52013DC0023

RAPPORT TAL-KUMMISSJONI LILL-PARLAMENT EWROPEW U LILL-KUNSILL

dwar l-iskema volontarja tal-ekodisinn għat-tagħmir tal-immaġni

(Test b'rilevanza għaż-ŻEE)

1.           Introduzzjoni u l-qafas legali

Id-Direttiva 2009/125/KE tal-Parlament Ewropew u tal-Kunsill tal-21 ta' Ottubru 2009 li tistabbilixxi qafas għall-iffissar ta' rekwiżiti għall-ekodisinn għal prodotti relatati mal-enerġija (Id-Direttiva tal-Ekodisinn)[1] tipprovdi qafas legali biex jiġu stabbiliti r-rekwiżiti tal-ekodisinn għal gruppi magħżula ta' prodotti prijoritarji.

Skont l-Artikolu 15(2)(a) sa (c) tad-Direttiva tal-Ekodisinn, grupp ta' prodotti prijoritarji għandu jkun kopert minn miżura implimentattiva obbligatorja (jiġifieri Regolament tal-Kummissjoni) jew minn miżura ta' awtoregolamentazzjoni (eż. ftehim volontarju konkluż mill-industrija), sakemm jissodisfa tliet kundizzjonijiet: li (i) jirrappreżenta volumi sinifikanti ta' bejgħ, (ii) jkollu impatt sinifikanti fuq l-ambjent u (iii) jkollu potenzjal sinifikanti għal progress.

Barra minn hekk, il-premessa 18 tad-Direttiva tal-Ekodisinn tistipula li l-gruppi ta' prodotti prijoritarji għandhom ikunu soġġetti għal modi alternattivi ta' azzjoni bħall-awtoregolamentazzjoni min-naħa tal-industrija jew ftehimiet volontarji, aktar milli miżuri implimentattivi obbligatorji, fil-każ li azzjonijiet bħal dawn x'aktarx jilħqu l-għanijiet politiċi b'mod aktar mgħaġġel jew b'inqas spejjeż minn dawk ir-rekwiżiti obbligatorji.

Ftehimiet volontarji jew miżuri oħra ta' awtoregolazzjoni jistgħu jitqiesu bħala alternattivi għall-miżuri implimentattivi fil-kuntest tad-Direttiva tal-Ekodisinn, diment li dawn ikunu konformi mal-kriterji stipulati fl-Anness VIII tad-Direttiva tal-Ekodisinn.

2.           Skema volontarja kif proposta mill-industrija għat-tagħmir tal-immaġni

L-Artikolu 16(2)(a) tad-Direttiva tal-Ekodisinn jistipula li l-Kummissjoni għandha ddaħħal miżuri implimentattivi għall-gruppi ta' prodotti tat-tagħmir tal-uffiċċju u tal-apparat elettroniku għall-konsumatur li joffru potenzjal għoli għat-tnaqqis kosteffikaċi fl-emissjonijiet tal-gassijiet serra.

Il-Kummissjoni kkummissjonat studji preparatorji għall-gruppi ta' prodotti tat-tagħmir tal-uffiċċju u tal-apparat elettroniku għall-konsumatur, inkluż it-tagħmir tal-immaġni.

L-istudju preparatorju dwar it-tagħmir tal-immaġni[2] kkonferma li dan il-grupp ta' prodott jilħaq il-kriterji elenkati fl-Artikolu 15 tad-Direttiva tal-Ekodisinn. B'mod partikolari, dan jirrappreżenta volumi sinifikanti ta' bejgħ, għandu impatt sinifikanti fuq l-ambjent u għandu potenzjal sinifikanti għal progress. Minħabba f'hekk, it-tagħmir tal-immaġni għandu jkun kopert minn miżura ta' implimentazzjoni jew minn miżura ta' awtoregolamentazzjoni.

Il-kumpaniji attivi fis-suq tat-tagħmir tal-immaġni pproponew skema volontarja għall-grupp ta' prodotti tat-tagħmir tal-immaġni fl-UE u, għal dan il-għan, waslu għal ftehim volontarju li jistabbilixxi rekwiżiti speċifiċi tal-ekodisinn għat-tagħmir tal-immaġni li tqiegħed fis-suq tal-UE. L-iskema volontarja ġiet miftiehma fis-16 ta' Frar 2011.

Huwa stmat li l-impenji li ħadu l-firmatarji tal-ftehim volontarju se jiffrankaw 15 TWh fl-2020 li jikkorrispondu għal 4.1 Mt emissjonijiet tas-CO2, u 130 TWh bejn l-2011 u l-2020 li jikkorrispondu għal 36 Mt emissjonijiet tas-CO2.

L-iskema volontarja li pproponiet l-industrija kienet soġġetta għal valutazzjoni tal-impatt sħiħa mill-Kummissjoni[3] u għal konsultazzjonijiet mal-partijiet interessati waqt li kien għaddej il-Forum Konsultattiv dwar l-Ekodisinn[4] stabbilit bl-Artikolu 18 tad-Direttiva tal-Ekodisinn.

Il-valutazzjoni tal-impatt ikkonkludiet li l-iskema volontarja proposta għandha tikseb l-għanijiet politiċi aktar malajr u bi spiża aktar baxxa milli bir-rekwiżiti obbligatorji. Il-valutazzjoni kkonkludiet ukoll li, kif meħtieġ bl-Anness VIII tad-Direttiva tal-Ekodisinn, l-iskema proposta hija konformi mad-dispożizzjonijiet kollha tat-Trattat (b'mod partikolari s-suq intern u r-regoli tal-kompetizzjoni), kif ukoll ma' impenji internazzjonali tal-UE (inklużi regoli tal-kummerċ multilaterali, l-għanijiet tad-Direttiva tal-Ekodisinn, u l-kriterji speċifiċi tal-valutazzjoni, jiġifieri (i) il-ftuħ għall-parteċipazzjoni, (ii) il-valur miżjud, (iii) ir-rappreżentattività, (iv) l-għanijiet kwantifikati u mqassma fi stadji, (v) l-involviment tas-soċjetà ċivili, (vi) il-monitoraġġ u r-rappurtar, (vii) il-kosteffikaċja fl-amministrazzjoni ta' inizjattiva awtoregolatorja, (viii) is-sostenibbiltà, u (ix) il-kompatibbiltà tal-inċentivi.

3.           Elementi tal-ftehim volontarju

Il-ftehim volontarju konkluż mill-industrija jistabbilixxi r-rekwiżiti speċifiċi tal-ekodisinn għat-tagħmir tal-immaġni li tqiegħed fis-suq tal-UE. Il-prodotti koperti bil-ftehim huma soġġetti wkoll għall-programm tal-ittikkettjar volontarju tal-użu effiċjenti tal-enerġija ENERGY STAR, li jistabbilixxi r-rekwiżiti għall-ittikkettar tal-użu effiċjenti tal-enerġija għal tagħmir differenti tal-uffiċju, inkluż it-tagħmir tal-immaġni. Kif inhu meħtieġ bid-Direttiva tal-Ekodisinn, il-firmatarji ta' din l-iskema volontarja jirrappreżentaw maġġoranza kbira tas-settur ekonomiku rilevanti. Permezz tal-ftehim, kull firmatarju impenja ruħu li tal-anqas 90% tal-mudelli kollha tat-tagħmir tal-immaġni li jqiegħed fis-suq ikunu konformi mar-rekwiżiti minimi tal-effiċjenza fir-rigward tat-TEC (il-konsum tipiku tal-enerġija) u l-OM (mod operattiv). Barra minn hekk, il-prodotti kollha tal-istampar għandhom joffru l-kapaċità ta' "stampar N-up"[5] bħala karatteristika standard u għandhom ikunu konformi mar-rekwiżiti tal-cartridges (eż. id-disinn ma għandux ixxekkel ir-riċiklaġġ jew l-użu mill-ġdid tal-cartridges ta' prodotti oħrajn). Il-prodotti ġodda kollha għandhom ikunu konformi wkoll mar-rekwiżiti tar-riċiklaġġ (eż. il-plastiks jiżżarmaw u jiġu identifikati faċilment). Fl-aħħar nett, il-firmatarji impenjaw ruħhom li jkunu konformi mar-rekwiżiti speċifiċi tal-informazzjoni (eż. informazzjoni dwar l-effiċjenza fl-użu tar-riżorsi u l-enerġija).

Apparti li stabbilixxa r-rekwiżiti tal-ekodisinn, il-ftehim iwaqqaf żewġ korpi amministrattivi:

· il-Kumitat tat-Tmexxija, li jkun fih rappreżentanti tal-firmatarji tal-ftehim u rappreżentanti tal-Kummissjoni Ewropea, li jamministra l-ftehim[6], u

· l-Ispettur Indipendenti, li jivvaluta l-konformità tal-firmatarji individwali mal-impenji stipulati fil-ftehim u lill-Kummissjoni jagħtiha r-rapporti tal-konformità[7].

Il-ftehim jiddefinixxi wkoll l-obbligi tar-rappurtar, billi jispeċifika li kull firmatarju għandu jagħti l-informazzjoni meħtieġa lill-Ispettur Indipendenti, inkella dan ikun qed jirriskja li jitlef l-istatus tiegħu ta' firmatarju.

Barra minn hekk, il-ftehim jipprovdi għal proċedura li biha l-Kumitat tat-Tmexxija jkun jista' jbiddel id-dispożizzjonijiet tal-ftehim, b'mod partikolari biex jaġġusta kemm ikunu stretti r-rekwiżiti skont is-sitwazzjoni fis-suq. Permezz ta' din il-proċedura, ir-rekwiżiti stabbiliti fil-ftehim volontarju se jiġu riveduti tliet xhur wara l-pubblikazzjoni ta' verżjoni ġdida tar-rekwiżiti tal-programm ENERGY STAR għat-tagħmir tal-immaġni. Fil-każ tat-tagħmir tal-immaġni, huma importanti li jintuża approċċ flessibbli fir-rigward tad-definizzjoni tal-parametri rilevanti u fir-rigward tal-istabbiliment tar-rekwiżiti applikabbli, peress li l-funzjonijiet ta' dan it-tagħmir jevolvu malajr.

Sabiex il-partijiet interessati kollha, b'mod partikolari l-firmatarji potenzjali, ikollhom fil-ħin l-informazzjoni korretta u aġġornata dwar ir-rekwiżiti li japplikaw għat-tagħmir tal-immaġni, l-aktar verżjoni reċenti tal-ftehim volontarju se tkun ippubblikata dejjem mal-valutazzjoni tal-impatt u ma' dan ir-Rapport fuq is-sit elettroniku Europa tal-Kummissjoni fil-paġna li hija ddedikata għall-politika tal-ekodisinn[8] u fuq is-sit iddedikat għal din l-iskema[9].

4.           Aċċettazzjoni tal-iskema volontarja

Billi l-iskema volontarja li tipproponi l-industrija għat-tagħmir tal-immaġni se tilħaq l-għanijiet politiċi aktar malajr u bi spiża aktar baxxa milli bir-rekwiżiti obbligatorji, u billi din hija konformi mal-kriterji kollha speċifikati fl-Anness VIII tad-Direttiva tal-Ekodisinn, il-Kummmissjoni tirrikonoxxi li t-tagħmir tal-immaġni li tqiegħed fis-suq tal-UE huwa soġġett għall-iskema volontarja tal-ekodisinn li stabbilixxiet l-industrija għat-tagħmir tal-immaġni. Il-kundizzjonijiet għall-iskema huma stipulati fil-ftehim volontarju konkluż mill-industrija.

Il-Kummissjoni tqis din l-iskema volontarja bħala alternattiva valida għal miżura ta' implimentazzjoni tal-ekodisinn. Minħabba f'hekk, il-Kummissjoni se tastjeni milli tistabbilixxi r-rekwiżiti obbligatorji tal-ekodisinn għat-tagħmir tal-immaġni li tqiegħed fis-suq tal-UE diment li l-ftehim volontarju u kull verżjoni sussegwenti konkluża skont l-iskema volontarja proposta se jilħqu, fl-opinjoni tal-Kummissjoni, l-għanijiet tagħhom u l-prinċipji ġenerali definiti fid-Direttiva tal-Ekodisinn.

B'mod partikolari, matul il-perjodu kollu tal-applikazzjoni tagħha, l-iskema volontarja trid tibqa' tkun konformi mal-prinċipji ġenerali ddefiniti fid-Direttiva tal-Ekodisinn, li jinkludu: kontribuzzjoni għall-għanijiet politiċi tad-Direttiva tal-Ekodisinn; ftuħ biex jieħdu sehem il-kumpaniji attivi kollha fis-suq tat-tagħmir tal-immaġni; kopertura tal-biċċa l-kbira tas-settur ekonomiku rilevanti[10]; ċarezza u nuqqas ta' ambigwità fit-termini u l-kundizzjonijiet tagħha; trasparenza; sistema ta' monitoraġġ imfassla sew; u ebda piż amministrattiv sproporzjonat. Barra minn hekk, kull rekwiżit speċifiku tal-ekodisinn għat-tagħmir tal-immaġni li tqiegħed fis-suq tal-UE u li hu ddefinit fil-ftehim volontarju u f'kull verżjoni sussegwenti konkluża skont l-iskema volontarja għandhom jagħtu valur miżjud mil-lat tal-prestazzjoni ambjentali ġenerali mtejba tal-prodotti koperti.

Barra minn hekk, kif inhu mitlub mill-Kummissjoni u mill-partijiet interessati[11], il-firmatarji tal-iskema volontarja huma meħtieġa li:

· jivvalutaw kontinwament il-progress li sar fl-applikazzjoni tal-iskema,

· jikkoperaw mas-servizzi tal-Kummissjoni, mal-Istati Membri u mal-partijiet interessati ħalli jtejbu kontinwament il-prestazzjoni ambjentali tat-tagħmir tal-immaġni, b'mod partikolari billi jnaqqsu kontinwament il-miri tal-konsum tal-enerġija ddefiniti fil-ftehim volontarju, u ħalli jkunu jinkludu aspetti ambjentali rilevanti oħrajn fejn xieraq,

· jikkoperaw mas-servizzi tal-Kummissjoni, mal-Istati Membri u mal-partijiet interessati ħalli jittejjeb il-mekkaniżmu tar-rappurtar u r-regoli dwar il-monitoraġġ u l-awditjar,

· jagħtu, sal-iskadenzi stipulati fil-ftehim volontarju, id-dejta rilevanti ħalli l-Kummissjoni u l-partijiet interessati jkunu jistgħu jissorveljaw il-kisba tal-għanijiet tal-ftehim, billi kull firmatarju jimpenja ruħu li jagħti informazzjoni dwar kull mudell tat-tagħmir tal-immaġni li qiegħed fis-suq tal-UE u informazzjoni dwar il-konsum tal-enerġija u karatteristiċi ambjentali oħrajn li jindirizza l-ftehim volontarju (eż. rekwiżiti għal riċiklaġġ faċli u tal-informazzjoni) għal kull mudell tat-tagħmir tal-immaġni soġġett għall-ftehim volontarju, u

· jagħmlu sforzi sabiex jiżguraw l-involviment attiv tal-firmatarji potenzjali fl-iskema.

5.           Monitoraġġ tal-iskema volontarja

Kif meħtieġ skont il-punt 6 tal-Anness VIII tad-Direttiva tal-Ekodisinn, il-Kummissjoni, bl-għajnuna tal-Forum Konsultattiv dwar l-Ekodisinn u tal-Kumitat imsemmi fl-Artikolu 19(1) tad-Direttiva tal-Ekodisinn, se tissorvelja l-applikazzjoni tal-iskema volontarja, b'mod partikolari l-konformità tagħha mal-prinċipji ġenerali, kif ukoll l-adegwatezza tar-rekwiżiti tal-ekodisinn speċifikati fil-ftehim volontarju u kull verżjoni sussegwenti.

Il-Kummissjoni se tagħti attenzjoni speċjali lill-obbligi tar-rappurtar u lir-regoli dwar il-monitoraġġ stipulati fid-Direttiva tal-Ekodisinn, fil-linji gwida eżistenti tal-Kummissjoni u fil-ftehim innifsu. B'mod partikolari, il-Kummissjoni se tivverifika jekk id-dispożizzjonijiet tal-ftehim u l-applikazzjoni tagħhom mill-firmatarji jippermettux lill-Kummissjoni u lill-partijiet interessati (inklużi l-awtoritajiet nazzjonali) jissorveljaw b'mod effettiv l-effikaċja tal-ftehim u kemm jilħaq sew l-għanijiet tiegħu.

Jekk il-Kummissjoni tikkonkludi li l-għanijiet u l-prinċipji ġenerali tad-Direttiva tal-Ekodisinn, kif riflessi fl-iskema volontarja, mhumiex se jintlaħqu u/jew li l-firmatarji tal-iskema volontarja mhumiex se jnaqqsu kontinwament matul iż-żmien il-miri tal-konsum tal-enerġija, mhumiex se jtejbu r-rekwiżiti dwar aspetti li mhumiex relatati mal-enerġija u li huma speċifikati fil-ftehim volontarju, jew mhumiex se jinkludu, fejn xieraq, aspetti ambjentali rilevanti ġodda fil-verżjonijiet sussegwenti, il-Kummissjoni se tadotta r-rekwiżiti tal-ekodisinn għat-tagħmir tal-immaġni pemezz ta' miżura ta' implimentazzjoni obbligatorja.

6.           Konklużjonijiet

L-iskema volontarja tal-ekodisinn proposta mill-industrija għat-tagħmir tal-immaġni hija konformi mad-dispożizzjonijiet kollha tat-Trattat, mal-impenji internazzjonali tal-UE u mal-kriterji speċifiċi tal-valutazzjoni, u għaldaqstant titqies valida skont id-Direttiva tal-Ekodisinn.

Il-valutazzjoni tal-Kummissjoni żvelat li din l-iskema volontarja tal-ekodisinn se tilħaq l-għanijiet politiċi aktar malajr u bi spiża aktar baxxa milli bir-rekwiżiti obbligatorji.

Il-Kummissjoni tirrikonoxxi li t-tagħmir tal-immaġni li tqiegħed fis-suq tal-UE għandu jkun soġġett għall-iskema volontarja tal-ekodisinn. Il-kundizzjonijiet għall-iskema huma stipulati fil-ftehim volontarju konkluż mill-industrija.

Il-Kummissjoni tqis din l-iskema volontarja bħal alternattiva valida għal miżura ta' implimentazzjoni tal-ekodisinn, u għalhekk għalissa, se tastjeni milli tistabbilixxi rekwiżiti obbligatorji tal-ekodisinn għat-tagħmir tal-immaġni li tqiegħed fis-suq tal-UE.

Il-Kummissjoni se tissorvelja kontinwament l-applikazzjoni tal-iskema volontarja. Jekk jinstab li l-għanijiet u l-prinċipji ġenerali tad-Direttiva tal-Ekodisinn mhumiex qed jintlaħqu, il-Kummissjoni se tistabbilixxi rekwiżiti tal-ekodisinn għat-tagħmir tal-immaġni f'miżura ta' implimentazzjoni obbligatorja.

[1]               ĠU L 285, 31.10.2009, p. 10.

[2]               Studju preparatorju tal-EuP "Lot 4 — Imaging equipment, copiers, faxes, printers, scanners, MFD", li sar minn konsorzju ta' sitt kumpaniji: Fraunhofer IZM, Öko-Institut, Bio Intelligence Service, Deutsche Umwelthilfe, PE Europe, u CODDE. Ir-rapporti finali ġew ippubblikati f'Diċembru 2007 u f'Mejju 2008. Id-dokumentazzjoni tista' tinstab fil-websajt tal-istudju: http://www.ecoimaging.org/.

[3]               Il-Bord għall-Valutazzjoni tal-Impatt ta opinjoni favorevoli dwar il-valutazzjoni tal-impatt fl-21 ta' Settembru 2012.

[4]               L-iskema volontarja għat-tagħmir tal-immaġni ġie diskuss darbtejn mill-Forum Konsultattiv dwar l-Ekodisinn, jiġifieri meta tlaqqa' fit-12 ta' Ottubru 2009 u fid-9 ta' Ottubru 2012.

[5]               Il-kapaċità li jiġu stampati bosta paġni minn dokument fuq folja waħda, meta l-prodott imexxih softwer oriġinali mogħti mill-manifattur.

[6]               Ir-rappreżentanti tal-Istati Membri tal-UE, tal-pajjiżi tal-EFTA/taż-ŻEE u tal-NGOs għandhom status ta' osservaturi.

[7]               Ir-rapporti tal-konformità jkunu disponibbli għall-partijiet interessati u jiġu diskussi magħhom.

[8]               http://ec.europa.eu/energy/efficiency/labelling/agreements_en.htm.

[9]               www.eurovaprint.eu

[10]             Tal-anqas 70% tal-prodotti li tqiegħdu fis-suq.

[11]             Il-laqgħa tal-Forum Konsultattiv dwar l-Ekodisinn tad-9 ta' Ottubru 2012.