52014DC0287

KOMUNIKAZZJONI MILL-KUMMISSJONI LILL-PARLAMENT EWROPEW U LILL-KUNSILL

dwar l-implimentazzjoni tad-Direttiva 2009/50/KE dwar il-kundizzjonijiet ta’ dħul u residenza ta’ ċittadini ta’ pajjiżi terzi għall-fini ta’ impjieg b’livell għoli ta’ kwalifiki

(“Il-Karta Blu tal-UE”)

Politika ta’ migrazzjoni ġestita tajjeb bil-għan li tattira migranti b’livell għoli ta’ kwalifiki tista' tikkontribwixxi biex issaħħaħ it-tkabbir ekonomiku u l-kompetittività, tindirizza n-nuqqasijiet tas-suq tax-xogħol u tpatti għall-ispejjeż tat-tixjiħ demografiku.

Id-Direttiva dwar il-Karta Blu tal-UE[1] ġiet adottata sabiex tiffaċilita l-ammissjoni u l-mobilità tal-migranti[2] b’livell għoli ta’ kwalifiki u l-membri tal-familja tagħhom billi tarmonizza l-kundizzjonijiet għad-dħul u r-residenza fl-UE u billi tipprovdi status legali u sett ta' drittijiet.

Fiż-żieda fil-kompetizzjoni globali għat-talent, il-Karta Blu tal-UE hi ntiża li tagħmel l-UE aktar attraenti għal ħaddiema b’livell għoli ta’ kwalifiki minn madwar id-dinja u ssaħħaħ l-ekonomija tal-għarfien tagħha. Id-Direttiva għandha wkoll l-għan li tnaqqas l-eżodu ta' mħuħ f’pajjiżi li qed jiżviluppaw u bi dħul medju u titħeġġeġ il-migrazzjoni ċirkolari u temporanja.

L-Istati Membri kellhom sad-19 ta’ Ġunju 2011 biex jittrasponu d-Direttiva fil-leġiżlazzjoni nazzjonali tagħhom. Il-Kummissjoni nediet proċedimenti ta’ ksur kontra 20-il Stat Membru[3] talli ma ttrasponewx id-Direttiva fil-ħin, li issa ngħalqu kollha.

L-Istati Membri kollha marbuta bid-Direttiva[4] issa qegħdin f’pożizzjoni li jagħtu Karti Blu tal-UE. B’mod parallel, ħafna SM għandhom fis-seħħ politiki nazzjonali biex jattiraw il-migranti b’livell għoli ta’ kwalifiki[5]. Filwaqt li xi SM[6] imponew volumi ta’ dħul u llimitaw in-numru ta’ migranti b’livell għoli ta’ kwalifiki, SM[7] oħrajn adottaw jew żammu dispożizzjonijiet aktar favorevoli fir-rigward tad-dispożizzjonijiet speċifiċi tad-Direttiva.

Din il-Komunikazzjoni[8] twieġeb għall-obbligu tal-Kummissjoni li tirraporta lill-Parlament Ewropew u lill-Kunsill dwar l-applikazzjoni tad-Direttiva dwar il-Karta Blu[9]. L-ewwel nett, din tivvaluta l-aspetti ewlenin relatati mal-attrazzjoni tal-Karta Blu tal-UE, segwita minn deskrizzjoni qasira ta’ kif il-miżuri ġew implimentati fil-liġijiet nazzjonali. Sa fejn possibbli, għandha tingħata attenzjoni partikolari lill-impatt ta’ skemi nazzjonali għall-migranti b’livell għoli ta’ kwalifiki (l-Artikolu 3(4)), il-kriterji għall-ammissjoni (l-Artikolu 5), b'mod partikolari l-limitu minimu tas-salarju, u l-kundizzjonijiet għal residenza fi SM oħrajn (l-Artikolu 18).

1. L-Attrazzjoni tal-Karta Blu tal-UE 1.1. Statistika

Bħala riżultat tat-traspożizzjoni tard, l-iskema tal-Karta Blu kienet biss fis-seħħ għal ftit xhur fl-2012 fil-maġġoranza tal-SM[10]. Minkejja d-dewmien, fl-2012, ingħataw 3 664 Karta Blu u 1 107 membri tal-familja kienu ammessi[11].

It-Tabella 1 turi li fl-2012, il-biċċa l-kbira tal-Karti l-Blu ngħataw mill-DE (2 584; 70,52%), ES (461; 12,58%) u LU (183; 4,99%). Min-naħa l-oħra, il-PL, il-PT u l-FI ħarġu żewġ Karti Blu kull wieħed, il-NL u l-HU ħarġu waħda filwaqt li l-BE, CY, il-EL u MT ma ħarġu xejn[12]. CY stabbilixxa volum ta’ ammissjoni ta’ żero.

Fl-2013, in-numru ta’ Karti Blu mogħtija żdied għal mill-anqas 15 261[13]. Il-maġġoranza ta' Karti Blu ngħataw mill-DE (14 197)[14], il-LU (306) u FR (304).

It-Tabella 2 turi li l-biċċa l-kbira tal-Karti Blu fl-2012 ingħataw lil migranti b’livell għoli ta’ kwalifiki mill-Asja (1 886), segwiti mill-Ewropa tal-Lvant (463), l-Amerika tat-Tramuntana (380), l-Amerika t’Isfel (278), in-Nofsinhar tal-Ewropa (227), l-Afrika ta' Fuq (174) u l-Amerika Ċentrali (118). Kienu 78 ħaddiem b'livell għoli ta' kwalifiki biss li daħlu mill-bqija tal-Afrika. L-Oċeanja tgħodd 38 detentur tal-Karta Blu.

Il-pajjiżi tal-oriġini fil-quċċata fl-2012 kienu l-Indja (699), iċ-Ċina (324), ir-Russja (271), l-Istati Uniti (313) u l-Ukraina (149), minn 96 pajjiż. L-ewwel statistiċi għall-2013 jidhru li jikkonfermaw din il-klassifikazzjoni.

L-impjiegi tad-detenturi tal-Karta Blu fl-2012 huma disponibbli biss għal 294 minn 3 664 (8,02 %)[15], perċentwali mhux kbir biżżejjed biex ikun rappreżentattiv.

Fil-DE, fl-ewwel sitt xhur tal-2013, 6 131 migrant ingħataw il-Karta Blu li minnhom 4 442 (72,45 %) kienu daħlu qabel l-2013[16] filwaqt li 1 689 (27,55 %) qatt ma kienu ġew qabel[17].

Fl-ewwel disa' xhur tal-2013, ingħataw 8 888 Karta Blu f'DE li minnhom 4 100 (46,13 %) fil-professjonijiet li hemm nuqqasijiet[18] u 4 788 (53,87 %) fl-impjiegi standard[19]. F’dan il-perjodu, 6 971 (78,43 %) ingħataw lill-irġiel u 1 914 (21,53 %) lin-nisa fil-DE[20].

Il-Karti Blu ingħataw fil-DE f’dan il-perjodu lil migranti ta'

0 – 25 sena: 183 (2,06 %) 25 – 35 sena: 6 533 (73,50 %) 35 – 45 sena: 1 765 (19,86 %) 45 – 55 sena: 308 (3,47 %) 55 – 65 sena: 95 (1,07 %) 65 sena jew iktar: 4 (0,05 %) 1.2. Skemi nazzjonali għal migranti b’livell għoli ta’ kwalifiki (l-Artikolu 3(4))[21]

Ħafna SM għandhom fis-seħħ politiki nazzjonali biex jattiraw migranti b'livell għoli ta' kwalifiki minbarra l-Karta Blu tal-UE[22].

Xi SM poġġew enfasi speċifika fuq ċerti gruppi ta' individwi[23] jew fuq oqsma preċiżi ta' impjieg fejn hemm ħtiġijiet u nuqqasijiet tas-suq tax-xogħol nazzjonali speċifiċi[24]. Il-maġġoranza jippromwovu lilhom infushom bħala pajjiżi ta’ destinazzjoni għal ħaddiema b'livell għoli ta' kwalifiki u jiffaċilitaw l-ammissjoni u d-dħul tagħhom, pereżempju, permezz ta’ proċeduri mgħaġġla għal permessi u viżi, eżenzjonijiet minn rekwiżiti ġenerali tal-immigrazzjoni u testijiet tas-suq tax-xogħol, kampanji ta’ informazzjoni u inċentivi oħra. Is-sistemi stabbiliti f’dawn l-Istati Membri jvarjaw minn sistemi bbażati fuq il-punti għal sistemi mmexxija minn min iħaddem u mid-domanda.

Bosta SM li għandhom fis-seħħ politiki nazzjonali bħal dawn għandhom sehem ogħla ta’ migranti b’livell għoli ta’ kwalifiki[25] fil-popolazzjoni tagħhom ta' migranti minn ċerti SM li ma għandhomx tali politiki[26].

It-Tabella 3 tissuġġerixxi li l-eżistenza ta’ skemi nazzjonali għal ħaddiema b' livell għoli ta' kwalifiki jista’ jkollha impatt fuq il-Karti Blu tal-UE maħruġa minn ċerti SM. Fl-2012, fil-NL nħarġu 5 514-il permess nazzjonali meta mqabbel ma' Karta Blu waħda biss; fi FR 3 030 meta mqabbel ma' 77 Karta Blu; fl-AT 1 158 meta mqabbel ma' 124 Karta Blu; fi ES 1 136 meta mqabbel ma' 461 Karta Blu; fil-FI 1 748 meta mqabbel ma' żewġ Karti Blu.

Eċċezzjonijiet notevoli fid-direzzjoni l-oħra huma il-DE b’210 permessi nazzjonali meta mqabbel ma’ 2 584 Karta Blu; il-LU b'21 permess nazzjoni meta mqabbel ma' 183 Karta Blu; u r-RO bl-ebda permess nazzjoni meta mqabbel ma' 46 Karta Blu;

1.3. Il-volumi tal-amissjoni (l-Artikolu 6)

Filwaqt li l-maġġoranza tal-Istati Membri ma għażlux li jistabbilixxu l-volumi tal-ammissjoni ta’ migranti b’livell għoli ta’ kwalifiki, xi SM[27] pprevedew din il-possibilità f’konformità mal-Artikolu 79(5) tat-Trattat dwar il-Funzjonament tal-UE. Dawk li effettivament imponew volumi tal-ammissjoni għandhom approċċi differenti biex jistabbilixxuhom. L-SM huma obbligati jikkomunikaw jekk il-miżuri li jimponu l-volumi tal-ammissjoni jkunu implimentati[28].

F’xi SM[29] l-volumi tal-ammissjoni huma kkalkulati bħala perċentwali tal-forza tax-xogħol nazzjonali jew tal-popolazzjoni, jew skont il-livell tal-qgħad jew il-ħtiġijiet tas-suq tax-xogħol, xi kultant skont ir-reġjun u l-ispeċjalizzazzjoni. F’bosta SM[30] l-volumi tal-ammissjoni huma stabbiliti kull sena jew sentejn mill-Ministri rilevanti.

L-ebda SM ma nfurma lill-Kummissjoni bil-volumi tal-ammissjonijiet, ħlief għal żewġ SM[31].

1.4. Ir-reklutaġġ etiku (l-Artikolu 3(3) u 8(4))

L-ebda SM ma daħal fi ftehim ma’ pajjiż terz li jagħti lista tal-professjonijiet li ma jaqgħux taħt din id-Direttiva sabiex jiġi żgurat ir-reklutaġġ etiku f’setturi li jbatu minn nuqqas ta’ persunal f’pajjiżi li qed jiżviluppaw.

Il-BE, CY, il-DE[32], il-EL, il-LU u MT ttrasponew l-għażla li jirrifjutaw applikazzjoni sabiex jiżguraw reklutaġġ etiku f’setturi bħal dawn. L-Istati Membri li jagħmlu użu minn din id-dispożizzjoni huma obbligati li jikkomunikaw id-deċiżjonijiet tagħhom[33]. L-ebda rifjuti abbażi ta' dawn ir-raġunijiet ma ġew irrappurtati.

Minħabba n-numru baxx ta’ Karti Blu tal-UE attwalment mogħtija lil migranti b’livell għoli ta’ kwalifiki mill-pajjiżi l-inqas żviluppati, ir-riskju tal-eżodu ta' mħuħ jibqa’ limitat għal dawn il-pajjiżi. Madankollu, il-pajjiżi li qed jiżviluppaw li għandhom introjtu medju jistgħu jkunu f'riskju ogħla. Xi SM[34] jindirizzaw l-eżodu ta' mħuħ u ċ-ċirkolazzjoni tal-imħuħ permezz tal-leġiżlazzjoni nazzjonali, ftehimiet bilaterali u/jew il-koperazzjoni mal-pajjiżi ta' oriġini.

2. It-traspożizzjoni mill-Istati Membri 2.1. Definizzjonijiet (l-Artikolu 2)

Id-definizzjonijiet ta’ “impjieg b'livell għoli ta' kwalifiki”, “kwalifiki professjonali ogħla”, “kwalifika ta’ edukazzjoni ogħla”, “esperjenza professjonali” u “professjoni regolata” ġew previsti mill-maġġoranza tal-Istati Membri għalkemm b’varjazzjonijiet fit-terminoloġija, l-ambitu u fl-Istati Membri bi strutturi federali.

Il-DE[35], l-EE, il-EL, ES, FR, il-LT, il-LU, MT, il-PL, il-PT, l-SE u s-SK għażlu li japplikaw id-deroga fejn mill-inqas ħames snin ta’ esperjenza professjonali rilevanti f’livell komparabbli għal kwalifiki ta’ edukazzjoni ogħla biżżejjed bħala evidenza ta’ kwalifiki professjonali ogħla[36].

2.2. Il-kriterji għall-ammissjoni u l-limitu minimu tas-salarju (l-Artikolu 5)

L-Istati Membri kollha jeħtieġu kuntratt validu tax-xogħol jew offerta ta’ impjieg li torbot, iżda l-DE u l-LV ma jitolbux b’mod espliċitu perjodu minimu ta’ sena[37].

L-Istati Membri kollha jeħtieġu dokument validu tal-ivvjaġġar iżda CY, il-EL, il-FI, il-LT, MT, il-PT u l-SE biss użaw din l-għażla biex jitolbu li l-perjodu ta’ validità tad-dokument tal-ivvjaġġar ikopri mill-inqas it-tul ta’ żmien inizjali tal-permess tar-residenza. Kif stipulat fid-Direttiva, l-Istati Membri kollha jeħtieġu l-assigurazzjoni kontra l-mard, ħlief ES fejn ma teżisti l-ebda dispożizzjoni korrispondenti. Il-maġġoranza tal-Istati Membri[38] jeħtieġu li l-applikant ma jkunx ta’ theddida għall-politika pubblika, is-sigurtà jew is-saħħa.

Il-maġġoranza tal-Istati Membri għamlu użu mill-għażla tal-Artikolu 5(2) biex jitolbu lill-applikant jipprovdi l-indirizz tiegħu fl-Istat Membru[39]. L-AT, il-BE u l-NL jirrikjedu notifika ta' kull bidla fl-indirizz  L-IT u l-LU jitolbu prova ta’ akkomodazzjoni adegwata.

F’konformità mal-Artikolu 5(3), il-maġġoranza tal-Istati Membri jistabbilixxu l-limitu minimu tas-salarju nominalment għal 1,5 darbiet is-salarju gross annwali iżda xi wħud użaw il-possibilità skont id-Direttiva għal livelli limitu ogħla[40]. Il-maġġoranza tal-Istati Membri poġġew metodu ta’ kalkolu fil-leġiżlazzjoni tagħhom[41]. Il-LV, l-EE, l-HU, is-SK u l-LT kkalkulaw il-limitu minimu abbażi tas-salarju gross medju fix-xahar. Xi wħud jużaw formuli jew kriterji oħrajn mhux is-salarju gross annwali medju biex jikkalkulaw il-limitu massimu[42]. Il-maġġoranza tal-Istati Membri jidhru li jużaw dejta nazzjonali biex jiddeterminaw il-limitu minimu ta’ salarju. L-Istati Membri huma mistiedna jużaw id-dejta tal-Eurostat[43], tal-inqas bħala standard[44].

L-Istati Membri huma obbligati li jiddefinixxu u jippubblikaw il-limiti tas-salarju rilevanti. Madankollu, reviżjoni mill-Kummissjoni dwar l-informazzjoni disponibbli fuq il-Portal tal-UE dwar l-Immigrazzjoni[45] u fuq websajts nazzjonali turi li f’bosta SM, il-limiti tas-salarju mhux qed jiġu ppubblikati jew aġġornati, huma diffiċli biex wieħed isibhom jew disponibbli biss fil-lingwa nazzjonali[46]. L-Istati Membri ma nnotifikawx dwar il-limiti tas-salarju jew l-aġġornamenti annwali lill-Kummissjoni. Id-Direttiva titlob lill-Kummissjoni biex tevalwa r-rilevanza tal-limitu tas-salarju[47], ħaġa li tista’ tagħmel biss jekk il-limiti jkunu nnotifikati kull sena.

Tqabbil tal-limiti tas-salarju disponibbli mad-dejta tal-Eurostat u tal-OECD dwar is-salarji annwali grossi medji juri li f’ċerti SM, il-limitu jista' ma jikkorrispondix għal-limitu minimu ta’ 1,5 darbiet is-salarju gross annwali medju (it-Tabella 4).

CY, il-DE, l-EE, il-EL, ES, l-HU, il-LU, MT u l-PT ittrasponew l-għażla li japplikaw limitu ta’ salarju ta’ mill-inqas 1,2 darbiet is-salarju gross annwali medju għal impjieg fi professjonijiet li huma fi ħtieġa partikolari ta’ ħaddiema migranti u jappartjenu għal gruppi kbar tal-ISCO 1 u 2. Il-DE, l-EE, l-HU u l-LU biss huma magħrufa li effettivament għamlu użu minn din il-possibilità ta' deroga li jiffissaw limitu ta’ salarju aktar baxx, għalkemm l-ebda wieħed minnhom ma kkomunika lill-Kummissjoni l-lista annwali meħtieġa tal-professjonijiet li għalihom ġiet deċiża deroga.

2.3. Il-perjodu ta’ validità tal-Karta Blu tal-UE (l-Artikolu 7(2))

L-Istati Membri għandhom jiffissaw perjodu ta’ validità standard tal-Karta Blu tal-UE fil-leġiżlazzjoni tagħhom ta’ bejn sena u erba’ snin li, fil-prinċipju, japplika għall-applikazzjonijiet u t-tiġdid kollha fl-Istati Membri rispettivi.

Jekk il-kuntratt tax-xogħol ikopri perjodu ta’ inqas minn dan il-perjodu, il-Karta Blu tal-UE għandha tinħareġ jew tiġġedded għat-tul ta’ żmien tal-kuntratt ta’ xogħol b’żieda ta’ tliet xhur. It-tul minimu għal Karta Blu tal-UE huwa ta’ sena billi dan huw l-perjodu minimu tal-kuntratt tax-xogħol jew offerta ta’ impieg meħtieġa[48]. Il-possibilità li tiġġedded il-Karta Blu hija impliċita fid-Direttiva u mingħajr limitazzjoni sakemm il-kundizzjonijiet ikunu sodisfatti[49].

Il-perjodu standard ta’ validità[50] tal-Karta Blu tal-UE huwa ta' sena fil-BG, CY, ES, il-LT, MT u l-PT, u 13-il xahar fil-BE. L-AT, ir-CZ, il-EL, il-FI, l-IT, il-LU, il-PL, ir-RO, l-SE u s-SI stabbilixxew perjodu ta’ sentejn u EE perjodu ta' sentejn u tliet xhur. FR u s-SK stabbilixxewh għal tliet snin u l-DE, l-HU u l-NL erba’ snin. Il-LV stabbilixxietu għal ħames snin.

Fi kważi kull SM[51], jekk il-kuntratt tax-xogħol ikopri perjodu inqas mill-perjodu standard ta' validità, il-Karta Blu tal-UE għandha tinħareġ jew tiġġedded għat-tul ta’ żmien tal-kuntratt ta’ xogħol b’żieda ta’ tliet xhur. Mat-tiġdid, jekk il-bqija tal-kuntratt tax-xogħol ikun ta' inqas minn sena, dan jista’ jfisser li l-Karta Blu tal-UE tinħareġ b’validità ta’ inqas minn sena. L-ewwel kuntratt tax-xogħol jew offerta ta’ impieg b’tul ta’ żmien ta’ inqas minn sena għandha tiġi miċħuda[52]. L-IT għamlet differenza bejn il-kuntratti tal-impjieg ta’ tul indefinit, li għalihom il-perjodu ta’ validità huwa stabbilit għal sentejn, u l-kuntratti l-oħra kollha, li għalihom il-perjodu huwa t-tul ta’ żmien tal-kuntratt ta’ xogħol b’żieda ta’ tliet xhur.

L-Istati Membri kollha jidhru li jippermettu rinnovamenti, iżda xi SM[53] stipulaw perjodu ta’ validità differenti (itwal) għat-tiġdid minn dak għall-Karta Blu tal-UE inizjali minflok ma applikaw għal perjodu ta’ validità standard wieħed. L-SE llimitat it-tul kumulattiv tal-Karta Blu inizjali flimkien mat-tiġdid għal erba’ snin.

2.4. It-test tas-suq tax-xogħol (l-Artikolu 8(2))[54]

L-AT, il-BE, il-BG, CY, ES, l-HU, l-IT, il-LU, MT, il-PL, is-SK u s-SI ttrasponew l-għażla għat-twettiq ta’ test tas-suq tax-xogħol. Il-maġġoranza tal-Istati Membri[55] għażlu li japplikaw l-alternattiva biex jivverifikaw jekk il-post vakanti kkonċernat jistax jimtela minn ħaddiema nazzjonali jew tal-UE.

2.5. L-irtirar jew ir-rifjut ta’ tiġdid tal-Karta Blu tal-UE (l-Artikolu 9)

Kważi l-Istati Membri kollha[56] jagħżlu[57] li jirtiraw jew ma jġeddux il-Karta Blu tal-UE għal raġunijiet ta’ politika pubblika, sigurtà pubblika jew saħħa pubblika; Fl-AT, il-BE, ES, il-FI, FR u l-IT din hija koperta minn dispożizzjonijiet ġenerali jew mill-kundizzjonijiet għad-dħul. L-AT, il-BE, il-BG, il-DE, l-EE, l-HU, il-NL, il-PL u s-SK biddlu t-terminu “politika pubblika” bit-terminu “ordni pubbliku” u l-AT, il-BE, il-BG, il-EL, FR, l-IT u l-PL ma jsemmux it-terminu “saħħa pubblika”.

Il-maġġoranza tal-Istati Membri[58] applikaw l-għażla li jirtiraw jew ma jġeddux il-Karta Blu tal-UE kull fejn id-detentur tal-Karta Blu tal-UE ma jkollux riżorsi suffiċjenti biex isostni lilu nnifsu u l-membri tal-familja tiegħu, mingħajr ma jirrikorri għas-sistema ta' għajnuna soċjali tal-Istat Membru kkonċernat[59].

Il-BE, il-BG, CY, l-EE, ES, l-HU, MT u l-PL applikaw l-għażla li jirtiraw jew ma jġeddux il-Karta Blu tal-UE jekk il-persuna kkonċernata ma tkunx ikkomunikat l-indirizz taghħa[60]. CY, ir-CZ, l-EE, il-EL, MT, ir-RO u s-SK għażlu l-possibilità li jirtiraw jew ma jġeddux il-Karta Blu tal-UE fejn id-detentur tal-Karta Blu tal-UE japplika għall-assistenza soċjali, sakemm l-informazzjoni xierqa u bil-miktub tkun ġiet ipprovduta bil-quddiem[61].

2.6. L-applikazzjonijiet għall-ammissjoni (l-Artikolu 10)

Il-maġġoranza tal-Istati Membri jitolbu li l-migrant jagħmel applikazzjoni għal Karta Blu tal-UE. CY, ES, FR, l-IT u MT jeħtieġu li min iħaddem jagħmel dan. Fil-BE u l-LV l-applikazzjonijiet għandhom isiru mill-migrant u min iħaddem, filwaqt li l-NL, l-AT, il-PT u s-SI jippermettu li japplikaw jew il-migrant jew min iħaddem. L-AT u l-NL jippermettu s-sottomissjoni minn avukat.

Il-maġġoranza tal-Istati Membri[62] jipprovdu li l-applikazzjonijiet jistgħu jiġu kkunsidrati u eżaminati meta l-applikant ikun jew barra mill-Istat Membru jew diġà jkun residenti fih bħala detentur ta’ permess ta’ residenza validu jew viża nazzjonali għal soġġorn twil[63]. Il-maġġoranza tal-Istati Membri[64] applikaw id-deroga li l-applikazzjonijiet jistgħu jiġu sottomessi meta l-applikant ma jkollux permess validu ta’ residenza imma jkun legalment preżenti fit-territorju tal-Istat Membru (l-Artikolu 10(3)). Il-LU u l-SE applikaw id-deroga ta’ sospensjoni tal-Artikolu 10(4) li applikazzjoni tista’ titressaq biss minn barra t-territorju[65].

2.7. Salvagwardji proċedurali (l-Artikolu 11)

Il-maġġoranza tal-Istati Membri jistabbilixxu l-limitu ta’ żmien għall-adozzjoni ta’ deċiżjoni dwar applikazzjoni kompluta u biex jagħtu notifika bil-miktub lill-applikant għal 90 jum[66], iżda xi wħud jiffissaw limiti iqsar taż-żmien ta’ 60 jum (l-EE, il-LT u l-PT; is-SK u l-PL għall-każijiet ikkumplikati), 56 (l-AT), 45 (ES), 30 (il-LV, ir-RO u s-SI; is-SK u l-PL għall-każijiet mhux ikkumplikati) u sebat ijiem (il-BG). Ħafna mill-Istati Membri ddeterminaw il-konsegwenza għal meta ma tittiħidx deċiżjoni sa tmiem dan il-perjodu[67], għalkemm il-BE, il-EL, l-IT u l-PL pprevedew estensjoni tal-iskadenza.

Fil-każ ta’ applikazzjoni mhux kompluta, il-maġġoranza tal-Istati Membri stabbilixxew skadenza biex jipprovdu tagħrif supplimentari u jissospendu l-limitu ta’ żmien għall-ipproċessar. L-Istati Membri kollha jipprovdu notifika bil-miktub f’każ ta’ ċaħda, rifjut ta’ tiġdid jew irtirar, u jispeċifikaw limiti ta’ żmien għall-bidu ta’ proċeduri ta’ rimedju.

2.8. Id-drittijiet

L-aċċess għas-suq tax-xogħol (l-Artikolu 12)

Il-maġġoranza tal-Istati Membri[68] applikaw l-għażla li wara l-ewwel sentejn ta’ aċċess ristrett tas-suq tax-xogħol, jingħata trattament ugwali bħaċ-ċittadini f’dak li jirrigwarda l-aċċess għal impjieg bi kwalifiki għolja.

Kważi l-Istati Membri kollha[69] jeħtieġu l-awtorizzazzjoni mill-awtorità kompetenti fil-każ ta’ bidla f'min iħaddem fl-ewwel sentejn. Ħafna SM[70] jeħtieġu komunikazzjoni jew awtorizzazzjoni minn qabel għal modifiki li jaffettwaw il-kundizzjonijiet għad-dħul.

Il-qgħad temporanju (l-Artikolu 13)

Dawn id-dispożizzjonijiet ġew trasposti mill-maġġoranza tal-Istati Membri. Xi SM japplikaw dispożizzjonijiet leġiżlattivi aktar favorevoli jew jillimitaw l-applikazzjoni għall-qgħad involontarju.

It-trattament ugwali (l-Artikolu 14)

Id-dispożizzjonijiet ta’ trattament ugwali huma applikati mil-maġġoranza tal-Istati Membri, għalkemm hemm varjazzjonijiet fl-ambitu tal-applikazzjoni, it-traspożizzjoni espliċita ta’ xi wħud hija nieqsa f’xi SM u xi Stati Membri japplikaw dispożizzjonijiet leġiżlattivi aktar favorevoli[71].

CY, il-DE, il-EL, ES, il-FI, il-LU, MT, il-PL u r-RO applikaw l-għażla fuq restrizzjonijiet possibbli għall-edukazzjoni u t-taħriġ vokazzjonali u l-aċċess għal oġġetti u servizzi. L-AT, il-BE, CY, ir-CZ, il-DE, il-EL, il-FI, il-LT, il-LU, MT, il-NL, il-PL u r-RO applikaw l-għażla li jagħmlu l-aċċess għall-università u għall-edukazzjoni postsekondarja soġġett għal prerekwiżiti speċifiċi.

Il-maġġoranza tal-Istati Membru[72] ma applikawx l-għażla li jillimitaw it-trattament ugwali meta d-detentur ta’ Karta Blu tal-UE jiċċaqlaq għat-tieni Stat Membru u deċiżjoni pożittiva dwar il-ħruġ ta’ Karta Blu tal-UE ma tkunx għadha ttieħdet.

Il-membri tal-familja (l-Artikolu 15)

Fl-2012, ingħataw 1 107 permessi għall-membri tal-familja ta’ detenturi ta’ Karta Blu. Fl-2013 fil-DE, mill-inqas 1 421 konjuġi u 899 tifel u tifla ngħaqdu ma' detentur ta’ Karta Blu tal-UE[73]. Madankollu, il-maġġoranza kbira ta’ detenturi ta’ Karta Blu huma taħt il-35 sena u jista’ jkun li għad ma bdewx familja[74]. Il-Kummissjoni se tanalizza din il-kwistjoni ulterjorment.

Status ta’ residenti fit-tul tal-UE (l-Artikoli 16 u 17)

L-AT, il-BG, CY, il-DE, l-EE, ES, il-EL, il-LT, MT, il-LV, il-NL u r-RO għażlu li japplikaw l-għażla tal-Artikolu 16(5) sabiex jirrestrinġu d-derogi mid-Direttiva 2003/109/KE f’dak li għandu x’jaqsam mal-perjodi ta’ assenza mit-territorju tal-Komunità.

2.9. Ir-residenza fi SM oħrajn (l-Artikolu 18 u 19)

Detentur ta’ Karta Blu tal-UE li jixtieq imur jgħix fi SM ieħor wara 18-il xahar ta’ residenza legali fl-ewwel SM, għandu japplika għal Karta Blu tal-UE fit-tieni SM. F’termini prattiċi, dan ifisser valutazzjoni ġdida ta' jekk id-detentur tal-Karta Blu jissodisfax il-kundizzjonijiet li japplikaw fit-tieni SM.

Hemm xi grad ta’ varjazzjoni fil-kundizzjonijiet ta’ ammissjoni u differenzi sinifikanti fil-limiti tas-salarju bejn l-Istati Membri.

Għad mhuwiex possibbli li jiġi evalwat l-impatt tal-aspett tal-mobilità ġewwa l-UE tal-Karta Blu tal-UE billi l-perjodu meħtieġ ta’ 18-il xahar ma ġiex sodisfatt minn numru sinifikanti ta’ detenturi ta’ Karta Blu tal-UE.

3. Il-Konklużjonijiet u l-passi li jmiss

Jeżistu varjazzjonijiet kbar bejn l-Istat Membru fin-numru ta’ Karti Blu mogħtija. Filwaqt li d-daqs tal-Istat Membru u l-qagħda ekonomika tiegħu jista' jkollhom impatt fuq l-attrattività tiegħu, dawn ma jispjegawx bis-sħiħ il-varjazzjonijiet kbar. Tweġiba tista’ tinstab ukoll fl-għażliet ta’ politika minn SM li japplikaw u jippromwovu l-Karta Blu f’ħafna modi differenti.

Id-Direttiva dwar il-Karta Blu kienet innegozjata u adottata qabel id-dħul fis-seħħ tat-Trattat ta’ Lisbona. Taħt is-sistema preċedenti, kienet meħtieġa l-unanimità fil-Kunsill, minflok il-maġġoranza kwalifikata attwali, u l-Parlament Ewropew ma kienx koleġiżlatur. Dan wassal għal negozjati twal u diffiċli dwar il-proposta tal-Kummissjoni. Id-Direttiva li rriżultat stabbilixxiet biss standards minimi, u ħalliet ħafna libertà lill-Istati Membri permezz ta’ ħafna klawżoli fakultattivi u referenzi għal-leġiżlazzjoni nazzjonali.

L-iskemi nazzjonali biex jattiraw migranti b'livell għoli ta' kwalifiki f’ħafna SM jikkompetu mal-Karta Blu tal-UE u ma’ xulxin. Madankollu, xi SM għamlu għażla politika favur il-Karta Blu tal-UE li jirrifletti fin-numru ta’ Karti Blu mogħtija. Il-politiki ta' SM oħrajn jiffavorixxu l-iskemi nazzjonali tagħhom.

Filwaqt li n-numru ta’ Karti Blu żdied fil-biċċa l-kbira tal-Istati Membri bejn l-2012 u l-2013, huwa kmieni wisq biex wieħed jiġbed konklużjonijiet dwar l-impatt tal-Karta Blu tal-UE fl-attirar ta' migranti b'livell għoli ta' kwalifiki lejn l-UE. Il-Kummissjoni hija kkonċernata dwar innuqqasijiet fit-traspożizzjoni, il-livell baxx ta’ koerenza, is-sett limitat ta’ drittijiet u l-ostakli għall-mobilità fl-UE nnifisha.

Dan ir-rapport jiżvela nuqqas ġenerali ta’ komunikazzjoni mill-Istati Membri tad-dejta u l-miżuri meħuda bl-applikazzjoni tad-Direttiva, pereżempju dwar il-volumi ta’ ammissjoni, it-testijiet tas-suq tax-xogħol, ir-reklutaġġ etiku, il-limitu tas-salarju[75]. Id-disponibilità ta’ informazzjoni kredibbli, dettaljata u aġġornata hija essenzjali għall-funzjonament tas-sistema tal-Karta Blu tal-UE, pereżempju għall-mobilità fl-UE, u biex tiġi evalwata l-attrazzjoni tagħha.

Ġew żvelati għadd ta’ nuqqasijiet fit-traspożizzjoni tad-Direttiva. Il-Kummissjoni se żżid l-isforzi tagħha biex tiżgura li d-Direttiva tiġi trasposta u implimentata b’mod korrett madwar l-UE. Tliet snin wara l-iskadenza tat-traspożizzjoni tad-Direttva, issa wasal iż-żmien li tibda tintuża b'mod sħiħ. Sabiex jintlaħaq dan l-għan, il-Kummissjoni se torganizza laqgħat mal-Istati Membri u, fejn meħtieġ, tagħmel użu mis-setgħat tagħha skont it-Trattat.

Fl-aħħar nett, il-migranti b’livell għoli ta’ kwalifiki u min iħaddem potenzjali għandhom ikunu infurmati aħjar dwar il-Karta Blu tal-UE. Il-Kummissjoni se tagħmel l-aħjar użu mill-websajts eżistenti, pereżempju l-Portal tal-UE dwar l-Immigrazzjoni, u tinkoraġġixxi lill-SM biex itejbu l-provvista tagħhom ta’ informazzjoni u jqajmu kuxjenza permezz ta’ kanali oħra rilevanti.

Fuq il-bażi tal-informazzjoni disponibbli u fid-dawl tal-perjodu qasir tal-applikazzjoni, l-ebda emendi mhuma proposti bħalissa.

It-Tabella 1: Karti Blu tal-UE fl-2012 u l-2013

Karti Blu tal-UE skont it-tip ta’ deċiżjoni || || Il-membri tal-familja ammessi ta’ detenturi ta’ Karta Blu tal-UE skont it-tip ta’ deċiżjoni

|| Mogħtija || Mġedda || Irtirata || || Mogħtija || Mġedda || Irtirata

|| 2012 || 2013 || 2012 || 2013 || 2012 || 2013 || || 2012 || 2013 || 2012 || 2013 || 2012 || 2013

Total || 3 664 || 15 261 || 146 || 170 || 1 || 0 || || 1 107 || 2 || 108 || 0 || 0 || 0

BE || 0 || 5 || : || || : || || || 0 || || 0 || || 0 ||

BG || 15 || 25 || 0 || || 0 || || || 5 || || 0 || || 0 ||

CZ || 62 || 74 || 1 || 25 || 0 || || || 35 || || 0 || || 0 ||

DE || 2 584 || 14 197 || 0 || || : || || || 270 || || 0 || || : ||

EE || 16 || 12 || 0 || 0 || 0 || 0 || || 18 || 2 || 0 || 0 || 0 || 0

EL || 0 || 0 || || || || || || : || || : || || : ||

ES || 461 || Għad mhux disponibbli || 91 || || 0 || || || 385 || || 82 || || 0 ||

FR || 126 || 304 || 49 || 133 || || || || : || || : || || : ||

IT || 6 || 112 || : || || : || || || : || || : || || : ||

CY || 0 || 0 || 0 || || 0 || || || 0 || || 0 || || 0 ||

LV || 17 || 13 || 0 || 12 || 0 || || || 8 || || 0 || || 0 ||

LT || fis-seħħ: 2013 || 40 || || || || || || || || || || ||

LU || 183 || 306 || 0 || || 0 || || || 223 || || 0 || || 0 ||

HU || 1 || 3 || 0 || || 0 || || || 0 || || 0 || || 0 ||

MT || 0 || Għad mhux disponibbli || 0 || || 0 || || || 0 || || 0 || || 0 ||

NL || 1 || Għad mhux disponibbli || 0 || || 0 || || || 0 || || 0 || || 0 ||

AT || 124 || Għad mhux disponibbli || 5 || || 0 || || || 155 || || 25 || || 0 ||

PL || 2 || 27 || 0 || || 0 || || || 0 || || 0 || || 0 ||

PT || 2 || Għad mhux disponibbli || 0 || || 0 || || || 0 || || : || || : ||

RO || 46 || 119 || 0 || || 0 || || || : || || : || || : ||

SI || 9 || Għad mhux disponibbli || 0 || || 1 || || || 3 || || 1 || || 0 ||

SK || 7 || 8 || 0 || || 0 || || || 5 || || 0 || || 0 ||

FI || 2 || 5 || 0 || || 0 || || || 0 || || 0 || || 0 ||

SE || fis-seħħ: 2013 || 2 || || 0 || || 0 || || || 0 || || 0 || || 0

HR || fis-seħħ: 2013 || 9 || || || || || || || || || || ||

Sorsi:     

L-Eurostat, Il-Karti Blu tal-UE skont it-tip ta’ deċiżjoni, l-impjieg u ċ-ċittadinanza [migr_resbc1]; Il-membri tal-familja ammessi ta’ detenturi ta’ Karta Blu tal-UE skont it-tip ta’ deċiżjoni u ċ-ċittadinanza [migr_resbc2], Estratta fis-16.04.14.

Dejta tal-2013: Mistoqsija Ad Hoc tal-EMN (skadenza għat-tweġibiet 20.02.2014); kuntatti diretti ma' bosta SM.

Noti dwar id-dejta tal-2013:           

Il-LT, ir-RO: Dejta provviżorja

Għad mhux disponibbli    

It-Tabella 2: Karti blu tal-UE skont iċ-ċittadinanza fl-2012

Total ||  3 664    || || ||

L-Asja ||  1 886    || || ||

|| || || L-Asja tan-Nofsinhar[76] ||  869 

|| || || L-Asja tal-Lvant[77] ||  489   

|| || || L-Asja tal-Punent[78] ||  410   

|| || || L-Asja tax-Xlokk[79] ||  99  

|| || || L-Asja Ċentrali[80] ||  19   

L-Ameriki ||  783    || || ||

|| || || L-Amerika ta' Fuq[81] ||  380   

|| || || L-Amerika t’Isfel[82] ||  278   

|| || || L-Amerika Ċentrali[83] ||  118   

|| || || Il-Karibew[84] ||  7 

L-Ewropa ||  690    || || ||

|| || || L-Ewropa tal-Lvant[85] ||  463   

|| || || L-Ewropa t’Isfel[86] ||  227   

L-Afrika ||  252    || || ||

|| || || L-Afrika ta' Fuq[87] ||  174   

|| || || L-Afrika tan-Nofs[88] ||  35  

|| || || L-Afrika t’Isfel[89] ||  18   

|| || || L-Afrika tal-Punent[90] ||  15   

|| || || L-Afrika tal-Lvant[91] ||  10  

L-Oċeanja[92] ||  38  || || ||

Il-bqija ||  15    || || ||

|| || || Mhux magħruf ||  9   

|| || || Mingħajr Stat ||  6   

Sors: L-Eurostat, Il-Karti Blu tal-UE skont it-tip ta’ deċiżjoni, l-impjieg u ċ-ċittadinanza [migr_resbc1];

It-Tabella 3: Tqabbil ma’ skemi nazzjonali għal impjieg bi kwalifiki għoljin

|| L-ewwel permessi skont skemi nazzjonali || || Karti Blu

|| 2008 || 2009 || 2010 || 2011 || 2012 || || 2012 || 2013

Total || 16 157 || 14 980 || 16 999 || 19 604 || 19 988 || || 3 664 || 15 261

BE || 3 577 || 1 202 || 106 || 119 || 98 || || 0 || 5

BG || || || || 0 || 0 || || 15 || 25

CZ || || 18 || 0 || 0 || 69 || || 62 || 74

DE || 96 || 119 || 122 || 177 || 210 || || 2 584 || 14 197

EE || || || 0 || 0 || 0 || || 16 || 12

EL || 0 || 0 || 0 || 0 || 0 || || 0 || 0

ES || 2 884 || 2 071 || 1 244 || 1 650 || 1 136 || || 461 || Għad mhux disponibbli

FR || 1 681 || 2 366 || 2 554 || 3 148 || 3 030 || || 126 || 304

IT || || || 1 984 || 1 563 || 1 695 || || 6 || 112

CY || 393 || 436 || 634 || 551 || 600 || || 0 || 0

LV || || 85 || 114 || 97 || 106 || || 17 || 13

LT || || || 138 || 186 || 225 || || fis-seħħ: 2013 || 40

LU || || 96 || 74 || 102 || 21 || || 183 || 306

HU || || || || 0 || 0 || || 1 || 3

MT || 0 || 0 || || 0 || 0 || || 0 || Għad mhux disponibbli

NL || 6 411 || 4 895 || 5 531 || 5 594 || 5 514 || || 1 || Għad mhux disponibbli

AT || 827 || 575 || 668 || 868 || 1 158 || || 124 || Għad mhux disponibbli

PL || || || 12 || || 314 || || 2 || 27

PT || 288 || 307 || 342 || 282 || 313 || || 2 || Għad mhux disponibbli

RO || || || || 0 || 0 || || 46 || 119

SI || 0 || 0 || || 0 || 0 || || 9 || Għad mhux disponibbli

SK || || 0 || || 0 || 0 || || 7 || 8

FI || || || || 861 || 748 || || 2 || 5

SE || || 2 810 || 3 476 || 4 406 || 4 751 || || fis-seħħ: 2013 || 2

HR || || || || || || || fis-seħħ: 2013 || 9

Sorsi:     

L-Eurostat, Il-Karti Blu tal-UE skont it-tip ta’ deċiżjoni, l-impjieg u ċ-ċittadinanza [migr_resbc1], Estratta fis-17.02.14.

Dejta tal-2013: Mistoqsija Ad Hoc tal-EMN (skadenza għat-tweġibiet 20.02.2014); kuntatti diretti ma' bosta SM.

Dejta dwar skemi nazzjonali: L-Eurostat, Raġunijiet għall-attivitajiet remunerati: Ħaddiema b'ħiliet kbar, l-Ewwel permessi maħruġa għal attivitajiet remunerati skont ir-raġuni, it-tul tal-validità u ċ-ċittadinanza [migr_resocc], Estratta fis-17.02.14; LT: Id-Dipartiment dwar il-Migrazzjoni taħt il-Ministeru tal-Intern tar-Repubblika tal-Litwanja.

Noti dwar id-dejta tal-2013:

il-LT, r-RO: Dejta provviżorja

għ.m.d: għadu mhux disponibbli   

It-Tabella 4: Il-limiti tas-salarju (meta disponibbli) u l-proporzjonijiet meta mqabbla mas-salarji grossi annwali għal kull Stat Membru

[1] Id-Direttiva tal-Kunsill 2009/50/KE tal-25 ta' Mejju 2009, ĠU L 155, 18.6.2009, p. 17-29).

[2] Billi d-Direttiva ma tapplikax għal ċittadini ta' pajjiżi terzi li jidħlu fi Stat Membru (SM)b'impenji li jinsabu fi ftehim internazzjonali li jiffaċilita d-dħul u s-soġġorn temporanju ta' ċerti kategoriji ta' persuni fiżiċi relatati mal-kummerċ u l-investiment [l-Artikolu 3(2)(g)], xejn f'dan ir-rapport ma jkopri il-kategoriji tal-fornituri tas-servizzi bi kwalifiki għolja tal-mode 4.

[3] L-AT, il-BE, il-BG, il-DE, il-EL, FR, l-IT, CY, il-LV, il-LT, il-LU, l-HU, MT, il-PL, il-PT, ir-RO, is-SI, is-SK, il-FI u l-SE.

[4] L-Istati Membri kollha minbarra d-DK, l-IE u r-UK. L-implimentazzjoni tal-HR wara l-adeżjoni tagħha għad trid tiġi vvalutata iżda daħlet fis-seħħ f’waqtha, fl-1 ta’ Lulju 2013.

[5] L-AT, il-BE, ir-CZ, il-DE, l-EE, il-EL, ES, il-FI, FR, il-NL, il-LT, il-LU, is-SK, is-SI u l-SE

[6] il-BG, CY, l-EE, il-EL u r-RO

[7] L-AT, il-BE, ir-CZ, il-DE, il-EL, il-FI, FR, l-HU, l-IT, il-LU, il-LV, il-NL, il-PT, l-SE u s-SI

[8] Il-Komunikazzjoni hija bbażata fuq studju mwettaq għall-Kummissjoni.

[9] L-Artikolu 21.

[10] Erba' SM ttrasponew fil-ħin, ħamsa sal-aħħar tal-2011, tmienja fl-ewwel nofs tal-2012, ħamsa fit-tieni nofs tal-2012, u tnejn biss fl-2013.

[11] http://epp.eurostat.ec.europa.eu/portal/page/portal/population/data/database

[12] Il-HR, il-LT, l-SE: dħul fis-seħħ fl-2013.

[13] Statistiċi proviżorji u mhux kompluti għal 15-il SM minn talba Ad Hoc tal-EMN (tweġiba bi skadenza 20.02.2014); kuntatti diretti mal-awtoritajiet tal-migrazzjoni ta’ diversi SM. 

[14] Dejta Preliminari għall-DE.

[15] Ippreżentat biss mill-BG, ir-CZ, l-EE, il-FI, l-HU, l-IT, il-LV, il-PL, ir-RO u s-SI.

[16] Dawn ikunu studjaw jew tħarġu fil-DE, jew ikunu biddlu l-istatus minn permess għal impjieg ieħor.

[17] Sors: Wanderungsmonitoring: Migration nach Deutschland, 1. Halbjahr 2013. http://www.bamf.de/SharedDocs/Anlagen/DE/Publikationen/Broschueren/wanderungsmonitoring-I-halbjahr-2013.html

[18] "Mangelberufe": professjonijiet li għalihom tkun identifikata ħtieġa partikolari fil-DE.

[19] "Regelberufe": il-professjonijiet kollha l-oħra.

[20] Is-sess mhux magħruf għal tlieta.

[21] Għal aktar informazzjoni: EMN Study, Attracting Highly Qualified and Qualified Third-Country Nationals, Synthesis Report, 2013, pp. 16-21. http://ec.europa.eu/dgs/home-affairs/what-we-do/networks/european_migration_network/reports/docs/emn-studies/attracting/emnsr_attractinghqworkers_finalversion_23oct2013_publication.pdf

[22] Il-BE, l-EE, il-FI, il-EL, l-IT, il-LT, il-LU, is-SK, is-SI u l-SE għandhom dispożizzjonijiet speċifiċi f’politiki ta’ migrazzjoni usa’; l-AT, ir-CZ, il-DE, ES, FR, il-NL u l-PT għandhom politiki separati mmirati lejn il-migranti b’livell għoli ta’ kwalifiki.

[23] Pereżempju: Il-Persunal Eżekuttiv u l-Impjegati Maniġerjali; Ir-Riċerkaturi u x-Xjentisti; jew it-Trasferiti Intrakorporattivi.

[24] Pereżempju: It-Teknoloġija tal-Informatika u l-Komunikazzjoni; Il-Kura tas-saħħa; Id-Dinja Akkademika; Is-Servizzi Finanzjarji; jew l-Inġinerija.

[25] Fl-2012, fl-SE 47 % tal-migranti ġew ikklassifikati fill-Klassifikazzjoni Standard Internazzjonali tal-Edukazzjoni (ISCED) tal-UNESCO fil-livelli 5-6 (lawrea mill-università u/jew PhD) u 35 % kellhom impjiegi fil-gruppi ISCO 1-3 (maniġers, professjonisti, teknixins u professjonisti assoċjati). Fil-LU 54 % kienu ISCED 5-6 u 53 % kienu ISCO 1-3.

[26] CY, l-IT, il-LV, MT, il-PL ma jiġbdux proporzjon akbar ta’ migranti b’livell għoli ta’ kwalifiki, ħlief CY fejn 28 % kienu kklassifikati fil-livell ISCED 5-6 fl-2012.

[27] Il-BG, CY, l-EE, il-EL, l-HU, MT, ir-RO u s-SI.

[28] L-Artikolu 20(1):

[29] Il-BG, l-EE, il-EL, l-HU, MT.

[30] L-EE, il-EL, l-HU, MT u r-RO. CY tipprojbixxi l-ammissjoni ta’ ħaddiema bi kwalifiki għolja iżda l-Kunsill tal-Ministri jista', f’każi eċċezjonali, jippermetti l-ammissjoni tagħhom skont is-settur, il-professjoni, l-ispeċjalizzazzjoni u/jew il-pajjiż ta’ oriġini (reviżjoni possibbli wara kull sena).

[31] CY: volum huwa attwalment stabbilit għal żero; il-EL: minħabba li mhemmx domanda l-EL għadha ma attivatx is-sistema tagħha biex tiddetermina, permezz ta' deċiżjoni ministerjali, in-numru massimu ta' impjiegi għal impjiegi b'livell għoli ta' kwalifiki mogħtija lil ċittadini ta' pajjiżi terzi.

[32] DE tipprevedi l-għażla li tuża din id-deroga permezz ta’ regolament (attwalment le).

[33] L-Artikolu 20(1) u 8(4)

[34] Sors: EMN Study, Attracting Highly Qualified and Qualified Third-Country Nationals, Synthesis Report, 2013, p. 23.

[35] DE tipprevedi l-għażla li tuża din id-deroga permezz ta’ regolament (attwalment le).

[36]MT: mill-inqas 10 snin esperjenza professjonali,

[37] L-IT tirrikjedi li l-professjonisti jaqgħu taħt il-livelli 1, 2 u 3 tal-klassifikazzjoni nazzjonali tal-professjonijiet ISTAT CP2011.

[38] Ħlief il-LU (l-ebda theddida għar-relazzjonijiet internazzjonali) u r-RO (l-ebda rekord kriminali u l-applikant irid ikun f’kundizzjoni medika tajba biex iwettaq l-attività ta’ xogħol speċifika).

[39] Ħlief il-EL, il-FI, il-PT u l-SE.

[40] Ir-RO (erba' darbiet) u l-LT (darbtejn).

[41] Ħlief il-NL u l-PL: ammont eżatt li huwa indiċjat u ppubblikat kull sena.

[42] Pereżempju: Il-DE: il-livell tas-salarju jammonta għal 2/3 tal-limitu valutazzjoni kontribuzzjoni annwali għall-fond tal-pensjoni statutorja (li huwa marbut mas-salarju gross medju); L-IT: tliet darbiet il-livell minimu għall-eżenzjoni mill-parteċipazzjoni fl-infiq għall-kura tas-saħħa; Il-PT: 1,5 darbiet is-salarju gross medju nazzjonali annwali jew tliet darbiet l-Indiċizzazzjoni tal-Għajnuna Soċjali (IAS).

[43] Id-dejta dwar id-dħul gross annwali (għal kull min iħaddem) ippubblikata mill-Eurostat għall-kumpaniji b’10 impjegati jew iktar [earn_ses 10_an]. Din id-dejta tinġabar kull erba’ snin permezz tal-Istħarriġ dwar l-Istruttura tal-Qligħ (SES) u tipprovdi sors komparabbli madwar l-UE.

[44] L-Artikolu 20(3) u 8(11)

[45] http://ec.europa.eu/immigration/

[46] Kontrolli mwettqa fi Frar 2014.

[47] L-Artikolu 21.

[48] L-Artikolu 5(1)(a).

[49] L-Artikoli 7(2), 8(2), 9(1)-(3), 11(3), 14(3) u 20(2).

[50] Diversi SM jorbtu l-perjodu ta’ validità tal-Karta Blu tal-UE mat-tul ta’ żmien tal-kuntratt tax-xogħol b’żieda ta’ tliet xhur u jistabbilixxu perjodu massimu (bejn sena u erba' snin; ħames snin fil-LV) minflok perjodu standard. Dan ma jistipulax b’mod ċar perjodu standard ta’ validità kif meħtieġ.

[51] Ħlief fil-BE, FR u ES.

[52] Il-kundizzjoni għall-ammissjoni fl-Artikolu 5(1)(a) teħtieġ tul ta’ żmien minimu ta’ sena. Jidher li l-AT, il-BG, CY, il-DE, l-HU, il-LT u l-LV ma jirrikjedux tul ta’ żmien minimu tal-kuntratt tax-xogħol jew offerta ta’ impjieg fil-leġiżlazzjoni tagħhom.

[53] Il-PT: sena inizjalment + sentejn għat-tiġdid; ES sena inizjalment + sentejn għat-tiġdid; Il-BE: 13-il xahar inizjalment + tliet snin għat-tiġdid; il-EL sentejn inizjalment + tliet snin għat-tiġdid; l-EE: sentejn u tliet xhur inizjalment + erba' snin u tliet xhur għat-tiġdid.

[54] Għal aktar tagħrif dwar it-testijiet tas-suq tax-xogħol ara: EMN tinforma, Approċċi u għodod użati mill-Istati Membri biex jidentifikaw il-ħtiġijiet tas-suq tax-xogħol, Diċembru 2013. http://ec.europa.eu/dgs/home-affairs/what-we-do/networks/european_migration_network/reports/docs/emn-studies/emn-informs/emn_inform_on_labour_market_tests_5dec2013_final.pdf; u l-Istudju tal-EMN, ntra-EU Mobility of third-country nationals, 2013, pp 35-37. http://ec.europa.eu/dgs/home-affairs/what-we-do/networks/european_migration_network/reports/docs/emn-studies/intra-eu-mobility/emn-synthesis_report_intra_eu_mobility_final_august_2013.pdf

[55] Ħlief ir-CZ, il-DE, ES, il-FI, FR, il-LV, il-NL u l-PT.

[56] Ħlief fil-LV u s-SI.

[57] L-Artikolu 9(3)(a).

[58] Il-BE, il-BG, CY, l-EE, il-EL, ES, il-FI, l-HU, l-IT, il-LT, il-LU, MT, il-NL, il-PT, ir-RO u s-SI.

[59] L-Artikolu 9(3)(b)

[60] L-Artikolu 9(3)(c).

[61] L-Artikolu 9(3)(d).

[62] Ħlief fil-BG fejn l-applikazzjonijiet jistgħu jsiru biss fit-territorju.

[63] Il-EL teħtieġ applikazzjoni minn qabel għal viża barra t-territorju u mbagħad applikazzjoni formali fit-territorju, b’viża għall-ħruġ ta’ Karta Blu.

[64] Ħlief il-BG, il-EL, ES, FR, l-IT, il-LV, il-PL u r-RO.

[65] Jidher li dispożizzjoni nazzjonali korrispondenti kienet teżisti fil-LU u l-SE qabel l-adozzjoni tad-Direttiva.

[66] Il-BE, CY, ir-CZ, il-DE, il-EL, il-FI, FR, l-IT, l-HU, il-LU, MT, il-NL u l-SE.

[67] CY: l-uniku rikors possibli huwa għall-Qorti Suprema għal ommissjoni minn awtorità, l-Artikolu 146 tal-Kostituzzjoni; L-HU: il-liġi ġenerali amministrattiva biss: awtorità superviżorja tinvestiga u tordna awtorità taħtha tieħu deċiżjoni fi żmien tmint ijiem, u rimborż tal-miżata jekk id-dewmien ma jistax ikun attribwit lill-applikant.

[68] Ħlief il-BE, il-BG, CY, ir-CZ, il-EL, il-LV, MT, il-PL u l-SE

[69] Ħlief il-FI u FR.

[70] Ħlief il-DE, l-EE, ES, il-FI, FR, l-HU, l-IT, il-LT u s-SK.

[71] Il-Kummissjoni qed tagħmel analiżi ulterjuri u qed titlob kjarifika mingħand l-Istati Membri.

[72] Ħlief CY, il-EL, FR, MT u s-SK. .

[73] Id-dejta provviżorja għall-ewwel disa' xhur tal-2013 (Mistoqsija Ad Hoc tal-EMN, tweġiba bi skadenza 20.02.2014).

[74] Il-DE fl-2013: 6 716 (75,56 %) ta’ taħt il-35 sena.

[75] L-Artikoli 5(5) u 20(1) (rigward l-Artikoli 6, 8(2), 8(4) u 18(6)) u 22 (rigward l-Artikoli 16, 18 u 20).

[76] L-Afganistan, il-Bangladexx, l-Indja, l-Iran, in-Nepal, il-Pakistan, is-Sri Lanka.

[77] Iċ-Ċina (inkluża Ħong Kong), il-Ġappun, il-Mongolja, il-Korea ta’ Fuq, il-Korea t’Isfel, it-Tajwan.

[78] L-Armenja, l-Ażerbajġan, il-Ġeorġja, l-Iraq, l-Iżrael, il-Ġordan, il-Libanu, l-Arabja Sawdija, is-Sirja, it-Turkija, l-Emirati Għarab Magħquda, il-Jemen.

[79] Il-Kambodja, l-Indoneżja, il-Malasja, il-Filippini, Singapor, it-Tajlandja, il-Vjetnam.

[80] Il-Kazakistan, il-Kirgiżistan, it-Taġikistan, l-Uzbekistan.

[81] Il-Kanada, l-Istati Uniti.

[82] L-Arġentina, il-Bolivja, il-Brażil, iċ-Ċili, il-Kolombja, l-Ekwador, il-Gujana, il-Paragwaj, il-Perù, l-Urugwaj, il-Venezwela.

[83] Il-Kosta Rika, El Salvador, il-Gwatemala, il-Messiku, il-Panama.

[84] Kuba, ir-Repubblika Dominikana, Ħajti, Trinidad u Tobago.

[85] Il-Bjelorussja, il-Moldova, ir-Russja, l-Ukraina.

[86] L-Albanija, il-Bożnja-Ħerzegovina, il-Kroazja, dik li kienet ir-Repubblika Jugoslava tal-Maċedonja , il-Kosovo skont ir-Riżoluzzjoni tal-Kunsill tas-Sigurtà tan-NU 1244/99, il-Montenegro u s-Serbja.

[87] L-Alġerija, l-Eġittu, il-Libja, il-Marokk, it-Tuneżija.

[88] L-Angola, il-Kamerun, il-Gabon.

[89] L-Afrika t’Isfel.

[90] Il-Benin, il-Burkina Faso, Il-Kosta tal-Avorju, il-Gana, il-Mawritanja, in-Niġerja, is-Senegal.

[91] L-Etjopja, il-Madagaskar, il-Mawrizju, it-Tanzanija, iż-Żambja, iż-Żimbabwe.

[92] L-Awstralja/New Zealand.