IL-KUMMISSJONI EWROPEA
Brussell, 15.6.2016
COM(2016) 389 final
2016/0183(NLE)
Proposta għal
DEĊIŻJONI TAL-KUNSILL
dwar il-kontribuzzjonijiet finanzjarji li għandhom jitħallsu mill-Istati Membri għall-finanzjament tal-Fond Ewropew għall-Iżvilupp, inkluż it-tieni ħlas parzjali għall-2016
MEMORANDUM TA' SPJEGAZZJONI
1.IL-KUNTEST TAL-PROPOSTA
Raġunijiet għall-proposta u l-objettivi tagħha
Il-proposta tirrigwarda abbozz ta' Deċiżjoni tal-Kunsill dwar it-tieni ħlas parzjali tal-kontribuzzjonijiet finanzjarji għall-Fond Ewropew għall-Iżvilupp (FEŻ) li għandhom jitħallsu mill-Istati Membri fl-2016.
Il-11-il FEŻ u l-fondi l-oħra tal-FEŻ li għadhom miftuħa (jiġifieri t-8, id-9 u l-10 FEŻ) huma mmaniġġati skont il-ġabra ta' regoli li ġejja:
Il-Ftehim ta' Sħubija kurrenti bejn il-membri tal-Grupp ta' Stati tal-Afrika, il-Karibew u l-Paċifiku fuq naħa, u l-Komunità Ewropea u l-Istati Membri tagħha fuq in-naħa l-oħra ("Il-Ftehim ta' Sħubija AKP-UE") kif emendat l-aħħar,
Il-Ftehim Intern bejn ir-Rappreżentanti tal-Gvernijiet tal-Istati Membri tal-Unjoni Ewropea, imlaqqgħin fil-Kunsill, dwar l-iffinanzjar tal-għajnuna tal-Unjoni Ewropea fl-ambitu tal-qafas finanzjarju pluriennali għall-perjodu mill-2014 sal-2020, skont il-Ftehim ta' Sħubija AKP-UE, u dwar l-allokazzjoni ta' assistenza finanzjarja għall-Pajjiżi u t-Territorji Extra-Ewropej li għalihom tapplika r-Raba' Parti tat-Trattat dwar il-Funzjonament tal-Unjoni Ewropea ("il-11-il "Ftehim Intern" tal-FEŻ"),
Ir-Regolament tal-Kunsill (UE) 2015/323 dwar ir-regolament finanzjarju applikabbli għall-11-il Fond Ewropew għall-Iżvilupp ("il-11-il Regolament Finanzjarju tal-FEŻ").
Id-dokumenti msemmijin hawn fuq jinkludu impenji pluriennali mill-Istati Membri biex jappoġġjaw finanzjarjament it-teżor tal-FEŻ. Il-11-il Regolament Finanzjarju tal-FEŻ jistipula li jsiru kontribuzzjonijiet regolari mill-Istati Membri għat-teżor tal-FEŻ skont impenji finanzjarji predeterminati. Il-kontribuzzjonijiet regolari huma xprunati minn Deċiżjonijiet tal-Kunsill tekniċi li jirriflettu l-implimentazzjoni ta' impenji finanzjarji deċiżi minn qabel.
Uħud mill-intestaturi fil-memorandum ta' spjegazzjoni għaldaqstant mhumiex applikabbli għal sejħiet regolari għall-kontribuzzjonijiet, bħalma hi din.
Konsistenza mad-dispożizzjonijiet ta' politika eżistenti fil-qasam ta' politika
Irreferi għall-punt 1. Ir-raġunijiet għall-proposta u l-objettivi tagħha
Konsistenza ma' politiki oħrajn tal-Unjoni
Irreferi għall-punt 1. Ir-raġunijiet għall-proposta u l-objettivi tagħha
2.BAŻI ĠURIDIKA, SUSSIDJARJETÀ U PROPORZJONALITÀ
Bażi ġuridika
F'konformità mal-Artikolu 21(7) tar-Regolament Finanzjarju tal-11-il FEŻ, l-ammont immaniġġat mill-Kummissjoni u l-ammont immaniġġat mill-Bank Ewropew tal-Investiment (BEI) huma speċifikati separatament.
Skont l-Artikolu 52 tar-Regolament Finanzjarju tal-11-il FEŻ, il-BEI bagħat lill-Kummissjoni l-estimi aġġornati tiegħu tal-impenji u l-ħlasijiet fl-istrumenti li jimmaniġġa.
Skont l-Artikolu 22(1) tal-11-il Regolament Finanzjarju, is-sejħiet għall-kontribuzzjonijiet l-ewwel għandhom jużaw l-ammonti disponibbli minn FEŻ preċedenti, wieħed wara l-ieħor. Għaldaqstant, is-sejħiet għal kontribuzzjonijiet f'din il-proposta jirrigwardaw l-ammonti fl-10 FEŻ, kemm għall-BEI kif ukoll għall-Kummissjoni.
F'konformità mal-Artikolu 21(3) tar-Regolament Finanzjarju tal-11-il FEŻ, il-Kunsill għandu jiddeċiedi dwar din il-proposta mhux aktar tard minn 21 jum kalendarju wara l-preżentazzjoni mill-Kummissjoni tal-proposta tagħha.
F'konformità mal-Artikolu 1 tad-Deċiżjoni tal-Kunsill 2013/759/UE li tistabbilixxi l-Faċilità Tranżitorja, l-ishma tal-kontribuzzjonijiet tal-Istati Membri stabbiliti fl-Artikolu 1(2)(a) tal-Ftehimiet Interni tat-8, id-9 u l-10 FEŻ għandhom jitnaqqsu skont dan, wara d-dħul fis-seħħ tal-Ftehim Intern tal-11-il FEŻ. It-tnaqqis se jkollu impatt fuq il-kontribuzzjonijiet tal-Istati Membri tal-2015, tal-2016 u tal-2017, skont l-opzjoni ta' aġġustament magħżula minn kull Stat Membru.
L-Artikolu 23(1) tar-Regolament Finanzjarju tal-11-il FEŻ jistipula li Stat Membru li jonqos milli jwettaq il-ħlas parzjali tal-kontribuzzjoni dovuta sal-iskadenza, ikun jeħtieġlu jħallas l-imgħax fuq l-ammont li ma jkunx ħallas; l-arranġamenti għall-ħlas tal-imgħax huma speċifikati fl-istess Artikolu.
Sussidjaretà (għal kompetenza mhux esklussiva)
Irreferi għall-punt 1. Ir-raġunijiet għall-proposta u l-objettivi tagħha
Proporzjonalità
Irreferi għall-punt 1. Ir-raġunijiet għall-proposta u l-objettivi tagħha
Għażla tal-istrument
Irreferi għall-punt 1. Ir-raġunijiet għall-proposta u l-objettivi tagħha
3.RIŻULTATI TAL-EVALWAZZJONIJIET EX POST, KONSULTAZZJONIJIET MAL-PARTIJIET IKKONĊERNATI U VALUTAZZJONIJIET TAL-IMPATT
Evalwazzjonijiet ex post/kontrolli tal-idoneità tal-leġiżlazzjoni eżistenti
Konsultazzjonijiet mal-partijiet ikkonċernati
Ġbir u użu tal-kompetenzi
Valutazzjoni tal-impatt
Idoneità regolatorja u simplifikazzjoni
Drittijiet fundamentali
4.IMPLIKAZZJONIJIET BAĠITARJI
Irreferi għall-punt 1. Ir-raġunijiet għall-proposta u l-objettivi tagħha
5.ELEMENTI OĦRAJN
Pjanijiet ta' implimentazzjoni u arranġamenti dwar il-monitoraġġ, l-evalwazzjoni u r-rappurtar
Dokumenti ta' spjegazzjoni (għad-direttivi)
Spjegazzjoni fid-dettall tad-dispożizzjonijiet speċifiċi tal-proposta
2016/0183 (NLE)
Proposta għal
DEĊIŻJONI TAL-KUNSILL
dwar il-kontribuzzjonijiet finanzjarji li għandhom jitħallsu mill-Istati Membri għall-finanzjament tal-Fond Ewropew għall-Iżvilupp, inkluż it-tieni ħlas parzjali għall-2016
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea,
Wara li kkunsidra l-Ftehim ta' Sħubija bejn il-membri tal-Grupp tal-Istati Afrikani, tal-Karibew u tal-Paċifiku, fuq-naħa, u l-Komunità Ewropea u l-Istati Membri tagħha, fuq in-naħa l-oħra, kif l-aħħar emendat ("il-Ftehim ta' Sħubija AKP-UE"),
Wara li kkunsidra l-Ftehim Intern bejn ir-Rappreżentanti tal-Gvernijiet tal-Istati Membri tal-Unjoni Ewropea, imlaqqgħin fil-Kunsill, dwar l-iffinanzjar tal-għajnuna tal-Unjoni Ewropea fl-ambitu tal-qafas finanzjarju pluriennali għall-perjodu mill-2014 sal-2020, skont il-Ftehim ta' Sħubija AKP-UE, u dwar l-allokazzjoni ta' assistenza finanzjarja għall-Pajjiżi u t-Territorji Extra-Ewropej li għalihom tapplika r-Raba' Parti tat-Trattat dwar il-Funzjonament tal-Unjoni Ewropea ("il-Ftehim Intern"), u b'mod partikolari l-Artikolu 7 tiegħu,
Wara li kkunsidra r-Regolament tal-Kunsill (UE) 2015/323 tat-2 ta' Marzu 2015 dwar ir-Regolament Finanzjarju applikabbli għall-11-il Fond Ewropew għall-Iżvilupp ("ir-Regolament Finanzjarju tal-11-il FEŻ"), u b'mod partikolari l-Artikolu 21(3) tiegħu,
Wara li kkunsidra l-proposta mill-Kummissjoni Ewropea,
Billi:
(1)Skont il-proċedura stabbilita fl-Artikoli 21 sa 24 tar-Regolament Finanzjarju tal-11-il FEŻ, il-Kummissjoni għandha sal-15 ta' Ġunju 2016 tressaq proposta li tispeċifika (a) l-ammont tat-tieni ħlas parzjali tal-kontribuzzjoni għall-2016, u (b) ammont annwali rivedut tal-kontribuzzjoni għall-2016, f'każijiet fejn l-ammont ivarja mill-bżonnijiet reali
(2)Skont l-Artikolu 52 tar-Regolament Finanzjarju tal-11-il FEŻ, fit-28 ta' April 2016, il-Bank Ewropew tal-Investiment bagħat lill-Kummissjoni l-estimi aġġornati tiegħu tal-impenji u l-pagamenti skont l-istrumenti li jimmaniġġa
(3)L-Artikolu 22(1) tar-Regolament Finanzjarju tal-11-il FEŻ jistipula li s-sejħiet għal kontribuzzjonijiet għandhom l-ewwel jużaw l-ammonti stipulati fil-FEŻ preċedenti. Għaldaqstant, għandha ssir sejħa għall-fondi fil-qafas tal-10 FEŻ
(4)Il-Kunsill adotta fl-24 ta' Novembru 2015, fuq proposta mill-Kummissjoni, id-Deċiżjoni li jistabbilixxi li l-limitu massimu għall-ammont annwali tal-kontribuzzjonijiet tal-FEŻ tal-Istati Membri għall-2016 ikun ta' EUR 3 450 000 000 għall-Kummissjoni, u ta' EUR 150 000 000 għall-Bank Ewropew tal-Investiment.
(5)Il-Kunsill adotta l-ħolqien tal-Faċilità Tranżitorja fit-12 ta' Diċembru 2013 fir-rigward tal-miżuri ta' mmaniġġar tranżizzjonali tal-FEŻ mill-1 ta' Jannar 2014 sad-dħul fis-seħħ tal-11-il Fond Ewropew għall-Iżvilupp.
ADOTTA DIN ID-DEĊIŻJONI:
Artikolu 1
Il-kontribuzzjonijiet individwali tal-Fond Ewropew għall-Iżvilupp li jridu jitħallsu mill-Istati Membri lill-Kummissjoni u lill-Bank Ewropew tal-Investiment bħala t-tieni ħlas parzjali għall-2016 huma stabbiliti fit-tabella fl-Anness 1.
Il-ħlasijiet ta' dawk il-kontribuzzjonijiet jistgħu jiġu kkombinati ma' aġġustamenti fl-ambitu tal-implimentazzjoni tat-tnaqqis tal-fondi impenjati skont il-Faċilità Tranżitorja, konsegwentement għal pjan ta' aġġustament ikkomunikat minn kull Stat Membru lill-Kummissjoni mal-adozzjoni tat-tielet ħlas parzjali tal-2015.
Artikolu 2
Din id-Deċiżjoni hija indirizzata lill-Istati Membri.
Magħmul fi Brussell,
Għall-Kunsill
Il-President