IL-KUMMISSJONI EWROPEA
Brussell, 9.11.2015
COM(2015) 556 final
Rakkomandazzjoni għal
DEĊIŻJONI TAL-KUNSILL
dwar l-adeżjoni tar-Repubblika tal-Kroazja mal-Konvenzjoni tat-18 ta’ Diċembru 1997, magħmula fuq il-bażi tal-Artikolu K.3 tat-Trattat dwar l-Unjoni Ewropea, fuq assistenza reċiproka u kooperazzjoni bejn l-amministrazzjonijiet doganali
MEMORANDUM TA’ SPJEGAZZJONI
1.KUNTEST TAL-PROPOSTA
•Ir-raġunijiet għall-proposta u l-għanijiet tagħha
L-Att tal-Adeżjoni tar-Repubblika tal-Kroazja fih sistema simplifikata għall-adeżjoni tal-Kroazja mal-konvenzjonijiet u mal-protokolli li ġew konklużi mill-Istati Membri abbażi tal-Artikolu 34 TUE (li qabel kien l-Artikolu K.3 TUE) jew tal-Artikolu 293 KE. Fil-fatt, l-Artikolu 3(4) tal-Att tal-Adeżjoni sempliċiment jistipula li l-Kroazja taderixxi mal-konvenzjonijiet u mal-protokolli bis-saħħa tal-Att.
2.BAŻI ĠURIDIKA, SUSSIDJARJETÀ U PROPORZJONALITÀ
•Il-bażi ġuridika
L-Artikoli 3(4) u (5) tal-Att tal-Adeżjoni jistipulaw li l-Kunsill se jadotta Deċiżjoni sabiex jistabbilixxi d-data li fiha dawn il-konvenzjonijiet u l-protokolli jidħlu fis-seħħ għall-Kroazja u sabiex isiru l-aġġustamenti neċessarji kollha għal dawn il-konvenzjonijiet u l-protokolli, li huma meħtieġa minħabba l-adeżjoni tal-Kroazja. Il-Kunsill għandu jaġixxi fuq rakkomandazzjoni tal-Kummissjoni, wara li jikkonsulta lill-Parlament Ewropew.
L-Anness I tal-Att tal-Adeżjoni jagħti l-lista ta’ konvenzjonijiet u ta’ protokolli li huma kkonċernati fil-qasam tal-Ġustizzja u tal-Affarijiet Interni.
Din il-lista tinkludi l-Konvenzjoni tat-18 ta’ Diċembru 1997, magħmula fuq il-bażi tal-Artikolu K.3 tat-Trattat dwar l-Unjoni Ewropea, fuq assistenza reċiproka u kooperazzjoni bejn l-amministrazzjonijiet doganali.
L-adeżjoni tal-Kroazja mal-Konvenzjoni msemmija hawn fuq ma tirrikjedix aġġustamenti għaliha.
Għalhekk, din ir-Rakkomandazzjoni tal-Kummissjoni għal Deċiżjoni tal-Kunsill hija maħsuba biss biex tistabbilixxi d-data li fiha l-Konvenzjoni tat-18 ta’ Diċembru 1997 tidħol fis-seħħ għall-Kroazja.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET TAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Il-valutazzjoni tal-impatt
Minħabba li l-Att tal-Adeżjoni diġà jipprevedi l-adeżjoni tal-Kroazja mal-konvenzjonijiet u mal-protokolli mniżżla fl-Anness I tal-Att, mhux neċessarju li ssir konsultazzjoni tal-partijiet interessati u valutazzjoni tal-impatt ta’ tali adeżjoni.
4.IMPLIKAZZJONIJIET BAĠITARJI
5.ELEMENTI OĦRA
•Spjegazzjoni dettaljata tad-dispożizzjonijiet speċifiċi tal-proposta
Il-Kummissjoni hija mistiedna tadotta r-Rakkomandazzjoni għal Deċiżjoni tal-Kunsill u tibgħatha lill-Kunsill u lill-Parlament Ewropew.
Rakkomandazzjoni għal
DEĊIŻJONI TAL-KUNSILL
dwar l-adeżjoni tar-Repubblika tal-Kroazja mal-Konvenzjoni tat-18 ta’ Diċembru 1997, magħmula fuq il-bażi tal-Artikolu K.3 tat-Trattat dwar l-Unjoni Ewropea, fuq assistenza reċiproka u kooperazzjoni bejn l-amministrazzjonijiet doganali
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea,
Wara li kkunsidra t-Trattat tal-Adeżjoni tar-Repubblika tal-Kroazja,
Wara li kkunsidra t-Trattat tal-Adeżjoni tar-Repubblika tal-Kroazja, u b’mod partikolari l-Artikoli 3(4) u (5) tiegħu,
Wara li kkunsidra l-proposta mill-Kummissjoni ,
Wara li kkunsidra l-opinjoni tal-Parlament Ewropew ,
Billi:
(1)Il-Konvenzjoni magħmula fuq il-bażi tal-Artikolu K.3 tat-Trattat dwar l-Unjoni Ewropea, fuq assistenza reċiproka u kooperazzjoni bejn l-amministrazzjonijiet doganali, (“il-Konvenzjoni”) ġiet iffirmata fi Brussell fit-18 ta’ Diċembru 1997. Se tidħol fis-seħħ 90 jum wara n-notifika tat-tlestija tal-proċeduri kostituzzjonali għall-adozzjoni tal-Konvenzjoni mill-Istat, Membru tal-Unjoni Ewropea fil-waqt tal-adozzjoni mill-Kunsill tal-Att li jfassal il-Konvenzjoni, li jkun l-aħħar wieħed li jwettaq dik il-formalità.
(2)F’konformità mal-Artikolu 32(4) tal-Konvenzjoni, sa meta l-Konvenzjoni tidħol fis-seħħ, kull Stat Membru jista’, meta jagħti n-notifika msemmija fl-Artikolu 32(2) tal-Konvenzjoni, jew fi kwalunkwe żmien ieħor wara dan, jiddikjara li sa fejn ikun ikkonċernat, il-Konvenzjoni tapplika għar-relazzjonijiet tiegħu mal-Istati Membri li għamlu l-istess dikjarazzjoni.
(3)L-Artikolu 3(4) tal-Att tal-Adeżjoni jistipula li l-Kroazja taderixxi mal-konvenzjonijiet u mal-protokolli li ġew konklużi bejn l-Istati Membri u li huma mniżżla fl-Anness 1 tal-Att tal-Adeżjoni, li jinkludi, fost l-oħrajn, il-Konvenzjoni tat-18 ta’ Diċembru 1997 fuq assistenza reċiproka u kooperazzjoni bejn l-amministrazzjonijiet doganali. Dawn il-konvenzjonijiet u l-protokolli għandhom jidħlu fis-seħħ għall-Kroazja fid-data stabbilita mill-Kunsill.
(4)F’konformità mal-Artikolu 3(5) tal-Att tal-Adeżjoni, il-Kunsill se jiddeċiedi li jagħmel l-aġġustamenti kollha li huma meħtieġa minħabba l-adeżjoni tar-Repubblika tal-Kroazja mal-konvenzjonijiet u mal-protokolli msemmija fl-Artikolu 3(4) tal-Att tal-Adeżjoni. L-Att tal-Adeżjoni ma jirrikjedix aġġustament tal-Konvenzjoni tat-18 ta’ Diċembru 1997 fuq assistenza reċiproka u kooperazzjoni bejn l-amministrazzjonijiet doganali.
ADOTTA DIN ID-DEĊIŻJONI:
Artikolu 1
Il-Konvenzjoni tat-18 ta’ Diċembru 1997, magħmula fuq il-bażi tal-Artikolu K.3 tat-Trattat dwar l-Unjoni Ewropea, fuq assistenza reċiproka u kooperazzjoni bejn l-amministrazzjonijiet doganali, tidħol fis-seħħ għall-Kroazja fid-data li fiha din id-Deċiżjoni ssir effettiva.
Artikolu 2
Il-Konvenzjoni mfassla bil-Kroat tkun awtentika bl-istess kundizzjonijiet bħat-testi l-oħra tal-Konvenzjoni.
Artikolu 3
Din id-Deċiżjoni tidħol fis-seħħ l-għada tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell,
Għall-Kunsill
Il-President