This document is an excerpt from the EUR-Lex website
Document 52013PC0663
Proposal for a COUNCIL DECISION regarding transitional EDF management measures from 1 January 2014 until the entry into force of the 11th European Development Fund
Proposta għal DEĊIŻJONI TAL-KUNSILL dwar miżuri ta' tranżizzjoni tal-ġestjoni tal-FEŻ mill-1 ta’ Jannar 2014 sad-dħul fis-seħħ tal-11-il Fond Ewropew għall-Iżvilupp
Proposta għal DEĊIŻJONI TAL-KUNSILL dwar miżuri ta' tranżizzjoni tal-ġestjoni tal-FEŻ mill-1 ta’ Jannar 2014 sad-dħul fis-seħħ tal-11-il Fond Ewropew għall-Iżvilupp
/* COM/2013/0663 final - 2013/0319 (NLE) */
Proposta għal DEĊIŻJONI TAL-KUNSILL dwar miżuri ta' tranżizzjoni tal-ġestjoni tal-FEŻ mill-1 ta’ Jannar 2014 sad-dħul fis-seħħ tal-11-il Fond Ewropew għall-Iżvilupp /* COM/2013/0663 final - 2013/0319 (NLE) */
MEMORANDUM TA’ SPJEGAZZJONI Skont l-Artikolu 1(5) tal-Ftehim Intern
għall-10 FEŻ, il-fondi tal-10 FEŻ ma għandhomx ikunu
impenjati wara l-31 ta’ Diċembru 2013, sakemm il-Kunsill ma
jiddeċidix mod ieħor b’mod unanimu, fuq proposta mill-Kummissjoni. Il-Ftehim Intern li jistabbilixxi
l-ħdax-il Fond Ewropew għall-Iżvilupp (11-il FEŻ) ġie
ffirmat mill-Istati Membri, imlaqqgħin fil-Kunsill,
f'Ġunju 2013. Dan il-Ftehim Intern jidħol biss
fis-seħħ wara r-ratifika mill-Istati Membri kollha. Dan il-proċess probabbilment mhux se jiġi konkluż
qabel Jannar 2014. Għalhekk, il-Kummissjoni qed tipproponi
miżuri ta' tranżizzjoni ("Faċilità ta'
Tranżizzjoni") sabiex tiżgura d-disponibbiltà tal-fondi għall-kooperazzjoni
mal-pajjiżi tal-Afrika, tal-Karibew u tal-Paċifiku u mal-Pajjiżi
u Territorji extra-Ewropej, bejn
Jannar 2014 u d-dħul fis-seħħ tal-Ftehim Intern li
jistabbilixxi l-11-il FEŻ. Din il-faċilità tiġi
iffinanzjata mill-bilanċi u l-fondi diżimpenjati tal-10 FEŻ u
dawk preċedenti. Huwa propost ukoll li
fondi impenjati taħt din il-Faċilità ta’ Tranżizzjoni jitqiesu
taħt il-11-il FEŻ, li jfisser li huma ma jikkostitwixxux riżorsi
addizzjonali fil-11-il-FEŻ, u li l-miżuri meħtieġa
jiġu adottati mill-aktar fis possibbli għall-ġestjoni
finanzjarja u operattiva ta’ din il-Faċilità ta' Tranżizzjoni. Il-Kummissjoni għalhekk
tissuġġerixxi li l-Kunsill jadotta d-deċiżjoni
mehmuża. 2013/0319 (NLE) Proposta għal DEĊIŻJONI TAL-KUNSILL dwar miżuri ta' tranżizzjoni
tal-ġestjoni tal-FEŻ mill-1 ta’ Jannar 2014
sad-dħul fis-seħħ tal-11-il Fond Ewropew
għall-Iżvilupp IL-KUNSILL TAL-UNJONI EWROPEA, Wara li kkunsidra t-Trattat dwar l-Unjoni
Ewropea u t-Trattat dwar il-Funzjonament tal-Unjoni Ewropea, Wara li kkunsidra l-Ftehim ta’ Partenarjat
bejn il-membri tal-Grupp ta' Stati Afrikani, tal-Karibew u tal-Paċifiku
minn naħa waħda, u l-Komunità Ewropea u l-Istati Membri tagħha
min-naħa l-oħra, iffirmat f'Cotonou
fit-23 ta’ Ġunju 2000[1], Wara li kkunsidra d-Deċiżjoni
tal-Kunsill dwar l-assoċjazzjoni tal-pajjiżi u t-territorji lil hinn
mill-baħar mal-Komunità Ewropea ("Deċiżjoni dwar
Assoċjazzjoni lil hinn mill-baħar")[2], Wara li kkunsidra l-Ftehim Intern bejn
ir-Rappreżentanti tal-Gvernijiet tal-Istati Membri, imlaqqgħin
fil-Kunsill, dwar il-finanzjament tal-għajnuna Komunitarja taħt
il-qafas finanzjarju pluriennali għall-perjodu 2008 sal-2013 b'konformità
mal-Ftehim ta' Sħubija AKP-KE u dwar l-allokazzjoni ta' assistenza
finanzjarja għall-Pajjiżi u Territorji Extra-Ewropej li
għalihom tapplika l-Parti Erbgħa tat-Trattat tal-KE[3] (minn hawn 'il quddiem
imsejjaħ l-“Għaxar Ftehim Intern tal-FEŻ”), u b'mod
partikolari l-Artikolu 1(5) tiegħu, Wara li kkunsidra l-proposta mill-Kummissjoni
Ewropea, Billi: (1) L-Artikolu 1(5)
tal-Ftehim Intern għall-10 FEŻ, jistipula li l-fondi tal-10 FEŻ
ma għandhomx ikunu impenjati wara
l-31 ta’ Diċembru 2013, sakemm il-Kunsill ma
jiddeċidix mod ieħor b’mod unanimu, fuq proposta mill-Kummissjoni. (2) Il-Paragrafu 5
tal-Anness Ib[4]
(Qafas finanzjarju pluriennali għall-perjodu
mill-2008 sal-2013) tal-Ftehim ta' Sħubija AKP-KE jistipula li l-fondi tal-10 FEŻ, għajr l-ammonti allokati
għall-Faċilità tal-Investiment, bl-esklużjoni tas-sussidji
relatati tar-rati tal-imgħax, ma għandhomx ikunu impenjati wara
l-31 ta' Diċembru 2013, sakemm il-Kunsill tal-Unjoni
Ewropea ma jiddeċidix mod ieħor b'mod unanimu, fuq proposta
mill-Kummissjoni. (3) L-Artikolu 1(2)
tal-Anness IIAa tad-Deċiżjoni tal-Kunsill
tas-27 ta’ Novembru 2001 dwar l-assoċjazzjoni
tal-pajjiżi u t-territorji lil hinn mill-baħar mal-Komunità Ewropea
jistipula li l-fondi tal-10 FEŻ ma għandhomx ikunu impenjati wara
l-31 ta’ Diċembru 2013, sakemm il-Kunsill ma
jiddeċidix mod ieħor b’mod unanimu, fuq proposta mill-Kummissjoni[5]. (4) L-Artikolu 13(3)
tal-Ftehim Intern għall-10 FEŻ jipprevedi li huwa konkluż
għall-istess tul ta’ żmien bħall-qafas finanzjarju pluriennali
tal-Ftehim ta' Sħubija AKP-KE, u li jibqa’ fis-seħħ sakemm ikun
meħtieġ sabiex l-operazzjonijiet kollha ffinanzjati taħt
il-Ftehim ta' Sħubija AKP-KE u d-Deċiżjoni
tal-Assoċjazzjoni u l-imsemmi qafas finanzjarju pluriennali jiġu
eżegwiti b’mod sħiħ. (5) L-organizzazzjoni u
l-funzjonament tas-Servizz Ewropew għall-Azzjoni Esterna huma deskritti
fid-Deċiżjoni tal-Kunsill 2010/427/UE. (6) Id-dħul
fis-seħħ tal-11-il FEŻ jista’ jiġi ttardjat sa wara
l-1 ta’ Jannar 2014. Għalhekk, huwa xieraq li jiġu
previsti miżuri ta' tranżizzjoni ("Faċilità ta'
Tranżizzjoni") sabiex tiġi żgurata d-disponibbiltà
tal-fondi għall-kooperazzjoni mal-pajjiżi tal-Afrika, tal-Karibew u
tal-Paċifiku u mal-Pajjiżi u t-Territorji extra-Ewropej, bejn
Jannar 2014 u d-dħul fis-seħħ tal-Ftehim Intern, li
għandhom jiġu ffinanzjati mill-bilanċi u l-fondi
diżimpenjati tal-10 FEŻ u dawk ta' qablu. ADOTTAT DIN ID-DEĊIŻJONI: Artikolu 1 Sakemm jidħol fis-seħħ
il-Ftehim Intern tal-11-il FEŻ miżuri ta' tranżizzjoni fil-forma
ta' programmi ta' azzjoni, miżuri individwali, miżuri speċjali
għas-sħab tal-AKP, deċiżjonijiet ta' finanzjament
f'appoġġ għall-OCTs, u programmi ta' azzjoni speċifiċi
għas-sostenn tan-nefqa jiġu ffinanzjati minn Faċilità ta'
Tranżizzjoni għall-11-il FEŻ, magħmula minn bilanċi
mill-FEŻ preċedent u minn fondi diżimpenjati minn proġetti
ta' dawn il-FEŻ. Din il-Faċilità ta' Tranżizzjoni tista’ wkoll
tkopri l-għotjiet biex ikunu ffinzanzjati s-sussidji fuq ir-rati tal-imgħax
u assistenza teknika marbuta ma’ proġetti allokati lill-Bank Ewropew
tal-Investiment kif stipulat fl-Artikoli 1, 2 u 4 tal-Anness II
tal-Ftehim ta’ Sħubija AKP-UE u fid-Deċiżjoni
tal-Assoċjazzjoni extra-Ewropea l-ġdida. Dawn il-miżuri
tranżizzjonali ta' finanzjament għandu jkollhom l-għan li
jiffaċilitaw l-implimentazzjoni tad-dokumenti ta’ programmazzjoni, u li
jwieġbu għar-rekwiżiti tal-għajnuna ta’ emerġenza. Fondi impenjati skont il-Faċilità ta’
Tranżizzjoni jkunu kkontabilizzati taħt il-11-il FEŻ. Is-sehem
tal-kontribuzzjonijiet tal-Istati Membri ddikjarat fl-Artikolu 1(2)(a)
tal-Ftehimiet Interni tad-9 u l-10 FEŻ jitnaqqsu skont dan. Artikolu 2 Minkejja l-istat tal-proċess ta’ ratifika
nazzjonali tal-Ftehim Intern mill-Istati Membri, il-Kunsill jadotta mill-aktar
fis possibbli r-regolamenti dwar l-implimentazzjoni tal-11-il-FEŻ, li
jinkludu l-miżuri għall-ġestjoni operattiva u finanzjarja ta’
din il-Faċilità ta' Tranżizzjoni. Sal-adozzjoni ta’ dawn
ir-regolamenti, għall-implimentazzjoni tal-Faċilità ta' Tranżizzjoni,
ir-Regolament tal-Kunsill (KE) Nru 617/2007
tal-14 ta’ Mejju 2007 dwar l-implimentazzjoni tal-10 FEŻ u
r-Regolament tal-Kunsill (KE) Nru 215/2008
tat-18 ta’ Frar 2008 dwar ir-Regolament Finanzjarju applikabbli
għall-10 FEŻ ikomplu japplikaw. Artikolu 3 L-applikazzjoni ta’ din id-Deċiżjoni
tkun skont id-Deċiżjoni tal-Kunsill 2010/427/UE, li tistabbilixxi
l-organizzazzjoni u l-funzjonament tas-Servizz Ewropew għall-Azzjoni
Esterna. Artikolu 4 Din id-Deċiżjoni tidħol
fis-seħħ fil-jum tal-pubblikazzjoni tagħha f'Il-Ġurnal
Uffiċjali tal-Unjoni Ewropea. Hija applikabbli
mill-1 ta’ Jannar 2014 sad-dħul fis-seħħ
il-Ftehim Intern tal-11-il FEŻ. Magħmul fi Brussell, Għall-Kunsill Il-President [1] ĠU
L 317, 15,12.2000, p. 3. Il-Ftehim kif emendat mill-Ftehim iffirmat
fil-Lussemburgu fil-25 ta' Ġunju 2005
(ĠU L 287,
28.10.2005, p. 4) u mill-Ftehim iffirmat f'Ouagadougou
fit-22 ta' Ġunju 2010 (ĠU L 287, 4.11.2010,
p. 3). [2] Id-Deċiżjoni
tal-Kunsill tas-27 ta’ Novembru 2001, 2001/822/KE, ĠU L 314, 30.11.2001, ;p. 1, emendata
mid-Deċiżjoni tal-Kunsill 2007/249/KE
tad-19 ta’ Marzu 2007, ĠU L 109, 26/04/2007,
p. 33. [3] ĠU
L 247, 9,9.2006, p. 32. [4] L-Anness Ib
kif inkluż fl-Anness tad-Deċiżjoni Nru 1/2006 tal-Kunsill
tal-Ministri AKP-KE (ĠU L 247, tad-9.9.2006, p. 22). [5] ĠU
L 314, tat-30.11.2001 p. 1, kif emendata bid-Deċiżjoni
tal-Kunsill tad-19 ta’ Marzu 2007 (ĠU L 109,
26.4.2007, p. 37)