Pubblikazzjoni ta' applikazzjoni skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2015/C 189/04)

Din il-pubblikazzjoni tagħti d-dritt li l-applikazzjoni tiġi opposta skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1).

DOKUMENT UNIKU

“LATVIJAS LIELIE PELĒKIE ZIRŅI”

Nru tal-KE: LV-PDO-0005-01194 — 04.02.2014

DOP ( X ) IĠP ( )

1.   Isem

2.   Stat Membru jew Pajjiż Terz

Il-Latvja

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta' prodott

Klassi 1.6. Frott, ħaxix u ċereali, friski jew ipproċessati

3.2.   Deskrizzjoni tal-prodott li għalih japplika l-isem fil-punt (1)

Id-DOP “Latvijas lielie pelēkie zirņi” tirreferi għaż-żrieragħ nexfin tal-kultivar lokali “Retrija” tal-varjetà maculatum tal-piżella (Pisum sativum L.).

Dan il-legum imnixxef għandu l-karatteristiċi morfoloġiċi li ġejjin:

Dehra: il-piżella tkun kbira, xierfa ħafna, kannella b'disinn immewweġ li jagħtiha lewn fil-griż, u b'punt iswed fejn iż-żerriegħa tingħaqad mal-perikarpju.

Piż medju: massa ta' 1 000 piżella: 360-380 g

densità tal-ħżin: 780 g/l

Karatteristiċi kimiċi ta' “Latvijas lielie pelēkie zirņi” (f'%):

—   kontenut ta' ilma: mhux iktar minn 14 %,

—   proteina kruda: 0–34 % (b'kontenut massimu ta' liżina ta' 11,4 %),

—   xaħmijiet: 1,5–2 %,

—   karboidrati: 50–57 %,

—   fibra kruda: massimu ta' 6,5 %,

—   rmied: mhux iktar minn 2 %.

Il-“Latvijas lielie pelēkie zirņi” jittieklu mingħajr ma titneħħa t-testa (jew il-qoxra taż-żerriegħa) tal-prodott, billi din ma tistax tiġi sseparata mill-bqija taż-żerriegħa; dan ifisser li l-prodott ma jiddiżintegrax meta jitgħalla, billi t-testa tibqa' mwaħħla mal-bqija tal-piżella.

Il-piżella mgħollija għandha l-karatteristiċi organolettiċi li ġejjin:

3.3.   Għalf (għal prodotti li ġejjin mill-annimali biss) u materja prima (għal prodotti pproċessati)

—

3.4.   L-istadji speċifiċi tal-produzzjoni li jridu jsiru fiż-żona ġeografika identifikata

L-istadji kollha fil-produzzjoni - il-kultivazzjoni, it-tnixxif u l-għażla - jsiru fiż-żona kkonċernata.

3.5.   Regoli speċifiċi dwar it-tqattigħ, il-taħkik, l-ippakkjar, eċċ., tal-prodott li għalih jirreferi l-isem irreġistrat

—

3.6.   Regoli speċifiċi dwar it-tikkettar tal-prodott li għalih jirreferi l-isem irreġistrat

—

4.   Definizzjoni konċiża taż-żona ġeografika

Iż-żona ġeografika fejn jiġi prodott il-prodott b'din id-DOP tkopri kważi l-Latvja kollha, ħlief għar-reġjuni li ġejjin: il-kosta tal-Baħar Baltiku u l-Golf ta' Riga sa 5 km ’l ġewwa fil-muniċipalitajiet ta' Nīca, Liepāja u Pāvilosta, iż-żona kostali tal-muniċipalità ta' Ventspils, iż-żona kostali tal-muniċipalità ta' Dundaga, u l-muniċipalitajiet ta' Roja, Engure, Jūrmala, Riga, Carnikava, Ādaži, Saulkrasti u Salacgrīva.

5.   Ir-rabta maż-żona ġeografika

Il-fatturi ewlenin li jinfluwenzaw il-kwalità tal-“Latvijas lielie pelēkie zirņi” huma l-kundizzjonijiet klimatiċi lokali, il-karatteristiċi tal-ħamrija u l-fatturi storiċi u dawk marbuta mal-bniedem.

Speċifiċità taż-żona ġeografika

It-territorju fejn tiġi kkultivata l-“Latvijas lielie pelēkie zirņi” tinsab fiż-żona ta' klima temperata. Il-klima tal-Latvja hija influwenzata mill-prossimità tal-baħar u l-mases tal-arja deħlin mill-Oċean Atlantiku, allura l-klima tagħha hija predominantement moderata u umida, b'erba' staġuni distinti. Is-sema spiss ikun imsaħħab (għal medja ta' 160–180 jum fis-sena) filwaqt li x-xemx toħroġ għal medja ta' 1 790 siegħa fis-sena. L-akbar numru ta' granet xemxin, medja ta' 28–30 jum, ikunu minn Mejju sa Awwissu, meta x-xemx toħroġ għal 8–10 siegħa kuljum. Il-preċipitazzjoni medja tvarja bejn 574 u 691 mm fis-sena. Il-klima predominantement moderata u umida toħloq il-kundizzjonijiet kollha meħtieġa għall-aħjar tkabbir, rimi tal-fjuri u formazzjoni tal-għalla, u għalhekk il-kwalitajiet u l-karatteristiċi ewlenin tal-legumi joħorġu l-aħjar preċiżament f'dik iż-żona ġeografika.

Il-ħamrija taż-żona ġeografika definita hija kkundizzjonata moderatament jew tajjeb u għandha konsistenza granulometrika, grassa u kalkaruża bl-aħjar pH tal-ħamrija ta' madwar 7, fatturi essenzjali għall-aħjar tkabbir tal-“Latvijas lielie pelēkie zirņi”.

Speċifiċità tal-prodott

Il-“Latvijas lielie pelēkie zirņi” nexfin huma distinti mill-piżelli l-oħra għaliex għandhom żrieragħ xierfa partikolarment kbar (massa ta' 1 000 żerriegħa tiżen 360–380 g). Għalkemm f'kull miżwed ikun hemm ftit żrieragħ, il-kwalitajiet kulinarji tajbin tagħhom, bħall-ħin relattivament qasir għat-tgħollija (madwar 10 minuti inqas minn piżelli oħra) ipattu għal dan il-fatt. Karatteristiċi tal-piżella mgħollija: konsistenza ramlija ratba u togħma ħafifa imma speċifika li tiġi mill-qoxra.

Il-“Latvijas lielie pelēkie zirņi” jittieklu mingħajr ma titneħħa t-testa (jew il-qoxra taż-żerriegħa) tal-prodott, billi din ma tistax tiġi sseparata mill-bqija taż-żerriegħa; dan ifisser li l-prodott ma jiddiżintegrax meta jitgħalla, billi t-testa tibqa' mwaħħla mal-bqija tal-piżella.

Rabta kawżali bejn iż-żona ġeografika u l-kwalità jew il-karatteristiċi tal-prodott

Il-“Latvijas lielie pelēkie zirņi” huwa prodott li ġie żviluppat biss bl-influwenza ta' kundizzjonijiet naturali speċifiċi u minħabba l-ħila tal-produtturi lokali.

Ir-referenza għall-pubblikazzjoni tal-ispeċifikazzjoni

(it-tieni subparagrafu tal-Artikolu 6(1) ta' dan ir-Regolament (2))

http://www.pvd.gov.lv/lat/kreis_izvlne/novertesana_un_registracija/lauksaimniecibas_un_partikas_p/

(1)  ĠU L 343, 14.12.2012, p. 1.

(2)  Ara n-nota f’qiegħ il-paġna 1.