19.9.2013   

MT

Il-Ġurnal Uffiċjali tal-Unjoni Ewropea

C 271/86

1.1

Il-Kumitat jilqa’ b’mod favorevoli d-dispożizzjonijiet tar-regolament propost. Id-dispożizzjonijiet attwali li japplikaw għas-sorveljanza tas-suq u l-kontroll tal-prodotti huma mifruxin wisq f’diversi testi b’kontenut differenti. Dan jikkomplika bla bżonn il-kompitu tal-awtoritajiet ta’ sorveljanza u tal-produtturi, kif ukoll dak tal-assoċjazzjonijiet tal-konsumatur u tal-organizzazzjonijiet tal-ħaddiema. Il-Kumitat bi pjaċir jinnota li d-dispożizzjonijiet vertikali preċedenti ser jitħassru biex jinġabru mill-ġdid f’regolament trasversali, uniku u msaħħaħ.

1.2

Il-Kumitat jaqbel mal-bażi legali iżda jqis li hemm bżonn referenza wkoll għall-Artikolu 12 tat-TFUE li jispeċifika li l-protezzjoni tal-konsumaturi hija politika trasversali li għandha tiġi kkunsidrata “fid-definizzjoni u l-implimentazzjoni ta’ politiki u attivitajiet oħra tal-Unjoni”.

1.3

L-istrument propost huwa regolament. Il-Kumitat iqis li din il-forma hija l-aktar adatta biex jiġu ffaċilitati l-kooperazzjoni u l-iskambji bejn l-Istati Membri u bejn l-Istati Membri u l-UE. Huwa jqis li l-pakkett propost mill-Kummissjoni jissodisfa r-rekwiżiti ta’ proporzjonalità u tas-sussidjarjetà stabbiliti mit-Trattati. L-Istati Membri għadhom kompletament responsabbli għas-sorveljanza tas-swieq nazzjonali tagħhom u l-kontrolli fil-frunteri esterni tal-Unjoni, u għandhom jiżguraw il-finanzjament għal dan.

1.4

Il-KESE jappoġġja d-dikjarazzjoni tal-Kummissjoni li skontha l-prodotti li jiċċirkolaw fl-Unjoni għandhom jissodisfaw ir-rekwiżiti li jipprovdu livell għoli ta’ protezzjoni tal-interessi pubbliċi, bħas-saħħa u s-sigurtà inġenerali, is-saħħa u s-sigurtà fuq il-post tax-xogħol, il-protezzjoni tal-konsumaturi, il-protezzjoni tal-ambjent u s-sigurtà pubblika.

1.5

Il-Kumitat iqis li r-rispett tas-sigrieti tal-manifattura jew ir-rispett tas-sigrieti kummerċjali ma jistgħux ikunu ostaklu għat-tnedija tat-twissijiet meta s-saħħa jew is-sigurtà tal-utenti jistgħu jkunu affettwati minn wieħed mill-elementi tal-prodott inkwistjoni. Il-prattika kontinwa tas-sistema RAPEX, li tiżgura li jirbaħ l-interess pubbliku mhux l-interessi privati, għalhekk għandha tkompli tiġi rispettata mill-korpi tas-sorveljanza u l-kontroll.

1.6

Il-membri jew l-impjegati tal-korpi tas-sorveljanza u d-dwani għandhom juru l-garanziji kollha tal-onestà u l-indipendenza u jkunu mħarsa mill-pressjonijiet jew mit-tentattivi tal-korruzzjoni potenzjali fil-qadi ta' dmirhom. Il-persuni li jikxfu n-nuqqasijiet jew ir-riskji relatati ma' prodott għandu jkollhom protezzjoni, l-iktar kontra s-segwiti; l-identità tagħhom għandha tibqa' kunfidenzjali.

1.7

Il-Kumitat jitlob biex fil-proposta għal Regolament tiġi inkluża bażi tad-data tal-korrimenti pan-Ewropea (Injuries Database, IDB) li għandha tiġi kkunsidrata bħala t-tielet pilastru tas-sistema ta' skambju ta' informazzjoni tas-sorveljenza tas-suq tal-UE, komplemetari għar-RAPEX u l-ICSMS.

1.8

Fl-aħħar nett, il-Kumitat jixtieq ħafna jkun wieħed mid-destinatarji tar-rapporti perjodiċi li l-Kummissjoni ser tistabbilixxi tul il-ħames snin biex jiġi żgurat is-segwitu tal-eżekuzzjoni tar-Regolament.

2.1

L-aqwa leġislazzjoni dwar is-sigurtà tal-prodotti u l-armonizzazzjoni tar-regoli fis-suq intern mhijiex biżżejjed biex jingħataw garanziji assoluti ta’ sigurtà lill-konsumaturi fir-rigward tal-prodotti ta’ konsum u lill-ħaddiema fir-rigward tal-prodotti intiżi għal użu professjonali.

2.2

Kif juru l-iskandli riċenti, il-frodi biex jiżdiedu l-profitti jew biex jitnaqqsu l-ispejjeż tal-produzzjoni għadha realtà fl-Ewropa; barra minn hekk, il-prodotti importati mhux dejjem jilħqu l-istandards Ewropej u jistgħu jservu bħala kompetizzjoni inġusta għall-prodotti ta' oriġini Ewropea.

2.3

Is-sorveljanza tas-swieq kif ukoll il-kontroll tal-konformità tal-prodotti huma essenzjali u jirrikjedu servizzi u persunal kwalifikat (dwana, servizzi tekniċi, spezzjonijiet, eċċ.) li jkunu qed joperaw fuq it-territorju ta’ kull Stat Membru.

2.4

Id-Direttiva 2001/95/KE dwar is-sigurtà ġenerali tal-prodotti, li kellha tiġi trasposta għalkollox fl-2004, u r-Regolament (KE) Nru 765/2008 dwar l-akkreditazzjoni u s-sorveljanza tas-swieq, li daħal fis-seħħ fl-2010, kif ukoll id-direttivi u d-deċiżjonijiet dwar l-armonizzazzjoni settorjali wasslu għall-progress ċar. Madankollu, id-dispożizzjonijiet dwar is-sorveljanza tas-suq huma mxerdin u jikkoinċidu, li jista’ joħloq konfużjoni bejn ir-regoli ta’ sorveljanza proprji u l-obbligi tal-operaturi, u b’hekk dan jikkomplika l-kompitu tagħhom u tal-leġislaturi u tal-uffiċjali tas-servizz ċivili.

2.5

Il-Kummissjoni tipproponi li jiġi ċċarat il-qafas regolatorju dwar is-sorveljanza tas-suq billi d-dispożizzjonijiet rilevanti kollha jinġabru fi strument legali wieħed li huwa applikabbli orizzontalment għas-setturi kollha. Ir-Regolament il-ġdid dwar is-sorveljanza tas-suq tal-prodotti ser ikun akkumpanjat minn pjan ta’ azzjoni pluriennali għas-sorveljanza tas-suq li jkopri l-perjodu 2013-2015.

2.6

Din hija miżura ewlenija tal-Aġenda Ewropea tal-Konsumatur u tal-Att dwar is-Suq Uniku I u II u tindirizza wkoll ir-rekwiżiti tal-qafas leġislattiv il-ġdid.

2.7

Permezz tal-istess modalitajiet f’kull pajjiż jeħtieġ li jiġi determinat jekk il-prodotti li jitqiegħdu fis-suq, inklużi dawk li jkunu ġejjin minn pajjiżi terzi, humiex siguri u jekk jistgħux jitqiegħdu fis-suq uniku jew għandhomx jiġu rtirati jew projbiti jekk ikunu perikolużi jew mhux konformi.

2.8

Madankollu, is-sorveljanza tas-suq u l-kontrolli ta’ konformità mhumiex effikaċi biżżejjed u għadd kbir ta’ prodotti mhux konformi jinfirxu fis-suq prinċipalment minħabba nuqqas ta’ koordinazzjoni bejn l-awtoritajiet nazzjonali ta’ sorveljanza u l-kwalità u l-affidabbiltà tal-informazzjoni skambjata.

2.9

Għalhekk l-UE għandha tieħu passi biex tiggarantixxi koordinazzjoni aħjar tal-azzjonijiet u tagħmel is-sorveljanza transkonfinali tas-suq effikaċi sabiex tipproteġi liċ-ċittadini. Il-Kummissjoni tistqarr li dan id-dritt ta’ azzjoni huwa l-frott tad-dispożizzjonijiet tal-Artikoli 114 (il-funzjonament tajjeb tas-suq uniku) u tal-Artikoli 168(1) (il-ħarsien tas-saħħa) u 169(1) (il-protezzjoni tal-konsumatur) tat-TFUE. Jeħtieġ ukoll li jiġi semplifikat il-qafas legali applikabbli u jitneħħew l-ambigwitajiet li jeżistu.

2.10

Hemm bżonn li tiġi ssemplifikata l-proċedura RAPEX, li jiġi stabbilit regolament dwar is-sigurtà tal-prodotti li jissostitwixxi d-Direttiva dwar is-sigurtà ġenerali tal-prodotti, u li jiġi stabbilit regolament ġdid dwar is-sorveljanza li jissostitwixxi d-dispożizzjonijiet li bħalissa huma mifruxa f’diversi testi f’livelli differenti.

2.11

It-titjib tal-koordinazzjoni u tal-effikaċja tal-azzjonijiet ta’ sorveljanza u ta’ kontroll mhux biss ser jitwettaq mill-proċedura normali ta’ valutazzjoni tal-leġislazzjoni iżda wkoll mill-istħarriġ tal-Ewrobarometru dwar il-perċezzjoni tal-konsumaturi, mis-sistemi ta’ informazzjoni GRAS-RAPEX u ICSMS u l-implimentazzjoni ta’ indikaturi li jippermettu s-segwitu mill-pari. Il-proċeduri ta’ notifika mill-pajjiżi ser jiġu razzjonalizzati permezz ta’ sistema waħda ta’ notifika għall-prodotti kollha.

2.12

Il-kontrolli fil-fruntieri ser jissaħħu u l-moviment ta’ kwalunkwe prodott li huwa suspettat li jirrappreżenta riskju għandu jitwaqqaf sakemm issir analiżi aktar fil-fond tal-qagħda tiegħu mill-awtorità ta’ sorveljanza.

2.13

Is-sistema ta’ notifika RAPEX għall-prodotti li jirrappreżentaw riskju ser tittejjeb mil-lat tal-perjodi limiti ta’ notifika u tar-rilevanza tal-informazzjoni dwar ir-riskji tal-prodott li dwaru tkun saret notifika.

2.14

Il-Kummissjoni tista’ tadotta miżuri restrittivi adatti fir-rigward tal-prodotti perikolużi li ser jiġu applikati direttament f’każ li l-miżuri standard ta’ urġenza ma jkunux biżżejjed jew adatti.

2.15

L-Att dwar is-Suq Uniku jipprevedi Pjan ta’ Azzjoni Pluriennali dwar is-sorveljanza tas-suq. Dan il-Pjan għandu jikkonċerna l-oqsma fejn il-koordinazzjoni żgurata mill-Kummissjoni tista’ tkun ta’ valur miżjud ġenwin u tista’ twassal għal titjib konsiderevoli.

2.16

Dan il-Pjan huwa l-istrument ta' azzjoni prinċipali fil-livell Komunitarju; huwa jħeġġeġ komunikazzjoni u kooperazzjoni msaħħa. Permezz ta’ mezzi tal-informatika, fil-forma ta’ stħarriġ u studji maħżuna fis-sistema, ser ikun hemm aċċess faċli għall-informazzjoni dwar l-aqwa prattiki. Il-bżonnijiet ser jiġu identifikati u f’dan il-kuntest ser jiġu offruti għodod ta’ taħriġ, għajnuna teknika u ta’ konsulenza.

2.17

Il-Kummissjoni ser tfassal approċċ komuni ta’ kontrolli dokumentarji u tekniċi u għall-analiżijiet li jsiru fil-laboratorji. It-tisħiħ tal-koordinazzjoni tal-azzjonijiet u l-programmi konġunti ser itejjeb l-effikaċja tas-sorveljanza.

2.18

Il-ġbir flimkien tar-riżorsi ser iwassal għal sinerġija u ser jevita d-duplikazzjoni. L-informazzjoni miġbura matul il-ħidma tal-awtoritajiet nazzjoanli ser tinħażen fil-bażi tad-data ICSMS li hija amministrata mill-Kummissjoni li ser toffri l-mezzi u t-taħriġ neċessarji biex jintuża l-potenzjal kollu ta’ din il-bażi tad-data.

2.19

Il-partijiet ikkonċernati kollha għandhom jiġu infurmati u kkonsultati b’mod regolari u flessibbli.

2.20

Ir-rapport li tfassal mill-Kummissjoni skont ir-Regolament (KE) Nru 765/2008 jippermetti li jiġu infurmati l-istituzzjonijiet u l-partijiet involuti u li jiġu valutati l-miżuri ta’ akkreditazzjoni, ta’ sorveljanza u ta’ kontroll tas-suq li huma ffinanzjati mill-UE.

2.21

Is-servizzi doganali u ta’ kontrolli fil-fruntieri esterni tal-Unjoni u taż-Żona Ekonomika Ewropea (ŻEE) għandhom jingħataw aktar mezzi u poteri huma u jindirizzaw il-kwistjoni tal-prodotti importati. Dan jirrikjedi l-allokazzjoni ta’ riżorsi addizzjonali, b’mod partikolari t-taħriġ u l-għodod tekniċi.

3.1

Il-Kumitat jilqa’ b’mod favorevoli l-inizjattiva tat-tisħiħ tas-sorveljanza u tal-kontrolli tas-sigurtà tal-prodotti li jitqiegħdu fis-suq, irrispettivament jekk ikunux ġejjin mill-UE, mill-pajjiżi taż-ŻEE jew minn pajjiżi terzi. Peress li tiżgura sigurtà aħjar tal-prodotti hija sservi għala azzjoni ewlenija tal-Att dwar is-Suq Uniku u tirreaġixxi għall-approċċ il-ġdid.

3.2

Il-Kumitat jinnota madankollu li l-proċeduri ta’ informazzjoni u ta’ konsultazzjoni tal-atturi ekonomiċi u soċjali għadhom vagi ħafna. Jista’ jiġi definit aħjar qafas flessibbli u adatt f’livelli differenti mingħajr ma jiġu introdotti proċeduri burokratiċi addizzjonali jew aktar stretti.

3.2.1

L-intrapriżi kkonċernati jitennew ħafna mill-informazzjoni legali u teknika li tista’ tippermettilhom li jkollhom għad-dispożizzjoni tagħhom is-sigurtà legali indispensabbli għad-deċiżjonijiet ta’ investiment fil-produzzjoni u l-kummerċjalizzazzjoni tal-prodotti. L-informazzjoni miġbura mid-diversi korpi ta’ sorveljanza u ta’ kontroll dwar il-prodotti li jressqu għall-kontroll jew għal proċedura ta’ akkreditazzjoni għandha tkun aċċessibbli għalihom.

3.2.2

Il-konsumaturi u l-ħaddiema jixtiequ li b'mod leġittimu jaċċertaw lilhom infushom dwar l-affidabbiltà tal-prodotti fis-suq, li jkunu jridu jużawhom fil-ħidma tagħhom jew fil-konsum tagħhom. Huma għandhom id-dritt li jkunu jafu l-azzjonijiet implimentati għal dan il-għan fil-livell nazzjonali, Komunitarju jew settorjali biex ikunu żgurati li s-saħħa u s-sigurtà tagħhom mhumiex mhedda.

3.2.3

Il-Kumitat jinsab konvint li l-fiduċja fis-sigurtà tal-prodotti hija essenzjali għall-funzjonament tajjeb tas-suq uniku u l-moviment liberu tal-prodotti, u dan għandu impatt favorevoli fuq it-tkabbir u l-impjiegi.

3.3

Il-Kumitat iqis li s-sorveljanza u l-kontrolli, u b’mod partikolari fil-fruntieri esterni tal-Unjoni, huma prinċipalment il-kompetenzi tal-Istati Membri, filwaqt li l-Unjoni tiżgura l-koordinazzjoni u l-miżuri indispensabbli għal azzjoni komuni effikaċi kif ukoll għall-istandardizzazzjoni tal-prodotti. Din is-sorveljanza u dawn il-kontrolli għandhom impatt fuq l-intrapriżi u jirrappreżentaw spiża konsiderevoli kemm għall-Istati Membri kif ukoll għall-operaturi ekonomiċi f’termini ta’ konformità (standardizzazzjoni, it-tikketta tal-KE). Il-Kumitat jistieden lill-Istati Membri u l-Kummissjoni biex, fl-attivitajiet tagħhom, jikkunsidraw b’mod adatt il-piżijiet amministrattivi fuq l-intrapriżi u b’mod partikolari fuq l-SMEs sabiex ma tiġix aggravata s-sitwazzjoni ekonomika tagħhom f’perjodu ta’ kriżi u ta’ qgħad konsiderevoli.

3.4

Il-qafas regolatorju u l-għadd u l-kwalità tal-mezzi ta’ kontroll fir-rigward tal-moviment liberu tal-prodotti mhux alimentari koperti fl-abbozz ta’ regolament ma jistgħux jiġu traskurati jew ikollhom xi nuqqasijiet. Għaldaqstant, jeħtieġ li l-Istati Membri u l-Kummissjoni jallokaw biżżejjed riżorsi għall-implimentazzjoni tal-mezzi ta’ sorveljanza u ta’ kontroll bil-għan li tiġi garantita l-effikaċja totali tagħhom. Għalkemm jirrikonoxxi li l-baġits huma limitati bħalissa, il-Kumitat iqis li l-interessi pubbliċi kkonċernati jirrikjedu li jsir minn kollox biex jiġu garantiti s-sigurtà u s-saħħa tal-konsumaturi kif ukoll il-protezzjoni tal-ambjent fir-rigward ta’ prodotti difettużi jew perikolużi. Il-funzjonament tajjeb tas-suq intern huwa indispensabbli għall-irkupru ekonomiku u għall-ħolqien ta’ impjiegi ġodda.

3.4.1

F’dan ir-rigward, il-Kumitat iqis li s-sistema attwali ta’ sorveljanza u ta’ kontroll tas-suq għandha nuqqasijiet jew inadegwatezzi serji. Il-kooperazzjoni bejn il-korpi nazzjonali kompetenti, il-Kummissjoni u l-partijiet ikkonċernati għandha tissaħħaħ. Jeħtieġ li jiġu organizzati konsultazzjonijiet regolari. Fuq l-inizjattiva tal-organizzazzjonijiet tal-konsumatur u tal-ħaddiema – u b’mod li tiġi garantita l-immunità ta’ dawn l-organizzazzjonijiet – għandu jiġi implimentat l-eżerċizzju tad-dritt ta’ twissija fir-rigward ta’ ċerti prodotti. Il-korpi kompetenti, l-awtoritajiet ta’ sorveljanza, il-korpi tekniċi ta’ ċertifikazzjoni, is-servizzi doganali u s-servizzi tal-prevenzjoni tal-frodi għandhom jikkooperaw u jagħmlu disponibbli l-informazzjoni miġbura bil-għan li jiġu evitati d-duplikazzjoni, il-ħela tar-riżorsi disponibbli u sabiex tibqa’ tissaħħaħ l-effikaċja tal-kontrolli li jsiru.

3.5

L-effikaċja tas-sistema Komunitarja ta’ skambju rapidu tal-informazzjoni (RAPEX) tippedendi għalkollox minn kemm jinbagħtu malajr in-notifiki u mir-rilevanza tal-informazzjoni teknika fir-rigward tal-prodotti dubbjużi. Il-linji gwida stabbiliti għall-ġestjoni ta' RAPEX għandhom jiġu implimentati b'mod kontinwu, u jkunu ċari biżżejjed biex ma jkun hemm l-ebda dubju dwar in-natura u l-iskala tal-informazzjoni li għandha tiġi notifikata; il-kriterji għall-identifikazzjoni tar-riskji serji għandhom jiġu stabbiliti fil-qafas ta' dawn il-linji gwida, u l-miżuri li għandhom jittieħdu konsegwentement għandhom ikunu definiti b'mod ċar, bħas-suspensjoni provviżorja, il-ħtieġa ta' bidliet tekniċi, sas-sempliċi projbizzjoni.

3.6

Anke r-riskji moderati jew mhux verifikati xjentifikament għandhom jiġu notifikati fi ħdan ir-RAPEX sabiex jiġu previsti miżuri ta’ eżekuzzjoni, bħas-sospensjoni provviżorja, billi jiġi applikat il-prinċipju ta’ prekawzjoni fejn ikun hemm bżonn, jew miżuri adatti oħra bħar-rekwiżiti addizzjonali ta’ informazzjoni għall-konsumaturi u t-twissija lill-utenti apparti r-rekwiżiti normali ta’ tikkettar tal-prodotti.

3.7

Meta, f’każijiet ta’ riskji magħrufa, il-Kummissjoni tipprevedi li tadotta atti ta’ implimentazzjoni fir-rigward ta’ prodott jew kategorija ta’ prodotti bil-għan li tistabbilixxi kundizzjonijiet uniformi ta’ kontroll ta’ dawn il-prodotti, il-Kumitat jixtieq li l-organizzazzjonijiet tal-konsumaturi u dawk ta’ min iħaddem u tal-ħaddiema jiġu nnotifikati u li l-opinjoni tagħhom tiġi kkunsidrata f’kull miżura possibbli. Ta’ min jinnota li dawn l-organizzazzjonijiet jistgħu jgħaddu lill-membri tagħhom mill-aktar fis id-dispożizzjonijiet meħuda mill-Kummissjoni, u dan jgħin b’mod sinifikanti biex jinfiehmu u jiġu applikati b’mod rapidu.

3.8

Fir-rigward tal-Forum tal-Kummissjoni u tal-Istati Membri, li għadu kif ġie stabbilit mir-regolament, il-Kumitat jinnota li l-organizzazzjonijiet tas-soċjetà ċivili ser jiġu mistiedna jieħdu sehem f’kapaċità konsultattiva fis-sottokorpi settorjali li jistgħu jinħolqu mill-Forum. Il-Kumitat iqis li, minkejja n-natura konsultattiva tagħhom, l-opinjonijiet u l-proposti ta’ dawn l-organizzazzjonijiet għandhom jiġu kkunsidrati b’mod adatt u jitqiesu f’kull miżura possibbli, fid-dawl tar-rwol attiv tagħhom fir-rigward tal-konsumaturi u l-ambjenti ekonomiċi u soċjali li jirrappreżentaw.

3.9

Barra minn hekk, fid-dawl ta' ċerti riskji, l-awtoritajiet ta' sorveljanza tal-Istati Membri għandhom iniedu twissija dwar ir-riskji minħabba ċerti prodotti u possibbliment il-mezzi għall-protezzjoni; huma għandhom jikkooperaw mal-operaturi ekonomiċi, sabiex jitwarrbu r-riskji li jqumu minn ċerti prodotti, imma anke mal-organizzazzjonijiet kompetenti tas-soċjetà ċivili, li għandhom jgħaddu l-għarfien u l-mezzi ta' informazzjoni tagħhom lill-membri tagħhom.

3.10

Fl-aħħar nett, il-Kumitat iqis li l-proposta inkwistjoni tindirizza b’mod ġenerali r-rekwiżiti tal-qafas leġislattiv il-ġdid (approċċ ġdid) kif ukoll dawk tas-sussidjarjetà u l-proporzjonalità. Jaqbel ukoll mal-bażi legali li fuqha d-DĠ responsabbli sejsu l-proposta tagħhom. Il-Kumitat jirreferi wkoll għall-Artikolu 12 tat-TFUE li jispeċifika li l-protezzjoni tal-konsumaturi għandha tiġi kkunsidrata “fid-definizzjoni u l-implimentazzjoni ta’ politiki u attivitajiet oħra tal-Unjoni”.

4.1

Il-Kumitat għadu mħasseb dwar id-differenzi potenzjali fl-interpretazzjoni tar-regolament minn pajjiż għall-ieħor; l-azzjoni Komunitarja għandu jkollha l-għan li l-interpretazzjonijiet u l-prattiki jkunu verament uniformi, għas-sigurtà legali tal-operaturi u s-sigurtà tal-utenti.

4.2

Jinsab imħasseb ukoll dwar l-applikazzjoni tad-dispożizzjonijiet dwar il-kunfidenzjalità li jistgħu jkunu ta’ ostaklu għall-aħjar informazzjoni dwar l-elementi jew il-prodotti perikolużi li jistgħu jaffettwaw is-saħħa, is-sigurtà tal-bniedem u l-kwalità tal-ambjent, pereżempju fil-qasam tas-sigrieti tal-produzzjoni. L-interessi pubbliċi kkonċernati b’mod ġenerali jissuperaw l-interessi privati li jistgħu jiġu protetti b’mod abbbużiv minħabba li l-kunċett ta’ kunfidenzjalità jiġi mifhum b’mod assolut wisq. Fi kwalunkwe każ, l-informazzjoni għandha tiġi ċċirkolata bejn il-korpi tal-Istati Membri u dawk tal-Unjoni inkarigati mis-sistema ta’ sorveljanza u ta’ kontroll. Madankollu, jeħtieġ li tiġi rispettata d-data personali protetta mil-liġi u li ma jiġux kompromessi l-investigazzjonijiet li jkunu għaddejjin.

4.3

Kif jeħtieġ ir-Regolament, l-awtoritajiet għandhom jippubblikaw l-informazzjoni dwar il-prodotti perikolużi u r-riskji li jġibu magħhom, il-miżuri potenzjali ta' prevenzjoni, u d-deċiżjonijiet li jittieħdu fir-rigward tal-operaturi, f'sit tal-internet speċjalizzat. Il-Kumitat jitlob li l-pubblikazzjoni ma tiġix ostakolata b'idea ta' kunfidenzjalità eċċessiva fir-rigward tas-sigrieti kummerċjali meta s-saħħa u s-sigurtà tal-utenti jkunu fir-riskju; barra minn hekk, din hija l-prattika segwita mill-Kummissjoni fil-ġestjoni tas-sistema RAPEX, prattika li għandha tinżamm.

4.4

Il-Kumitat jinsisti fuq ir-rekwiżiti tal-indipendenza u t-trasparenza tal-korpi ta’ sorveljanza u ta’ kontroll. L-uffiċjali ta’ dawn il-korpi għandhom jiġu protetti minn interferenzau kull tentattiv ta’ korruzzjoni fl-eżerċizzju tal-funzjonijiet tagħhom. Dawn għandhom ikunu imparzjali u għandhom jiġbru l-ilmenti kollha li jitressqu mill-konsumaturi u l-utenti jew l-organizzazzjonijiet tagħhom u fejn ikun hemm bżonn jagħtuhom segwitu. Il-laboratorji ta’ kontroll għandhom joperaw ukoll b’mod għalkollox indipendenti, l-istess bħall-korpi inkarigati mill-għoti ta’ tikketti standardizzati, li huma indispensabbli biex dawk li jieħdu d-deċiżjonijiet fl-intrapriżi u l-konsumaturi jagħmlu l-għażla tagħhom.

4.5

Il-Kumitat jemmen li r-Regolament propost għandu jinkludi wkoll dispożizzjonijiet li jistabbilixxu bażi tad-data pan-Ewropea dwar il-korrimenti li tkun tkopri kull tip ta' korriment. Din il-bażi tad-data għandha:

4.5.1

Għaldaqstant, il-Kumitat jissuġġerixxi li: