52012DC0297

1.           Introduzzjoni u Bażi Legali

Il-kompitu ewlieni tal-Kunsill Ewropew għar-Riċerka (KER) stabbilit bid-Deċiżjoni tal-Kummissjoni 2007/134/KE[1] huwa l-implimentazzjoni tal-Programm Speċifiku "Ideas" (Ideat), b'baġit kumplessiv ta' EUR 7.51 biljun.

Il-KER jikkonsisti f’Kunsill Xjentifiku indipendenti appoġġjat minn struttura ta' implimentazzjoni ddedikata fil-forma tal-Aġenzija Eżekuttiva tal-KER (ERCEA)[2] li nħolqot skont ir-reġim ġenerali tal-aġenziji eżekuttivi. Ir-responsabbiltà għall-implimentazzjoni tal-programm "Ideas" u għall-appoġġ tal-Kunsill Xjentifiku ġiet iddelegata lill-Aġenzija mill-Kummissjoni fl-2008 u l-awtonomija ngħatat lill-Aġenzija f'Lulju 2009.

F'konformità mal-Artikolu 4.4 u l-Anness I tad-Deċiżjoni tal-Kunsill dwar il-Programm Speċifiku "Ideas", dan ir-Rapport Annwali tal-Kummissjoni, imfassal b'kooperazzjonu mal-Kunsill Xjentifiku tal-KER u l-Aġenzija Eżekuttiva tal-KER, jippreżenta l-valutazzjoni tal-Kummissjoni tal-operazzjonijiet tal-KER u l-ksib tal-għanijiet tagħha fl-2011. Dan ir-rapport huwa kkumplimentat b'rapport mill-Kunsill Xjentifiku dwar l-implimentazzjoni u l-kisbiet xjentifiċi tal-programm matul is-sena 2011[3].

2.           Kwistjonijiet ta' Strateġija

Il-Kunsill Xjentifiku huwa responsabbli biex jistabbilixxi l-istrateġija xjentifika tal-KER, inkluż l-istabbiliment tal-iktar dokument ta' strateġija importanti tal-KER, il-Programm ta' Ħidma annwali "Ideas".

2.1.        Skemi ta' finanzjament

Żewġ skemi ta' għotja jiffurmaw il-qofol tal-Programm ta' Ħidma "Ideas".

Għotjiet għad-Debuttanti, li jappoġġjaw lir-riċerkaturi fl-istadju bikri tal-karriera tagħhom, bil-għan li jipprovdu kundizzjonijiet ta' xogħol li jippermettulhom isiru mexxejja indipendenti tar-riċerka.

Għotjiet għal Riċerkaturi Avvanzati, imfassla biex jappoġġjaw mexxejja tar-riċerka importanti u stabbiliti billi jipprovdu r-riżorsi meħtieġa biex jippermettulhom ikomplu x-xogħol tal-gruppi tagħhom, billi jfittxu kisbiet sinifikanti ġodda fil-linja tar-riċerka tagħhom.

Il-Kunsill Xjentifiku, biex isaħħaħ ir-rwol tal-KER fil-katina tal-innovazzjoni mir-riċerka fil-fruntieri tal-għarfien għall-benefiċċji soċjo-ekonomiċi, fl-2011 żviluppa u nieda opportunità ġdida ta' offerta - il-Prova tal-Kunċett – li hija offruta lid-detenturi tal-għotjiet tal-KER biex jistabbilixxu l-potenzjal tal-innovazzjoni ta’ ideat li joħorġu mill-proġetti tagħhom iffinanzjati mill-KER. L-iskema timmira li tkopri d-differenza fil-finanzjament fl-istadju l-iktar bikri tal-innovazzjoni.

2.2.        Il-Programm ta' Ħidma għall-2011 għall-Programm Speċifiku "Ideas"

Il-Programm ta' Ħidma għall-2011 għall-Programm Speċifiku "Ideas" ġie stabbilit fl-14 ta' April 2010 mill-Kunsill Xjentifiku u ġie adottat sussegwentement fid-19 ta' Lulju 2010 mill-Kummissjoni[4]. Il-Programm ta’ Ħidma ġie rivedut u jinkludi l-opportunità l-ġdida ta’ għotja, il-Prova tal-Kunċett. Il-verżjoni riveduta, stabbilita mill-Kunsill Xjentifiku fid-29 ta’ Novembru 2010, ġiet adottata mill-Kummissjoni fl-24 ta’ Marzu 2011[5].

Minbarra l-introduzzjoni tal-Għotjiet tal-Prova tal-Kunċett, saru ftit aġġustamenti fl-istrateġija xjentifika. Il-perjodu tal-eliġibiltà għall-Għotja għad-Debuttanti ġie estiż ulterjorment; issa jikkonsisti minn 2 – 12-il-sena għall-għoti ta’ PhD (2 – 7 għal "debuttanti" u 7-12 għal "konsolidanti"). Ir-restrizzjoni fuq l-applikazzjoni mill-ġdid kienet illaxkata wkoll; l-applikanti issa jistgħu japplikaw mill-ġdid għas-sejħa li ġejja jekk il-proposta tagħhom kienet ivvalutata li taqbeż il-limitu tal-kwalità. Id-dominju interdixxiplinarju issemma mill-ġdid bħala “ir-raba’ dominju” b’baġit indikattiv ta’ 10%.

2.3.        Metodoloġija għal reviżjoni bejn il-pari

Il-KER juża struttura ta' bordijiet ta' livell għoli ta' reviżjoni bejn il-pari li l-membri tagħhom jintgħażlu mill-Kunsill Xjentifiku u jinkludu xjenzjati, inġiniera u studjużi kemm mill-UE kif ukoll lil hinn minnha. Dawn il-bordijiet ikopru d-dixxiplini kollha tar-riċerka u huma organizzati f'qafas ta' tliet dominji ta' riċerka ewlenin: Ix-Xjenzi Fiżiċi u l-Inġinerija, ix-Xjenzi tal-Ħajja, u x-Xjenzi Soċjali u l-Istudji Umanistiċi. B'konsistenza mas-sejħiet preċedenti, l-għadd tal-bordijiet kien ta’ 25 għaż-żewġ skemi ta' għotja. Il-proposti Prova tal-Kunċett ġew ivvalutati minn sett speċifiku ta’ reviżuri bejn il-pari li ħadmu mill-bogħod.

3.           L-Implimentazzjoni tal-Programm

Fl-implimentazzjoni tal-Programm fl-2011, l-impenji ta' iktar minn EUR 1.3 biljun (impenn globali) u l-ħlasijiet ta' EUR 725 miljun ġew eżegwiti b'mod sħiħ, u rrappreżentaw 100% tal-krediti operazzjonali tal-Programm Speċifiku "Ideas" għall-2011. Madwar 2.2 % tal-baġit operazzjonali ntefaq fuq l-amministrazzjoni.

3.1.        Għotjiet

Sa mill-Programm ta' Ħidma tal-2008, is-sejħiet tal-KER involvew proċess ta' applikazzjoni f'pass wieħed, fejn l-applikanti huma mitluba jressqu l-proposta kompluta tagħhom u evalwazzjoni f'żewġ stadji.

L-għotjiet jiġu offruti lill-aqwa proposti li jiddependu fuq il-baġit disponibbli. L-offerta ssir abbażi tal-proposta nfisha u l-finanzjament irrakkomandat mir-reviżjoni bejn il-pari.

3.1.1.     Għotjiet tal-KER għad-Debuttanti

Is-sejħa tal-2011 tal-KER għall-Għotjiet għad-Debuttanti ġiet ippubblikata f'Lulju 2010 b'baġit indikattiv ta' EUR 661 miljun. B'kollox waslu 4080 proposta mqassma skont il-kategorija kif ġej: 1690 proposta fix-Xjenzi Fiżiċi u l-Inġinerija, 1440 fix-Xjenzi tal-Ħajja u 950 fix-Xjenzi Soċjali u l-Istudji Umanistiċi. Intgħażlu total ta’ 485 proposta għall-fondi, b'total ta' aktar minn EUR 670 miljun mogħtija u għotja medja kumplessiva mogħtija ta' madwar EUR 1.4 miljun.

Is-sejħa tal-2012 għall-Għotjiet għad-Debuttanti ġiet ippubblikata f'Lulju 2011 b'baġit indikattiv ta' EUR 730 miljun. Bħala reazzjoni, tressqu total ta' 4741 proposta: 2058 għax-Xjenzi Fiżiċi u l-Inġinerija, 1653 għax-Xjenzi tal-Ħajja u 1030 għax-Xjenzi Soċjali u l-Istudji Umanistiċi, li jirrappreżentaw 43%, 35 % u 22% rispettivament, sehem simili għas-sejħiet tal-Għotjiet għad-Debuttanti tal-2010 u tal-2011.

3.1.2.     Għotjiet KER għal Riċerkaturi Avvanzati

Is-sejħa tal-2011 għall-Għotjiet tal-KER għal Riċerkaturi Avvanzati ġiet ippubblikata f'Novembru 2010 b'baġit indikattiv ta' EUR 661 miljun. B'kollox waslu 2284 proposta mqassma skont il-kategorija kif ġej: 917 –il proposta fix-Xjenzi Fiżiċi u l-Inġinerija (40%), 789 fix-Xjenzi tal-Ħajja (35%) u 578 fix-Xjenzi Soċjali u l-Istudji Umanistiċi (25%). Il-proċess ta' evalwazzjoni ammonta għal total ta' 294 proposta miżmuma għall-finanzjament b'total ta' madwar EUR 700 miljun mogħtija u għotja medja kumplessiva ta' madwar EUR 2.4 miljuni.

Is-sejħa tal-2012 għall-Għotjiet tal-KER għal Riċerkaturi Avvanzati ġiet ippubblikata f'Novembru 2011 bl-iskadenzi bejn Frar u April 2012 u b’baġit indikattiv ta' EUR 680 miljun.

3.1.3.     Il-Prova tal-Kunċett tal-KER

L-ewwel sejħa għal Prova tal-Kunċett ġiet ippubblikata f’Marzu 2011 b’baġit indikattiv ta’ EUR 10 miljun, li bejn wieħed u ieħor nofsu mar għal kull wieħed miż-żewġ rawnds ta' evalwazzjoni li jsegwu ż-żewġ skadenzi għas-sottomissjonijiet stabbiliti għal Ġunju u Novembru 2011 rispettivament. Ir-riċerkaturi biss li kellhom diġà Għotja tal-KER għad-Debuttanti jew Għotja tal-KER għal Riċerkaturi Avvanzati kienu eliġibbili li japplikaw għal fond Prova tal-Kunċett. Total ta’ 78 proposta waslu fl-ewwel skadenza u 73 minnhom kienu kkunsidrati eliġibbli għal valutazzjoni, bid-distribuzzjoni li ġejja għal kull dominju tal-għotja oriġinali tal-KER li għandu l-applikant. 58% fix-Xjenzi Fiżiċi u l-Inġinerija, 34% fix-Xjenzi tal-Ħajja u 8% fix-Xjenzi Soċjali u l-Istudji Umanistiċi. Il-valutazzjoni rriżultat fi 30 proposta aċċettati għall-finanzjament.

Sat-tieni skadenza waslu total ta’ 73 proposta li 67 minnhom kienu kkunsidrati eliġibbli għal evalwazzjoni, bid-distribuzzjoni li ġejja għal kull dominju tal-għotja oriġinali tal-KER li għandu l-applikant. 61% fix-Xjenzi Fiżiċi u l-Inġinerija, 34% fix-Xjenzi tal-Ħajja u 5% fix-Xjenzi Soċjali u l-Istudji Umanistiċi.

3.2.        Il-Kumitat tal-Programm

Minbarra d-doveri formali tiegħu, il-Kumitat tal-Programm tal-Programm Speċifiku "Ideas" iservi bħala netwerk ta' komunikazzjoni importanti bejn l-Istati Membri u l-Pajjiżi Assoċjati mal-FP7 (is-Seba' Programm Kwadru), il-Kunsill Xjentifiku, is-Segretarju Ġenerali tal-KER u l-Kummissjoni. Fl-2011, il-laqgħat ta' dan il-kumitat saru fit-5 ta' April u l-24 ta' Ottubru.

3.3.        Analiżi etika

Kumplessivament, fl-2011 ir-Reviżjoni etika involviet 55 espert estern u kopriet 100% tal-proposti, li minnhom 3 biss ġew indikati li jirrelataw maċ-Ċelloli Staminali dderivati mill-Embrijun Uman. Dawn il-proposti se jiġu trasferiti lill-Kummissjoni għall-finalizzazzjoni tal-proċess.

3.4.        Rimedju

Fl-2011, waslu 234 talba għal rimedju, li jirrappreżentaw 3.6% tal-proposti sottomessi, tnaqqis sinifikanti meta kkumparat mal-4.6% fl-2010. Iż-żewġ talbiet ta’ suċċess għal rimedju oriġinaw fi żbalji fuq stima individwali fl-ewwel pass tal-proċess ta' evalwazzjoni. Fiż-żewġ każijiet seħħet evalwazzjoni kompletament mill-ġdid, li kkonkludiet li ż-żewġ proposti kellhom jitqiegħdu fuq il-lista għall-finanzjament; konsegwenza ta’dan, iż-żewġ proposti intgħażlu għall-għotja.

3.5.        Komunikazzjoni

Matul l-2011 il-KER intensifika l-attivitajiet ta’ sensibilizzazzjoni tiegħu dwar l-opportunitajiet ta’ finanzjament, fl-Ewropa u lil hinn, filwaqt li jiżgura l-preżenza u l-involviment tiegħu f'konferenzi ta' riċerka u esebizzjonijiet internazzjonali, kif ukoll f'fieri tal-karrieri u f'sessjonijiet ta' ħidma, filwaqt li l-viżibbiltà tal-proġetti ffinanzjati tal-KER għoliet fost il-pubbliku ġenerali u l-midja.

Fl-Ewropa, il-KER ħa sehem fil-laqgħat annwali tal-Organizzazzjoni Ewropea tal-Bioloġija Molekulari fi Vjenna u tal-Assoċjazzjoni Ewropea tas-Soċjoloġija f'Ġinevra, il-Kungress tal-Federazzjoni tas-Soċjetajiet Ewropej tal-Bijokimika f’Turin, il-Fiera tal-Karrieri tal-Impjiegi Naturali f'Londra, il-laqgħa tal-Universitajiet Ewropej, ir-Relazzjonijiet Pubbliċi u l-Uffiċjali tal-Informazzjoni fi Praga, il-Konferenza Falling Walls f'Berlin, kif ukoll il-Konvenzjoni tal-Innovazzjoni tal-UE fi Brussell.

Saru sforzi speċjali f’pajjiżi b’parteċipazzjoni baxxa fl-iskemi tal-KER. F’Ġunju, fl-okkażjoni tal-Presidenza Ungeriża tal-Unjoni Ewropea, il-KER organizza konferenza ewlenija dwar "Il-Promozzjoni tal-Eċċellenza fir-Riċerka fl-Ewropa", f'Budapest, flimkien mal-Akkademja Ungeriża tax-Xjenzi. L-attenzjoni kienet fuq l-aħjar riċerkaturi li kellhom suċċess fil-kisba ta' għotjiet ferm kompetittivi tal-KER. Għażla ta’ detenturi tal-għotjiet tal-KER taw ir-rakkomandazzjonijiet tagħhom, inkluż ir-rebbieħ tal-Premju Nobel 2010 Konstantin Novoselov. F’Riga (il-Latvja) ġiet organizzata preżentazzjoni pubblika dwar il-KER b'kooperazzjoni mal-Akkademja nazzjonali tax-Xjenzi. Fil-Polonja, serje ta’ workshops ta’ sensibilizzazzjoni kienu organizzati mill-Punti ta’ Kuntatt Nazzjonali u Reġjonali tal-Polonja.

Fil-25 ta’ Mejju 2011, il-KER ġie invitat għal skambju ta’ fehmiet mal-Kumitat tal-Parlament Ewropew għall-Industrija, ir-Riċerka u l-Enerġija (ITRE). Seħħ skambju ta’ fehmiet ukoll fil-Kunsill tal-Kompetittività fit-30 ta’ Settembru 2011 mal-Kummissarju għar-riċerka, l-innovazzjoni u x-xjenza u l-President tal-KER.

Barra mill-Ewropa, il-KER reġa’ kien preżenti fi ftit pajjiżi ta’ prijorità, fosthom l-Istati Uniti tal-Amerika (Karrieri Ewropej MIT, l-Assoċjazzjoni Amerikana għall-Iżvilupp fix-Xjenza, il-Laqgħa Annwali tas-Soċjetà għan-Newroxjenza, l-Assoċjazzjoni Amerikana għar-Riċerka dwar il-Kanċer, il-Konferenza Internazzjonal Bio, il-Laqgħa tal-Unjoni Amerikana tal-Ġeofiżika), iċ-Ċina (żjarat f'organizzazzjonijiet tar-riċerka u universitajiet f'Beijing), l-Indja (il-Kungress Indjan tax-Xjenza f'Chennai u l-parteċipazzjoni f’kampanja tal-UE organizzata mid-Delegazzjoni tal-UE madwar il-pajjiż) u l-Brażil (Sao Paulo u Brasilia), fl-okkażżjoni tas-60 anniversarju tal-Aġenzija tal-Fondazzjoni tar-Riċerka tal-Brażil.

Il-membri tal-Kunsill Xjentifiku u l-persunal tal-Aġenzija Eżekuttiva ikkontribwixxew f’ħafna minn dawn l-attivitajiet ta’ għajnuna u attendew kungressi xjentifiċi oħra li saru fl-UE u f’partijiet oħra tad-dinja (bħal-Laqgħa Annwali tas-Soċjetà Amerikana għall-Bijoloġija taċ-Ċelloli f'Denver, l-Istati Uniti tal-Amerika, il-Konferenza Annwali Amerikana tal-Assoċjazzjoni Antropoloġika f'Montréal u l-laqgħa tal-Ħarifa tas-Soċjetà tar-Riċerka dwar il-Materjali f’Varsavja).

Il-KER ġibed l-attenzjoni tal-midja fl-Ewropa u madwar id-dinja kollha tul is-sena, kemm bħala organizzazzjoni u permezz tal-proġetti ffinanzjati u d-detenturi tal-għotjiet tiegħu. L-attivitajiet tal-istampa rriżultaw f’għadd tajjeb ta’ artikli kemm fl-istampa xjentifika kif ukollf'dik aktar ġenerali (aktar minn 1900 tismija) u f'ħafna stqarrijiet għall-istampa u aġġornamenti mqassma lill-midja. Intervisti numerużi mal-President, is-Segretarju Ġenerali jew il-Kunsill Xjentifiku tal-KER ġew ippubblikati, ukoll f'gazzetti ewlenin ta' kuljum. B’segwitu għall-aħbarijiet, ġew ippubblikati tliet “Features Speċjali” fl-okkażżjoni ta’ jum l-Alzheimer, ix-Xahar tas-Sensibilizzazzjoni dwar il-Kanċer tas-Sider u l-Konferenza dwar it-Tibdil fil-Klima tan-NU f'Durban.

Il-Punti ta' Kuntatt Nazzjonali (NCPs) ibbażati fl-Ewropa kollha u li jservu bħala multiplikaturi tal-informazzjoni għall-applikanti potenzjali, inżammu infurmati kontinwament dwar l-iżviluppi tal-KER u s-sejħiet tiegħu.

Finalment, f’Settembru ġiet imnedija websajt kompletament ġdida, b’dehra u sensazzjoni ġdida, lejawt ġdid, navigazzjoni aktar ċara u aktar sempliċi għall-utent, funzjonalitajiet addizzjonali u b’approċċ aktar dinamiku. Rivista li toħroġ kull tliet xhur l-isem ta’ “Ideas” ġiet ippubblikata l-ewwel darba f’Marzu, biex toffri aktar informazzjoni dettaljata u preżentazzjonijiet tal-kisbiet, il-proġetti, il-benefiċjarji tal-għotjiet u s-sħab tal-KER.

3.6.        Monitoraġġ, Valutazzjoni u Evalwazzjoni (MVE) tal-Programm Speċifiku "Ideas"

Evalwazzjoni tar-riżultati ewlenin tal-KER tħejjiet flimkien mal-valutazzjoni tal-impatt ex-ante tal-proposta tal-Kummissjoni dwar Horizon 2020, il-Programm ta’ Qafas li jmiss għar-Riċerka u l-Innovazzjoni[6]. Is-sejbiet minn din l-evalwazzjoni jinkludu dawn li ġejjin:

· Sa tmiem is-sena 2011 kienu għaddejin aktar minn 2000 proġett ta' riċerka transfruntiera f'madwar 470 istituzzjoni prestiġjuża ta' riċerka fl-Ewropa.

· Mill-2011, sitta u tletin benefiċjarju tal-KER irċivew premjijiet xjentifiċi internazzjonali prestiġjużi, fosthom 4 Premijiet Nobel u 3 Medalji fil-Qasam.

· L-għadd ta’ artikli li jirrikonoxxu finanzjament mill-KER, ippubblikati f'ġurnali riveduti bejn il-pari żdied minn 1200 fl-2010 għal iktar minn 1750 fl-2011, b’total ta’ iktar minn 3400 mill-2008. Din hija taħlita ta' għadd ta' proġetti li qed jiżdiedu u proġetti li qed jimmaturaw u li qed jagħtu aktar riżultati.

· L-impronta tal-KER qed tikber malajr kif jidher mill-attenzjoni fuq artikli fi tnejn mill-aktar ġurnali xjentifiċi ċċitati (Nature u Science). Fl-2011, kull gimgħa talanqas proġett wieħed iffinanzjat mill-KER ippubblika s-sejbiet tiegħu f’Nature jew f’Science. Dan jikkorrispondi ma' kull ħmistax u kull seba' ġimgħat fl-2010 u l-2009 rispettivament.

Fl-2010, il-Kummissjoni, l-ERCEA u l-Kunsill Xjentifiku ħadu azzjoni dwar ir-rakkomandazzjonijiet tal-Analiżi tal-KER ta' strutturi u mekkaniżmi[7]. F'Deċiżjoni li temenda d-Deċiżjoni li tistabbilixxi l-KER[8], il-Kummissjoni kkonfermat l-arranġamenti għall-appoġġ lokali lill-President u l-Viċi-Presidenti tal-Kunsill Xjentifiku fil-postijiet tax-xogħol tagħhom u introduċiet onorarju għall-attendenza fil-laqgħat plenarji tal-Kunsill Xjentifiku bħala rikonoxximent tal-impenji personali tal-membri tal-Kunsill Xjentifiku u tal-ħin li jużaw biex iwettqu l-kompiti tal-KER. L-istess deċiżjoni introduċiet il-kunċett tal-Kumitat Permanenti għall-Identifikazzjoni, sabiex jiġu identifikati membri futuri tal-Kunsill. Dawn il-miżuri saru operazzjonali u ġew ipprovduti b’baġit fir-reviżjoni tal-programm ta’ ħidma Ideas f’Marzu 2011[9].

Bit-tmexxija tal-KER u f'kuntatt mill-qrib mal-Kunsill Xjentifiku, il-Kummissjoni rriflettiet iktar dwar soluzzjoni sostenibbli u li tħares 'il quddiem, fid-dawl ta’ Horizon 2020. Din ir-riflessjoni ġiet fdata lil Task Force, imwaqqfa f'Diċembru 2010 u li kienet tinkludi rappreżentanti tal-Kunsill Xjentifiku tal-Bord ta' Reviżjoni tal-KER u tal-Kummissjoni[10]. Ir-rapport tat-Task Force tal-KER ġie ppubblikat fit-12 ta’ Lulju 2011[11] u ġie mgħoddi lill-Kunsill u lill-Parlament Ewropew. Il-konklużjoni ewlenija tiegħu hija li fil-perjodu taż-żmien ta' Horizon 2020, il-futur tal-KER huwa żgurat aħjar fl-istruttura ta' Aġenzija Eżekuttiva. Ir-rapport huwa konformi ferm mal-konklużjonijiet tar-Reviżjoni tal-KER tal-2009. Huwa jirrikonoxxi s-suċċess enormi li kellu sa issa l-KER u jipproponi miżuri għat-titjib tal-operazzjonijiet tiegħu. Waħda mill-innovazzjonijiet rakkomandati hija d-dispożizzjoni għal President kważi full-time ibbażat fi Brussell, dispożizzjoni li tneħħi l-ħtieġa ta’ Segretarju Ġenerali tal-KER. Ir-rakkomandazzjonijiet tat-Task Force ġew inkorporati fil-proposti tal-Kummissjoni għall-programm speċifiku li jimplimenta Horizon 2020[12].

4.           Struttura tal-Kunsill Ewropew tar-Riċerka

4.1.        Il-Kunsill Xjentifiku

It-tiġdid ta’ terz tal-membri tal-Kunsill Xjentifiku daħal fis-seħħ f’Jannar 2011 u kien ippreżentat fir-rapport annwali tas-sena l-oħra[13]. Il-Kumitat Permanenti ta’ Identifikazzjoni għadu għaddej bit-tfittxija għal membri futuri u f'Diċembru 2011 ħabbar il-konsultazzjoni tal-komunità xjentifika[14] għall-eżerċizzju ta' identifikazzjoni li jmiss, f’Ottubru 2012.

Wara t-tiġdid tal-Kunsill Xjentifiku, il-Professuri Pavel Exner u Carl-Henrik Heldin, it-tnejn membri fundaturi tal-Kunsill Xjentifiku, ġew eletti bħala Viċi-Presidenti[15].

Fl-2011 il-Kunsill Xjentifiku għażel lill-Prof. Donald Bruce Dingwel, Professur fil-Volkanoloġija Esperimentali fl-Università ta' Ludwig-Maximilian ta’ Munich, bħala t-tielet Segretarju Ġenerali wara Ernst-Ludwig Winnacker u Andreu Mas-Colell. Il-Prof. Dingwell ħa l-kariga fl-1 ta’ Settembru 2011[16].

Il-Kunsill Xjentifiku organizza 5 laqgħat plenarji fl-2011, li tnejn minnhom saru barra minn Brussell. f’Budapest (l-Ungerija) f’Ġunju u f’Riga (il-Latvja) f’Ottubru. Is-sommarju tal-laqgħat plenarji huwa ppubblikat fil-websajt tal-KER[17].

Barra mis-sessjonijiet plenarji, il-membri tal-Kunsill Xjentifiku jiltaqgħu fi Gruppi ta' Ħidma u jindirizzaw kwistjonijiet speċifiċi. Fl-2011, l-Aġenzija Eżekuttiva organizzat diversi laqgħat tal-Gruppi ta' Ħidma dwar "L-Innovazzjoni u r-Relazzjonijiet mal-Industrija", l-"Aċċess Miftuħ", l-“Internazzjonalizzazzjoni" u l-"Bilanċ bejn is-Sessi". Il-Gruppi ta' Ħidma jagħmlu analiżi u jikkontribwixxu għall-istrateġija xjentifika tal-KER permezz ta' proposti li għandhom jiġu adottati mill-Kunsill Xjentifiku b'mod plenarju f'oqsma koperti mill-mandati tagħhom: jeżaminaw ir-relazzjoni tal-KER mas-settur industrijali/tan-negozju u l-impatt tar-riċerka dwar l-innovazzjoni ffinanzjata mill-KER; jiżviluppaw pożizzjoni tal-KER dwar l-aċċess miftuħ; jesploraw mekkaniżmi adattati biex jagħtu spinta lill-parteċipazzjoni tar-riċerkaturi mhux Ewropej, partikolarment mill-Brażil, ir-Russja, l-Indja u ċ-Ċina (il-pajjiżi BRIC) fl-iskemi tal-KER; jiżguraw li l-KER ikun fuq ta' quddiem fl-aqwa prassi rigward il-bilanċ bejn is-sessi tal-benefiċjarji.

Il-Kunsill Xjentifiku għandu żewġ Kumitati Permanenti, wieħed dwar ir-reviżjoni bejn il-pari u ieħor dwar il-kunflitt ta' interess u l-imġiba xjentifika ħażina. Serje ta’ dokumenti ta’ ħidma li fihom analiżi u messaġġi importanti rigward il-kwistjonijiet speċifiċi trattati minn Gruppi oħra ta' Ħidma u mill-Kumitati Permanenti tħejjew mill-Aġenzija Eżekuttiva, b’ħidma mal-membri tal-gruppi.

Biex ikun żgurat iktar il-kuntatt mal-Kummissjoni Ewropea u l-Aġenzija Eżekuttiva, il-President u l-Viċi-Presendenti tal-Kunsill Xjentifiku, is-Segretarju Ġenerali tal-KER u d-Direttur tal-Aġenzija jiltaqgħu regolarment bħala l-Bord tal-KER. Għal dawn il-laqgħat jattendu l-ogħla livelli tal-korp ta’ ġestjoni tal-Aġenzija. Fl-2011, il-Bord iltaqa' fi Brussell għaxar (10) darbiet, partikolarment biex iħejji l-laqgħat tal-Kunsill Xjentifiku jew minħabba s-segwitu tagħhom.

Il-laqgħat plenarji tal-Kunsill Xjentifiku u l-laqgħat tal-membri tiegħu mal-partijiet interessati tal-KER jitħejjew bl-appoġġ organizzattiv u amministrattiv tal-Aġenzija Eżekuttiva. L-Aġenzija tipprovdi wkoll pariri u analiżi biex tgħin lill-Kunsill Xjentifiku jissodisfa l-kompiti tiegħu kif deskritt fl-Anness 1 għall-Programm Speċifiku Ideas, kif ukoll bħala appoġġ għall-attivitajiet operattivi tal-Gruppi ta' Ħidma u l-kumitati permanenti tiegħu.

4.2.        L-Aġenzija Eżekuttiva tal-KER

Minn Lulju 2009, l-Aġenzija kienet responsabbli għall-aspetti kollha tal-implimentazzjoni amministrattiva u t-twettiq tal-programm kif ipprovdut fil-Programm ta' Ħidma.

L-operazzjonijiet tal-Aġenzija huma ssorveljati minn Kumitat ta’ Tmexxija, maħtur mill-Kummissjoni. F’konformità mal-konklużjonijiet tat-Task Force tal-KER, is-sħubija tal-Kumitat ta’ Tmexxija ġiet immodifikata biex tinkludi, żewġ membri tal-Kunsill xjentifiku, il-Professuri Sierd Cloetingh u Tomasz Dietl, bħala membri esterni. Il-Kumitat huwa presedut mid-Direttur Ġenerali ta' DĠ għar-Riċerka u Innovazzjoni filwaqt li s-Segretarju Ġenerali tal-KER huwa osservatur. Fl-2011, il-Kumitat tat-Tmexxija organizza erba' laqgħat u adotta d-deċiżjonijiet relatati mal-Programm ta' Ħidma Annwali tal-Aġenzija, il-baġit u l-kontijiet. Waqt kull laqgħa tiegħu, il-Kumitat ta' Tmexxija rċieva rapport dettaljat dwar il-progress mid-Direttur tal-Aġenzija.

4.2.1.     Il-Persunal tal-Aġenzija

Il-baġit operattiv tal-2011 ipprovda pjan ta’ stabbiliment ta' 100 aġent temporanju u baġit għal 253 persunal kuntrattwali u 7 esperti nazzjonali ssekondati, li ammontaw għal total ta’ 360 aġent.

Fi tmiem Diċembru 2011, l-Aġenzija impjegat total ta' 350 aġent: 97 aġent temporanju, 245 aġent kuntrattwali u 8 esperti nazzjonali ssekondati.

L-istatistika ta' Diċembru 2011 turi li l-Aġenzija timpjega madwar 36 % rġiel u 64 % nisa. Fir-rigward tal-bilanċ bejn is-sessi tal-persunal speċjalizzat ħafna (l-Aġenti Temporanji u l-Grupp ta' Funzjoni IV tal-Aġenti Kuntrattwali), 54 % tal-karigi huma okkupati min-nisa. Fi tmiem l-2011, l-Aġenzija Eżekuttiva tal-KER impjegat ċittadini minn 24 Stat Membru. Pablo Amor segwa lil Jack Metthey bħala Direttur ad interim tal-Aġenżija Eżekuttiva tal-KER fl-1 ta’ Jannar 2011.

5.           Konklużjonijiet u Previżjoni għall-2012

L-għotjiet tal-KER intlaqgħu tajjeb ħafna mill-komunità tar-riċerka. Sa mill-bidu tal-2007 il-KER lestiet tmien sejħiet għall-proposti għall-iskemi għad-Debuttanti u għal Riċerkaturi Avvanzati. Il-kompetizzjonijet irrendew total ta’ iktar minn 26000 proposta li minnhom 2500 intgħażlu għall-finanzjament permezz ta’ reviżjoni rigoruża bejn il-pari.

Fl-2012, il-Kunsill Xjentifiku ser jintroduċi l-Għotjiet ta’ Sinerġija biex jippermetti gruppi żgħar ta’ riċerkaturi li jiġbru flimkien ħiliet kumplimentari, għarfien u riżorsi, sabiex jindirizzaw flimkien il-problemi ta' riċerka fil-fruntiera tal-għarfien, u jmorru lil hinn minn dak li jista' jikseb riċerkatur waħdu. L-għotjiet ta’ sinerġija qed jiġu introdotti fuq bażi pilota u b’baġit ta’ EUR 150 miljun[18].

Matul l-2012 se jkun hemm ukoll id-diskussjonijiet fil-Parlament Ewropew u l-Kunsill dwar il-proposti tal-Kummissjoni għal Horizon 2020. Ambizzjoni ewlenija waħda ta’ Horizon 2020 hija li tkun appoġġjata l-pożizzjoni tal-UE bħala mexxejja dinjija fix-xjenza b’baġit dedikat ta’ EUR 24.6 biljun, inkluża żieda ta’ 77% fil-fondi għall-KER. L-istimulazzjoni tal-baġit tal-KER se tippermetti aktar riċerkaturi ta' kalibru għoli u l-ideat pijunieri tagħhom biex ikunu appoġġjati, u speċjalment riċerkaturi iżgħar biex ikunu pprovduti b'perspettiva fit-tul.

Finalment, fl-2012, l-Aġenzija Eżekuttiva tal-KER se tkun temmet 3 snin ta' eżistenza awtonoma u se tgħaddi minn valutazzjoni esterna, li se tinkludi analiżi tal-benefiċċju mal-ispiża. Ir-rapport ta’ evalwazzjoni se jiġi mgħoddi lill-Parlament Ewropew, lill-Kunsill, lill-Kummissjoni u lill-Qorti tal-Awdituri.

[1]               ĠU L 57, 24.02.2007, p. 14.

[2]               2008/37/KE: Id-Deċiżjoni tal-Kummissjoni tal-14 ta’ Diċembru 2007 li tistabbilixxi l-Aġenzija Eżekuttiva tal-Kunsill Ewropew għar-Riċerka għall-ġestjoni tal-programm speċifiku Komunitarju Ideat fil-qasam tar-riċerka fil-fruntieri tal-għarfien b’applikazzjoni tar-Regolament tal-Kunsill (KE) Nru 58/2003 (ĠU L 9, 12.01.2008. p. 15).

[3]               http://erc.europa.eu/sites/default/files/document/file/erc_annual_report_2011.pdf

[4]               C(2010)4898 tad-19.07.10, mhux ippubblikat

[5]               C(2011)1848 tal-24.03.11, mhux ippubblikata

[6]               COM (2011) 809 finali, tat-30.11.2011

[7]               Rapport tar-Reviżjoni tal-Bord: Navvanzaw lejn Organizzazzjoni tar-Riċerka ta' livell dinji li tmur lil hinn mill-Fruntieri: Analiżi tal-Istrutturi u l-Mekkaniżmi tal-Kunsill Ewropew għar-Riċerka (23 ta' Lulju 2009). http://erc.europa.eu/index.cfm?fuseaction=page.display&topicID=158 Tweġiba tal-Kummissjoni: Komunikazzjoni lill-Kunsill u lill-Parlament C(2009) 552 finali tat-22.10.2009 http://ec.europa.eu/research/evaluations/pdf/archive/other_reports_studies_and_documents/commission_communication_on_the_erc_review_-_22_october_2009.pdf

[8]               Id-Deċiżjoni 2011/12/UE tat-12.1.2011, ĠU L 9, 13.1.2011, p. 5

[9]               C(2011) 1848 tal-24.03.11, mhux pubblikata.

[10]             Stqarrija għall-Istampa IP/10/1759 http://europa.eu/rapid/pressReleasesAction.do?reference=IP/10/1759&format=HTML&aged=0&language=EN&guiLanguage=fr

[11]             http://erc.europa.eu/about-erc/reviews-and-development-erc

[12]             COM (2011) 811 finali, tat-30.11.2011

[13]             COM(2011) 497, 17.8.2011.

[14]             http://ec.europa.eu/research/index.cfm?pg=newsalert&lg=en&year=2011&na=na-121211

[15]             http://erc.europa.eu/pdf/ERC_Press_release_Vice-Presidents.pdf

[16]             http://erc.europa.eu/pdf/ERC_Press_release_New_Secretary_General.pdf

[17]             http://erc.europa.eu/about-erc/organisation

[18]             http://ec.europa.eu/research/fp7/pdf/wp2012/wp2012_ideas_en.pdf