52012PC0439

MEMORANDUM TA’ SPJEGAZZJONI

1.           KUNTEST TAL-PROPOSTA

Fis-6 ta’ Ottubru 2011, il-Kunsill ta mandat lill-Kummissjoni fejn ġiet awtorizzata tiftaħ negozjati mal-Organizzazzjoni Ewropea għas-Sigurtà tan-Navigazzjoni bl-Ajru (Eurocontrol) sabiex tikkonkludi ftehim ta’ kooperazzjoni bejn l-Unjoni Ewropea (UE) u l-Eurocontrol. Il-Ftehim għandu jirrikonoxxi l-prinċipji tal-Ajru Uniku Ewropew (SES), notevolment ir-rwol tal-UE bħala l-uniku regolatur għall-ġestjoni tat-traffiku tal-ajru (ATM) u l-użu tal-għarfien espert tekniku tal-Eurocontrol biex jgħin lill-UE twettaq titjib fl-ATM fl-Ewropa skont il-qafas legali tal-SES u biex jappoġġa lill-UE fl-implimentazzjoni u l-iżvilupp tal-SES u politiki relatati oħrajn (l-ambjent, it-tibdil fil-klima u r-riċerka). Il-Ftehim għandu wkoll jiffaċilita aktar riformi istituzzjonali tal-Eurocontrol, pereżempju, fl-istabbiliment ta’ relazzjoni ġdida bejn l-Eurocontrol u l-Aġenzija Ewropea tas-Sikurezza tal-Avjazzjoni (EASA), u jipprovdi qafas għal kwistjonijiet potenzjalment sensittivi bħal kooperazzjoni ċivili-militari pan-Ewropea.

Abbażi tad-direttivi ta’ negozjati tal-mandat, fl-24 ta’ April 2012 ġie inizjalat abbozz ta’ Ftehim miż-żewġ partijiet.

L-abbozz ta’ Ftehim propost jiddefinixxi t-termini u l-kundizzjonijiet ta’ kooperazzjoni msaħħa bejn l-UE u l-Eurocontrol sabiex jappoġġaw lill-UE fl-implimentazzjoni u l-iżvilupp ta’ ATM skont il-qafas legali tal-SES u politiki tal-UE relatati. L-għanijiet huma: li jsir kontribut għal implimentazzjoni f’waqtha u konsistenti tal-SES fi ħdan l-UE u fi Stati li jaqblu li jkunu marbuta bl-SES; li tkun iffaċilitata l-kooperazzjoni ċivili-militari meħtieġa dwar l-ATM fl-SES u l-użu tal-għarfien espert tal-Eurocontrol f'dawn l-oqsma; li jkun iffaċilitat l-involviment ta’ Stati li mhumiex Membri tal-UE fl-SES. Barra minn hekk, l-abbozz ta’ Ftehim għandu l-għan li jiżgura sinerġiji u jevita d-duplikazzjoni tal-ħidma tal-EASA fl-affarijiet tal-ATM marbuta mas-sikurezza u kwistjonijiet ambjentali u biex jikkunsidra d-dimensjoni pan-Ewropea tal-Eurocontrol.

L-abbozz ta’ Ftehim propost jelenka l-oqsma ta’ kooperazzjoni li jikkonċernaw l-implimentazzjoni ta’ SES, SESAR u politiki oħrajn tal-UE relatati li se jiġu definiti aktar f’annessi separati tal-Ftehim.

L-abbozz ta’ Ftehim propost jiddefinixxi l-forom u l-mekkaniżmi ta’ kooperazzjoni u koordinazzjoni bejn il-partijiet inkluż il-proċessi ta’ konsultazzjoni mal-partijiet interessati. Kumitat Konġunt imwaqqaf permezz tal-Ftehim se jkun responsabbli għall-ġestjoni u l-funzjonament tiegħu. Barra minn hekk, l-iffinanzjar tal-attivitajiet huwa definit skont ir-regoli applikabbli għall-baġits rispettivi tal-partijiet.

Il-Kummissjoni tipproponi lill-Kunsill biex jadotta:

· deċiżjoni li tawtorizza l-iffirmar tal-Ftehim u l-applikazzjoni proviżorja tiegħu qabel id-dħul fis-seħħ;

· ladarba tkun ġiet adottata din l-ewwel deċiżjoni, deċiżjoni oħra li permezz tagħha jiġi konkluż il-Ftehim bil-ħsieb li dan jidħol fis-seħħ, abbażi tal-kunsens tal-Parlament Ewropew,.

2.           ELEMENTI LEGALI TAL-PROPOSTA

Id-Deċiżjonijiet tal-Kunsill proposti huma t-tnejn ibbażati fuq l-Artikolu 100, il-paragrafu 2 tat-Trattat dwar il-Funzjonament tal-Unjoni Ewropea (TFUE). Barra minn hekk, id-Deċiżjoni tal-Kunsill dwar l-iffirmar u l-applikazzjoni proviżorja tal-Ftehim hija bbażata fuq l-Artikolu 218, il-paragrafu 5 tat-TFUE, filwaqt li d-Deċiżjoni tal-Kunsill dwar il-konklużjoni hija bbażata fuq l-Artikolu 218, il-paragrafu 6.

Il-Ftehim dwar il-kooperazzjoni msaħħa bejn l-UE u l-Eurocontrol huwa strument legali vinkolanti effiċjenti li jrawwem kooperazzjoni teknika bejn iż-żewġ partijiet. Jistabbilixxi qafas ġenerali li jippermetti l-istabbilment ta’ attivitajiet kooperattivi fil-qasam tal-ATM u politiki relatati. Il-ftehim propost ma jimponi l-ebda piż amministrattiv jew finanzjarju addizzjonali fuq l-awtoritajiet tal-Istati Membri.

2012/0213 (NLE)

Proposta għal

DEĊIŻJONI TAL-KUNSILL

dwar il-konklużjoni tal-Ftehim li jipprovdi qafas ġenerali għal kooperazzjoni msaħħa bejn l-Unjoni Ewropea u l-Organizzazzjoni Ewropea għas-Sigurtà tan-Navigazzjoni bl-Ajru

(Test b'rilevanza għaż-ŻEE)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 100(2), flimkien mal-punt (a) tal-Artikolu 218(6) tiegħu,

Wara li kkunsidra l-proposta mill-Kummissjoni Ewropea,

Wara li kkunsidra l-kunsens tal-Parlament Ewropew[1],

Billi:

(1)       Il-Kummissjoni Ewropea nnegozjat, f’isem l-Unjoni, il-Ftehim li jipprovdi qafas ġenerali għal kooperazzjoni msaħħa bejn l-Unjoni Ewropea u l-Organizzazzjoni Ewropea għas-Sigurtà tan-Navigazzjoni bl-Ajru (minn hawn ’il quddiem “il-Ftehim”).

(2)       Il-Ftehim ġie ffirmat fi (...), suġġett għall-konklużjoni tiegħu f’data iktar tard.

(3)       Il-Ftehim għandu jkun approvat mill-Unjoni.

(4)       Huwa meħtieġ li jiġu stabbiliti arranġamenti proċedurali għall-parteċipazzjoni tal-Unjoni fil-Kumitat Konġunt stabbilit permezz tal-Ftehim,

ADOTTA DIN ID-DEĊIŻJONI:

Artikolu 1

Il-Ftehim li jipprovdi qafas ġenerali għal kooperazzjoni msaħħa bejn l-Unjoni Ewropea u l-Organizzazzjoni Ewropea għas-Sigurtà tan-Navigazzjoni bl-Ajru huwa b’dan approvat f'isem l-Unjoni.

It-test tal-Ftehim huwa mehmuż mad-Deċiżjoni.

Artikolu 2

Il-President tal-Kunsill għandu jinnomina l-persuna/i awtorizzata/i biex tagħti/jagħtu, f’isem l-Unjoni, in-notifika pprovduta fl-Artikolu 13, 2 tal-Ftehim, sabiex ikun espress il-kunsens tal-Unjoni li tkun marbuta bil-Ftehim.

Artikolu 3

L-Unjoni għandha tiġi rrappreżentata mill-Kummissjoni fil-Kumitat Konġunt stabbilit permezz tal-Artikolu 7 tal-Ftehim.

Artikolu 4

1. Il-Kummissjoni, wara konsultazzjoni mal-Kumitat Speċjali maħtur mill-Kunsill, għandha tiddetermina l-pożizzjoni li għandha tittieħed mill-Unjoni fil-Kumitat Konġunt, inkluż fir-rigward tal-adozzjoni tal-Annessi tal-Ftehim u l-emendi ta’ dawn l-Annessi.

.

2. Il-Kummissjoni tista’ tieħu kwalunkwe azzjoni xierqa skont l-Artikoli 5, 6, 8, 9, 10 u 11 tal-Ftehim.

Artikolu 5

Il-Kummissjoni għandha tinforma lill-Kunsill regolarment dwar l-implimentazzjoni tal-Ftehim.

Artikolu 6

Din id-Deċiżjoni għandha tidħol fis-seħħ l-għada tal-jum tal-pubblikazzjoni tagħha f'Il-Ġurnal Uffiċjali tal-Unjoni Ewropea.

Magħmul fi Brussell,

                                                                       Għall-Kunsill

                                                                       Il-President

[1]               ĠU C , , p. .