This document is an excerpt from the EUR-Lex website
Document 52015DC0158
REPORT FROM THE COMMISSION TO THE EUROPEAN PARLIAMENT, THE COUNCIL AND THE EUROPEAN ECONOMIC AND SOCIAL COMMITTEE Experience gained in the implementation of Directive 2003/122/EURATOM on the control of high-activity sealed radioactive sources and orphan sources
RAPPORT TAL-KUMMISSJONI LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI EWROPEW L-esperjenza miksuba fl-implimentazzjoni tad-Direttiva 2003/122/EURATOM dwar il-kontroll ta' sorsi radjuattivi siġillati ta' attività għolja
RAPPORT TAL-KUMMISSJONI LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI EWROPEW L-esperjenza miksuba fl-implimentazzjoni tad-Direttiva 2003/122/EURATOM dwar il-kontroll ta' sorsi radjuattivi siġillati ta' attività għolja
/* COM/2015/0158 final */
RAPPORT TAL-KUMMISSJONI LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI EWROPEW L-esperjenza miksuba fl-implimentazzjoni tad-Direttiva 2003/122/EURATOM dwar il-kontroll ta' sorsi radjuattivi siġillati ta' attività għolja /* COM/2015/0158 final */
Werrej 1..................... Introduzzjoni. 2 2..................... Sorsi
ssiġillati ta' attività għolja fl-Ewropa.. 3 3..................... Implimentazzjoni
tad-Direttiva 2003/122/Euratom fl-UE-27 3 3.1.................. Introduzzjoni 3 3.2.................. Ħarsa ġenerali dwar
l-implimentazzjoni 4 3.3.................. Oqsma ta' implimentazzjoni
inkonsistenti tad-Direttiva. 4 3.4.................. Oqsma ta' implimentazzjoni
diffiċli tad-Direttiva. 5 3.5.................. Implimentazzjoni tad-Direttiva
mill-Kummissjoni 5 3.6.................. Rakkomandazzjonijiet
għat-titjib fl-implimentazzjoni tad-Direttiva. 6 3.7.................. L-aħjar prattiki
fl-implimentazzjoni tad-Direttiva. 6 4..................... Rekwiżiti
tad-Direttiva 2003/122/Euratom bħala parti mill-Istandards Bażiċi
ta' Sikurezza l-ġodda tal-UE.. 8 4.1.................. Introduzzjoni 8 4.2.................. Armonizzazzjoni regolatorja
mal-IAEA.. 8 4.3.................. Bidliet oħra. 9 5..................... Konklużjonijiet. 9
1.
Introduzzjoni
Wara l-attakki
terroristiċi tal-2001 fl-Istati Uniti, ħafna organizzazzjonijiet
tas-sigurtà nazzjonali esprimew it-tħassib tagħhom li gruppi
terroristiċi jistgħu jużaw is-sorsi radjuattivi bħala arma
biex joħolqu biża' u diżordni pubblika. Kemm l-Aġenzija
Internazzjonali tal-Enerġija Atomika kif ukoll l-Unjoni Ewropea ħadu
azzjoni biex jistabbilixxu qafas legali internazzjonali biex jiżgura
s-sikurezza u s-sigurtà ta' dawn is-sorsi, speċjalment ta' dawk li
għandhom l-ogħla attività. Id-Direttiva 2003/122/Euratom
(id-"Direttiva HASS") [1] daħlet fis-seħħ fil-31 ta'
Diċembru 2003 u l-perjodu ta' promulgazzjoni legali tagħha
spiċċa sentejn wara. Id-Direttiva tistabbilixxi qafas legali biex
jiżgura l-kontroll u s-sigurtà tas-sorsi radjuattivi ssiġillati ta'
attività għolja (HASS) fl-Ewropa u biex jobbliga lill-Istati Membri
jistabbilixxu sistemi li jindividwaw sorsi orfni ta' radjazzjoni u jirkupraw
sorsi radjuattivi li tħallew minn attivitajiet passati. Kull Stat Membru tal-UE
ħatar awtorità kompetenti biex twettaq xogħlijiet skont id-Direttiva
[2,3]. L-Artikolu 14
tad-Direttiva HASS jirrikjedi li l-Kummissjoni tirrapporta dwar l-esperjenza
miksuba fl-implimentazzjoni tad-Direttiva. Twettqet analiżi
tal-implimentazzjoni sabiex tipprovdi ħarsa ġenerali tas-sitwazzjoni
fl-UE dwar (1) il-kontroll tas-sorsi ta' attività għolja li qed jintużaw,
(2) il-ġestjoni tas-sorsi li ma għadhomx jintużaw u (3)
l-istrateġiji għall-immaniġġjar tas-sorsi orfni[1]. L-analiżi hija bbażata fuq
ir-rapporti nazzjonali ta' implimentazzjoni tad-Direttiva HASS magħmula
mill-Istati Membri, fuq il-kwestjonari, l-intervisti u l-missjonijiet ta'
ġbir ta' informazzjoni fost il-partijiet ikkonċernati Ewropej[2].
Ir-riżultati tal-analiżi jindikaw prattiki varjabbli
fl-implimentazzjoni prattika tar-rekwiżiti tad-Direttiva. Xi Stati Membri
għandhom arranġamenti u amministrazzjoni ta' kontroll avvanzati
ħafna tal-HASS, filwaqt li Stati oħra jissodisfaw ir-rekwiżiti
tal-UE b'mezzi amministrattivi pjuttost modesti. Dawn ir-riżultati kienu
mistennija, peress li l-għadd ta' sorsi ssiġillati ta' attività
għolja fl-Istati Membri tal-UE jvarja minn ammont żgħir f'xi
Stati Membri għal diversi eluf fi Stati oħra. B'mod
ġenerali, id-Direttiva HASS ġiet implimentata sew fl-Istati Membri
kollha; l-għanijiet tad-Direttiva ġew issodisfati u ma hemm l-ebda
raġuni biex wieħed jemmen li s-sorsi ssiġillati ta' attività
għolja ma jkunux soġġetti għal kontroll suffiċjenti
fl-Istati Membri tal-UE. Il-qasam l-aktar diffiċli
għall-implimentazzjoni huwa l-organizzazzjoni tal-kampanji ta' tiftix
għas-sorsi orfni possibbli li tħallew minn prattiki passati[3].
Barra minn hekk, hemm xi inkonsistenzi fl-implimentazzjoni tad-definizzjoni
tal-HASS, tas-sigurtà finanzjarja tas-sorsi, tat-taħriġ tal-persunal
potenzjonalment espost u tal-prattiki ta' kontroll tas-sors. Id-Direttiva HASS
tħassret bid-Direttiva 2013/59/Euratom (id-Direttiva l-ġdida dwar
l-Istandards Bażiċi ta' Sikurezza, BSS)[4], li tinkorpora d-dispożizzjonijiet
ewlenin tad-Direttiva u tarmonizzahom mal-gwida tal-IAEA dwar is-sorsi
radjuattivi. L-Istati Membri tal-UE għandhom sas-6 ta' Frar 2018 biex jittrasponu
d-Direttiva l-ġdida dwar l-Istandards Bażiċi ta' Sikurezza
fil-leġiżlazzjoni nazzjonali tagħhom. Matul il-proċess ta'
traspożizzjoni, il-Kummissjoni se tiġbed l-attenzjoni speċifika
tal-Istati Membri għall-oqsma fejn kien hemm diffikultajiet ta'
implimentazzjoni sabiex dawn jingħelbu b'mod aħjar
fil-leġiżlazzjoni ta' traspożizzjoni l-ġdida. Peress li
d-Direttiva l-ġdida dwar l-Istandards Bażiċi ta' Sikurezza ma
tirrekjedix rapport dwar l-implimentazzjoni, dan ir-rapport mhux se jkollu
segwitu. Fi żmien
l-analiżi tal-implimentazzjoni, il-Kroazja ma kinitx Stat Membru tal-UE u
b'hekk ma ġietx inkluża f'dan ir-rapport. Madankollu, id-Direttiva
HASS ġiet trasposta aktar tard fil-leġiżlazzjoni nazzjonali
tal-Kroazja. Għal din ir-raġuni, wara li jkun għadda xi ftit ta'
żmien, ikun xieraq li tiġi analizzata wkoll l-esperjenza tal-Kroazja
fl-implimentazzjoni tad-Direttiva. Għalhekk, il-Kummissjoni hija lesta li
twettaq analiżi fil-Kroazja wara li d-dispożizzjonijiet tad-Direttiva
jkunu ilhom li daħlu fis-seħħ għal tlieta jew erba' snin
f'dan l-Istat Membru.
2.
Sorsi ssiġillati ta' attività għolja
fl-Ewropa
Is-sorsi ssiġillati ta' attività għolja (HASS) huma
kontenituri ta' materjal radjuattiv miġbura f'kapsuli li l-attività
tagħhom hija aktar mil-limitu speċifikat fid-Direttiva
2003/122/Euratom. Dawn jintużaw l-aktar fil-mediċina, fl-ittestjar
mhux distruttiv tal-materjali u għal finijiet ta' sterilizzazzjoni.
In-nuklidi tipiċi tal-HASS huma n-nuklidi b'ħajja twila Co-60, Ir-192,
Sr-90 u Cs-137. Id-detentur tipiku tal-HASS huwa sptar, kumpanija ta' ttestjar
industrijali jew istitut ta' riċerka. Fl-Ewropa hemm xi ftit kumpaniji li
jimmanifatturaw il-HASS, għalkemm ħafna mis-sorsi kummerċjali
joriġinaw mill-Istati Uniti jew mill-Kanada. L-inventarju
Ewropew tal-HASS jinkludi madwar 30 700 sors li 50 % minnhom huwa
rrappreżentat mill-Ġermanja u Franza. Disa' Stati Membri
għandhom inventarju ta' inqas minn 100 HASS. Ħafna minn dawn is-sorsi
użati għall-ittestjar mhux distruttiv huma mobbli u għalhekk
jippreżentaw sfida partikolari għas-sigurtà. Fl-Istati Membri
hemm madwar 3 200 detentur irreġistrat tal-HASS, li minnhom 63 %
huwa rrappreżentat mill-Ġermanja, Franza, il-Polonja u r-Renju Unit.
Tipikament ikun hemm bejn 1 u 40 HASS individwali għal kull detentur (f'xi
każijiet, l-apparat li għandu aktar minn sors wieħed jitqies
bħala sors wieħed). Minħabba
l-attività għolja tagħhom u l-istruttura fiżika tagħhom li
ħafna drabi tkun mobbli, is-sigurtà tal-HASS hija sfida partikolari
għall-awtoritajiet nazzjonali, speċjalment minħabba l-fatt li
l-użu malizzjuż tal-materjal radjuattiv jista' jkollu konsegwenzi
gravi sinifikanti għall-funzjonament tas-soċjetà. Barra minn hekk,
it-telf aċċidentali tal-kontroll tal-HASS jista' jwassal għal
inċidenti ta' esponiment żejjed għar-radjazzjoni jew għal
spejjeż ekonomiċi sinifikanti jekk dan is-sors jinħall fi
proċess għar-riċiklaġġ tar-ruttam tal-metall. Fl-Unjoni Ewropea
seħħew xi inċidenti fejn intilef il-kontroll tal-HASS
irreġistrat jew instab xi HASS mhux irreġistrat. Il-każijiet li
kienu jinvolvu esponiment perikoluż kienu ftit ħafna (inqas minn
għaxra) u dawk li kienu b'intenzjoni malizzjuża kienu ferm inqas.
Huwa stmat li l-inċidenti kriminali kienu jammontaw biss għal
perċentwal żgħir ħafna, jiġifieri għal inqas minn
8 fil-mija tal-inċidenti kollha tas-sors irrappurtati bejn l-2007 u
l-2009. Is-sejbien ta' sorsi radjuattivi jew ta' oġġetti kkontaminati
f'ruttam tal-metall huwa ċertament l-aktar inċident irrappurtat, li
jseħħ f'faċilitajiet ta' ruttam tal-metall u fi fruntieri
nazzjonali waqt l-esportazzjoni tar-ruttam. It-tieni l-aktar avveniment
irrappurtat mill-Istati tal-UE huwa s-sejbien ta' sorsi orfni f'postijiet
pubbliċi, f'miżbliet muniċipali jew fil-bini ta' kumpaniji
falluti.
3.
Implimentazzjoni
tad-Direttiva 2003/122/Euratom fl-UE-27
3.1.
Introduzzjoni
L-Artikolu 14
tad-Direttiva HASS jirrikjedi li sal-31 ta' Diċembru 2010 l-Istati Membri
jirrapportaw dwar l-esperjenza miksuba fl-implimentazzjoni tad-Direttiva. Wara
li rċeviet dan ir-rapport minn kull Stat Membru, il-Kummissjoni wettqet
studju biex tivvaluta l-implimentazzjoni tad-Direttiva. L-istudju kkompleta
l-informazzjoni rrappurtata mill-Istati Membri, ipprovda ħarsa
ġenerali tal-implimentazzjoni u identifika kemm in-nuqqasijiet kif ukoll
l-aħjar prattiki.
3.2.
Ħarsa ġenerali dwar l-implimentazzjoni
Il-Grafika 1
tirrappreżenta ħarsa ġenerali tal-istatus ta' implimentazzjoni
tad-Direttiva HASS fis-27 Stat Membru. Ir-riżultati huma
ppreżentati bħala: punt implimentat (OK), punt li
jeħtieġ l-attenzjoni (PoA) u punt li kellu xi diffikultajiet
biex jiġi implimentat (NOK). L-analiżi tal-grafika turi li
ġeneralment hemm konformità tajba mar-rekwiżiti tad-Direttiva HASS.
L-għanijiet tad-Direttiva ġew issodisfati u ma hemm l-ebda
raġuni biex wieħed jemmen li s-sorsi ta' attività għolja ma
jkunux soġġetti għal kontroll suffiċjenti fl-Istati Membri
tal-UE. Grafika 1. Ħarsa ġenerali
tal-implimentazzjoni tad-Direttiva HASS fis-27 Stat Membru
(OK =Punt implimentat, PoA
= Punt li jeħtieġ l-attenzjoni, NOK = Punt li kellu xi diffikultajiet
biex jiġi implimentat)
3.3.
Oqsma ta' implimentazzjoni inkonsistenti
tad-Direttiva
Għalkemm b'mod ġenerali huma konformi mar-rekwiżiti
tad-Direttiva HASS, ħames suġġetti juru ta' spiss inkonsistenzi
fl-implimentazzjoni: (1) Jidher li fi
12-il Stat Membru hemm inkonsistenzi fl-implimentazzjoni tal-qafas
leġiżlattiv. Tipikament, l-inkonsistenzi jikkonċernaw il-livelli differenti
ta' attività kkunsidrati li jiddefinixxu l-HASS (pereżempju l-livelli
l-ġodda stabbiliti mill-IAEA[5]). Dan jimplika li l-implimentazzjoni tad-definizzjoni
tal-HASS fir-regolamenti nazzjonali ma tkunx kompletament konformi
mad-Direttiva. Barra minn hekk, diversi Stati Membri li jużaw l-istess
definizzjoni ta' HASS bħal dik mogħtija fid-Direttiva HASS,
fil-prattika jqisu l-attività attwali tas-sors meta jimplimentaw
id-dispożizzjonijiet nazzjonali. B'hekk, sors li l-attività tiegħu
tkun niżlet taħt il-livelli ta' attività għolja stabbiliti
fl-Anness I tad-Direttiva, ma jkunx kopert bir-rekwiżiti tad-Direttiva. (2) F'diversi
Stati Membri r-rekwiżiti marbuta mal-kontroll tal-HASS mid-detentur
mhumiex kompletament konsistenti mar-rekwiżiti tad-Direttiva.
Pereżempju, it-testijiet tat-tnixxija tal-HASS ma jsirux b'mod
sistematiku mid-detenturi jew il-programm test li jitwettaq mid-detenturi tas-sors ikun
limitat (issir verifika viżwali biss mingħajr kejl tar-rata
tad-doża). (3) F'għaxar
Stati Membri d-dokumentazzjoni li takkumpanja l-HASS mhix kompletament konformi
mar-rekwiżiti tal-Artikolu 7 tad-Direttiva, li titlob li l-manifattur
jipprovdi ritratt ta' kull tip ta' disinn ta' sors manifatturat u ritratt
tal-kontenitur tipiku tas-sors. Id-dententur għandu jiżgura li kull
sors ikun akkumpanjat b'informazzjoni bil-miktub, li tinkludi ritratti
tas-sors, tal-kontenitur tas-sors, tal-imballaġġ tat-trasport,
tal-apparat u tat-tagħmir, skont il-każ. Barra minn hekk, f'xi Stati
Membri hemm ukoll sorsi storiċi mingħajr numru ta' identifikazzjoni
(ID). (4) Il-punt
prinċipali ta' attenzjoni dwar il-ġestjoni fit-tul tal-HASS
jikkonċerna l-perjodu permess għall-ħżin tal-HASS mhux
użati fil-bini tad-detentur. Id-Direttiva HASS titlob
għat-trasferiment ta' kull sors mhux użat mingħajr dewmien
żejjed wara li ma jibqax jintuża. Madankollu, diversi Stati Membri ma
jiddefinixxux fir-reġim regolatorju tagħhom il-perjodu massimu
għall-ħżin tas-sorsi mhux użati fil-bini tad-detentur, li
warajh isir obbligatorju t-trasferiment. F'xi Stati Membri l-garanzija
finanzjarja għall-ġestjoni sigura fit-tul tas-sorsi mhux użati
tista', f'xi okkażjonijiet, tkun inċerta jew id-detenturi tal-HASS ma
jkunux obbligati jagħmlu arranġamenti xierqa għall-ġestjoni
fit-tul tal-HASS mhux użati matul il-proċess ta' liċenzjar. (5) L-aħħar
suġġett li jeħtieġ attenzjoni huwa t-taħriġ u
l-informazzjoni għall-ħaddiema li jistgħu jiltaqgħu ma' xi
sors orfni. F'erba' Stati Membri dan it-taħriġ ma jsirx, filwaqt li
fi tmien Stati Membri oħra dan it-taħriġ mhux meħtieġ
mir-regolament jew ma jingħatax lill-ħaddiema kollha jew ma jsirx
fil-faċilitajiet kollha fir-riskju jew ma jkunx dokumentat jew ripetut.
3.4.
Oqsma ta' implimentazzjoni diffiċli tad-Direttiva
Rekwiżit wieħed biss mhuwiex implimentat sew f'madwar nofs
l-Istati Membri: l-organizzazzjoni tal-kampanji ta' rkupru tas-sorsi orfni.
Fil-fatt, l-Artikolu 9.4 tad-Direttiva HASS titlob li l-Istati Membri
jiżguraw li l-kampanji jkunu organizzati kif xieraq biex jirkupraw
is-sorsi orfni li jitħallew minn attivitajiet passati. L-organizzazzjoni
ta' dawn il-kampanji rriżultat diffiċli f'14-il Stat Membru għal
raġunijiet differenti. Fi tliet Stati Membri r-rekwiżiti dwar iż-żamma
tar-rekords (l-Artikolu 5) kienu diffiċli biex jiġu implimentati
minħabba li mhux dejjem kien possibbli li l-awtoritajiet jiġu
nnotifikati b'mod dirett dwar il-modifiki tas-sitwazzjoni tal-HASS.
3.5.
Implimentazzjoni tad-Direttiva mill-Kummissjoni
Id-Diretttiva
HASS tillimita r-responsabbiltajiet tal-Kummissjoni għal dawn li
ġejjin: il-Kummissjoni tqiegħed għad-dispożizzjoni l-folja
ta' reġistrazzjoni standard, tista' taġġorna l-informazzjoni
meħtieġa fl-Anness II (l-Artikolu 5) u tippubblika l-lista
tal-awtoritajiet kompetenti u tal-punti ta' kuntatt tal-Istati Membri
(l-Artikolu 13). Il-folja ta' reġistrazzjoni standard li tiddeskrivi
l-informazzjoni meħtieġa għal kull HASS hija disponibbli fuq
il-websajt tal-Kummissjoni[6] u ġiet ippubblikata l-informazzjoni dwar
l-awtoritajiet tal-Istat Membru [2,3]. Sal-lum, il-Kummissjoni għada ma
ħassitx il-ħtieġa li taġġorna l-Anness II u
għalhekk għada ma stabbilietx il-kumitat konsultattiv skont l-Artikolu 17.
3.6.
Rakkomandazzjonijiet għat-titjib
fl-implimentazzjoni tad-Direttiva
Skont l-analiżi tal-promulgazzjoni tad-Direttiva HASS, diversi
rakkomandazzjonijiet jistgħu jiġu indirizzati lill-Istati Membri
sabiex itejbu l-implimentazzjoni tagħha: ·
Il-ħtieġa li
jiġu organizzati kampanji ta' rkupru sistematiċi jew dedikati
għas-sorsi orfni għandha tiġi vvalutata f'dawk l-Istati Membri
li s'issa għadhom ma organizzawx dawn il-kampanji. L-ewwel pass biex
tiġi vvalutata l-ħtieġa ta' kampanja ta' rkupru jkun l-analiżi
tar-reġistri storiċi disponibbli għand l-awtorità u għand
il-manifatturi jew il-fornituri. Waqt l-ispezzjonijiet fil-faċilitajiet
fejn x'aktarx jistgħu jinstabu s-sorsi mhux użati (bħal
sptarijiet, universitajiet, ċentri tar-riċerka, siti militari eċċ),
fil-bini jistgħu jitwettqu investigazzjonijiet iktar bir-reqqa
għat-tiftix ta' sorsi passati li jistgħu jkunu preżenti fis-sit. ·
Biex tiġi
żgurata n-notifika immedjata ta' kull modifika fl-istatus tal-HASS,
il-qafas regolatorju nazzjonali jista' jiddefinixxi d-dewmien massimu ttollerat
ta' xi ftit ġranet li fih l-awtorità rilevanti trid tiġi nnotifikata. ·
Sakemm tiġi trasposta
d-Direttiva l-ġdida dwar l-Istandards Bażiċi ta' Sikurezza li
fiha tiġi rriveduta d-definizzjoni ta' HASS, l-Istati Membri li jużaw
id-definizzjoni ta' HASS mogħtija fid-Direttiva attwali għandhom
japplikaw id-dispożizzjonijiet nazzjonali tagħhom tal-HASS sakemm
is-sors ikun naqas taħt il-livelli ta' eżenzjoni/approvazzjoni u mhux
sakemm l-attività tas-sors tonqos taħt il-livelli ta' attività għolja. ·
It-tip u l-frekwenza tat-testijiet
li jridu jitwettqu mid-detenturi tal-HASS għandhom jiġu ddefiniti
fir-regolament jew skont il-gwida elaborata mill-korp regolatorju. Dawn
it-testijiet għandhom jitwettqu minn persuna kkwalifikata b'kompetenzi
adegwati fir-radjuprotezzjoni. Jekk fost il-persunal tad-detentur tal-HASS ma
jkunx hemm uffiċjal rikonoxxut tar-radjuprotezzjoni, it-testijiet
għandhom jitwettqu minn organizzazzjoni rikonoxxuta ta' appoġġ
tekniku. F'kull każ, id-dokumentazzjoni li tirreġistra
r-riżultati tat-testijiet dwar il-HASS għandha tiġi vverifikata
mill-awtorità waqt l-ispezzjonijiet sabiex tiżgura li dawn twettqu b'mod
effettiv u li d-detentur qies ir-riżultati tat-testijiet. ·
Id-dokumentazzjoni li
takkumpanja l-HASS għandha tiġi kkontrollata matul l-ispezzjonijiet biex
tiġi vverifikata l-kompletezza tagħha fil-konfront tar-rekwiżiti
tad-Direttiva HASS. ·
Sabiex jiġi evitat
ir-riskju tan-nuqqas ta' kontroll tal-HASS mhux użati maħżuna
fil-bini tad-detentur, iż-żmien massimu permessibbli
għall-ħżin qabel it-trasferiment obbligatorju jista' jiġi
stabbilit fir-regolamenti nazzjonali. Il-konformità ma' dan ir-rekwiżit
għandha tiġi kkontrollata matul l-ispezzjonijiet u jekk ikun hemm xi
nuqqas ta' konformità għandhom jittieħdu l-azzjonijiet ta' infurzar
meħtieġa. Biex jiġu evitati s-sitwazzjonijiet mhux mixtieqa,
l-arranġamenti adegwati għall-ġestjoni fit-tul tal-HASS mhux
użati għandhom ikunu prerekwiżit għall-awtorizzazzjoni ta'
kull prattika. ·
Ir-regolamenti nazzjonali
għandhom jinsistu biex jiġu organizzati sessjonijiet ta'
taħriġ biex il-persuni fl-impjanti fejn x'aktarx ikunu jinsabu jew
jiġu proċessati s-sorsi orfni jew f'punti ta' tranżitu nodali
sinifikanti jingħataw taħriġ u informazzjoni xierqa.
Ir-rekwiżit għandu jimponi korsijiet ta' taħriġ
għat-tipi kollha ta' impjanti f'riskju u għaż-żewġ
kategoriji ta' persuni (il-maniġment u l-ħaddiema). Kemm il-kontenut
kif ukoll il-frekwenza tas-sessjonijiet ta' taħriġ għandhom
jiġu ddefiniti jew approvati mill-awtorità rilevanti. Il-programm ta'
taħriġ u informazzjoni għandu jinkludi eżerċizzji
prattiċi, bħad-detezzjoni viżiva tas-sorsi u tal-kontenituri
tagħhom u l-azzjonijiet li għandhom jittieħdu fuq il-post
f'każ ta' detezzjoni jew suspett ta' detezzjoni ta' sors.
3.7.
L-aħjar prattiki
fl-implimentazzjoni tad-Direttiva
Skont l-analiżi tal-livell ta' implimentazzjoni tar-rekwiżiti
tal-HASS fis-27 Stat Membru, jistgħu jiġu identifikati diversi
prattiki tajbin. Hawn taħt hawn eżempji differenti ta' dawn. ·
Il-proċess ta'
liċenzjar huwa pass importanti għall-ġestjoni tal-HASS.
L-għoti ta' awtorizzazzjoni preliminari għal kull prattika li
tikkonċerna HASS tispeċifika pereżempju, li jkunu saru
l-arranġamenti adegwati, inklużi l-garanziji finanzjarji,
għall-ġestjoni fit-tul tal-HASS, anke f'każijiet fejn
id-detentur jew il-fornitur isir insolventi jew ifalli. L-arranġament
fit-tul jeskludi l-ħżin fit-tul tal-HASS mhux użati fil-bini
tad-detentur. L-awtorizzazzjoni tiddeskrivi wkoll it-testijiet li jridu jsiru
mid-detenturi fuq il-HASS u l-frekwenza tagħhom, kif ukoll is-sessjonijiet
ta' taħriġ li se jiġu organizzati għall-ħaddiema
esposti u kemm il-darba dawn se jiġu ripetuti. ·
Sabiex l-awtorità
tiġi nnotifikata fil-pront dwar kull bidla fl-istatus tal-HASS, id-dewmien
massimu ttollerat ta' ftit ġranet irid jiġi ddefinit fir-regolamenti
nazzjonali li jippromulgaw id-Direttiva HASS. ·
L-awtoritajiet kompetenti
nazzjonali jwettqu spezzjonijiet imħabbra u għall-għarrieda biex
jivverifikaw kemm il-kwistjonijiet ta' sikurezza kif ukoll ta' sigurtà.
L-ispezzjonijiet għandhom l-għan li jivverifikaw li d-detentur
iżomm ir-reġistri kollha tal-HASS biex jikkontrolla li l-informazzjoni
nnotifikata lill-awtorità tkun korretta. Tiġi vverifikata wkoll
id-dokumentazzjoni li takkumpanja s-sors. Waqt l-ispezzjonijiet jiġu
vverifikati r-reġistri dwar l-ittestjar tal-HASS u dwar
it-taħriġ tal-persunal tad-detenturi tal-HASS. Barra minn dawn
il-verifiki fuq id-dokumenti, l-ispetturi jwettqu wkoll spezzjonijiet
viżivi tas-sorsi u kejl, li jippermettulhom jivvalutaw l-integrità
tas-sors u l-użu korrett tiegħu. ·
Il-programm ta'
taħriġ tal-persunal tad-detentur tal-HASS huwa ddefinit jew approvat
mill-awtorità u l-frekwenza tar-repetizzjoni hija stabbilita f'intervall ta'
żmien raġonevoli (bħal pereżempju, kull sena). Il-korsijiet
ta' taħriġ huma rreġistrati u jiġu organizzati wkoll
testijiet tal-komprensjoni. Ir-reġistri dwar it-taħriġ jiġu
kkontrollati waqt l-ispezzjonijiet. ·
Id-Direttiva HASS
tirrikjedi li d-detenturi tas-sorsi jirritornaw mingħajr dewmien
żejjed kull sors mhux użat lill-fornitur, iqiegħduh f'impjant
rikonoxxut jew jittrasferixxuh għand detentur awtorizzat ieħor,
dejjem jekk l-awtorità kompetenti ma tkunx ftiehmet mod ieħor. Peress li
d-Direttiva ma tiddefinix b'mod preċiż il-frażi
"mingħajr dewmien żejjed", il-perjodu ta' qabel
it-trasferiment obbligatorju jvarja ħafna bejn Stat Membru u ieħor,
minn inqas minn sena għal diversi snin jew għal perjodu ta'
żmien mhux iddefinit. L-aħjar prattika hi li l-perjodu massimu
raġonevoli għat-tneħħija tas-sorsi mhux użati
mill-bini tal-utenti jiġi ddefinit f'regolament, pereżempju jiġi
stabbilit massimu ta' sentejn. Id-dispożizzjonijiet ta' teħid lura ma
jiżgurawx it-tneħħija effettiva tas-sorsi mhux użati
mill-bini tad-detenturi, iżda hemm bżonn ta' arranġamenti
finanzjarji, bħal depożiti ta' flus mid-detenturi jew mill-fornituri.
Dawn l-arranġamenti, li għandhom jiġu ffinanzjati mill-komunità
tal-utenti tas-sors, huma wkoll disponibbli għall-ġestjoni fit-tul
tal-HASS mhux użati trasferiti f'faċilità ta' ħżin
rikonoxxuta. Jekk it-trasferiment tal-HASS mhux użati f'faċilità ta'
ħżin rikonoxxuta tkun waħda mill-għażliet ta'
ġestjoni fit-tul, l-Istat Membru jipprovdi għal aċċess
għal faċilità li jkollha kapaċità suffiċjenti. ·
L-istabbiliment u
l-promulgazzjoni ta' dispożizzjonijiet speċifiċi li jirregolaw
is-sigurtà u l-protezzjoni fiżika tal-HASS hija prattika tajba oħra
osservata f'diversi Stati Membri. Ir-rekwiżiti ta' sigurtà huma
bbażati fuq approċċ iggradat, li jqis ir-riskju maħluq
mis-sorsi. ·
Biex jiġu evitati
l-inċidenti bis-sorsi orfni, l-Istat Membru jidentifika postijiet
strateġiċi fejn x'aktarx jinstabu jew fejn dawn jistgħu
jidħlu fil-pajjiż. Barra minn hekk, l-awtorità regolatorja timponi li
f'dawn il-postijiet jiġi installat tagħmir ta' detezzjoni u
monitoraġġ. Qed jiġu organizzati kampanji ta' rkupru tas-sorsi
orfni, speċjalment f'impjanti qodma jew eks impjanti fejn is-sustanzi radjuattivi
kienu jew għadhom jintużaw. Il-piż finanzjarju
għall-irkupru u l-ġestjoni tas-sorsi orfni mhuwiex appoġġat
mill-komunità permezz tal-baġit tal-Istat iżda jiġġarrab
mill-komunitajiet tal-utenti tas-sors ikkonċernati. Il-proċeduri ta'
rispons u ta' twissija għall-impjanti fejn x'aktarx jistgħu jinstabu
s-sorsi orfni huma approvati mill-awtorità u jiġu organizzati
eżerċizzji biex jittestjawhom. ·
Il-maniġers u
l-ħaddiema li jistgħu jiltaqgħu ma' sors orfni fit-tipi kollha
ta' impjanti f'riskju, jitħarrġu b'mod regolari f'konformità
mar-rekwiżiti tar-regolamenti nazzjonali. Il-kontenut tal-kors ta'
taħriġ ikun definit jew approvat mill-awtorità, li tiżgura li
s-sessjonijiet jiġu ddokumentati u mogħtija effettivament. Jiġi
evalwat il-fehim ta' dawk li qed jitħarrġu. Biex jiżdied
l-għarfien tal-persuni li jistgħu jiltaqgħu mas-sorsi orfni,
l-awtorità torganizza sessjonijiet ta' informazzjoni u tiżviluppa gwidi,
dokumentazzjoni, films edukattivi, posters, eċċ.
4.
Rekwiżiti tad-Direttiva 2003/122/Euratom
bħala parti mill-Istandards Bażiċi ta' Sikurezza l-ġodda
tal-UE
4.1.
Introduzzjoni
Id-Direttiva
2013/59/Euratom [4] l-ġdida dwar l-Istandards Bażiċi ta'
Sikurezza (BSS) ġiet adottata fil-5 ta' Diċembru 2013. Apparti milli
taġġorna d-Direttiva BSS attwali [5], id-Direttiva l-ġdida
tinkorpora u taġġorna r-rekwiżiti ta' ħames Direttivi
eżistenti oħra, fosthom id-Direttiva HASS. Id-Direttiva BSS
il-ġdida tqis l-aħħar gwida tal-ICRP[7] u l-Istandards Internazzjonali
Bażiċi ta' Sikurezza l-ġodda abbozzati mill-IAEA. L-Istati
Membri tal-UE għandhom erba' snin (sas-6 ta' Frar 2018) biex jippromulgaw
id-Direttiva l-ġdida fil-leġiżlazzjonijiet nazzjonali
tagħhom. Fid-Direttiva BSS
il-ġdida hemm kapitoli differenti dwar il-kontroll ta' sorsi
ssiġillati u dwar is-sorsi orfni. Dawn il-kapitoli jinkludu
d-dispożizzjonijiet tad-Direttiva HASS attwali, bi ftit modifiki
sinifikanti li huma mniżżlin hawn taħt.
4.2.
Armonizzazzjoni regolatorja mal-IAEA
Sabiex
tinħoloq sistema ta' kontroll regolatorju għas-sorsi ssiġillati
ta' attività għolja, hemm bżonn li jiġi definit livell ta'
attività speċifiku tan-nuklidi, li meta dan jinqabeż is-sors jibda
jiġi kkontrollat bħala HASS. Meta ġiet abbozzata d-Direttiva
HASS il-valuri ta' attività ddefiniti għar-regolamenti tat-trasport
tal-IAEA[8] (A1-valuri diviżi b'100)
intagħżlu bħala bażi għad-definizzjoni tal-HASS. Aktar
tard l-IAEA żviluppat il-valuri-D[9] biex tiddefinixxi sors "perikoluż" u
użathom bħala bażi għas-sistema ta' kategorizzazzjoni
tas-sorsi tagħha, li waslet għal definizzjonijiet differenti ta' sors
fid-Direttiva HASS u fil-Kodiċi ta' Kondotta tal-IAEA dwar is-Sikurezza u
s-Sigurtà ta' Sorsi Radjuattivi (CoC)[10]. Il-BSS il-ġdida tal-UE tneħħi din
id-diskrepanza billi tadotta l-valuri-D tal-IAEA bħala bażi
għad-definizzjoni tal-HASS. Dan ifisser li s-sorsi tal-Kategoriji 1, 2 u 3
tal-IAEA huma meħtieġa biex ikunu kkontrollati bħala HASS fl-UE.
Ir-reviżjoni
saret minħabba li diversi awtoritajiet tal-Istati Membri tal-UE indikaw li
meta fil-livell internazzjonali jkun hemm żewġ definizzjonijiet differenti
tal-HASS tinħoloq sitwazzjoni problematika. Peress li d-Direttiva HASS u
l-Kodiċi ta' Kondotta tal-IAEA għandhom għanijiet simili, dawn
għandhom jiġu applikati fuq l-istess grupp ta' sorsi. Barra minn
hekk, bħala prinċipju, l-IAEA u l-UE għandhom ifittxu
l-armonizzazzjoni tal-istandards internazzjonali. Inħass ukoll
li, għal ħafna nuklidi, il-livelli ta' attività tad-Direttiva HASS
kienu pjuttost baxxi, għalhekk mhux is-sorsi kollha tal-HASS "jfissru
possibbiltà konsiderevoli ta' riskju għas-saħħa tal-bniedem u
għall-ambjent", kif huwa indikat fil-premessi tad-Direttiva,
filwaqt li l-bażi xjentifika għall-valuri-D tal-IAEA hija soda u, sa
ċertu punt, ikkonfermata bil-valuri tad-dożi attwali li nstabu
f'każijiet reali ta' inċidenti tas-sors. Din l-armonizzazzjoni
tfisser li l-awtoritajiet tal-Istati Membri se jkollhom jadattaw il-limiti
nazzjonali tagħhom skont dan. Barra minn hekk, peress li l-valuri-D huma
fil-biċċa l-kbira ogħla mill-valuri ddefiniti mid-Direttiva HASS
(A1/100), il-bidla se tinvolvi t-tnaqqis tar-rekwiżiti
għall-maġġoranza tan-nuklidi (it-tneħħija volontarja
ta' xi sorsi mir-reġistri HASS). Fil-prattika, l-għadd ta' sorsi li
ma jaqgħux fid-definizzjoni antika u f'dik ġdida huwa żgħir
ħafna, peress li l-biċċa l-kbira tas-sorsi HASS reġistrati
għandhom attivitajiet ferm ikbar mil-limitu ta' attività stabbilit
mid-Direttiva BSS il-ġdida. Fil-każ ta' erba' nuklidi[11] l-limitu ta' attività l-ġdid huwa aktar
baxx minn dak tal-limitu l-qadim; għal dawn in-nuklidi d-Direttiva BSS
il-ġdida timplika kontroll regolatorju aktar strett. Bidla oħra
importanti fid-definizzjoni tal-HASS hija li issa d-definizzjoni tirreferi
għall-attività attwali u mhux għall-attività waqt il-manifattura jew
waqt it-tqegħid fis-suq. Dan ifisser li meta l-attività tas-sors tonqos
taħt il-valur-D, is-sors jista' jitneħħa mir-reġistru
tal-HASS u m'hemmx għalfejn jibqa' jiġi kkontrollat bħala HASS. Ta' min jinnota li
d-Direttiva tistabbilixxi standard minimu. L-Istati Membri huma liberi li
jistabbilixxu rekwiżiti iktar ristrettivi fir-regolamenti nazzjonali
tagħhom.
4.3.
Bidliet oħra
Bidliet oħra
relatati mas-sors li ġew introdotti mill-BSS il-ġdida tal-UE
jirriflettu l-esperjenza miksuba mill-applikazzjoni tad-Direttiva HASS u
l-feedback riċevut mill-avvenimenti riċenti ta' kontaminazzjoni u
sorsi radjuattivi. Il-bidliet l-aktar sinifikanti huma deskritti hawn
taħt: ·
Id-definizzjonijiet
għas-sorsi ssiġillati u l-kontenituri tas-sors ġew kemxejn
modifikati. ·
Hemm rekwiżiti
ġodda għas-sitwazzjonijiet li jinvolvu l-kontaminazzjoni tal-metalli.
Impjant għar-riċiklaġġ tar-ruttam tal-metall huwa obbligat
li jinnotifika lill-awtorità kompetenti jekk hemm suspett jew ġie
mgħarraf bit-tidwib jew bil-proċess metallurġiku ta' sors orfni.
Dan għandu jirrikjedi li l-materjali kontaminati ma jintużawx, ma
jitqegħdux fis-suq jew ma jintremewx mingħajr l-involviment
tal-awtorità kompetenti. L-Istati Membri għandhom iħeġġu
l-istabbiliment ta' sistemi li jindividwaw il-preżenza ta' kontaminazzjoni
radjuattiva fi prodotti tal-metall importati minn pajjiżi terzi,
f'postijiet bħal impjanti kbar ta' importazzjoni tal-metall u punti ta'
tranżitu nodali sinifikanti. ·
L-Istati Membri huma
mitluba jiżguraw li l-maniġment tal-impjanti fejn x'aktarx jinstabu
jew jiġu proċessati s-sorsi orfni, inklużi l-impjanti l-kbar
għar-ruttam tal-metall u l-impjanti l-kbar
għar-riċiklaġġ tar-ruttam tal-metall, u f'punti ta'
tranżitu nodali sinifikanti, ikunu mgħarrfa bil-possibbiltà li
jiltaqgħu ma' xi sors. Jekk il-ħaddiema jiltaqgħu ma' sors, dawn
iridu jingħataw pariri u jiġu mħarrġa fid-detezzjoni
viżwali tas-sorsi u tal-kontenituri tagħhom, ikunu infurmati
bil-fatti bażiċi dwar ir-radjazzjoni jonizzanti u jkunu infurmati u
mħarrġa fl-azzjonijiet li jridu jittieħdu fuq il-post f'każ
ta' detezzjoni jew suspett ta' detezzjoni ta' sors. ·
Il-folja ta'
reġistrazzjoni HASS (l-Anness XIV tad-Direttiva BSS) ġiet imtejba
billi ġiet aġġornata t-terminoloġija u tneħħew
l-inkonsistenzi li jidhru fil-folja ta' reġistrazzjoni tad-Direttiva HASS.
·
Hemm rekwiżiti
ġenerali ġodda għal sorsi mhux issiġillati. L-Istati Membri
għandhom jiżguraw li jsiru arranġamenti biex jinżamm
il-kontroll ta' sorsi mhux issiġillati rigward il-post, l-użu u
r-riċiklaġġ jew ir-rimi tagħhom. Barra minn hekk, l-Istati
Membri għandhom jirrikjedu li l-impriża żżomm, kif ikun
xieraq u sa fejn ikun possibbli, reġistru tas-sorsi mhux issiġillati
li jkun taħt ir-responsabbiltà tagħha. L-Istati Membri għandhom
jirrikjedu li kull impriża li jkollha sors mhux issiġillat ta' radjuattività
tinnotifika mill-ewwel lill-awtorità kompetenti bi kwalunkwe telf, serq, tixrid
sinifikanti jew użu jew rilaxx mhux awtorizzat.
5.
Konklużjonijiet
Id-Direttiva HASS
ġiet implimentata sew fl-UE, għalkemm għad hemm differenzi
sinifikanti fil-prattiki ta' implimentazzjoni fost l-Istati Membri tal-UE.
L-għadd baxx ta' inkjesti relatati mal-HASS li l-Kummissjoni wettqet matul
is-snin huwa sinjal li r-rekwiżiti tad-Direttiva ġew mifhuma sew u
aċċettati. Id-Direttiva
2003/122/Euratom tħassret, b'effett mis-6 ta' Frar 2018, bid-Direttiva
2013/59/Euratom li tinkorpora d-dispożizzjonijiet ewlenin tad-Direttiva u
tarmonizzahom mal-gwida tal-IAEA dwar is-sorsi radjuattivi. L-Istati Membri
tal-UE għandhom sas-6 ta' Frar 2018 biex jittrasponu d-Direttiva
l-ġdida dwar l-Istandards Bażiċi ta' Sikurezza fil-leġiżlazzjoni
nazzjonali tagħhom. Id-Direttiva l-ġdida dwar l-Istandards
Bażiċi ta' Sikurezza tirrappreżenta reviżjoni importanti
tal-qafas legali kollu tal-UE dwar il-protezzjoni mir-radjazzjoni. Il-kapitoli
dwar il-HASS joqogħdu sew f'dan il-qafas, peress li d-Direttiva HASS
ġiet aċċettata sew mill-Istati Membri tal-UE u ma kienx hemm
bżonn ta' modifiki kbar fil-kontroll tal-HASS, għalkemm id-Direttiva
BSS il-ġdida tikkoreġi diversi nuqqasijiet tad-Direttiva HASS. B'mod
partikolari, l-armonizzazzjoni miksuba mar-regolamenti tal-IAEA tqiegħed
lill-Istati Membri tal-UE f'pożizzjoni tajba biex jissodisfaw
ir-rekwiżiti kemm tal-UE kif ukoll tal-Aġenzija Internazzjonali
tal-Enerġija Atomika dwar il-kontroll tas-sorsi ssiġillati ta'
attività għolja u tas-sorsi orfni. Il-Kummissjoni
tħeġġeġ lil kull Stat Membru biex iqis il-kontenut ta' dan
ir-rapport, speċjalment tal-aħjar prattiki identifikati, meta
jabbozzaw mill-ġdid ir-regolamenti u l-gwida nazzjonali dwar is-sikurezza
u s-sigurtà ta' sorsi radjuattivi u b'hekk jissodisfaw l-obbligu li tiġi
trasposta d-Direttiva 2013/59/Euratom il-ġdida. Il-pubblikazzjoni
tal-Kummissjoni RP 179 tas-serje dwar il-Protezzjoni mir-Radjazzjoni,
tippreżenta ħarsa ġenerali aktar iddettaljata tas-sitwazzjoni
tal-HASS fl-Ewropa u tiddeskrivi wkoll l-arranġamenti korrispondenti
fil-Kanada u fl-Istati Uniti. Referenzi [1] Id-Direttiva tal-Kunsill 2003/122/Euratom
tat-22 ta' Diċembru 2003 dwar il-kontroll ta' sorsi radjuattivi
siġillati ta' attività għolja, ĠU L 346, 31.12.2003, p. 57. [2] Il-Komunikazzjoni mill-Kummissjoni dwar
l-awtoritajiet kompetenti msemmija fid-Direttiva tal-Kunsill 2003/122/EURATOM
dwar il-kontroll ta' sorsi radjuattivi ssiġillati b'attività għolja u
sorsi orfni, ĠU C 122/2, 27.4.2013, p. 2. [3] Il-Komunikazzjoni mill-Kummissjoni dwar
l-awtoritajiet kompetenti msemmija fid-Direttiva tal-Kunsill 2003/122/EURATOM
dwar il-kontroll ta' sorsi radjuattivi ssiġillati b'attività għolja u
sorsi orfni, ĠU C 347/02, 28.11.2013, p. 2. [4] Id-Direttiva tal-Kunsill 2013/59/Euratom tal-5
ta' Diċembru 2013 li tistabbilixxi standards bażiċi ta'
sikurezza għal protezzjoni kontra l-perikli li jirriżultaw minn
esponiment għal radjazzjoni jonizzanti, u li tħassar id-Direttivi
89/618/Euratom, 90/641/Euratom, 96/29/Euratom, 97/43/Euratom u
2003/122/Euratom, ĠU L 13/1, 17.1.2014, p. 1. [5] Id-Direttiva tal-Kunsill 96/29/EURATOM tat-13
ta' Mejju 1996 li tistabbilixxi standards bażiċi ta' sigurtà
għall-ħarsien tas-saħħa tal-ħaddiema u l-pubbliku
ġenerali kontra l-perikli li jiġu minn radjazzjoni jonizzanti,
ĠU L 159, 29.6.1996. p. 1. [1] Is-sors orfni huwa sors radjuattiv li mhuwiex taħt kontroll
regolatorju. [2] Aktar informazzjoni ddettaljata dwar is-sitwazzjoni tal-HASS
fl-Istati tal-UE, l-Istati Uniti u l-Kanada hija disponibbli fil-pubblikazzjoni
tal-Kummissjoni Radiation Protection Nru 179 bl-isem ta' "Study on
the current status of radioactive sources in the EU, on the origin and
consequences of loss of control over radioactive sources and on successful
strategies concerning the detection and recovery of orphan sources"
(Studju dwar l-istatus attwali tas-sorsi radjuattivi fl-UE, dwar l-oriġini
u l-konsegwenzi tan-nuqqas ta' kontroll fuq is-sorsi radjuattivi u dwar
l-istrateġiji ta' suċċess li jikkonċernaw id-detezzjoni u
l-irkupru tas-sorsi orfni), 2014. [3] Id-Direttiva tirrikjedi li l-Istati Membri jorganizzaw kampanji
ta' tiftix għas-sors orfni "kif xieraq", biex b'hekk ikun hemm
lok għat-teħid ta' deċiżjonijiet nazzjonali dwar
il-ħtieġa li jiġu organizzati dawn il-kampanji. [4] L-Artikolu 107 tad-Direttiva l-ġdida dwar l-Istandards
Bażiċi ta' Sikurezza, b'effett mis-6 ta' Frar 2018 [5] Standards ta' Sikurezza tal-IAEA għall-ħarsien
tan-nies u tal-ambjent, Kategorizzazzjoni tas-sorsi radjuattivi, Nru RS-G-1.9,
l-Aġenzija Internazzjonali tal-Enerġija Atomika, 2005 [6] http://ec.europa.eu/energy/en/topics/nuclear-energy/radiation-protection/control-other-radioactive-sources [7] Il-Kummissjoni Internazzjonali dwar il-Protezzjoni Radjoloġika [8] Regolamenti għat-Trasport Sikur ta' Materjal Radjuattiv,
Serje ta' Standards tas-Sikurezza, Rekwiżiti tas-Sikurezza Nru TS-R-1,
l-Aġenzija Internazzjonali tal-Enerġija Atomika, Vjenna, 2009. [9] "Dangerous quantities of radioactive material
(D-values)" (Kwantitajiet perikolużi ta' materjal radjuattiv) (EPR-D-VALUES
2006), l-Aġenzija Internazzjonali dwar l-Enerġija Atomika, 2006. [10] Kodiċi ta' Kondotta dwar is-Sikurezza u s-Sigurtà ta' Sorsi
Radjuattivi, l-Aġenzija Internazzjonali tal-Enerġija Atomika, Vjenna,
2004. [11] Po-210, Pu-238, Cm-244 u Am-241