EUR-Lex Access to European Union law
This document is an excerpt from the EUR-Lex website
Document 52011PC0805
Proposal for a COUNCIL DECISION on the signature of the Agreement between the United States of America and the European Union on the use and transfer of Passenger Name Records to the United States Department of Homeland Security
Proposta għal DEĊIŻJONI TAL-KUNSILL dwar l-iffirmar tal-Ftehim bejn l-Istati Uniti tal-Amerika u l-Unjoni Ewropea dwar l-użu u t-trasferiment tar-Reġistri tal-Ismijiet tal-Passiġġieri lid-Dipartiment tas-Sigurtà Interna tal-Istati Uniti
Proposta għal DEĊIŻJONI TAL-KUNSILL dwar l-iffirmar tal-Ftehim bejn l-Istati Uniti tal-Amerika u l-Unjoni Ewropea dwar l-użu u t-trasferiment tar-Reġistri tal-Ismijiet tal-Passiġġieri lid-Dipartiment tas-Sigurtà Interna tal-Istati Uniti
/* KUMM/2011/0805 finali - 2011/0383 (NLE) */
Proposta għal DEĊIŻJONI TAL-KUNSILL dwar l-iffirmar tal-Ftehim bejn l-Istati Uniti tal-Amerika u l-Unjoni Ewropea dwar l-użu u t-trasferiment tar-Reġistri tal-Ismijiet tal-Passiġġieri lid-Dipartiment tas-Sigurtà Interna tal-Istati Uniti /* KUMM/2011/0805 finali - 2011/0383 (NLE) */
MEMORANDUM TA’ SPJEGAZZJONI Il-leġiżlazzjoni tal-Istati Uniti
tagħti s-setgħa lid-Dipartiment tas-Sigurtà Interna (DHS) sabiex
jirrikjedi li kull trasportatur tal-ajru li jopera titjiriet
tal-passiġġieri lejn u mill-Istati Uniti jipprovdilu aċċess
elettroniku għad-dejta tar-Reġistru tal-Ismijiet
tal-Passiġġieri (PNR) qabel ma l-passiġġier jasal l-Istati
Uniti jew jitlaq minnhom. Ir-rekwiżiti tal-awtoritajiet tal-Istati Uniti
huma bbażati fuq it-titolu 49 tal-Kodiċi tal-Istati Uniti,
it-taqsima 44909c (3) u fuq ir-regolamenti ta’ implimentazzjoni
tiegħu (it-titolu 19 tal-Kodiċi tar-regolamenti federali,
it-taqsima 122.49b). Din il-leġiżlazzjoni timmira li
tikseb id-dejta tal-PNR b’mod elettroniku qabel il-wasla ta’ titjira u b’hekk
iżżid b’mod sinifikanti l-abbiltà tad-DHS li jwettaq valutazzjoni
tar-riskju effiċjenti u effettiva minn qabel tal-passiġġieri u
li jiffaċilita l-ivvjaġġar bona fide, biex b’hekk titjieb
is-sigurtà tal-Istati Uniti. Il-Ftehim se jinkoraġġixxi wkoll
il-kooperazzjoni tal-pulizija u dik ġudizzjarja fil-livell internazzjonali
permezz tat-trasferiment ta' informazzjoni analitika li tirriżulta
mid-dejta tal-PRN mill-Istati Unit għal għand l-awtoritajiet
kompetenti tal-Istati Membri kif ukoll għal għand l-Europol u
l-Eurojust fi ħdan il-kompetenzi rispettivi tagħhom. Il-PNR huwa reġistrazzjoni
tar-rekwiżiti tal-ivvjaġġar ta’ kull passiġġier li
tinkludi l-informazzjoni kollha neċessarja li tippermetti li
l-prenotazzjonijiet jiġu pproċessati u kkontrollati mit-trasportaturi
tal-ajru. It-trasportaturi tal-ajru huma obbligati li
jipprovdu lid-DHS aċċess għal ċerta dejta tal-PNR
inkluża fis-sistemi awtomatizzati tal-prenotazzjoni u tal-kontroll
tat-tluq tat-trasportatur tal-ajru. Il-liġijiet tal-UE dwar il-protezzjoni
tad-dejta ma jippermettux li trasportaturi tal-ajru Ewropej u oħrajn li
joperaw titjiriet mill-UE jittrażmettu d-dejta tal-PNR
tal-passiġġieri tagħhom lil pajjiżi terzi li ma
jiżgurawx livell adegwat ta’ protezzjoni tad-dejta personali mingħajr
il-preżentazzjoni ta’ salvagwardji xierqa. Hija meħtieġa
soluzzjoni li tipprovdi l-bażi legali għat-trasferiment tad-dejta
tal-PNR mill-UE lejn l-Istati Uniti bħala rikonoxximent tan-neċessità
u l-importanza tal-użu tad-dejta tal-PNR fil-ġlieda kontra
t-terroriżmu u kriminalità transnazzjonali serja oħra, filwaqt li
tiġi evitata l-inċertezza legali għat-trasportaturi tal-ajru.
Barra minn hekk, din is-soluzzjoni għandha tiġi applikata b’mod
omoġenju madwar l-Unjoni Ewropea kollha sabiex tkun żgurata ċ-ċertezza
legali għat-trasportaturi tal-ajru u r-rispett tad-drittijiet
tal-individwi għall-protezzjoni tad-dejta personali kif ukoll is-sigurtà
fiżika tagħhom. Fl-2007 l-Unjoni Ewropea ffirmat ftehim
mal-Istati Uniti dwar it-trasferiment u l-ipproċessar tad-dejta tal-PNR,
ibbażat fuq sett ta’ impenji mid-DHS fir-rigward tal-applikazzjoni
tal-programm tal-PNR tagħha[1]. Wara d-dħul fis-seħħ
tat-Trattat ta' Lisbona u waqt l-istennija tal-konklużjoni tal-ftehim,
il-Kunsill bagħat il-Ftehim tal-2007 mal–Istati Uniti lill-Parlament
Ewropew biex jagħti l-kunsens tiegħu għall-konklużjoni.
Il-Parlament Ewropew adotta riżoluzzjoni[2]
li biha ddeċieda li jipposponi l-votazzjoni tiegħu dwar it-talba
għall-approvazzjoni u talab li jkun hemm negozjar mill-ġdid
tal-Ftehim abbażi ta' ċerti kriterji. Sakemm isir dan in-negozjar
mill-ġdid, il-Ftehim tal-2007 jibqa’ applikabbli provviżorjament. Fil-21 ta’ Settembru 2010,
il-Kunsill irċieva rakkomandazzjoni mill-Kummissjoni biex jawtorizza
l-ftuħ tan-negozjati għal Ftehim bejn l-Unjoni Ewropea u l-Istati
Uniti tal-Amerika għall-użu u t-trasferiment ta’ dejta
tar-Reġistru tal-Ismijiet tal-Passiġġieri (PNR) biex jipprevjeni
u jiġġieled it-terroriżmu u kriminalità transnazzjonali serja
oħra. Fil-11 ta’ Novembru 2010,
il-Parlament Ewropew adotta riżoluzzjoni dwar ir-Rakkomandazzjoni
mill-Kummissjoni lill-Kunsill biex jawtorizza l-ftuħ tan-negozjati. Fit-2 ta’ Diċembru 2010, il-Kunsill
adotta Deċiżjoni, flimkien ma’ direttiva ta’ negozjar, li tawtorizza
l-Kummissjoni biex tiftaħ in-negozjati f’isem l-Unjoni Ewropea.
B'riżultat ta' dawn in-negozjati bejn il-Partijiet, il-Ftehim ġie
inizjalat fis-17 ta' Novembru 2011. Dan il-Ftehim jieħu inkonsiderazzjoni
l-kriterji ġenerali stabbiliti fil-Komunikazzjoni mill-Kummissjoni dwar
l-Approċċ Globali għat-trasferiment ta’ dejta tar-Reġistru
tal-Ismijiet tal-Passiġġieri (PNR) lejn pajjiżi terzi[3] u d-direttivi ta’ negozjar
mogħtija mill-Kunsill, u huwa konsistenti magħhom. Il-PNR wera li huwa għodda importanti
ħafna fil-ġlieda kontra t-terroriżmu u kriminalità serja.
Il-Ftehim assigura diversi salvagwardji importanti għal dawk li d-dejta
tagħhom ser tiġi trasferita u użata. B'mod partikolari,
l-għan tal-ipproċessar tad-dejta tal-PNR hija strettament limitata
għall-prevenzjoni, il-kxif, l-investigazzjoni u l-prosekuzzjoni ta' reati
terroristiċi u kriminalità transnazzjonali serja. Il-perjodu
taż-żamma tad-dejta tal-PNR huwa limitat u l-PNR ser jiġi
użat għal perjodu iqsar fil-ġlieda kontra l-kriminalità
transnazzjonali serja u għal perjodu itwal kontra t-terroriżmu. Barra
minn hekk, id-dejta għandha tiġi spersonalizzata wara perjodu ta'
sitt xhur. L-individwi huma pprovduti bid-dritt għall-aċċess,
il-korrezzjoni, ir-rimedjar u l-informazzjoni. Il-metodu ‘push’ ta'
trasferiment huwa rikonoxxut bħala l-mod standard ta’ trasferiment, li
t-trasportaturi tal-ajru kollha se jkunu mitluba li jsegwu fi żmien
sentejn mill-Ftehim. Dejta sensittiva għandha tintuża f'każijiet
verament eċċezzjonali u mħassra wara żmien qasir
ħafna. Il-konformità ma’ dawn ir-regoli tkun soġġetta għal
reviżjoni indipendenti u kkontrollata minn diversi Uffiċjali
tal-Privatezza tad-Dipartiment, kif ukoll mill-Uffiċċju tad-DHS
tal-Ispettur Ġenerali, l-Uffiċċju tar-Responsabbiltà
Governattiva u l-Kungress tal-Istati. Uniti. L-Artikolu 218 (5) tat-Trattat dwar
il-Funzjonament tal-Unjoni Ewropea jiddikjara li l-Kunsill jawtorizza
l-iffirmar ta’ ftehimiet internazzjonali. Il-Kummissjoni għalhekk tipproponi
lill-Kunsill li jadotta deċiżjoni li tawtorizza l-iffirmar tal-Ftehim
bejn l-Unjoni Ewropea u l-Istati Uniti tal-Amerika dwar l-użu u
t-trasferiment tad-dejta tar-Reġistru tal-Ismijiet
tal-Passiġġieri lid-Dipartiment tas-Sigurtà Interna tal-Istati Uniti. 2011/0383 (NLE) Proposta għal DEĊIŻJONI TAL-KUNSILL dwar l-iffirmar tal-Ftehim bejn l-Istati
Uniti tal-Amerika u l-Unjoni Ewropea dwar l-użu u t-trasferiment
tar-Reġistri tal-Ismijiet tal-Passiġġieri lid-Dipartiment
tas-Sigurtà Interna tal-Istati Uniti IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b’mod partikolari l-Artikoli 82 (1) (d) u
87 (2) (a), flimkien mal-Artikolu 218 (5) tiegħu, Wara li kkunsidra l-proposta mill-Kummissjoni
Ewropea, Billi: (1) Fit-2 ta’ Diċembru 2010,
il-Kunsill adotta Deċiżjoni, flimkien ma’ direttivi ta’ negozjar, li
awtorizzaw lill-Kummissjoni tiftaħ in-negozjati f'isem l-Unjoni Ewropea
bejn l-Unjoni Ewropea u l-Istati Uniti tal-Amerika għat-trasferiment u
l-użu tar-Reġistri tal-Ismijiet tal-Passiġġieri (PNR)
għall-prevenzjoni u l-ġlieda kontra t-terroriżmu u kriminalità
transnazzjonali serja oħra. (2) Il-Ftehim ġie negozjat.
In-negozjati ġew konklużi b'suċċess bl-inizjalar
tal-ftehim. (3) Il-Ftehim għandu
jiġi ffirmat suġġett għall-konklużjoni tiegħu
f'data aktar tard. (4) Dan il-Ftehim jirrispetta
d-drittijiet fundamentali u josserva l-prinċipji rikonoxxuti b’mod
partikolari mill-Karta tad-Drittijiet Fundamentali tal-Unjoni Ewropea,
partikolarment id-dritt għall-ħajja privata u familjari, rikonoxxut
fl-Artikolu 7 tal-Karta, id-dritt għall-protezzjoni tad-dejta
personali, rikonoxxut fl-Artikolu 8 tal-Karta u d-dritt għal rimedju
effettiv u proċess ġust rikonoxxut mill-Artikolu 47 tal-Karta.
Dan il-Ftehim għandu jiġi applikat skont dawk id-drittijiet u
prinċipji. (5) [Skont l-Artikolu 3
tal-Protokoll 21 dwar il-Pożizzjoni tar-Renju Unit u l-Irlanda fir-rigward
taż-żona ta’ Libertà, Sigurtà u Ġustizzja anness mat-Trattat
dwar l-Unjoni Ewropea u t-Trattat dwar il-Funzjonament tal-Unjoni Ewropea,
ir-Renju Unit u l-Irlanda jieħdu sehem fl-adozzjoni ta’ din
id-Deċiżjoni.] (6) Skont l-Artikoli 1 u 2
tal-Protokoll 22 dwar il-Pożizzjoni tad-Danimarka annessi mat-Trattat
dwar l-Unjoni Ewropea u t-Trattat dwar il-Funzjonament tal-Unjoni Ewropea,
id-Danimarka mhix tieħu sehem fl-adozzjoni ta’ din id-Deċiżjoni
u la hi marbuta bil-Ftehim u lanqas hi suġġetta għall-applikazzjoni
tiegħu, ADOTTA DIN ID-DEĊIŻJONI: Artikolu 1 L-iffirmar tal-Ftehim bejn l-Unjoni Ewropea u
l-Istati Uniti tal-Amerika dwar l-użu u t-trasferiment tar-Reġistru
tal-Ismijiet tal-Passiġġieri lid-Dipartiment tas-Sigurtà Interna
tal-Istati Uniti huwa hawnhekk approvat, soġġett
għall-konklużjoni tiegħu f'data aktar tard. It-test tal-Ftehim li għandu jiġi
ffirmat huwa mehmuż ma’ din id-Deċiżjoni. Il-Kummissjoni hija awtorizzata li taħtar
il-persuni li jkollhom is-setgħa li jipproċedu bl-iffirmar
tad-Deċiżjoni, soġġett għall-konklużjoni
tagħha. Artikolu 2 Id-Dikjarazzjoni mill-UE dwar il-Ftehim dwar
l-użu u t-trasferiment tar-Reġistru tal-Ismijiet
tal-Passiġġieri lid-Dipartiment tas-Sigurtà Interna tal-Istati Uniti
("Il-Ftehim") rigward l-obbligi tagħha skont l-Artikoli 17 u 23
tal-Ftehim hija hawnhekk approvata. It-test tad-Dikjarazzjoni huwa mehmuż ma'
din id-Deċiżjoni. Artikolu 3 Din id-Deċiżjoni tidħol
fis-seħħ fil-jum tal-adozzjoni tagħha. Magħmul fi Brussell, Għall-Kunsill Il-President ANNESS I FTEHIM BEJN L-ISTATI UNITI TAL-AMERIKA U
L-UNJONI EWROPEA DWAR L-UŻU U T-TRASFERIMENT TAR-REĠISTRI
TAL-ISMIJIET TAL-PASSIĠĠIERI LID-DIPARTIMENT TAS-SIGURTÀ INTERNA
TAL-ISTATI UNITI L-ISTATI UNITI TAL-AMERIKA kif ukoll L-UNJONI EWROPEA, Minn hawn 'il quddiem imsejħa bħala
“il-Partijiet,” FILWAQT LI JIXTIEQU li jipprevjenu u
jiġġieldu t-terroriżmu u l-kriminalità transnazzjonali serja
b'mod effettiv bħala mezz ta' protezzjoni tas-soċjetajiet
demokratiċi rispettivi tagħhom u l-valuri komuni; WAQT LI JFITTXU li jsaħħu u
jħeġġu l-kooperazzjoni bejn il-Partijiet fi spirtu ta'
sħubija transatlantika; JIRRIKONOXXU d-dritt u r-responsabbiltà
tal-istati li jiżguraw is-sigurtà taċ-ċittadini tagħhom u
jipproteġu l-fruntieri tagħhom u konxji tar-responsabbiltà tan-nazzjonijiet
kollha li jipproteġu l-ħajja u s-sikurezza tal-pubbliku inklużi
dawk li jużaw is-sistemi ta’ trasport internazzjonali; KONVINTI li l-qsim tal-informazzjoni huwa
komponent essenzjali fil-ġlieda kontra t-terroriżmu u l-kriminalità
transnazzjonali serja u li f'dan il-kuntest, l-ipproċessar u l-użu
ta’ Reġistri tal-Ismijiet tal-Passiġġieri (PNR) huwa għodda
neċessarja li tipprovdi informazzjoni li ma tistax tinkiseb b'mezzi
oħra; DETERMINATI li
jipprevjenu u jiġġieldu r-reati terroristiċi u l-kriminalità
transnazzjonali, filwaqt li jiġu rispettati d-drittijiet u l-libertajiet
fundamentali u jirrikonoxxu l-importanza tal-privatezza u l-protezzjoni
tad-dejta u l-informazzjoni personali; WARA LI KKUNSIDRAW l-istrumenti
internazzjonali, l-istatuti u r-regolamenti tal-Istati Uniti li
jeħtieġu li kull trasportatur tal-ajru li jopera titjiriet
tal-passiġġieri fit-trasport bl-ajru barrani lejn jew mill-Istati
Uniti jagħmel il-PNR disponibbli lid-Dipartiment tas-Sigurtà Interna (DHS)
sal-punt li jiġu miġbura u jinżammu fis-sistemi awtomatizzati
tal-prenotazzjoni/kontroll tat-tluq tat-trasportatur tal-ajru, u
r-rekwiżiti paragunabbli li huma jew jistgħu jiġu implimentati
fl-UE; FILWAQT LI JINNUTAW li d-DHS jipproċessa
u juża l-PNR għall-għan ta’ prevenzjoni, kxif, investigazzjoni u
prosekuzzjoni ta' reati terroristiċi u l-kriminalità transnazzjonali
f’konformità ma’ salvagwardji dwar il-privatezza u l-protezzjoni ta’ dejta u
l-informazzjoni personali, kif stabbilit f'dan il-Ftehim; JENFASIZZAW l-importanza tal-qsim tal-PNR u
l-informazzjoni analitika rilevanti u xierqa miksuba mill-PNR mill-Istati Uniti
mal-awtoritajiet tal-pulizija u ġudizzjarji kompetenti tal-Istati Membri,
u l-Europol jew l-Eurojust bħala mezz biex tittrawwem il-kooperazzjoni
internazzjonali tal-pulizija u dik ġudizzjarja. JIRRIKONOXXU t-tradizzjonijiet antiki
taż-żewġ Partijiet ta’ rispett għall-privatezza
individwali, kif rifless fil-liġijiet tagħhom u d-dokumenti
fundaturi; KONXJI mill-impenji tal-UE skont
l-Artikolu 6 tat-Trattat dwar l-Unjoni Ewropea dwar ir-rispett
tad-drittijiet fundamentali, id-dritt għall-privatezza fir-rigward
tal-ipproċessar ta’ dejta personali kif stipulat fl-Artikolu 16
tat-Trattat dwar il-Funzjonament tal-Unjoni Ewropea, il-prinċipji ta’
proporzjonalità u neċessità dwar id-dritt għall-ħajja privata u
familjari, ir-rispett għall-privatezza, u l-protezzjoni ta’ dejta
personali skont l-Artikolu 8 tal-Konvenzjoni Ewropea dwar il-Protezzjoni
tad-Drittijiet Umani u Libertajiet Fundamentali, il-Konvenzjoni Nru. 108
tal-Kunsill tal-Ewropa għall-Protezzjoni ta’ Individwi fir-rigward
tal-Ipproċessar Awtomatiku ta’ Dejta Personali u l-Protokoll addizzjonali
tagħha 181, u l-Artikoli 7 u 8 tal-Karta tad-Drittijiet Fundamentali
tal-Unjoni Ewropea; KONXJI li d-DHS attwalment jimpjega proċessi
b'saħħithom biex jipproteġi l-privatezza personali u
jiżgura l-integrità tad-dejta, inkluż is-sigurtà fiżika,
il-kontrolli tal-aċċess, is-separazzjoni u l-enkriptjar tad-dejta,
kapaċitajiet ta' verifika u miżuri ta’ responsabbiltà effettivi; JIRRIKONOXXU l-importanza li tiġi
żgurata l-kwalità, l-eżattezza, l-integrità, u s-sigurtà tad-dejta, u
li jistabbilixxu responsabbiltà xierqa biex jiżguraw li dawn
il-prinċipji jiġu osservati; JINNOTAW b'mod partikolari l-prinċipju
tat-trasparenza u l-mezzi varji li bihom l-Istati Uniti tiżgura li
l-passiġġieri li l-PNR tagħhom jiġi miġbur mid-DHS
ikunu mgħarrfa mill-ħtieġa għal u l-użu tal-PNR
tagħhom; JIRRIKONOXXU AKTAR li l-ġbir u
l-analiżi tal-PNR huwa meħtieġ għad-DHS sabiex iwettaq
il-missjoni tiegħu ta’ sigurtà tal-fruntieri, filwaqt li jiġi
żgurat li l-ġbir u l-użu tal-PNR jibqa’ rilevanti u
neċessarju għall-għanijiet li għalih ikun inġabar; JIRRIKONOXXU li, b’konsiderazzjoni ta’ dan
il-Ftehim u l-implimentazzjoni tiegħu, id-DHS ikun meqjus bħala li
jiżgura livell adegwat ta’ protezzjoni tad-dejta
għall-ipproċessar u l-użu ta’ PNR trasferiti lid-DHS; KONXJI li l-Istati Uniti u l-Unjoni Ewropea
huma impenjati li jiżguraw livell għoli ta' protezzjoni
għall-informazzjoni persunali filwaqt li jiġġieldu kontra l-kriminalità
u t-terroriżmu, u huma ddeterminati li jilħqu, bla dewmien, ftehim
sabiex jipproteġu l-informazzjoni persunali skambjata fil-kuntest
tal-ġlieda kontra t-terroriżmu b'manjiera komprensiva li ser tmexxi
l-miri komuni tagħna 'l quddiem; JIRRIKONOXXU r-Reviżjonijiet
Konġunti b'suċċess fl-2005 u l-2010 tal-Ftehimiet tal-2004 u
l-2007 bejn il-Partijiet dwar it-trasferiment tal-PNR; JINNUTAW l-interess tal-partijiet, kif ukoll
tal-Istati Membri tal-UE, fl-iskambju tal-informazzjoni fir-rigward tal-metodu
ta' trażmissjoni tal-PNR kif ukoll it-trasferiment 'il quddiem tal-PNR kif
spjegat fl-artikoli relevanti ta' dan il-Ftehim, u filwaqt li jinnutaw ukoll
l-interess tal-UE fl-indirizzar ta' dan fil-kuntest tal-mekkaniżmu ta'
konsultazzjoni u reviżjoni spjegat f'dan il-Ftehim; WAQT LI JAFFERMAW li dan il-Ftehim ma
jikkostitwix preċedent għal kwalunkwe arranġament ġejjieni
bejn il-Partijiet, jew bejn xi waħda mill-Partijiet u kull parti
oħra, rigward l-ipproċessar, l-użu, jew it-trasferiment tal-PNR
jew kwalunkwe forma oħra ta' dejta, jew dwar il-protezzjoni tad-dejta; JIRRIKONOXXU
l-prinċipji relatati ta’ proporzjonalità kif ukoll ir-rilevanza u
n-neċessità li jiggwidaw dan il-Ftehim u l-implimentazzjoni tiegħu
mill-Unjoni Ewropea u l-Istati Uniti; kif ukoll WARA
LI KKUNSIDRAW il-possibbiltà li l-Partijiet jiddiskutu ulterjorment
it-trasferiment ta’ dejta tal-PNR fil-modalità marittima; HAWNHEKK
JAQBLU:
KAPITOLU I Dispożizzjonijiet Ġenerali Artikolu 1 Għan 1.
L-għan ta’ dan il-Ftehim huwa li jiżgura
s-sigurtà u jipproteġi l-ħajja
u s-sigurtà tal-pubbliku. 2.
Għal dan il-għan, dan il-Ftehim
jistabbilixxi r-responsabbiltajiet tal-Partijiet fir-rigward
tal-kondizzjonijiet li taħthom il-PNR jista’ jiġi trasferit,
ipproċessat u użat, u protett. Artikolu 2 Kamp ta' applikazzjoni 1.
PNR, kif stabbilit fil-Linji Gwida
tal-Organizzazzjoni Internazzjonali tal-Avjazzjoni Ċivili, ifisser
ir-reġistrazzjoni maħluqa minn trasportaturi tal-ajru jew
l-aġenti awtorizzati tagħhom għal kull vjaġġ ipprenotat
minn kwalunkwe passiġġier, jew f'ismu, u inkluża f’sistemi ta’
prenotazzjoni tat-trasportaturi tal-ajru, is-sistemi ta’ kontroll tat-tluq, jew
sistemi ekwivalenti li jipprovdu funzjonalità simili (kollettivament imsemmija
f'dan il-Ftehim bħala sistemi ta’ prenotazzjoni). Speċifikament, kif
użat f’dan il-Ftehim, il-PNR jikkonsisti mit-tipi ta’ dejta stabbiliti
fl-anness ta' ma' dan il-Ftehim. 2.
Dan il-Ftehim japplika għat-trasportaturi
tal-ajru li joperaw titjiriet tal-passiġġieri bejn l-Unjoni Ewropea u
l-Istati Uniti. 3.
Dan il-Ftehim japplika wkoll
għat-trasportaturi tal-ajru inkorporati jew li jaħżnu d-dejta
fl-Unjoni Ewropea u li joperaw titjiriet tal-passiġġieri lejn jew
mill-Istati Uniti. Artikolu 3 Provvista ta’ PNR Il-Partijiet jaqblu li t-trasportaturi
tal-ajru jipprovdu l-PNR inkluż fis-sistemi ta’ prenotazzjoni tagħhom
lid-DHS kif meħtieġ minn u skont l-istandards tad-DHS u b’mod
konsistenti ma’ dan il-Ftehim. Jekk il-PNR trasferit mit-trasportaturi tal-ajru
jkun jinkludi dejta oħra aktar minn dik elenkata fl-anness ta' ma' dan
il-Ftehim, id-DHS iħassar dejta bħal din hekk kif jirċiviha. Artikolu 4 Użu tal-PNR 1.
L-Istati Uniti tiġbor, tuża u
tipproċessa l-PNR għall-skopijiet ta’ prevenzjoni, kxif,
investigazzjoni, u prosekuzzjoni: (a)
Reati terroristiċi u reati relatati,
inklużi i. Imġiba li – 1. tinvolvi att vjolenti jew att
perikoluż għall-ħajja umana, il-proprjetà, jew l-infrastruttura;
kif ukoll 2. tidher li hi intiża biex – a. tintimida jew tisforza popolazzjoni
ċivili; b. tinfluwenza l-politika ta’ gvern permezz
ta’ intimidazzjoni jew sforzar; jew c. taffettwa l-komportament ta’ gvern
permezz ta’ qerda tal-massa, qtil, ħtif, jew teħid ta'
ostaġġi. ii. Attivitajiet li jikkostitwixxu reat
fl-ambitu ta’ u kif definit f’konvenzjonijiet internazzjonali applikabbli u
l-protokolli dwar it-terroriżmu; iii. Il-provvista jew il-ġbir ta’
fondi, bi kwalunkwe mezz, direttament jew indirettament, bl-intenzjoni li
għandhom jintużaw jew bil-konoxxenza li għandhom jintużaw,
b’mod sħiħ jew parzjali, sabiex jitwettaq kwalunkwe mill-atti
deskritti fis-subparagrafi (i) jew (ii); iv. It-tentattiv li jitwettaq kwalunkwe
mill-atti deskritti fis-subparagrafi (i), (ii), jew (iii); v. Il-parteċipazzjoni bħala
kompliċi fil-kummissjoni ta’ kwalunkwe mill-atti deskritti
fis-subparagrafi (i), (ii), jew (iii); vi. L-organizzazzjoni jew id-direzzjoni ta’
oħrajn biex jikkommettu kwalunkwe mill-atti deskritti
fis-subparagrafi (i), (ii), jew (iii); vii. Il-kontribuzzjoni b'xi mod ieħor
għall-kummissjoni ta' kwalunkwe mill-atti deskritti
fis-subparagrafi (i), (ii), jew (iii); viii. It-theddid li jitwettaq att deskritt
fis-subparagrafu (i) taħt ċirkostanzi li jindikaw li t-theddida
hija kredibbli; (b)
Reati oħra li huma kkastigati b'sentenza ta'
priġunerija ta' tliet snin jew aktar u li huma ta' natura transnazzjonali.
Reat huwa meqjus bħala transnazzjonali
fin-natura b’mod partikolari jekk: i. Jitwettaq f’aktar minn pajjiż
wieħed; ii. Jitwettaq f'pajjiż wieħed
iżda parti sostanzjali tal-preparazzjoni, tal-ippjanar, id-direzzjoni jew
il-kontroll tiegħu jseħħu f'pajjiż ieħor; iii. Jitwettaq f'pajjiż wieħed
iżda jinvolvi grupp kriminali organizzat li jwettaq attivitajiet kriminali
f'aktar minn pajjiż wieħed; iv. Jitwettaq f'pajjiż wieħed
iżda għandu effetti sostanzjali f'pajjiż ieħor; jew v. Jitwettaq f'pajjiż wieħed u
min iwettaq ir-reat qiegħed jivvjaġġa jew għandu
l-intenzjoni li jivvjaġġa lejn pajjiż ieħor. 2.
Il-PNR jista’ jintuża u jiġi
pproċessat abbażi ta’ każ b’każ fejn ikun meħtieġ
fid-dawl ta' theddida serja u għall-protezzjoni tal-interessi essenzjali
ta’ kwalunkwe individwu jew jekk ikun ordnat minn xi qorti. 3.
Il-PNR jista' jiġi użat u pproċessat
mid-DHS sabiex jidentifika persuni li jistgħu jkunu soġġetti
għal mistoqsijiet jew eżami ddetaljati mal-wasla fl-Istati Uniti jew
meta jkunu se jitilqu, jew li forsi jkunu jeħtieġu li jiġu
eżami aktar. 4.
Il-paragrafi 1, 2, u 3 ta’ dan l-Artikolu
jkunu bla ħsara għall-infurzar tal-liġi domestika,
is-setgħat ġudizzjarji, jew il-proċedimenti, fejn ikun ġie
skopert ksur ieħor tal-liġi jew indikazzjonijiet tagħhom matul
l-użu u l-ipproċessar tal-PNR. KAPITOLU II Salvagwardji Applikabbli
għall-Użu tal-PNR Artikolu 5 Sigurtà tad-Dejta 1.
Id-DHS jiżgura li miżuri tekniċi
xierqa u arranġamenti organizzattivi jiġu implimentati biex
jipproteġu d-dejta personali u informazzjoni personali li tinsab fil-PNR
kontra qerda aċċidentali, illegali jew mhux awtorizzata, telf,
żvelar, alterazzjonijiet, aċċess, ipproċessar jew użu.
2.
Id-DHS jagħmel użu xieraq
tat-teknoloġija biex jiżgura l-protezzjoni tad-dejta, is-sigurtà,
il-kunfidenzjalità u l-integrità. B’mod partikolari, id-DHS jiżgura li: (a)
il-proċeduri ta’ enkriptjar, awtorizzazzjoni u
dokumentazzjoni rikonoxxuti mill-awtoritajiet kompetenti jiġu applikati.
B’mod partikolari, l-aċċess għall-PNR ikun assigurat u limitat
għal uffiċjali speċifikament awtorizzati; (b)
Il-PNR jinżamm f'ambjent fiżiku sikur u
protett b’kontrolli kontra dħul mhux awtorizzat fiżiku; kif ukoll (c)
jeżisti mekkaniżmu li jiżgura li
investigazzjonijiet dwar il-PNR jitwettqu b’mod konsistenti
mal-Artikolu 4. 3.
Fil-każ ta’ inċident relatat mal-privatezza
(inkluż aċċess mhux awtorizzat jew żvelar), id-DHS
jieħu miżuri raġjonevoli sabiex jinnotifika l-individwi
affettwati kif xieraq, biex jitnaqqas ir-riskju ta’ ħsara ta’ żvelar
mhux awtorizzat ta’ dejta personali u informazzjoni, u biex jiftaħ miżuri
ta’ rimedju li huma teknikament prattikabbli kemm jista' jkun. 4.
Fl-ambitu ta’ dan il-Ftehim, id-DHS jinforma
mingħajr dewmien lill-awtoritajiet Ewropej rilevanti dwar każijiet
ta’ inċidenti sinifikanti relatati mal-privatezza li jinvolvu l-PNR ta’
ċittadini jew residenti tal-UE li jirriżultaw mill-qerda
aċċidentali jew illegali jew telf aċċidentali,
alterazzjoni, żvelar jew aċċess mhux awtorizzat, jew kwalunkwe
forma llegali ta' pproċessar jew użu. 5.
L-Istati Uniti tikkonferma li miżuri effettivi
ta’ infurzar amministrattiv, ċivili u kriminali huma disponibbli taħt
il-liġi tal-Istati Uniti għal inċidenti dwar il-privatezza.
Id-DHS jista’ jieħu azzjoni dixxiplinari kif xieraq kontra persuni
responsabbli għal kwalunkwe inċident dwar il-privatezza li tinkludi
ċaħda ta’ aċċess għas-sistema, twissijiet formali,
sospensjoni, demozzjoni jew tneħħija minn dmir. 6.
Kull aċċess għall-PNR, kif ukoll
l-ipproċessar u l-użu tiegħu, jkun irreġistrat jew
dokumentat mid-DHS. Ir-reġistrazzjonijiet jew dokumentazzjoni
jintużaw biss għall-finijiet ta’ sorveljanza, verifika, u
manutenzjoni tas-sistema jew kif meħtieġ mod ieħor
bil-liġi. Artikolu 6 Dejta Sensittiva 1.
Sal-punt li l-PNR ta’ passiġġier kif ikun
miġbur jinkludi dejta sensittiva (jiġifieri, dejta personali u
informazzjoni li tiżvela l-oriġini razzjali jew etnika, opinjonijiet
politiċi, twemmin reliġjuż jew filosofiku, sħubija
fit-trejdunjins, jew dejta dwar is-saħħa u l-ħajja sesswali
tal-individwu), id-DHS juża sistemi awtomatizzati għall-filtrazzjoni
u l-protezzjoni ta’ dejta sensittiva mill-PNR. Barra minn hekk, id-DHS ma
jipproċessax b’mod ulterjuri jew juża tali dejta, ħlief skont
il-paragrafi 3 u 4 ta’ dan l-Artikolu. 2.
Id-DHS jipprovdi lill-Kummissjoni Ewropea fi
żmien 90 jum mid-dħul fis-seħħ ta’ dan il-Ftehim lista ta'
kodiċi u termini li jidentifikaw dejta sensittiva li għandha
tiġi ffiltrata. 3.
L-aċċess għal dejta sensittiva, kif
ukoll l-ipproċessar u l-użu tagħha, ikunu permessi
f’ċirkostanzi eċċezzjonali fejn il-ħajja ta’ individwu
tista’ tkun ipperikolata jew indebolita serjament. Tali dejta tista’ tiġi
aċċessata esklussivament bl-użu ta’ proċessi restrittivi
abbażi ta’ każ b’każ bl-approvazzjoni ta’ maniġer anzjan
tad-DHS. 4.
Dejta sensittiva tiġi mħassra b’mod
permanenti mhux aktar tard minn 30 jum mill-aħħar irċevuta
tal-PNR li jinkludi tali dejta mid-DHS. Madankollu, dejta sensittiva tista’
tinżamm għaż-żmien speċifikat f’liġi tal-Istati
Uniti għall-għan ta’ azzjoni speċifika ta’ investigazzjoni,
prosekuzzjoni jew infurzar. Artikolu 7 Deċiżjonijiet Individwali Awtomatizzati L-Istati Uniti ma tiħux
deċiżjonijiet li jipproduċu azzjonijiet negattivi sinifikanti li
jaffettwaw l-interessi legali ta’ individwi abbażi biss ta’ proċessar
u użu awtomatizzat tal-PNR. Artikolu 8 Żamma ta’ Dejta 1.
Id-DHS iżomm il-PNR f’bażi ta' dejta
attiva għal mhux aktar minn ħames snin. Wara l-ewwel sitt xhur ta’
dan il-perjodu, il-PNR jiġi spersonalizzat u protett skont
il-paragrafu 2 ta’ dan l-Artikolu. Sakemm ma jkunx permess b’dan
il-Ftehim, l-aċċess għal din il-bażi ta' dejta attiva jkun
ristrett għal numru limitat ta’ uffiċjali awtorizzati
speċifikament. 2.
Sabiex isseħħ l-ispersonalizzazzjoni,
titneħħa informazzjoni identifikabbli personalment tat-tipi ta' dejta
tal-PNR li ġejjin: (a)
isem/ismijiet; (b)
ismijiet oħra fuq il-PNR; (c)
l-informazzjoni kollha disponibbli dwar kuntatti
(inkluża informazzjoni dwar l-oriġinatur); (d)
Rimarki Ġenerali, inkluż informazzjoni
supplimentari oħra (OSI), informazzjoni ta’ servizz speċjali (SSI), u
talba għal servizz speċjali (SSR); kif ukoll (e)
kwalunkwe informazzjoni APIS miġbura. 3.
Wara dan il-perjodu attiv, il-PNR jiġi
trasferit lejn bażi ta' dejta inattiva għal perjodu ta’ mhux aktar
minn għaxar snin. Din il-bażi ta' dejta inattiva tkun
soġġetta għal kontrolli addizzjonali, inkluż numru aktar
ristrett ta' persunal awtorizzat, kif ukoll livell ogħla ta’ approvazzjoni
superviżorja meħtieġa qabel l-aċċess. F'din
il-bażi ta' dejta inattiva, il-PNR ma jkunx personalizzat mill-ġdid
minbarra b’konnessjoni ma’ operazzjonijiet ta’ infurzar tal-liġi u mbagħad
f'konnessjoni biss ma’ każ, theddida jew riskju identifikabbli.
Fir-rigward tal-għanjiet hekk kif stabbiliti fl-Artikolu 4,
il-paragrafu (1)(b), il-PNR ta' din il-bażi ta' dejta inattiva jista'
jiġi ppersonalizzat mill-ġdid biss għal perjodu ta' mhux aktar
minn ħames snin. 4.
Wara l-perjodu ta’ inattività, id-dejta
miżmuma għandha tiġi totalment anonimizzata billi jitħassru
t-tipi kollha ta-dejta li jistgħu jservu sabiex jidentifikaw
lill-passiġġier li l-PNR ikun jirrelata miegħu mingħajr
il-possibbiltà ta’ personalizzazzjoni mill-ġdid. 5.
Id-dejta li hija relatata ma’ każ jew
investigazzjoni speċifika tista’ tinżamm f'bażi ta' dejta attiva
ta’ PNR sakemm il-każ jew l-investigazzjoni jiġu arkivjati. Dan
il-paragrafu huwa mingħajr ħsara għal rekwiżiti taż-żamma
tad-dejta għall-fajls ta’ investigazzjoni jew prosekuzzjoni individwali. 6.
Il-Partijiet jaqblu li, fil-qafas tal-evalwazzjoni
kif previst fl-Artikolu 23, il-paragrafu 1, il-ħtieġa ta'
perjodu inattiv ta’ 10 snin li matulhom tinżamm id-dejta ser tiġi kkunsidrata. Artikolu 9 Nondiskriminazzjoni L-Istati Uniti jiżguraw li s-salvagwardji
applikabbli għall-ipproċessar u l-użu tal-PNR taħt dan
il-Ftehim japplikaw għall-passiġġieri kollha fuq bażi
ugwali mingħajr diskriminazzjoni illegali. Artikolu 10 Trasparenza 1.
Id-DHS jipprovdi informazzjoni lill-pubbliku li
jivvjaġġa dwar l-użu u l-ipproċessar tal-PNR permezz ta’: (a)
pubblikazzjonijiet fir-Reġistru Federali; (b)
pubblikazzjonijiet fuq il-websajt tiegħu; (c)
avviżi li jistgħu jiġu inkorporati
mit-trasportaturi tal-ajru fil-kuntratti ta' trasport; (d)
rapportar meħtieġ statutorjament
lill-Kungress; kif ukoll (e)
miżuri oħra xierqa li jistgħu
jiżviluppaw. 2.
Id-DHS jippubblika u jipprovdi lill-UE
għall-pubblikazzjoni possibbli l-proċeduri u l-modalitajiet
tiegħu dwar l-aċċess, il-korrezzjoni jew ir-rettifika, u
l-proċeduri ta’ rimedju. 3.
Il-Partijiet jaħdmu mal-industrija
tal-avjazzjoni biex jinkoraġġixxu viżibilità akbar
għall-passiġġieri meta ssir il-prenotazzjoni dwar l-iskop
tal-ġbir, l-ipproċessar u l-użu tal-PNR mid-DHS, u dwar kif
issir talba għall-aċċess, il-korrezzjoni u r-rimedju. Artikolu 11 Aċċess għall-Individwi 1.
Skont id-dispożizzjonijiet tal-Att dwar
il-Libertà tal-Informazzjoni, kull individwu, irrispettivament
min-nazzjonalità, pajjiż ta’ oriġini, jew il-post ta' residenza huwa
intitolat li jitlob il-PNR tiegħu jew tagħha mid-DHS. Id-DHS
jipprovdi b’mod f’waqtu tali PNR soġġett
għad-dispożizzjonijiet tal-paragrafi 2 u 3 ta’ dan l-Artikolu. 2.
L-iżvelar tal-informazzjoni inkluża
fil-PNR jista’ jkun soġġett għal limitazzjonijiet legali
raġjonevoli, applikabbli taħt il-liġi tal-Istati Uniti,
inkluż kull limitazzjoni bħal din li tista’ tkun meħtieġa
biex tkun salvagwardjata informazzjoni sensittiva dwar privatezza protetta,
sigurtà nazzjonali, u infurzar tal-liġi. 3.
Kwalunkwe ċaħda jew restrizzjoni
tal-aċċess tkun stabbilita bil-miktub u pprovduta f'ħin f'waqtu
lill-individwu li jkun talabha. Tali notifika tkun tinkludi l-bażi legali
li fuqha l-informazzjoni ġiet miżmuma u għandha tinforma lill-individwu
dwar l-għażliet disponibbli taħt il-liġi tal-Istati Uniti
biex ifittex rimedju. 4.
Id-DHS ma jiżvelax il-PNR lill-pubbliku,
għajr lill-individwu li l-PNR tiegħu ikun ġie pproċessat u
użat jew lir-rappreżentant tiegħu jew tagħha, jew kif
mitlub mil-liġi tal-Istati Uniti. Artikolu 12 Korrezzjoni jew Rettifika għall-Individwi 1.
Kull individwu, irrispettivament min-nazzjonalità,
il-pajjiż ta’ oriġini, jew il-post ta’ residenza jista’ jitlob
il-korrezzjoni jew ir-rettifika, inkluż il-possibbiltà ta’ tħassir
jew imblukkar, tal-PNR tiegħu jew tagħha mid-DHS skont
il-proċessi deskritti f’dan il-Ftehim. 2.
Id-DHS jinforma, bla dewmien żejjed,
lill-individwu li għamel talba bil-miktub bid-deċiżjoni
tiegħu jekk għandux jikkoreġi jew jirrettifika l-PNR
inkwistjoni. 3.
Kwalunkwe ċaħda jew restrizzjoni ta’ korrezzjoni
jew rettifika titniżżel bil-miktub u tiġi pprovduta f'ħin
f'waqtu lill-individwu li jkun għamel it-talba. Tali notifika tkun
tinkludi l-bażi legali ta’ ċaħda jew restrizzjoni bħal din
u għandha tinforma lill-individwu bl-għażliet disponibbli taħt
il-liġi tal-Istati Uniti biex ifittex rimedju. Artikolu 13 Rimedju għall-Individwi 1.
Kwalunkwe individwu irrispettivament
min-nazzjonalità, il-pajjiż ta' oriġini, jew il-post ta’ residenza
tiegħu li d-dejta personali u l-informazzjoni personali tiegħu
ġiet proċessata u użata b’mod inkonsistenti ma’ dan il-Ftehim
jista’ jfittex rimedju amministrattiv u ġudizzjarju skont il-liġi
tal-Istati Uniti. 2.
Kwalunkwe individwu huwa intitolat li jfittex li
amministrattivament jisfida d-deċiżjonijiet tad-DHS relatati mal-użu
u l-ipproċessar tal-PNR. 3.
Skont id-dispożizzjonijiet tal-Att dwar
il-Proċedura Amministrattiva u liġi applikabbli oħra, kwalunkwe
individwu huwa intitolat għal petizzjoni għal reviżjoni
ġudizzjarja fil-qorti federali tal-Istati Uniti fir-rigward ta’ kwalunkwe
azzjoni tal-aġenzija finali mid-DHS. Barra minn hekk, kwalunkwe individwu
huwa intitolat għal petizzjoni għal reviżjoni ġudizzjarja
skont il-liġi applikabbli u d-dispożizzjonijiet rilevanti ta': (a)
l-Att dwar il-Libertà tal-Informazzjoni; (b)
l-Att dwar il-Frodi u l-Abbuż tal-Kompjuter; (c)
l-Att dwar il-Privatezza tal-Komunikazzjonijiet
Elettroniċi; kif ukoll (d)
dispożizzjonijiet applikabbli oħra
tal-liġi tal-Istati Uniti. 4.
B’mod partikolari, id-DHS jipprovdi lill-individwi
kollha mezz amministrattiv (attwalment il-Programm ta’ Inkjesta u Rimedju
tal-Vjaġġatur DHS (DHS TRIP)) biex isolvi inkjesti relatati
mal-ivvjaġġar inklużi dawk relatati mal-użu tal-PNR. Id-DHS
TRIP jipprovdi proċess ta’ rimedju għall-individwi li jemmnu li
sofrew dewmien jew li ġew ipprojbiti milli jitilgħu abbord ajruplan
kummerċjali peress li ġew identifikati bħala theddida meta dan
ma kienx minnu. Skont l-Att dwar il-Proċedura Amministrattiva u
t-Titolu 49, Kodiċi tal-Istati Uniti, Taqsima 46110, kwalunkwe
tali individwu li jħossu aggravat huwa intitolat għal petizzjoni
għal reviżjoni ġudizzjarja fil-qorti federali tal-Istati Uniti
minn kull azzjoni tal-aġenzija finali mid-DHS fir-rigward ta' dan
it-tħassib. Artikolu 14 Sorveljanza 1.
Il-konformità mas-salvagwardji tal-privatezza f'dan
il-Ftehim tkun soġġetta għal reviżjoni indipendenti u
sorveljanza mill-Uffiċjali dwar il-Privatezza tad-Dipartiment,
bħall-Kap Uffiċjal tal-Privatezza tad-DHS, li: (a)
għandhom rekord ippruvat tal-awtonomija; (b)
jeżerċitaw setgħat effettivi ta’
sorveljanza, investigazzjoni, intervent, u reviżjoni; kif ukoll (c)
għandhom is-setgħa li jirreferu ksur
tal-liġi marbut ma’ dan il-Ftehim għall-prosekuzzjoni jew azzjoni
dixxiplinarja, meta jkun xieraq. B’mod partikolari, jiżguraw li l-ilmenti
relatati ma’ nuqqas ta’ konformità ma’ dan il-Ftehim jiġu rċevuti,
investigati, imwieġba, u rimedjati b’mod xieraq. Dawn l-ilmenti
jistgħu jitressqu minn kwalunkwe individwu, irrispettivament
min-nazzjonalità, il-pajjiż ta’ oriġini, jew il-post ta’ residenza. 2.
Barra minn hekk, l-applikazzjoni ta’ dan il-Ftehim
mill-Istati Uniti tkun soġġetta għal reviżjoni indipendenti
u sorveljanza minn waħda jew aktar mill-entitajiet li ġejjin: (a)
L-Uffiċċju tal-Ispettur Ġenerali
tad-DHS; (b)
L-Uffiċċju tar-Responsabbiltà
Governattiva kif stabbilit mill-Kungress; kif ukoll (c)
il-Kungress tal-Istat Uniti. Sorveljanza bħal din tista’ tkun manifestata
fis-sejbiet u r-rakkomandazzjonijiet ta' rapporti pubbliċi, smigħ
pubbliku, u l-analiżi. Kapitolu iii Modalitajiet ta’ trasferimenti Artikolu 15 Metodu ta’ Trażmissjoni tal-PNR 1.
Għall-iskopijiet ta’ dan il-Ftehim,
it-trasportaturi tal-ajru jkunu mitlubin jittrasferixxu l-PNR lid-DHS
bl-użu tal-metodu “push”, bi tkomplija tal-ħtieġa
għall-preċiżjoni, il-puntwalità u l-kompletezza tal-PNR. 2.
It-trasportaturi tal-ajru jkunu mitlubin
jittrasferixxu l-PNR lid-DHS b’mezzi elettroniċi sikuri b’konformità
mar-rekwiżiti tekniċi tad-DHS. 3.
It-trasportaturi tal-ajru jkunu mitlubin
jittrasferixxu l-PNR lid-DHS skont il-paragrafi 1 u 2 ta’ dan l-Artikolu,
inizjalment 96 siegħa qabel it-tluq tat-titjira skedata u addizzjonalment
jew f’ħin reali jew għal numru fiss ta’ trasferimenti ta’ rutina u
skedati kif speċifikat mid-DHS. 4.
Fi kwalunkwe każ, il-Partijiet jaqblu li
t-trasportaturi tal-ajru kollha jkunu mitlubin jiksbu l-kapaċità teknika
li jużaw il-metodu “push” mhux aktar tard minn 24 xahar wara d-dħul
fis-seħħ ta’ dan il-Ftehim. 5.
Id-DHS jista’, fejn meħtieġ, abbażi
ta’ każ b’każ, jirrikjedi li trasportatur tal-ajru jipprovdi l-PNR
bejn jew wara t-trasferimenti regolari deskritti fil-paragrafu 3. Kull
fejn it-trasportaturi tal-ajru ma jkunux jistgħu, għal
raġunijiet tekniċi, jirrispondu fil-ħin għal talbiet li
jsiru skont dan l-Artikolu u f'konformità mal-istandards tad-DHS jew,
f’ċirkostanzi eċċezzjonali sabiex jirreaġġixxi
għal theddida speċifika, urġenti, u serja, id-DHS jista'
jirrikjedi li t-trasportaturi tal-ajru jipprovdu aċċess b'mod
ieħor. Artikolu 16 Kondiviżjoni domestika 1.
Id-DHS jista’ jaqsam il-PNR biss skont valutazzjoni
bir-reqqa tas-salvagwardji li ġejjin: (a)
Esklussivament b’mod konsistenti mal-Artikolu 4; (b)
Ma’ awtoritajiet governattivi domestiċi biss
meta jaġixxu fl-avvanz tal-użi msemmija fl-Artikolu 4; (c)
L-awtoritajiet li jirċievu jipprovdu lill-PNR
salvagwardji ekwivalenti jew paragunabbli kif stabbilit f'dan il-Ftehim; kif ukoll (d)
Il-PNR jiġi maqsum ma' ħaddieħor
biss b’appoġġ għal dawk il-każijiet taħt
eżaminazzjoni jew investigazzjoni u skont fehim bil-miktub u l-liġi
tal-Istati Uniti dwar l-iskambju ta’ informazzjoni bejn awtoritajiet
governattivi domestiċi. 2.
Waqt it-trasferiment tal-informazzjoni analitika
miksuba mill-PNR taħt dan il-Ftehim, jiġu rispettati s-salvagwardji
stabbiliti fil-paragrafu 1 ta’ dan l-Artikolu. Artikolu 17 Trasferiment 'il Quddiem 1.
L-Istati Uniti tista’ tittrasferixxi l-PNR
lill-awtoritajiet governattivi kompetenti ta’ pajjiżi terzi biss taħt
termini konsistenti ma’ dan il-Ftehim u biss wara li tiżgura li l-użu
maħsub tar-riċevitur huwa konsistenti ma’ dawn it-termini. 2.
Minbarra ċirkostanzi ta’ emerġenza,
kwalunkwe trasferiment tad-dejta bħal dan iseħħ skont fehim
espliċitu li jinkorpora protezzjonijiet tal-privatezza tad-dejta
komparabbli ma’ dawk applikati għall-PNR mid-DHS kif stabbilit f'dan
il-Ftehim. 3.
Il-PNR jinqasam biss b'appoġġ lejn dawk
il-każijiet li huma taħt eżaminazzjoni jew investigazzjoni. 4.
Meta d-DHS ikun konxju li jkun ġie trasferit
il-PNR ta’ ċittadin jew resident ta’ Stat Membru tal-UE, l-awtoritajiet
kompetenti tal-Istat Membru kkonċernat jiġu informati dwar
il-kwistjoni mal-ewwel opportunità xierqa, kmieni kemm jista' jkun. 5.
Waqt it-trasferiment ta’ informazzjoni analitika
miksuba mill-PNR taħt dan il-Ftehim, jiġu rispettati s-salvagwardji
stabbiliti fil-paragrafi 1-4 ta’ dan l-Artikolu. Artikolu 18 Pulizija, Infurzar tal-Liġi u Kooperazzjoni Ġudizzjarja 1.
B’konformità ma’ infurzar tal-liġi
eżistenti jew ftehimiet oħra ta’ qsim ta’ informazzjoni jew
arranġamenti bejn l-Istati Uniti u kull Stat Membru tal-UE jew l-Europol u
l-Eurojust, id-DHS jipprovdi lill-pulizija kompetenti, awtoritajiet
tal-infurzar tal-liġi speċjalizzati jew awtoritajiet ġudizzjarji
oħra tal-Istati Membri u l-Europol u l-Eurojust fil-kompetenza tal-mandati
rispettivi tagħhom, hekk kif ikun prattikabbli, rilevanti u xieraq,
informazzjoni analitika miksuba mill-PNR f'dawk il-każijiet taħt eżaminazzjoni
jew investigazzjoni sabiex jipprevjeni jikxef jinvestiga jew iħarrek
fl-Unjoni Ewropea l-kriminalità transnazzjonali kif deskritta
fl-Artikolu 4, il-paragrafu 1(b) jew imġiba jew attivitajiet
relatati ma’ reati terroristiċi. 2.
Awtorità tal-pulizija jew ġudizzjarja ta’ Stat
Membru tal-UE, jew l-Europol jew l-Eurojust, jistgħu jitolbu, fil-mandat
tagħhom, aċċess għall-PNR jew informazzjoni analitika
rilevanti miksuba mill-PNR li hija neċessarja f'każ speċifiku
għall-prevenzjoni, il-kxif, l-investigazzjoni, jew il-prosekuzzjoni
fl-Unjoni Ewropea ta’ reat terroristiku jew kriminalità transnazzjonali kif
deskritta fl-Artikolu 4, il-paragrafu 1(b). Id-DHS, soġġett
għall-ftehimiet u l-arranġamenti indikati fil-paragrafu 1 ta'
dan l-Artikolu, jipprovdi tali informazzjoni. 3.
Skont il-paragrafi 1 u 2 ta’ dan l-Artikolu, id-DHS
jaqsam il-PNR biss wara evalwazzjoni bir-reqqa tas-salvagwardji li ġejjin: (a)
Esklussivament
b’mod konsistenti mal-Artikolu 4; (b)
Biss meta jaġixxi bl-iskop tal-użi
msemmija fl-Artikolu 4; kif ukoll (c)
L-awtoritajiet li jirċievu jipprovdu lill-PNR
salvagwardji ekwivalenti jew paragunabbli kif stabbilit f'dan il-Ftehim. 4.
Waqt it-trasferiment ta’ informazzjoni analitika
miksuba mill-PNR taħt dan il-Ftehim, jiġu rispettati s-salvagwardji
stabbiliti fil-paragrafi 1-3 ta’ dan l-Artikolu. Kapitolu IV Dispożizzjonijiet implimentattivi
u finali Artikolu 19 Adegwatezza Fil-konsiderazzjoni ta’ dan il-Ftehim u
l-implimentazzjoni tiegħu, id-DHS jitqies li jipprovdi, fis-sens
tal-liġi tal-protezzjoni tad-dejta tal-UE, livell adegwat ta’ protezzjoni
għall-ipproċessar u l-użu tal-PNR. F’dan ir-rigward,
trasportaturi li pprovdew il-PNR lid-DHS f’konformità ma’ dan il-Ftehim
jitqiesu li jkunu kkonformaw mar-rekwiżiti legali applikabbli fl-UE
relatati mat-trasferiment ta’ tali dejta mill-UE lejn l-Istati Uniti. Artikolu 20 Reċiproċità 1.
Il-Partijiet jippromwovu b’mod attiv
il-kooperazzjoni tat-trasportaturi fil-ġurisdizzjonijiet rispettivi
tagħhom ma’ kwalunkwe sistema operattiva tal-PNR jew kif jistgħu
jiġu adottati fil-ġurisdizzjonijiet tal-oħrajn, konsistenti ma’
dan il-Ftehim. 2.
Minħabba li t-twaqqif ta’ sistema tal-PNR
tal-UE jista’ jkollu effett materjali fuq l-obbligi tal-Partijiet taħt dan
il-Ftehim, jekk u meta sistema tal-PNR tal-UE tiġi adottata, il-Partijiet
jikkonsultaw biex jiddeterminaw jekk dan il-Ftehim jeħtieġx li
jiġi aġġustat kif xieraq biex jiżgura
r-reċiproċità sħiħa. Tali konsultazzjonijiet jeżaminaw
b'mod partikolari jekk xi sistema futura tal-PNR tal-UE tapplikax standards ta’
protezzjoni tad-dejta inqas stretti minn dawk previsti f'dan il-Ftehim, u jekk,
għaldaqstant, għandux jiġi emendat. Artikolu 21 Implimentazzjoni u Non-Deroga 1.
Dan il-Ftehim ma joħloqx jew jagħti,
taħt il-liġi tal-Istati Uniti, xi dritt jew benefiċċju lil
kwalunkwe persuna jew entità, privata jew pubblika. Kull parti tiżgura li
d-dispożizzjonijiet ta’ dan il-Ftehim jiġu implimentati kif xieraq. 2.
Xejn f'dan il-Ftehim ma jidderoga mill-obbligi
eżistenti tal-Istati Uniti u l-Istati Membri, inkluż taħt
il-Ftehim dwar l-Assistenza Legali Reċiproka bejn l-Unjoni Ewropea u
l-Istati Uniti tal-25 ta’ Ġunju 2003 u l-istrumenti
bilaterali relatati ta’ għajnuna legali reċiproka bejn l-Istati Uniti
u Istati Membri. Artikolu 22 Notifika ta’ Bidliet fil-Liġi Domestika Il-Partijiet javżaw lil xulxin dwar
l-approvazzjoni ta’ kwalunkwe leġiżlazzjoni li materjalment taffettwa
l-implimentazzjoni ta’ dan il-Ftehim. Artikolu 23 Reviżjoni u Evalwazzjoni 1.
Il-Partijiet jirrevedu flimkien l-implimentazzjoni
ta’ dan il-Ftehim sena wara d-dħul fis-seħħ tiegħu u b'mod
regolari wara dan kif maqbul b’mod konġunt. Barra minn hekk, il-Partijiet
jevalwaw dan il-Ftehim erba’ snin wara d-dħul tiegħu
fis-seħħ. 2. Il-Partijiet jiddeterminaw flimkien minn qabel il-modalitajiet u
t-termini tar-reviżjoni konġunta u għandhom jikkomunikaw lil
xulxin il-kompożizzjoni tat-timijiet rispettivi tagħhom.
Għall-fini tar-reviżjoni konġunta, l-Unjoni Ewropea tkun
rappreżentata mill-Kummissjoni Ewropea, u l-Istati Uniti tkun
rappreżentata mid-DHS. It-timijiet jistgħu jinkludu esperti xierqa
dwar il-protezzjoni tad-dejta u l-infurzar tal-liġi. Soġġett
għal-liġijiet applikabbli, il-parteċipanti fir-reviżjoni
konġunta jkunu mitluba jkollhom il-permessi xierqa tas-sigurtà u
jirrispettaw il-kunfidenzjalità tad-diskussjonijiet. Għall-iskopijiet
tar-reviżjoni konġunta, id-DHS jiżgura aċċess xieraq
għad-dokumentazzjoni, is-sistemi, u l-persunal rilevanti. 3.
Wara r-reviżjoni konġunta, il-Kummissjoni
Ewropea tippreżenta rapport lill-Parlament Ewropew u lill-Kunsill
tal-Unjoni Ewropea. L-Istati Uniti
jingħataw opportunità li jipprovdu kummenti bil-miktub, li jkunu
mehmuża mar-rapport. Artikolu 24 Riżoluzzjoni tat-Tilwim u Sospensjoni tal-Ftehim 1.
Kwalunkwe tilwima li tirriżulta
mill-implimentazzjoni ta’ dan il-Ftehim, u kwalunkwe kwistjoni marbuta
miegħu, jagħtu lok għal konsultazzjonijiet bejn il-Partijiet,
bil-ħsieb li tintlaħaq riżoluzzjoni reċiprokament maqbula,
inkluż billi tipprovdi opportunità għal kull Parti li tirrimedja fi
żmien raġjonevoli. 2.
Fil-każ li l-konsultazzjonijiet ma
jirriżultawx f’riżoluzzjoni tat-tilwima, kwalunkwe Parti tista’
tissospendi l-applikazzjoni ta’ dan il-Ftehim b’notifika bil-miktub b’mezzi
diplomatiċi, b’sospensjoni bħal din tidħol fis-seħħ 90
jum mid-data ta’ tali notifika, sakemm il-Partijiet ma jaqblux mod ieħor għal
data effettiva differenti. 3.
Minkejja kull sospensjoni ta’ dan il-Ftehim, il-PNR
kollha miksuba mid-DHS skont dan il-Ftehim qabel is-sospensjoni tiegħu
jkomplu jiġu pproċessati u użati skont is-salvagwardji ta’ dan
il-Ftehim. Artikolu 25 Terminazzjoni 1.
Kull Parti tista’ tittermina dan il-Ftehim fi
kwalunkwe żmien b’notifika bil-miktub b’mezzi diplomatiċi. 2.
It-terminazzjoni tidħol fis-seħħ 120
jum mid-data ta’ tali notifika, sakemm il-Partijiet ma jaqblux mod ieħor
għal data effettiva differenti. 3.
Qabel kull terminazzjoni ta’ dan il-Ftehim,
il-Partijiet jikkonsultaw lil xulxin b’mod li jippermetti żmien
biżżejjed biex tintlaħaq soluzzjoni maqbula reċiprokament. 4.
Minkejja kull terminazzjoni ta’ dan il-Ftehim,
il-PNR kollha miksuba mid-DHS skont dan il-Ftehim qabel it-terminazzjoni
tiegħu jkomplu jiġu pproċessati u użati skont
is-salvagwardji ta’ dan il-Ftehim. Artikolu 26 Tul ta’ żmien 1.
Soġġett għall-Artikolu 25, dan
il-Ftehim jibqa’ fis-seħħ għal perjodu ta’ seba’ snin mid-data
tad-dħul fis-seħħ tiegħu. 2.
Malli jiskadi l-perjodu stabbilit fil-paragrafu 1
ta’ dan l-Artikolu, kif ukoll kwalunkwe perjodu sussegwenti ta’ tiġdid
taħt dan il-paragrafu, il-Ftehim jiġi mġedded għal perjodu
sussegwenti ta’ seba’ snin sakemm waħda mill-Partijiet ma tinnotifikax
lill-oħra bil-miktub b’mezzi diplomatiċi, mill-inqas tnax-il xahar
bil-quddiem, bl-intenzjoni tagħha li ma ġġeddidx il-Ftehim. 3.
Minkejja l-iskadenza ta’ dan il-Ftehim, il-PNR
kollha miksuba mid-DHS taħt it-termini ta’ dan il-Ftehim ikomplu jiġu
proċessati u użati skont is-salvagwardji ta’ dan il-Ftehim. B'mod
simili, il-PNR kollha miskuba mid-DHS taħt it-termini tal-Ftehim Bejn
l-Istati Uniti tal-Amerika u l-Unjoni Ewropea dwar l-Ipproċessar u
t-Trasferiment tad-Dejta tar-Reġistru tal-Ismijiet
tal-Passiġġieri (PNR) minn Trasportaturi tal-Ajru lid-Dipartiment
tas-Sigurtà Interna (DHS) tal-Istati Uniti, ifirmat fi Brussell u f'Washington
fit-23 u s-26 ta' Lulju, 2007, tkompli tiġi
pproċessata u użata skont is-salvagwardji ta' dak il-Ftehim. Artikolu 27 Dispożizzjonijiet finali 1.
Dan il-Ftehim jidħol fis-seħħ
fl-ewwel jum tax-xahar wara d-data li fiha l-Partijiet ikunu skambjaw
in-notifiki li jindikaw illi jkunu temmew il-proċeduri interni
tagħhom għal dan l-iskop. 2.
Mill-jum tad-dħul fis-seħħ
tiegħu, dan il-Ftehim jieħu post il-Ftehim tat-23 u s-26 ta' Lulju 2007. 3.
Dan il-Ftehim ser japplika biss
għat-territorju tad-Danimarka, tar-Renju Unit jew tal-Irlanda jekk
il-Kummissjoni Ewropea tinnotifika lill-Istati Uniti bil-miktub li d-Danimarka,
ir-Renju Unit jew l-Irlanda jkunu għażlu li jkunu marbuta b’dan
il-Ftehim. 4.
Jekk, qabel id-dħul fis-seħħ ta’ dan
il-Ftehim, il-Kummissjoni Ewropea tinnotifika lill-Istati Uniti li jkun ser
japplika għat-territorju tad-Danimarka, tar-Renju Unit jew tal-Irlanda,
dan il-Ftehim japplika għat-territorju ta’ tali Stat fl-istess jum bħal
dak tal-Istati Membri l-oħra tal-UE li huma marbuta b’dan il-Ftehim. 5.
Jekk, wara d-dħul fis-seħħ ta’ dan
il-Ftehim, il-Kummissjoni Ewropea tinnotifika lill-Istati Uniti li jkun se
japplika għat-territorju tad-Danimarka, tar-Renju Unit jew tal-Irlanda, dan
il-Ftehim japplika għat-territorju ta’ tali Stat fl-ewwel jum wara
l-irċevuta tan-notifika mill-Istati Uniti. Magħmul fil-... illum ... jum ta’...
2011, f'żewġ oriġinali. Skont l-liġi tal-UE, l-UE tikteb dan
il-Ftehim ukoll bil-Bulgaru, biċ-Ċek, bid-Daniż,
bl-Olandiż, bl-Estonjan, bil-Finlandiż, bil-Franċiż,
bil-Ġermaniż, bil-Grieg, bl-Ungeriż, bit-Taljan, bil-Latvjan,
bil-Litwan, bil-Malti, bil-Pollakk, bil-Portugiż, bir-Rumen, bis-Slovakk,
bis-Sloven, bl-Ispanjol u bl-Isvediż. ANNESS Tipi
ta’ Dejta tal-PNR 1.
Kodiċi tal-lokalizzatur
tar-reġistrazzjoni tal-PNR 2.
Data tal-prenotazzjoni/ħruġ tal-biljett 3.
Data(i) tal-ivvjaġġar previst 4.
Isem(Ismijiet) 5.
Informazzjoni disponibbli għal dawk li jtiru
frekwentament u l-benefiċċji (jiġifieri, biljetti b’xejn, titjib
tas-servizz, eċċ.) 6.
Ismijiet oħra fuq il-PNR, inkluż in-numru
ta’ vjaġġaturi fuq il-PNR 7.
L-informazzjoni kollha disponibbli dwar kuntatti
(inkluż informazzjoni dwar l-oriġinatur) 8.
L-informazzjoni kollha disponibbli dwar
ħlas/ħruġ ta’ kontijiet (mhux inklużi dettalji oħra
ta’ tranżazzjonijiet marbuta ma’ karta tal-kreditu jew kont u mhux marbuta
mat-tranżazzjoni tal-ivvjaġġar) 9.
Itinerarju tal-ivvjaġġar għal PNR
speċifiku 10.
Aġenzija tal-ivvjaġġar/aġent
tal-ivvjaġġar 11.
Informazzjoni dwar qsim ta’ kodiċi 12.
Informazzjoni maqsuma/diviża 13.
Stat tal-ivvjaġġar
tal-passiġġier (inklużi konfermi u stat ta’ reġistrazzjoni) 14.
Informazzjoni dwar il-biljett, inkluż in-numru
tal-biljett, biljetti ta’ mingħajr ritorn u Kwotazzjoni Awtomatizzata
tal-Prezz tal-Biljett 15.
Informazzjoni dwar il-bagalji kollha 16.
Informazzjoni dwar is-sit, inkluż in-numru
tas-sit 17.
Rimarki ġenerali inkluż informazzjoni
OSI, SSI u SSR 18.
Kull informazzjoni oħra miġbura dwar
is-Sistema ta' Informazzjoni Avvanzata dwar il-Passiġġieri (APIS) 19.
Il-bidliet storiċi kollha għall-PNR
elenkati fin-numri minn1 sa 18 ANNESS II Id-Dikjarazzjoni
mill-UE dwar il-Ftehim dwar l-użu u t-trasferiment tar-Reġistru
tal-Ismijiet tal-Passiġġieri lid-Dipartiment tas-Sigurtà Interna
tal-Istati Uniti ("Il-Ftehim") rigward l-obbligi tagħha skont
l-Artikoli 17 u 23 tal-Ftehim. 1.
Fil-kuntest tal-mekkaniżmu ta' reviżjoni
u evalwazzjoni konġunti stabbilit fl-Artikolu 23 tal-Ftehim, u
mingħajr preġudizzjoni għal kwistjonijiet oħra li
jistgħu jitqajmu matul it-tħaddim ta' dan il-mekkaniżmu, fejn
xieraq l-Unjoni Ewropea se titlob informazzjoni mingħand l-Istati Uniti
dwar l-iskambju ta' informazzjoni, fir-rigward tat-trasferimenti ta' dejta
tal-PNR ta' ċittadini u residenti tal-Unjoni Ewropea, mal-awtoritajiet ta'
pajjiżi terzi, kif stipulat fl-Artikolu 17 tal-Ftehim; 2.
Fil-kuntest tal-mekkaniżmu ta' konsultazzjoni
u reviżjoni stabbilit fl-Artikolu 23 tal-Ftehim, l-UE se titlob
mingħand l-Istati Uniti l-informazzjoni kollha xierqa dwar
l-implimentazzjoni tal-kundizzjonijiet li jirregolaw dawk it-trasferimenti
skont id-dispożizzjonijiet tal-Artikolu 17; 3.
L-UE, fil-kuntest tal-mekkaniżmu ta'
konsultazzjoni u reviżjoni stabbilit fl-Artikolu 23 tal-Ftehim, se
tagħti attenzjoni partikolari għar-rispett tas-salvagwardji kollha
għall-implimentazzjoni tad-dispożizzjonijiet tal-Artikolu 17(2),
sabiex tkun sodisfatta li pajjiżi terzi li jirċievu tali dejta jkunu
qablu li jagħtu lid-dejta livell ta' ħarsien tal-privatezza
kumparabbli ma' dak ipprovdut għall-PNR mid-DHS skont il-Ftehim. [1] ĠU L204/16, 4.8.2007 [2] P7_TA-(2010)0144, 5.5.2010 [3] COM (2010) 492.