This document is an excerpt from the EUR-Lex website
Document 52012AE1279
Opinion of the European Economic and Social Committee on the ‘Communication from the Commission to the European Parliament, the Council, the European Economic and Social Committee and the Committee of the Regions: Towards a job-rich recovery’ COM(2012) 173 final
Opinjoni tal-Kumitat Ekonomiku u Soċjali Ewropew dwar il- “Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Lejn irkupru li jwassal għall-ħolqien abbundanti ta’ impjiegi” COM(2012) 173 final
Opinjoni tal-Kumitat Ekonomiku u Soċjali Ewropew dwar il- “Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Lejn irkupru li jwassal għall-ħolqien abbundanti ta’ impjiegi” COM(2012) 173 final
ĠU C 11, 15.1.2013, p. 65–70
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
15.1.2013 |
MT |
Il-Ġurnal Uffiċjali tal-Unjoni Ewropea |
C 11/65 |
Opinjoni tal-Kumitat Ekonomiku u Soċjali Ewropew dwar il-“Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Lejn irkupru li jwassal għall-ħolqien abbundanti ta’ impjiegi”
COM(2012) 173 final
2013/C 11/14
Relatur: is-Sinjura BISCHOFF
Nhar it-18 ta’ April 2012, il-Kummissjoni Ewropea ddeċidiet, b’konformità mal-Artikolu 304 tat-Trattat dwar il-Funzjonament tal-Unjoni Ewropea, li tikkonsulta lill-Kumitat Ekonomiku u Soċjali Ewropew dwar
il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni – Lejn irkupru li jwassal għall-ħolqien abbundanti ta’ impjiegi
COM(2012) 173 final.
Is-Sezzjoni Speċjalizzata għax-Xogħol, l-Affarijiet Soċjali u ċ-Ċittadinanza, inkarigata sabiex tipprepara l-ħidma tal-Kumitat dwar is-suġġett, adottat l-Opinjoni tagħha nhar it-23 ta’ Ottubru 2012.
Matul l-484 sessjoni plenarja tiegħu li saret fl-14 u l-15 ta’ Novembru 2012 (seduta tal-15 ta’ Novembru 2012), il-Kumitat Ekonomiku u Soċjali Ewropew adotta din l-Opinjoni b’204 voti favur, 2 voti kontra u 2 astensjonijiet.
1. Konklużjonijiet u rakkomandazzjonijiet
1.1 |
S’issa l-Ewropa għadu ma rnexxilhiex tegħleb il-kriżi, u għalhekk il-qasma fl-Ewropa qed tikber. Ħafna pajjiżi milqutin mill-kriżi qed jesperjenzaw żieda qawwija fil-qgħad, b’mod partikolari fost iż-żgħażagħ. Il-politika Ewropea dwar l-impjiegi għandha tagħti konkribut akbar biex tappoġġja lill-Istati Membri fil-problemi tagħhom. Issa aktar minn qatt qabel, hi għandha titqies bħala parti mis-soluzzjoni sabiex negħlbu l-kriżi flimkien b’mod solidali u l-Ewropa ssir stabbli. |
1.2 |
Għalhekk, il-KESE jemmen li huwa kruċjali li l-politika dwar l-impjiegi tiġi akkumpanjata mill-iżvilupp tal-infrastruttura Ewropea u t-tkabbir kwalitattiv. Jinħtieġ investiment enormi sabiex jinħolqu l-impjiegi. F’dan ir-rigward għandhom jiġu mobilizzati minnufih sew l-investimenti privati u sew dawk pubbliċi u għandhom isiru wkoll xi riformi. |
1.3 |
Bis-saħħa ta’ politika dwar l-impjiegi solidali u effettiva jista’ jifforma suq tax-xogħol Ewropew u tintrebaħ lura l-kredibbiltà. Element ċentrali għal dan il-għan hu, fost affarijiet oħra, l-implimentazzjoni mingħajr dewmien u l-iżvilupp obbligatorju tal-garanzija għaż-żgħażagħ. Barra minn hekk, f’xi pajjiżi milqutin mill-kriżi qed jinbet l-interess fl-introduzzjoni ta’ sistema edukattiva fuq żewġ binarji. Il-Kummissjoni għandha tappoġġja dan l-interess, u għandha tippermetti l-finanzjamenti inizjali u tibda l-iskambji tal-prattiki tajbin. Jekk ma jirnexxilniex nagħtu prospetti liż-żgħażagħ, speċjalment fil-pajjiżi milqutin mill-kriżi, hemm ir-riskju li tiżviluppa “ġenerazzjoni mitlufa” u b’hekk tinħoloq splużjoni soċjali u politika enormi. Il-KESE jappella għal soluzzjonijiet solidali, bħall-Fond għall-Globalizzazzjoni. |
1.4 |
L-ewwel pass importanti huwa l-iżvilupp adegwat tal-garanzija għaż-żgħażagħ, però l-problemi strutturali eżistenti jridu jiġu indirizzati b’mod urġenti. L-għan li jinħoloq numru kbir ta’ impjiegi jiddependi mir-restrizzjonijiet marbutin:
|
1.5 |
Il-politika dwar l-impjiegi ma tistax tikkumpensa għall-governanza politika ħażina fil-qasam makroekonomiku, iżda tista’ tikkontribwixxi bil-kbir biex fis-soċjetajiet ibbażati fuq l-għarfien tiżdied il-kompetittività permezz tat-tisħiħ tal-kapaċità għall-innovazzjoni u permezz ta’ bilanċ aħjar bejn il-provvista u d-domanda tal-kwalifiki. Barra minn hekk, jeħtieġ li l-aċċess tal-intrapriżi Ewropej, speċjalment tal-SMEs, għall-kapital ta’ riskju jittejjeb minnufih u li titneħħa l-burokrazija żejda. |
1.6 |
Huwa importanti li r-rwol partikolari tal-imsieħba soċjali jiġi kkunsidrat fit-tfassil u l-implimentazzjoni tal-politika dwar l-impjiegi u għandu jissaħħaħ fil-qafas tal-governanza ġdida. |
2. Il-politika Ewropea dwar l-impjiegi fi żminijiet ta’ kriżi
2.1 |
Nhar it-18 ta’ April 2012, il-Kummissjoni Ewropea ppubblikat Komunikazzjoni bit-titolu “Lejn irkupru li jwassal għall-ħolqien abbundanti ta’ impjiegi” flimkien ma’ disa’ dokumenti ta’ akkumpanjament. Il-Komunikazzjoni tipproponi miżuri ta’ appoġġ għall-ħolqien tal-impjiegi, għar-riforma tas-swieq tax-xogħol u għat-tisħiħ tal-governanza tal-UE. |
2.2 |
Il-Kummissjoni tappella għal “irkupru li jwassal għall-ħolqien abbundanti ta’ impjiegi” fi żmien meta minħabba d-diversi kriżijiet (kriżi finanzjarja, kriżi ekonomika, kriżi soċjali, kriżi tal-euro, kriżi tad-dejn, kriżi tal-fiduċja) intilfu ħafna u ħafna impjiegi f’bosta pajjiżi, u dan jikkomprometti l-ħajja ta’ kuljum tan-nies għaliex ikunu tilfu xogħolhom, ma jkunux jistgħu jsibu xogħol ieħor jew għax ikollhom joqogħdu għat-tnaqqis fil-pagi u/jew għax is-servizzi soċjali qed jitnaqqsu jew jitneħħew. |
2.3 |
Għalhekk, il-Kumitat jilqa’ l-fatt li l-Kummissjoni tittratta l-konsegwenzi tal-kriżi fuq il-politika dwar l-impjiegi u tappella għal irkupru li jwassal għall-ħolqien abbundanti ta’ impjiegi. Dan però qed isir tard wisq għaliex il-konsegwenzi tal-kriżi qed jiggravaw, l-aktar minħabba li fil-kuntest tal-implimentazzjoni tar-regoli l-ġodda dwar il-governanza ekonomika fiż-żona tal-euro l-gvernijiet ta’ kważi l-Istati Membri kollha tal-UE qed jippruvaw inaqqsu d-defiċit baġitarju permezz ta’ tnaqqis kultant delikat fin-nefqa pubblika, b’mod partikolari fin-nefqa soċjali u fin-nefqa għas-servizzi pubbliċi. Madankollu, din il-politika tillimita l-opportunitajiet offruti fis-suq tax-xogħol, l-aktar għal dawk li diġà kienu jagħmlu parti minn xi grupp ta’ persuni żvantaġġati (1). Il-miżuri ta’ awsterità jolqtu l-aktar lil dawk li jiddependu mit-trasferimenti soċjali tal-Istat, fosthom dawk li għandhom impjieg prekarju u gruppi żvantaġġati oħrajn fis-suq tax-xogħol. Għaldaqstant, għandu jinżamm u jissaħħaħ ir-rwol li jaqdu s-sistemi tas-sigurtà soċjali bbażati fuq is-solidarjetà bħala stabbilizzaturi, sabiex dawn jibqgħu effettivi u sostenibbli b’mod partikolari fir-rigward tal-aktar gruppi milquta u żvantaġġati fis-suq tax-xogħol. |
2.4 |
Il-KESE talab minn kmieni li jsiru sforzi speċjali sabiex jiġi indirizzat il-qgħad li qed jiżdied b’rata inkwetanti; ma jistax ikun inkomplu sejrin qisu xejn mhu xejn. Il-politika dwar is-suq tax-xogħol tista’ u għandha tappoġġja l-proċess tal-ħolqien tal-impjiegi. Però dan jirrikjedi ekonomija stabbli. Huwa laqa’ l-pjan ta’ rkupru ekonomiku adottat fl-2008, iżda kkritika li l-kamp ta’ applikazzjoni tiegħu kien limitat wisq (2). |
2.5 |
Iċ-ċifri attwali tas-suq tax-xogħol huma allarmanti, u fil-pajjiżi milqutin mill-kriżi t-tendenza negattiva fis-suq tax-xogħol qed tissokta mingħajr waqfien. F’Awwissu r-rata tal-qgħad fl-Ewropa kienet ta’ 10,5 % (11,4 % fiż-żona tal-euro), l-ogħla li qatt kienet. Il-qgħad qed jiżdied f’żewġ terzi tal-Istati Membri, b’żieda partikolarment qawwija fi Spanja (25,1 %), il-Portugall (15,9 %) u l-Greċja (24,2 %) (3). 25,46 miljun persuna jinsabu mingħajr impjieg. Aspett partikolarment negattiv hu li l-qgħad fit-tul żdied ukoll, u jidher ċar li dan il-fenomenu qed ikompli jiggrava. Aktar minn 40 % tal-persuni qiegħda kollha diġà ilhom ’il fuq minn sena jfittxu xogħol (4). Huwa partikolarment preokkupanti l-fatt li r-rata tal-qgħad fost iż-żgħażagħ għadha għolja ħafna fl-UE. Din ir-rata hi ta’ aktar minn 22 %, però jeżistu differenzi kbar bejn l-Istati Membri. Fi Spanja u l-Greċja din ir-rata hi ta’ aktar minn 50 %, u f’xi Stati Membri (il-Portugall, is-Slovakkja, il-Bulgarija, l-Italja, l-Irlanda) hi ta’ madwar 30 %. Ir-rata tal-qgħad fost iż-żgħażagħ hija ta’ inqas minn 10 % fi tliet Stat Membri biss (il-Ġermanja, l-Awstrija u l-Pajjiżi l-Baxxi) (5). |
2.6 |
Il-politika dwar it-tkabbir u l-politika dwar l-impjiegi ma jistgħux jiġu kkunsidrati b’mod iżolat minn xulxin. Għaldaqstant, il-Kumitat kemm-il darba talab li jkun hemm pjan Ewropew ta’ rkupru ekonomiku b’impatt konsiderevoli fuq il-politika dwar is-suq tax-xogħol li jilħaq it-2 % tal-Prodott Domestiku Gross (PDG). Il-ħolqien tal-intrapriżi u l-ispirtu intraprenditorjali għandhom jiġu promossi wkoll fis-soċjetà kollha, b’mod partikolari fis-sistemi edukattivi u fl-iskemi ta’ taħriġ. Flimkien mal-investimenti nazzjonali addizzjonali implimentati b’mod ikkoordinat sabiex iżidu l-impatt fuq l-impjieg, jeħtieġ li jiġu identifikati wkoll proġetti Ewropej ta’ investiment. Fil-“Patt għat-Tkabbir u l-Impjieg” adottat fis-summit tat-28 u d-29 ta’ Ġunju 2012 saru l-ewwel passi li issa jridu jitlaħħmu bil-kontenut sabiex fl-Ewropa jinħoloq il-marġni ta’ manuvrar tant meħtieġ għat-tkabbir sostenibbli u l-impjieg. Għandha titpoġġa enfasi partikolari fuq l-assikurazzjoni tat-tranżizzjonijiet fis-suq tax-xogħol, b’mod partikolari fil-proċessi ta’ ristrutturar. |
3. Kundizzjonijiet qafas għall-politika Ewropea dwar l-impjiegi
3.1 |
Għalhekk, il-Kumitat jaqbel mal-Kummissjoni li l-prospetti li jiżdiedu l-impjiegi jiddependu bil-kbir mill-kapaċità tal-UE li tiġġenera tkabbir ekonomiku permezz ta’ politiki fil-qasam makroekonomiku, industrijali u tal-innovazzjoni, u li tikkompleta dan it-tkabbir permezz ta’ politika dwar l-impjiegi li tiffoka fuq irkupru li jwassal għall-ħolqien abbundanti ta’ impjiegi. Il-KESE huwa mħasseb li ħafna mill-proposti pożittivi tal-Pakkett dwar l-Impjiegi ma jistgħux jiġu implimentati jekk l-UE tissokta mingħajr waqfien bil-politika ta’ awsterità tagħha. Barra minn hekk, il-KESE jibża’ li bil-miżuri proposti biss mhux ser ikunu jistgħu jintlaħqu l-għanijiet stabbiliti fl-istrateġija tal-UE dwar l-impjiegi. Fi Frar 2012 hu kien diġà fakkar li jinħtieġ patt ta’ investiment soċjali sabiex tingħeleb il-kriżi b’mod permanenti u jsiru investimenti fil-futur (6). B’rabta ma’ dan, il-Kumitat jilqa’ l-fatt li l-Kummissjoni, bil-Pakkett dwar l-Impjiegi, tfakkar li skont l-Artikolu 3 tat-Trattat l-UE għandha l-obbligu li timmira għal livell massimu ta’ impjiegi u għall-koeżjoni soċjali. |
4. Proposti għat-tisħiħ tal-istrateġija Ewropea dwar l-impjiegi
4.1 Noħolqu l-prospetti għaż-żgħażagħ
4.1.1 |
Fir-rapport tagħha dwar it-tendenzi dinjija tal-impjieg fost iż-żgħażagħ fl-2012 (“Global Employment Trends for Youth 2012”), f’Mejju tal-2012 l-ILO wissiet kontra r-riskju li tiżviluppa “ġenerazzjoni mitlufa”. Għalhekk, il-gvernijiet għandhom jagħtu l-ogħla prijorità lil politika attiva dwar is-suq tax-xogħol u dwar l-impjiegi għaż-żgħażagħ. F’dan il-kuntest, il-Kumitat jilqa’ l-pjan li titwettaq b’mod konkret il-garanzija għaż-żgħażagħ. Madankollu, dan ma jistax jinkiseb permezz tar-riżorsi li għandhom ma ntużawx mill-Fond Soċjali Ewropew (FSE) biss. Għaldaqstant, il-KESE jirrakkomanda li l-pajjiżi b’diffikultajiet partikolari jiġu appoġġjati għal xi żmien, għaliex sikwit huma ma jkollhomx ir-riżorsi finanzjarji għall-politika attiva meħtieġa dwar l-impjiegi, speċjalment għall-implimentazzjoni vinkolanti tal-garanzija għaż-żgħażagħ. Jekk dan ma jistax isir permezz tar-riżorsi tal-FSE biss, il-finanzjament għandu jsir permezz ta’ riżorsi Ewropej oħra (Fond ta’ Solidarjetà taż-Żgħażagħ). Għall-banek setgħu jintużaw biljuni ta’ flus, għalhekk għandu jkun possibbli li dawn ir-riżorsi jiġu mobilizzati wkoll, pereżempju permezz tal-introduzzjoni ta’ taxxa fuq it-transazzjonijiet finanzjarji, li l-Kumitat ilu żmien twil jaħdem favuriha. |
4.1.2 |
Il-Fondazzjoni Ewropea għat-Titjib tal-Kondizzjonijiet tal-Ħajja u tax-Xogħol (Eurofound) analizzat il-punti pożittivi u d-dgħufijiet tal-garanziji għaż-żgħażagħ (7). Dawn huma miżura importanti li tista’ tiġi applikata malajr sabiex tiġi evitata l-esklużjoni taż-żgħażagħ. Madankollu, l-effett tagħhom huwa iżgħar fil-każ ta’ ċerti gruppi mmirati, bħal dawk li huma diffiċli biex wieħed jgħinhom (jiġifieri l-“hard to help”). Barra minn hekk, huma ma jsolvux il-problemi strutturali (bħan-nuqqas ta’ sistemi tal-edukazzjoni jew tat-taħriġ vokazzjonali). |
4.1.3 |
Iż-żmien meta jsir l-intervent huwa kruċjali wkoll. Il-KESE jemmen li intervent wara tliet xhur huwa tard wisq; l-aħjar hu li l-garanzija għaż-żgħażagħ tibda tapplika malajr kemm jista’ jkun, jiġifieri hekk kif iż-żgħażagħ jirreġistraw mal-aġenziji tal-impjieg, għaliex jekk it-tranżizzjoni ma tirnexxix, dan ikun ta’ ħsara għall-ekonomija u jħalli marki ta’ ħsara għall-ħajja kollha. Il-Kumitat jirrakkomanda li l-garanziji għaż-żgħażagħ jinkludu wkoll lill-adulti żgħażagħ ta’ bejn 25 u 29 sena. Fil-qafas tal-Pjani Nazzjonali ta’ Riforma għandhom jitfasslu miżuri konkreti f’dan ir-rigward. Għal dan il-għan, ħafna Stati Membri ser ikollhom iżidu l-appoġġ speċifiku mogħti mill-korpi pubbliċi tal-impjieg, fejn għandha tingħata aktar attenzjoni lill-gruppi żvantaġġati. |
4.1.4 |
Huwa importanti li jingħalaq id-distakk bejn il-bżonnijiet tas-suq tax-xogħol, l-edukazzjoni u dak li jkunu qed jistennew iż-żgħażagħ. Mod wieħed kif jinkiseb dan hu billi jingħataw inċentivi u appoġġ għall-iżvilupp ta’ skemi ta’ apprentistati ta’ kwalità għolja. Il-Kumitat jemmen li hu importanti li l-imsieħba soċjali fl-Istati Membri jiġu involuti mill-qrib fl-iżvilupp ta’ dawn l-iskemi. Il-KESE jappella biex jittejjeb l-iskambju tal-esperjenzi u biex l-FSE jappoġġja l-iskemi ta’ apprentistati. Jeħtieġ li jiġu promossi l-iskambju tal-prattiki tajba, il-finanzjamenti inizjali u l-iżvilupp ta’ qafas ta’ kwalità għat-taħriġ fuq żewġ binarji. L-applikazzjoni tal-proposta għal Qafas ta’ Kwalità għall-Iskemi ta’ Taħriġ għandha tinkludi xi inċentivi. |
4.2 Il-kwalifiki jtejbu l-kompetittività u joħolqu prospetti ġodda
4.2.1 |
Hemm bżonn ta’ bilanċ bejn il-kwalifiki sempliċi, vokazzjonali u akkademiċi. Dan għaliex l-iżvilupp fit-tul u pożittiv tal-impjiegi ma jistax ikun ibbażat biss fuq il-kwalifiki akkademiċi tal-edukazzjoni terzjarja. Minbarra l-kwalifiki formali għoljin, huwa kruċjali wkoll li jinkisbu ħiliet konoxxittivi u universali. Fil-futur ser ikun hemm bżonn aktar ħiliet trasversali u komunikattivi. Il-KESE jappoġġja l-isforzi maħsuba biex jiżguraw ir-rikonoxximent aħjar tal-kwalifiki bis-saħħa tal-validazzjoni tal-ħiliet miksubin lil hinn mis-sistemi tal-edukazzjoni formali, speċjalment fid-dawl tal-proposta reċenti għal Rakkomandazzjoni tal-Kunsill dwar il-validazzjoni tat-tagħlim mhux formali u informali (8). Jeħtieġ li tissaħħaħ l-implimentazzjoni tal-Qafas Ewropew tal-Kwalifiki fil-livell nazzjonali. |
4.3 Il-kwalità tal-provvista u d-domanda fis-suq tax-xogħol
4.3.1 |
Il-Kumitat jilqa’ l-fatt li l-Kummissjoni ma tindirizzax biss in-naħa tal-provvista iżda tiffoka aktar mill-qrib ukoll fuq id-domanda fis-suq tax-xogħol. L-intrapriżi tal-Ewropa huma atturi ċentrali sabiex tingħeleb il-kriżi fis-suq tax-xogħol. Fil-passat, ir-rata ta’ reklutaġġ tal-intrapriżi ż-żgħar u ta’ daqs medju b’mod partikolari kienet waħda pożittiva. Għaldaqstant, huwa essenzjali li jittejjeb l-aċċess tal-SMEs għall-kapital u li l-ispejjeż biex jinbeda negozju jitnaqqsu b’25 %. Qed isiru sforzi kontinwi biex jonqos il-piż amministrattiv li jridu jerfgħu l-kumpaniji. Skont il-Kummissjoni Ewropea, dan ser ikollu impatt ekonomiku sinifikattiv fuq l-ekonomija tal-UE: il-PDG jiżdied b’mal-1,5 % jew madwar EUR 150 biljun, mingħajr ma tonqos il-protezzjoni tal-impjegati fl-istess ħin. Anke l-intrapriżi soċjali u l-organizzazzjonijiet tas-soċjetà ċivili jistgħu jikkontribwixxu biex jiżdiedu l-impjiegi, kif enfasizza kemm-il darba l-KESE fl-opinjonijiet tiegħu (9). Barra minn hekk, dan l-aħħar f’opinjoni fuq inizjattiva proprja tas-CCMI (10) ntqal li l-kooperattivi, speċjalment il-kooperattivi tal-ħaddiema, jiggarantixxu aktar impjiegi anke fi żminijiet ta’ kriżi, għaliex huma jnaqqsu l-profitti tagħhom biex jipproteġu l-impjiegi. |
4.3.2 |
Il-kompetittività għat-tul f’ekonomija bbażata fuq l-għarfien teħtieġ investimenti adegwati fil-kwalifiki tal-ħaddiema. Sabiex tiġi stimolata d-domanda, is-sussidji tal-pagi u l-“in-work benefits” jistgħu jkunu wkoll miżuri utli għal ċerti gruppi mmirati (bħall-persuni li ilhom qiegħda għal żmien twil). |
4.3.3 |
Il-KESE jilqa’ l-proposta dwar l-“aġenziji tal-ġestjoni tat-tranżizzjoni”. Però, proprju għaliex in-numru ta’ persuni qiegħda fit-tul qed jiżdied, dawn m’għandhomx ikunu limitati għas-servizzi ta’ tiftix ta’ impjieg. Hemm bżonn li joffru firxa wiesgħa ta’ servizzi sabiex jitneħħew l-ostakli għall-impjieg u sabiex in-nies (jerġgħu) jidħlu malajr fis-suq tax-xogħol, b’mod partikolari fil-livell lokali, pereżempju permezz ta’ taħriġ kontinwu u avvanzat. L-għan tal-istrateġija tal-“inklużjoni attiva” li stabbiliet il-Kummissjoni f’Ottubru 2008 (11) mhux biss li tiggarantixxi d-dħul u tippromovi s-swieq tax-xogħol inklużivi, iżda wkoll li tagħti aċċess għas-servizzi li jipprovdu għajnuna kwalitattiva speċifika sabiex l-individwu jsib impjieg skont ix-xewqat u l-ħiliet tiegħu. Għaldaqstant, fil-kuntest ta’ strateġija tas-suq tax-xogħol iffokata fuq l-individwu, jeħtieġ li s-servizzi msemmijin jingħaqdu f’netwerk u li jibdew jingħataw servizzi integrati. Dan għandu jiġi appoġġjat permezz tat-tisħiħ tal-prinċipju tas-sħubija fil-qafas tal-FSE, fost affarijiet oħrajn. |
4.3.4 |
L-istaġnar tad-domanda għax-xogħol minħabba l-kriżi kontinwa qed iwassal għal żieda fil-qgħad fit-tul u dan qed iġib miegħu diffikultajiet serji fl-integrazzjoni fis-suq tax-xogħol, u b’hekk anke żieda fil-faqar minħabba li jintilef il-kuntatt mas-suq tax-xogħol. Il-KESE jirrakkomanda lill-Istati Membri sabiex joqogħdu partikolarment attenti li joħolqu suq tax-xogħol intermedju inklużiv fejn ir-riżorsi pubbliċi jintużaw għall-ħolqien ta’ numru adatt ta’ impjiegi adegwati, u b’hekk il-qiegħda fit-tul ikunu jistgħu jżommu l-kuntatt tagħhom mad-dinja tax-xogħol u jtejbu l-għarfien tagħhom. B’dan il-mod jiġi evitat li jiżdied il-faqar minħabba li jintilef il-kuntatt mas-suq tax-xogħol, u dawn il-ħaddiema jkollhom tranżizzjoni mingħajr diffikultà fis-suq tax-xogħol miftuħ wara li tgħaddi l-kriżi. |
4.3.5 |
Fit-tul, l-għan hu li jiġi żviluppat suq tax-xogħol Ewropew. Il-KESE jilqa’ l-proposti biex jitneħħew l-ostakli għall-moviment ħieles tal-ħaddiema. B’mod ġenerali, il-kundizzjonijiet qafas għall-mobilità ġusta jridu jittejbu (12). Però l-mobilità m’għandhiex twassal għad-depopolazzjoni ta’ xi reġjuni. Minflok dan, ir-reġjuni aktar foqra għandhom jiġu megħjuna jirkupraw permezz tal-qsim solidali tar-riskji. |
4.4 Flessibbiltà u sigurtà
4.4.1 |
Il-Kumitat diġà esprima l-fehma tiegħu kemm-il darba dwar il-flessigurtà. Huwa jilqa’ l-fatt li l-esperjenzi fl-indirizzar tal-kriżi wasslu għall-estensjoni tal-approċċ tal-flessigurtà. It-titjib tal-flessibbiltà interna s’issa ma ngħatax l-attenzjoni meħtieġa fil-qafas tad-dibattiti dwar il-flessigurtà. L-impjiegi għal żmien fiss u l-impjiegi temporanji jistgħu joffru tranżizzjonijiet f’qasir żmien u kultant jistgħu jkunu meħtieġa sabiex jiffaċilitaw it-tranżizzjoni ta’ gruppi partikolarment żvantaġġati fis-suq tax-xogħol għall-ewwel darba. L-inċertezza tal-impjiegi marbuta ma’ dan għandha tkun tranżitorja u trid tiġi koperta mis-sigurtà soċjali. Il-KESE jopponi l-proposti msemmijin b’mod indirett fil-Komunikazzjoni għal “kuntratt tax-xogħol uniformi”. Minflok dan, huwa jirrakkomanda li jiġi miġġieled b’aktar saħħa l-impjieg prekarju u li jitressqu proposti dwar kif il-kundizzjonijiet tax-xogħol jistgħu jerġgħu lura għan-normal. |
4.5 Il-promozzjoni tad-domanda u d-distribuzzjoni ġusta
4.5.1 |
Mil-lat makroekonomiku għandu jiġi żgurat li jkun hemm bilanċ bejn it-tkabbir suffiċjenti fid-domanda u l-kompetittività tal-prezzijiet (13). Dawn il-kwistjonijiet diġà qed jiġu diskussi fid-djalogu makroekonomiku, kemm f’livell tekniku kif ukoll f’livell politiku. F’dan il-kuntest, kif tirrimarka l-Kummissjoni f’paġna 24, għandha tinżamm u tiġi rispettata l-awtonomija tal-imsieħba soċjali b’konformità stretta mal-Artikolu 153(5) tat-TFUE. Il-Kumitat huwa kontra l-proposta li jitwaqqaf kumitat tripartitiku ġdid dwar il-pagi fil-livell Ewropew. Minflok dan, huwa jirrakkomanda li, fejn ikun hemm bżonn, jiġu riformati u msaħħa l-istrutturi eżistenti – is-summit soċjali tripartitiku u l-kumitat għad-djalogu makroekonomiku u d-djalogu soċjali – biex jiġi żgurat l-involviment effettiv u bbilanċjat tal-imsieħba soċjali, il-ministri tax-xogħol u tal-affarijiet soċjali u tal-ministri tal-finanzi u tal-ekonomija. |
4.5.2 |
Il-Kumitat jilqa’ li l-Kummissjoni tittratta l-kwistjoni tal-pagi minimi u l-kwalità deċenti tal-impjiegi. Il-pagi minimi għandhom rwol importanti biex jevitaw id-dumping tal-pagi, b’mod partikolari meta l-ftehimiet kollettivi ma jipprevedu l-ebda limitu minimu għall-pagi. Madankollu, il-Kumitat huwa kontra li l-pagi minimi jitqiesu daqslikieku huma remunerazzjoni deċenti. Mhux kull paga minima tirrappreżenta fiha nnifisha remunerazzjoni deċenti; huma biss il-pagi minimi adegwati li jiżguraw ukoll pensjonijiet adegwati. Fil-prinċipju, jeħtieġ li tiġi kkunsidrata l-kumplessità tas-sistemi nazzjonali differenti għall-kalkolu tal-pagi. |
4.5.3 |
Il-KESE ilu li stqarr li hu favur l-estensjoni tal-bażi tat-taxxa għall-finanzjament tas-sistema tas-sigurtà soċjali. Punt pożittiv f’dan ir-rigward hu li fil-Pakkett dwar l-Impjiegi l-Kummissjoni titkellem dwar l-aġġustament tat-tassazzjoni fuq l-ambjent, il-konsum jew l-assi, bil-għan li l-piż tat-taxxa fuq ix-xogħol jonqos mingħajr l-ebda konsegwenza fuq il-baġit. Sabiex jiġu kkonsolidati l-baġits u tissaħħaħ il-vijabbiltà tas-soċjetà u tal-ekonomija permezz ta’ politika adegwata dwar l-impjiegi u l-kwalifiki, m’għandhiex titqies biss in-nefqa iżda jeħtieġ ukoll li d-dħul jittejjeb u jintuża b’mod aktar effiċjenti. |
4.6 Proposti dwar il-governanza ġdida
4.6.1 |
Il-proposti dwar il-governanza l-ġdida jsawru l-qalba tal-Komunikazzjoni. Hawnhekk il-Kummissjoni tressaq punti essenzjali ġodda u tippreżenta proposti fuq kif il-politika dwar l-impjiegi tista’ ssir aktar importanti u dinamika fil-kuntest tas-Semestru Ewropew. Dan jintlaqa’ tajjeb ħafna mill-Kumitat, billi l-politika dwar l-impjiegi diġà tilfet mill-importanza tagħha fl-evalwazzjoni ta’ nofs it-term tal-Istrateġija ta’ Lisbona, fl-għanijiet għall-2020 u fil-governanza l-ġdida fil-kuntest tas-Semestru Ewropew. Għalhekk, il-KESE jitlob li ssir evalwazzjoni mingħajr dewmien tas-Semestru Ewropew u li l-imsieħba soċjali u s-soċjetà ċivili jiġu involuti aktar u minn qabel. |
4.6.2 |
Filwaqt li s-Semestru Ewropew ikopri perjodu qasir, l-għanijiet tal-politika dwar l-impjiegi huma stabbiliti f’perspettiva medja ta’ żmien. Fil-21 ta’ Ottubru 2010, il-Kunsill iddeċieda li l-linji gwida dwar l-impjiegi ma jinbidlux sal-2014. Fl-2011, il-KESE kkritika li l-linji gwida tal-2010:
|
4.6.3 |
Il-Kumitat jilqa’ l-proposti li jkun hemm sistema ta’ valutazzjoni komparattiva u tabella ta’ valutazzjoni tal-progress fir-rigward tal-implimentazzjoni tal-pjani nazzjonali dwar l-impjiegi. L-imsieħba soċjali Ewropej għandhom jiġu involuti fit-tfassil tas-sistema ta’ valutazzjoni komparattiva u tal-kriterji għat-tabella ta’ valutazzjoni tal-progress. Barra minn hekk, huma għandhom jiġu kkonsultati wkoll fi stadju bikri tat-tħejjija tar-Rapport Annwali dwar it-Tkabbir b’rabta mad-definizzjoni tal-prijoritajiet strateġiċi ewlenin tal-politika dwar l-impjiegi kif ukoll b’rabta mat-tfassil, l-implimentazzjoni u l-evalwazzjoni tal-linji gwida dwar l-impjiegi. Fid-dawl tal-ħtieġa msemmija hawn fuq ta’ servizzi integrati u ffokati fuq l-individwu, huwa mixtieq li l-indikaturi jkun fihom komponent marbut mal-gruppi mmirati u għandhom jikkunsidraw il-kuntesti reġjonali. |
4.6.4 |
Barra minn hekk, il-KESE jitlob li jkun hemm koordinazzjoni ġusta bejn l-evalwazzjoni komparattiva tal-politiki dwar l-impjiegi u l-proċedura ta’ tabella ta’ valutazzjoni f’każ ta’ żbilanċi makroekonomiċi eċċessivi. |
4.6.5 |
Il-Kumitat jappoġġja l-inizjattivi kollha tal-Pakkett dwar l-Impjiegi maħsubin biex l-isfidi, l-għanijiet u l-progress attwali tal-politika dwar l-impjiegi jerġgħu jsiru aktar viżibbli, vinkolanti u komprensibbli, u biex jinsab bilanċ aħjar bejn il-politika ekonomika, dik dwar l-impjiegi u dik soċjali. Barra minn hekk, il-miżuri għandhom jitfasslu b’tali mod li jappoġġjaw l-għanijiet tal-UE relatati mal-ugwaljanza bejn in-nisa u l-irġiel. Punt ta’ kritika hu li l-Pakkett dwar l-Impjiegi ma jirriflettix biżżejjed il-promozzjoni tal-impjieg tan-nisa u ma jintegrax b’mod suffiċjenti l-perspettivi tal-ugwaljanza bejn in-nisa u l-irġiel li l-Kummissjoni tħeġġeġ bnadi oħra. |
4.7 Proposti dwar il-prospetti li jiżdiedu l-impjiegi
4.7.1 |
Fid-dokumenti li jakkumpanjaw il-Komunikazzjoni jingħad li l-“ekonomija ekoloġika” għandha potenzjal partikolari sabiex iżżid l-impjiegi. Madankollu, dan il-potenzjal jiddependi ħafna mil-leġislazzjoni tal-Istati Membri differenti dwar kif tiġi regolata l-imġiba ambjentali. Għall-kuntrarju ta’ oqsma oħra ta’ tkabbir, bħat-teknoloġija tal-informazzjoni u tal-komunikazzjoni, it-tkabbir tal-ekonomija ekoloġika huwa aktar immexxi mill-interessi politiċi milli mill-interessi purament ekonomiċi peress li l-ammortament tal-investimenti f’dan is-settur jieħu aktar żmien. Għalhekk hemm bżonn ta’ inċentivi ċari fil-politika ambjentali. Barra minn hekk, dawn l-inċentivi għandhom jippermettu l-ippjanar fit-tul u jnaqqsu l-inċertezzi marbutin mal-possibbiltà li tinbidel il-politika ambjentali. Sabiex l-implimentazzjoni tirnexxi, hemm assolutament bżonn ta’ kooperazzjoni u koordinazzjoni mill-qrib bejn il-politika ambjentali u dik ekonomika. Madankollu, din il-kooperazzjoni m’għandhiex titbiegħed mill-għanijiet li tkun maħsuba għalihom. F’dan il-kuntest, punt partikolarment kritiku hu li l-kunċett ta’ “impjieg ekoloġiku” ġie estiż għall-impjiegi ffinanzjati mit-taxxi ekoloġiċi (15). Abbażi ta’ definizzjoni bħal din, il-kontenut tal-attività ma jibqax jitqies bħala kriterju deċiżiv ta’ impjieg ekoloġiku, kunċett li għad irid jiġi definit (16). |
4.7.2 |
Barra minn hekk, il-potenzjal tal-impjiegi fl-ekonomija ekoloġika jiddependi mill-fluttwazzjonijiet ekonomiċi; is-setturi kkonċernati mhumiex stabbli. Għalhekk, il-bidla lejn ekonomija ekoloġika għall-bidu ser twassal għat-telf tal-impjiegi fl-industriji tradizzjonali. Dan it-telf tal-impjiegi għandu jittaffa b’tali mod li s-soċjetà tkun tiflaħ għalih u l-ħaddiema għandhom jiġu appoġġjati permezz ta’ kwalifiki ġodda skont il-ħiliet tagħhom biex jissaħħu l-possibbiltajiet tagħhom li jsibu xogħol. Ekonomija b’approċċ iktar ekoloġiku tista’ tistimola d-domanda għal impjigei bi kwalifiki għooljin, medji u baxxi, kif turi l-Kummissjoni Ewropea fid-dokument dwar it-tkabbir ekoloġiku (17). B’mod globali dan iwassal għal effetti ta’ sostituzzjoni; għalhekk il-Kumitat jiddubita kemm il-bilanċ tal-impjiegi huwa verament pożittiv kif qed tassumi l-Kummissjoni. Barra minn dan, ċerti setturi tat-teknoloġija ekoloġika jistgħu jikbru ħafna f’qasir żmien (pereżempju, l-industrija tal-bini), filwaqt li l-impjiegi fit-tul huma mistennija li jkunu fl-attivitajiet li jirrikjedu kwalifiki għoljin. Dawn il-ħaddiema wkoll għandhom bżonn ta’ sigurtà soċjali adegwata, u t-tranżizzjonijiet fis-suq tax-xogħol għandhom jitfasslu b’mod sostenibbli. |
4.7.3 |
Is-sostenibbiltà tal-potenzjal tal-impjiegi fl-ekonomija ekoloġika tiġi influwenzata ħafna wkoll mill-istrutturi tal-kwalifiki. Studju dwar l-istrutturi tal-kwalifiki (18) f’disa’ Stati Membri tal-UE juri li ż-żieda tal-impjiegi f’dan il-qasam hija mistennija li tikkonċerna l-aktar il-pożizzjonijiet li jirrikjedu kwalifiki għoljin. Fl-istess ħin, s’issa t-taħriġ offrut f’dan il-qasam għadu frammentat ħafna. Sabiex jittejbu kemm jista’ jkun l-istrutturi tat-taħriġ relatat mal-impjiegi ekoloġiċi, jeħtieġ li l-imsieħba soċjali jikkoordinaw b’mod regolari mal-istituti li joffru t-taħriġ. Madankollu, il-politika ambjentali hija importanti immens ukoll għat-taħriġ fl-ekonomija ekoloġika, peress li hi tidderieġi d-domanda għall-kwalifiki. L-Ewropa, li għad m’għandhiex riċerka u żvilupp li jassoċjaw l-imħuħ u l-kapital ta’ riskju, għadu ma rnexxilhiex toħloq is-Silicon Valley tagħha. Però l-impjiegi industrijali jiddependu mill-manifattura tal-applikazzjonijiet. B’mod ġenerali, il-Komunikazzjoni tal-Kummissjoni ma tgħid xejn dwar l-ixprun magħmul mir-riċerka u l-iżvilupp. Wieħed mis-setturi li joffri l-opportunitajiet sew għall-intrapriżi tal-produzzjoni u sew għas-servizzi privati u s-servizzi ta’ interess ġenerali huwa s-settur tat-tixjiħ fi stat tajjeb – f’sens wiesa’ – bis-saħħa tat-teknoloġiji tal-informazzjoni u tal-komunikazzjoni sabiex l-anzjani (li daqt jilħqu t-30 % tas-soċjetajiet tagħna) jibqgħu attivi, konnessi, mobbli, inklużi, b’saħħithom u megħjunin (19). L-eżempju tal-Asja (iċ-Ċina u l-Ġappun) għandu jiġi kkunsidrat. Jekk jiġu rikonoxxuti u mħarsa b’mod rapidu d-drittijiet tal-utenti, jintrebaħ il-ħin u tiżdied ir-rata tal-impjieg. |
4.7.4 |
F’opinjoni tiegħu (20) l-KESE diġà nnota li jekk sal-2020 jintlaħaq l-għan li 20 % tal-enerġija tkun enerġija rinnovabbli, dan ser ikollu effett nett ta’ madwar 410 000 impjieg addizzjonali u impuls tat-tkabbir ta’ 0,24 % fil-prestazzjoni ekonomika meta mqabbla mas-sitwazzjoni tal-2005. |
4.7.5 |
Settur ieħor li l-Kummissjoni temmen li jistgħu jiżdiedu l-impjiegi fih huwa dak tat-teknoloġija tal-informazzjoni u tal-komunikazzjoni. Dan huwa qasam eteroġenu ħafna li jinkludi mill-programmazzjoni purament teknika sal-konsulenza u s-servizzi li jingħataw lill-klijenti. Minħabba x-xejra teknika tiegħu u r-ritmu mgħaġġel tal-innovazzjoni fih, dan il-qasam jirrikjedi ħafna għarfien u b’hekk ipoġġi esiġenzi kbar fuq l-ħaddiema li jaħdmu fih. Għal din ir-raġuni kif ukoll minħabba li l-għarfien malajr ma jibqax rilevanti, il-politika dwar l-edukazzjoni, it-taħriġ fuq il-post tax-xogħol u r-rieda tal-individwu li jitgħallem għandhom ukoll importanza kbira f’dan il-qasam. Bosta drabi l-ħaddiema jintalbu jkunu flessibbli ħafna kemm f’termini ta’ post kif ukoll ta’ ħinijiet tax-xogħol. Għaldaqstant, hemm bżonn ta’ strateġiji tal-persunal li jikkunsidraw il-fażijiet differenti tal-ħajja, sabiex il-ħaddiema jkunu marbutin mal-intrapriżi għal żmien twil. Barra minn hekk, sikwit ikun hemm riskju għoli ta’ mard u tensjoni mentali fost il-ħaddiema. |
4.7.6 |
Fis-setturi tas-saħħa u tal-kura, speċjalment fl-ekonomija tal-anzjani, id-domanda hija relattivament prevedibbli minħabba t-tixjiħ tal-popolazzjoni. Il-kunċett ta’ impjieg iġġenerat mill-anzjani jkopri l-ħolqien ta’ impjiegi ġodda peress li l-istruttura tal-produzzjoni tiġi adattata għall-bżonnijiet ta’ popolazzjoni li qed tixjieħ. L-aktar setturi importanti għall-impjieg iġġenerat mill-anzjani huma dawk tas-saħħa u l-kura fit-tul, li jirrikjedu ammont konsiderevoli ta’ ħaddiema u fejn id-domanda min-naħa tal-popolazzjoni li qed tixjieħ hija kbira ħafna. Fl-istess ħin, però, qed jonqos in-numru disponibbli ta’ ħaddiema żgħażagħ u kkwalifikati. Minkejja li s-setturi tas-saħħa u tal-kura huma elementi ċentrali għall-ħolqien tal-valur fl-ekonomija, ħafna impjiegi fil-qasam tas-servizzi personali mhumiex attraenti biżżejjed għaliex huma impjiegi għal perjodu limitat u b’pagi baxxi. Problema oħra hi t-tensjoni fiżika qawwija, li minħabba fiha bosta nies jieqfu jaħdmu qabel iż-żmien. Madankollu, il-prodotti u s-servizzi ta’ kwalità jistgħu jiġu żgurati fit-tul biss jekk ikun hemm impjiegi tal-istess kwalità għolja. Bis-saħħa ta’ miżuri fil-qasam tas-saħħa u fit-titjib tas-sistemi tal-kura (fit-tul) u tal-għajnuna, b’mod partikolari fid-djar, jistgħu jinħolqu bosta impjiegi. Barra minn hekk, jistgħu jinħolqu wkoll ħafna opportunitajiet permezz tal-promozzjoni tal-investimenti li jappoġġjaw l-iżvilupp tal-intrapriżi inklużivi u tal-intrapriżi soċjali f’dan is-settur. |
Brussell, 15 ta’ Novembru 2012.
Il-President tal-Kumitat Ekonomiku u Soċjali Ewropew
Staffan NILSSON
(1) ĠU C 143, 22.5.2012, p. 23.
(2) ĠU C 306, 16.12.2009, p. 70.
(3) Ara l-Istqarrija għall-Istampa tal-Eurostat Nru 138/2012 tal-1 ta’ Ottubru 2012.
(4) Ara l-Istqarrija għall-Istampa tal-Eurostat Nru 138/2012 tal-1 ta’ Ottubru 2012.
(5) SWD(2012) 90 final, p. 10ff.
(6) Ara n-nota 2 f’qiegħ il-paġna.
(7) Eurofound (2012), “Youth Garanties: Experiences from Finland and Sweden”.
(8) COM(2012) 485 final.
(9) ĠU C 229, 31.7.2012, p. 44.
(10) ĠU C 191, 29.6.2012, p. 24.
(11) C(2008) 5737: http://eur-lex.europa.eu/LexUriServ/LexUriServ.do?uri=OJ:L:2008:307:0011:0014:MT:PDF.
(12) ĠU C 228, 22.9.2009, p. 14.
(13) Ara n-nota 3 f’qiegħ il-paġna.
(14) ĠU 143, 22.5.2012, p. 94.
(15) SWD(2012) 92 final.
(16) Skont id-definizzjoni tal-UNEP, pereżempju, kull attività li l-kontenut tagħha jagħti kontribut għall-ħarsien jew ir-riġenerazzjoni tal-kwalità tal-ambjent hija attività ekoloġika.
(17) SWD(2012) 92 final.
(18) Nota ta’ informazzjoni tas-CEDEFOP (Frar 2012), “A strategy for green skills?”
(19) Seduta tal-KESE tal-11 ta’ Settembru 2012 dwar it-tixjiħ attiv u t-teknoloġija tal-informazzjoni.
(20) ĠU C 376, 22.12.2011, p. 1.