAĠITARJI
In-numru mnaqqas ta’ siġġijiet b’konsegwenza tal-ħruġ tar-Renju Unit mill-Unjoni Ewropea jista’ jkollu effett ta’ tnaqqis fuq il-baġit kumplessiv tal-Kumitat.
5.ELEMENTI OĦRAJN
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar
Mhux applikabbli
•Dokumenti ta’ spjegazzjoni (għad-direttivi)
Mhux applikabbli
•Id-dħul fis-seħħ
Huwa propost li l-Kunsill jipposponi l-applikazzjoni ta’ din id-Deċiżjoni sal-għada ta’ tmiem il-mandat attwali tal-Kumitat.
2018/0402 (NLE)
Proposta għal
DEĊIŻJONI TAL-KUNSILL
li tiddetermina l-kompożizzjoni tal-Kumitat Ekonomiku u Soċjali Ewropew
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 301 tiegħu,
Wara li kkunsidra l-proposta tal-Kummissjoni Ewropea,
Billi:
(1)L-Artikolu 300 tat-Trattat jistabbilixxi r-regoli għall-kompożizzjoni tal-Kumitat Ekonomiku u Soċjali Ewropew.
(2)Id-Deċiżjoni tal-Kunsill (UE) 2015/1157 4 adattat il-kompożizzjoni tal-Kumitat Ekonomiku u Soċjali Ewropew wara l-adeżjoni tal-Kroazja. L-Estonja, Ċipru u l-Lussemburgu rispettivament tilfu siġġu wieħed biex tiġi indirizzata d-diskrepanza bejn l-għadd massimu ta’ membri stabbilit mit-Trattat u l-għadd ta’ membri wara l-adeżjoni tal-Kroazja.
(3)Il-preambolu tad-Deċiżjoni (UE) 2015/1157 jgħid li għandha tiġi riveduta fi żmien adegwat għall-mandat tal-Kumitat li jibda fl-2020.
(4)Fit-18 ta’ Settembru 2018, il-Kumitat Ekonomiku u Soċjali Ewropew adotta rakkomandazzjonijiet lill-Kummissjoni u lill-Kunsill dwar il-kompożizzjoni futura tiegħu 5 .
(5)Jenħtieġ li l-bilanċ attwali fil-kompożizzjoni tal-Kumitat Ekonomiku u Soċjali Ewropew sa fejn hu possibbli jinżamm peress li huwa r-riżultat ta’ Konferenzi Intergovernattivi suċċessivi.
(6)Il-ħruġ tar-Renju Unit mill-Unjoni Ewropea wassal għal 24 siġġu battal fil-Kumitat. B’konsegwenza ta’ dan, jista’ jerġa’ jintlaħaq il-bilanċ fl-allokazzjoni tas-siġġijiet li kienet teżisti qabel l-adozzjoni tad-Deċiżjoni tal-Kunsill (UE) 2015/1157.
ADOTTA DIN ID-DEĊIŻJONI:
Artikolu 1
Il-kompożizzjoni tal-membri tal-Kumitat Ekonomiku u Soċjali Ewropew għandha tkun hekk:
Il-Belġju 12
Il-Bulgarija 12
Ir-Repubblika Ċeka 12
Id-Danimarka 9
Il-Ġermanja 24
L-Estonja 7
L-Irlanda 9
Il-Greċja 12
Spanja 21
Franza 24
Il-Kroazja 9
L-Italja 24
Ċipru 6
Il-Latvja 7
Il-Litwanja 9
Il-Lussemburgu 6
L-Ungerija 12
Malta 5
In-Netherlands 12
L-Awstrija 12
Il-Polonja 21
Il-Portugall 12
Ir-Rumanija 15
Is-Slovenja 7
Is-Slovakkja 9
Il-Finlandja 9
L-Iżvezja 12.
Artikolu 2
Din id-Deċiżjoni għandha tidħol fis-seħħ fl-20 jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Għandha tapplika mill-21 ta’ Settembru 2020.
Artikolu 3
Din id-Deċiżjoni hija indirizzata lill-Istati Membri.
Magħmul fi Brussell,
Għall-Kunsill
Il-President
- (1) L-Att dwar il-kondizzjonijiet tal-adeżjoni tar-Repubblika tal-Kroazja u l-aġġustamenti għat-Trattat dwar l-Unjoni Ewropea, it-Trattat dwar il-Funzjonament tal-Unjoni Ewropea u t-Trattat li jistabbilixxi l-Komunità Ewropea tal-Enerġija Atomika (ĠU L 112, 24.4.2012, p. 6–110).
- (2) Id-Deċiżjoni tal-Kunsill 2015/1157/UE, ĠU L 187, 15.7.2015, p. 28-29.
- (3) Ittra tal-President tal-Kumitat lill-Kummissjoni tal-4 ta’ Ottubru 2018.
- (4) Id-Deċiżjoni tal-Kunsill (UE) 2015/1157 tal-14 ta’ Lulju 2015 li tiddetermina l-kompożizzjoni tal-Kumitat Ekonomiku u Soċjali Ewropew (ĠU L 187, 15.7.2015, p. 28).
- (5) Id-Deċiżjoni tal-Bureau tal-Kumitat Ekonomiku u Soċjali Ewropew tat-18 ta’ Settembru 2018.