52014PC0366

MEMORANDUM TA’ SPJEGAZZJONI

Ir-regoli li japplikaw għall-kontribuzzjonijiet finanzjarji mill-Fond Ewropew ta’ Aġġustament għall-Globalizzazzjoni huma stipulati fir-Regolament (KE) Nru 1309/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) 1927/2006 [1].

TAQSIRA TAL-APPLIKAZZJONI U TAL-ANALIŻI

Dejta ewlenija:

Nru ta’ Referenza tal-FEG                                                                                  EGF/2014/000

Il-Kummissjoni Ewropea                                                                                Għajnuna teknika

Nefqa amministrattiva: baġit f'EUR                                                                              330 000

% ta' nefqa amministrattiva (limitu: 0,5 %)                                                                     0,21 %

Skont l-Artikolu 11(1) tar-Regolament (UE) Nru 1309/2013, fuq l-inizjattiva tal-Kummissjoni kull sena jista' jiġi allokat 0,5 % tal-ammont annwali massimu tal-FEG għall-għajnuna teknika.

Għajnuna teknika li se tiġi ffinanzjata u rendikont tal-ispejjeż stmati tagħha

1.           Il-kontribuzzjoni se tintuża għan-nefqa msemmija fl-Artikolu 11(1) u (4) kif ukoll fl-Artikolu 12(2), (3) u (4) tar-Regolament (UE) Nru 1309/2013, kif spjegat hawn taħt. Ta’ min jinnota li fl-2014 in-nefqa tnaqqset sal-minimu għaliex il-fondi mhumiex se jingħaddew fil-linja baġitarja tal-FEG rilevanti qabel ma l-Parlament Ewropew jerġa' jibda jiltaqa' wara l-waqfa minħabba l-elezzjoni.

2.           Monitoraġġ u ġbir ta’ dejta: Il-Kummissjoni se tiġbor id-dejta dwar l-applikazzjonijiet li jkunu waslulha, dwar dawk imħallsa u dawk ta’ stralċ, kif ukoll dwar il-miżuri proposti u implimentati. Din id-dejta se titqiegħed fis-sit elettroniku u se tkun fl-għamla ta’ ritratt statistiku (Statistical Portrait) aġġornat. B'mod li wieħed ikompli jibni fuq ix-xogħol ta’ dawn l-aħħar snin, il-biċċa l-kbira ta’ dan jista’ jsir bir-riżorsi amministrattivi normali tal-Kummissjoni, iżda biex jitjiebu u jiġu żgurati l-funzjonalitajiet tal-bażi tad-dejta tal-FEG skont is-sejbiet tal-Awditjar Intern tal-Kummissjoni se jkun meħtieġ xi ftit tal-għarfien espert estern. Hu stmat li l-ispiża għal dawn l-azzjonijiet tiswa EUR 20,000.

3.           Informazzjoni: Is-sit dwar il-FEG[2], li l-Kummissjoni waqqfet fil-qasam tagħha tal-Impjiegi, l-Affarijiet Soċjali u l-Inklużjoni, u li qed tieħu ħsiebu skont kif mitlub mill-Artikolu 12(2) tar-Regolament (UE) Nru 1309/2013, se jkun aġġornat u mkabbar b’mod regolari, u kull element ġdid se jkun tradott ukoll fil-lingwi kollha tal-UE. Se tingħata informazzjoni dwar ir-Regolament tal-FEG il-ġdid, u se tingħata wkoll il-gwida meħtieġa. Se jiġi inkoraġġit l-għarfien ġenerali tal-FEG u anki l-viżibilità tiegħu. Se jiġi stampat għadd żgħir tal-valutazzjoni ex-post tal-FEG u jkun disponibbli flimkien ma’ pubblikazzjoni onlajn. Il-FEG se jiġi ttrattat f'diversi pubblikazzjonijiet u attivitajiet awdjoviżivi tal-Kummissjoni kif previst fl-Artikolu 11(4) tar- Regolament (UE) Nru 1309/2013. Hu stmat li fl-2014 l-ispejjeż ta’ dawn l-azzjonijiet kollha se jkunu ta' EUR 20 000 u dan minħabba l-limitazzjonijiet ta’ żmien u huma mistennija jiżdiedu b’mod sinifikanti fl-2015.

4.           Il-ħolqien ta' bażi tal-għarfien / interfaċċja tal-applikazzjoni: Il-Kummissjoni għadha għaddejja bil-ħidma tagħha bil-ħsieb li toħloq formola elettronika għall-applikazzjoni u tistabbilixxi proċeduri standardizzati għall-applikazzjonijiet tal-FEG; dan se jippermetti li l-applikazzjonijiet fil-kuntest tar-Regolament il-ġdid ikunu ssimplifikati, li l-ipproċessar tagħhom jitħaffef u r-rapporti jinħarġu aktar faċilment skont il-bżonnijiet varji. Għadhom għaddejjin tħejjijiet bil-għan li l-FEG jiġi integrat fis-SFC. L-istandardizzazzjoni tar-rapporti finali għadha għaddejja wkoll, bl-għan li tnaqqas il-piż amministrattiv tal-Istati Membri.

Hu stmat li dawn l-azzjonijiet jiġu jiswew EUR 100 000.

5.           Għajnuna amministrattiva u teknika: Il-Grupp ta' Esperti tal-Persuni ta' Kuntatt tal-FEG, b’membru wieħed minn kull Stat Membru, se jkun qed isejjaħ żewġ laqgħat (fi tmiem l-2014 / l-ewwel nofs tal-2015), u li flimkien huma stmati li se jiswew EUR 70 000.

6.           Barra minn hekk, il-Kummissjoni se torganizza netwerking fost l-Istati Membri, b’żewġ seminars ta’ korpi ta’ implimentazzjoni tal-FEG fl-Istati Membri bejn wieħed u ieħor fl-istess dati, u fejn se tkun qed tiffoka fuq kwistjonijiet relatati mal-interpretazzjoni tar-Regolament il-ġdid tal-FEG, b’mod partikolari rigward l-inklużjoni possibbli ta’ NEETs fil-miżuri. L-ispiża għal dan hi stmata li se tkun ta' EUR 120 000.

7.           Evalwazzjoni: Mhux se jkun hemm għalfejn jingħataw fondi għall-evalwazzjonijiet fl-2014. L-akkwist pubbliku għall-evalwazzjoni ta’ nofs it-terminu se jiġi varat fl-2015, bil-ħsieb li l-evalwazzjoni titlesta sat-30 ta’ Ġunju 2017, kif mitlub mill-Artikolu 20(1)(a) tar-Regolament (UE) 1309/2013.

Azzjonijiet || Għadd stmat || Stima tal-ispiża għal kull azzjoni (f'EUR) || Spejjeż totali (f'EUR)

Monitoraġġ u ġbir ta’ dejta || Varji || Varji || 20 000

Attivitajiet ta' informazzjoni || Varji || Varji || 20 000

Ħolqien ta' bażi ta' għarfien / interfaċċja tal-applikazzjoni || Varji || Varji || 100 000

Għajnuna amministrattiva u teknika: Laqgħat tal-Grupp ta' Esperti tal-Persuni ta' Kuntatt tal-FEG || 2 || 35 000 || 70 000

Għajnuna amministrattiva u teknika: Seminars ta' netwerking dwar l-implimentazzjoni tal-FEG || 2 || 60 000 || 120 000

Evalwazzjoni || 0 || 0 || 0

Total tal-istima tal-ispejjeż || || 330 000

Finanzjament

8.           Il-baġit massimu annwali għall-FEG hu EUR 150 miljun (prezzijiet tal-2011), kif stipulat fl-Artikolu 12 tar-Regolament tal-Kunsill (UE, Euratom) Nru 1311/2013 tat-2 ta' Diċembru 2013 li jistabbilixxi l-qafas finanzjarju pluriennali għas-snin 2014-2020[3].

9.           L-Artikolu 11(1) tar-Regolament (UE) Nru 1309/2013 jgħid li fuq l-inizjattiva tal-Kummissjoni kull sena jista' jiġi allokat 0,5 % ta' dan l-ammont (jiġifieri EUR 750 000 fi prezzijiet tal-2011) għall-għajnuna teknika. Fil-preżent, għad hemm disponibbli l-ammont sħiħ allokat għall-2014; għadu ma ġie allokat xejn għall-għajnuna teknika.

10.         Id-deċiżjoni proposta biex jiġi mobilizzat il-FEG se tittieħed b'mod konġunt bejn il-Parlament Ewropew u l-Kunsill, kif stabbilit fil-punt 13 tal-Ftehim Interistituzzjonali tat-2 ta' Diċembru 2013 bejn il-Parlament Ewropew, il-Kunsill u l-Kummissjoni dwar id-dixxiplina baġitarja, il-kooperazzjoni fi kwistjonijiet baġitarji u l-ġestjoni finanzjarja tajba[4].

Atti relatati

11.         Fl-istess żmien li se tkun qed tippreżenta din il-proposta għal deċiżjoni biex jiġi mobilizzat il-FEG, il-Kummissjoni se tippreżenta proposta lill-Parlament Ewropew u lill-Kunsill biex jiġu trasferiti EUR 330 000 fil-linja baġitarja rilevanti.

Sors tal-approprjazzjonijiet tal-pagament

12.         Mil-linja baġitarja tal-FEG se jintużaw approprjazzjonijiet biex ikopru l-ammont ta' EUR 330 000 meħtieġ għall-għajnuna teknika.

Proposta għal

DEĊIŻJONI TAL-PARLAMENT EWROPEW U TAL-KUNSILL

biex jiġi mobilizzat il-Fond Ewropew ta’ Aġġustament għall-Globalizzazzjoni (EGF/2014/000 TA 2014 — Għajnuna teknika fuq l-inizjattiva tal-Kummissjoni)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw ir-Regolament (KE) Nru 1309/2013 tal-Parlament Ewropew u tal-Kunsill tas-17 ta' Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006[5], u b'mod partikolari l-Artikolu 11(2) tiegħu,

Wara li kkunsidraw il-proposta mill-Kummissjoni Ewropea,

Filwaqt li jaġixxu skont il-proċedura stabbilita fil-punt 13 tal-Ftehim Interistituzzjonali tat-2 ta' Diċembru 2013 bejn il-Parlament Ewropew, il-Kunsill u l-Kummissjoni dwar id-dixxiplina baġitarja, il-kooperazzjoni fi kwistjonijiet baġitarji u l-ġestjoni finanzjarja tajba[6],

Billi:

(1)       Il-Fond Ewropew ta’ Aġġustament għall-Globalizzazzjoni (FEG) kien stabbilit biex isostni lill-ħaddiema li jkunu ngħataw is-sensja u lil persuni li jaħdmu għal rashom u li jkunu waqqfu l-attività tagħhom b'riżultat ta’ bidliet strutturali kbar fix-xejriet tal-kummerċ dinji minħabba l-globalizzazzjoni, b'riżultat ta’ kontinwazzjoni tal-kriżi finanzjarja u ekonomika globali indirizzata fir-Regolament (KE) Nru 546/2009, jew b'riżultat ta’ kriżi ekonomika u finanzjarja globali ġdida, u sabiex jgħinhom fl-integrazzjoni mill-ġdid tagħhom fis-suq tax-xogħol.

(2)       Il-FEG ma għandux jaqbeż l-ammont massimu annwali ta' EUR 150 miljun (prezzijiet tal-2011), kif stabbilit fl-Artikolu 12 tar-Regolament tal-Kunsill (UE, Euratom) Nru 1311/2013 li jistabbilixxi l-qafas finanzjarju pluriennali għas-snin 2014-2020[7].

(3)       Ir-Regolament (UE) Nru 1309/2013 jipprevedi li fuq l-inizjattiva tal-Kummissjoni kull sena jista' jintuża 0,5 % tal-ammont massimu annwali għall-għajnuna teknika. Il-Kummissjoni, għalhekk, tipproponi li jiġi mobilizzat l-ammont ta' EUR 330 000.

(4)       Il-FEG għandu, għaldaqstant, jiġi mmobilizzat biex jipprovdi għajnuna teknika fuq l-inizjattiva tal-Kummissjoni.

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni Ewropea għas-sena finanzjarja 2014, il-Fond Ewropew ta' Aġġustament għall-Globalizzazzjoni (FEG) għandu jiġi mmobilizzat biex jipprovdi s-somma ta' EUR 330 000 f'approprjazzjonijiet għall-impenji u għall-ħlasijiet.

Artikolu 2

Din id-Deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.

Magħmul fi Brussell,

Għall-Parlament Ewropew                            Għall-Kunsill

Il-President                                                    Il-President

[1]               ĠU L 347, 20.12.2013, p. 855.

[2]               http://ec.europa.eu/egf

[3]               ĠU L 347, 20.12.2013, p. 884.

[4]               ĠU C 373, 20.12.2013, p. 1.

[5]               ĠU L 347, 20.12.2013, p. 855.

[6]               ĠU C 373, 20.12.2013, p. 1.

[7]               ĠU L 347, 20.12.2013, p. 884.