(1)

Fil-Kawża C-249/10 P (2), il-Qorti tal-Ġustizzja ddeċidiet li t-teknika tat-teħid tal-kampjuni prevista fl-Artikolu 17 tar-Regolament tal-Kunsill (KE) Nru 1225/2009 tat-30 ta’ Novembru 2009 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Komunità Ewropea (3) ma tistax tiġi applikata għall-finijiet tad-determinazzjoni tat-talbiet għal trattament ta’ ekonomija tas-suq li jsir taħt l-Artikolu 2(7)(c) ta' dak ir-Regolament.

(2)

Id-deċiżjoni tal-Qorti tal-Ġustizzja titlob li l-Kummissjoni teżamina l-applikazzjonijiet kollha għal trattament ta’ ekonomija tas-suq imressqa minn produtturi esportaturi li jkunu kkooperaw u li mhumiex parti mill-kampjun, irrispettivament minn jekk in-numru ta’ produtturi li kkooperaw huwiex kbir. Madankollu, din il-prattika timponi piż amministrattiv disproporzjonat fuq l-awtoritajiet investigattivi tal-Unjoni. Għaldaqstant hu f’loku li jiġi emendat ir-Regolament (KE) Nru 1225/2009.

(3)

Barra minn hekk, l-użu tat-teknika tat-teħid tal-kampjuni prevista fl-Artikolu 17 tar-Regolament (KE) Nru 1225/2009 għall-finijiet tad-determinazzjoni tat-talbiet għal trattament ta’ ekonomija tas-suq li ssir skont l-Artikolu 2(7)(c) ta' dak ir-Regolament hija permessa skont ir-regoli tal-Organizzazzjoni Dinjija tal-Kummerċ. Pereżempju, il-Bord tal-Korp għas-Soluzzjoni tat-Tilwim tal-Organizzazzjoni Dinjija tal-Kummerċ fit-tilwima DS405 (l-Unjoni Ewropea – Il-miżuri antidumping fuq ċerti żraben miċ-Ċina, rapport adottat fit-22 ta’ Frar 2012) sab li ċ-Ċina ma kinitx stabbiliet li l-Unjoni Ewropea aġixxiet b' mod inkonsistenti mal-Artikoli 2.4 u 6.10.2 tal-Ftehim tal-Antidumping, mal-paragrafu 15(a)(ii) tal-Protokoll tal-Adeżjoni taċ-Ċina, u mal-paragrafi 151(e) u (f) tar-Rapport tal-Grupp ta’ Ħidma dwar l-Adeżjoni taċ-Ċina, minħabba li naqset milli teżamina l-applikazzjonijiet għal trattament tal-ekonomija tas-suq tal-produtturi esportaturi Ċiniżi li kkooperaw li mhumiex parti mill-kampjun għall-investigazzjoni oriġinali.

(4)

Għalhekk, meta wieħed jikkunsidra dan l-isfond u għal raġunijiet marbuta maċ-ċertezza legali, huwa meqjus f'loku li tiġi introdotta dispożizzjoni li tiċċara li d-deċiżjoni li l-investigazzjoni tiġi limitata għal numru raġonevoli ta’ partijiet billi jintużaw kampjuni abbażi tal-Artikolu 17 tar-Regolament (KE) Nru 1225/2009 tapplika wkoll għall-partijiet suġġetti għall-eżaminazzjoni skont l-Artikolu 2(7)(b) u (c). B'riżultat ta' dan, huwa wkoll f'loku li jiġi ċċarat li ma għandhiex issir determinazzjoni skont l-Artikolu 2(7)(c) għal produtturi esportaturi li mhumiex parti mill-kampjun sakemm dawn il-produtturi ma jitolbux u ma jiksbux eżaminazzjoni individwali skont l-Artikolu 17(3).

(5)

Barra minn hekk, jitqies f'loku li jkun iċċarat li d-dazju anti-dumping li jrid jiġi applikat għall-importazzjonijiet mill-esportaturi jew mill-produtturi li jkunu ppreżentaw id-dettalji tagħhom skont l-Artikolu 17, imma li ma kinux ġew inklużi fl-eżaminazzjoni, ma għandux jaqbeż il-marġni medju differenzjat tad-dumping stabbilit għall-partijiet fil-kampjun, irrispettivament minn jekk il-valur normali stabbilit għal dawn il-partijiet kienx determinat abbażi tal-Artikolu 2(1) sa 2(6) jew tal-Artikolu 2(7)(a).

(6)

Fl-aħħar nett, il-perjodu ta’ żmien stipulat ta’ tliet xhur li fih trid tkun saret id-determinazzjoni skont l-Artikolu 2(7)(c), irriżulta wieħed mhux prattiku partikolarment fi proċedimenti fejn it-teħid tal-kampjuni jsir skont l-Artikolu 17. Għaldaqstant, huwa f’loku li dan il-perjodu stipulat jitneħħa.

(7)

Fl-interessi taċ-ċertezza legali u l-prinċipju ta’ amministrazzjoni soda, hu neċessarju li jkun stipulat li dawn l-emendi jibdew jgħoddu kemm jista' jkun malajr għall-investigazzjonijiet kollha ġodda u pendenti.

(8)

Ir-Regolament (KE) Nru 1225/2009 għandu għalhekk jiġi emendat f'dan is-sens,

(1)

L-Artikolu 2(7) huwa emendat kif ġej:

(2)

Fl-Artikolu 9(6), l-ewwel sentenza tiġi ssotitwita b'dan li ġej:

"Meta l-Kummissjoni tkun illimitat l-eżaminazzjoni tagħha skont l-Artikolu 17, id-dazju anti-dumping applikat għall-importazzjonijiet minn esportaturi jew produtturi li jkunu ressqu d-dettalji tagħhom skont l-Artikolu 17 imma li ma kinux ġew inklużi fl-eżaminazzjoni ma għandux jaqbeż il-marġni medju peżat ta’ dumping stabbilit fir-rigward tal-partijiet fil-kampjun, irrispettivament minn jekk il-valur normali għal dawn il-partijiet huwiex determinat abbażi tal-Artikolu 2(1) sa 2(6) jew l-Artikolu 2(7)(a).".