52013DC0298

KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI

STRATEĠIJA EWROPEA GĦALL-KOMPONENTI U S-SISTEMI MIKRO U NANOELETTRONIĊI

1.           Introduzzjoni

Is-sistemi u l-komponenti mikro u nanoelettroniċi[1] mhumiex biss essenzjali għall-prodotti u s-servizzi diġitali; dawn jirfdu wkoll l-innovazzjoni u l-kompetittività ta' kull settur ekonomiku ewlieni. Il-karozzi, l-ajruplani, u l-ferroviji ta' żmienna huma aktar sikuri, aktar effiċjenti fl-enerġija u komdi bis-saħħa tal-biċċiet elettroniċi li jkun fihom. Dan jgħodd ukoll għal setturi kbar bħal tat-tagħmir mediku u tas-saħħa, it-tagħmir domestiku, in-netwerks tal-enerġija u s-sistemi tas-sigurtà. Minħabba f'hekk il-mikro u n-nanoelettronika huma Teknoloġija Abilitanti Essenzjali (KET)[2] u huma essenzjali għat-tkabbir u l-impjiegi fl-Unjoni Ewropea (UE).

Din il-Komunikazzjoni tistabbilixxi strateġija li ssaħħaħ il-kompetittività u t-tkabbir tal-kapaċità tal-industrija tal-mikro u n-nanoelettronika fl-Ewropa. Fuq l-istess ħsieb tal-politika industrijali aġġornata[3], l-għan huwa li l-Ewropa tibqa' fuq quddiem nett fid-disinn u l-manifattura ta' dawn it-teknoloġiji u biex jagħmlu l-ġid lill-ekonomija kollha.

L-istrateġija tifrex strumenti politiċi fuq livell reġjonali, nazzjonali u tal-UE inkluż appoġġ finanzjarju għar-riċerka, l-iżvilupp u l-innovazzjoni (R&D&I), aċċess għall-kapital tal-investiment (CAPEX) kif ukoll titjib u użu aħjar tal-leġiżlazzjoni rilevanti. L-istrateġija ssejjes fuq il-vantaġġi[4] tal-Ewropa u fuq raggruppamenti reġjonali ta' eċċellenza. Din tkopri l-katina kollha tal-valur mill-materjal u t-tagħmir tal-manifattura sad-disinn u l-produzzjoni volumenuża tas-sistemi u l-komponenti mikro u nanoelettroniċi.

L-importanza ta' dan il-qasam u l-isfidi li jkollhom il-partijiet interessati fl-UE jeħtieġu azzjonijiet urġenti u b'saħħithom ħalli l-ebda ħolqa tal-katini Ewropej tal-innovazzjoni u l-valur ma tkun dgħajfa. Qed tingħata attenzjoni biex:

· L-investimenti jiġu attirati u mmexxija b'tali mod li jappoġġaw pjan direzzjonali Ewropew għal tmexxija industrijali fil-mikro u n-nanoelettronika.

· Jitwaqqaf mekkaniżmu fil-livell tal-UE li jgħaqqad u jiffoka l-appoġġ lill-R&D&I fil-mikro u n-nanoelettronika mingħand l-Istati Membri, l-UE u s-settur privat.

· Jittieħdu miżuri li jsaħħu l-kompetittività tal-Ewropa biex jinħoloq kuntest ekwu globali fejn tidħol l-għajnuna mingħand l-istat, li jappoġġaw l-iżvilupp tan-negozji u l-SMEs, u li jindirizzaw l-iskarsezza tal-ħiliet.

2.           Għalfejn il-mikro u n-nanoelettronika huma essenzjali għall-Ewropa?

2.1.        Industrija importanti b'potenzjal sinifikanti għat-tkabbir u impatt ekonomiku qawwi

Il-mikro u n-nanoelettronika jirfdu parti sinifikanti tal-ekonomija dinjija. Ir-rwol tagħhom se jibqa' jikber waqt li l-prodotti u s-servizzi futuri se jsiru aktar diġitali, kif jidher hawn taħt.

· Biss biss, fl-2012 il-fatturat globali tas-settur kien madwar EUR 230 biljun[5]. Il-valur tal-prodotti li jkun fihom komponenti mikro u nanoelettroniċi jirrappreżenta madwar EUR 1 600 biljun tal-valur mad-dinja kollha.

· Minkejja l-ostakli ekonomiċi u finanzjarji riċenti, mill-2000 'il hawn, is-suq dinji tal-mikro u n-nanoelettronika kiber b'5% fis-sena. Għall-bqija ta' dan id-deċennju qed jitbassar aktar tkabbir li għall-inqas ikollu l-istess daqs.

· Ir-ritmu tal-innovazzjoni f'dan il-qasam huwa wieħed mill-muturi ewlenin li jżid ir-rati ta' tkabbir tas-settur diġitali kollu li b'kollox illum għandu valur ta' madwar EUR 3 000 biljun mad-dinja kollha[6].

· Fl-Ewropa, il-mikro u n-nanoelettronika huma responsabbli għal 200 000 impjieg dirett u għal aktar minn miljun impjieg indirett[7] filwaqt li d-domanda għall-ħiliet ma ssibx temma.

· L-impatt tal-mikro u n-nanoelettronika fuq l-ekonomija kollha huwa stmat 10% tal-PDG dinji[8].

2.2.        Teknoloġija ewlenija biex jiġu indirizzati l-isfidi tas-soċjetà

Il-mikro u n-nanoelettronika mhumiex biss il-qawwa tal-informatika fil-kompjuters u l-apparat mobbli. Dawn jissodisfaw ukoll il-funzjonijiet tas-sensi u l-attwazzjoni[9] li fost l-oħrajn hemm fil-miters u l-grilji intelliġenti għal konsum inqas tal-enerġija, jew fl-impjanti u fit-tagħmir mediku sofistikat li jtejjeb il-kura tas-saħħa u jgħin lill-anzjani. Dawn huma s-sisien għal sigurtà aħjar, għas-sikurezza u l-effiċjenza tas-sistemi kollha tat-trasport u għas-sorveljanza ambjentali.

Fi żmienna, l-ebda sfida tas-soċjetà ma tista' tingħeleb mingħajr l-elettronika.

3.           Qafas industrijali li qed jinbidel għall-mikro u n-nanoelettronika

3.1.        Il-progress fit-teknoloġija toffri opportunitajiet ġodda

Hemm żewġ binarji ewlenin li jikkaratterizzaw l-iżvilupp fit-teknoloġija u jimbuttaw il-bidla fin-negozju. L-ewwel binarju jirfina ċ-ċokon tal-komponenti ta' skala nano skont pjan direzzjonali internazzjonali għall-iżvilupp fit-teknoloġija li stabbilixxiet l-industrija[10]. Dan il-binarju jissejjaħ "aktar Moore" u għandu l-għan li jtejjeb il-prestazzjoni u jnaqqas l-ispejjeż u l-konsum tal-enerġija[11].

It-tieni binarju għandu l-għan li jiddiversifika l-funzjonijiet ta' ċippa billi jintegra flimkien elementi ta' skala mikro bħat-tranżisters tal-enerġija u s-swiċċijiet elettromekkaniċi. Dan il-binarju jissejjaħ "aktar minn Moore". Huwa s-sies tal-innovazzjonijiet f'ħafna oqsma importanti bħall-bini effiċjenti fl-enerġija, il-bliet intelliġenti u s-sistemi tat-trasport intelliġenti.

Barra minn hekk, qed jiġu riċerkati teknoloġiji u arkitetturi distruttivi, għalkollox ġodda. Ħafna drabi dan il-binarju jissejjaħ "lil hinn mis-CMOS"[12]. Dan jeħtieġ riċerka multidixxiplinari, ħakma sew tal-fiżika u l-kimika u ħila eċċellenti fl-inġinerija.

Barra minn hekk, sabiex jonqsu l-ispejjeż tal-produzzjoni, l-industrija żżid ukoll pass pass id-daqs tal-appoġġ materjali[13] għall-produzzjoni tal-mikro u n-nanoelettronika. Hemm bżonn li jsiru investimenti enormi fl-R&D&I u l-CAPEX għal dawn il-bidliet fl-istandards tal-manifattura.

3.2.        Żieda fl-ispejjeż tal-R&D&I u ambjent tal-R&D&I aktar kompetittiv

Aktar ċokon ifisser aktar spejjeż għall-R&D&I u l-CAPEX. L-intensità tal-R&D&I tal-industrija tal-mikro u n-nanoelettronika żdiedet minn 11% fl-2000 għal 17% fl-2009[14]. Jidher li din ix-xejra se tibqa'. Dawn l-investimenti kbar jistgħu jiġu sostnuti biss bil-produzzjoni tal-volum.

Bħalissa fl-industrija qed issir il-konsolidazzjoni. Din tista' toħloq sitwazzjoni li ftit atturi biss jitħallew barra mid-dinja u mnejn ħadd ma jitħalla barra mill-Ewropa. Huwa stmat li hemm bżonn sehem ta' 10 % tas-suq dinji biex kumpanija tas-semikondutturi ssostni l-investiment biex tlaħħaq mal-iżvilupp teknoloġiku.

Minħabba f'hekk inħolqu alleanzi globali bejn kumpaniji, ngħidu aħna l-alleanza IBM fi New York għat-teknoloġija tal-wejfer ta' 300 mm u l-Global 450 Consortium li jiffoka fuq il-bidla għal wejfers ta' 450 mm. Fl-Ewropa, l-iżvilupp teknoloġiku tal-ġenerazzjoni li jmiss jinsab fiċ-ċentri mexxejja tar-riċerka bħal LETI[15], Fraunhofer[16], u imec[17] li jikkoperaw mill-qrib mal-atturi industrijali. Ir-riċerka stess qed issir dejjem aktar globali peress li l-Asja qed issir il-post għad-detenturi tal-privattivi u l-ħaddiema speċjalizzati.

3.3.        Mudelli ġodda tan-negozju u l-produzzjoni

Il-qafas industrijali tal-mikro u n-nanoelettronika qed jinbidel ħafna billi fl-aħħar 15-il sena l-produzzjoni volumenuża mxiet b'mod sinifikanti lejn l-Asja[18]. B'mod ġenerali, il-produzzjoni fl-Ewropa naqset għal ftit inqas minn 10% tal-produzzjoni dinjija fl-2011. Minkejja s-saħħa tal-kumpaniji fl-Istati Uniti f'dan il-qasam, 16% biss tal-produzzjoni ssir fl-Istati Uniti.

Flimkien maż-żieda fl-ispiża biex jinħolqu l-faċilitajiet tal-produzzjoni ("fabs"), l-għoti ta' inċentivi finanzjarji mingħand l-awtoritajiet territorjali sar element importanti fid-deċiżjoni dwar fejn se tinbena kapaċità ġdida. Il-ħelsien mit-taxxa, l-art, l-enerġija rħisa u inċentivi oħra lkoll għandhom rwol kbir, u daqstant ieħor għandha rwol id-disponibbiltà ta' ħaddiema speċjalizzati[19].

Xejra importanti oħra hija ż-żieda tal-mudell ta' "fonderija"[20]. Il-fonderiji żviluppaw sew fl-Asja u diġà jirrappreżentaw madwar 10% tal-produzzjoni dinjija tal-komponenti elettroniċi. Apparti dan, qed dejjem jiżdied l-għadd ta' kumpaniji "fabless"[21] li jiġġeneraw dħul mill-bejgħ tad-disinji taċ-ċipep. Mingħajr produzzjoni, dawn il-kumpaniji fabless ma għandhomx il-piżijiet finanzjarji għoljin li għandhom il-kumpaniji tal-manifattura.

Madanakollu fil-futur l-aċċess sikur għall-kapaċità tal-produzzjoni jista' jsir problematiku meta l-fonderiji jwessgħu l-offerta tagħhom biex jinkludu d-disinn u l-prototipar li għandhom jgħinuhom jifhmu l-prodotti finali. Sabiex jonqos ir-riskju kemm jista' jkun, xi kumpaniji li jagħmlu d-disinji huma stess, iżommu għalihom linji limitati tal-produzzjoni (l-hekk imsejjaħ mudell "fab-lite").

3.4.        Il-manifatturi tat-tagħmir għandhom elementi ewlenin tal-katina tal-valur

Mingħajr żvilupp fit-tagħmir tal-produzzjoni ma jkunx jista' jsir żvilupp f'aktar ċokon u f'aktar funzjonalità taċ-ċipep. Il-manifatturi tat-tagħmir saru parti ewlenija fil-katina tal-valur u dan jidher fir-rwol prominenti li għandhom fl-alleanzi teknoloġiji internazzjonali.

4.           Is-saħħiet u d-dgħufijiet tal-Ewropa

4.1.        L-industrija mibnija madwar iċ-ċentri ta' eċċellenza u ktajjen tal-provvista usa' mifruxin mal-Ewropa kollha

Bħall-bqija tad-dinja, l-industrija Ewropea tal-mikro u n-nanoelettronika hija kkonċentrata madwar is-siti reġjonali l-kbar tal-produzzjoni u d-disinn. Ir-reġjuni madwar Dresden (DE), Grenoble (FR) u Eindhoven-Leuven (NL-BE) jilqgħu tliet ċentri ewlenin tar-riċerka u l-produzzjoni bi speċjalizzazzjonili dejjem akbar f'wieħed mit-tliet oqsma tal-"aktar Moore", "aktar minn Moore" u t-tagħmir u l-materjal. Barra minn hekk, fir-reġjun ta' Dublin (IE) hemm sit Ewropew kbir tal-manifattura tal-mikroproċessuri, u Cambridge (UK) pereżempju huwa l-bażi tal-kumpanija ewlenija fid-disinn ta' mikroproċessuri b'konsum baxx tal-enerġija li jitqiegħdu fil-biċċa l-kbira tal-apparat mobbli u t-tablets ta' żmienna.

Dan ir-raggruppament u din l-ispeċjalizzazzjoni reġjonali huma essenzjali għall-iżvilupp tas-settur fil-futur. Madanakollu, dan jiddependi fuq katina tal-provvista wiesgħa mifruxa mal-Ewropa. Dan jinkludi raggruppamenti relattivament iżgħar iżda innovattivi u speċjalizzati ħafna bħar-reġjuni ta' Graz u Vjenna (AT), Milan u Katanja (IT) jew Ħelsinki (FI).

L-Ewropa għandha tliet kumpaniji indiġeni kbar tal-mikro u n-nanoelettronika li laħqu t-tmien post (STMicroelectronics), l-għaxar post (Infineon) u t-tnax-il post (NXP) fil-bejgħ dinji fl-2012. L-Ewropa ġibdet ukoll xi kumpaniji barranin kbar li investew fl-Ewropa (eż. GlobalFoundries u Intel). Il-manifattura mikro u nanoelettronika fl-Ewropa qed tkompli tissaħħaħ b'katina tal-valur wiesgħa u kompetittiva ħafna u b'ekosistema ta' kumpaniji, inkluż b'ħafna SMEs. Is-siti ewlenin tal-manifattura huma inkorporati f'raggruppamenti reġjonali kif jissemma hawn fuq.

4.2.        Fuq quddiem nett fis-swieq vertikali iżda kważi assenti f'xi segmenti kbar

L-Ewropa hija relattivament nieqsa fejn tidħol il-produzzjoni tal-kompjuters u komponenti relatati mal-konsumatur li jirrappreżentaw parti kbira tas-suq totali. Hija tinsab fuq quddiem fl-elettronika tal-karozzi (~50% tal-produzzjoni globali), tal-applikazzjonijiet tal-enerġija (~40%) u l-awtomazzjoni industrijali (~35%). L-Ewropa għadha b'saħħitha wkoll fit-tfassil ta' elettronika għat-telekomunikazzjoni mobbli.

Kumpaniji Ewropej, inkluż għadd kbir ta' SMEs, huma mexxejja dinjija f'mikrosistemi intelliġenti bħall-impjanti tas-saħħa u t-teknoloġiji tas-sensi. Għalkemm bħalissa dawn huma swieq speċjalizzati, dawn huma oqsma ta' tkabbir kbir (tipikament aktar minn 10% kull sena). Assi ewlieni ieħor huwa t-tmexxija Ewropea fis-suq bi tkabbir kbir tal-komponenti b'konsum baxx tal-enerġija.

4.3.        Indubitabbli, it-tmexxija Ewropea fil-materjal u t-tagħmir

L-Ewropa għandha fost l-aktar fornituri importanti tat-tagħmir u l-materjal, fosthom ASML u SOITEC li għandhom ishma sinifikanti fis-suq dinji rilevanti. Dawn il-kumpaniji jistrieħu fuq bosta fornituri stabbiliti fl-Ewropa, li ħafna minnhom huma SMEs. Dawn il-fornituri Ewropej tat-tagħmir u l-materjal biss għandhom teknoloġiji tassew sofistikati li jvarjaw minn ottiċi u lejżers sa mekkanika ta' preċiżjoni u kimika. Ir-rwol li għandhom fl-iżvilupp fil-qasam tal-mikro u n-nanoelettronika huwa sinifikanti u rikonoxxut ferm bħalma pereżempju juri l-investiment strateġiku riċenti ta' kumpaniji kbar tas-semikondutturi fl-ASML[22].

4.4.        L-investimenti tal-kumpaniji tal-UE jibqa' relattivament modest

Għalkemm f'termini assoluti, l-investimenti li għamlu kumpaniji Ewropej huma għoljin (biljun ta' ewro), dawn jibqgħu relattivament modesti meta jitqabblu mal-investimenti li saru band'oħra. Madanakollu, l-attrazzjoni Ewropea għan-negozji tibqa' għolja meta jitqies li d-daqs tal-konsum tagħha huwa aktar minn 20% tas-suq dinji. Iżda fil-futur ma hemmx garanzija li fl-Ewropa se jsiru investimenti fil-manifattura tal-elettronika. Il-kompetizzjoni ma' reġjuni oħra fid-dinja hija iebsa.

L-investiment pubbliku fl-R&D&I u l-politiki li jattiraw l-investiment privat għadhom frammentati wisq fl-UE minkejja l-progress li sar fl-aħħar ħames snin. Dan jikkuntrasta sew mal-fatt li l-R&D&I Ewropew fil-mikro u n-nanoelettronika għandu klassi dinjija u attraenti ħafna għall-atturi internazzjonali.

5.           L-isforzi Ewropej sal-lum

5.1.        L-isforzi reġjonali u nazzjonali li jsaħħu r-raggruppamenti ta' eċċellenza

L-isforzi importanti, l-aktar matul l-aħħar 15-il sena, saru fil-livell reġjonali biex jinbnew raggruppamenti industrijali u teknoloġiċi f'dan il-qasam. L-aktar raggruppament li rnexxa ġej minn strateġiji sostnuti fit-tul li jgħaqqdu politiki bħal inċentivi fiskali, investiment fl-R&D&I f'laboratorji pubbliċi, koperazzjoni qawwija bejn l-industrija u l-akkademja, infrastrutturi ta' livell għoli, kopertura kritika tal-katina tal-valur u ambjent dinamiku għan-negozji. F'dan il-qasam, id-disponibbiltà tal-ħiliet u l-għarfien għandha importanza kbira daqstant ieħor.

Bl-isfidi quddiemna, fosthom iż-żieda fl-ispejjeż tal-R&D&I, il-kompetizzjoni globali qalila u t-tagħwir ta' xi partijiet ewlenin tal-katina tal-valur fl-Ewropa (eż. l-istadju ta’ komponenti tal-ippakkjar fis-sistemi), hemm l-obbligu li ssir ħafna kollaborazzjoni eqreb matul il-katini tal-valur u fl-ekosistemi tal-innovazzjoni fuq il-livell tal-UE.

5.2.        Investiment dejjem aktar u aktar ikkoordinat fl-R&D&I fuq il-livell tal-UE

L-investiment fl-R&D&I fil-mikro u n-nanoelettronika huwa parti mill-programmi tal-UE għar-riċerka u l-iżvilupp sa mill-bidu tagħhom. Il-programm EUREKA għandu wkoll raggruppament kbir ta' riċerka fil-mikro u n-nanoelettronika[23].

Wara għaxar snin b'appoġġ tal-UE staġnat għal R&D&I f'dan il-qasam[24], dan se jiżdied ftit ftit bi kważi 20% fis-sena mill-2011 li jwassal għal baġit ta' aktar minn EUR 200 miljun fl-2013. Sabiex jiffokaw l-isforzi tal-R&D&I u jibnu massa kritika, fl-2008 il-Kummissjoni, l-Istati Membri u partijiet interessati privati lkoll flimkien nedew sħubija pubblika-privata bl-għamla ta' Impriża Konġunta[25] (ENIAC JU). Sa tmiem l-2013, l-ENIAC JU se tkun investiet min-naħa privata u min-naħa pubblika aktar minn EUR 2 biljun fl-R&D&I, minbarra madwar EUR 1 biljun investiti fil-mikro u n-nanoelettronika fis-Seba' Programm Kwadru.

5.3.        Saru avvanzi teknoloġiċi iżda tħalla vojt fil-katina tal-innovazzjoni

L-enfasi tal-appoġġ tal-UE għall-R&D&I qed issir fuq it-tħejjija għaż-żewġ ġenerazzjonijiet li jmiss tat-teknoloġija[26]. B'dawn il-programmi, l-industrija żammet il-pass mal-aktar żviluppi eċċellenti f'aktar ċokon. B'dawn il-programmi wkoll, ġew żviluppati sistemi intelliġenti sofistikati li llum qed jintużaw pereżempju fil-karozzi u s-sistemi tas-saħħa.

Madankollu l-programmi tal-UE għall-R&D&I sal-lum appoġġaw l-ewwel fażijiet tal-proċess tal-innovazzjoni, jiġifieri l-validazzjoni tat-teknoloġiji sal-livell ta' laboratorju[27]. Il-loġika kienet tiddetta li l-passi li jmiss jitħallew jersqu eqreb tal-prodott finali sal-industrija, minħabba l-livell għoli ta' investiment dawn jeħtieġu. Dan ħoloq vojt ċar fil-katina tal-innovazzjoni. Sabiex ikun effettiv u jaqsam il-magħruf "wied tad-dmugħ", l-appoġġ għar-riċerka u l-innovazzjoni f'dan il-qasam jeħtieġ li tiġi indirizzata dejjem aktar il-katina kollha tal-innovazzjoni, jiġifieri lil hinn minn xi kumpanija waħda, reġjun jew Stat Membru.

Dan l-aħħar l-ENIAC JU sejħet għal linji pilota fil-manifattura li jindirizzaw b'mod partikolari dawn l-iskali ogħla tal-maturità teknoloġika. L-interess qawwi li wrew il-partijiet interessati privati u l-awtoritajiet pubbliċi biex jappoġġaw dawn il-linji pilota juri l-importanza strateġika tagħhom.

6.           It-triq ’il quddiem - Strateġija industrijali Ewropea

L-istrateġija proposta tibni fuq l-Inizjattiva Ewropea dwar it-Teknoloġiji Abilitanti Ewlenin u fuq il-proposta tal-Orizzont 2020[28] għar-riċerka, l-iżvilupp u l-innovazzjoni. Iżda din tiffoka fuq l-azzjonijiet li huma speċifiċi għall-isfidi li għandhom il-mikro u n-nanoelettronika.

6.1.        Għan: Titreġġa' lura x-xejra negattiva tas-sehem tal-UE fil-provvista dinjija

L-Ewropa ma tiflaħx titlef il-kapaċità li tiddisinja u timmanifattura l-mikro u n-nanoelettronika. Dan jixħet partijiet kbar tal-katini tal-valur ta' setturi industrijali kbar f'riskju u jċaħħad lill-Ewropa minn teknoloġiji essenzjali li hemm bżonn biex jiġu indirizzati l-isfidi tas-soċjetà tagħha.

Minħabba l-firxa wiesgħa ta' opportunitajiet quddiemna u sfidi li għandha l-industrija, huwa urġenti li jiżdiedu u jiġu kkoordinati l-isforzi pubbliċi rilevanti kollha mal-Ewropa. Strateġija industrijali għandha tiżgura li jerġa' jkun hemm tkabbir u fi żmien għaxar snin jintlaħaq livell tal-produzzjoni fl-UE li tkun eqreb tas-sehem tagħha mill-PGD dinji. Fid-dettall, l-għanijiet huma li:

· Tiżgura d-disponibbiltà tal-mikro u n-nanoelettronika meħtieġa għall-kompetittività tal-industriji ewlenin fl-Ewropa.

· Tattira aktar investiment fil-manifattura avvanzata fl-Ewropa u ssaħħaħ il-kompetittività industrijali fil-katina tal-valur mid-disinn sal-manifattura.

· Iżżomm it-tmexxija fil-provvista tat-tagħmir u l-materjal u f'oqsma bħall-"aktar minn Moore" u l-komponenti effiċjenti fl-enerġija.

· Tibni tmexxija fid-disinn taċ-ċipep fi swieq bi tkabbir kbir, l-aktar fid-disinn ta' komponenti kumplessi.

6.2.        Nenfasizzaw fuq il-vantaġġi tal-Ewropa, nibnu u nsaħħu r-raggruppamenti ewlenin tal-Ewropa

Kif indikat hawn fuq, l-assi tal-Ewropa fil-mikro u n-nanoelettronika jinkludu komunità akkademika għal riċerka eċċellenti u tmexxija industrijali fis-swieq vertikali. Barra minn hekk, meta wieħed iqis l-Ewropa kollha kemm hi, hemm preżenza industrijali u teknoloġika matul il-katina tal-valuri kollha li tinkludi t-tagħmir, il-materjal, il-manifattura, id-disinn kif ukoll l-industrija b'saħħitha tal-utent aħħari.

Jekk jinbena fuq dawn il-punti b'saħħithom u jiġu mobilizzati r-riżorsi meħtieġa, l-Ewropa għandha ssir attur ewlieni fil-mikro u n-nanoelettronika. Biex jiġu mobilizzati r-riżorsi, hemm bżonn jiġu allinjati l-azzjonijiet fil-livell reġjonali, nazzjonali u Ewropew. Dan joħloq il-fiduċja u jistimola t-tiġdid u t-tkabbir tal-kapaċità tal-manifattura fl-Ewropa.

L-enfasi ssir biex insaħħu u nibnu fuq l-eċċellezza tal-organizzazzjonijiet tar-riċerka u t-teknoloġija (RTOs) fejn jidħlu l-faċilitajiet u l-persunal. Dawn għandhom ikunu "l-mekka" tal-inġiniera ta' talent u r-riċerkaturi f'dan il-qasam, fil-qalba tal-ekosistemi li jiġbdu l-investimenti privati fil-manifattura u d-disinn. Sabiex jiżdied kemm jista' jkun ir-redditu fuq l-investiment u tkun żgurata l-eċċellenza, aktar progress għal speċjalizzazzjoni komplementari u koperazzjoni aktar b'saħħitha bejn l-RTOs ewlenin huma sigriet għas-suċċess skont l-istrateġija tal-Ispeċjalizzazzjoni Intelliġenti[29] tal-UE.

Sabiex ikun żgurat aktar użu tal-elettronika fis-setturi industrijali kollha u li jinħatfu l-opportunitajiet li ġejjin minn ħidma transdixxiplinarja, għandhom jissaħħu l-kollaborazzjonijiet eqreb transfrunieri u transettorjali inkluż mal-industriji tal-utenti aħħari.

6.3.        Jinħatfu l-opportunitajiet li jinħolqu f'oqsma mhux konvenzjonali u jiġi appoġġat it-tkabbir għall-SMEs

L-SMEs jaqdu rwol ewlieni f'oqsma emerġenti bħall-elettronika plastika u organika, is-sistemi integrati intelliġenti u b'mod ġenerali fil-qasam tad-disinn. Għaldaqstant għan importanti huwa li l-SMEs jiġu integrat aħjar fil-katini tal-valur, u li jingħataw aċċess għall-aqwa teknoloġiji u faċilitajiet tal-R&D&I. L-appoġġ lil ċentri ta’ eċċellenza li jgħinu biex jiġu inkorporati l-mikro u n-nanoelettronika f'kull tip ta' prodotti u servizzi, se jkun essenzjali biex jixpruna l-innovazzjoni fl-ekonomija kollha u l-aktar f'SMEs mhux teknoloġiċi.

Sħubijiet mal-UE kollha, bejn industriji tal-utent aħħari, awtoritajiet pubbliċi u fornituri (kbar u żgħar) tal-mikro u n-nanoelettronika se jgħinu biex jinfetħu oqsma ġodda ta' tkabbir kbir bħall-vetturi elettriċi, il-bini effiċjenti fl-enerġija u l-bliet intelliġenti u t-tipi kollha tas-servizzi mobbli fuq l-internet.

7.           L-azzjonijiet

7.1.        Bi Pjan Strateġiku Ewropew għal investiment f'dan il-qasam

L-għan huwa li jiġu attirati aktar investimenti pubbliċi u privati u li dawn jitmexxew b'tali mod biex jiġi implimentat pjan direzzjonali għal tmexxija li trid tistabbilixxih l-industrija.

Il-livell tal-investiment pubbliku u privat se jkun skont id-daqs tal-isfida. Il-ħsieb huwa li l-investiment pubbliku u privat totali fl-R&D&I fuq il-livell tal-UE, nazzjonali u reġjonali jilħaq aktar minn EUR 1,5 biljun fis-sena, jiġifieri baġit totali ta' aktar minn EUR 10 biljun f'seba' snin.

Għal dan l-għan il-Kummissjoni se tkompli tiddjaloga mal-partijiet interessati u tistabbilixxi Grupp ta' Mexxejja fl-Elettronika biex telabora u tgħin fl-implimentazzjoni ta' Pjan Strateġiku Industrijali Ewropew li se jibni fuq il-vantaġġi tal-Ewropa u jkopri tliet linji kumplimentari:

· L-iżvilupp tal-binarju tat-teknoloġija "aktar minn Moore" fuq id-daqs tal-wejfer ta' 200 mm u 300 mm. B'dan l-Ewropa tkun tista' żżomm u tespandi t-tmexxija tagħha[30] f'suq li jirrappreżenta madwar EUR 60 biljun fis-sena u li għandu tkabbir annwali ta' 13%. Dan se jħalli impatt dirett fuq il-ħolqien ta' impjiegi b'valur għoli, inkluż l-aktar fl-SMEs.

· Aktar progress fit-teknoloġiji "aktar Moore" biex jibqa' jiċkien id-daqs tal-wejfer ta' 300 mm. B'dan l-investiment l-Ewropa għandha tkun tista' żżid ftit ftit il-produzzjoni f'dan is-suq li tirrappreżenta aktar minn EUR 200 biljun[31].

· L-iżvilupp ta' teknoloġija ġdida tal-manifattura fuq wejfers ta' 450 mm. Fil-bidu mill-investiment se jgawdu l-manifatturi tat-tagħmir u l-materjal fl-Ewropa li llum huma mexxejja dinjiin f'suq ta' madwar EUR 40 biljun fis-sena u fi żmien ħames jew għaxar snin se jagħti vantaġġ kompetittiv ċar lill-industrija kollha.

Il-pjan direzzjonali se jkun stabbilit mhux aktar tard minn tmiem l-2013 bħala sett ta' azzjonijiet konkreti li jsaħħu notevolment ir-raggruppamenti ta' eċċellenza tal-Ewropa fil-manifattura u d-disinn (ara t-Taqsima 4.1) u jiżguraw ftuħ għal sħubijiet u alleanzi matul il-katina tal-valur. L-azzjonijiet tas-settur pubbliku, il-Kummissjoni Ewropea, l-Istati Membri u l-awtoritajiet reġjonali se jinkludu:

· Appoġġ għall-R&D&I b'finanzjament istituzzjonali jew għotjiet għal azzjonijiet skont il-pjan direzzjonali. Jiġu mobilizzati interventi ffokati u kkoordinati[32] li joħolqu massa kritika u jżidu kemm jista' jkun ir-redditu fuq l-investiment.

· Bi sħab mal-industrija u b'appoġġ għall-innovazzjoni, tinħoloq infrastruttura avvanzata tal-manifattura u l-pilotaġġ li timla l-vojt fil-katina tal-innovazzjoni u tqabbad id-disinn mal-użu proprju.

· Tħaffef l-aċċess għall-finanzjament tal-CAPEX b'self u ekwitajiet, l-aktar b'fondi reġjonali u bl-iskemi tal-innovazzjoni tal-Bank Ewropew tal-Investiment (BEI). F'dan il-kuntest, fi Frar 2013 il-Kummissjoni Ewropea ffirmat Memorandum ta' Qbil mal-BEI li juri l-KETs bħala prijorità għal investimenti.

Il-Kummissjoni se twitti t-triq għall-industrija biex tingħaqad matul il-katina tal-valur u biex tiżviluppa u taġġorna sikwit il-pjan direzzjonali. L-Istati Membri, l-awtoritajiet regjonali u l-Kummissjoni Ewropea se jappoġġaw il-pjan direzzjonali b'mod individwali u/jew kollettiv inkluż b'Inizjattiva Teknoloġika Konġunta (JTI) u bl-inizjattiva EUREKA. Se jkun żgurat l-aħjar użu tal-Fondi Strutturali reġjonali inkluż bi Speċjalizzazzjoni Intelliġenti bejn ir-raggruppamenti fil-mira u l-użu tal-istrumenti finanzjarji previsti fil-Fondi tal-Investiment Strutturali Ewropew (il-Fondi tal-ESI)[33].

L-industrija se timpenja ruħha li żżomm u twessa' l-attivitajiet tad-disinn u l-manifattura fl-Ewropa u se taġġorna sikwit il-pjan direzzjonali bl-għajnuna tal-RTOs u l-komunità akkademika sabiex tibqa' aġġornata mad-dinamika tas-suq u l-iżviluppi teknoloġiċi.

7.2.        L-Inizjattiva Teknoloġika Konġunta: mudell tripartitiku għal proġetti ta' skala kbira

Il-Kummissjoni Ewropea se tipproponi Inizjattiva Teknoloġika Konġunta[34] skont l-Artikolu 187 tat-TFUE li tgħaqqad ir-riżorsi fil-livell ta' proġett b'appoġġ għall-R&D&I transfruntiera b'kollaborazzjoni bejn l-industrija u l-akkademja. Il-proposta għal Regolament tal-Kunsill biex tiġi stabbilita Impriża Konġunta se tieħu post iż-żewġ Impriżi Konġunti eżistenti dwar sistemi inkorporati tal-informatika (ARTEMIS) u n-nanoelettronika (ENIAC) li ġew stabbiliti fis-Seba' Programm Kwadru. Fl-Orizzont 2020, fl-isfida "Tmexxija fit-Teknoloġiji Abilitanti u Industrijali", il-JTI l-ġdida se tkopri tliet oqsma interrelatati ewlenin:

· It-teknoloġiji tad-disinn, il-proċessi tal-manifattura u l-integrazzjoni, it-tagħmir u l-materjal għall-mikro u n-nanoelettronika.

· Il-proċessi, il-metodi, l-għodod u l-pjattaformi, disinji u arkitetturi ta' referenza Għal Sistemi inkorporati/Ċiberfiżiċi.

· Approċċi multidixxiplinarji għal sistemi intelliġenti.

Il-JTI l-ġdida se tibni fuq it-tagħlimiet tal-JTIs attwali[35] u tagħti struttura ta' finanzjament simplifikata. Prinċipalment, din se tappoġġa azzjonijiet tal-kapital-intensivi[36] bħal linji pilota jew dimostraturi fuq skala kbira fil-Livell tat-Tlestija tat-Teknoloġija sal-livell 8 kif jidher hawn fuq. Dawn se jkunu jeħtieġu mudell tripartitiku ta' finanzjament li jinvolvi lill-Kummissjoni Ewropea, lill-Istati Membri u lill-industrija u se jgħinu biex jiġu allinjati l-istrateġiji rilevanti tal-investiment mal-Ewropa kollha. L-implimentazzjoni se ssegwi l-prinċipji tal-Orizzont 2020 u se tkun konsistenti mal-programm ta' ħidma trasversali tal-KETs biex tissaħħaħ l-influwenza reċiproka bejn il-KETs differenti.

L-appoġġ lill-JTI se jiġi kkumplementat b'finanzjament tal-UE għal R&D teknoloġiku u għall-azzjonijiet tal-innovazzjoni mmirati l-aktar għall-SMEs. Din se tkopri R&D&I f'oqsma ġodda tal-mikro u n-nanoelettronika (ara t-Taqsima 6.3), inklużi dawk li jeħtieġu taħlita ta' bosta teknoloġiji abilitanti ewlenin bħall-materjal avvanzat, il-bijoteknoloġija industrijali, il-fotonika, in-nanoteknoloġija u sistemi avvanzati tal-manifattura[37].

Fil-JTI l-ġdida, minbarra dan, il-Kummissjoni se tgħarrex kif tista' tissimplifika u tgħaġġel l-approvazzjonijiet għal għajnuniet mingħand inkluż bi Proġett ta' Interess Ewropew Komuni skont l-Artikolu 107.3(b) tat-TFUE.

7.3.        Nibnu fuq il-miżuri orizzontali tal-kompetittività u nappoġġawhom

L-aċċess għal forza tax-xogħol b'għadd kbir ta' ħiliet ta' inġiniera u tekniċi u għal gradwati ta' kwalità għolja huwa essenzjali biex jiġu attirati investimenti privati fl-elettronika. Bħas-settur kollu tal-ICT, il-mikro u n-nanoelettronika qed ibatu b'żieda fl-iskarsezza tal-ħiliet u b'nuqqas ta' qbil bejn il-provvista u d-domanda tal-ħiliet. Il-Kummissjoni se tibqa' tippromwovi l-kompetenzi diġitali għall-industrija b'inizjattia tal-Ħiliet fl-elettronika u dan l-aħħar nediet il-"Koalizzjoni Kbira għall-ħiliet u l-impjiegi fl-ICT". . Għall-mikro u n-nanoelettronika, l-impenn tal-industrija li tattira l-ġenerazzjoni żagħżugħa kmieni waqt l-edukazzjoni huwa kruċjali. Minbarra l-isforzi industrijali u l-inizjattivi rilevanti fil-livell reġjonali u nazzjonali, il-Kummissjoni se tibqa' tagħti kofinanzjamenti fil-proġetti tal-Orizzont 2020 biex toħloq u xxerred materjal ta' taħriġ u tagħlim dwar l-aħħar teknoloġija tal-mikro u n-nanoelettronika kif ukoll tappoġġa l-kampanji ta' għarfien immirati għall-intraprendituri żgħażagħ.

Barra minn hekk, il-Kummissjoni Ewropea qed tistabbilixxi Panorama tal-Ħiliet tal-UE bi previżjonijiet aġġornati tal-provvista tal-ħiliet u l-bżonnijiet tas-suq tax-xogħol sal-2020, biex titjieb it-trasparenza għall-klassifikazzjoni tal-Ħiliet, il-Kompetenzi u x-Xogħol (ESCO), bħala punt komuni bejn id-dinjiet tal-impjiegi, l-edukazzjoni u t-taħriġ u biex tappoġġa l-mobbiltà.

Flimkien ma' RTOs, universitajiet u awtoritajiet nazzjonali u reġjonali, il-Kummissjoni se tara li tagħmel disponibbli faċilitajiet u servizzi kondiviżi għall-ittestjar u l-esperimentazzjoni bikrija tat-teknoloġija mikro u nanoelettronika lil negozji ġodda, SMEs u utenti mal-Ewropa kollha.

Barra minn hekk, b'akkwist pubbliku ta' innovazzjonijiet xprunati mill-mikro u n-nanoelettronika bħat-tagħmir tas-saħħa jew tas-sigurtà, se jinħolqu kundizzjonijiet aħjar għall-iżviluppi tas-suq f'dawn l-oqsma.

7.4.        Dimensjoni internazzjonali

Il-Kummissjoni Ewropea se tippromwovi l-koperazzjoni internazzjonali fil-mikro u n-nanoelettronika, speċjalment f'oqsma ta' benefiċċju reċiproku bħall-ippjanar direzzjonali internazzjonali dwar it-teknoloġija, it-tfassil ta' punti ta' riferiment, l-istandardizzazzjoni, kwistjonijiet ta' saħħa u sigurtà relatati man-nanomaterjali[38], u t-tħejjija tal-bidla għal daqs tal-wajfers ta' 450 mm jew ir-riċerka avvanzata "lil hinn mis-CMOS".

Il-Kummissjoni Ewropea se tkompli l-isforzi tagħha għal kuntest globali aktar trasparenti u ekwu fil-fora multilaterali u bilaterali internazzjonali billi tillimita x-xkiel tal-kummerċ/suq, u biex tappoġġa l-industrija f'negozjati kummerċjali settorjali u fi kwistjonijiet rilevanti li jeħtieġu dibattitu internazzjonali bħall-problema tal-entitajiet mhux prattikanti (NPEs).

8.           Konklużjonijiet

Kif diġà għamlet f'oqsma strateġiċi bħall-ajrunawtika jew l-ispazju, l-Ewropa ma għandha l-ebda għażla oħra ħlief li taħdem fuq strateġija industrijali ambizzjuża għall-mikro u n-nanoelettronika. Din il-Komunikazzjoni tipproponi strateġija bħal din li hija bbażata fuq pjan direzzjonali Ewropew għal dan il-qasam. Din tappoġġa l-ispeċjalizzazzjoni reġjonali intelliġenti u tippromwovi koperazzjoni mill-qrib matul il-katini tal-valur u tal-innovazzjoni.

Ir-riżorsi finanzjarji tal-UE, nazzjonali u reġjonali f'dan il-qasam iridu jiġu allinjati sabiex tintlaħaq il-massa kritika meħtieġa biex jiġu attirati l-investimenti u l-aqwa talenti fid-dinja. Ir-riżorsi finanzjarji se jkunu kkonċentrati fuq ir-raggruppamenti ewlenin tal-Ewropa. B'aktar żvilupp fihom, in-negozji Ewropej kollha, ikunu fejn ikunu, ikunu jistgħu jisfruttaw l-aħħar żviluppi fil-mikro u n-nanoelettronika. Il-pjan ta' azzjoni fl-Anness jiġbor fil-qosor x'għandu jsir.

ANNESS

|| L-azzjonijiet ewlenin || Minn min || Meta

1 || Tkompli tiddjaloga mal-partijiet interessati u tistabbilixxi Grupp ta' Mexxejja fl-Elettronika biex telabora u tgħin fl-implimentazzjoni ta' Pjan Strateġiku Industrijali Ewropew għas-settur tal-elettronika || Il-Kummissjoni Ewropea, l-industrija || Mhux aktar tard minn tmiem l-2013

|| Tippromwovi speċjalizzazzjoni intelliġenti, l-użu tal-istrumenti finanzjarji previsti fil-Fondi tal-Investiment Strutturali Ewropew (il-Fondi tal-ESI) u l-ORIZZONT 2020 || Il-Kummissjoni Ewropea, l-Istati Membri || Għaddejja bħalissa – trid tissaħħaħ

|| Tippromwovi, skont il-Memorandum ta' Qbil mal-BEI dwar il-KETs, il-mezzi li jiżguraw investiment tal-kapital fil-produzzjoni fl-Ewropa || Il-Bank Ewropew tal-Investiment, l-industrija || Fl-ewwel kwart tal-2014

2 || Tadotta Regolament tal-Kunsill u tniedi JTI tripartita ġdida || Il-Kummissjoni Ewropea, l-Istati Membri || Kmieni fl-2014

|| Fil-JTI l-ġdida, tgħarrex kif tista' tissimplifika u tgħaġġel l-approvazzjonijiet għal għajnuniet mingħand inkluż bi Proġett ta' Interess Ewropew Komuni skont l-Artikolu 107.3(b) tat-TFUE || Il-Kummissjoni Ewropea, l-Istati Membri || Fit-tielet kwart tal-2013

3 || Tagħmel djalogu kontinwu mal-RTOs ewlenin, reġjuni u Stati Membri biex issaħħaħ l-ekosistema tal-mikro u n-nanoelettronika fil-livell Ewropew || Il-Kummissjoni Ewropea, l-Istati Membri, ir-Reġjuni, l-RTOs || Għaddejja bħalissa – trid tissaħħaħ

|| Bl-ORIZZONT 2020, tagħmel disponibbli faċilitajiet kondiviżi għall-ittestjar u l-esperimentazzjoni bikrija lil negozji ġodda, SMEs, universitajiet u utenti || RTOs, il-Kummissjoni Ewropea || Fl-ewwel kwart tal-2014

|| Tinvesti f'sisien sodi (edukazzjoni u taħriġ); trawwem ambjent favorevli għall-inġinerija fl-Ewropa || L-Istati Membri, l-akkademiċi || Mill-ewwel kwart tal-2014 sa tmiem l-2020

4 || Telabora u timplimenta strateġija tal-forza tas-suq iffokata fuq prodotti tal-elettronika-intensiva b'bosta stumenti bħalma huwa l-akkwist pubbliku || L-industrija, l-Istati Membri, ir-reġjuni, il-Kummissjoni Ewropea || Sat-tieni kwart tal-2014

|| Telabora azzjonijiet ta' politika mmirati biex jinħoloq kuntest dinji ekwu billi tillimita x-xkiel tal-kummerċ/suq, inkluż fil-Laqgħa tal-Gvern u l-Awtoritajiet dwar is-Semikondutturi (GAMS) || Il-Kummissjoni Ewropea, l-industrija || Għaddejja bħalissa – trid tissaħħaħ

[1]               Dak li f'din il-Komunikazzjoni jissejjaħ "mikroelettronika u nanoelettronika" ivarja minn tranżituri ta' skala nano sa sistemi ta' skala mikro li jintegraw bosta funzjonijiet f'ċippa.

[2]               COM(2012) 341 finali.

[3]               COM(2012) 582 finali "Industrija Ewropea Aktar B'saħħitha għat-Tkabbir u l-Irkupru Ekonomiku".

[4]               eż. l-elettronika għall-karozzi, l-enerġija u s-setturi tal-manifattura.

[5]               World Semiconductor Trade Statistics (L-Istatistika Dinjija tal-Kummerċ tas-Semikondutturi) (WSTS), 2012 (http://www.wsts.org/).

[6]               Ir-rapport ta' Digiworld, IDATE 2012 (http://www.idate.org).

[7]               http://ec.europa.eu/enterprise/sectors/ict/files/kets/hlg_report_final_en.pdf

[8]               Ara r-Rapport tal-2008 dwar il-Kompetittività tal-Assoċjazzjoni Ewropea tal-Industrija tas-Semikondutturi (ESIA) "Mastering Innovation Shaping the Future" (Naħkmu l-innovazzjoni, insawru l-ġejjieni) (https://www.eeca.eu/data/File/ESIA_Broch_CompReport_Total.pdf).

[9]               Senser hu kull tagħmir, bħal termometru, li jittraċċa kundizzjoni fiżika fid-dinja. Attwattur hu tagħmir, bħas-swiċċijiet, li jintuża biex jixgħel jew jitfi l-affarijiet jew biex jaġġusta f'sistema operattiva.

[10]             International Technology Roadmap for Semiconductors (Pjan Direzzjonali Teknoloġiku Internazzjonali għas-Semikondutturi) (ITRS) http://www.itrs.net

[11]             Il-Liġi ta' Moore: tirdoppja l-prestazzjoni għall-proporzjon tal-ispiża kull 18-24 xahar.

[12]             Is-semikonduttur metallossidu kumplimentari (CMOS) huwa teknoloġija standard għal ċirkwiti integrati fil-binarju "aktar Moore".

[13]             Iċ-ċipep tal-mikro u n-nanoelettronika jiġu prodotti fuq uċuħ tondi tal-materjal li jissejħu "wejfers". Il-ġenerazzjoni teknoloġiċi ta' wara jiġu identifikati bid-daqs tad-dijametru tal-wejfers li fuqhom jiġu prodotti. Fi żmienna, il-produzzjoni ssir prinċipalment fuq wajfers ta' 200 mm u 300 mm. Id-daqs tal-wejfers li jmiss se jkun 450 mm.

[14]             Information Technology Outlook tal-OECD    (http://www.oecd.org/internet/ieconomy/oecdinformationtechnologyoutlook2010.htm)

[15]             LETI huwa istitut tas-CEA, organizzazzjoni Franċiża tar-riċerka u t-teknoloġija. Din il-kumpanija tispeċjalizza fin-nanoteknoloġija u l-applikazzjonijiet tagħha, mit-tagħmir wireless għall-bijoloġija, il-kura tas-saħħa u l-fotonika (http://www-leti.cea.fr).

[16]             L-istitut Ġermaniż Fraunhofer-Gesellschaft jagħmel riċerka applikata li għandha siwi dirett għall-intrapriżi privati u pubbliċi li huma ta' benefiċċju kbir għas-soċjetà. Bosta istituti qed jiffokaw fuq ċirkwiti u sistemi integrati (http://www.fraunhofer.de).

[17]             L-istitut Belġjan imec jagħmel riċerka fost l-aqwa fid-dinja fin-nanoelettronika li żżid l-għarfien xjentifiku ma' sħubijiet globali fl-ICT, il-kura tas-saħħa u l-enerġija (http://www.imec.be).

[18]             eż. In-nefqa kapitali tal-kumpaniji Koreani żdiedet minn 13% fl-2005 għal 27% fl-2012.

[19]             Ara d-dokument tal-Assoċjazzjoni tal-industrija tas-Semikondutturi (SIA), Maintaining America's Competitive Edge: Government Policies Affecting Semiconductor Industry R&D and Manufacturing Activity (Inżommu l-vantaġġ kompetittiv li għandha l-Amerika: il-politiki governattivi li jolqtu lill-R&D tal-industrija tas-semikondutturi u l-attività tal-manifattura), Marzu 2009             (http://www.semiconductors.org/clientuploads/directory/DocumentSIA/Research%20and%20Technology/Competitiveness_White_Paper.pdf).

[20]             Fonderija hija kumpanija li tkun is-sid ta' fabbriki u toffri servizzi tal-manifattura lil klijenti "fabless".

[21]             Kumpanija "fabless" tfassal il-komponenti tagħha stess iżda testernalizza l-manifattura tagħhom lil fornitur tas-servizzi ("il-fonderija").

[22]             Ara http://www.asml.com/asml/show.do?ctx=5869&rid=46974 - "As part of the program, Intel, TSMC and Samsung will each acquire ASML shares, equal to an aggregate 23 percent minority equity stake in ASML for EUR 3.85 billion in cash".

[23]             http://www.catrene.org/

[24]             Għal ~EUR 130 miljun kull sena.

[25]             Ibbażata fuq l-Artikolu 187 tat-TFUE.

[26]             Skont l-International Technology Roadmap for Semiconductors (il-Pjan Direzzjonali Teknoloġiku Internazzjonali għas-Semikundutturi) (ITRS) http://www.itrs.net

[27]             Il-Livelli tat-Tlestija tat-Teknoloġija (TRLs) jintużaw biex jivvalutaw il-maturità tat-teknoloġiji li qegħdin jevolvu. Il-livelli 1 sa 4 tipikament jirreferu għal R&D bikri filwaqt li l-livelli 5 sa 8 juru l-prototipar u l-validazzjoni proprja tas-sistema f'ambjent operattiv.

[28]             COM(2011) 809 finali.

[29]             http://s3platform.jrc.ec.europa.eu/home

[30]             Bħalissa, il-produzzjoni fl-Ewropa f'dan il-binarju hija aktar minn 30% tal-valur dinji.

[31]             Is-sehem tal-Ewropa fil-produzzjoni huwa madwar 9%, iżda l-Ewropa għadha fuq quddiem fit-tellieqa tat-teknoloġija ċkejkna.

[32]             Minn programmi fuq il-livell reġjonali, nazzjonali u tal-UE.

[33]             http://s3platform.jrc.ec.europa.eu/home

[34]             L-impatt tal-proposta se jiġi ppreżentat fil-valutazzjoni tal-impatt. L-impatt baġitarju se jitniżżel fid-dikjarazzjoni leġiżlattiva u finanzjarja.

[35]             L-ewwel evalwazzjoni interim tal-Inizjattivi Teknoloġiċi Konġunti tal-ARTEMIS u l-ENIAC, 2010 http://ec.europa.eu/dgs/information_society/evaluation/rtd/jti/artemis_and_eniac_evaluation_report_final.pdf

[36]             Bħalissa, l-appoġġ pubbliku għal linji pilota fl-ENIAC JU huwa bejn EUR 50 u EUR 120 miljun għal kull azzjoni.

[37]             Ara COM(2012) 582 finali, it-Taqsima III.A.1.(ii).

[38]             COM(2012) 572 finali: it-Tieni Reviżjoni Regolatorja dwar in-Nanomaterjali.