IL-KUMMISSJONI EWROPEA

Strasburgu,17.4.2018

COM(2018) 213 final

2018/0105(COD)

Proposta għal

DIRETTIVA TAL-PARLAMENT EWROPEW U TAL-KUNSILL

li tistabbilixxi regoli li jiffaċilitaw l-użu ta’ informazzjoni finanzjarja u informazzjoni oħra għall-prevenzjoni, l-identifikazzjoni, l-investigazzjoni jew il-prosekuzzjoni ta’ ċerti reati kriminali u li tħassar id-Deċiżjoni tal-Kunsill 2000/642/ĠAI

{SWD(2018) 114 final}
{SWD(2018) 115 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u għanijiet tal-proposta

Informazzjoni f’waqtha hija essenzjali għall-investigazzjonijiet kriminali dwar reati serji. Nuqqas ta’ informazzjoni finanzjarja jista’ jirriżulta f’opportunitajiet mitlufa biex jiġu investigati reati serji, jiġu mfixkla attivitajiet kriminali, jitwaqqfu l-komplotti terroristiċi u jiġi identifikat u ffriżat ir-rikavat tal-kriminalità. Nuqqas ta’ informazzjoni fuq il-kontijiet kollha ta’ persuna suspettata jista’ jwassal għal iffriżar parzjali tal-assi biss, li jista’ jiġbed l-attenzjoni tal-persuna suspettata, li mbagħad tkun tista’ tneħħi l-fondi mhux identifikati mill-kontijiet l-oħra. Ħafna investigazzjonijiet ma jagħmlux progress minħabba n-nuqqas ta’ aċċess f’waqtu, preċiż u komprensiv għad-data finanzjarja rilevanti 1 .

Il-mekkaniżmi attwali għall-aċċess u l-iskambju ta’ informazzjoni finanzjarja huma bil-mod meta mqabbla mal-pass mgħaġġel li bih il-fondi jistgħu jiġu ttrasferiti madwar l-Ewropa u globalment. Huwa meħtieġ wisq żmien biex tinkiseb informazzjoni finanzjarja, u b’hekk titnaqqas l-effettività tal-investigazzjonijiet u tal-prosekuzzjonijiet. Hemm il-ħtieġa li jinstabu modi aktar mgħaġġla u aktar effettivi biex tiġi aċċessata u skambjata l-informazzjoni fuq il-kontijiet tal-bank, l-informazzjoni finanzjarja u l-analiżi finanzjarja. Għadd dejjem jikber ta’ investigazzjonijiet kriminali li jirnexxu se jirriżulta f’għadd dejjem jikber ta’ kundanni u konfiski tal-assi. Dan se jikkontribwixxi għat-tfixkil tal-attivitajiet kriminali u għaż-żieda tas-sigurtà fl-Istati Membri u madwar l-Unjoni.

Fit-2 ta’ Frar 2016, il-Kummissjoni adottat Pjan ta’ Azzjoni għat-tisħiħ tal-ġlieda kontra l-finanzjament tat-terroriżmu 2 li ppreżenta kif il-Kummissjoni se tfittex li taġġorna r-Raba’ Direttiva kontra l-Ħasil tal-Flus (4AMLD) 3 . Barra minn hekk, il-pjan talab ukoll l-immappjar ta’ ostakli għall-aċċess għal, l-iskambju u l-użu tal-informazzjoni u għall-kooperazzjoni operazzjonali bejn il-UIF li għandha tiġi segwita bi proposti leġiżlattivi jekk ikun xieraq.

•Konsistenza mad-dispożizzjonijiet eżistenti fil-qasam ta' politika

Barra minn hekk, din il-proposta għal Direttiva ssaħħaħ u tibni l-qafas tal-liġi kriminali tal-Unjoni fir-rigward tal-ġlieda kontra r-reati serji, b’mod partikolari r-Regolament (UE) 2016/794 dwar l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) 8 .

•Konsistenza ma’ politiki oħra tal-Unjoni

Id-Direttiva proposta hija konformi mal-għanijiet ta’ politika segwiti mill-Unjoni, u b’mod partikolari r-reġim ta’ protezzjoni tad-data riformata, li jirriżulta mid-Direttiva (UE) 2016/680, u hija konformi mal-każistika rilevanti tal-Qorti tal-Ġustizzja tal-Unjoni Ewropea.

Din l-inizjattiva leġiżlattiva hija konsistenti wkoll mal-għanijiet tal-iżvilupp tas-suq intern tal-Unjoni, b’mod partikolari s-suq uniku għall-pagamenti li jistabbilixxi servizzi ta’ pagament aktar sikuri u aktar innovattivi madwar l-UE, jiġifieri r-regoli stabbiliti fid-Direttiva (UE) 2015/2366 9 .

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

Is-setgħa li taġixxi hija kkonferita mill-Artikolu 87(2) tat-TFUE li jippermetti lill-Unjoni Ewropea tistabbilixxi miżuri dwar il-kooperazzjoni tal-pulizija li jinvolvu lill-awtoritajiet kompetenti kollha tal-Istati Membri (inklużi l-pulizija, id-dwana u servizzi speċjalizzati oħra tal-infurzar tal-liġi), b’mod partikolari fir-rigward tal-ġbir, il-ħżin u l-iskambju ta’ informazzjoni rilevanti għall-prevenzjoni, l-identifikazzjoni u l-investigazzjoni ta’ reati kriminali (ittra a) u tekniki ta’ investigazzjoni komuni b’rabta mal-identifikazzjoni ta’ forom serji ta’ kriminalità organizzata.
(ittra b).

•Sussidjarjetà (għall-kompetenza mhux esklużiva)

Azzjoni tal-Unjoni għandha l-għan li tiġġenera valur miżjud billi tipprovdi approċċ armonizzat li jsaħħaħ il-kooperazzjoni domestika u transkonfinali fl-investigazzjonijiet finanzjarji dwar ir-reati serji u t-terroriżmu. Barra minn hekk, azzjoni fil-livell tal-Unjoni se tgħin sabiex tiżgura dispożizzjonijiet armonizzati, inkluż dwar il-protezzjoni tad-data, filwaqt li jekk l-Istati Membri jitħallew jilleġiżlaw b’mod indipendenti, ikun diffiċli biex jintlaħaq livell armonizzat ta’ salvagwardji.

•Proporzjonalità

F’konformità mal-prinċipju tal-proporzjonalità, kif stabbilit fl-Artikolu 5(4) tat-TUE, din il-proposta hija limitata għal dak li huwa meħtieġ u proporzjonat sabiex jiġi ffaċilitat l-użu u l-kondiviżjoni ta’ informazzjoni finanzjarja rilevanti u informazzjoni oħra mill-awtoritajiet pubbliċi li għandhom l-obbligu li jipproteġu liċ-ċittadini tal-Unjoni.

L-inizjattiva proposta għandha l-għan li tagħti lil ċerti awtoritajiet kompetenti l-aċċess dirett għar-reġistri ċentrali nazzjonali tal-kontijiet tal-bank u għas-sistemi għall-ikrupru tad-data. Hija teżiġi li l-Istati Membri jinnominaw fost l-awtoritajiet tagħhom li huma kompetenti għall-prevenzjoni, id-detezzjoni, l-investigazzjoni, l-identifikazzjoni jew il-prosekuzzjoni ta’ reati kriminali, awtoritajiet kompetenti li jkollhom is-setgħa li jaċċessaw u jfittxu f’dawn ir-reġistri. Dawn għandhom jinkludu l-Uffiċċji għall-Irkurpu tal-Assi u l-Unitajiet Nazzjonali tal-Europol. Barra minn hekk, il-Europol se tingħata aċċess indirett, fuq bażi ta’ każ b’każ biss, għall-informazzjoni miżmuma fir-reġistri ċentrali nazzjonali tal-kontijiet tal-bank u fis-sistemi għall-irkupru tad-data, sabiex twettaq il-kompiti tagħha f’konformità mal-mandat.

L-aċċess għar-reġistri ċentrali nazzjonali tal-kontijiet tal-bank u għas-sistemi għall-irkupru tad-data se jingħata biss għal sett limitat ta’ informazzjoni (pereżempju l-isem, id-data tat-twelid, in-numru tal-kont tal-bank tas-sid) li huwa strettament meħtieġ biex jiġi identifikat f’liema banek is-suġġett ta’ investigazzjoni għandu kontijiet tal-bank. L-awtoritajiet mhux se jkunu jistgħu jaċċessaw il-kontenut tal-kontijiet tal-bank, la l-bilanċ tal-kontijiet u lanqas id-dettalji dwar it-tranżazzjonijiet. Ladarba l-awtoritajiet kompetenti jidentifikaw f’liema istituzzjoni finanzjarja s-suġġett ta’ investigazzjoni għandu kont tal-bank, f’ħafna każijiet huma se jkollhom javviċinaw lill-istituzzjoni rispettiva u jitolbu aktar informazzjoni, pereżempju lista ta’ tranżazzjonijiet (normalment fuq il-bażi ta’ awtorizzazzjoni ġudizzjarja).

Il-miżuri proposti mhux se jġibu bidliet għall-funzjonijiet ewlenin jew l-istatus organizzazzjonali tal-UIF, li se jkomplu jwettqu l-istess funzjonijiet kif stabbilit fil-leġiżlazzjoni nazzjonali u tal-Unjoni diġà fis-seħħ.

Il-proposta tiffaċilita l-kooperazzjoni bejn il-UIF kif ukoll il-kooperazzoni bejn il-UIF u l-awtoritajiet kompetenti. Dan il-qafas għal skambju ta’ informazzjoni jingħata taħt kundizzjonijiet speċifiċi u huwa limitat għal reati speċifiċi (ħasil tal-flus u reati predikati, finanzjament tat-terroriżmu) kif ukoll għal reati serji. Huwa jinkludi għadd ta’ salvagwardji għall-protezzjoni tal-privatezza u tad-data personali, dejjem bil-għan li jitjiebu l-kooperazzjoni domestika u transkonfinali u l-iskambju ta’ informazzjoni u li l-kriminali jitwaqqfu milli jisfruttaw id-differenzi bejn il-leġiżlazzjonijiet nazzjonali għall-vantaġġ tagħhom. Il-każijiet u l-kundizzjonijiet fejn l-iskambju ta’ data finanzjarja huwa permess huma limitati wkoll għal lista eżawrjenti ta’ awtoritajiet kompetenti. Dawn l-awtoritajiet kompetenti se jitħallew jaċċessaw u jiskambjaw biss data finanzjarja fir-rigward ta’ lista stabbilita ta’ reati kriminali u soġġett għal salvagwardji proċedurali nazzjonali u slavagwardji tal-privatezza.

•Għażla tal-istrument

3.IR-RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Konsultazzjonijiet ma’ partijiet ikkonċernati

·il-konsultazzjoni dwar il-Valutazzjoni tal-Impatt tal-Bidu (imnedija fid-9 ta’ Awwissu 2017 sas-6 ta’ Settembru 2017, fejn kwalunkwe parti interessata tista’ tipprovdi feedback);

·konsultazzjoni pubblika (miftuħa għal feedback minn kwalunkwe parti interessata għal 12-il ġimgħa mis-17 ta’ Ottubru 2017 sad-9 ta’ Jannar 2018);

·stħarriġ immirat indirizzat għall-Uffiċċji għall-Irkupru tal-Assi u l-Awtoritajiet ta’ Kontra l-Korruzzjoni tal-Istati Membri f’Ġunju 2016;

·laqgħa tal-esperti dwar it-twessigħ tal-aċċess tal-infurzar tal-liġi għar-reġistri ċentrali tal-kontijiet tal-bank, li saret bejn il-25 u s-26 ta’ Ottubru 2017;

·bħala segwitu tal-laqgħa tal-esperti dwar it-twessigħ tal-aċċess tal-infurzar tal-liġi għar-reġistri ċentrali tal-kontijiet tal-bank, il-Kummissjoni bagħtet mistoqsijiet addizzjonali lil diversi delegazzjonijiet;

·konsultazzjoni mal-Uffiċċji għall-Irkupru tal-Assi waqt il-laqgħa tal-Pjattaforma tal-Uffiċċji għall-Irkupru tal-Assi tal-UE fit-12-13 ta’ Diċembru 2017;

·laqgħa ta’ livell għoli li tivvaluta l-ħtieġa ta’ miżuri addizzjonali biex jiġi ffaċilitat l-aċċess għal informazzjoni finanzjarja – 20 ta’ Novembru 2017;

·laqgħa biex tiġi diskussa l-kooperazzjoni bejn il-UIF u l-awtoritajiet tal-infurzar tal-liġi, fis-6-7 ta’ Marzu 2018.

·aċċess rapidu għal informazzjoni dwar il-kontijiet tal-bank huwa kruċjali għat-twettiq effettiv tal-kompiti tagħhom;

·il-prattika attwali ta’ ħruġ ta’ “talbiet ġenerali” ma huma xejn sodisfaċenti mil-lat ta’ “effiċjenza”. dan jirriżulta f’piż amministrattiv konsiderevoli kemm għall-banek kif ukoll għalihom infushom u jnaqqas ir-ritmu tal-investigazzjonijiet;

·fir-rigward tal-aċċess tal-infurzar tal-liġi jintużaw approċċi differenti fl-Istati Membri. Għadd ta’ awtoritajiet tal-pulizija, Uffiċċji għall-Irkupru tal-Assi u aġenziji ta’ kontra l-korruzzjoni għandhom aċċess f’xi Stati Membri, filwaqt li f’oħrajn ma għandhomx.

·id-deċiżjoni ta’ jekk sistema għandhiex tkun ċentralizzata jew deċentralizzata għandha tittieħed fil-livell nazzjonali;

·l-inizjattiva għandha tiżgura kif xieraq li ma tipperikolax id-drittijiet fundamentali tal-individwi għall-privatezza tad-data.

·il-prattika li jintbagħtu talbiet ġenerali mhijiex sodisfaċenti mil-lat tal-protezzjoni tad-data;

·hemm il-ħtieġa ta’ ġustifikazzjoni b’saħħitha biex jitwessa’ l-aċċess u għandhom jingħataw is-salvagwardji meħtieġa.

·kwalunkwe proposta leġiżlattiva jeħtieġ li tkun kompletament konformi mal-qafas Ewropew dwar il-protezzjoni tad-data.

Fir-rigward tal-iskambju ta’ informazzjoni bejn il-UIF u l-awtoritajiet kompetenti:

F’Marzu 2018, il-Kummissjoni organizzat laqgħa biex tiddiskuti l-kooperazzjoni bejn il-UIF u l-awtoritajiet tal-infurzar tal-liġi. L-Istati Membri ġew ikkonsultati u taw input dwar il-kwistjonijiet li ġejjin:

(i) dwar l-aċċess tal-UIF għall-informazzjoni tal-awtoritajiet tal-infurzar tal-liġi lokalment fejn jidher li l-UIF kollha għandhom aċċess, kemm dirett kif ukoll indirett (permezz ta’ uffiċjali ta’ kollegament tal-pulizija preżenti fl-UIF). Id-differenza ewlenija fl-Istati Membri hija t-tip ta’ informazzjoni li l-UIF għandhom aċċess għaliha. Il-UIF irrikonoxxew li l-armonizzazzjoni tat-tipi ta’ informazzjoni li għandhom aċċess għaliha hija importanti;

(ii) l-aċċess tal-awtoritajiet kompetenti għal informazzjoni finanzjarja permezz tal-UIF, fejn jidher li l-ebda UIF ma tagħti aċċess dirett lill-awtoritajiet kompetenti għall-bażijiet tad-data tagħha. Madankollu, il-UIF tal-pulizija huma kapaċi jirrispondu faċilment għat-talbiet għal informazzjoni mill-awtoritajiet kompetenti. Għall-UIF amministrattivi dan mhux daqshekk faċli;

(iii) Kooperazzjoni djagonali, jiġifieri kooperazzjoni bejn UIF f’wieħed mill-Istati Membri mal-awtoritajiet kompetenti fi Stat Membru ieħor, li tista’ tkun diretta jew indiretta (jiġifieri permezz tal-UIF fl-Istat Membru tal-awtoritajiet kompetenti rikjedenti), fejn l-Istati Membri kollha ma qablux mal-idea ta’ kooperazzjoni djagonali diretta u kienu lkoll favur kooperazzjoni djagonali indiretta;

(iv) Kooperazzjoni mal-Europol fejn 8 UIF diġà skambjaw informazzjoni mal-Europol. B’mod ġenerali, il-UIF esprimew interess fl-iskambju ta’ informazzjoni mal-Europol, bil-kundizzjoni li l-iskambji jkunu reċiproċi.

•Ġbir u użu tal-kompetenzi

•Valutazzjoni tal-impatt

Din il-proposta hija appoġġjata minn valutazzjoni tal-impatt li vvalutat il-modi li bihom jitwessa’ l-aċċess għall-informazzjoni finanzjarja għall-awtoritajiet kompetenti fir-rigward tal-investigazzjoni ta’ reati, u tindirizza żewġ kwistjonijiet: il-kwistjoni tal-aċċess tal-awtoritajiet kompetenti għar-reġistri ċentrali tal-kontijiet tal-bank jew għas-sistemi għall-irkupru, u l-kwistjoni tat-tisħiħ tal-kooperazzjoni bejn l-Unitajiet tal-Intelligence Finanzjarja u l-awtoritajiet kompetenti.

(1)Għażla Bażika.

(2)Għażla Mhux Leġiżlattiva – Għażla 0.

(3)Għażliet Leġiżlattivi:

·Għażla A kienet relatata mat-tipi ta’ reati għall-prevenzjoni u l-ġlieda li tagħhom l-awtoritajiet kompetenti jkunu jistgħu jaċċessaw u jiskambjaw l-informazzjoni.

Għażla A.1 kienet limitata għall-prevenzjoni u l-ġlieda tal-ħasil tal-flus, ir-reati predikati assoċjati u l-finanzjament tat-terroriżmu.

Għażla A.2 kienet limitata għall-prevenzjoni u l-ġlieda tal-Ewroreati.

Għażla A.3 kienet limitata għall-prevenzjoni u l-ġlieda ta’ reati serji skont ir-Regolament tal-Europol.

·Għażla B eżaminat il-modalitajiet ta’ aċċess għad-data.

Għażla B.1 kienet relatata mal-modalitajiet ta’ aċċess tal-awtoritajiet kompetenti għar-reġistri ċentrali tal-kontijiet tal-bank mal-Għażla B.1.a li tipprevedi aċċess dirett u Għażla B.1.b li tipprevedi aċċess indirett.

Għażla B.2 kienet relatata mal-modalitajiet ta’ aċċess tal-awtoritajiet kompetenti għall-informazzjoni finanzjarja kollha bl-Għażla B.2.a tipprevedi aċċess dirett għall-informazzjoni minn istituzzjonijiet finanzjarji u l-Għażla B.2.b tipprevedi aċċess indirett permezz tal-Unitajiet tal-Intelligence Finanzjarja.

Għażla B.3 kienet relatata mal-iskambju ta’ informazzjoni bejn l-Unitajiet tal-Intelligence Finanzjarja stess u ma’ talbiet għal informazzjoni mill-Unitajiet tal-Intelligence Finanzjarja lill-awtoritajiet kompetenti, li tagħhom Għażla B.3.a eżaminat kooperazzjoni diretta filwaqt li Għażla B.3.b eżaminat l-għażla li titwaqqaf UIF ċentrali tal-UE.

·Għażla C eżaminat il-kategoriji tal-awtoritajiet li se jibbenefikaw mill-aċċess għal u l-iskambji ta’ informazzjoni. Għażla C.1 kienet tinkludi l-awtoritajiet kompetenti tad-Direttiva dwar il-Pulizija u l-Protezzjoni tad-Data, filwaqt li Għażla C.2 estendiet il-kooperazzjoni ma’ awtoritajiet oħrajn, jiġifieri l-Uffiċċji għall-Irkupru tal-Assi, il-Europol u l-OLAF.

Din il-proposta tikkorrispondi għall-għażliet tal-pulizija ppreferuti meqjusa fil-Valutazzjoni tal-Impatt.

L-għażla ppreferuta, f’dak li għandu x’jaqsam mar-reġistri ċentrali tal-kontijiet tal-bank, hija l-adozzjoni ta’ strument leġiżlattiv tal-UE li jagħti aċċess dirett lill-awtoritajiet kompetenti. Dan l-aċċess għandu jingħata għall-finijiet ta’ investigazzjonijiet kriminali fuq il-forom serji kollha ta’ kriminalità msemmija fl-Artikolu 3(1) tar-Regolament tal-Europol. L-aċċess tal-Europol għandu jkun aċċess indirett, iżda l-investigazzjonijiet appoġġjati mill-Europol se jibbenefikaw ukoll minn aċċess għal informazzjoni miżmuma fir-reġistri ċentrali tal-kontijiet tal-bank.

Aċċess dirett għar-reġistri ċentrali tal-kontijiet tal-bank u għas-sistemi għall-irkupru huwa permess taħt l-għażla ppreferuta peress li dawn fihom informazzjoni limitata. L-interferenza bid-dritt għall-protezzjoni ta’ data personali se tinżamm għall-minimu skont l-għażla ppreferuta. Id-drittijiet ta’ aċċess huma limitati u huma mmirati biss għall-awtoritajiet meħtieġa f’kull każ, u b’hekk jiżguraw proporzjonalità fl-interferenza fil-protezzjoni ta’ data personali.

L-għażla ppreferuta tinkludi wkoll dispożizzjonijiet sabiex tiffaċilita l-iskambji ta’ data bejn UIF, kif ukoll reċiprokament bejn UIF u awtoritajiet kompetenti. Il-possibbiltà li l-Europol titlob ukoll informazzjoni minn UIF se tiġi rregolata wkoll. Minħabba s-sensittività tal-informazzjoni, l-għażla ppreferuta tipprevedi salvagwardji stretti tal-protezzjoni tad-data.

•Idoneità regolatorja u simplifikazzjoni

•Drittijiet fundamentali

Din l-inizjattiva se tipprovdi lill-awtoritajiet kompetenti aċċess għall-mekkaniżmi li jiċċentralizzaw id-data personali relatata mal-persuni fiżiċi jew li minnhom tkun tista’ tiġi rkuprata d-data personali. Dan se jkollu impatt fuq id-drittijiet fundamentali tas-suġġetti tad-data. B’mod partikolari, din se tinterferixxi mad-dritt għall-privatezza u d-dritt għall-protezzjoni ta’ data personali, rispettivament skont l-Artikoli 7 u 8 tal-Karta tad-Drittijiet Fundamentali tal-UE.

Il-proposta tispeċifika l-għanijiet għall-ipproċessar ta’ data personali u teżiġi lista ta’ awtoritajiet kompetenti nnominati intitolati biex jitolbu informazzjoni. L-iskambji ta’ informazzjoni se jkunu limitati fuq bażi ta’ każ b’każ, jiġifieri fejn ikun rilevanti għal każ speċifiku biss, għall-iskop ta’ ġlieda kontra lista eżawrjenti ta’ reati kriminali serji speċifikati.

Il-proposta tistabbilixxi wkoll dispożizzjonijiet speċifiċi dwar ir-reġistrazzjoni, rekords ta’ talbiet għal informazzjoni, restrizzjonijiet għad-drittijiet u l-ipproċessar ta’ kategoriji speċjali tad-data personali (“data sensittiva”).

Permezz tal-Unitajiet Nazzjonali Ewropej, il-Europol se tingħata wkoll aċċess indirett għall-informazzjoni miżmuma fir-reġistri ċentrali nazzjonali tal-kontijiet tal-bank u fis-sistemi għall-irkupru tad-data u se jkollha l-possibbiltà li tiskambja data mal-Unitajiet tal-Intelligence Finanzjarja, bil-għan li twettaq il-kompiti tagħha (tappoġġja u ssaħħaħ l-azzjoni mill-Istati Membri għall-prevenzjoni, l-identifikazzjoni, l-investigazzjoni u l-prosekuzzjoni ta’ reati speċifiċi fi ħdan il-kompetenzi tagħha) skont il-mandat tagħha. Is-salvagwardji kollha previsti fil-Kapitoli VI u VII tar-Regolament (UE) 2016/794 japplikaw.

Fir-rigward tad-drittijiet proċedurali, it-tneħħija tal-ħtieġa ta’ awtorizzazzjoni ġudizzjarja li teżisti f’xi Stati Membri se jkollha impatt serju ħafna. Għalhekk l-iskambji ta’ informazzjoni bejn l-Unitajiet tal-Intelligence Finanzjarja u l-awtoritajiet kompetenti se jkunu soġġetti għal salvagwardji proċedurali nazzjonali.

4.IMPLIKAZZJONIJIET BAĠITARJI

5.ELEMENTI OĦRAJN

•Pjanijiet ta’ implimentazzjoni u arranġamenti ta’ monitoraġġ, ta’ valutazzjoni u ta’ rapportar

Il-Kummissjoni se tevalwa wkoll l-effettività, l-effiċjenza, ir-rilevanza, il-koerenza u l-valur miżjud tal-UE tal-qafas legali li jirriżulta, mhux qabel sitt snin wara d-data tat-traspożizzjoni sabiex tiżgura li jkun hemm biżżejjed data relatata mal-funzjonament tad-Direttiva. L-evalwazzjoni għandha tinkludi l-konsultazzjonijiet tal-partijiet ikkonċernati biex tiġbor feedback dwar l-effetti tal-bidliet leġiżlattivi. Il-punt ta’ riferiment li miegħu se jitkejjel il-progress huwa s-sitwazzjoni bażika meta l-att leġiżlattiv jidħol fis-seħħ. Il-Kummissjoni se tippreżenta rapport dwar il-funzjonament tad-Direttiva lill-Parlament Ewropew u lill-Kunsill. Ir-rapport għandu jinkludi wkoll evalwazzjoni ta’ kif id-drittijiet u l-prinċipji fundamentali rikonoxxuti mill-Karta tad-Drittijiet Fundamentali tal-Unjoni Ewropea ġew irrispettati.

•Id-dokumenti ta’ spjegazzjoni (għad-direttivi)

•Spjegazzjoni dettaljata tad-dispożizzjonijiet speċifiċi tal-proposta

2018/0105 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

li tistabbilixxi regoli li jiffaċilitaw l-użu ta’ informazzjoni finanzjarja u informazzjoni oħra għall-prevenzjoni, l-identifikazzjoni, l-investigazzjoni jew il-prosekuzzjoni ta’ ċerti reati kriminali u li tħassar id-Deċiżjoni tal-Kunsill 2000/642/ĠAI

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 87(2) tiegħu,

Wara li kkunsidraw il-proposta mill-Kummissjoni Ewropea

Wara t-trażmissjoni tal-abbozz tal-att leġiżlattiv lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 10 ,

Wara li kkunsidraw l-opinjoni tal-Kumitat tar-Reġjuni 11 ,

Waqt li jaġixxu skont il-proċedura ordinarja leġiżlattiva,

Billi:

(1)L-iffaċilitar tal-użu ta’ informazzjoni finanzjarja huwa meħtieġ għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati serji.

(2)Sabiex tissaħħaħ is-sigurtà fl-Istati Membri u madwar l-Unjoni, huwa meħtieġ li jitjieb l-aċċess għal informazzjoni mill-Unitajiet tal-Intelligence Finanzjarja u l-awtoritajiet pubbliċi responsabbli għall-prevenzjoni, l-identifikazzjoni, l-investigazzjoni jew il-prosekuzzjoni ta’ forom serji ta’ kriminalità, sabiex tissaħħaħ il-kapaċità tagħhom li jwettqu investigazzjonijiet finanzjarji u titjieb il-kooperazzjoni bejniethom.

(3)Fil-Pjan ta’ Azzjoni tagħha biex issaħħaħ il-ġlieda kontra l-finanzjament tat-terroriżmu 12 , il-Kummissjoni impenjat ruħha li tesplora l-possibbiltà ta’ strument legali ddedikat sabiex twessa’ l-aċċess għar-reġistri ċentrali tal-kontijiet tal-bank mill-awtoritajiet tal-Istati Membri, jiġifieri l-awtoritajiet kompetenti għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali jew l-eżekuzzjoni ta’ pieni kriminali, l-Uffiċċji għall-Irkupru tal-Assi, l-awtoritajiet tat-taxxa u l-awtoritajiet kontra l-korruzzjoni. Barra minn hekk, il-Pjan ta’ Azzjoni 2016 talab l-immappjar tal-ostakli għall-aċċess għal, skambju u użu ta’ informazzjoni u għall-kooperazzjoni operazzjonali bejn l-Unitajiet tal-Intelligence Finanzjarja.

(4)Id-Direttiva (UE) 2015/849 13 teżiġi li l-Istati Membri jistabbilixxu reġistri ċentrali tal-kontijiet tal-bank jew sistemi għall-irkupru tad-data li jippermettu l-identifikazzjoni f’waqtha tal-persuni li għandhom kontijiet tal-bank u ta’ pagament u kaxxi tad-depożitu tas-sejf.

(5)Skont id-Direttiva (UE) 2015/849, l-informazzjoni miżmuma f’dawk ir-reġistri hija direttament aċċessibbli għall-Unitajiet tal-Intelligence Finanzjarja u hija aċċessibbli wkoll għall-awtoritajiet nazzjonali kompetenti għall-prevenzjoni tal-ħasil tal-flus, tar-reati relattivi u tal-finanzjament tat-terroriżmu.

(6)Aċċess immedjat u dirett għall-informazzjoni miżmuma fir-reġistri ċentrali tal-kontijiet tal-bank spiss huwa indispensabbli għas-suċċess ta’ investigazzjoni kriminali jew għall-identifikazzjoni, l-intraċċar u l-iffriżar f’waqtu tal-assi relatati fid-dawl tal-konfiska tagħhom. Aċċess dirett huwa l-aktar tip ta’ aċċess immedjat għall-informazzjoni miżmuma fir-reġistri ċentrali tal-kontijiet tal-bank. Għalhekk, din id-Direttiva għandha tistabbilixxi regoli li jagħtu aċċess dirett għall-informazzjoni miżuma fir-reġistri ċentrali tal-kontijiet tal-bank għall-awtoritajiet innominati tal-Istati Membri u korpi kompetenti oħra għall-prevenzjoni, l-identifkazzjoni, l-investigazzjoni jew il-prosekuzzjoni ta’ reati kriminali.

(7)Peress li f’kull Stat Membru hemm diversi awtoritajiet jew korpi li huma kompetenti għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali, u sabiex jiġi żgurat aċċess proporzjonat għal informazzjoni finanzjarja u informazzjoni oħra skont din id-Direttiva, l-Istati Membri għandhom ikunu meħtieġa jinnominaw liema awtoritajiet għandhom jingħataw is-setgħa li jkollhom aċċess għar-reġistri ċentrali tal-kontijiet tal-bank u jitolbu informazzjoni mill-Unitajiet tal-Intelligence Finanzjarja għall-finijiet ta’ din id-Direttiva.

(8)L-Uffiċċji għall-Irkupru tal-Assi għandhom jiġu nnominati fost l-awtoritajiet kompetenti u jkollhom aċċess dirett għall-informazzjoni miżmuma fir-reġistri ċentrali tal-kontijiet tal-bank meta jipprevjenu, jidentifikaw jew jinvestigaw reat kriminali serju speċifiku jew jappoġġjaw investigazzjoni kriminali speċifika, inkluż l-identifikazzjoni, l-intraċċar u l-iffriżar tal-assi.

(9)Sakemm l-awtoritajiet tat-taxxa u l-aġenziji kontra l-korruzzjoni jkunu kompetenti għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali skont il-liġi nazzjonali, dawn għandhom jitqiesu wkoll bħala awtoritajiet li jistgħu jiġu nnominati għall-finijiet ta’ din id-Direttiva. L-investigazzjonijiet amministrattivi ma għandhomx ikunu koperti taħt din id-Direttiva.

(10)L-awturi tar-reati kriminali, b’mod partikolari l-gruppi kriminali u t-terroristi, spiss joperaw fi Stati Membri differenti u l-assi tagħhom, inklużi l-kontijiet tal-bank, spiss ikunu jinsabu fi Stati Membri oħra. Minħabba d-dimensjoni transkonfinali ta’ reati serji, inkluż it-terroriżmu, u tal-attivitajiet finanzjarji relatati, spiss ikun meħtieġ li l-awtoritajiet kompetenti jwettqu investigazzjonijiet biex jaċċessaw informazzjoni dwar il-kontijiet tal-bank miżmuma fi Stati Membri oħra.

(11)L-informazzjoni akkwistata mill-awtoritajiet kompetenti mir-reġistri ċentrali nazzjonali tal-kontijiet tal-bank tista’ tiġi skambjata mal-awtoritajiet kompetenti li jinsabu fi Stat Membru differenti, skont id-Deċiżjoni Qafas tal-Kunsill 2006/960/ĠAI 14 u d-Direttiva 2014/41/UE 15 tal-Parlament Ewropew u tal-Kunsill.    

(12)Id-Direttiva (UE) 2015/849 tejbet b’mod sostanzjali l-qafas legali tal-Unjoni li jirregola l-attività u l-kooperazzjoni tal-Unitajiet tal-Intelligence Finanzjarja. Is-setgħat tal-Unitajiet tal-Intelligence Finanzjarja jinkludu d-dritt ta’ aċċess għall-informazzjoni finanzjarja, amministrattiva u dwar l-infurzar tal-liġi li huma jeħtieġu biex jiġġieldu l-ħasil tal-flus, ir-reati relattivi assoċjati u l-finanzjament tat-terroriżmu. Madankollu, id-dritt tal-Unjoni ma jistabbilixxix l-għodod u l-mekkaniżmi speċifiċi kollha li l-Unitajiet tal-Intelligence Finanzjarja għandu jkollhom għad-dispożizzjoni tagħhom sabiex jaċċessaw dik l-informazzjoni u jwettqu l-kompiti tagħhom. Peress li l-Istati Membri jibqgħu kompletament responsabbli biex jistabbilixxu u jiddeċiedu dwar in-natura organizzazzjonali tal-Unitajiet tal-Intelligence Finanzjarja, Unitajiet tal-Intelligence Finanzjarja differenti għandhom gradi differenti ta’ aċċess għall-bażijiet tad-data regolatorji li jwassal għal skambju insuffiċjenti ta’ informazzjoni bejn is-servizzi tal-infurzar tal-liġi jew ta’ prosekuzzjoni u l-Unitajiet tal-Intelligence Finanzjarja.

(13)Sabiex tissaħħaħ iċ-ċertezza tad-dritt u l-effettività operazzjonali, din id-Direttiva għandha tistabbilixxi regoli biex issaħħaħ il-kapaċità tal-Unitajiet tal-Intelligence Finanzjarja li jikkondividu l-informazzjoni mal-awtoritajiet kompetenti nnominati tagħhom għal kull reat kriminali serju.

(14)Din id-Direttiva għandha tistabbilixxi wkoll qafas legali ddefinit b’mod ċar sabiex tippermetti lill-Unitajiet tal-Intelligence Finanzjarja jitolbu data rilevanti maħżuna mill-awtoritajiet kompetenti nnominati sabiex jippermettulhom jipprevjenu u jiġġieldu l-ħasil tal-flus, ir-reati predikati assoċjati u l-finanzjament tat-terroriżmu b’mod effettiv.

(15)Il-kondiviżjoni ta’ informazzjoni bejn l-Unitajiet tal-Intelligence Finanzjarja u mal-awtoritajiet kompetenti għandha tkun permessa biss fejn ikun meħtieġ fuq bażi ta’ każ b’każ, għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali serji jew għall-ħasil tal-flus, ir-reati predikati assoċjati u l-finanzjament tat-terroriżmu.

(16)Sabiex tipprevjeni u tiġġieled il-ħasil tal-flus, ir-reati predikati assoċjati u l-finanzjament tat-terroriżmu b’mod aktar effettiv u sabiex issaħħaħ ir-rwol tagħha fil-provvediment ta’ informazzjoni u analiżi finanzjarja, Unità tal-Intelligence Finanzjarja għandha tingħata s-setgħa li tiskambja informazzjoni jew analiżi li hija diġà fil-pussess tagħha jew li tista’ tinkiseb minn entitajiet obbligati fuq it-talba ta’ Unità tal-Intelligence Finanzjarja oħra jew ta’ awtorità kompetenti fl-Istat Membru tagħha. Dan l-iskambju ma għandux ixekkel ir-rwol attiv ta’ Unità tal-Intelligence Finanzjarja fit-tixrid tal-analiżi tagħha lil Unitajiet tal-Intelligence Finanzjarja oħra fejn dik l-analiżi tiżvela fatti, imġiba jew suspett ta’ ħasil tal-flus u finanzjament tat-terroriżmu ta’ interess dirett għal dawk l-Unitajiet tal-Intelligence Finanzjarja oħra. L-analiżi finanzjarja tkopri analiżi operazzjonali li tiffoka fuq każijiet individwali u miri speċifiċi jew fuq informazzjoni magħżula xierqa, skont it-tip u l-volum tad-divulgazzjonijiet riċevuti u l-użu mistenni tal-informazzjoni wara t-tixrid kif ukoll analiżi strateġika li tindirizza x-xejriet u t-tendenzi tal-ħasil tal-flus u tal-finanzjament tat-terroriżmu. Madankollu, din id-Direttiva għandha tkun mingħajr preġudizzju għall-istatus organizzazzjonali u r-rwol mogħti lill-Unitajiet tal-Intelligence Finanzjarja skont il-liġi nazzjonali tal-Istati Membri.

(17)Il-limiti ta’ żmien għal skambji ta’ informazzjoni bejn l-Unitajiet tal-Intelligence Finanzjarja huma meħtieġa sabiex tiġi żgurata kooperazzjoni rapida, effettiva u konsistenti. Il-kondiviżjoni ta’ informazzjoni li hija meħtieġa biex jiġu solvuti każijiet u investigazzjonijiet transkonfinali għandha titwettaq bl-istess rapidità u prijorità bħal dawk għal każ domestiku simili. Għandhom jingħataw limiti ta’ żmien biex tiġi żgurata l-kondiviżjoni ta’ informazzjoni effettiva fi żmien raġonevoli jew sabiex jiġu rrispettati l-limitazzjonijiet proċedurali. Limiti ta’ żmien iqsar għandhom jingħataw f’każijiet debitament iġġustifikati, fejn it-talbiet jirrelataw ma’ reati kriminali serji speċifiċi, bħal reati terroristiċi u reati relatati ma’ grupp terroristiku jew attivitajiet kif stabbilit fid-dritt tal-Unjoni.

(18)L-użu ta’ faċilitajiet sikuri għall-iskambju ta’ informazzjoni, b’mod partikolari n-netwerk ta’ kompjuter deċentralizzat FIU.net (l-“FIU.net), li ilu jiġi mmaniġġjat mill-Europol mill-1 ta’ Jannar 2016, jew mis-suċċessur tiegħu u t-tekniki offruti mill-FIU.net, għandhom jintużaw għal skambji ta’ informazzjoni bejn l-Unitajiet tal-Intelligence Finanzjarja.

(19)Minħabba s-sensittività tad-data finanzjarja li għandha tiġi analizzata mill-Unitajiet tal-Intelligence Finanzjarja u s-salvagwardji meħtieġa tal-protezzjoni tad-data, din id-Direttiva għandha tistabbilixxi speċifikament it-tip u l-kamp ta’ applikazzjoni tal-informazzjoni li jistgħu jiġu skambjati bejn l-Unitajiet tal-Intelligence Finanzjarja u ma’ awtoritajiet kompetenti nnominati. Din id-Direttiva ma għandha ġġib l-ebda bidla għall-metodi ta’ ġbir tad-data miftiehma attwalment.

(20)Skont il-kompetenzi u l-kompiti speċifiċi tagħha kif stabbilit fl-Artikolu 4 tar-Regolament (UE) 2016/794 tal-Parlament Ewropew u tal-Kunsill 16 , il-Europol tipprovdi appoġġ għall-investigazzjonijiet transkonfinali tal-Istati Membri fl-attivitajiet tal-ħasil tal-flus ta’ organizzazzjonijiet kriminali transnazzjonali. Skont ir-Regolament (UE) 2016/794, l-Unitajiet Nazzjonali tal-Europol huma l-korpi ta’ kollegament bejn il-Europol u l-awtoritajiet tal-Istati Membri li huma kompetenti biex jinvestigaw ir-reati kriminali. Sabiex il-Europol tingħata l-informazzjoni meħtieġa biex twettaq il-kompiti tagħha, l-Istati Membri għandhom jipprevedu li l-Unità tal-Intelligence Finanzjarja tagħhom twieġeb għat-talbiet għal informazzjoni finanzjarja u analiżi finanzjarja magħmula mill-Europol permezz tal-Unità Nazzjonali tal-Europol rispettiva. L-Istati Membri għandhom jipprevedu wkoll li l-Unità Nazzjonali tal-Europol tagħhom twieġeb għat-talbiet għal informazzjoni dwar il-kontijiet tal-bank mill-Europol. It-talbiet magħmula mill-Europol għandhom jiġu debitament iġġustifikati. Dawn għandhom isiru fuq bażi ta’ każ b’każ, fi ħdan il-limiti tar-responsabbiltajiet tal-Europol u għat-twettiq tal-kompiti tagħha.

(21)Din id-Direttiva għandha tqis ukoll il-fatt li, skont l-Artikolu 43 tar-Regolament (UE) 2017/1939 17 , il-Prosekuturi Delegati Ewropej tal-Uffiċċju Ewropew tal-Prosekuzzjoni Pubblika (EPPO) għandhom is-setgħa li jiksbu kwalunkwe informazzjoni rilevanti maħżuna fil-bażijiet tad-data nazzjonali tal-investigazzjoni kriminali u tal-infurzar tal-liġi, kif ukoll reġistri rilevanti oħra tal-awtoritajiet pubbliċi, inklużi r-reġistri ċentrali tal-kontijiet tal-bank u s-sistemi għall-irkupru tad-data taħt l-istess kundizzjonijiet bħal dawk li japplikaw taħt il-liġi nazzjonali f’każijiet simili.

(22)Sabiex jinkiseb bilanċ xieraq bejn l-effiċjenza u livell għoli tal-protezzjoni tad-data, l-Istati Membri għandhom ikunu meħtieġa jiżguraw li l-ipproċessar ta’ informazzjoni finanzjarja sensittiva li tista’ tiżvela r-razza jew l-oriġini etnika, l-opinjonijiet politiċi, ir-reliġjon jew it-twemmin filosofiku, is-sħubija fi trejdjunjin, is-saħħa, il-ħajja sesswali jew l-orjentazzjoni sesswali ta’ persuna, għandu jitħalla biss sa fejn ikun strettament meħtieġ u rilevanti għal investigazzjoni speċifika.

(23)Din id-Direttiva tirrispetta d-drittijiet fundamentali u tosserva l-prinċipji rikonoxxuti mill-Artikolu 6 tat-Trattat dwar l-Unjoni Ewropea u mill-Karta tad-Drittijiet Fundamentali tal-Unjoni Ewropea, b’mod partikolari d-dritt għar-rispett għall-ħajja privata u għall-ħajja tal-familja (Artikolu 7) u d-dritt għall-protezzjoni tad-data personali (Artikolu 8), fil-liġi internazzjonali u ftehimiet internazzjonali li għalihom l-Unjoni jew l-Istati Membri kollha huma partijiet, inkluża l-Konvenzjoni Ewropea għall-Protezzjoni tad-Drittijiet tal-Bniedem u l-Libertajiet Fundamentali, u fil-kostituzzjonijiet tal-Istati Membri fl-oqsma ta’ applikazzjoni rispettivi tagħhom.

(24)Huwa essenzjali li jiġi żgurat li l-ipproċessar ta’ data personali skont din id-Direttiva jirrispetta bis-sħiħ id-dritt għall-protezzjoni tad-data personali. Kwalunkwe pproċessar bħal dan huwa soġġett għad-Direttiva (UE) 2016/680 tal-Parlament Ewropew u tal-Kunsill u għar-Regolament (UE) 2016/679 tal-Parlament Ewropew u tal-Kunsill 18 , fil-kamp ta’ applikazzjoni rispettiv tagħhom. F’dak li għandu x’jaqsam mal-aċċess tal-Uffiċċji għall-Irkupru tal-Assi għar-reġistri ċentrali tal-kontijiet tal-bank u għas-sistemi għall-irkupru tad-data tapplika d-Direttiva (UE) 2016/680, filwaqt li l-Artikolu 5(2) tad-Deċiżjoni tal-Kunsill 2007/845/ĠAI ma għandux japplika. F’dak li għandu x’jaqsam mal-Europol, japplika r-Regolament (UE) 2016/794. F’din id-Direttiva għandhom jiġu stabbiliti salvagwardji u kundizzjonijiet speċifiċi u addizzjonali biex tiġi żgurata l-protezzjoni ta’ data personali fir-rigward tal-mekkaniżmi sabiex jiġi żgurat l-ipproċessar ta’ data sensittiva u rekords ta’ talbiet għal informazzjoni.

(25)Id-data personali miksuba skont din id-Direttiva għandha tiġi pproċessata biss mill-awtoritajiet kompetenti fejn ikun meħtieġ u proporzjonat għall-finijiet ta’ prevenzjoni, l-identifikazzjoni, l-investigazzjoni jew il-prosekuzzjoni ta’ reat serju jew infurzar ta’ sanzjonijiet kriminali.

(26)Barra minn hekk, sabiex jiġi rrispettat id-dritt għall-protezzjoni tad-data personali u d-dritt għall-privatezza u jiġi limitat l-impatt tal-aċċess għall-informazzjoni li tinsab fir-reġistri ċentrali tal-kontijiet tal-bank u fis-sistemi għall-irkupru tad-data, huwa essenzjali li jiġu previsti kundizzjonijiet li jillimitaw l-aċċess. B’mod partikolari, l-Istati Membri għandhom jiżguraw li politiki u miżuri xierqa dwar il-protezzjoni tad-data japplikaw għall-aċċess għal data personali mill-awtoritajiet kompetenti għall-finijiet ta’ din id-Direttiva. Persuni awtorizzati biss għandu jkollhom aċċess għal informazzjoni li fiha data personali, li tista’ tinkiseb mir-reġistri ċentrali tal-kontijiet tal-bank jew permezz ta’ proċessi ta’ awtentikazzjoni.

(27)It-trasferiment ta’ data finanzjarja lejn pajjiżi terzi u sħab internazzjonali, għall-finijiet stabbiliti f’din id-Direttiva għandu jitħalla biss taħt il-kundizzjonijiet stabbiliti fil-Kapitolu V tad-Direttiva (UE) 2016/680 jew il-Kapitolu V tar-Regolament (UE) 2016/679.

(28)Il-Kummissjoni għandha tirrapporta dwar l-implimentazzjoni ta’ din id-Direttiva tliet snin wara d-data tat-traspożizzjoni tagħha, u kull tliet snin wara dan. Skont il-paragrafi 22 u 23 tal-Ftehim Interistituzzjonali dwar Tfassil Aħjar tal-Liġijiet 19 il-Kummissjoni għandha twettaq ukoll evalwazzjoni ta’ din id-Direttiva fuq il-bażi tal-informazzjoni miġbura permezz ta’ arranġamenti ta’ monitoraġġ speċifiċi sabiex tivvaluta l-effetti attwali tad-Direttiva u l-ħtieġa ta’ kwalunkwe azzjoni ulterjuri.

(29)Din id-Direttiva għandha l-għan li tiżgura li r-regoli jiġu adottati biex jipprovdu liċ-ċittadini tal-Unjoni livell ogħla ta’ sigurtà billi tiġi evitata u miġġielda l-kriminalità skont l-Artikolu 67 tat-Trattat dwar il-Funzjonament tal-Unjoni Ewropea. Minħabba n-natura transnazzjonali tiegħu, it-theddid terroristiku u kriminali jaffettwa l-Unjoni kollha kemm hi u jeħtieġ rispons mal-Unjoni kollha. Il-kriminali jistgħu jisfruttaw, u se jibbenefikaw min-nuqqas ta’ użu effiċjenti ta’ informazzjoni dwar il-kontijiet tal-bank u informazzjoni finanzjarja fi Stat Membru, li jista’ jkollu konsegwenzi fi Stat Membru ieħor. Ladarba l-objettiv ta’ dan ir-Regolament ma jistax jintlaħaq b’mod suffiċjenti mill-Istati Membri u għalhekk jista’ jintlaħaq aħjar fil-livell tal-Unjoni, l-Unjoni tista’ tadotta miżuri f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. Skont il-prinċipju tal-proporzjonalità, kif stabbilit f’dak l-Artikolu, din id-Direttiva ma tmurx lil hinn minn dak li hu meħtieġ sabiex jintlaħaq dan l-objettiv.

(30)Id-Deċiżjoni tal-Kunsill 2000/642/ĠAI għandha tiġi rrevokata minħabba li s-suġġett tagħha huwa regolat minn atti oħra tal-Unjoni u ma hemmx bżonn tagħha iktar.

(31)[F’konformità mal-Artikolu 3 tal-Protokoll (Nru 21) dwar il-pożizzjoni tar-Renju Unit u l-Irlanda, fir-rigward tal-ispazju ta’ libertà, sigurtà u ġustizzja, anness mat-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea, ir-Renju Unit u l-Irlanda nnotifikaw ix-xewqa tagħhom li jieħdu sehem fl-adozzjoni u l-applikazzjoni ta’ din id-Direttiva.]

(32)F’konformità mal-Artikoli 1 u 2 tal-Protokoll (Nru 21) dwar il-pożizzjoni tar-Renju Unit u l-Irlanda, fir-rigward tal-ispazju ta’ libertà, sigurtà u ġustizzja, anness mat-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea, u mingħajr preġudizzju għall-Artikolu 4 ta’ dak il-Protokoll, ir-Renju Unit u l-Irlanda mhumiex qegħdin jieħdu sehem fl-adozzjoni u l-applikazzjoni ta’ din id-Direttiva u mhumiex marbuta biha jew soġġetti għall-applikazzjoni tagħha.]

(33)Skont l-Artikoli 1 u 2 tal-Protokoll (Nru 22) dwar il-pożizzjoni tad-Danimarka anness mat-Trattat dwar il-Funzjonament tal-Unjoni Ewropea, id-Danimarka mhijiex se tieħu sehem fl-adozzjoni ta’ din id-Direttiva u għalhekk mhix marbuta biha jew soġġetta għall-applikazzjoni tagħha.

(34)Il-Kontrollur Ewropew għall-Protezzjoni tad-Data ġie kkonsultat skont l-Artikolu 28(2) tar-Regolament (KE) Nru 45/2001 20 tal-Parlament Ewropew u tal-Kunsill [u ta opinjoni nhar … 21 ],

ADOTTA DIN ID-DIRETTIVA:

Il-Kapitolu I

Dispożizzjonijiet ġenerali

Artikolu 1

Suġġett

1.Din id-Direttiva tistabbilixxi miżuri li jiffaċilitaw l-aċċess mill-awtoritajiet kompetenti għal informazzjoni finanzjarja u informazzjoni dwar il-kontijiet tal-bank għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali serji. Hija tipprevedi wkoll miżuri li jiffaċilitaw l-aċċess mill-Unitajiet tal-Intelligence Finanzjarja għall-informazzjoni dwar l-infurzar tal-liġi u li jiffaċilitaw il-kooperazzjoni bejn l-Unitajiet tal-Intelligence Finanzjarja.

2.Din id-Direttiva hija mingħajr preġudizzju għal:

(a)id-dispożizzjonijiet tad-Direttiva (UE) 2015/849 tal-Parlament Ewropew u tal-Kunsill u d-dispożizzjonijiet relatati fil-liġi nazzjonali tal-Istati Membri, inkluż l-istatus organizzazzjonali mogħti lill-Unitajiet tal-Intelligence Finanzjarja skont il-liġi nazzjonali;

(b)is-setgħat tal-awtoritajiet kompetenti li jiskambjaw informazzjoni bejniethom jew li jiksbu informazzjoni minn entitajiet obbligati skont il-liġi tal-Unjoni jew il-liġi nazzjonali tal-Istati Membri.

Artikolu 2

Definizzjonijiet

Għall-finijiet ta’ din id-Direttiva, għandhom japplikaw id-definizzjonijiet li ġejjin:

(a)“reġistri ċentrali tal-kontijiet tal-bank” tfisser il-mekkaniżmi awtomatizzati ċentrali, bħal reġistri ċentrali jew sistemi ċentrali elettroniċi għall-irkupru tad-data, stabbiliti skont l-Artikolu 32(a)1 tad-Direttiva (UE) 2015/849.

(b)“Uffiċċji għall-Irkupru tal-Assi” tfisser l-uffiċċji nazzjonali nnominati mill-Istati Membri skont l-Artikolu 8(1) tad-Deċiżjoni tal-Kunsill 2007/845/ĠAI għall-finijiet tal-iffaċilitar tal-intraċċar u l-identifikazzjoni ta’ rikavat tal-kriminalità u kriminalità oħra relatata mal-proprjetà fid-dawl tal-iffriżar, is-sekwestru jew il-konfiska possibbli tagħha abbażi ta’ ordni maħruġa minn awtorità ġudizzjarja kompetenti;

(c) “Unità tal-Intelligence Finanzjarja” tfisser il-korp stabbilit f’kull Stat Membru għall-finijiet tal-Artikolu 32 tad-Direttiva (UE) 2015/849;

(d)“entitajiet obbligati” tfisser l-entitajiet stabbiliti fl-Artikolu 2 tad-Direttiva (UE) 2015/849;

(e)“informazzjoni finanzjarja” tfisser kwalunkwe tip ta’ informazzjoni jew data li tinżamm mill-Unitajiet tal-Intelligence Finanzjarja biex jipprevjenu, jidentifikaw u jiġġieldu b’mod effettiv il-ħasil tal-flus u l-finanzjament tat-terroriżmu, jew kwalunkwe tip ta’ informazzjoni jew data li tinżamm mill-awtoritajiet pubbliċi jew mill-entitajiet obbligati għal dawk l-għanijiet u li hija disponibbli għall-Unitajiet tal-Intelligence Finanzjarja mingħajr ma jittieħdu miżuri repressivi skont il-liġi nazzjonali;

(f)“informazzjoni dwar l-infurzar tal-liġi” tfisser kwalunkwe tip ta’ informazzjoni jew data li tinżamm mill-awtoritajiet kompetenti biex jipprevjenu, jidentifikaw, jinvestigaw jew jipproċedu kontra reati kriminali jew kwalunkwe tip ta’ informazzjoni jew data li tinżamm mill-awtoritajiet pubbliċi jew mill-entitajiet privati għal dawk l-għanijiet u li hija disponibbli għall-awtoritajiet kompetenti mingħajr ma jittieħdu miżuri repressivi skont il-liġi nazzjonali;

(g) “informazzjoni dwar il-kontijiet tal-bank” tfisser l-informazzjoni li ġejja li tinsab fir-reġistri ċentrali tal-kontijiet tal-bank:

(a)għad-detentur tal-kont tal-klijent u kull persuna li tidher li taġixxi f’isem il-klijent l-isem, ikkumplimentat b’data tal-identifikazzjoni oħra meħtieġa skont id-dispożizzjonijiet nazzjonali għat-traspożizzjoni tal-Artikolu 13(1)(a) tad-Direttiva (UE) 2015/849 dwar l-identifikazzjoni tal-klijent u l-verifika tal-identità tal-klijent, jew numru tal-identifikazzjoni uniku;

(b)għas-sid benefiċjarju tad-detentur tal-kont tal-klijent: l-isem, ikkumplimentat b’data tal-identifikazzjoni oħra meħtieġa skont id-dispożizzjonijiet nazzjonali għat-traspożizzjoni tal-Artikolu 13(1)(b) tad-Direttiva (UE) 2015/849 dwar l-identifikazzjoni tas-sid benefiċjarju u l-verifika tal-identità tas-sid benefiċjarju, jew numru tal-identifikazzjoni uniku;

(c)għall-kont bankarju jew tal-pagament: in-numru tal-IBAN u d-data tal-ftuħ u l-għeluq tal-kont;

(d) għall-kaxxa tad-depożitu tas-sejf: l-isem tal-lokatorju kkumplimentat b’data tal-identifikazzjoni oħra meħtieġa skont id-dispożizzjonijiet nazzjonali għat-traspożizzjoni tal-Artikolu 13(1) tad-Direttiva (UE) 2015/849 dwar l-identifikazzjoni tal-klijent u s-sid benefiċjarju u l-verifika tal-identità tiegħu/tagħha, jew numru tal-identifikazzjoni uniku u d-durata tal-perjodu tal-kirja.

(h)“ħasil tal-flus” tfisser l-imġiba ddefinita fl-Artikolu 3 tad-Direttiva (UE) 2018/XX 22 ;

(i)“reati predikati assoċjati” tfisser ir-reati stabbiliti fl-Artikolu 2 tad-Direttiva (UE) 2018/XX;

(j)“finanzjament tat-terroriżmu” tfisser l-imġiba ddefinita fl-Artikolu 11 tad-Direttiva (UE) 2017/541 23 ;

(k)“analiżi finanzjarja” tfisser l-analiżi operazzjonali u strateġika mwettqa mill-Unitajiet tal-Intelligence Finanzjarja għat-twettiq tal-kompiti tagħhom skont id-Direttiva (UE) 2015/849;

(l)“reati kriminali serji” tfisser il-forom ta’ kriminalità elenkati fl-Anness I għar-Regolament (UE) 2016/794 tal-Parlament Ewropew u tal-Kunsill.

Artikolu 3

Deżinjazzjoni tal-awtoritajiet kompetenti

1.Kull Stat Membru għandu jinnomina fost l-awtoritajiet kompetenti tiegħu għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali, l-awtoritajiet kompetenti li għandhom is-setgħa li jaċċessaw jew ifittxu fir-reġistri ċentrali nazzjonali tal-kontijiet tal-bank stabbiliti mill-Istati Membri skont l-Artikolu 32(a) tad-Direttiva (UE) 2015/849. Dawn għandhom jinkludu l-Unitajiet Nazzjonali tal-Europol u l-Uffiċċji għall-Irkupru tal-Assi.

2.Kull Stat Membru għandu jinnomina fost l-awtoritajiet kompetenti tiegħu għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali, l-awtoritajiet kompetenti li għandhoms is-setgħa li jitolbu u jirċievu informazzjoni finanzjarja jew analiżi finanzjarja mill-Unità tal-Intelligence Finanzjarja. Dawn għandhom jinkludu l-Unitajiet Nazzjonali tal-Europol.

3.Kull Stat Membru għandu jinnotifika lill-Kummissjoni dwar l-awtoritajiet kompetenti nnominati tiegħu skont il-paragrafi (1) u (2) mhux aktar tard minn [6 xhur mid-data tat-traspożizzjoni], u għandu jinnotifika lill-Kummissjoni bi kwalunkwe emenda għal dan. Il-Kummissjoni għandha tippubblika n-notifiki u kwalunkwe emenda fihom fil-Ġurnal Uffiċjali tal-Unjoni Ewropea.

Kapitolu II

Aċċess mill-awtoritajiet kompetenti għall-informazzjoni dwar il-kontijiet tal-bank

Artikolu 4

Aċċess u tfittxija mill-awtoritajiet kompetenti għall-informazzjoni dwar il-kontijiet tal-bank

1.    L-Istati Membri għandhom jiżguraw li l-awtoritajiet kompetenti nnominati skont l-Artikolu 3(1) għandu jkollhom is-setgħa li jaċċessaw u jfittxu, direttament u immedjatament, informazzjoni dwar il-kontijiet tal-bank meta jkun meħtieġ għat-twettiq tal-kompiti tagħhom għall-finijiet ta’ prevenzjoni, identifikazzjoni, investigazzjoni jew prosekuzzjoni ta’ reati kriminali serji jew l-appoġġ ta’ investigazzjoni kriminali dwar reat kriminali serju, inkluż l-identifikazzjoni, l-intraċċar u l-iffriżar tal-assi relatati ma’ tali investigazzjoni.

2.L-informazzjoni addizzjonali li l-Istati Membri jistgħu jqisu essenzjali u jinkludu fir-reġistri ċentrali tal-kontijiet tal-bank skont l-Artikolu 32a(4) tad-Direttiva 2018/XX/UE ma għandhiex tkun aċċessibbli u li tista’ tiġi mfittxija mill-awtoritajiet kompetenti skont din id-Direttiva.

Artikolu 5

Kundizzjonijiet għall-aċċess u t-tfittxija mill-awtoritajiet kompetenti

1.L-aċċess u t-tfittxija ta’ informazzjoni dwar il-kontijiet tal-bank skont l-Artikolu 4 għandhom jitwettqu biss mill-perusni f’kull awtorità kompetenti li tkun ġiet innominata u awtorizzata speċifikament biex twettaq dawn il-kompiti u fuq bażi ta’ każ b’każ.

2.L-Istati Membri għandhom jiżguraw li l-aċċess u t-tfittxija mill-awtoritajiet kompetenti jkunu appoġġjati b’miżuri tekniċi u organizzazzjonali li jiżguraw is-sigurtà tad-data.

Artikolu 6

Monitoraġġ tal-aċċess u t-tfittxija mill-awtoritajiet kompetenti

1. L-Istati Membri għandhom jiżguraw li l-awtoritajiet li joperaw ir-reġistri ċentrali tal-kontijiet tal-bank iżommu reġistru ta’ kwalunkwe aċċess mill-awtoritajiet kompetenti għall-informazzjoni dwar il-kontijiet tal-bank. Ir-reġistri għandhom jinkludu, b’mod partikolari, l-elementi li ġejjin:

(a)ir-referenza tal-fajl nazzjonali;

(b)id-data u l-ħin tad-domanda jew tat-tfittxija;

(c)it-tip ta’ data użata għat-tnedija tad-domanda jew tat-tfittxija;

(d)ir-riżultati tad-domanda jew tat-tfittxija;

(e)l-isem tal-awtorità li tikkonsulta r-reġistru;

(f)l-identifikaturi tal-uffiċjal li wettaq id-domanda jew it-tfittxija u tal-uffiċjal li ordna d-domanda jew it-tfittxija.

2. Ir-reġistri għandhom jiġu vverifikati b’mod regolari mill-uffiċjali tal-protezzjoni tad-data tar-reġistri ċentrali tal-kontijiet tal-bank u mill-awtorità superviżorja kompetenti stabbilita skont l-Artikolu 41 tad-Direttiva (UE) 2016/680.

3.Ir-reġistri msemmija fil-paragrafu 1 għandhom jintużaw biss għall-monitoraġġ tal-protezzjoni tad-data, inkluża l-verifika tal-ammissibbiltà ta’ talba u tal-legalità tal-ipproċessar ta’ data, u għall-iżgurar tas-sigurtà. Dawn għandhom ikunu protetti permezz ta’ miżuri xierqa kontra aċċess mhux awtorizzat u għandhom jitħassru ħames snin wara li jinħolqu, sakemm ma jkunux meħtieġa għal proċeduri ta’ monitoraġġ li diġà għaddejjin.

Kapitolu III

Skambju ta’ data bejn l-awtoritajiet kompetenti u l-Unitajiet tal-Intelligence Finanzjarja, u bejn l-Unitajiet tal-Intelligence Finanzjarja

Artikolu 7

Talbiet għal informazzjoni mill-awtoritajiet kompetenti lill-Unità tal-Intelligence Finanzjarja

1.Soġġett għas-salvagwardji proċedurali nazzjonali, kull Stat Membru għandu jiżgura li l-Unità tal-Intelligence Finanzjarja nazzjonali tiegħu hija meħtieġa twieġeb għal talbiet għal informazzjoni finanzjarja jew analiżi finanzjarja mill-awtoritajiet kompetenti nnominati tiegħu msemmija fl-Artikolu 3(2), fejn dik l-informazzjoni finanzjarja jew l-analiżi finanzjarja hija meħtieġa, fuq bażi ta’ każ b’każ , għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali serji.

2.L-informazzjoni finanzjarja u l-analiżi finanzjarja riċevuta mill-Unità tal-Intelligence Finanzjarja tista’ tiġi pproċessata mill-awtoritajiet kompetenti tal-Istati Membri għall-finijiet speċifiċi ta’ prevenzjoni, identifikazzjoni, investigazzjoni jew prosekuzzjoni ta’ reati kriminali serji għajr il-finijiet li għalihom id-data personali tinġabar skont l-Artikolu 4(2) tad-Direttiva (UE) 2016/680.

Artikolu 8

Talbiet għal informazzjoni minn Unità tal-Intelligence Finanzjarja lil awtoritajiet kompetenti

Soġġett għas-salvagwardji proċedurali nazzjonali, kull Stat Membru għandu jiżgura li l-awtoritajiet nazzjonali kompetenti nnominati tiegħu huma meħtieġa jwieġbu għat-talbiet għal informazzjoni dwar l-infurzar tal-liġi mill-Unità tal-Intelligence Finanzjarja nazzjonali, fuq bażi ta’ każ b’każ, fejn l-informazzjoni hija meħtieġa għall-prevenzjoni u l-ġlieda kontra l-ħasil tal-flus, ir-reati predikati assoċjati u l-finanzjament tat-terroriżmu.

Artikolu 9

Skambju ta’ informazzjoni bejn l-Unitajiet tal-Intelligence Finanzjarja ta’ Stati Membri differenti

1.Kull Stat Membru għandu jiżgura li l-Unità tal-Intelligence Finanzjarja tiegħu jkollha l-permess li tiskambja informazzjoni finanzjarja jew analiżi finanzjarja ma’ kwalunkwe Unità tal-Intelligence Finanzjarja fl-Unjoni fejn dik l-informazzjoni finanzjarja jew l-analiżi finanzjarja hija meħtieġa għall-prevenzjoni u l-ġlieda kontra l-ħasil tal-flus, ir-reati predikati assoċjati u l-finanzjament tat-terroriżmu.

2. L-Istati Membri għandhom jiżguraw li meta Unità tal-Intelligence Finanzjarja tkun mitluba skont il-paragrafu 1 biex tiskambja informazzjoni finanzjarja jew analiżi finanzjarja, hija għandha tagħmel dan malajr kemm jista’ jkun u fi kwalunkwe każ mhux aktar tard minn tlitt ijiem wara l-wasla tat-talba. F’każijiet eċċezzjonali u debitament iġġustifikati, dan il-limitu ta’ żmien jista’ jiġi estiż b’massimu ta’ 10 tijiem.

3.L-Istati Membri għandhom jiżguraw li, f’każijiet eċċezzjonali u urġenti, u b’deroga mill-paragrafu 2, fejn Unità tal-Intelligence Finanzjarja hija mitluba skont il-paragrafu 1 tiskambja informazzjoni finanzjarja jew analiżi finanzjarja li diġà għandha fil-pussess tagħha li tirrelata ma’ investigazzjonijiet speċifiċi dwar att jew imġiba kkwalifikati bħala reat kriminali serju, Unità tal-Intelligence Finanzjarja għandha tipprovdi dik l-informazzjoni jew l-analiżi mhux aktar tard minn 24 siegħa wara l-wasla tat-talba.

4. L-Istati Membri għandhom jiżguraw li talba maħruġa skont dan l-Artikolu u t-tweġiba tagħha għandhom jiġu trażmessi bl-użu tan-netwerk tal-komunikazzjoni elettronika FIU.net jew is-suċċessur tiegħu. Dak in-netwerk għandu jiżgura l-komunikazzjoni sikura u għandu jkun kapaċi jipproduċi rekord bil-miktub taħt il-kundizzjonijiet li jippermettu l-iżgurar tal-awtentiċità. Fil-każ ta’ ħsara teknika tal-FIU.net, l-informazzjoni finanzjarja jew l-analiżi finanzjarja għandha tiġi trażmessa bi kwalunkwe mezz xieraq ieħor li jiżgura livell għoli ta’ sigurtà tad-data.

Kapitolu IV

Europol

Artikolu 10

Aċċess mill-Europol għall-informazzjoni dwar il-kontijiet tal-bank u skambju ta’ informazzjoni bejn il-Europol u l-Unitajiet tal-Intelligence Finanzjarja

1.Kull Stat Membru għandu jiżgura li l-Unità Nazzjonali tal-Europol tiegħu twieġeb għal talbiet debitament iġġustifikati relatati mal-informazzjoni dwar il-kontijiet tal-bank magħmula mill-Aġenzija għall-Kooperazzjoni fl-Infurzar tal-Liġi stabbilita bir-Regolament (UE) 2016/794 tal-Parlament Ewropew u tal-Kunsill (“Europol”) fuq bażi ta’ każ b’każ fi ħdan il-limiti tar-responsabbiltajiet tagħha u għat-twettiq tal-kompiti tagħha.

2.Kull Stat Membru għandu jiżgura li l-Unità tal-Intelligence Finanzjarja tiegħu twieġeb għal talbiet debitament iġġustifikati relatati ma’ informazzjoni finanzjarja u analiżi finanzjarja magħmula mill-Europol permezz tal-Unità Nazzjonali tal-Europol fi ħdan il-limiti tar-responsabbiltajiet tagħha u għat-twettiq tal-kompiti tagħha.

3.L-iskambju ta’ informazzjoni skont il-paragrafi 1 u 2 għandu jsir b’mod elettroniku permezz ta’ SIENA u skont ir-Regolament (UE) 2016/794. Il-lingwaġġ użat għat-talba u l-iskambju ta’ informazzjoni għandu jkun dak applikabbli għas-SIENA.

Artikolu 11

Rekwiżiti tal-protezzjoni tad-data

1.L-ipproċessar ta’ data personali relatata mal-informazzjoni dwar il-kontijiet tal-bank, l-informazzjoni finanzjarja u l-analiżi finanzjarja msemmija fl-Artikolu 10(1) u (2) għandu jitwettaq biss mill-persuni fi ħdan il-Europol li ġew innominati u awtorizzati speċifikament biex iwettqu dawk il-kompiti.

2.Il-Europol għandha tinforma lill-uffiċjal tal-protezzjoni tad-data skont l-Artikolu 41 tar-Regolament (UE) 2016/794 ta’ kull skambju ta’ informazzjoni skont l-Artikolu 10 ta’ din id-Direttiva.

Kapitolu V

Dispożizzjonijiet addizzjonali relatati mal-Ipproċessar ta’ Data Personali

Artikolu 12

Kamp ta’ applikazzjoni

Dan il-Kapitolu għandu japplika biss għall-awtoritajiet kompetenti nnominati u l-Unitajiet tal-Intelligence Finanzjarja fl-iskambju ta’ informazzjoni skont il-Kapitolu III u fir-rigward tal-iskambji ta’ informazzjoni finanzjarja u analiżi finanzjarja li jinvolvu l-Unitajiet Nazzjonali tal-Europol skont il-Kapitolu IV.

Artikolu 13

L-ipproċessar ta’ data sensittiva

1.L-ipproċessar ta’ informazzjoni li tiżvela r-razza jew l-oriġini etnika, l-opinjonijiet politiċi, ir-reliġjon jew it-twemmin filosofiku, is-sħubija fi trejdjunjin, is-saħħa, il-ħajja sesswali jew l-orjentazzjoni sesswali ta’ persuna, għandu jitħalla biss sa fejn ikun strettament meħtieġ u rilevanti f’każ speċifiku.

2.Il-persuni awtorizzati speċifikament biss jistgħu jaċċessaw u jipproċessaw id-data msemmija fil-paragrafu 1 skont l-istruzzjoni tal-uffiċjal tal-protezzjoni tad-data

Artikolu 14

Rekords ta’ talbiet għal informazzjoni

L-Istati Membri għandhom jiżguraw li l-awtoritajiet rikjedenti u dawk li jirċievu t-talba jżommu rekords relatati mat-talbiet għal informazzjoni skont din id-Direttiva. Dawk ir-rekords għandu jkun fihom mill-inqas l-informazzjoni li ġejja:

(a)l-isem u d-dettalji ta’ kuntatt tal-organizzazzjoni u l-membru tal-persunal li jitlob l-informazzjoni;

(b)ir-referenza għall-każ nazzjonali li fir-rigward tiegħu tintalab l-informazzjoni;

(c)it-talbiet magħmula skont din id-Direttiva u l-miżuri ta’ eżekuzzjoni tagħhom.

Ir-rekords għandhom jinżammu għal perjodu ta’ ħames snin, u għandhom jintużaw biss għall-finijiet ta’ verifika tal-legalità tal-ipproċessar ta’ data personali. L-awtoritajiet ikkonċernati għandhom jagħmlu r-rekords kollha disponibbli, fuq talba, lill-awtorità superviżorja nazzjonali.

Artikolu 15

Restrizzjonijiet għad-drittijiet tas-suġġetti tad-data

L-Istati Membri għandhom jadottaw miżuri leġiżlattivi li jirrestrinġu, kompletament jew parzjalment, id-dritt tas-suġġett tad-data ta’ aċċess għal data personali li tirrelata miegħu jew magħha pproċessata skont din id-Direttiva sabiex:

(a)l-Unità tal-Intelligence Finanzjarja jew l-awtorità nazzjonali kompetenti tkun tista’ twettaq il-kompiti tagħha b’mod xieraq għall-finijiet ta’ din id-Direttiva;

(b)jiġi evitat li l-inkjesti, l-analiżijiet, l-investigazzjonijiet jew il-proċeduri uffiċjali jew legali jiġu ostakolati għall-finijiet ta’ din id-Direttiva u sabiex ikun żgurat li l-prevenzjoni, l-investigazzjoni u l-identifikazzjoni tal-ħasil tal-flus, il-finanzjament tat-terroriżmu jew reati kriminali serji oħra ma jiġux ipperikolati.

Kapitolu VI

Dispożizzjonijiet finali

Artikolu 16

Monitoraġġ

1.L-Istati Membri għandhom jirrevedu l-effettività tas-sistemi tagħhom sabiex jiġu miġġielda r-reati kriminali serji billi jżommu statistika komprensiva.

2.Sa mhux aktar tard minn [6 xhur mid-dħul fis-seħħ], il-Kummissjoni għandha tistabbilixxi programm dettaljat għall-monitoraġġ tal-eżiti, tar-riżultati u tal-impatti ta’ din id-Direttiva.

Il-programm ta’ monitoraġġ għandu jistabbilixxi l-mezzi li permezz tagħhom, u l-intervalli li fihom, se tinġabar id-data u evidenza oħra meħtieġa. Għandu jispeċifika l-azzjoni li għandha tittieħed mill-Kummissjoni u mill-Istati Membri fil-ġbir u fl-analiżi tad-data u ta’ evidenza oħra.

L-Istati Membri għandhom jipprovdu lill-Kummissjoni d-data u evidenza oħra meħtieġa għall-monitoraġġ.

3.Fi kwalunkwe każ, l-istatistika msemmija fil-paragrafu 1 għandha tinkludi l-informazzjoni li ġejja:

(a)l-għadd ta’ tfittxijiet imwettqa mill-awtoritajiet kompetenti nnominati skont l-Artikolu 4;

(b)data li tkejjel il-volum tat-talbiet maħruġa minn kull awtorità koperta b’din id-Direttiva, is-segwitu mogħti lil dawk it-talbiet, l-għadd ta’ każijiet investigati, l-għadd ta’ persuni mħarrka, l-għadd ta’ persuni li nstabu ħatja għal reati kriminali serji, fejn tali informazzjoni hija disponibbli;

(c)data li tkejjel iż-żmien li awtorità teħtieġ biex twieġeb għal talba wara l-wasla tat-talba;

(d)    jekk disponibbli, data li tkejjel il-kost tar-riżorsi umani jew tal-IT li huma ddedikati għal talbiet domestiċi jew transkonfinali li jaqgħu taħt din id-Direttiva.

4.L-Istati Membri għandhom jorganizzaw il-produzzjoni u l-ġbir tal-istatistika u għandhom jittrażmettu l-istatistika msemmija fil-paragrafu 3 lill-Kummissjoni fuq bażi annwali.

Artikolu 17

Relazzjoni ma’ strumenti oħra

1.L-Istati Membri jistgħu jkomplu japplikaw ftehimiet jew arranġamenti bilaterali jew multilaterali bejniethom dwar l-iskambju tal-informazzjoni bejn awtoritajiet kompetenti li jkunu fis-seħħ fid-data tad-dħul fis-seħħ ta’ din id-Direttiva, sa fejn dawn il-ftehimiet jew l-arranġamenti jkunu kompatibbli ma’ din id-Direttiva.

2.Din id-Direttiva hija mingħajr preġudizzju għal kwalunkwe obbligu jew impenn tal-Istati Membri jew tal-Unjoni permezz ta’ ftehimiet bilaterali jew multilaterali ma’ pajjiżi terzi. 

Artikolu 18

Evalwazzjoni

1.Sa mhux aktar tard minn [ĠU: jekk jogħġbok daħħal id-data: tliet snin wara d-data tat-traspożizzjoni ta’ din id-Direttiva], u kull tliet snin wara dan, il-Kummissjoni għandha tfassal rapport dwar l-implimentazzjoni ta’ din id-Direttiva u tissottomettih lill-Parlament Ewropew u lill-Kunsill. Ir-rapport għandu jsir pubbliku.

2.Mhux qabel sitt snin wara d-data tat-traspożizzjoni ta’ din id-Direttiva, il-Kummissjoni għandha twettaq evalwazzjoni ta’ din id-Direttiva u tippreżenta rapport dwar is-sejbiet ewlenin lill-Parlament Ewropew u lill-Kunsill. L-evalwazzjoni għandha ssir skont il-Linji Gwida tal-Kummissjoni għal Regolamentazzjoni Aħjar. Ir-rapport għandu jinkludi wkoll evalwazzjoni ta’ kif id-drittijiet fundamentali u l-prinċipji rikonoxxuti mill-Karta tad-Drittijiet Fundamentali tal-Unjoni Ewropea ġew irrispettati.

3.Għall-finijiet tal-paragrafi 1 u 2, l-Istati Membri għandhom jipprovdu l-informazzjoni meħtieġa lill-Kummissjoni għat-tħejjija tar-rapporti. Il-Kummissjoni għandha tqis l-istatistika sottomessa mill-Istati Membri skont l-Artikolu 16 u tista’ titlob informazzjoni addizzjonali mill-Istati Membri u l-awtoritajiet superviżorji.

Artikolu 19

Traspożizzjoni

1.L-Istati Membri għandhom jadottaw u jippubblikaw il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ma’ din id-Direttiva sa mhux aktar tard minn XXYY [26 xahar wara d-data tad-dħul fis-seħħ tad-Direttiva (UE) (...)/2018: ĠU jekk jogħġbok daħħal in-numru tad-Direttiva li temenda d-Direttiva (UE) 2015/849]. Huma għandhom jikkomunikaw minnufih lill-Kummissjoni t-test ta’ dawk id-dispożizzjonijiet.

Meta l-Istati Membri jadottaw dawk id-dispożizzjonijiet, dawn għandhom jinkludu referenza għal din id-Direttiva jew ikunu akkumpanjati minn tali referenza fl-okkażjoni tal-pubblikazzjoni uffiċjali tagħhom. L-Istati Membri għandhom jiddeterminaw il-mod kif għandha ssir dik ir-referenza.

2.L-Istati Membri għandhom jikkomunikaw lill-Kummissjoni t-test tad-dispożizzjonijiet prinċipali tad-dritt nazzjonali li jadottaw fil-qasam kopert minn din id-Direttiva.

Artikolu 20

Tħassir tad-Deċiżjoni 2000/642/ĠAI

Id-Deċiżjoni 2000/642/ĠAI hi mħassra b’effett mill-[id-data tat-traspożizzjoni ta’ din id-Direttiva].

Artikolu 21

Dħul fis-seħħ

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 22

Destinatarji

Din id-Direttiva hija indirizzata lill-Istati Membri skont it-Trattati.

Magħmul fi Brussell,

(1)    Ir-Rapport tal-Europol “From suspicion to action: converting financial intelligence into greater operational impact” (Minn suspett għal azzjoni: il-bidla tal-intelligence finanzjarja f’impatt operazzjonali akbar), li ġie ppubblikat fl-2017, enfasizza dawn il-problemi u l-ħtieġa ta’ aċċess aħjar tal-awtoritajiet tal-infurzar tal-liġi għal informazzjoni finanzjarja.

(2)    COM(2016) 50 final.

(3)    Id-Direttiva (UE) 2015/849 tal-Parlament Ewropew u tal-Kunsill tal-20 ta’ Mejju 2015 dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu, li temenda r-Regolament (UE) Nru 648/2012 tal-Parlament Ewropew u tal-Kunsill, u li tħassar id-Direttiva 2005/60/KE tal-Parlament Ewropew u tal-Kunsill u d-Direttiva tal-Kummissjoni 2006/70/KE (ĠU L 141, 5.6.2015, p. 73).

(4)    Fir-rapport, “Does crime still pay?: criminal asset recovery in the EU” (Il-kriminalità għadha tirrendi?: irkupru tal-assi kriminali fl-UE) (2016), il-Europol stmat li, bejn l-2010 u l-2014, il-valur tal-assi ffriżati jew issekwestrati fl-Unjoni Ewropea kienu jirrappreżentaw 2.2 % tar-rikavat stmat minn attività kriminali, filwaqt li l-valur tal-assi kkonfiskati kienu jirrappreżentaw madwar 1.1 % ta’ tali rikavat stmat. https://www.europol.europa.eu/newsroom/news/does-crime-still-pay

(5)    Il-UIF huma unitajiet li joperaw b’mod indipendenti u awtonomu, li għandhom l-awtorità u l-kapaċità li jieħdu deċiżjonijiet awtonomi biex janalizzaw, jitolbu u jxerrdu l-analiżijiet tagħhom lill-awtoritajiet kompetenti, meta jkun hemm raġunijiet ta’ suspett ta’ ħasil tal-flus, reati assoċjati jew finanzjament tat-terroriżmu.

(6)    SWD (2017)275.

(7)    COM(2015) 185 final tat-28 ta’ April 2015.

(8)    Ir-Regolament (UE) 2016/794 tal-Parlament Ewropew u tal-Kunsill tal-11 ta’ Mejju 2016 dwar l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u li jissostitwixxi u jħassar id-Deċiżjonijiet tal-Kunsill 2009/371/ĠAI, 2009/934/ĠAI, 2009/935/ĠAI, 2009/936/ĠAI u 2009/968/ĠAI.

(9)    Id-Direttiva (UE) 2015/2366 tal-Parlament Ewropew u tal-Kunsill tal-25 ta’ Novembru 2015 dwar is-servizzi ta’ pagament fis-suq intern, li temenda d-Direttivi 2002/65/KE, 2009/110/KE u 2013/36/UE u r-Regolament (UE) Nru 1093/2010.

(10)    ĠU C , , p. .

(11)    ĠU C , , p.

(12)    COM(2016) 50 tat-2.2.2016.

(13)    Id-Direttiva (UE) 2015/849 tal-Parlament Ewropew u tal-Kunsill tal-20 ta’ Mejju 2015 dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu, li temenda r-Regolament (UE) Nru 648/2012 tal-Parlament Ewropew u tal-Kunsill, u li tħassar id-Direttiva 2005/60/KE tal-Parlament Ewropew u tal-Kunsill u d-Direttiva tal-Kummissjoni 2006/70/KE, ĠU L 141 tal-5.6.2015, p. 73.

(14)    Id-Deċiżjoni Qafas 2006/960/ĠAI tat-18 ta’ Diċembru 2006 dwar is-simplifikazzjoni tal-iskambju ta’ informazzjoni u intelligence bejn l-awtoritajiet tal-infurzar tal-liġi tal-Istati Membri tal-Unjoni Ewropea, ĠU L 386 tad-29.12.2006, p. 89.

(15)    Id-Direttiva 2014/41/UE tat-3 ta’ April 2014 dwar l-Ordni ta’ Investigazzjoni Ewropew f’materji kriminali, ĠU L 130 tal-1.5.2014, p. 1.

(16)    Ir-Regolament (UE) 2016/794 tal-Parlament Ewropew u tal-Kunsill tal-11 ta’ Mejju 2016 dwar l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u li jissostitwixxi u jħassar id-Deċiżjonijiet tal-Kunsill 2009/371/ĠAI, 2009/934/ĠAI, 2009/935/ĠAI, 2009/936/ĠAI u 2009/968/ĠAI, ĠU L 135, 24.5.2016, p. 53.

(17)    Ir-Regolament tal-Kunsill (UE) 2017/1939 tat-12 ta’ Ottubru 2017 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”), ĠU L 283 tal-31.10.2017, p. 1.

(18)    Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1).

(19)    Ftehim Interistituzzjonali bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar it-Tfassil Aħjar tal-Liġijiet tat-13 ta’ April 2016; ĠU L 123, 12.5.2016, p. 1-14.

(20)    Ir-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni ta’ individwu fir-rigward tal-ipproċessar ta’ data personali mill-istituzzjonijiet u l-korpi tal-Komunità u dwar il-movement liberu ta’ dak id-data, ĠU L 8, 12.1.2001, p. 1.

(21)    ĠU C …

(22)

   Id-Direttiva 2018/XX/UE dwar il-ġlieda kontra l-ħasil tal-flus permezz tal-liġi kriminali, ĠU ... .

(23)    Id-Direttiva (UE) 2017/541 tal-Parlament Ewropew u tal-Kunsill tal-15 ta’ Marzu 2017 dwar il-ġlieda kontra t-terroriżmu u li tissostitwixxi d-Deċiżjoni Kwadru tal-Kunsill 2002/475/ĠAI u li temenda d-Deċiżjoni tal-Kunsill 2005/671/ĠAI, ĠU L 88, tal-31.3.2017, p. 6.