This document is an excerpt from the EUR-Lex website
Document 52017PC0633
COMMUNICATION FROM THE COMMISSION TO THE EUROPEAN PARLIAMENT pursuant to Article 294(6) of the Treaty on the Functioning of the European Union concerning the position of the Council on the adoption of a Regulation of the European Parliament and of the Council on the sustainable management of external fishing fleets, repealing Council Regulation (EC) No 1006/2008
KOMUNIKAZZJONI TAL-KUMMISSJONI LILL-PARLAMENT EWROPEW skont l-Artikolu 294(6) tat-Trattat dwar il-Funzjonament tal-Unjoni Ewropea dwar il-pożizzjoni tal-Kunsill rigward l-adozzjoni ta’ Regolament tal-Parlament Ewropew u tal-Kunsill dwar il-ġestjoni sostenibbli ta’ flotot tas-sajd esterni, li jħassar ir-Regolament tal-Kunsill (KE) Nru 1006/2008
KOMUNIKAZZJONI TAL-KUMMISSJONI LILL-PARLAMENT EWROPEW skont l-Artikolu 294(6) tat-Trattat dwar il-Funzjonament tal-Unjoni Ewropea dwar il-pożizzjoni tal-Kunsill rigward l-adozzjoni ta’ Regolament tal-Parlament Ewropew u tal-Kunsill dwar il-ġestjoni sostenibbli ta’ flotot tas-sajd esterni, li jħassar ir-Regolament tal-Kunsill (KE) Nru 1006/2008
COM/2017/0633 final - 2015/0289 (COD)
IL-KUMMISSJONI EWROPEA
Brussell, 25.10.2017
COM(2017) 633 final
2015/0289(COD)
KOMUNIKAZZJONI TAL-KUMMISSJONI LILL-PARLAMENT EWROPEW
skont l-Artikolu 294(6) tat-Trattat dwar il-Funzjonament tal-Unjoni Ewropea
dwar
il-pożizzjoni tal-Kunsill rigward l-adozzjoni ta’ Regolament tal-Parlament Ewropew u tal-Kunsill dwar il-ġestjoni sostenibbli ta’ flotot tas-sajd esterni, li jħassar ir-Regolament tal-Kunsill (KE) Nru 1006/2008
2015/0289 (COD)
KOMUNIKAZZJONI TAL-KUMMISSJONI LILL-PARLAMENT EWROPEW
skont l-Artikolu 294(6) tat-Trattat dwar il-Funzjonament tal-Unjoni Ewropea
dwar
il-pożizzjoni tal-Kunsill rigward l-adozzjoni ta’ Regolament tal-Parlament Ewropew u tal-Kunsill dwar il-ġestjoni sostenibbli ta’ flotot tas-sajd esterni, li jħassar ir-Regolament tal-Kunsill (KE) Nru 1006/2008
1.Sfond
|
Id-data ta’ meta l-proposta ntbagħtet lill-Parlament Ewropew u lill-Kunsill
|
L-10 ta’ Diċembru 2015 |
|
Id-data tal-opinjoni tal-Kumitat Ekonomiku u Soċjali Ewropew: |
Il-25 ta’ Mejju 2016 |
|
Id-data tal-pożizzjoni tal-Parlament Ewropew wara l-ewwel qari: |
It-2 ta’ Frar 2017 |
|
Id-data ta’ meta ntbagħtet il-proposta emendata: |
L-14 ta’ Lulju 2017 |
|
Id-data tal-adozzjoni tal-pożizzjoni tal-Kunsill: |
Is-17 ta’ Ottubru 2017 |
2.L-għan tal-proposta tal-Kummissjoni
Bħala parti integrali tar-riforma tal-Politika Komuni tas-Sajd 1 (PKS), fil-Komunikazzjoni 2 tagħha dwar id-Dimensjoni Esterna tal-PKS tal-2011 il-Kummissjoni pproponiet reviżjoni tar-Regolament dwar l-Awtorizzazzjonijiet tas-Sajd 3 (FAR). Il-proposta għal Regolament dwar il-ġestjoni sostenibbli ta’ flotot tas-sajd esterni se ssaħħaħ is-superviżjoni tal-flotta tas-sajd esterna tal-UE kull fejn topera.
Din il-proposta għandha l-għan li tirrevedi r-regoli attwali tar-Regolament dwar l-Awtorizzazzjonijiet tas-Sajd, sabiex tittejjeb il-governanza tal-oċeani, sabiex jiġu indirizzati l-objettivi tal-PKS il-ġdida, u sabiex ikun hemm konsistenza mar-Regolament dwar il-Kontroll u mar-Regolament dwar is-Sajd Illegali, Mhux Irrappurtat u Mhux Irregolat (IUU) 4 . Il-proposta għandha wkoll l-għan li tikseb kundizzjonijiet ekwi bejn il-flotot differenti, b’mod li l-flotta tas-sajd tal-UE li tistad barra l-ilmijiet tal-UE tkun soġġetta għall-istess regoli li huma soġġetti għalihom bastimenti ta’ pajjiżi terzi li jistadu fl-ilmijiet tal-UE.
Jeżistu regoli ġodda li jirregolaw l-awtorizzazzjonijiet diretti (magħrufa wkoll bħala “ftehimiet privati”) li għandhom l-għan li jiskoraġġixxu l-bdil abbużiv tal-bandiera tal-bastiment, li jirregolaw il-kiri ta’ bastimenti tal-Unjoni u li jipprevedu l-ħolqien ta’ bażi ta’ dejta għall-awtorizzazzjonijiet tas-sajd, li tinkludi parti sigura u parti pubblika.
Il-proposta hija bbażata fuq il-prinċipju tar-responsabbiltà tal-istat tal-bandiera u tistabbilixxi dispożizzjonijiet li permezz tagħhom l-Istati Membri tal-bandiera jwettqu kontrolli fuq bastimenti abbażi ta’ kriterji ta’ eliġibbiltà stabbiliti qabel dawn il-bastimenti jingħataw l-awtorizzazzjoni biex jistadu barra l-ilmijiet tal-UE. Dispożizzjonijiet sodi dwar il-monitoraġġ tal-flotot se jippermettu li bastimenti tal-UE ma jibqgħux jiġu awtorizzati jistadu jekk ma jikkonformawx mar-regoli.
3.Kummenti dwar il-pożizzjoni tal-Kunsill
3.1 Kummenti ġenerali dwar il-pożizzjoni tal-Kunsill
Il-pożizzjoni tal-Kunsill tirrifletti l-ftehim politiku li ntlaħaq mill-Parlament Ewropew u mill-Kunsill fl-20 ta’ Ġunju 2017. Il-Kummissjoni tappoġġa dan il-ftehim.
3.2 Emendi li għamel il-Parlament Ewropew wara l-ewwel qari
Il-Parlament Ewropew qabel dwar elementi ġodda li ġejjin minn kompromessi li ntlaħqu mal-Kunsill matul it-trilogi, iżda l-pożizzjoni tal-Parlament Ewropew wara l-ewwel qari dejjem inżammet u hija riflessa fil-ftehim politiku finali.
3.3 Dispożizzjonijiet li ddaħħlu abbażi tal-pożizzjoni tal-Kummissjoni u tal-Kunsill f’dan ir-rigward
Il-pożizzjoni tal-Kunsill ma ssegwix il-proposta tal-Kummissjoni dwar il-kamp ta’ applikazzjoni tal-proposta, id-definizzjonijiet użati, u l-proċeduri għall-għoti ta’ awtorizzazzjonijiet tas-sajd. Il-pożizzjoni tal-Kunsill kompliet issaħħaħ id-dispożizzjonijiet dwar it-trattament ugwali, biex jiġi żgurat li bastimenti tal-UE li joperaw kemm ġewwa kif ukoll barra l-ilmijiet tal-UE jiġu trattati b’mod ugwali u li bastimenti ta’ pajjiżi terzi f’ilmijiet tal-UE josservaw l-istess kondizzjonijiet li josservaw il-bastimenti tal-UE. Għalhekk, ġie żgurat li jkun hemm kundizzjonijiet ekwi effettivi għal kulħadd.
Il-Kummissjoni tqis li dawn il-bidliet jikkontribwixxu għat-tisħiħ tal-konsistenza tal-proposta, filwaqt li jissimplifikaw il-proċeduri previsti, inaqqsu l-piż amministrattiv u jirreferu kemm jista’ jkun għar-regoli eżistenti fil-qafas tal-Organizzazzjonijiet Reġjonali tal-Ġestjoni tas-Sajd u għall-Ftehimiet Internazzjonali dwar is-Sajd, inklużi l-Ftehimiet tat-Tramuntana u Ftehimiet ta’ Sħubija dwar is-Sajd Sostenibbli.
Għalhekk, il-proposta tal-Kummissjoni ġiet emendata biex tipprevedi l-miżuri li ġejjin li huma riflessi fil-ftehim politiku:
L-inklużjoni ta’ Taqsima 2 ġdida dwar “attivitajiet tas-sajd skont ftehimiet dwar skambju jew ġestjoni konġunta”. Din it-taqsima ġiet inkluża sabiex jiġi ċċarat il-kamp ta’ applikazzjoni tal-proposta u biex jiġi żgurat li l-bastimenti kolha tas-sajd ta’ pajjiżi terzi li jistadu fl-ilmijiet tal-UE huma koperti b’dan ir-Regolament.
L-Artikolu 5(1)(d) dwar il-Kriteriji ta’ eliġibbiltà: “In-nuqqas ta’ ksur serju fl-aħħar 12-il xahar qabel l-applikazzjoni għal awtorizzazzjoni tas-sajd”. Dan il-kriterju ta’ eliġibbiltà ġie propost bħala prekundizzjoni għall-ksib ta’ aċċess għal awtorizzazzjoni tas-sajd għal bastimenti minn pajjiżi terzi li beħsiebhom jistadu barra mill-ilmijiet tal-UE. Madankollu, il-Kunsill kien tal-fehma li dan il-kriterju ta’ eliġibbiltà jikkostitwixxi sistema ta’ sanzjonament doppju, u għaldaqstant wera oppożizzjoni qawwija ħafna kontrih. Madankollu, il-Parlament Ewropew appoġġah. Bħala parti minn kompromess ġenerali, il-Kummissjoni taċċetta li tneħħi dan il-kriterju ta’ eliġibbiltà mit-test, bil-kundizzjoni li jsir qbil dwar bażi ġuridika li tippermetti lill-Kummissjoni tintervjeni sabiex twaqqaf bastiment milli jistad skont l-Artikolu 7.
L-Artikolu 7(6) dwar il-“Is-sorveljanza tal-awtorizzazzjonijiet tas-sajd”: Din id-dispożizzjoni tippermetti lill-Kummissjoni tintervjeni, bħala l-aħħar rimedju, sabiex twaqqaf bastiment milli jistad meta l-Istat Membru tal-bandiera ma jiħux azzjoni (il-klawżola ta’ “rkupru”). Il-proposta oriġinali tal-Kummissjoni mhijiex aċċettabbli għall-Kunsill minħabba li hi meqjusa bħala inferenza b’rabta mal-kompetenzi tal-Istati Membri tal-bandiera. Il-Parlament Ewropew jappoġġa bażi ġuridika soda biex il-Kummissjoni tkun tista’ tintervjeni sabiex twaqqaf bastiment milli jistad meta dak il-bastiment ma josservax ir-regoli.
Bħala parti minn kompromess ġenerali, il-Kummissjoni aċċettat li l-intervent mill-Kummissjoni biex bastiment jitwaqqaf milli jistad ikun limitat għal żoni fejn hemm fis-seħħ ftehim internazzjonali dwar is-sajd li jorbot lill-Unjoni fir-rigward ta’ Organizzazzjonijiet Reġjonali tal-Ġestjoni tas-Sajd, jew ftehim internazzjonali dwar is-sajd li jorbot lil pajjiżi terzi skont Ftehimiet ta’ Sħubija dwar is-Sajd Sostenibbli.
L-Artikolu 6(2) dwar Operazzjonijiet ta’ għoti ta’ bandiera ġdida: Il-bastimenti tal-UE ma għandhomx jistadu f’ilmijiet ta’ pajjiż terz li ma jikkooperax skont l-Artikoli 31 u 33 tar-Regolament IUU. L-Artikolu 31 jikkonċerna “l-identifikazzjoni” mill-Kummissjoni, filwaqt li l-Artikolu 33 jikkonċerna “l-istabbiliment ta’ lista” mill-Kunsill. Il-Kunsill huwa tal-fehma li huwa kompitu tal-Kunsill (permezz tad-Deċiżjoni tiegħu) li jniżżel pajjiż fil-lista ta’ pajjiżi li ma jikkooperawx, u għalhekk l-identifikazzjoni mill-Kummissjoni ma għandu jkollha ebda effett fil-kuntest ta’ din il-proposta.
Bħala parti minn kompromess ġenerali, il-Kummissjoni aċċettat li bastiment jingħata perjodu ta’ avviż ta’ sitt ġimgħat biex jitlaq mill-ilmijiet ta’ pajjiż terz, ladarba l-pajjiż terz jiġi identifikat bħala pajjiż li ma jikkooperax skont l-Artikolu 31 tar-Regolament IUU.
L-Artikoli 13 sa 15 dwar “Allokazzjoni mill-ġdid ta’ opportunitajiet tas-sajd mhux użati”: Skont ir-regoli attwali, il-Kummissjoni għandha talloka mill-ġdid l-opportunitajiet tas-sajd mhux użati (l-Artikolu 10 tar-Regolament tal-Kunsill (KE) Nru 1006/2008) permezz ta’ deċiżjoni tal-Kummissjoni. Il-proposta għall-flotot esterni tipprevedi l-għoti ta’ setgħat ta’ implimentazzjoni lill-Kummissjoni biex twettaq din l-allokazzjoni mill-ġdid. Il-Kunsill jinsisti li l-allokazzjoni mill-ġdid għandha ssir abbażi tal-Artikolu 43(3) tat-TFUE.
Bħala parti minn kompromess ġenerali, il-Kummissjoni taċċetta din il-bażi ġuridika għall-allokazzjoni mill-ġdid ta’ opportunitajiet tas-sajd mhux użati.
L-Artikolu 26a dwar it-“trasbord”: il-Parlament Ewropew esprima li kellu diffikultajiet biex jaċċetta d-definizzjoni tal-Kunsill ta’ “attivitajiet tas-sajd” fl-Artikolu 3(g), u stqarr li fil-fehma tiegħu din mhijiex olistika daqs dik li hemm fil-PKS. Il-Parlament Ewropew huwa prinċipalment interessat fl-inklużjoni ta’ “ħatt l-art” u ta’ “trasbord” fid-definizzjoni, iżda madankollu dan kieku jinvolvi piżijiet amministrattivi sostanzjali għall-ħruġ ta’ awtorizzazzjonijiet għal dawn l-attivitajiet. Bħala kompromess, il-Kunsill aċċetta li jespandi l-kamp ta’ applikazzjoni tal-Artikolu 26a għat-trasbord fl-ibħra miftuħa u għall-awtorizzazzjonijiet diretti, bl-inklużjoni ta’ notifika minn qabel lill-Istat Membru tal-bandiera u rappurtar annwali għall-Istati Membri lill-Kummissjoni. Il-Kummissjoni aċċettat dan il-kompromess għaliex għandu jgħin lill-Kummissjoni tikseb informazzjoni dwar it-trasbordi.
L-Artikolu 39(2) informazzjoni pubblika fil-bażi ta’ dejta: Il-proposta tal-Kummissjoni u l-approċċ ġenerali tal-Kunsill qablu li d-dejta dwar l-isem u l-bandiera tal-bastiment, it-tip ta’ awtorizzazzjoni u l-ħin u ż-żona li fihom il-bastmenti huma awtorizzati jistadu tiġi ppubblikata. Il-Parlament Ewropew kien tal-fehma li għandhom jiġu inklużi: (1) in-numru tas-CFR 5 u dak tal-Organizzazzjoni Marittima Internazzjonali, (2) l-isem, il-belt u l-pajjiż ta’ residenza ta’ sid il-kumpanija u tas-sid benefiċjarju tal-kumpanija, u (3) it-tip ta’ awtorizzazzjoni tas-sajd u tal-opportunitajiet tas-sajd.
La l-Kunsill u lanqas il-Kummissjoni ma jistgħu jappoġġaw it-talba ta-Parlament Ewropew, u dan minħabba tħassib fir-rigward tad-dritt għall-privatezza, il-protezzjoni tad-dejta u l-protezzjoni ta’ interessi kummerċjali. Il-koleġiżlaturi laħqu kompromess li permezz tiegħu id-dejta dwar sid il-kumpanija u s-sid benefiċjarju tal-kumpanija tinħażen fil-parti sigura tal-bażi ta’ dejta. Barra minn hekk, se tiġi ppubblikata wkoll id-dejta li ġejja: (1) in-numru tas-CFR u dak tal-Organizzazzjoni Marittima Internazzjonali, (2) it-tip ta’ awtorizzazzjoni, inkluż l-ispeċi jew il-grupp ta’ speċijiet fil-mira, u (3) il-ħin u ż-żona li fihom huma awtorizzati l-attivitajiet tas-sajd. Il-Kummissjoni aċċettat dan il-kompromess għaliex iżid it-trasparenza b’konformità sħiħa mar-regoli dwar il-protezzjoni tad-dejta.
Il-pożizzjoni wara l-ewwel qari adottata mill-Kunsill fis-17 ta’ Ottubru 2017 issaħħaħ l-elementi ewlenin tal-proposta tal-Kummissjoni u tippreżenta test ibbilanċjat li jqis il-konsiderazzjonijiet prinċipali tal-Parlament Ewropew, tal-Kummissjoni u tal-Kunsill.
4.Konklużjoni
Is-servizzi legali u l-ġuristi lingwisti tal-Parlament Ewropew u tal-Kunsill ingħataw il-mandat jagħmlu l-aġġustamenti kollha rilevanti fit-test. Għalhekk id-dokument finali jirrappreżenta l-ftehim politiku li l-koleġiżlaturi laħqu fl-20 ta’ Ġunju 2017.