EUR-Lex Access to European Union law
This document is an excerpt from the EUR-Lex website
Document 52012PC0667
Proposal for a COUNCIL DECISION authorising Slovenia to apply a special measure derogating from Article 287 of Directive 2006/112/EC on the common system of value added tax
Proposta għal DEĊIŻJONI TAL-KUNSILL li tawtorizza lis-Slovenja tapplika miżura speċjali ta' deroga għall-Artikolu 287 tad-Direttiva 2006/112/KE dwar is-sistema komuni ta' taxxa fuq il-valur miżjud
Proposta għal DEĊIŻJONI TAL-KUNSILL li tawtorizza lis-Slovenja tapplika miżura speċjali ta' deroga għall-Artikolu 287 tad-Direttiva 2006/112/KE dwar is-sistema komuni ta' taxxa fuq il-valur miżjud
/* COM/2012/0667 final - 2012/0316 (NLE) */
Proposta għal DEĊIŻJONI TAL-KUNSILL li tawtorizza lis-Slovenja tapplika miżura speċjali ta' deroga għall-Artikolu 287 tad-Direttiva 2006/112/KE dwar is-sistema komuni ta' taxxa fuq il-valur miżjud /* COM/2012/0667 final - 2012/0316 (NLE) */
MEMORANDUM TA' SPJEGAZZJONI 1. KUNTEST TAL-PROPOSTA Raġunijiet għall-proposta u
l-għanijiet tagħha Skont l-Artikolu 395(1)
tad-Direttiva 2006/112/KE[1]
tat-28 ta' Novembru 2006 dwar is-sistema komuni ta' taxxa fuq
il-valur miżjud, il-Kunsill, bi qbil unanimu fuq proposta
mill-Kummissjoni, jista' jawtorizza lil kwalunkwe Stat Membru li japplika
miżuri speċjali ta' deroga mid-Direttiva msemmija biex iħaffef
il-proċedura ta' ħlas tat-taxxa jew biex iwaqqaf milli jsiru
ċerti tipi ta' evażjoni tat-taxxa. B'ittra rreġistrata mal-Kummissjoni
fit-30 ta’ Lulju 2012, is-Slovenja talbet awtorizzazzjoni biex
tapplika miżura ta’ deroga mill-Artikolu 287
tad-Direttiva 2006/112/KE, li tkun tippermetti lis-Slovenja teżenta
mill-VAT lill-persuni taxxabbli li l-fatturat annwali tagħhom ma jkunx
jaqbeż il-EUR 50 000. B’konformità mal-Artikolu 395(2)
tad-Direttiva 2006/112/KE, b’ittra ddatata
t-18 ta’ Settembru 2012 il-Kummissjoni infurmat lill-Istati
Membri l-oħrajn bit-talba li saret mis-Slovenja. B’ittra ddatata
d-19 ta’ Settembru 2012, il-Kummissjoni nnotifikat lis-Slovenja
li kellha l-informazzjoni kollha meħtieġa biex tikkunsidra t-talba. Kuntest ġenerali Il-Kapitolu 1 tat-Titolu XII
tad-Direttiva 2006/112/KE jagħti l-possibbiltà lill-Istati Membri li
japplikaw skemi speċjali għall-impriżi ż-żgħar,
inkluża l-possibbiltà li jeżentaw lil persuni taxxabbli b'inqas minn
ċertu fatturat annwali. Din l-eżenzjoni timplika li persuna taxxabbli
ma għandhiex għalfejn iżżomm il-VAT fuq il-provvisti
tagħha u, konsegwentement, ma tistax tnaqqas il-VAT minn fuq l-elementi
produttivi tagħha. Skont l-Artikolu 287
tad-Direttiva 2006/112/KE, Stati Membri partikulari li ssieħbu
fil-Komunità wara l-1 ta' Jannar 1978 jistgħu jeżentaw
lill-persuni taxxabbli li l-fatturat annwali tagħhom ma jkunx ogħla
mill-ekwivalenti fil-munita nazzjonali tal-ammonti bir-rata tal-kambju
fil-ġurnata tal-adeżjoni tagħhom, kif speċifikat f’dik
id-dispożizzjoni. Fir-rigward tas-Slovenja, dan il-limitu minimu huwa
stabbilit bħala EUR 25 000 skont il-punt 15 tal-Artikolu 287
tad-Direttiva 2006/112/KE. Fil-klima ekonomika u politika ta’
bħalissa, is-Slovenja tixtieq tgħolli dan il-limitu minimu għal
EUR 50 000. L-introduzzjoni ta’ limitu minimu bħal dan se
tissimplifika s-sistema tal-VAT għall-impriżi ż-żgħar
billi tnaqqas b'mod sinifikanti l-piżijiet minn fuq dawk in-negozji li
huma eleġibbli għall-iskema billi tirrilaxxahom minn ħafna
mill-obbligi tal-VAT skont l-arranġamenti normali tal-VAT. Is-sistema tkun
fakultattiva għall-persuni taxxabbli. Skont l-awtoritajiet Sloveni,
il-miżura speċjali li jridu jdaħħlu se jkollha biss effett
negliġibbli fuq l-ammont totali tad-dħul tas-Slovenja mill-VAT
miġbur fl-istadju tal-konsum finali (mhux aktar minn 0.3%). Dispożizzjonijiet eżistenti
fil-qasam tal-proposta Fl-2004, il-Kummissjoni għamlet proposta
biex – inter alia – tgħolli l-limitu minimu tal-fatturat annwali
disponibbli għall-Istati Membri (COM(2004) 728 finali[2])
għall-eżenzjoni ta’ persuni taxxabbli mill-VAT għal
EUR 100 000. Konsistenza ma' politiki u objettivi
oħrajn tal-Unjoni Mhux applikabbli. 2. IR-RIŻULTATI TAL-KONSULTAZZJONIJIET
MAL-PARTIJIET INTERESSATI U TAL-VALUTAZZJONIJIET TAL-IMPATT Konsultazzjoni mal-partijiet interessati Mhux rilevanti. Il-ġbir u l-użu tal-kompetenza Ma kien hemm l-ebda bżonn ta’
għarfien espert estern. Valutazzjoni tal-impatt Il-proposta għal Deċiżjoni
tal-Kunsill għandha l-għan li ddaħħal miżura ta'
simplifikazzjoni li tneħħi ħafna mill-obbligi tal-VAT
għan-negozji li jaħdmu b’fatturat annwali li mhux ogħla minn
EUR 50 000 u għalhekk għandha potenzjal għal impatt
pożittiv. Minħabba l-kamp ta' applikazzjoni strett
tad-deroga u l-applikazzjoni limitata fiż-żmien, l-impatt, fi
kwalunkwe każ, se jkun limitat . 3. ELEMENTI LEGALI TAL-PROPOSTA Sommarju tal-azzjoni proposta Il-proposta għandha l-għan li
tawtorizza lis-Slovenja tintroduċi miżura ta’ simplifikazzjoni li
tagħti deroga mill-Artikolu 287 tad-Direttiva 2006/112/KE sabiex
persuni taxxabbli b’fatturat annwali mhux ogħla minn EUR 50 000
ikunu jistgħu jiġu eżentati mill-VAT. Bażi legali L-Artikolu 395(1) tad-Direttiva
tal-Kunsill 2006/112/KE. Il-prinċipju tas-sussidjarjetà Il-proposta taqa’ taħt il-kompetenza
esklużiva tal-Unjoni Ewropea. Għalhekk, il-prinċipju
tas-sussidjarjetà ma japplikax. Il-prinċipju tal-proporzjonalità Il-proposta hija konformi mal-prinċipju
tal-proporzjonalità għar-raġunijiet li ġejjin: Din id-Deċiżjoni tikkonċerna
awtorizzazzjoni mogħtija lil Stat Membru fuq it-talba tiegħu stess u
ma timplika l-ebda obbligu. Minħabba l-ambitu limitat tad-deroga,
il-miżura speċjali hija proporzjonata mal-għan mixtieq. L-għażla tal-istrumenti L-istrument propost: Deċiżjoni
tal-Kunsill. Mezzi oħrajn ma jkunux adegwati
għar-raġunijiet li ġejjin: Skont l-Artikolu 395 tad-Direttiva
tal-Kunsill 2006/112/KE, deroga mir-regoli komuni tal-VAT hija possibbli
biss bl-awtorizzazzjoni tal-Kunsill li jkun qiegħed jaġixxi b'mod
unanimu fuq proposta mill-Kummissjoni. Deċiżjoni tal-Kunsill hija
l-aktar strument xieraq peress li tista' tiġi indirizzata lil Stat Membru
individwali. 4. IMPLIKAZZJONI BAĠITARJA Il-proposta mhix se taffettwa ħażin
lir-riżorsi proprji tal-Unjoni mill-VAT minħabba li s-Slovenja se
twettaq kalkolu tal-kumpens skont l-Artikolu 6 tar-Regolament tal-Kunsill
(KEE, Euratom) 1553/89. 5. ELEMENTI FAKULTATTIVI Il-proposta tinkludi klawżola sunset. 2012/0316 (NLE) Proposta għal DEĊIŻJONI TAL-KUNSILL li tawtorizza lis-Slovenja tapplika
miżura speċjali ta' deroga għall-Artikolu 287 tad-Direttiva 2006/112/KE
dwar is-sistema komuni ta' taxxa fuq il-valur miżjud IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, Wara li kkunsidra d-Direttiva tal-Kunsill
2006/112/KE[3]
tat-28 ta' Novembru 2006 dwar is-sistema komuni ta' taxxa fuq
il-valur miżjud, u b'mod partikolari l-Artikolu 395(1) tagħha, Wara li kkunsidra l-proposta mill-Kummissjoni
Ewropea, Billi: (1) B'ittra rreġistrata
mal-Kummissjoni fit-30 ta’ Lulju 2012, is-Slovenja talbet
awtorizzazzjoni biex tapplika miżura ta’ deroga mill-Artikolu 287
tad-Direttiva 2006/112/KE, li tkun tippermetti lis-Slovenja teżenta
mill-VAT lill-persuni taxxabbli li l-fatturat annwali tagħhom ma jkunx
jaqbeż il-EUR 50 000. (2) B’konformità
mal-Artikolu 395(2) tad-Direttiva 2006/112/KE, b’ittra datata
t-18 ta’ Settembru 2012 il-Kummissjoni infurmat lill-Istati
Membri l-oħrajn bit-talba li saret mis-Slovenja. Permezz ta’ ittra datata
d-19 ta’ Settembru 2012, il-Kummissjoni nnotifikat lis-Slovenja
li kellha l-informazzjoni kollha meħtieġa sabiex tqis it-talba. (3) Skont l-Artikolu 287
tad-Direttiva 2006/112/KE, Stati Membri partikulari li ssieħbu
fil-Komunità wara l-1 ta' Jannar 1978 jistgħu jeżentaw
lill-persuni taxxabbli li l-fatturat annwali tagħhom ma jkunx ogħla
mill-ekwivalenti fil-munita nazzjonali tal-ammonti bir-rata tal-kambju
fil-ġurnata tal-adeżjoni tagħhom, kif speċifikat f’dik
id-dispożizzjoni. Is-Slovenja talbet li l-limitu minimu korrispondenti
tagħha, li huwa stabbilit bħala EUR 25 000 skont
il-punt 15 tal-Artikolu 287, jiżdied għal
EUR 50 000. (4) Limitu minimu ogħla
għall-iskema speċjali għall-impriżi ż-żgħar hu
miżura ta’ simplifikazzjoni peress li dan jista’ jnaqqas b’mod sinifikanti
l-obbligi tal-VAT għan-negozji ż-żgħar. L-iskema
speċjali hija fakultattiva għall-persuni taxxabbli. (5) Fil-proposta tagħha
għal-Direttiva biex tissimplifika l-obbligi tat-taxxa fuq il-valur
miżjud tad-29 ta' Ottubru 2004[4],
il-Kummissjoni inkludiet dispożizzjonijiet maħsuba biex jippermettu
lill-Istati Membri biex jistabbilixxu l-limitu tal-fatturat annwali
għall-iskema ta' eżenzjoni mill-VAT sa ammont massimu ta'
EUR 100 000 jew l-ekwivalenti fil-valuta nazzjonali, bil-possibbiltà
li dan l-ammont ikun aġġornat kull sena. It-talba ppreżentata
mis-Slovenja hi konformi ma' dik il-proposta. (6) Id-deroga se jkollha biss
effett negliġibbli fuq l-ammont globali ta’ taxxa miġbura fl-istadju
tal-konsum finali u mhux se jkollha effetti negattivi fuq ir-riżorsi
proprji tal-Unjoni li jinġabru mit-taxxa fuq il-valur miżjud. ADOTTA DIN ID-DEĊIŻJONI: Artikolu 1 B’deroga mill-Artikolu 287(15)
tad-Direttiva 2006/112/KE, is-Slovenja hija awtorizzata teżenta
mill-VAT lil persuni taxxabbli li l-fatturat annwali tagħhom ma jkunx
aktar minn EUR 50 000. Artikolu 2 Din id-Deċiżjoni tapplika sad-data
tad-dħul fis-seħħ ta’ regoli tal-Unjoni li jemendaw l-ammonti
tal-limiti massimi ta’ fatturat annwali li taħthom il-persuni taxxabbli
jistgħu jikkwalifikaw għal eżenzjoni mill-VAT jew
sal-31 ta’ Diċembru 2015, skont liema data tiġi
l-ewwel. Din id-Deċiżjoni tidħol
fis-seħħ l-għada tal-jum tal-pubblikazzjoni tagħha f'Il-Ġurnal
Uffiċjali tal-Unjoni Ewropea. Artikolu 3 Din
id-Deċiżjoni hija indirizzata lir-Repubblika tas-Slovenja. Magħmul fi Brussell, Għall-Kunsill Il-President [1] ĠU L347, 11.12.2006, p.1. [2] http://eur-lex.europa.eu/LexUriServ/LexUriServ.do?uri=COM:2004:0728:FIN:MT:PDF [3] ĠU L347, 11.12.2006, p.1. [4] COM(2004) 728 finali.