52014PC0054

MEMORANDUM TA’ SPJEGAZZJONI

Fuq talba tal-Portugall, il-Kunsill ta assistenza finanzjarja lill-Portugall fis-17 ta' Mejju 2011 (Deċiżjoni ta' Implimentazzjoni tal-Kunsill 2011/344/UE) bħala sostenn għal programm ta' riforma ekonomika ambizzjuż bil-għan li terġa' tinkiseb il-fiduċja, li jiġi faċilitat ir-ritorn tal-ekonomija lejn tkabbir sostenibbli u li tiġi salvagwardjata l-istabbiltà finanzjarja fil-Portugall, fiż-żona tal-euro u fl-UE.

F'konformità mal-Artikolu 3(10) tad-Deċiżjoni 2011/344/UE, il-Kummissjoni, flimkien mal-Fond Monetarju Internazzjonali (FMI) u f'kooperazzjoni mal-Bank Ċentrali Ewropew (BĊE), wettqet l-għaxar rieżami biex tivvaluta l-progress li sar fuq l-implimentazzjoni tal-miżuri miftiehma kif ukoll l-effikaċja u l-impatt ekonomiku u soċjali tagħhom.

Filwaqt li qieset l-informazzjoni li waslet sadanittant, permezz tal-proposta [daħħal ir-referenza], il-Kummissjoni pproponiet li tiġi emendata d-Deċiżjoni 2011/344/UE.

Hija meħtieġa deċiżjoni addizzjonali, wara d-dħul fis-seħħ tat-“two-pack” (speċifikament, ir-Regolament (UE) Nru 472/2013) li tiddixxiplina wkoll kif għandha tiġi modifikata l-kundizzjonalità politika li ssostni programm ta’ aġġustament ekonomiku. Ir-Regolament (UE) Nru 472/2013, sa mid-data tad-dħul fis-seħħ tiegħu, japplika għall-programmi eżistenti ta’ aġġustament makroekonomiku li qegħdin fis-seħħ u li, konsegwentement, jirrikjedu li jsiru l-aġġustamenti skont il-proċedura tal-Artikolu 7(5).

2014/0027 (NLE)

Proposta għal

DEĊIŻJONI TA’ IMPLIMENTAZZJONI TAL-KUNSILL

li tapprova l-aġġornament tal-programm ta’ aġġustament makroekonomiku tal-Portugall

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament (UE) Nru 472/2013 tal-Parlament Ewropew u tal-Kunsill tal-21 ta’ Mejju 2013 dwar it-tisħiħ tas-sorveljanza ekonomika u baġitarja tal-Istati Membri fiż-żona tal-euro li jesperjenzaw jew ikunu mhedda b'diffikultajiet gravi fir-rigward tal-istabbiltà finanzjarja tagħhom[1], u b'mod partikolari l-Artikolu 7(5) tiegħu,

Wara li kkunsidra l-proposta tal-Kummissjoni Ewropea,

Billi:

(1)       Ir-Regolament (UE) Nru 472/2013 japplika għal Stati Membri li, fil-mument tad-dħul fis-seħħ tiegħu, diġà jkunu qed jirċievu assistenza finanzjarja, inkluż mill-mekkaniżmu Ewropew ta’ stabilizzazzjoni finanzjarja (EFSM) u/jew il-Faċilità Ewropea ta’ Stabbiltà Finanzjarja (EFSF).

(2)       Ir-Regolament (UE) Nru 472/2013 jistabbilixxi r-regoli għall-approvazzjoni ta’ programmi ta’ aġġustament makroekonomiku għall-Istati Membri li jirċievu tali għajnuna finanzjarja, li jeħtieġ li jiġu applikati flimkien mad-dispożizzjonijiet tar-Regolament tal-Kunsill (UE) Nru 407/2010[2] li jistabbilixxi l-EFSM meta l-Istat Membru kkonċernat jirċievi assistenza kemm mill-EFSM kif ukoll minn sorsi oħra.

(3)       Il-Portugall ingħata assistenza finanzjarja kemm mill-EFSM, permezz tad-Deċiżjoni ta’ Implimentazzjoni tal-Kunsill 2011/344/UE[3], kif ukoll mill-EFSF.

(4)       Għal raġunijiet ta’ konsistenza, l-approvazzjoni tal-aġġornament tal-programm ta’ aġġustament makroekonomiku għall-Portugall, skont ir-Regolament (UE) Nru 472/2013, għandha ssir b’referenza għad-dispożizzjonijiet rilevanti tad-Deċiżjoni ta’ Implimentazzjoni 2011/344/UE.

(5)       F’konformità mal-Artikolu 3(10) tad-Deċiżjoni ta’ Implimentazzjoni 2011/344/UE, il-Kummissjoni, flimkien mal-Fond Monetarju Internazzjonali u l-Bank Ċentrali Ewropew, wettqet l-għaxar rieżami biex tivvaluta l-progress li sar mill-awtoritajiet Portugiżi fuq l-implimentazzjoni tal-miżuri miftiehma skont il-programm ta' aġġustament makroekonomiku, kif ukoll l-effikaċja u l-impatt ekonomiku u soċjali tagħhom. Bħala konsegwenza ta’ dan ir-rieżami, jeħtieġ li jsiru xi bidliet fil-programm ta’ aġġustament makroekonomiku eżistenti.

(6)       Dawn il-bidliet huma stabbiliti fid-dispożizzjonijiet rilevanti tad-Deċiżjoni ta’ Implimentazzjoni 2011/344/UE, kif emendata mid-Deċiżjoni ta’ Implimentazzjoni tal-Kunsill [daħħal ir-referenza] ta’ [daħħal id-data/daħħal ir-referenza],

ADOTTA DIN ID-DEĊIŻJONI:

Artikolu 1

Il-miżuri stipulati fl-Artikolu 3(8) u (9) tad-Deċiżjoni ta’ Implimentazzjoni 2011/344/UE li għandhom jittieħdu mill-Portugall bħala parti mill-programm ta’ aġġustament makroekonomiku tiegħu, huma b’dan approvati.

Artikolu 2

Din id-Deċiżjoni hija indirizzata lill-Portugall.

Artikolu 3

Din id-Deċiżjoni tiġi ppubblikata f'Il-Ġurnal Uffiċjali tal-Unjoni Ewropea.

Magħmul fi Brussell,

                                                                       Għall-Kunsill

                                                                       Il-President

[1]               ĠU L 140, 27.5.2013, p. 1.

[2]               Ir-Regolament tal-Kunsill (UE) Nru 407/2010 tal-11 ta’ Mejju 2010 li jistabbilixxi mekkaniżmu Ewropew ta' stabbilizzazzjoni finanzjarja (ĠU L 118, 12.5.2010, p. 1).

[3]               Id-Deċiżjoni ta’ Implimentazzjoni tal-Kunsill 2011/344/UE tas-17 ta’ Mejju 2011 dwar l-għoti ta’ assistenza finanzjarja tal-Unjoni lill-Portugall (ĠU L 159, 17.6.2011, p. 88).