52011DC0597

2010/0101 (COD)

KOMUNIKAZZJONI MILL-KUMMISSJONI LILL-PARLAMENT EWROPEW skont l-Artikolu 294(6) tat-Trattat dwar il-Funzjonament tal-Unjoni Ewropea dwar

il-pożizzjoni tal-Kunsill dwar l-adozzjoni ta’ Deċiżjoni tal-Parlament Ewropew u tal-Kunsill li tagħti garanzija tal-UE lill-Bank Ewropew tal-Investiment f’każ ta’ telf minn self u garanziji għal self għal proġetti barra mill-Unjoni Ewropea u li tħassar id-Deċiżjoni Nru 633/2009/KE

1.           Sfond

Id-data tat-trażmissjoni tal-proposta lill-Parlament Ewropew u lill-Kunsill (dokument COM((2010)174) finali – 2010/101 COD): || Il-21 ta’ April 2010

Id-data tal-opinjoni tal-Kumitat Ekonomiku u Soċjali Ewropew: || Mhux applikabbli

Id-data tal-pożizzjoni tal-Parlament Ewropew, l-ewwel qari: || Is-17 ta' Frar 2011

Id-data tat-trażmissjoni tal-proposta emendata: || Mhux applikabbli

Id-data tal-adozzjoni tal-pożizzjoni tal-Kunsill: || L-20 ta’ Settembru 2011

2.           L-għan tal-proposta mill-Kummissjoni

Id-Deċiżjoni Nru 633/2009/KE tal-Parlament Ewropew u tal-Kunsill tat-13 ta’ Lulju 2009 tagħti garanzija tal-UE lill-Bank Ewropew tal-Investiment (BEI) f’każ telf minn self u garanziji għal self għal proġetti barra mill-UE sabiex tkabbar il-kontribuzzjoni tal-BEI lejn it-twettiq tal-għanijiet ta’ politika tal-UE permezz tal-finanzjament ta’ proġetti.

Il-proposta ppreżentata mill-Kummissjoni għandha l-għan li temenda d-Deċiżjoni 633/2009/KE wara reviżjoni ta’ nofs it-term tal-applikazzjoni tal-mandat estern tal-BEI, kif stabbilit mid-Deċiżjoni 633/2009/KE.

3.           Kummenti dwar il-pożizzjoni tal-Kunsill

3.1       Kummenti ġenerali dwar il-pożizzjoni tal-Kunsill fl-ewwel qari

Il-Kummissjoni tista' taċċetta bis-sħiħ il-pożizzjoni tal-Kunsill li hija r-riżultat ta’ negozjati kostruttivi bejn it-tliet istituzzjonijiet. Din taqbel mal-għanijiet essenzjali u l-approċċ bażiku tal-proposta inizjali tal-Kummissjoni.

3.2       Ftehim fl-istadju tal-Pożizzjoni tal-Kunsill

Il-pożizzjoni tal-Kunsill hija r-riżultat ta' negozjati interistituzzjonali intensivi li saru wara l-adozzjoni mill-Parlament Ewropew tal-pożizzjoni tiegħu fl-ewwel qari fis-17 ta' Frar 2011.

Wara n-negozjati bejn it-tliet partijiet, fis-27 ta' Ġunju 2011, il-President tal-Kumitat BUDG tal-Parlament Ewropew, is-Sur Alain Lamassoure, bagħat ittra lill-Presidenza Ungeriża li tikkonferma li jekk, bħala l-pożizzjoni tiegħu fl-ewwel qari, il-Kunsill jadotta t-test approvat mill-ECOFIN (suġġett għall-verifika lingwistika-legali), hu se jirrakkomanda lill-Kumitat BUDG u mbagħad lill-Parlament kollu fis-sessjoni plenarja, li l-pożizzjoni tal-Kunsill tiġi aċċettata mingħajr emendi fit-tieni qari tal-Parlament. Il-Kunsill Affarijiet Ġenerali laħaq ftehim politiku fuq din il-bażi fit-18 ta' Lulju 2011.

Il-punti ewlenin li ġew innegozjati u li ntlaħaq ftehim dwarhom mit-tliet istituzzjonijiet huma dawn li ġejjin:

a)         L-ammont tal-limiti massimi reġjonali:

– Żieda ta’ EUR 1 biljun tal-limitu massimu għar-reġjun tal-Viċinat tan-Nofsinhar. Żieda ta’ 4 % tal-limiti massimi reġjonali u subreġjonali l-oħra kollha tal-mandat ġenerali; iż-żieda ġenerali tkun ta’ madwar EUR 1.7 biljun (li jiżdiedu mal-EUR 2 biljuni addizzjonali tal-mandat għat-tibdil fil-klima).

– Iż-żidiet imsemmija hawn fuq ikunu mmarkati bħala żidiet ta’ natura temporanja u b’kundizzjonalità mhux stretta (żidiet mogħtija lil pajjiżi li għaddejjin minn riforma politika kif ivvalutat mill-Kummissjoni bl-involviment tal-SEAE (Servizz Ewropew għall-Azzjoni Esterna)).

– F’dak li jirrigwarda l-flessibbiltà, il-korpi ta’ tmexxija tal-BEI jistgħu jiddeċiedu li jallokaw mill-ġdid ammont li jasal sa 10 % tal-limiti massimi reġjonali tal-mandat ġenerali fir-reġjuni u bejniethom (qabel din kienet biss għal bejn ir-reġjuni).

b)         L-aspetti ta’ żvilupp:

Ġew introdotti xi emendi fuq talba tal-Parlament Ewropew li jiffukaw fuq il-ħtieġa tal-BEI li jirrapporta u jivvaluta aħjar l-impatt tal-attivitajiet tiegħu fuq l-iżvilupp kif ukoll l-impatt soċjali, ambjentali u l-impatt fuq id-drittijiet tal-bniedem (pereż. billi jiġu definiti indikaturi tal-prestazzjoni u billi jsir monitoraġġ profond ta’ dawk l-aspetti matul iċ-ċiklu tal-ħajja ta’ proġett).

It-test ġie kkjarifikat aktar biex jirrifletti l-fatt li l-appoġġ tal-BEI lejn it-tnaqqis tal-faqar u l-kisba tal-Għanijet ta' Żvilupp tal-Millenju jkun fil-biċċa l-kbira indirett billi jitrawmu t-tkabbir inklussiv u l-iżvilupp ekonomiku u soċjali sostenibbli permezz tal-finanzjament tal-operazzjonijiet skont l-għanijiet ġenerali stipulati fid-Deċiżjoni.

c)         L-eliġibbiltà tal-pajjiżi:

Wara żviluppi politiċi riċenti, il-Bjelorussja se tkun dikjarata bħala mhux eliġibbli (filwaqt li se tibqa' 'potenzjalment' eliġibbli).

Il-Kummissjoni se tingħata s-setgħa tattiva l-mandat għall-pajjiżi potenzjalment eliġibbli kif ukoll biex tiddeattiva/tissospendi l-mandat permezz ta' atti delegati (skont id-Deċiżjoni preċedenti, dan kien jirrikjedi proċedura leġiżlattiva ordinarja). Dan se jippermetti lill-Kummissjoni biex tattiva/tissospendi l-mandat aktar malajr f’ċerti pajjiżi jekk jinbidlu ċ-ċirkostanzi politiċi.

Mill-aspett tekniku, ġew stipulati żewġ listi fl-Annessi għad-Deċiżjoni: il-lista tar-reġjuni u l-pajjiżi potenzjalment eliġibbli kollha u l-lista tar-reġjuni u l-pajjiżi li huma fil-fatt eliġibbli (it-tieni lista fiha biss pajjiżi mill-ewwel lista). Il-Kummissjoni kieku jkollha s-setgħa biex timmodifika t-tieni lista permezz ta’ atti delegati.

d)         Il-Pjattaforma tal-UE dwar il-Kooperazzjoni u l-Iżvilupp:

Kien hemm qbil dwar il-fatt li l-Kummissjoni se tistabbilixxi u tippresjedi Grupp ta’ Esperti (GoE) biex jistudja l-kunċett ta' Pjattaforma tal-UE għall-Kooperazzjoni u l-Iżvilupp. Il-GoE se jkun magħmul mill-Kummissjoni, l-SEAE, l-Istati Membri u l-BEI. Se jiġu kkonsultati istituzzjonijiet finanzjarji oħra iżda dawn mhux se jkunu membri permanenti tal-GoE.

e)         Il-qafas ta’ politika reġjonali:

Il-premessi (15), (16), (17), (18), (19) u (20) tal-proposta tal-Kummissjoni tpoġġew fl-Anness IV il-ġdid “qafas ta’ politika reġjonali”, wara li sar l-abbozzar mill-ġdid ix-xieraq.

4.           Konklużjoni

Il-Kummissjoni ssostni b'mod sħiħ ir-riżultati tan-negozjati interistituzzjonali u għalhekk tista' taċċetta l-pożizzjoni tal-Kunsill fl-ewwel qari.