This document is an excerpt from the EUR-Lex website
Document 52015DC0215
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS Better regulation for better results - An EU agenda
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Regolamentazzjoni aħjar għal riżultati aħjar — Aġenda tal-UE
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Regolamentazzjoni aħjar għal riżultati aħjar — Aġenda tal-UE
COM/2015/0215 final
IL-KUMMISSJONI EWROPEA
Strasburgu, 19.5.2015
COM(2015) 215 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Regolamentazzjoni aħjar għal riżultati aħjar — Aġenda tal-UE
{SWD(2015) 110 final}
{SWD(2015) 111 final}
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Regolamentazzjoni aħjar għal riżultati aħjar — Aġenda tal-UE
1.Inrendu Riżultati Aħjar: Nibdlu Kif Naħdmu fil-Livell Ewropew
Il-Kummissjoni Ewropea hija ddeterminata li tbiddel kemm dak li tagħmel l-Unjoni Ewropea (UE), kif ukoll kif tagħmlu. L-UE, l-istituzzjonijiet tagħha, u l-korpus tal-liġijiet tagħha, qegħdin hemm biex jaqdu liċ-ċittadini u n-negozji li jridu jaraw dan fil-ħajja u l-operazzjonijiet tagħhom ta’ kuljum. Irridu nerġgħu niksbu l-fiduċja tagħhom fil-kapaċità tagħna li nwettqu dak li nwiegħdu.
Il-Kummissjoni Juncker tirrappreżenta bidu ġdid. Il-prijorità tagħna hija li noffru soluzzjonijiet għal kwistjonijiet kbar li ma jistgħux jiġu indirizzati mill-Istati Membri waħedhom: pjan ta’ investiment li jimmobilizza EUR 315-il biljun biex tingħata spinta lill-impjiegi u lit-tkabbir; unjoni tal-enerġija li tipproduċi enerġija sikura, affordabbli u sostenibbli; aġenda tas-sigurtà interna sabiex jiġu affrontati t-theddidiet komuni bħat-terroriżmu u l-kriminalità organizzata; suq diġitali uniku biex nisfruttaw l-opportunitajiet onlajn; u aġenda għall-migrazzjoni. L-inizjattivi l-ġodda tagħna jfeġġu minn prijoritajiet politiċi ġenwini. Il-Kummissjoni ma tistax u ma għandhiex tkun involuta f’kull kwistjoni fl-UE. L-ewwel programm ta’ ħidma tal-Kummissjoni jirrifletti din il-bidla fl-approċċ. Huwa jinkludi biss 23 inizjattiva ġdida kbar li huma allinjati mill-qrib mal-prijoritajiet politiċi miftiehma. L-azzjonijiet addizzjonali u ta’ rutina li jsegwu matul is-sena wkoll se jirriflettu l-istess sens ta’ konċentrazzjoni u skop. L-inizjattiva 'Il-Baġit tal-UE ffoka fuq ir-riżultati' se timmira wkoll fuq li turi l-valur miżjud tal-baġit tal-UE għaċ-ċittadini tal-UE.
Il-prijoritajiet politiċi huma l-mutur tal-azzjoni tal-Kummissjoni għall-isfidi li qed tiffaċċja llum l-UE. Ir-regolamentazzjoni aħjar hija għodda li tipprovdi bażi għal deċiżjonijiet politiċi f’waqthom u sodi — iżda din qatt ma tista’ tissostitwixxi d-deċiżjonijiet politiċi.
Illum qed nippreżentaw miżuri oħra li jwasslu għal regoli aħjar għal riżultati aħjar. Se nkomplu niftħu t-tfassil tal-politika u nisimgħu u ninteraġixxu aħjar ma’ dawk li jimplimentaw il-leġiżlazzjoni tal-UE u jibbenefikaw minnha. Se nagħtu ħarsa mill-ġdid lejn l-oqsma kollha ta’ politika biex naraw fejn jeħtieġ li ntejbu l-miżuri eżistenti.
Se nkomplu kif bdejna: se niffokaw fuq l-affarijiet li verament hemm bżonn isiru mill-UE u naċċertaw ruħna li qed isiru sew. L-applikazzjoni tal-prinċipji tar-regolamentazzjoni aħjar se tiżgura li l-miżuri jkunu bbażati fuq l-evidenza, imfassla tajjeb u jrendu benefiċċji tanġibbli u sostennibbli għaċ-ċittadini, in-negozji u s-soċjetà kollha.
Dan japplika kemm għall-korpus kbir eżistenti ta’ leġiżlazzjoni tal-UE kif ukoll għal dawk ġodda. Din il-leġiżlazzjoni hija essenzjali għall-iżvilupp sostenibbli, għas-suq uniku li huwa l-mutur tal-ekonomija tagħna u biex tħeġġeġ l-investimenti meħtieġa biex isostnu l-impjiegi u t-tkabbir. Tirfed il-mudell soċjali Ewropew u tagħti tifsira lid-drittijiet u lil-libertajiet li jgħożżu l-Ewropej, inklużi s-sigurtà u d-dritt għall-ġustizzja tagħhom. Barra minn hekk, tgħinna wkoll inwieġbu għall-isfidi komuni bħas-sigurtà tal-enerġija u l-protezzjoni tal-ambjent u l-klima. F’ħafna każijiet sett wieħed ta' regoli tal-UE jieħu post it-taħlita ta’ 28 regola nazzjonali differenti, u dan iħaffef il-ħajja taċ-ċittadini u tan-negozji, jissimplifika l-qafas legali, inaqqas il-piżijiet regolatorji fis-suq uniku kollu u jżid il-prevedibbiltà regolatorja.
Il-korpus tal-liġi tal-UE mhuwiex biss meħtieġ, huwa l-punt tal-forza tagħna - jagħmel lill-UE kwalitattivament differenti minn kull mudell ieħor ta’ governanza kollettiva fid-dinja. Din hija r-raġuni għaliex huwa daqstant importanti li kull miżura fil-ktieb tar-regoli tal-UE tkun adattata għall-għan tagħha, moderna, effettiva, proporzjonata, operattiva u kemm jista’ jkun sempliċi. Il-leġiżlazzjoni għandha tagħmel dak li hija maħsuba li tagħmel, għandha tkun faċli biex tiġi implimentata u prevedibbli u għandha tevita kwalunkwe piż bla bżonn. Regoli sensibbli, realistiċi, implimentati u infurzati sew fl-UE kollha. Regoli li jagħmlu xogħlhom biex nilħqu l-objettivi komuni tagħna - xejn aktar, xejn anqas.
Ir-regolamentazzjoni aħjar mhijiex dwar “aktar” jew “inqas” legiżlazzjoni tal-UE; u lanqas mhi dwar id-deregolamentazzjoni jew deprijoritazzjoni ta' ċerti oqsma politiċi jew dwar li jiġu kompromessi valuri li ngħożżu: il-protezzjoni soċjali u ambjentali, u d-drittijiet fundamentali, inkluża s-saħħa — biex insemmu biss xi ftit eżempji. Regolamentazzjoni aħjar hi dwar li niżguraw li nwettqu l-għanijiet politiċi ambizzjużi li stabbilejna għalina nfusna.
Matul l-aħħar 10 snin, l-UE introduċiet sett komprensiv ta’ għodod u proċeduri ta' regolamentazzjoni aħjar biex tiżgura dan. Dawn il-bidliet importanti diġà qed jagħtu riżultati iżda din il-Kummissjoni ddeċidiet li tmur lil hinn minn dan.
L-impenn tagħna lejn ir-regolamentazzjoni aħjar irid japplika kullimkien, jibni fuq il-progress li diġà sar fil-valutazzjonijiet tal-impatt u l-Programm tal-Idoneità Regolatorja (REFIT). Ma għandniex nimponu l-politiki iżda għandna nħejjuhom b'mod inklużiv, abbażi tat-trasparenza u impenn sħaħ, nagħtu widen lill-fehmiet ta’ dawk milquta mil-leġiżlazzjoni sabiex ikun faċli li nimplimentawha. Aħna miftuħin għar-reazzjonijiet u l-iskrutinju esterni biex jiżguraw li ninsabu fit-triq it-tajba. Anki l-politiki tal-UE għandhom jiġu rieżaminati regolarment: għandna nkunu trasparenti u responsabbli dwar jekk aħniex qed jilħqu l-objettivi politiċi tagħna, dwar x’mar tajjeb u x’hemm bżonn jinbidel.
Regolamentazzjoni aħjar mhijiex eżerċizzju burokratiku. Iċ-ċittadini, in-negozji u partijiet konċernati oħra jiġġudikaw lill-UE fuq l-impatti tal-azzjonijiet tagħha: mhux biss l-inizjattivi l-ġodda iżda aktar importanti r-regoli li diġà jinsabu fis-seħħ. Il-Kummissjoni timpenja ruħha li terfa' r-responsabbiltà politika għall-applikazzjoni tal-prinċipji u l-proċessi tar-regolamentazzjoni aħjar fil-ħidma tagħha u tistieden lill-istituzzjonijiet l-oħra tal-UE u lill-Istati Membri biex jagħmlu l-istess.
2.Ftuħ u Trasparenza
2.1.Aktar konsultazzjoni, nisimgħu aħjar
Il-ftuħ tat-tfassil tal-politika jista' jagħmel lill-UE aktar trasparenti u responsabbli, iżda jiżgura wkoll li l-politiki jkunu bbażati fuq l-aħjar evidenza disponibbli u jagħmilhom aktar effettivi. Fil-livelli kollha - lokali, reġjonali, nazzjonali u tal-Unjoni - dawk affettwati mil-leġiżlazzjoni jifhmu aħjar l-impatt li se jkollha l-leġiżlazzjoni u jistgħu jipprovdu l-evidenza meħtieġa biex intejbuha.
Il-Kummissjoni għandha l-intenzjoni li tisma’ aktar mill-qrib liċ-ċittadini u lill-partijiet konċernati, u tkun miftuħa għar-reazzjonijiet tagħhom, f’kull stadju tal-proċess - mill-ewwel l-idea, meta l-Kummissjoni tagħmel proposta, sal-adozzjoni tal-leġiżlazzjoni u l-evalwazzjoni tagħha. Il-Kummissjoni biħsiebha toħloq portal fuq l-internet fejn tkun tista' tiġi ttraċċata kull inizjattiva.
Billi jkomplu jibnu fuq l-istandards minimi eżistenti għall-konsultazzjonijiet 1 , il-Linji Gwida tar-Regolamentazzjoni Aħjar il-ġodda tal-Kummissjoni jsaħħu l-impenn tagħna lejn konsultazzjonijiet li huma ta’ kwalità għolja, trasparenti u li jilħqu lill-partijiet konċernati rilevanti kollha u jimmiraw lejn l-evidenza meħtieġa biex jittieħdu deċiżjonijiet tajbin. Dan se jsir f’żewġ modi ewlenin.
L-ewwel nett, il-partijiet konċernati se jkunu jistgħu jesprimu l-fehmiet tagħhom matul iċ-ċiklu kollu tal-ħajja ta’ politika. “Pjanijiet ta' Direzzjoni” u “valutazzjonijiet tal-impatt fil-bidu” se jagħtu opportunità lill-partijiet konċernati biex jagħtu r-reazzjonijiet tagħhom u jistidnuhom jagħtu l-informazzjoni relevanti, mill-bidu nett tal-ħidma fuq inizjattiva ġdida 2 . Se jkun hemm ukoll konsultazzjonijiet pubbliċi ta' 12-il ġimgħa meta jkunu qed jitħejjew proposti ġodda u meta nkunu qed nevalwaw u nagħmlu l-“kontrolli tal-idoneità” tal-leġiżlazzjoni eżistenti. Wara li l-Kummissjoni tkun adottat proposta, il-parlamenti nazzjonali jkollhom l-opportunità jagħtu l-opinjonijiet motivati tagħhom dwar is-sussidjarjetà. Barra minn hekk il-Kummissjoni se tistieden liċ-ċittadini jew lill-partijiet konċernati biex jagħtu r-reazzjonijiet tagħhom fi żmien tmien ġimgħat 3 : il-Kummissjoni se tiġbor dawn ir-reazzjonijiet u tippreżentahom lill-Parlament Ewropew u l-Kunsill, biex b'hekk jitqiesu fid-dibattitu leġiżlattiv.
It-tieni, il-partijiet konċernati kollha se jkunu jistgħu jagħtu r-reazzjonijiet tagħhom dwar l-atti li jistabbilixxu elementi tekniċi jew speċifiċi li huma meħtieġa biex tiġi implimentata l-leġiżlazzjoni adottata mill-Parlament Ewropew u l-Kunsill. Għall-ewwel darba l-abbozz tat-testi tal-atti delegati se jkun miftuħ għall-pubbliku inġenerali għal erba' ġimgħat fil-websajt tal-Kummissjoni fl-istess ħin tal-konsultazzjoni tal-esperti fl-Istati Membri. Atti ta’ implimentazzjoni importanti li huma soġġetti għall-opinjoni tal-Kumitat ukoll se jiġu ppubblikati għal erba’ ġimgħat biex il-partijiet konċernati jkunu jistgħu jressqu l-kummenti tagħhom qabel kull vot mill-Istati Membri fil-Kumitat rilevanti 4 . Il-Kummissjoni se tippubblika onlajn lista indikattiva ta’ kull att bħal dan li jkun qed jitħejja, sabiex il-partijiet interessati jkunu jistgħu jippjanaw minn qabel. Se jkunu wkoll meħtieġa valutazzjonijiet tal-impatt proporzjonati kull meta l-impatti x’aktarx ikunu sinifikanti.
Minħabba r-rwol u l-awtonomija tal-isħab soċjali, se japplikaw arranġamenti speċifiċi għall-konsultazzjonijiet tal-Kummissjoni skont Artikolu 154 TFUE għall-proposti tagħha skont l-Artikolu 155 TFUE.
2.2.Nispjegaw aħjar x’qed nagħmlu u għaliex
F’kull każ, jeħtieġ li nispjegaw aħjar għaliex inkunu qed naġixxu, x'riżultati qed nittamaw li niksbu, u x’jistgħu jkunu l-impatti. Memorandum ta’ spjegazzjoni aħjar se jakkumpanja kull proposta tal-Kummissjoni 5 . Minbarra li jispjega l-għan tal-miżura proposta, se jispjega kif ġew applikati l-prinċipji tar-regolamentazzjoni aħjar: x'inhi l-ħtieġa tal-inizjattiva, għaliex din hija l-aħjar għodda li l-UE tista’ tuża, x'jaħsbu l-partijiet konċernati u x’aktarx ikunu l-impatti ambjentali, soċjali u ekonomiċi, partikolarment fuq il-kompetittività u l-intrapriżi żgħar u medji (SMEs). Se jinkludi wkoll spjegazzjoni bir-reqqa ta’ kif l-inizjattiva tissodisfa ż-żewġ testijiet tas-sussidjarjetà (għaliex l-għan ma jistax tintlaħaq mill-Istati Membri weħidhom) u l-proporzjonalità (għalfejn il-miżura proposta ma tmurx lil hinn minn dak li huwa meħtieġ biex jintlaħaq l-għan). Dan huwa essenzjali biex tiġi promossa r-responsabbiltà.
2.3.Kif il-liġi tal-UE taffettwa lin-nies, lin-negozji u lis-soċjetà sħiħa — kulħadd ikollu ċ-ċans jgħid tiegħu
Il-Kummissjoni trid li l-partijiet konċernati jkunu jistgħu jipprovdu reazzjonijiet - mhux biss fil-“punti ta’ kontroll” fissi waqt li tkun qed tiġi żviluppata politika partikolari - iżda dwar kwalunkwe aspett tal-politika u leġiżlazzjoni tal-UE, f'kull ħin. Irridu nkunu nafu kif il-liġi tal-UE taffettwa lin-nies u lin-negozji, u kif nistgħu nagħmluha taħdem aħjar.
Possibbiltà ġdida “Ħaffef il-Piż - Semma' Leħnek” fil-websajt tal-Kummissjoni tar-Regolamentazzjoni Aħjar se tagħti lil kulħadd l-opportunità li jagħti l-opinjonijiet u kummenti tiegħu dwar il-liġijiet u l-inizjattivi eżistenti tal-UE, barra mill-konsultazzjonijiet formali li twettaq il-Kummissjoni. Irridu nisimgħu n-nies xi jsibu irritanti, ta’ piż, jew fi bżonn li jitjieb. Aħna se nirrispondu billi nsegwu direttament jew billi nibagħtu l-kumment biex jitqies aktar fil-pjattaforma tal-partijiet konċernati deskritta hawn taħt). Dan se jagħti mod dirett liċ-ċittadini, lill-isħab soċjali u lill-kumpaniji individwali Ewropej biex jifhmu u jinfluwenzaw il-politika tal-UE, billi jużaw għodda interattiva adattata għal din l-era diġitali.
3.Nagħmlu dan aħjar: Għodod aħjar għal Politiki Aħjar
3.1.Niksbu l-objettivi tagħna: Ir-regolamentazzjoni aħjar bħala l-aġenda bilanċjata
Regolamentazzjoni aħjar ma tfissirx li jkunu ffavoriti ċerti politiki jew objettivi aktar minn oħrajn. Tfisser li nkunu ċari dwar l-objettivi, ikunu xi jkunu. Hija dwar li niżguraw li s-soluzzjoni politika tkun l-aħjar u tal-inqas piż biex jintlaħqu dawk l-objettivi u hija dwar li nkunu onesti dwar kemm qed jaħdmu sew is-soluzzjonijiet. Għandhom jiġu analizzati u kkunsidrati l-impatti sinifikanti kollha, kemm jekk pożittiv kif ukoll jekk negattiv, kwantifikabbli jew mhux.
Mil-lum se japplikaw għall-ħidma tal-Kummissjoni linji gwida integrati ġodda dwar ir-Regolamentazzjoni Aħjar 6 . Huma se jiżguraw li impatti ekonomiċi, soċjali u ambjentali jkomplu jiġu kkunsidrati flimkien f’kull ħidma analitika tal-Kummissjoni flimkien mad-drittijiet fundamentali. Dawn jimpenjaw mill-ġdid lill-Kummissjoni biex tuża l-aħjar evidenza u xjenza disponibbli u jissaħħu l-impenn li ssegwi pjanijiet ċari ta’ monitoraġġ u ta’ implimentazzjoni qabel ma jiġu adottati miżuri. Huma se jiżguraw ukoll li l-għan li l-UE tibqa' kompetittiva u li l-iżvilupp tal-UE jibqa’ sostenibbli jibqgħu prijorità f’kull ma nagħmlu.
Meta nikkunsidraw soluzzjonijiet politiċi, aħna se jikkunsidraw kemm il-mezzi regolatorji u dawk mhux regolatorji mfasslin tajjeb 7 kif ukoll it-titjib fl-implimentazzjoni u l-infurzar tal-leġiżlazzjoni eżistenti. Se niżguraw soluzzjonijiet li jieħdu vantaġġ mill-opportunitajiet kollha li jistgħu joffru t-teknoloġiji diġitali u oħrajn tal-lum u li jistgħu joffru fil-ġejjini, mingħajr ma nirrestrinġu l-innovazzjoni u noperaw b’mod effettiv kemm fid-dinja diġitali kif ukoll fid-dinja fiżika.
Qed nagħtu attenzjoni partikolari għar-regoli li jaffettwaw lill-SMEs, li ħafna drabi jħossuhom mxekkla mill-burokrazija. Madankollu, dawn ir-regoli mhux kollha jiġu minn Brussell. U ħafna regoli tal-UE huma pertinenti għan-negozji iżgħar daqs kemm huma għall-kumpaniji ikbar: ħaddiem f’negozju żgħir li jagħmel prodotti artiġjanali għandu l-istess dritt għall-protezzjoni tas-saħħa u tas-sikurezza daqs xi ħadd fuq il-produzzjoni ġo fabbrika kbira. Iżda jekk il-qafas leġiżlattiv ikun kumplikat wisq, ta’ piż żejjed jew burokratiku wisq, ir-riskju huwa li n-negozji iżgħar sempliċement ma jkunx jistgħu jimxu miegħu — għalhekk il-ħaddiema ma jkunux protetti jew ir-riżorsi skarsi ta' kumpanija jintefqu biss biex jiġu applikati r-regoli minflok milli biex ikabbru n-negozju u joħolqu l-impjiegi.
Se napplikaw il-prinċipju “Aħseb l-Ewwel fiż-Żgħir” aktar bir-reqqa meta nħejju l-inizjattivi: meta nfasslu u nevalwaw il-politiki se nqisu l-interessi tan-negozji żgħar u medji, nipprevedulhom reġim eħfef u kull meta jkun possibbli u jagħmel sens, eżenzjoni sħiħa għall-mikronegozji 8 . Meta xejn minn dan ma jkun possibbli, pereżempju minħabba li dan ma jippermettix li jintlaħqu b'mod effikaċi l-objettivi soċjali, ambjentali u ekonomiċi tal-leġiżlazzjoni proposta, il-Kummissjoni se tispjega għaliex.
3.2.Kummissjoni li hija miftuħa għall-iskrutinju
L-impenji ta’ hawn fuq huma bidla ambizzjuża fil-mod kif noperaw. L-iskrutinju jista' jgħinna nżommu mal-prinċipji tar-regolamentazzjoni aħjar tagħna, filwaqt li jiżgura li l-proposti jkunu bbażati fuq l-aħjar evidenza u analiżi disponibbli.
Il-Bord tal-Valutazzjoni tal-Impatt ilu mill-2006 jaqdi dan ir-rwol ta’ skrutinju. Żgura l-kwalità tal-ħidma tal-valutazzjoni tal-impatt li l-Kummissjoni twettaq qabel id-deċiżjonijiet tagħha fuq inizjattivi ġodda. Kif imħabbar f’Diċembru 2014 9 , il-Bord tal-Iskrutinju Regolatorju ġdid se jieħu post il-Bord eżistenti u se jkolli rwol aktar b'saħħtu.
Il-Bord il-ġdid se jivvaluta l-kwalità tal-valutazzjonijiet tal-impatt li jinfurmaw it-teħid tad-deċiżjonijiet politiċi. Jekk il-Kummissjoni tiddeċiedi li tieħu azzjoni mingħajr valutazzjoni tal-impatt ta’ appoġġ adegwata se tispjega għalfejn pubblikament. Kuntrarju għal dak li kien isir qabel, il-Bord se jikkontrolla wkoll l-evalwazzjonijiet l-aktar importanti u “kontrolli tal-adegwatezza” ta' leġiżlazzjoni eżistenti.
Il-kompożizzjoni tal-Bord se tippermettilu jagħti opinjoni imparzjali dwar il-bażi ta’ għarfien espert komprensiv tal-metodi analitiċi relevanti. Għahekk il-Bord il-ġdid se jkollu President u sitt membri li għall-ewwel darba se jaħdmu fuq bażi full-time u se jkunu ħielsa minn kull responsabbiltà politika oħra fil-Kummissjoni. Barra minn hekk, tlieta minn dawn il-membri se jiġu rreklutati b'termini fissi u li ma jiġġeddux minn barra l-Istituzzjonijiet tal-UE. Il-Membri kollha se jintgħażlu permezz ta’ proċeduri tal-għażla rigorużi u oġġettivi fuq il-bażi tal-għarfien espert tagħhom.
3.3.Impenn komuni mill-Istituzzjonijiet tal-UE
Il-proposti tal-Kummissjoni huma dak - proposti. Dawn huma għall-konsiderazzjoni u l-adozzjoni mill-koleġiżlaturi. Il-proposti rarament jgħaddu mill-proċess leġislativ intatti: isiru emendi mill-Parlament Ewropew u mill-Kunsill. La darba jiġi miftiehem l-att jiġi traspost fil-livell nazzjonali jew reġjonali mill-Istati Membri. Dan jista’ jaffettwa l-benefiċċji u l-kostijiet tiegħu — għall-aħjar jew għall-agħar.
Għalkemm il-Kummissjoni għandha rwol ewlieni fir-regolamentazzjoni aħjar, hi ma tistax trendiha weħidna. Naturalment, bħala parti mill-proċess demokratiku l-Parlament Ewropew u l-Kunsill għandhom id-dritt jemendaw il-leġiżlazzjoni — iżda għandhom ukoll ir-responsabbiltà jikkunsidraw l-impatti tal-emendi tagħhom. Il-Parlament Ewropew u l-Kunsill għandhom, għalhekk jirriflettu l-impenn tal-Kummissjoni lejn ir-regolamentazzjoni aħjar, kif għandhom jagħmlu l-Istati Membri meta jittrasponu jimplimentaw il-liġi tal-UE.
Il-Ftehim Interistituzzjonali tal-2003 dwar it-tfassil aħjar tal-liġijiet jistabbilixxi kif il-Parlament Ewropew, il-Kunsill u l-Kummissjoni Ewropea għandhom jikkooperaw biex jiżguraw l-aħjar tħejjija possibbli għal-liġi tal-UE. Madankollu dawn l-intenzjonijiet tajba ma ġewx implimentati b’mod konsistenti. Pereżempju, bejn l-2007 u l-2014, il-Kummissjoni pproduċiet aktar minn 700 valutazzjoni tal-impatt; fl-istess perjodu, il-Parlament Ewropew evalwa l-impatt ta’ madwar 20 emenda tiegħu, filwaqt li l-Kunsill ma vvaluta xejn. Huwa rari ħafna li l-koleġiżlaturi jibdew l-konsiderazzjoni tagħhom ta’ proposta b’analiżi xierqa tal-valutazzjoni tal-impatt tal-Kummisjoni. U b’mod partikolari fl-istadji finali tan-negozjati, jitlaħqu ftehimiet mingħajr ma jitqiesu bis-sħiħ l-impatti diretti jew indiretti li jistgħu joħolqu l-emendi ta’ kompromess.
Fil-passat, il-Parlament Ewropew u l-Kunsill ġieli eżitaw biex jaqblu dwar miżuri li jnaqqsu l-piżijiet amministrattivi. Pereżempju, proposta għal dikjarazzjoni tal-VAT standard ġiet dilwita u mblukkat mill-Istati Membri fil-Kunsill — b'riskju li jintilfu EUR 15-il biljun fi frankar. L-Istati Membri wkoll ta’ sikwit imorru lil hinn minn dak li huwa strettament meħtieġ mil-leġiżlazzjoni tal-UE meta jimplimentawha fil-livell nazzjonali (“gold-plating"). Dan jista’ jsaħħaħ il-benefiċċji iżda jista’ wkoll iżid l-ispejjeż bla bżonn għan-negozji u l-awtoritajiet pubbliċi li huma b'mod żbaljat assoċjati mal-leġiżlazzjoni tal-UE.
Madankollu, il-Kummissjoni tirrikonoxxi li l-burdata politika ġdida kemm fil-Parlament Ewropew kif ukoll fil-Kunsill tipprovdi l-opportunità għal kulħadd, mhux biss biex jimpenja ruħu mal-prinċipji tar-rikonoxximent, iżda wkoll biex dawn il-prinċipji jinżammu.
Bidla ta' vera sseħħ biss permezz ta’ impenn kondiviż bejn l-istituzzjonijiet kollha tal-UE, u ma’ kull Stat Membru. Il-Kummissjoni qed tipproponi ftehim ġdid mal-Parlament Ewropew u l-Kunsill L-għan huwa li l-partijiet kollha jimpenjaw ruħhom lejn leġizlazzjoni aħjar u biex jaħdmu flimkien aħjar biex b'hekk iċ-ċittadini, in-negozji u s-soċjetà inġenerali jkunu jistgħu jaraw il-benefiċċji tal-UE u fil-ħajja ta’ kuljum tagħhom. Aħna nħarsu lejn ir-regolamentazzjoni aħjar bħala prijorità politika ewlenija — għall-proposti l-ġodda u għal-leġiżlazzjoni eżistenti. Minħabba r-responsabbiltà kondiviża tagħna lejn il-pubbliku ġenerali tal-UE, nappellaw lill-istituzzjonijiet l-oħra biex jagħmlu l-istess, u jaħdmu flimkien magħna niksbu dan.
B’mod partikolari, qed nitolbu lill-Parlament Ewropew u lill-Kunsill biex:
Jipprijoritizzaw l-inizjattivi li jissimplifikaw jew itejbu l-liġijiet eżistenti bħal dawk l-inizjattivi identifikati mill-programm REFIT tal-Kummissjoni biex il-benefiċċji fil-mira jintlaħqu aktar malajr;
Iwettqu valutazzjoni tal-impatt fuq kull emenda sostanzjali li jipproponu l-Parlament Ewropew jew tal-Kunsill matul il-proċess leġiżlattiv. Meta l-Parlament Ewropew u l-Kunsill jilħqu ftehim li jkun differenti b’mod sinifikanti mill-proposta inizjali tal-Kummissjoni, huma għandhom jivvalutaw l-impatt ekonomiku, soċjali u ambjentali probabbli u l-piż regolatorju qabel ma tittieħed kwalunkwe deċiżjoni finali;
Jaqblu li l-leġiżlazzjoni għandha tkun komprenżibbli u ċara, tippermetti lill-partijiet jifhmu faċilment id-drittijiet u l-obbligi tagħhom, tinkludi r-rekwiżiti ta’ rappurtar, monitoraġġ u evalwazzjoni xierqa, tevita spejjeż sproporzjonati u implimentatazzjoni għandha tkun prattika;
Jaqblu li kull istituzzjoni tista' titlob lil bord indipendenti jwettaq valutazzjoni ta’ dawn il-fatturi wara kull emenda sostanszjali fil-proposta tal-Kummissjoni. Tali valutazzjoni għandha tkun finalizzata u disponibbli għall-pubbliku fi żmien raġonevoli u tqis kull ħidma ta' valutazzjoni tal-impatt eżistenti. Kull istituzzjoni taħtar membru tal-bord li jkollu bil-provi l-għarfien espert speċifiku meħtieġ, ma jkollu l-ebda kunflitt ta’ interess u li jaġixxi b’mod indipendenti mill-awtorità tal-ħatra;
Jaqblu li l-leġiżlazzjoni li tkun diġà fis-seħħ tkun ġiet evalwata sew biex wieħed jara jekk jistgħux jintużaw għodod eżistenti biex jintlaħaq l-għan — qabel ma jiġu kkunsidrati inizjattivi ġodda;
Jinkludu b’mod sistematiku f’kull att ġdid dispożizzjonijiet li jippermettu l-monitoraġġ u l-evalwazzjoni fil-ġejjieni;
Iħeġġu lill-Istati Membri biex jevitaw “gold plating” tar-regoli tal-UE meta jittrasponuhom fil-liġi nazzjonali. Filwaqt li dan jista’ jgħin biex jintlaħqu l-objettivi tal-leġiżlazzjoni fil-kuntest lokali jew jimmiraw li jżidu l-benefiċċji, dan jista' wkoll jimponi piżijiet addizzjonali sinifikanti. L-Istati Membri jiġu mistiedna jispjegaw ir-raġunijiet għal tali gold plating;
Jaqblu li jintlaħaq fehim komuni rivedut dwar l-atti delegati, inklużi l-kriterji li jiddelinjaw bejn atti delegati u atti ta’ implimentazzjoni 10 ;
Li jkunu aktar trasparenti u parteċipattiv;
Jimpenjaw ruħhom lejn abbozzar legali aħjar biex il-liġijiet tal-UE jkunu korretti, jinftiehmu, ċari, u konsistenti ħalli kulħadd jifhem id-drittijiet u l-obbligi tiegħu b’ċertezza;
Jippromwonu r-“riformulazzjoni” tal-leġiżlazzjoni, ħalli l-liġijiet jibqgħu ċari u strutturati tajjeb, anki wara li jiġu emendati; kif ukoll
li l-leġiżlazzjoni tal-UE tkun aċċessibbli kemm jista’ jkun: ħalli kullħadd ikun jista’ jara l-leġiżlazzjoni li taffettwah, onlajn, aġġornati, kredibbli, sħaħ u konsolidati.
Il-proposta tal-Kummissjoni għal ftehim interistituzzjonali tipprovdi bażi solida għal negozjati u l-Kummissjoni tittama li t-tliet Istituzzjonijiet ikunu jistgħu jiffinalizzaw ftehim ġdid sal-aħħar tas-sena.
4.Inġeddu l-Istokk Eżistenti tal-Leġiżlazzjoni
Meta wieħed iħares lejn il-benefiċċji u l-kostijiet ma għandux sempliċiment iħares b'mod statiku lejn it-twelid ta’ politika: il-valutazzjoni u l-evalwazzjoni għandhom ikomplu jsiru tul il-ħajja tal-politika biex jiżguraw li tibqa’ adattata għall-għan tagħha. Dan ifisser li wara li politika tkun ġiet implimentata wieħed iħares lura lejn l-impatt li l-politika realment kellha fuq setturi speċifiċi u jissuġġerixxi modi biex iħaffef il-piż mingħajr ma jnaqqas l-ambizzjoni tal-politika. Din l-evalwazzjoni tkun ġeneralment tinvolvi konsultazzjoni pubblika miftuħa.
Għandna nkunu ċari dwar meta jkun hemm riżultati diżappuntanti u konsegwenzi mhux intenzjonati, kemm jekk ekonomiċi, soċjali jew ambjentali. Għandna nkunu lesti nqisu mill-ġdid u ntejbu fejn meħtieġ. Għandna bżonn ukoll nsibu modi ġodda biex jiddiskutu u niftiehmu mal-Parlament Ewropew u l-Kunsill dwar x’ħadem u x’ma ħadimx. Mingħajr dan, ma jistax ikun hemm tentattiv sinifikanti biex titnaqqas il-burokrazija jew biex isiru t-tibdiliet meħtieġa fil-leġiżlazzjoni.
It-tendenza naturali tal-politiċi hija li jiffokaw fuq inizjattivi ġodda. Madankollu, l-UE tiġi ġġudikata mhux biss fuq l-inizjattivi politiċi ġodda, iżda fuq il-benefiċċjui u l-piż tal-leġiżlazzjoni eżistenti tal-UE. Bħala tali, l-immaniġġjar attiv tal-leġiżlazzjoni eżistenti tal-UE huwa daqstant politikament importanti daqs it-tħejjija ta' inizjattivi ġodda.
Matul iż-żmien anke leġiżlazzjoni mfassla tajjeb jista' jgħaddi żmienha, issir ta’ piż akbar milli meħtieġ jew ma tibqax tilħaq l-objettivi tagħha. Pereżempju bidliet fis-suq jistgħu jwasslu biex liġi ma tibqax utli, rilevanti jew iservi l-għan tagħha; Bidliet teknoloġiċi jistgħu joffru l-opportunità li politiku tilħaq l-għan tagħha b’mod aħjar — pereżempju jippermettu li formola tiġi sottomessa onlajn; It-tagħlimiet mill-implimentazzjoni ta' politika permezz ta' monitoraġġ u evalwazzjoni aħjar tista' tipprovdi evidenza ġdida dwar liema hija l-aħjar soluzzjoni politika.
4.1.Il-Programm REFIT — inżommu l-Liġi tal-UE adattata għall-iskop tagħha
Il-Programm dwar l-Idoneità u l-Prestazzjoni tar-Regolamentazzjoni (REFIT) huwa l-programm tal-Kummissjoni li jiżgura li l-leġiżlazzjoni tal-UE tibqa' adattata għall-għan tagħha u li tagħti r-riżultati maħsuba minn min fassal il-liġi tal-UE. Ir-REFIT mhuwiex dwar id-deregolamentazzjoni iżda pjuttost dwar regolamentazzjoni aħjar. Għandha l-għan li tisfrutta l-benefiċċji tal-liġi tal-UE għaċ-ċittadini, għan-negozji u għas-soċjetà sħiħa bl-aktar mod effiċjenti u effettiv, filwaqt li tneħħi l-burokrazija żejda u tnaqqas l-ispejjeż mingħajr ma' tikkomprometti l-objettivi politiċi. Ir-REFIT mhuwiex rieżami ta’ darba: huwa impenn fit-tul biex il-korpus tal-liġi tal-UE jinżamm sempliċi u b’saħħitu.
Ir-REFIT u t-tfassil ta’ politika ambizzjuża jimxu id f’id. Valutazzjonijiet onesti tal-leġiżlazzjoni eżistenti ħafna drabi jservu biex jiġu enfasizzati modi kif jitnaqqas il-piż regolatorju biex titjieb l-implimentazzjoni u jgħollew l-istandards. Huma jistgħu wkoll jidentifikaw sfidi politiċi ġodda li qed jitfaċċaw f’dinja li qed tinbidel b’mod mgħaġġel li leġiżlazzjoni aktar antika ma tkunx attrezzata sew biex tindirizzihom.
Sa mit-tnedija tiegħu fl-2012, ir-REFIT diġà ġibet l-attenzjoni b'mod aktar iffukat fuq sfidi ta' kuljum li jħabbtu wiċċhom magħhom iċ-ċittadini u n-negozji minħabba l-liġi eżistenti tal-UE. Il-progress jiġi mmonitorjat billi tintuża t-tabella ta’ valutazzjoni tar-REFIT: l-aħħar verżjoni ġiet ippubblikata llum. 11 Abbażi ta' dan il-momentum, il-Kummissjoni beħsiebha ssaħħaħ ir-REFIT sabiex tikseb riżultati aħjar u aktar tanġibbli. Ir-REFIT se jkun aktar:
Immirat - billi jiffoka fuq l-aktar sorsi serji ta’ ineffiċjenza u piż mhux meħtieġ;
Kwantitattiv — stimi tal-benefiċċji potenzjali u l-iffrankar tal-ispejjeż se jakkumpanjaw kull proposta REFIT; aġġornament ta’ dawn l-istimi se jiġi ppubblikat wara l-adozzjoni tal-leġiżlazzjoni; u l-Kummissjoni se taħdem flimkien mal-Istati Membri u l-partijiet konċernati biex tivverifika jekk dan il-potenzjal hux qed jissarraf f’impatti reali fir-realtà;
Inklużiv — il-Pjattaforma l-ġdida tar-REFIT se tkun sors imprezzabbli ta’ suġġerimenti biex jitjiebu l-liġijiet tal-UE;
Integrat fit-teħid tad-deċiżjonijiet politiċi — ir-REFIT se jidher b’mod prominenti fil-programm ta’ ħidma ta’ kull sena u fid-djalogu politiku tal-Kummissjoni mal-istituzzjonijiet tal-UE l-oħra qabel u wara l-adozzjoni tal-programm ta’ ħidma.
Ir-REFIT huwa responsabbiltà kondiviża. Il-Kummissjoni tistieden lill-Parlament Ewropew u lill-Kunsill biex jagħtu appoġġ qawwi lil inizjattivi mfassla biex itejbu l-effettività u l-effiċjenza tal-leġiżlazzjoni eżistenti.
4.2.Ir-REFIT fl-azzjoni
Kull inizjattiva futura tar-REFIT se tirrifletti dan l-approċċ imsaħħaħ ġdid, tibbaża fuq ix-xogħol tal-Pjattaforma l-ġdida tar-REFIT u r-riżultati tal-evalwazzjonijiet kontinwi, b’mod partikolari dawk l-evalwazzjonijiet u l-Kontrolli tal-Idoneità identifikati bħala prijoritajiet skont ir-REFIT.
Tagħlimiet minn dawn ir-rieżamijiet se jgħinu jiffurmaw it-tfassil tal-proposti leġiżlattivi futuri. Meta jinstab li l-kostijiet regolatorji jkunu sproporzjonati mal-għanijiet segwiti, se jiġu esplorati approċċi alternattivi biex jinkisbu l-istess għanijiet. Pereżempju, rieżamijiet futuri tar-regoli tal-iskema speċjali tal-VAT għan-negozji ż-żgħar, il-punt uniku ta' kuntatt tad-dwana tal-UE u ż-Żoni b’Fowkus Ekoloġiku jistgħu jwasslu għal iffrankar sinifikanti.
Inizjattivi ġodda u fis-seħħ biex jitnaqqsu l-piżijiet...
Aktar tard din is-sena se jitħabbru għadd ta’ inizjattivi ġodda bħala parti mill-programm ta’ ħidma tal-Kummissjoni. Madankollu, il-Kummissjoni diġà qed taħdem b’mod attiv biex tnaqqas il-piżijiet f’oqsma bħal:
–L-akkwisti pubbliċi: Il-Kummissjoni se tipproponi forma standard għad-dejta biex tindirizza d-diffikultajiet li jiltaqgħu magħhom l-SMEs li jkollhom jimlew dokumentazzjoni twila u kumplessa fl-akkwist pubbliku.
–Statistika tan-negozju: Il-Kummissjoni se tkejjel u toħloq iffrankar tal-ispejjeż għan-negozji permezz tar-Regolament Qafas li Jintegra l-Istatistiki tan-Negozji (Framework Regulation Integrating Business Statistics - FRIBS) u l-Istatistika tas-Suq Uniku (Single Market Statistics - SIMSTAT).
–Leġiżlazzjoni dwar il-Kimiċi: Il-leġiżlazzjoni tal-UE dwar is-sustanzi kimiċi ħolqot iffrankar konsiderevoli għan-negozji li joperaw fis-Suq Uniku. Madankollu, il-kumpaniji żgħar isibuha diffiċli u għali biex jikkonformaw mar-rekwiżiti amministrattivi assoċjati. Il-Kummissjoni se tindirizza dan it-tħassib billi tissimplifika r-regoli għas-sustanzi użati fi kwantitajiet żgħar u billi toħloq pjan ta’ azzjoni biex tgħin lill-SMEs jilħqu l-iskadenza tar-reġistrazzjoni tal-1 ta’ Ġunju 2018 għal dawn il-kwantitajiet. Fl-2015 se jsiru proposti għas-simplifikazzjoni tal-proċedura ta’ awtorizzazzjoni, tnaqqis tal-ammont ta’ informazzjoni meħtieġa u ż-żieda tal-previdibbiltà tal-proċess.
It-tħassir tal-leġiżlazzjoni skaduta...
Barra minn hekk, il-Kummissjoni se tkompli tgħarbel il-leġiżlazzjoni settorjali biex tidentifika u tipproponi t-tħassir ta’ leġiżlazzjoni skaduta li ma għadhiex taqdi l-iskop tagħha jew li hija ta’ piż eċċessiv. Ġew identifikati 23 kandidat biex jitħassru f’diversi oqsma ta’ politika 12 . Fl-oqsma tal-agrikoltura u s-sajd jitwettqu eżerċizzji annwali biex jiġu identifikati atti li għadda żmienhom. Dawn l-aħjar prassi se jiġu estiżi fil-Kummissjoni kollha.
Evalwazzjonijiet u Verifiki tal-Idoneità...
Barra minn hekk, qed jitħejjew rieżamijiet u evalwazzjonijiet komprensivi li jwittu t-triq għal azzjoni futura possibbli f'firxa wiesgħa ta’ politiki u leġiżlazzjoni — pereżempju dwar il-pagamenti tard, il-pestiċidi; l-ikel, in-nutrizzjoni u l-pretensjonijiet tas-saħħa; l-assigurazzjoni tal-vetturi; ir-Regolament tad-Derivattivi tal-UE u r-Regolament dwar ir-Rekwiżiti Kapitali.
Ħidma oħra ta’ evalwazzjoni li qed issir fir-REFIT qiegħda toqrob lejn it-tmiem. B’mod partikolari:
–Il-Kontroll tal-Idoneità tal-liġi tal-ikel ġenerali (ir-Regolament 178/2002) se jevalwa jekk il-prinċipji fundamentali u definizzjonijiet tagħha ġewx implimentati b’mod effettiv u jekk humiex adattati għal dan l-iskop responsabbiltajiet ġodda għall-operaturi, filwaqt li jitqiesu r-regoli u l-istandards stabbiliti mil-leġiżlazzjoni sussegwenti, l-implimentazzjoni tagħhom u l-effetti kumulattivi li jirriżultaw u d-duplikazzjonijiet potenzjali.
–Bħala segwitu għall-evalwazzjoni komprensiva tas-Saħħa u s-Sigurtà fil-Post tax-Xogħol li mistennija titlesta fl-aħħar tal-2015, il-Kummissjoni se tidentifika nuqqasijiet li jeħtieġ li jiġu indirizzati u tiżviluppa miżuri speċifiċi biex itaffi l-piżijiet għall-SMEs u biex tgħinhom jikkonformaw mar-rekwiżiti tal-UE. Se titqies azzjoni possibbli biex titjieb il-koerenza u l-konsistenza bejn il-leġiżlazzjoni dwar is-Saħħa u s-Sigurtà fuq il-Post tax-Xogħol u l-leġiżlazzjoni dwar il-prodotti kimiċi (REACH).
–Bl-istess mod, ir-riżultati tal-Kontroll tal-Idoneità tal-leġislazzjoni tas-sustanzi kimiċi barra mir-REACH (li se jitlesta fl-2016) se jidentifika azzjonijiet possibbli jkomplu jnaqqsu l-piżijiet.
Titjib fl-implimentazzjoni...
It-tnaqqis tal-piż amministrattiv ma jikkonċernax biss tibdil fil-leġislazzjoni. Hemm ħafna modi oħra biex jitjieb il-mod li tiġi implimentata bih il-liġi tal-UE. Pereżempju, il-Kummissjoni se:
–Tniedi rieżami wiesa' tar-rekwiżiti ta’ rappurtar biex tara kif jistgħu jitnaqqsu l-piżijiet. Dan ir-rieżami se jikkonċentra b'mod partikolari fuq oqsma fejn il-partijiet konċernati riċentament għadhom kif indikaw it-tħassib tagħhom, bħall-agrikoltura, l-enerġija, l-ambjent u s-servizzi finanzjarji.
–Nikkooperaw mal-Istati Membri biex neżaminaw l-aħjar modi biex jiżguraw il-konformità mal-liġi tal-UE fil-livell nazzjonali, inklużi dawk li taw bidu għal rieżami ta’ kif ir-regolamentazzjoni tal-UE u tal-Istati Membri jingħaqdu biex jgħinu jipproteġu l-ambjent (bħal fl-inizjattiva “Make it work”). L-objettivi huwa li jiġu identifikati soluzzjonijiet li jtejbu l-applikazzjoni effiċjenti tal-liġi tal-UE fil-livell nazzjonali u lokali billi titnaqqas il-komplessività tagħha filwaqt li jinżamm il-livell ta' protezzjoni tagħha.
–Niffinalizzaw il-ħidma fuq bażi tad-dejta biex nipprovdu ħarsa ġenerali komprensiva u affidabbli tar-rekwiżiti tal-UE u tal-Istati Membri għat-tikkettar tal-ikel biex ngħinu lill-SMEs b’mod partikolari.
–Inkomplu nimmonitorjaw bir-reqqa li d-Direttivi tal-UE jkunu trasposti b'mod ċar, tajjeb u fil-ħin u li r-regoli tal-UE jiġi implimentati u infurzati sew fl-Istati Membri kollha, iġibu ċertezza legali u jħallu liċ-ċittadini u lin-negozji jibbenefikaw mill-opportunitajiet tas-suq uniku.
Is-simplifikazzjoni tal-finanzjament tal-UE...
Fl-aħħar nett, il-Kummissjoni ilha favur is-simplifikazzjoni tal-immaniġġjar tal-fondi tal-UE biex tgħin jiġu mmassimizzati l-benefiċċji ta’ dan il-finanzjament filwaqt li żżomm standards għoljin ta’ immaniġġar finanzjarju. Il-progress fis-simplifikazzjoni jiġi mmonitorjat mit-Tabella ta' Valutazzjoni tas-Simplifikazzjoni Amministrattiva li tiġi ppubblikata regolarment mill-Kummissjoni. 13 Il-kumplessità tar-regoli amministrattivi għall-implimentazzjoni tal-baġit tal-UE, kemm fil-livell tal-Unjoni kif ukoll fil-livell tal-Istati Membri żżid il-burokrazija, id-dewmien, l-ispejjeż tal-kontrolli u l-iżbalji. Is-simplifikazzjoni hija element importanti tal-isforz tal-“baġit tal-UE il-ġdid iffukat fuq ir-riżultati” u l-Kummissjoni se tkompli din il-ħidma, pereżempju fil-qasam ta’:
–Il-Politika Agrikola Komuni, fejn il-Kummissjoni se tissimplifika l-immaniġġjar tal-Organizzazzjoni Komuni tas-Suq b’mod partikolari billi tgħaqqad 200 regolament eżistenti tal-Kummissjoni f’40 att ta’ implimentazzjoni u delegat.
–Il-Fondi Strutturali u ta’ Investiment Ewropej, fejn il-Kummissjoni se tistabbilixxi grupp ta’ livell għoli biex jimmonitorja t-twettiq tas-simplifikazzjoni mill-Istati Membri; tniedi sensiela ta’ studji biex teżamina aktar alternattivi għat-tnaqqis u simplifikazzjoni tal-kostijiet; u toħloq bażi tad-dejta interattiva tat-testi legali u dokumenti ta’ gwida għall-Istati Membri, il-benefiċjarji u l-partijiet konċernati.
–L-implimentazzjoni ta’ Orizzont 2020, fejn qed titħejja t-tieni mewġa ta’ miżuri ta’ simplifikazzjoni għall-Programm Qafas għar-riċerka u l-innovazzjoni.
4.3.Approċċ inklużiv
Il-Kummissjoni se tfittex b’mod attiv l-kontribut tal-partijiet konċernati dwar kif tista' ttejjeb il-leġiżlazzjoni tal-UE.
Flimkien mal-websajt il-ġdida “Ħaffef il-Piż - Semma' Leħnek” deskritta hawn fuq, il-Kummissjoni waqqfet "pjattaforma ġdida tar-REFIT" u dalwaqt se tagħti lin-nies l-opportunità jsemmgħu leħinhom u jipprovdu bażi għal ħidma inklużiva dwar aġenda komuni. Il-pjattaforma se tinvolvi esperti ta’ livell għoli mid-dinja tan-negozju, l-isħab soċjali u s-soċjetà ċivili maħtura permezz ta’ proċess miftuħ u trasparenti kif ukoll esperti mit-28 Stat Membru kollha, il-Kumitat Ekonomiku u Soċjali Ewropew u l-Kumitat tar-Reġjuni. Kull parti konċernata li jkollha tħassib jew suġġerimenti se tkun tista' tippreżenta l-fehmiet tagħha dwar l-impatt tal-liġijiet tal-UE fil-Pjattaforma u tissuġġerixxi kif il-leġiżlazzjoni tista’ tittejjeb. Il-Pjattaforma se tqis dawk is-suġġerimenti, titlob opinjonijiet dwar temi speċifiċi, bħal “l-ostakli għad-diġitalizzazzjoni” jew "għall-innovazzjoni" u tagħmel suġġerimenti konkreti lill-Kummissjoni.
Il-President tal-pjattaforma se jkun l-Ewwel Viċi President tal-Kummissjoni. Il-Kummissjoni se tirreaġixxi għas-suġġerimenti kollha tal-Pjattaforma u se tispjega sistematikament kif biħsiebha tagħti segwitu. Il-Kummissjoni se tistieden lill-Istati Membri biex jagħmlu l-istess f’każijiet fejn is-suġġerimenti jirrigwardaw it-traspożizzjoni u l-implimentazzjoni nazzjonali.
5.Konklużjoni
Din il-Komunikazzjoni tistabbilixxi serje ta’ azzjonijiet li juru l-impenn imġedded tal-Kummissjoni biex tapplika r-Regolamentazzjoni Aħjar fil-ħidma tagħha ta’ kuljum. L-għan huwa li taħdem b’mod aktar trasparenti u b’mod inklussiv biex tipproduċi proposti ta’ kwalità ogħla, u tiżgura li r-regoli eżistenti jagħtu riżultati soċjetali importanti b’mod aktar effettiv.
Madankollu, il-Kummissjoni ma tistax tikseb Regolamentazzjoni Aħjar weħidha. Dan jeħtieġ impenn kondiviż mill-istituzzjonijiet tal-UE kollha, l-Istati Membri u atturi oħrajn bħalma huma l-isħab soċjali. Il-Parlament Ewropew u l-Kunsill għandhom responsabbiltà partikolari li jipproduċu regolamentazzjoni aħjar. Il-Kummissjoni tistedinhom jibdew negozjati malajr fuq il-bażi tal-proposta tal-Kummissjoni għal ftehim interistituzzjonali ġdid — bil-għan li jaslu jiffinalizzawh qabel tmiem l-2015.