IL-KUMMISSJONI EWROPEA

Brussell, 16.10.2017

COM(2017) 615 final

ITTRA EMENDATORJA Nru 1 TAL-ABBOZZ TAL-BAĠIT ĠENERALI TAL-2018

Aġġornament tal-ħtiġijiet stmati għan-nefqa agrikola u aġġustamenti oħra (riżerva għall-Fond ta’ Solidarjetà tal-Unjoni Ewropea, aġenziji u nefqa amministrattiva)

Wara li kkunsidrat:

–it-Trattat dwar il-Funzjonament tal-Unjoni Ewropea, u b'mod partikolari l-Artikolu 314 tiegħu, flimkien mat-Trattat li jistabbilixxi l-Komunità Ewropea tal-Enerġija Atomika, u b'mod partikolari l-Artikolu 106a tiegħu,

–ir-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni 1 , u b’mod partikolari l-Artikolu 39 tiegħu,

–l-abbozz tal-baġit ġenerali tal-Unjoni Ewropea għas-sena finanzjarja 2018, kif adottat mill-Kummissjoni fit-18 ta' Lulju 2017 2 ,

Il-Kummissjoni Ewropea b’dan tippreżenta lill-Parlament Ewropew u lill-Kunsill l-Ittra Emendatorja Nru 1 tal-abbozz tal-baġit ġenerali tal-Unjoni Ewropea għas-sena finanzjarja 2018 għar-raġunijiet stabbiliti fil-memorandum ta’ spjegazzjoni.

BIDLIET FID-DIKJARAZZJONI TAD-DĦUL U N-NEFQA TAQSIMA B'TAQSIMA

Il-bidliet fid-dikjarazzjoni tad-dħul u n-nefqa taqsima b'taqsima huma disponibbli fil-EUR-Lex ( http://eur-lex.europa.eu/budget/www/index-mt.htm ). Il-verżjoni bl-Ingliż tal-bidliet f'dan ir-rapport hija mehmuża għall-informazzjoni bħala anness baġitarju.

WERREJ

1.     Introduzzjoni    

2.     IL-Fond Agrikolu Ewropew ta' Garanzija (FAEG)    

2.1 2.1 Ħarsa ġenerali

2.2 2.2 Kummenti dettaljati

2.3 2.3 L-effett kombinat fuq AB 2018

3.     IL-Fond ta' Solidarjetà tal-Unjoni Ewropea (FSUE)    

4.     Aġenziji    

4.1 4.1 Awtorità Ewropea tat-Titoli u s-Swieq (ESMA)

4.2 4.2 Il-Fondazzjoni Ewropea għat-Titjib tal-Kundizzjonijiet tal-Ħajja u tax-Xogħol (EUROFOUND)

4.3 4.3 Aġenzija Eżekuttiva għall-Edukazzjoni, l-Awdjoviżiv u l-Kultura (EACEA)

5.     Amministrazzjoni    

5.1 5.1 L-Uffiċċju Ewropew Kontra l-Frodi (OLAF)

5.2 5.2 L-Uffiċċju tal-Pubblikazzjonijiet (OP)

5.3 5.3 Is-Servizz Ewropew għall-Azzjoni Esterna (SEAE)

5.3.1 5.3.1 L-involviment fil-futur tal-UE mal-Afganistan wara t-tmiem tal-mandat b’funzjoni doppja tar-RSUE għall-Afganistan

5.3.2 5.3.2 Tranżizzjoni ta’ ċerti kompiti għall-Monitoraġġ, l-Iggwidar u l-Konsulenza (MIK) minn EULEX Kosovo għall-Uffiċċju tal-UE fil-Kosovo

5.3.3 5.3.3 Linja baġitarja separata għall-kontribuzzjoni għal Skejjel Ewropej

5.3.4 5.3.4 L-effett kombinat fuq AB2018

6.     Tabella ta' Sommarju skont l-Intestatura tal-QFP    

1.Introduzzjoni

Din l-Ittra Emendatorja Nru 1 għall-abbozz tal-baġit għall-2018 (IE 1/2018) tkopri dan li ġej:

¾L-aġġornament tal-ħtiġijiet stmati, id-dħul assenjat u l-approprjazzjonijiet għan-nefqa agrikola. Minbarra l-fatturi tas-suq li dejjem jinbidlu, l-IE 1/2018 tinkorpora wkoll l-impatt tad-deċiżjonijiet fis-settur tal-agrikoltura minn meta l-AB 2018 kien ippreżentat f'Mejju 2017 kif ukoll proposti oħra li huma mistennija li jkollhom effett sinifikanti matul is-sena baġitarja. B’mod ġenerali, l-impatt fuq il-Fond Agrikolu Ewropew ta’ Garanzija (FAEG) huwa relattivament limitat bi tnaqqis ta’ impenn u approprjazzjonijiet ta’ pagament b’EUR 53,9 miljun.

¾It-tnaqqis tal-approprjazzjonijiet imdaħħla fir-riżerva għall-Fond ta’ Solidarjetà tal-Unjoni Ewropea (FSUE) biex jittieħed kont ta’ forniment minn qabel (ta’ flus) ġie deċiż riċentement mill-Parlament Ewropew u mill-Kunsill fid-deċiżjoni ta’ mobilizzazzjoni tal-FSUE għall-Italja wara sensiela ta’ terremoti li seħħew bejn Awwissu 2016 u Jannar 2017 fir-reġjuni ta’ Abruzzo, Lazio, Marche u Umbria.

¾L-aġġornament tal-livelli ta’ approprjazzjonijiet u l-pjanijiet ta’ stabbiliment tal-Awtorità Ewropea tat-Titoli u s-Swieq (ESMA) wara l-aħħar proposta mressqa mill-Kummissjoni.

¾L-aġġustament tal-pjan ta’ stabbiliment tal-Fondazzjoni Ewropea għat-titjib tal-kundizzjonijiet tal-ħajja u tax-xogħol (EUROFOUND).

¾Il-ħolqien tal-istruttura baġitarja għall-kostijiet operattivi li l-Aġenzija Eżekuttiva għall-Edukazzjoni, l-Awdjoviżiv u l-Kultura (EACEA) se ġġarrab fl-implimentazzjoni tal-Korp ta’ Solidarjetà Ewropew propost.

¾L-aġġustament ta’ xi nefqa amministrattiva.

2.IL-Fond Agrikolu Ewropew ta' Garanzija (FAEG)

Il-Kummissjoni tipproponi li taġġorna l-istimi tan-nefqa għall-agrikoltura b’-EUR 53,9 miljun meta mqabbla mal-AB 2018. Huwa propost l-ibbaġitjar għall-approprjazzjonijiet għan-nefqa agrikola ffinanzjata mill-Fond Agrikolu Ewropew ta' Garanzija (FAEG) fl-IE 1/2018 għal EUR 43 464,4 miljun, li huwa anqas mill-bilanċ nett tal-2018 disponibbli għan-nefqa tal-FAEG (“sottolimitu nett”) ta' EUR 44 162,4 miljun 3 . Minkejja żieda netta fil-ħtiġijiet tal-FAEG b’EUR 188,1 miljun, l-approprjazzjonijiet tal-FAEG meta mqabbla mal-AB 2018 jistgħu jitnaqqsu billi din iż-żieda hija kkumpensata bis-sħiħ bid-dħul addizzjonali assenjat lill-FAEG (+EUR 242,0 miljun).

Għalhekk, l-approprjazzjonijiet ta’ impenn kumplessivi mitluba għall-intestatura 2 fl-AB 2018 inkluż l-IE 1/2018 huma stmati li jammontaw għal EUR 59 499,6 miljun. Dan iħalli marġni ta’ EUR 767,4 miljun f’approprjazzjonijiet ta' impenn taħt il-limitu massimu tal-QFP korrispondenti. L-approprjazzjonijiet ta’ pagament tal-Intestatura 2 jammontaw għal EUR 56 305,9 wara li tnaqqsu bl-istess ammont (-EUR 53,9 miljun), bħall-approprjazzjonijiet ta’ impenn meta mqabbla mal-AB 2018.

2.1    Ħarsa ġenerali

L-għan tal-IE 1/2018 huwa li taġġorna l-istimi għan-nefqa agrikola abbażi tal-aktar dejta ekonomika u qafas leġiżlattiv aġġornati. Sa lejn tmiem Settembru 2017, il-Kummissjoni se jkollha għad-dispożizzjoni tagħha l-ewwel indikazzjoni tal-livell ta’ produzzjoni għall-2017, kif ukoll perspettivi għas-swieq tal-agrikoltura, li huma l-bażi għall-istimi aġġornati tal-ħtiġijiet baġitarji għall-2018.

Minbarra li tikkunsidra l-fatturi tas-suq, din l-IE 1/2018 tinkorpora wkoll l-impatt tad-deċiżjonijiet leġiżlattivi fis-settur agrikolu minn meta tfassal l-AB 2018 f’Mejju 2017, kif ukoll għal xi ftit li qed jitħejjew iżda li daqt jiġu adottati.

Kumplessivament, il-ħtiġijiet tal-FAEG 2018 (wara li jitqiesu d-dispożizzjonijiet tal-FAEG relatati mad-“dixxiplina finanzjarja”) issa huma stmati għal EUR 44 710,4 miljun 4 , li hi żieda b’EUR 188,1 miljun meta mqabbel mal-AB 2018. Din iż-żieda hi dovuta l-aktar għal nefqa addizzjonali għal miżuri ta’ appoġġ eċċezzjonali fis-settur tal-frott u l-ħaxix, u tal-laħam tal-majjal u dak tat-tjur kif ukoll għal pagamenti ta’ mgħax relatati ma’ deċiżjoni tal-Qorti tal-Ġustizzja fuq l-eks imposti fuq il-produzzjoni taz-zokkor. Barra minn hekk, hemm xi varjazzjonijiet żgħar għall-miżuri tas-suq ġenerali u għan-nefqa relatata ma’ deċiżjonijiet tal-approvazzjoni tal-kontijiet u tal-konformità taħt il-Kapitolu 05 07 Awditjar tan-nefqa agrikola ffinanzjata mill-Fond Agrikolu Ewropew ta’ Garanzija (FAEG), li huma wkoll inkorporati fl-IE 1/2018. Il-ħtiġijiet għall-Kapitolu 05 03 Pagamenti diretti mmirati li jikkontribwixxu għall-introjti tal-azjendi agrikoli, biex jillimataw il-varjabbiltà tal-introjtu tal-azjendi agrikoli u biex jintlaħqu l-objettivi ambjentali u klimatiċi jibqgħu kważi mhux mibdula meta mqabbla mal-AB 2018.

L-ammont ta' dħul assenjat li mistenni li jkun disponibbli fl-2018 jiżdied minn EUR 1 004 miljun fl-AB 2018 għal EUR 1 246 miljun (+EUR 242 miljun), u b'hekk il-ħtiġijiet addizzjonali jiġu kkumpensati għalkollox. L-aġġornament tal-istimi jikkonċerna ammonti li joriġinaw minn deċiżjonijiet għall-approvazzjoni tal-kontijiet (+EUR 104,9 miljun) u irregolaritajiet (-EUR 13-il miljun). Barra minn hekk, l-IE 1/2018 tinkorpora riport mistenni ta’ dħul assenjat mill-2017 sal-2018 għal ammont ta’ EUR 400,1 miljun (“surplus” FAEG mistenni) 5 , li minnu ammont ta’ EUR 250 miljun kien diġà inkluż fl-AB 2018. Is-surplus stmat ma jinkludix approprjazzjonijiet mhux użati (EUR 450,5 miljun) tar-riżerva għall-kriżijiet fis-settur agrikolu tal-2017, li mhux se jintużaw. Dawn l-approprjazzjonijiet mhux użati se jiġu riportati għal rimborż lill-bdiewa soġġetti għad-dixxiplina finanzjarja fl-2018.

Bħala riżultat ta’ dawn l-aġġornamenti, l-approprjazzjonijiet ta' impenn ta’ EUR 43 464,4 miljun, li jinkludu EUR 459,5 miljun għar-Riżerva għall-kriżijiet fis-settur agrikolu, huma meħtieġa biex ikopru l-ħtiġijiet tal-FAEG għall-2018. Dan l-ammont globali jibqa’ taħt il-livell tas-sottolimitu nett tal-FAEG ta’ EUR 44 162,4 miljun. Dan ifisser li l-mekkaniżmu tad-dixxiplina finanzjarja se jiġi applikat biss biex jistabbilixxi r-riżerva ta’ kriżi agrikola għas-sena baġitarja tal-2018 6 .

2.2    Kummenti dettaljati

05 02 — Intejbu l-kompetittività tas-settur agrikolu permezz ta' interventi fis-swieq agrikoli (approprjazzjonijiet +EUR 81,8 miljun)

B'mod ġenerali, il-ħtiġijiet għal miżuri ta' intervent fis-swieq agrikoli jiżdiedu b'EUR 81,8 miljun meta mqabbla mal-AB 2018. L-approprjazzjonijiet mitluba fl-IE 1/2018 jiżdiedu bl-istess ammont, minħabba li d-dħul assenjat li mistenni jkun disponibbli għall-kapitolu 05 02 (li jammonta għal EUR 400,0 miljun) jibqa’ mhux mibdul meta mqabbel mal-AB 2018.

Għall-frott u l-ħaxix, iż-żieda proposta b’EUR 12,8 miljun tirrifletti nefqa addizzjonali stmata għall-emenda riċenti tal-miżuri ta’ rtirar eċċezzjonali fir-rigward tal-ħawħ u tan-nuċiprisk. 7  

L-approprjazzjonijiet għas-settur tal-inbid fuq il-partita tal-baġit 05 02 09 08 li tiffinanzja l-programmi nazzjonali ta’ appoġġ huma proposti li jitnaqqsu b’EUR 7,0 miljun, u dan jirrifletti l-aktar ċifri ta’ implimentazzjoni riċenti.

L-approprjazzjonijiet għas-settur tal-ħalib (artikolu tal-baġit 05 02 12) jiżdiedu b’EUR 2,0 miljun minħabba stimi aġġornati għal kostijiet ta’ ħażna marbuta ma’ trab tal-ħalib xkumat li għalihom kwantitajiet akbar milli kien stmat inizjalment għadhom f’ħażna ta’ intervent pubbliku.

L-akbar modifika proposta fl-IE 1/2018 għall-miżuri tas-suq tikkonċerna s-setturi tal-laħam tal-majjal u dak tat-tjur (l-artikolu tal-baġit 05 02 15) b’żieda ta’ EUR 60,0 miljun, relatati ma’ miżuri speċifiċi eċċezzjonali lill-bdiewa wara tifqigħat tad-deni Afrikan tal-ħnieżer 8 u l-influwenza avjarja.

05 03 — Pagamenti diretti mmirati li jikkontribwixxu għall-introjti tal-azjendi agrikoli, biex jillimataw il-varjabbiltà tal-introjtu tal-azjendi agrikoli u biex jintlaħqu l-objettivi ambjentali u klimatiċi (approprjazzjonijiet - EUR 244,5 miljun)

Meta mqabbla mal-AB 2018, l-approprjazzjonijiet mitluba għall-kapitolu 05 03 huma riveduti ’l isfel b'EUR 244,5 miljun. Din il-bidla hija dovuta l-aktar għall-ammont ogħla ta’ dħul assenjat (+EUR 242,0 miljun) għall-partita 05 03 01 10 Skema ta’ Pagament Bażiku (SPB). B’mod ġenerali, abbażi tal-aktar dejta riċenti dwar l-implimentazzjoni, hija proposta biss bidla żgħira tal-ħtiġijiet (-EUR 2,5 miljun) għall-pagamenti diretti. Hemm xi varjazzjonijiet bejn partiti baġitarji għall-pagamenti diretti, li jirriflettu l-informazzjoni aġġornata dwar l-għażliet ta’ implimentazzjoni magħmula mill-Istati Membri. L-aktar importanti minn dawn fl-IE 1/2018 tikkonċerna l-pagament ta’ “ekoloġizzazzjoni” (+EUR 95,0 miljun fuq il-partita 05 03 01 11), pagamenti għall-bdiewa żgħażagħ (+EUR 34,0 miljun fuq il-partita 05 03 01 13), il-pagament ridistributtiv (+EUR 14,0-il miljun fuq il-partita 05 03 01 07) u l-iskema għall-bdiewa żgħar (-EUR 110,0 miljun fuq il-partita 05 03 02 61).

Nefqa agrikola oħra ffinanzjata mill-Fond Agrikolu Ewropew ta’ Garanzija (FAEG) (approprjazzjonijiet +EUR 108,8 miljun)

L-approprjazzjonijiet għall-partiti baġitarji 05 07 01 06 Korrezzjonijiet finanzjarji favur l-Istati Membri wara deċiżjonijiet dwar l-approvazzjoni tal-kontijiet u 05 07 01 07 Korrezzjonijiet finanzjarji favur l-Istati Membri wara deċiżjonijiet tal-approvazzjoni tal-konformità jridu jiżdiedu b’EUR 1,4 miljun u EUR 5,2 miljun rispettivament, fatt li jirrifletti l-impatt finanzjarju ta’ Deċiżjonijiet tal-Kummissjoni li jemendaw il-korrezzjonijiet finanzjarji għas-snin preċedenti. L-approprjazzjonijiet għall-artikolu tal-baġit 05 07 02 Soluzzjoni ta’ tilwim iridu jiżdiedu b’EUR 102,2 miljun bħala konsegwenza ta’ deċiżjoni tal-Qorti tal-Ġustizzja fuq l-eks imposti fuq il-produzzjoni taz-zokkor.

L-ammont jirrigwarda l-kost stmat ta’ pagamenti ta’ mgħax li jirriżulta mid-deċiżjoni dwar il-kawża Tirlemontoise (C-585/15) li tikkonċerna s-snin ta’ kummerċjalizzazzjoni taz-zokkor 1999/2000 u 2000/2001 9 .

2.3    L-effett kombinat fuq AB 2018

3.IL-Fond ta' Solidarjetà tal-Unjoni Ewropea (FSUE)

Fis-26 ta’ Ġunju 2017 10 , il-Kummissjoni pproponiet li timmobilizza l-Fond ta’ Solidarjetà tal-Unjoni Ewropea (FSUE) għal ammont ta’ EUR 1 196,8 miljun biex tingħata assistenza lill-Italja b’rispons għal sensiela ta’ terremoti li seħħew bejn Awwissu 2016 u Jannar 2017 fir-reġjuni ta’ Abruzzo, Lazio, Marche u Umbria. Din il-mobilizzazzjoni kienet akkumpanjata mill-Abbozz ta’ Baġit Emendatorju (ABE) Nru 4/2017 11 li jipproponi li l-approprjazzjonijiet meħtieġa jiddaħħlu fil-baġit ġenerali tal-2017, kemm f’impenji u kemm f’pagamenti, wara li jkun tnaqqas il-pagament antiċipat li diġà tħallas fl-2016.

L-ammont li seta’ jiġi mobilizzat f’dan l-istadju tas-sena 2017 kien ta’ EUR 902,8 miljun, li jikkorrispondi għall-ammont totali disponibbli għall-mobilizzazzjoni tal-FSUE fil-bidu tal-2017 (EUR 1 115,1 miljun), bit-tnaqqis tal-mobilizzazzjoni ta’ qabel 12 (EUR 71,5 miljun), bit-tnaqqis tal-ammont miżmum ta’ EUR 140,8 miljun sabiex jitħares l-obbligu ta’ twarrib ta’ 25 % tal-allokazzjoni annwali tal-2017 sal-1 ta’ Ottubru 2017 kif stipulat mill-Artikolu 10(1) tar-regolament dwar il-QFP 13 .

Dan l-ammont mhuwiex biżżejjed biex ikopri l-mobilizzazzjoni sħiħa tal-FSUE għall-Italja. Madankollu, il-Kummissjoni kkunsidrat li l-kundizzjonijiet tal-Artikolu 10(2) tar-Regolament dwar il-QFP ġew issodisfati u proponiet biex tkopri d-differenza ta’ EUR 294,0 miljun mill-ammont annwali disponibbli fl-2018.

Kemm id-deċiżjoni dwar il-mobilizzazzjoni u l-ABE Nru 4/2017 ġew definittivament adottati mill-Parlament Ewropew fit-13 ta’ Settembru 2017.

Minħabba din is-sitwazzjoni eċċezzjonali ta’ forniment minn qabel (ta' flus) fl-2017, huwa meħtieġ li jitnaqqas b’mod xieraq l-ammont imniżżel bħala riżerva fl-AB 2018, f’approprjazzjonijiet ta’ impenn u ta’ pagament. L-għan ta’ din ir-riżerva hu maħsub biex jippermetti l-mobilizzazzjoni tal-FSUE permezz ta’ trasferimenti simultanji għad-deċiżjoni ta’ mobilizzazzjoni tal-Parlament Ewropew u tal-Kunsill. Peress li tali approċċ inaqqas il-ħtieġa għal baġits emendatorji, b’hekk jitħaffef il-proċess tal-mobilizzazzjoni tal-FSUE.

4.Aġenziji

4.1    Awtorità Ewropea tat-Titoli u s-Swieq (ESMA)

Fit-13 ta’ Ġunju 2017, il-Kummissjoni adottat proposta għal Regolament 14 f’dak li għandu x’jaqsam mal-proċeduri u l-awtoritajiet involuti għall-awtorizzazzjoni ta’ Kontropartijiet Ċentrali (CCPs) u r-rekwiżiti għar-rikonoxximent ta’ CCPs ta’ pajjiżi terzi.

Bħalissa hemm 17-il CCP stabbiliti fl-UE, li kollha kemm huma, huma awtorizzati li joffru s-servizzi tagħhom fl-Unjoni. Ġew rikonoxxuti 28 CCP ta’ pajjiżi terzi addizzjonali, u b’hekk dawn ikunu jistgħu joffru s-servizzi tagħhom fl-UE. Tnax-il CCP oħra minn 10 ġurisdizzjonijiet applikaw għal rikonoxximent u qed jistennew deċiżjoni tal-Kummissjoni. Barra minn hekk, volum sostanzjali ta’ tranżazzjonijiet tad-derivati ddenominati f’euro (u tranżazzjonijiet oħra soġġetti għall-obbligu tal-ikklirjar tal-UE) attwalment qed ikunu kklirjati fis-CCPs li jinsabu fir-Renju Unit.

Minħabba ż-żieda fl-għadd ta’ CCPs ta’ pajjiżi terzi, il-Kummissjoni tipproponi li jingħata mandat lill-Awtorità Ewropea tat-Titoli u s-Swieq (l-ESMA, Pariġi) biex tkun inkarigata minn firxa usa’ ta’ kompiti superviżorji b’rabta ma’ dawn is-CCPs. Ġie preżunt li r-Regolament se jidħol fis-seħħ f’nofs l-2018. L-ESMA se teħtieġ aktar riżorsi umani u finanzjarji biex twettaq il-ħidmiet il-ġodda tagħha skont ir-Regolament tas-CCP, b’introduzzjoni gradwali matul il-perjodu 2018–2020.

Għas-sena 2018, huma mitluba 20 aġent temporanju addizzjonali (biex jiġu reklutati fil-grad AD7) u 10 esperti nazzjonali ssekondati, li jibdew minn Awwissu 2018 ’il quddiem. In-nefqa relatata, b’mod partikolari għal salarji, spejjeż ta’ missjonijiet u l-kera tal-uffiċċji, tammonta għal EUR 4,3 miljun fl-2018, u huwa mistenni li tiġi koperta minn tariffi mill-industrija. Madankollu, peress li l-introduzzjoni ta’ tariffi se tkun teħtieġ l-adozzjoni minn qabel ta’ att delegat tal-Kummissjoni, il-kostijiet imġarrba fl-2018 se jkollhom bżonn jiġu ffinanzjati mill-baġit tal-UE (li għandhom jittieħdu mill-marġni mhux allokat taħt il-limitu massimu tan-nefqa tal-Intestatura 1a), u mogħtija lura lill-baġit tal-UE sa mhux aktar tard mill-2020.

Il-pjan ta' stabbiliment aġġornat huwa stabbilit fl-anness baġitarju.

4.2    Il-Fondazzjoni Ewropea għat-Titjib tal-Kundizzjonijiet tal-Ħajja u tax-Xogħol (EUROFOUND)

Il-mira tat-tnaqqis tal-persunal għall-Fondazzjoni Ewropea għat-titjib tal-kundizzjonijiet tal-ħajja u tax-xogħol (EUROFOUND) f'Dublin tissarraf fi tnaqqis ta’ żewġ karigi fl-2018, jiġifieri minn 93 kariga awtorizzati fil-baġit tal-2017 għal 91 kariga fl-abbozz tal-baġit tal-2018, li minnhom 49 kariga kienu proposti fil-grupp ta’ funzjonijiet għall-Amministraturi u 42 kariga fil-grupp ta’ funzjonijiet għall-Assistenti.

Wara t-tluq ta’ żewġ uffiċjali fil-grupp ta’ funzjonijiet għall-Amministraturi, l-Aġenzija issa talbet li tpartat żewġ karigi permanenti għal uffiċjali ma’ żewġ karigi temporanji għal aġenti temporanji fil-grupp ta’ funzjonijiet għall-Amministraturi. Dan iżomm l-għadd globali ta’ karigi fil-grupp ta’ funzjonijiet għall-Amministraturi stabbli fil-livell mitlub inizjalment għall-2018 (49). Dan ma għandu l-ebda impatt fuq in-nefqa.

Il-pjan ta' stabbiliment aġġornat huwa stabbilit fl-anness baġitarju.

4.3    Aġenzija Eżekuttiva għall-Edukazzjoni, l-Awdjoviżiv u l-Kultura (EACEA)

Skont ir-riżultati preliminari tal-analiżi tal-kostijiet u l-benefiċċji li se jiġu ppreżentati lill-Kumitat għall-Aġenziji Eżekuttivi fil-qafas tal-pakkett ta’ delega li jmiss, il-Kummissjoni se tipproponi li tinkariga lill-EACEA b’kompiti ta’ implimentazzjoni fil-kuntest ta’ Korp Ewropew ta’ Solidarjetà ġdid (ESC – European Solidarity Corps) propost fit-30 ta’ Mejju 2017 15 . Dawn il-kompiti jinkludu t-tnedija u l-konklużjoni ta’ proċeduri ta’ għotjiet u akkwisti, il-monitoraġġ tal-proġetti, il-kontroll finanzjarju u l-kontabilità, il-kontribut għall-evalwazzjoni tal-programmi u diversi kompiti ta’ appoġġ.

Il-Kummissjoni tipproponi l-ħolqien ta’ partita baġitarja 15 01 06 03 Aġenzija Eżekuttiva għall-Edukazzjoni, l-Awdjoviżiv u l-Kultura — Kontribuzzjoni minn Korp Ewropew ta’ Solidarjetà li tkopri l-kostijiet operattivi li l-EACEA se ġġarrab fl-implimentazzjoni tal-Korp Ewropew ta’ Solidarjetà (ESC).

L-ebda approprjazzjoni mhi se tkun allokata għall-partita tal-baġit fl-istennija tar-riżultat tal-proċedura leġiżlattiva u l-konsultazzjoni tal-Kumitat dwar l-Aġenziji Eżekuttivi. Il-ħolqien ta’ dan il-punt b’entrata “pro memoria” se jippermetti li l-Kummissjoni tittrasferixxi l-approprjazzjonijiet meħtieġa malajr, b’konformità mad-dispożizzjonijiet tar-Regolament Finanzjarju, ladarba tkun ġiet adottata l-bażi ġuridika tal-ESC sabiex ma jkunx hemm dewmien fl-implimentazzjoni tal-attivitajiet. Dan iwassal għal opportunitajiet ta’ mobbiltà għaż-żgħażagħ li jkunu disponibbli malajr matul l-2018.

5.Amministrazzjoni

5.1    L-Uffiċċju Ewropew Kontra l-Frodi (OLAF)

Fid-Dikjarazzjoni tal-Istimi tiegħu għas-sena finanzjarja 2018, l-Uffiċċju Ewropew Kontra l-Frodi (OLAF) talab il-konverżjoni ta’ kariga waħda AD15 temporanja f’pożizzjoni AD15 permanenti fil-pjan ta’ stabbiliment tal-OLAF mill-1 ta’ Jannar 2018.

Madankollu, minħabba d-deċiżjonijiet tal-Kummissjoni rigward il-persunal, magħmula fil-kuntest tal-proċedura ta’ reklutaġġ tad-Direttur Ġenerali l-ġdid tal-OLAF, din il-konverżjoni mitluba ġiet irtirata, b’tali mod li l-kariga tibqa’ temporanja.

Il-modifiki mhuma se jikkawżaw l-ebda impatt fuq in-nefqa tal-OLAF. Il-pjan ta' stabbiliment aġġornat huwa stabbilit fl-anness baġitarju.

5.2    L-Uffiċċju tal-Pubblikazzjonijiet (OP) 

Fil-kuntest ta’ modernizzazzjoni tal-proċessi ta’ appoġġ u l-istabbiliment ta’ metodi ta’ ħidma mtejba, il-Kummissjoni stabbiliet aġenda ta’ trasformazzjoni diġitali, speċjalment fl-oqsma ta’ konsolidazzjoni ta’ ċentri tad-dejta lokali, it-tagħmir tal-ICT u s-sigurtà. F’dan il-qafas u b’kooperazzjoni mill-qrib mad-Direttorat Ġenerali għall-Informatika (DIGIT), l-Uffiċċju tal-Pubblikazzjonijiet (OP) iddeċieda, fil-21 ta’ Novembru 2016 li jniedi proġett tal-konsolidazzjoni tal-IT fi tliet oqsma prinċipali: in-netwerk u t-telekomunikazzjoni, il-post tax-xogħol diġitali u l-awtomazzjoni tal-uffiċċju u ċentri ta’ dejta.

Il-benefiċċju prinċipali tal-konsolidazzjoni se jiġi minn ekonomiji ta’ skala miksuba mill-proċess ta’ industrijalizzazzjoni.

Sabiex jiġi implimentat dan il-proġett, 14-il kariga (3 AD u 11-il AST) li huma attwalment assenjati lill-OP fis-setturi tal-Infrastruttura tal-IT u tal-Produzzjoni se jkollhom jiġu trasferiti lill-Kummissjoni f’DĠ DIGIT. Dawn il-karigi jirrappreżentaw ir-riżorsi meħtieġa fil-Kummissjoni sabiex tiġi żgurata l-kontinwità tas-servizz għall-operazzjonijiet tal-OP.

F’dan il-kuntest ġiet iffirmata konvenzjoni bejn l-OP u DIGIT fit-30 ta’ Mejju 2017 u dan jitfa’ dawl fuq ir-raġuni għaliex ma kienx possibbli li dan iċ-ċaqliq ta’ karigi jiġi inkluż fl-AB 2018.

Għaldaqstant, huwa propost li jiġu trasferiti 14-il kariga u l-approprjazzjonijiet ta’ salarju relatati mill-OP għall-Kummissjoni, sa mill-1 ta’ Jannar 2018.

L-impatt ta’ dan it-trasferiment fuq l-approprjazzjonijiet huwa newtrali. Il-proposta aġġornata tal-pjanijiet ta’ stabbiliment għall-Kummissjoni (amministrazzjoni) u għall-OP huma stabbiliti fl-anness baġitarju.

5.3    Is-Servizz Ewropew għall-Azzjoni Esterna (SEAE)

5.3.1        L-involviment fil-futur tal-UE mal-Afganistan wara t-tmiem tal-mandat b’funzjoni doppja tar-RSUE għall-Afganistan 

Il-mandat b’funzjoni doppja tar-Rappreżentant Speċjali tal-UE (RSUE) għall-Afganistan spiċċa fil-31 ta’ Awwissu 2017. Fl-isfond tal-mandat politiku msaħħaħ bil-kbir tal-Kapijiet tad-Delegazzjonijiet tal-UE biex jirrappreżentaw lill-UE b’mod komprensiv f’pajjiżi terzi wara d-dħul fis-seħħ tat-Trattat ta’ Lisbona, u b’kont meħud tal-fehmiet tal-Parlament Ewropew 16 , ir-Rappreżentant Għoli ddeċidiet li ma tipproponix il-ħatra ta’ RSUE ieħor għall-Afganistan wara l-iskadenza tal-mandat attwali. L-involviment fil-futur tal-UE mal-Afganistan minflok se jiġi appoġġat minn żewġ entitajiet suċċessuri tar-RSUE:

-Mibgħut Speċjali tal-UE bbażat b’Brussell inħatar fl-1 ta’ Settembru 2017 u ħa f’idejh il-kompiti tar-RSUE ta’ koordinazzjoni reġjonali u internazzjonali relatata mal-proċess ta’ paċi, stabbilizzazzjoni u rikonċiljazzjoni fl-Afganistan. Il-Mibgħut Speċjali se jkun appoġġat minn żewġ konsulenti politiċi u assistent wieħed.

-Id-delegazzjoni tal-UE f’Kabul se tissaħħaħ permezz ta’ Taqsima Politika, tal-Istampa u tal-Informazzjoni (PPI – Political, Press and Information) ġdida. Dan se jippermettilha tassumi r-rwol mistenni tagħha b’mod sħiħ, inkluż li takkumpanja l-programm komprensiv ta’ riforma tal-Afganistan, l-implimentazzjoni ta’ ftehimiet għall-paċi, l-appoġġ għall-iżvilupp ekonomiku u l-implimentazzjoni tal-assistenza tal-UE għall-iżvilupp.

Dan il-kunċett kien ippreżentat lill-Kumitat Politiku u ta’ Sigurtà fit-13 ta’ Ġunju 2017 mingħajr ebda oġġezzjoni minn Stati Membri tal-UE.

Billi l-ispejjeż għal uffiċċju tal-Mibgħut Speċjali kważi kollha se jkunu koperti minn riallokazzjonijiet fi ħdan il-baġit amministrattiv attwali tas-SEAE, se tkun meħtieġa żieda tal-baġit tas-SEAE biex tkopri kostijiet addizzjonali relatati mat-twaqqif ta’ taqsima ġdida tal-PPI fid-Delegazzjoni tal-UE f’Kabul u spejjeż oħrajn amministrattivi relatati mal-infrastruttura u s-sigurtà, li bħalissa huma koperti mir-RSUE.

Din iż-żieda tal-baġit amministrattiv tas-SEAE (Intestatura 5, it-Taqsima X tal-baġit tal-UE) fl-2018 tammonta għal EUR 4,5 miljun (kost ta’ sena sħiħa).

Globalment, iż-żieda se tiġi kkumpensata minn frankar fil-Politika Estera u ta’ Sigurtà Komuni (PESK, Intestatura 4, it-Taqsima III tal-Baġit tal-UE) li jirriżulta mill-għeluq tar-RSUE fl-Afganistan, stmata għal EUR 10,2 miljun. Huwa propost li l-bilanċ ta’ EUR 5,7 miljun jibqa’ fil-baġit tal-PESK biex ikopri kwalunkwe azzjoni ġdida oħra li ma tistax tiġi pprogrammata minn qabel.

It-tranżizzjoni proposta tirrappreżenta wkoll simplifikazzjoni amministrattiva, peress li s-SEAE ma jkollux aktar bżonn li jżomm sistema kumplessa ta’ reġistrazzjonijiet paralleli għan-nefqa li saret għan-nom tar-RSUE għall-Afganistan.

5.3.2        Tranżizzjoni ta’ ċerti kompiti għall-Monitoraġġ, l-Iggwidar u l-Konsulenza (MIK) minn EULEX Kosovo għall-Uffiċċju tal-UE fil-Kosovo

Bħala riżultat tar-Rieżami Strateġiku 2015/2016 u t-tneħħija gradwali ta’ EULEX Kosovo, il-Kunsill talab lis-SEAE biex iħejji strateġija ta’ tranżizzjoni.

Ġie ppreżentat kunċett ta’ tranżizzjoni għal EULEX lill-Kumitat għall-Aspetti Ċivili tal-Maniġġar ta’ Kriżijiet (CivCom) fit-13 ta’ Marzu 2017 fejn ġie propost it-trasferiment ta’ ċerti kompiti tal-MIK lill-Uffiċċju tal-UE, li għalhekk irid jissaħħaħ b’pożizzjonijiet ġodda ta’ konsulenti strateġiċi tal-Istat ta’ Dritt u ta’ persunal amministrattiv iffinanzjati mill-baġit amministrattiv tas-SEAE.

Fuq dik il-bażi, CivCom qabel dwar dan il-kunċett fl-24 ta’ April 2017 u l-Kumitat Politiku u ta’ Sigurtà (KPS) approvah fit-28 ta’ April 2017, biex b’hekk stieden lis-SEAE biex iħejji t-tranżizzjoni.

Ġie stmat li 12-il kariga ġdida se tkun meħtieġa fl-Uffiċċju tal-UE (aġenti kuntrattwali, esperti nazzjonali ssekondati u aġenti lokali) biex iwettqu l-kompiti u ż-żieda relatata fix-xogħol amministrattiv. Dawn il-karigi ġodda jistgħu jwasslu għal żieda tal-baġit amministrattiv tas-SEAE ta’ EUR 0,5 miljun għas-sitt xhur u nofs ikkonċernati fl-2018. L-ammont sħiħ fuq bażi annwali jkun ta’ EUR 0,8 miljun, li se jkun il-punt ta’ referenza għall-baġit 2019 u tas-snin ta’ wara.

Abbażi tal-preżunzjonijiet kurrenti, it-tnaqqis korrispondenti ta’ karigi fi ħdan il-missjoni EULEX jammonta għal 41, li jwassal għal iffrankar mistenni ta’ EUR 1,8 miljun fl-2018 fil-qasam tal-Politika Estera u ta’ Sigurtà Komuni 17 . Huwa propost li l-bilanċ ta’ EUR 1,3 miljun jibqa’ fil-baġit tal-PESK biex ikopri kwalunkwe azzjoni ġdida oħra li ma tistax tiġi pprogrammata minn qabel.

Huwa mistenni li, ladarba titlesta, it-tranżizzjoni tal-kompiti MIK ta’ EULEX se twassal għal tnaqqis ulterjuri ta’ 37 kariga addizzjonali (24 internazzjonali u 13 lokali), li jammontaw għal 78 b’kollox, li madankollu se tirrikjedi madwar 10 karigi addizzjonali li jkun iffinanzjati permezz ta’ żieda fil-baġit amministrattiv tas-SEAE.

5.3.3        Linja baġitarja separata għall-kontribuzzjoni għal Skejjel Ewropej

Għal raġunijiet ta’ trasparenza u armonizzazzjoni ma’ istituzzjonijiet oħra, qed jiġi propost li tinħoloq partita tal-baġit ġdida li turi l-kontribuzzjoni tas-SEAE għall-Iskejjel Ewropej tat-tip 2.

Din in-nefqa, li tammonta għal EUR 20 000 fis-sena, attwalment hija ffinanzjata minn xi punt ieħor relatat mal-persunal, li se titnaqqas skont dan. L-operazzjoni hija għalhekk newtrali għall-baġit.

5.3.4        L-effett kombinat fuq AB2018

6.Tabella ta' Sommarju skont l-Intestatura tal-QFP

(1) ĠU L 298, 26.10.2012, p. 1.

(2) COM(2017) 400, 29.6.2017.

(3)  Skont il-QFP 2014-2020, is-sottolimitu inizjali tal-FAEG għall-2018 kien jammonta għal EUR 44 889 miljun. Wara li jiġi kkunsidrat ammont nett ta’ EUR 726,7 miljun li għandu jkun ittrasferit lejn l-Iżvilupp Rurali, il-bilanċ nett disponibbli tal-2018 għan-nefqa tal-FAEG (“is-sottolimitu nett”) jammonta għal EUR 44 162,4 miljun. Il-ħtiġijiet tal-FAEG fl-2018 huma vvalutati vis-à-vis dan is-“sottolimitu nett” tal-FAEG.

(4)  L-ammont tal-ħtiġijiet jikkorrispondi għal EUR 43 464,4 miljun ta’ approprjazzjonijiet ġodda flimkien ma’ EUR 1 246,0 miljun ta’ dħul assenjat.

(5)  Din l-istima hija bbażata fuq id-dikjarazzjonijiet tan-nefqa reali li waslu mingħand l-Istati Membri sax-xahar ta’ Awwissu 2017, flimkien mat-tbassir għall-perjodu bejn l-01.09.2017 sa 15.10.2017. Informazzjoni sħiħa dwar in-nefqa reali għal dan il-perjodu li jifdal se tkun disponibbli fl-aħħar ta’ Ottubru/fil-bidu ta’ Novembru 2017.

(6)  Ir-rata ta’ aġġustament għall-pagamenti diretti relatati mal-mekkaniżmu ta’ dixxiplina finanzjarja fir-rigward tas-sena kalendarja 2017 hija stabbilita fir-Regolament ta’ Implimentazzjoni tal-Kummissjoni (UE) Nru 2017/1236. Fid-dawl ta’ modifiki żgħar għall-pagamenti diretti proposti f’din l-IE 1/2018, l-adattament tar-rata diġà stabbilita mhijiex meħtieġa.

(7)  Ir-Regolament Delegat tal-Kummissjoni (UE) 2017/1533 tat-8 ta’ Settembru 2017 li jemenda r-Regolament Delegat (UE) 2017/1165 fir-rigward miżuri temporanji eċċezzjonali ta’ appoġġ għall-produtturi tal-ħawħ u tan-nuċiprisk fil-Greċja, fi Spanja u fl-Italja.

(8)  Ir-Regolament ta’ Implimentazzjoni tal-Kummissjoni (UE) 2017/1536 tal-11 ta' Settembru 2017 dwar miżura ta' emerġenza fil-forma ta' għajnuna lill-irziezet b'mhux aktar minn 50 annimal tal-ispeċi porċina li jinsabu f'ċerti żoni tal-Polonja meta jieqfu jipproduċu l-laħam tal-majjal minħabba rekwiżiti ġodda fir-rigward tad-deni Afrikan tal-ħnieżer.

(9)  Bħalissa qed titħejja komunikazzjoni speċifika mill-Kummissjoni lill-Kunsill, akkumpanjata minn proposta ġdida dwar l-iffissar tal-imposti ta’ produzzjoni ġodda u l-koeffiċjent għall-kalkolu tal-imposta addizzjonali fis-settur taz-zokkor għal dawn is-sentejn ta’ kummerċjalizzazzjoni 1999/2000 u 2000/2001. Din se tkun simili għall-Komunikazzjoni ta’ qabel tal-Kummissjoni lill-Kunsill (COM(2013) 526 final) ta’ 17.7.2013 wara d-deċiżjoni tal-Qorti dwar l-hekk imsejħa kawża “Jülich u oħrajn” fl-2012.

(10)  COM(2017) 540, 26.6.2017.

(11) COM(2017) 541, 26.6.2017.

(12) Id-Deċiżjoni (UE) 2017/741 tal-Parlament Ewropew u tal-Kunsill tal-5 ta' April 2017 dwar il-mobilizzazzjoni tal-Fond ta' Solidarjetà tal-Unjoni Ewropea biex jipprovdi assistenza lir-Renju Unit, lil Ċipru u lill-Portugall (ĠU L 111, 24.4.2017, p. 6) u l-Baġit Emendatorju Nru 1/2017 (ĠU L 136, 24.5.2017, p. 1) li jakkumpanjaha.

(13)  Ir-Regolament tal-Kunsill 2013/1311 tat-2 ta’ Diċembru 2013 li jistabbilixxi l-qafas finanzjarju pluriennali għas-snin 2014-2020, ĠU L 34, 20.12.2013, p. 884.

(14)  COM(2017) 331, 13.6.2017.

(15)

     COM(2017) 262, 30.5.2017.

(16) B’mod partikolari l-punt 101 tar-riżoluzzjoni tiegħu tas-16 ta’ Frar 2017 dwar it-titjib tal-funzjonament tal-Unjoni Ewropea.

(17)  Dan l-iffrankar huwa stmat fuq bażi annwali sħiħa, peress li l-baġits annwali tal-missjonijiet tal-Politika ta’ Sigurtà u ta’ Difiża Komuni jiġu impenjati b’mod sħiħ ma’ kull tiġdid tal-mandat.