This document is an excerpt from the EUR-Lex website
Document 52010DC0128
Communication from the Commission to the Council, the European Parliament, the European Economic and Social Committee and the Committee of the Regions The EU Role in Global Health SEC(2010)380 SEC(2010)381 SEC(2010)382
Komunikazzjoni mill-Kummissjoni lill-Kunsill, il-Parlament Ewropew, il-Kumitat Ekonomiku u Soċjali Ewropew u l-Kumitat tar-Reġjuni - Ir-Rwol tal-UE fis-Saħħa Globali SEG(2010)380 SEG(2010)381 SEG(2010)382
Komunikazzjoni mill-Kummissjoni lill-Kunsill, il-Parlament Ewropew, il-Kumitat Ekonomiku u Soċjali Ewropew u l-Kumitat tar-Reġjuni - Ir-Rwol tal-UE fis-Saħħa Globali SEG(2010)380 SEG(2010)381 SEG(2010)382
/* KUMM/2010/0128 finali */
[pic] | IL-KUMMISSJONI EWROPEA | Brussel 31.3.2010 KUMM(2010)128 finali KOMUNIKAZZJONI MILL-KUMMISSJONI LILL-KUNSILL, IL-PARLAMENT EWROPEW, IL-KUMITAT EKONOMIKU U SOĊJALI EWROPEW U L-KUMITAT TAR-REĠJUNI Ir-Rwol tal-UE fis-Saħħa Globali SEG(2010)380 SEG(2010)381 SEG(2010)382 KOMUNIKAZZJONI MILL-KUMMISSJONI LILL-KUNSILL, IL-PARLAMENT EWROPEW, IL-KUMITAT EKONOMIKU U SOĊJALI EWROPEW U L-KUMITAT TAR-REĠJUNI Ir-Rwol tal-UE fis-Saħħa Globali L-ISFIDA TAS-SAħħA GLOBALI Is-saħħa globali huwa terminu li m'għandux tifsira waħda. Dan jolqot it-titjib dinji tas-saħħa, it-tnaqqis tad-differenzi, u l-protezzjoni kontra t-theddid tas-saħħa globali. Sabiex tiġi indirizzata s-saħħa globali jeħtieġ li jkun hemm koerenza tal-politiki u l-azzjonijiet interni u esterni kollha bbażati fuq prinċipji miftiehma. It-Trattat tal-Unjoni Ewropea jistipula li għandu jkun żgurat livell għoli ta' protezzjoni tas-saħħa fid-definizzjoni u l-implimentazzjoni tal-politiki u l-attivitajiet kollha tal-Unjoni. Il-Karta tad-Drittijiet Fundamentali tistipula wkoll li kulħadd għandu d-dritt ta' aċċess għal kura tas-saħħa preventiva u d-dritt li jgawdi minn kura medika skont il-kondizzjonijiet stabbiliti mil-liġijiet u l-prattiki nazzjonali[1]. Żieda fil-koerenza bejn il-politiki interni u esterni rilevanti se ssaħħaħ l-UE bħala attur globali. Il-mudell soċjali tal-UE, in-normi sodi ta' sigurtà tagħha, il-kummerċ globali tagħha u l-pożizzjoni tal-għajnuna għall-iżvilupp jippermettulha li jkollha rwol ewlieni fit-titjib tas-saħħa globali. Is-saħħa hija marbuta ma' fatturi soċjali, ekonomiċi u ambjentali li dejjem qed ikunu iktar influwenzati mill-globalizzazzjoni. B'mod ġenerali, it-titjib fis-saħħa jiddependi wkoll fuq ġustizzja soċjali akbar. Dan il-fatt qed jiġi iktar ipprovat mill-effett tal-kriżi finanzjarja u tal-prezzijiet tal-ikel fuq il-foqra. Ir-Rapport dwar id-Determinanti Soċjali tal-2008 tad-WHO jipprovdi evidenza li l-progress jeħtieġ tibdil fil-bilanċi ta' qawwa eżistenti – ta' natura politika, ekonomika, soċjali u bbażat fuq is-sess. Matul l-aħħar seklu l-medja tal-istennija tal-ħajja rduppjat, minn 30 għal 64 sena. Min-naħa waħda, żdid l-aċċess għall-prevenzjoni, it-trattament u l-kura . Min-naħa l-oħra, żdiedu d-differenzi bejn is-sinjuri u l-foqra fil-pajjiżi u bejn pajjiż u ieħor. Iż-żieda fil-popolazzjoni, l-urbanizzazzjoni, ix-xjuħija, stili ta' ħajja ħżiena għas-saħħa, degradazzjoni ambjentali, aċċess baxx għall-ilma sigur, servizzi ta' ikel u ta' saħħa, flimkien ma' differenzi soċjali u ekonomiċi jeħtieġu azzjoni multisettorjali u globali. Għalhekk, il-politiki tas-saħħa pubblika jeħtieġu li jmorri lil hinn mil-livell nazzjonali u jeħtieġu istituzzjonijiet globali b'saħħithom u sforzi koordindati. Governanza tas-saħħa globali u oqsfa tal-politika internazzjonali L-Assemblea Dinjija tas-Saħħa (WHA) għandha l-awtorità li tadotta riżoluzzjonijiet u regolamenti internazzjonali vinkolanti. Il-Konvenzjoni Qafas dwar il-Kontroll tat-Tabakk[2] huwa l-ewwel trattat internazzjonali dwar is-saħħa. Iktar riċenti, id-WHA adottat ir-Regolamenti Internazzjonali dwar is-Saħħa li jipprovdu qafas għall-ġestjoni kkoordinata tal-emerġenzi tas-saħħa pubblika. Madankollu, il-biċċa l-kbira tar-riżoluzzjonijiet tad-WHA mhumiex vinkolanti u l-konformità tiddependi fuq il-kapaċitajiet nazzjonali u r-rieda politika. It-tliet Għanijiet għall-Iżvilupp tas-saħħa tal-Millenju (MDG 4, 5 u 6) tejjbu l-isforzi regolatorji u finanzjarji tal-Komunità internazzjonali sabiex jitjiebu r-riżultati tas-saħħa. L-Għajnuna diretta għas-saħħa żdiedet minn EUR 4 biljuni fl-1990 għal iktar minn EUR 16 biljun illum. Donaturi emerġenti u kooperazzjoni min-Nofsinhar għan-Nofsinhar qed ikollhom rwol li dejjem qed isir importanti. Aħna għandna stejjer tajbin x'nirrakuntaw u eżempji tajbin li nistgħu nibnu fuqhom. Madankollu, il-progress lejn l-MDGs tas-saħħa huwa irregolari u fil-biċċa l-kbira għadu lura fil-maġġoranza tal-pajjiżi li qed jiżviluppaw. Minkejja li sar xi progress biex inaqqas il-mortalità tat-tfal (MDG 4) inkluż l-impatt tal-Alleanza Globali għall-Vaċċini u t-Tilqim (GAVI), kważi 15% tat-tfal fl-Afrika l-isfel mis-Saħara għadhom qed imutu qabel l-età ta' 5 snin. Ir-rati tal-mortalità materna (MDG 5) bilkemm naqsu. Fir-rigward tal-HIV/AIDS (MDG 6), in-numru tal-persuni minn pajjiżi li qed jiżviluppaw li qed jirċievu trattament antiretrovirali żdiet għal għaxar darbiet f'dawn l-aħħar ħames snin, l-iktar minħabba l-finanzjament dirett mill-Fond Globali għall-ġlieda kontra l-AIDS, it-tuberkolożi u l-malarja (GFATM)[3]. Madankollu, l-HIV/AIDS jibqa' l-kawża waħda ewlenija tal-mewt fl-Afrika l-isfel mis-Saħara. Attenzjoni mhux bilanċjata u frammentata lill-prijoritajiet tas-saħħa dgħajfet il-progress. Iktar minn 140 inizjattiva tas-saħħa globali li immirati lejn ħtiġijiet speċifiċi ħafna drabi jsiru b'mod parallel u jistgħu potenzjalment iżidu l-pressjoni fuq sistemi tas-saħħa li diġà huma dgħajfa. Hu meħtieġ li tingħata attenzjoni speċjali, permezz ta' approċċ multisettorjali, lil MDG 1 dwar in-nutrizzjoni, MDG 3 dwar ugwaljanza bejn is-sessi u MDG 7 dwar sostenibilità ambjentali, li jikkostitwixxu sehem kbir tar-riskju attribwibbli għal saħħa ħażina fil-pajjiżi li qed jiżviluppaw. Sfida ewlenija hija n-nuqqas ta' kapaċità tal-pajjiżi – li ħafna drabi huma fraġli, jinsabu wara kunflitt jew mingħajr istituzzjonijiet b'saħħithom biżżejjed u mingħajr riżorsi adegwati – biex jimplimentaw politiki tas-saħħa pubblika effettivi, inkluż l-aċċess għas-servizzi tas-saħħa adegwati. Pereżempju, is-Sri Lanka għandha rata tal-mortalità materna 30 darba inqas minn Angola, li għandha livelli simili ta' GDP per kapita, jew il-Malawi għandu rata tal-mortalità tat-tfal li għandhom inqas minn ħames snin li hija n-nofs minn dik tal-Ginea Ekwatorjali, li għandha GDP per kapita 30 darba inqas. Din il-Kummissjoni tipproponi viżjoni tal-UE dwar saħħa globali, tiddefinixxi l-prinċipji ta' gwida li għandhom japplikaw għas-setturi ta' politika rilevanti kollha u tippreżenta numru ta' oqsma fejn l-UE tista' taġixxi b'mod iktar effettiv[4]. IL-LEġITIMITÀ TAL-UE BIEX TAġIXXI It-Trattat tal-Unjoni Ewropea jistqarr li l-UE għandha tiġġieled kontra l-esklużjoni soċjali u d-diskriminazzjoni, u tippromwovi l-ġustizzja u l-protezzjoni soċjali, l-ugwaljanza bejn in-nisa u l-irġiel, is-solidarjetà bejn il-ġenerazzjonijiet u l-protezzjoni tad-drittijiet tat-tfal[5]. It-Trattat jistqarr ukoll li fir-relazzjonijiet tagħha mal-bqija tad-dinja, l-Unjoni għandha ssostni u tippromwovi l-valuri u l-interessi tagħha[6]. L-UE qablet dwar valuri komuni ta' solidarjetà lejn kopertura ekwa u universali ta' kura ta' kwalità[7]. Komunikazzjoni reċenti tindirizza wkoll l-isfida ta' inugwaljanzi ta' saħħa fi ħdan l-UE[8]. L-azzjoni tal-UE biex tippromwovi s-saħħa f'pajjiżi terzi hija bbażata fuq it-Trattat dwar il-Funzjonament tal-Unjoni Ewropea. Hu jispeċifika li l-Unjoni u l-Istati Membri għandhom jinkoraġixxu kooperazzjoni ma' pajjiżi terzi u l-organizzazzjonijiet internazzjonali kompetenti fl-isfera tas-saħħa pubblika, u li livell għoli ta' protezzjoni tas-saħħa tal-bniedem għandha kun żgurata fid-definizzjoni u l-implimentazzjoni tal-politiki u l-attivitajiet kollha tal-Unjoni[9]. L-Istrateġija tas-Saħħa tal-UE tistqarr li tmexxija kollettiva sostnuta fis-saħħa globali hija meħtieġa għal riżultati aħjar ta' saħħa fl-Ewropa u barra mill-Ewropea. Permezz tal-Programmi Oqsfa ta' Riċerka, l-UE kienet qed issostni r-riċerka madwar iċ-ċiklu kollu ta' innovazzjoni. Dan jibda b'riċerka bażika, riċerka klinika u riċerka dwar is-saħħa pubblika u s-servizzi tas-saħħa. Din tinkludi teknoloġija tal-informatika u tal-komunikazzjoni (ICT) għas-saħħa (eHealth). Barra minn hekk, il-politiki tal-UE dwar l-istandards ambjentali jew dwar l-implimentazzjoni ta' ftehimiet ambjentali multilaterali għandhom ukoll impatt pożittiv fuq is-saħħa globali. Il-konsensus dwar l-iżvilupp Ewropew[10] jirrikonoxxi s-saħħa bħala għan essenzjali fi ħdan il-qafas MDG. L-UE tippromwovi tmexxija inklużiva, drittijet tal-bniedem, demokrazija, governanza tajba u stabilità, li kollha kemm huma huma fatturi essenzjali għal soċjetajiet b'saħħithom u viċe versa. Is-saħħa hija element kritiku fit-tnaqqas tal-faqar u fil-promozzjoni tat-tkabbir sostenibbli. Il-politika tal-UE dwar is-saħħa u t-tnaqqis tal-faqar[11] tindirizza dawn il-punti. Attenzjoni speċjali hija mogħtija lill-mard relatat mal-faqar[12] u lill-kriżi tar-riżorsi umani għas-saħħa[13]. Hemm impenji ċari biex tiżdied l-għajnuna għall-iżvilupp[14] kif ukoll il-livelli tagħha ta' allinjament mal-istrateġiji u l-prevedibilità tal-pajjiżi msieħba, sabiex jippermettulhom li jkollhom il-politiki u azzjonijiet ta' saħħa proprji tagħhom. Ir-rwol prinċipali tal-UE fil-kummerċ internazzjonali, fil-governanza ambjentali globali u fl-għajnuna tal-iżvilupp, kif ukoll il-valuri u l-esperjenza tagħha ta' kura fis-saħħa ta' kwalità universali u ekwa, jagħtuha leġitimità qawwija biex taġixxi fis-saħħa globali. VIżJONI, VUċI U AZZJONI IKTAR QAWWIJA TAL-UE 3.1. L-isfida tal-governanza: kif tmexxija qawwija tista' tikkoordina atturi globali Hemm għad kbir ta' atturi u inizjattivi impenjati fis-saħħa globali u hemm ħtieġa kontinwa biex jiġu mobilizati r-riżorsi. Dan jitlob tmexxija globali iktar ċara u iktar effiċjenti. Mad-dħul fis-seħħ tat-Trattat ta' Liżbona, ir-rwol tal-UE fid-WHO jeħtieġ li jkun inkluż f'riflessjonijiet iktar wiesgħa dwar ir-rwol tagħha fin-Nazzjonijiet Uniti (NU). 3.2. L-isfida tal-kopertura universali: żgurar tal-aċċess għas-servizzi tas-saħħa għal kulħadd It-tnaqqis tan-nuqqasijiet attwali fil-kopertura tas-servizzi tas-saħħa se jeħtieġ mhux biss iż-żieda tar-riżorsi domestiċi iżda wkoll l-għajnuna għall-iżvilupp fil-pajjiżi l-iktar foqra. Aparti t-titjib fl-allokazzjoni tar-riżorsi fil-pajjiżi u bejn pajjiż u ieħor, dan ifisser li jrid jissaħħaħ id-djalogu politiku dwar is-sistemi tas-saħħa u l-arranġamenti finanzjarji tagħhom. Fit-twettiq tal-aġenda tal-effettività tal-għajnuna, l-UE għandha żżid l-allinjament u l-prevedibilità tal-appoġġ tagħha. L-approċċ lejn l-MDĠs tas-saħħa jrid jikkunsidra r-rabta tagħhom mal-MDĠs l-oħra (l-iktar is-sess, in-nutrizzjoni u l-ilma u s-sanità). Dan irid ukoll jipprovdi għall-ħtiġijiet importanti oħra, b'mod partikolari l-Mard li Ma Jittiħidx (NCDs)[15], u l-ħtiġijiet speċjali tal-persuni f'sitwazzjonijiet ta' kriżi umanitarja. Sabiex issegwi dan l-approċċ olistiku ta' "sistemi", l-UE se jkollha bżonn ittejjeb il-kapaċità tagħha għall-analiżi u d-djalogu dwar sfidi ta' saħħa globali fuq livell nazzjonali, reġjonali u internazzjonali. 3.3. L-isfida tal-koerenza politika: Il-politika tas-saħħa ma tistax tkun itrattata waħedha L-UE għandha opportunità biex tgħaqqad ir-rwoli globali ewlenin fil-kummerċ u l-għajnuna għall-iżvilupp mal-impenn tagħha lejn il-progress soċjali u ambjentali, sabiex issawwar approċċ koerenti lejn is-saħħa globali. Il-ħames oqsma ta' prijorità miftiehma dan l-aħħar mill-UE fl-indirizzar tal-Koerenza Politika għall-Iżvilupp ikopru fatturi ewlenin li jinfluwenzaw is-saħħa globali. Dawn huma: kummerċ u finanzjament, migrazzjoni, sigurtà, sigurtà tal-ikel u bidla fil-klima. Żieda fl-attenzjoni lejn l-impatti tal-iżvilupp f'dawn l-oqsma ta' politika u oħrajn bħal l-edukazzjoni u l-għoti ta' setgħa liż-żgħażagħ se ġġib benefiċċji għas-saħħa globali. 3.4. L-isfida tal-għarfien: investiment fir-riċerka li minnha jibbenefika kulħadd L-innovazzjoni fir-riċerka tas-saħħa kkontribwixxiet ħafna fit-titjib tas-saħħa tal-bniedem u l-kwalità tal-ħajja fl-Ewropa u barra minnha. L-interventi ġodda jew il-prodotti mediċinali ma jridux ikunu biss effettivi u siguri; iżda jridu jkunu wkoll aċċetabbli, ikollhom prezz li jista' jintlaħaq u jkunu aċċessibbli sabiex il-popolazzjoni kollha tkun tista' tibbenefika minnhom. ICT jista' jkollu rwol ewlieni fit-titjib tal-provvediment tas-servizzi tas-saħħa. Għad hemm nuqqas kbir bejn dak li hu magħruf li jtejjeb is-saħħa u dak li qed jinkiseb fil-prattika. Barra minn hekk, l-istruttura tal-inċentivi għall-iżvilupp tal-mediċini ġodda u t-teknoloġiji mediċi hija inqas effettiva meta l-pazjenti jkunu jew ftit wisq jew foqra ħafna. Huwa għalhekk essenzjali li l-prijoritajiet ta' riċerka jkunu mmirati biex jagħmlu l-ikbar impatt fuq is-saħħa pubblika. L-aċċess u l-innovazzjoni jeħtieġu li jkunu indirizzati fl-istess ħin, kif enfasizzat fl-Istrateġija u l-Pjan ta' Azzjoni Globali għas-Saħħa Pubblika, l-Innovazzjoni u l-Proprjetà Intelletwali[16]. Dawk li jfasslu l-politika u r-riċerkaturi jridu jibdlu r-riżultati tar-riċerka f'deċiżjonijiet ibbażati fuq l-evidenza. Il-politiki bbażati fuq l-evidenza jistgħu jinbnew biss fuq sistemi xierqa ta' informazzjoni dwar is-saħħa u ġenerazzjoni ta' riċerka u għarfien immexxija mill-pajjiżi. Dan jeħtieġ kapaċità ta' riċerka multidixxiplinari fuq livell nazzjonali. RISPONS IMSAħħAħ TAL-UE L-UE għandha tapplika l-valuri u l-prinċipji komuni ta' solidarjetà lejn kopertura ekwa u universali tas-servizzi tas-saħħa ta' kwalità fil-politiki u azzjonijiet esterni u interni kollha. 4.1. Governanza demokratika u inklużiva - F'livell globali, l-UE għandha tagħmel ħilitha biex tiddefendi pożizzjoni unika fi ħdan l-aġenziji tan-NU. L-UE għandha tistinka biex tnaqqas id-duplikazzjoni u l-frammentazzjoni u żżid il-koordinazzjoni u l-effettività tas-sistema tan-NU. Hi għandha issostni tmexxija iktar b'saħħitha mid-WHO fil-funzjonijiet tagħha normattivi u ta' gwida sabiex ittejjeb is-saħħa globali. L-UE għandha tfittex sinerġiji mad-WHO sabiex tindirizza l-isfidi tas-saħħa globali. Hi għandha tnaqqas il-frammentazzjoni tal-finanzjament lid-WHO u torjenta ruħha b'mod gradwali lejn il-finanzjament tal-baġit ġenerali tagħha. Fuq livell reġjonali, l-UE għandha tippromwovi netwerking eqreb bejn il-ġirien u trawwem l-istabbiliment ta' netwerks tas-saħħa reġjonali bħal pereżempju d-Dimensjoni tat-Tramuntana u n-Netwerk tas-Saħħa tal-Ewropa tax-Xlokk. Fejn diġà jeżistu istituzzjonijiet reġjonali (pereżempju l-Unjoni Afrikana) jew djalogi (pereżempju taħt il-Politika Ewropea tal-Viċinat), l-UE għandha tippromwovi l-inklużjoni ta' kwistjonijiet tas-saħħa globali fost il-prijoritajiet tagħhom u ssaħħaħ il-kooperazzjoni maċ-Ċentru Ewropew għall-Kontrol tal-Mard. - Fuq livell nazzjonali, l-UE għandha ttejjeb l-appoġġ tagħha għall- parteċipazzjoni sħiħa tal-partijiet interessati kollha fl-iżvilupp, l-implimetazzjoni u s-sorveljanza tal-politika tas-saħħa u politiki rilevanti oħra. Hi għandha tippromwovi l-iskrutinju parlamentari tad-deċiżjonijiet ta' finanzjament pubbliku li jinfluwenzaw it-twassil tas-servizzi tas-saħħa f'pajjiżi imsieħba. Dawn l-azzjonijiet għandhom jinkludu rabtiet mal-edukazzjoni, li jinvolvu żgħażagħ, familji u komunitajiet, u jagħtuhom is-setgħa li jkollhom stili ta' ħajja iktar b'saħħithom, ikabbru l-potenzjal uman tagħhom u jikkontribwixxu b'mod effettiv għall-proċess ta' politika[17]. 4.2. Lejn kopertura universali tal-kura ta' saħħa bażika ta' kwalità: Fejn, xiex, u kif taġixxi - L-UE għandha tagħti prijorità u ssostni iktar il-pajjiżi li jinsabu f'kuntest fraġli, tgħin lil orfni u/jew dawk li huma l-aktar imbegħda mill-MDGs tas-saħħa. Hi għandha ssostnihom fit-tfassil u fl-implimentazzjoni tal-politiki, l-istrateġiji u l-programmi nazzjonali sabiex iħaffu l-progress lejn il-kisba ta' MDGs tas-saħħa. Dan l-approċċ għandu jitwettaq b'mod kostanti mill-UE permezz ta' mezzi bilaterali u parteċipazzjoni f'inizjattivi globali u fora internazzjonali. Il-Kummissjoni se tipproponi lista ta' pajjiżi ta' prijorità fejn l-UE għandha tikkonċentra l-Assistenza għall-Iżvilupp Uffiċjali tagħha bil-ħsieb tas-Summit tal-MDG tal-2010. - L-UE għandha tikkonċentra l-appoġġ tagħha fuq it-tisħiħ tas-sistemi tas-saħħa sabiex tiżgura li l-komponenti ewlenin tagħha – il-ħaddiema fil-qasam tas-saħħa, aċċess għall-mediċini, infrastruttura u loġistika u ġestjoni deċentralizzata – ikunu biżżejjed effettivi biex jagħtu kura tas-saħħa bażika ekwa u ta' kwalità għal kulħadd mingħajr diskriminazzjoni fuq kwalunkwe bażi kif definit fl-Artikolu 21 tal-Karta tad-Drittijiet Fundamentali. Dan l-approċċ huwa partikolament importanti għall- MDG 5 . Dan it-tip ta' proċess immexxi mill-Isħubija Internazzjonali tas-Saħħa fil-valutazzjoni ta' pjanijiet komprensivi tas-saħħa nazzjonali (permezz tal-Valutazzjoni Konġunta tal-Istrateġiji Internazzjonali) li jiffinanzja baġit tas-saħħa nazzjonali u proċess ta' sorveljanza għandu jkun il-qafas preferut għall-provvediment tal-appoġġ tal-UE. Approċċ komprensiv li jinkludi l-prijoritajiet kollha huwa l-unika wieħed effiċjenti. L-UE għandha tippromwovi dan l-approċċ fl-inizjattivi ta' finanzjament globali bħal pereżempju l-GFATM u l-GAVI u permezz tal-parteċipazzjoni tagħha fil-governanza tal-Istituzzjonijiet Finanzjarji Internazzjonali (IFIs). Il-fondi globali eżistenti għandhom ikunu adattati għall-isfidi tas-saħħa globali, pjuttost milli jinħolqu strumenti ġodda. - Fit-twassil tal-wegħdiet tagħha dwar l-għajnuna għall-iżvilupp, l-UE għandha żżid l-appoġġ għall-implimentazzjoni tal-istrateġiji tas-saħħa nazzjonali permezz tas-sistemi tal-pajjiżi. Kemm jekk tkun diretta kif ukoll indiretta (bħala parti mill-appoġġ tal-baġit jew inizjattivi globali), l-għajnuna tal-UE għas-saħħa għandha toffri prevedibilità ta' mill-inqas tliet snin . Dan huwa essenzjali sabiex tippermetti t-tfassil u l-implimentazzjoni tal-istrateġiji tas-saħħa nazzjonali f'pajjiżi li għandhom l-inqas kapaċità ta' finanzjament pubbliku. L-Istati Membri għandhom ikunu mħeġġa biex jissieħbu mal-Kummissjoni f'"kuntratti tal-MDG" li joffru prevedibilità u żieda fir-riżorsi nazzjonali. Rabta mfissra sew mal-mekkaniżmi konġunti ta' sorveljanza u ta' djalogu tas-settur tas-saħħa ibbażata fuq politiki tas-saħħa nazzjonali se ttejjeb ir-rilevanza tagħhom għas-saħħa. F'konformità mal-għanijiet tal-effettività tal-għajnuna, l-UE għandha tqassam żewġ terzi tal-ODA tas-saħħa permezz ta' programmi ta' żvilupp tal-pajjiżi imsieħba u 80% permezz tas-sistemi ta' ġestjoni tal-akkwist u tal-finanzjament pubbliku ta' dawn il-pajjiżi . Flimkien mal-imsieħba globali, l-UE għandha wkoll tesplora b'mod attiv l-opportunitajiet għall-finanzjament innovattiv addizzjonali sabiex titrattata l-isfidi tas-saħħa globali u r-rwol li l-Bank Ewropew għall-Investiment jista' jkollu fil-finanzjament tal-infrastrutturi soċjali u relatati mas-saħħa. Hi għandha wkoll tippromwovi d-diviżjoni tax-xogħol bejn l-atturi istituzzjonali u l-organizzazzjonijiet privati. L-UE għandha ssostni l-isforzi tal-pajjiżi terzi biex jifformulaw politiki effettivi biex jimmobilizzaw dħul domestiku, iżidu l-finanzjament ġust tas-sistemi tas-saħħa u jiżviluppaw jew isaħħu l-mekkaniżmi tal-protezzjoni soċjali fis-settur tas-saħħa. Dan hu mħeġġeġ permezz tal-proċess ta' tkabbir fejn l-allinjament legali mal-acquis fil-qasam tas-saħħ, il-politiki u l-prattika tal-UE huwa sorveljat b'mod regolari mill-Kummissjoni. F'pajjiżi li qed jiżviluppaw, għandu jiġi kkunsidrat it-tibdil tal-ispejjeż tal-utent mal-mekkiżmi ta' finanzjament ġust u l-konformità mal-impenji dwar l-allokazzjoni nazzjonali tal-baġit għas-saħħa[18]. L-UE se ssostni d-WHO, fi ħdan il-ftehim ta' sħubija attwali, biex tivvaluta, tanalizza u tipprovdi stimi regolari ta' nuqqasijiet ta' finanzjament pubbliku nazzjonali għat-twassil tal-kura tas-saħħa bażika. L-UE għandha tindirizza n- natura multisettorjali tas-saħħa u r-rabtiet mill-qrib mas-sess, nutrizzjoni, ilma, sanità, kwalità tal-ambjent u edukazzjoni fid-djalogi politiċi rilevanti. Flimkien mar-reġjuni jew il-pajjiżi l-iktar affettwati min-nutrizzjoni ħażina tal-ommijiet u tat-tfal, l-UE għandha ssostni l-formulazzjoni u l-implimentazzjoni tal-politiki dwar in-nutrizzjoni tal-gvern, billi jkun hemm rabta bejn l-interventi tas-saħħa u tas-sigurtà tal-ikel. 4.3. Koerenza bejn il-politiki rilevanti tal-UE relatati mas-saħħa globali L-UE għandha tiżgura li l-politiki interni u esterni rilevanti kollha jikkontribwixxu għall-promozzjoni ta' kopertura ekwa u universali tas-servizzi tas-saħħa ta' kwalità. Sabiex tagħmel dan, il-valutazzjoni tal-impatt tal-oqsma ta' politika rilevanti għandha tanalizza l-effetti tal-għażliet ta' politika dwar is-saħħa globali[19]. Ir-rabta bejn l-għajnuna umanitarja u għall-iżvilupp tal-UE għandha tkun imħeġġa. F'konformità mal-impenji magħmula dwar il-koerenza ta' politika għall-iżvilupp [20], l-UE għandha tkun ippreparata biex tindirizza dawn l-aspetti li ġejjin tas-saħħa globali: - Dwar il-kummerċ , l-UE għandha taħdem biex tiżgura użu iktar effettiv tad-dispożizzjonijiet TRIPS[21] biex iżżid il-prezzijiet raġonevoli u l-aċċess għall-mediċini essenzjali . L-UE għandha ssostni l-azzjonijiet ta' prijorità identifikati fl-Istrateġija u l-Pjan ta' Azzjoni Globali għas-Saħħa Pubblika, l-Innovazzjoni u l-Proprjetà Intelletwali. Din għandha tindirizza l-isfidi mistennija wara l-2016 meta l-qafas tat-TRIPS jidħol fis-seħħ fil-pajjiżi l-inqas żviluppati. L-UE għandha tkompli tiżgura li l-ftehimiet bilaterali tal-kummerċ tal-UE jevitaw klawżoli li jistgħu jdagħjfu l-aċċess għall-mediċini. Il-kompetizzjoni ġenerika[22] u l-użu razzjonali tal-mediċini huma ta' importanza kbira biex tkun żgurata s-sostenibilità tas-sistemi tal-kura tas-saħħa[23]. L-UE għandha wkoll taħdem fuq livell globali u reġjonali biex telimina l-kummerċ fil-mediċini falsifikati pereżempju permezz tat-task force internazzjonali għall-ġlieda kontra l-mediċini foloz (International Medical Products Anti-Counterfeiting Taskforce). L-UE għandha wkoll tindirizza iktar il-problema tad-drogi illegali u l-effetti tagħha fuq is-saħħa u tikkunsidra r-rwol importanti tat-tnaqqis fid-domanda. L-UE għandha wkoll tkompli tippromwovi governanza globali aħjar tal-ftehimiet ambjentali rilevanti għas-saħħa. - Dwar il-migrazzjoni , l-Istati Membri tal-UE għandhom jiżguraw li l-politiki ta' migrazzjoni tagħhom ma jdgħajfux id-disponibilità tal-professjonisti tas-saħħa f'pajjiżi terzi filwaqt li jirrispettaw il-libertà ta' moviment individwali u aspirazzjonijiet personali u professjonali. F'dan ir-rigward, l-UE għandha tgħaġġel il-progress lejn l-impenji miftiehma taħt l-Istrateġija tal-Unjoni Ewropea għall-Azzjoni dwar il-Kriżi fir-Riżorsi Umani għas-Saħħa fil-Pajjiżi li Qed Jiżviluppaw u tikkontribwixxi għall-Kodiċi ta' Prattika tad-WHO dwar ir-Reklutaġġ Internazzjonali tal-Persunal fil-Qasam tas-Saħħa. L-UE għandha tiffaċilita l-migrazzjoni ċirkolari bħala mezz biex jitnaqqas il-brain drain minn pajjiżi li qed jesperjenzaw tali pressjoni. L-Istati Membri tal-UE għandhom iżidu l-isforzi tagħhom biex jiżguraw li kulħadd – anki l-migranti – fl-UE ikollhom aċċess għal servizzi ta' saħħa ta' kwalità mingħajr diskriminazzjoni. - Dwar is- sigurtà , il-Politika Barranija u ta' Sigurtà Komuni tal-UE għandha issaħħaħ il-progress fuq ir-rispons tal-UE għal sitwazzjonijiet ta' fraġilità [24] u tenfasizza l-importanza tal-aċċess tas-servizzi tas-saħħa għall-popolazzjonijiet taħt stress f'kuntesti fraġli, fi kriżi umanitarja u fi proċessi ta' paċi u stabilizzazzjoni. L-UE għandha tikkontribwixxi għall-kapaċitajiet nazzjonali globali tal-pajjiżi terzi li jipprevedu, isibu u jwieġbu minn kmieni għal theddid tas-saħħa globali , taħt ir-Regolamenti tas-Saħħa Internazzjonali. Minħabba t-theddid tal-mard żoonitiku, dan ifisser ukoll li tingħata attenzjoni iktar mill-qrib lejn il-kunċett ta' "dinja waħda, saħħa waħda"[25]. - Dwar is-sigurtà tal-ikel, l-assistenza tal-ikel u nutrizzjoni l-UE għandha tiżgura li l-politiki tagħha jaħdmu sabiex iżidu l-aċċess għall-ikel u jorbtu mal-istrateġiji tas-saħħa nazzjonali li jinkludu s-servizzi ta' nutrizzjoni u s-sorveljanza tal-istatus nutrizzjonali fil-popolazzjoni, kif elaborat fil-Komunikazzjonijiet dwar is-Sigurtà tal-Ikel u l-Assistenza tal-Ikel. L-UE għandha tikkontribwixxi għall-iżvilupp ta' tmexxija globali unika b'saħħitha u effettiva tan-NU dwar in-nutrizzjoni u dwar l-iżvilupp ta' Qafas tan-Nutrizzjoni Globali u Multisettorjali[26]. L-UE għandha tfittex ukoll biex tikkontribwixxi għas-sigurtà tal-ikel permezz tal-implimentazzjoni tal-konvenzjonijiet ta' biodiversità u ta' deżertifikazzjoni. - Dwar il-bidla fil-klima , l-UE se tikkunsidra għanijiet tas-saħħa globali fl-implimentazzjoni tal-impenn kollettiv minn pajjiżi żviluppati, f'Diċembru 2009, għall-riżorsi ġodda u addizzjonali fil-ħmistax-il Konferenza tal-Partijiet. 4.4. Riċerka u evidenza bbażata fuq id-djalogu u l-azzjoni - L-UE għandha tikkoordina b'mod iktar effettiv ir-riċerka dwar is-saħħa globali sabiex tindirizza x-xenarju fframmentat ħafna u tiddentifika l-prijoritajiet globali konġunti għar-riċerka dwar is-saħħa. Hi għandha tippromwovi finanzjament effettiv u ġust għar-riċerka li minnha tibbenefika is-saħħa ta' kulħadd . - Il-Programmi Qafas ta' Riċerka tal-UE għandhom ikomplu jagħtu prijorità lill-azzjonijiet li jitrattaw l-isfidi tas-saħħa globali. Dawn l-azzjonijiet għandhom ikunu bbażati fuq proċessi konġunti ta' tfassil ta' prioritajiet, sħubiji ekwi u aċċess sigur għall-għarfien miksub. - L-UE għandha ssaħħaħ u tibbilanċja il- proċess sħiħ tar-riċerka dwar is-saħħa tal-innovazzjoni, l-implimentazzjoni, l-aċċess, is-sorveljanza u l-evalwazzjoni. Tali riċerka għandha tipprovdi input effettiv għall-politiki tas-saħħa, ittejjeb il-provvediment tas-servizzi tas-saħħa, u tinkludi mekkaniżmi għall-pajjiżi msieħba sabiex jibnu u jsostnu l-kapaċità ta' riċerka nazzjonali tagħhom. - L-UE għandha ssaħħaħ il-ħidma attwali tagħha[27] b'entitajiet nazzjonali u internazzjonali rilevanti bħad-WHO, l-OECD u l-Health Metrics Network, sabiex ittejjeb is-sistemi tal-informazzjoni tas-saħħa u l-ġabra ta' dejta u statistiċi komparabbli biex jippermettu valutazzjoni komparattiva u jikkontribwixxu għall-politiki globali, Ewropej u nazzjonali. L-UE għandha tippromwovi l-użu tal-ICT, kif ukoll l-eHealth. - Kull azzjoni globali informattiva dwar is-sigurtà tal-ikel, għalf, prodotti, farmaċewtiċi, u mezzi mediċi jridu jkunu bbażati fuq l-evidenza. L-UE għandha tippromwovi t-tixrid tal-informazzjoni dwar perikli u riskji f'dawn l-oqsma. 4.5 Ir-riżultati miksuba permezz ta' koordinazzjoni, sorveljanza u bini ta' kapaċita msaħħa Sabiex tkabbar u tkejjel l-impatt tal-politiki u l-programmi tagħha li jirrilataw mas-saħħa globali, l-UE se tistabbilixxi dawn il-mekkaniżmi li ġejjin: - Il-faċilitazzjoni ta' azzjoni konġunta tal-UE dwar saħħa fuq livelli nazzjonali u globali; il-Kummissjoni u l-Istati Membri għandhom kull wieħed jinnominaw koordinatur dwar is-saħħa globali. Il-koordinaturi tas-saħħa globali tal-UE se jaħdmu flimkien f'pjattaforma biex jagħtu lil xulxin informazzjoni u jiltaqgħu regolarment sabiex jiftiehmu dwar pożizzjonijiet komuni u opportunitajiet għall-azzjoni konġunta. - Sorveljanza tal-għajnuna ġenerali tal-UE għas-saħħa u kif inhi mqassma. L-UE għandha tiżgura l-implimentazzjoni sħiħa tal-Kodiċi ta' Kondotta tal-UE dwar id- Diviżjoni tax-Xogħol [28] fil-qasam tas-saħħa. L-UE għandha tibni għarfien kollettiv dwar il-kapaċità fl-analiżi u d-djalogu politiku dwar is-saħħa globali sabiex tkun tista' titkellem b'vuċi waħda ma' pajjiżi terzi u f'fora internazzjonali. L-evalwazzjoni tal-għarfien eżistenti tal-UE għandha tkun il-bażi għall-azzjoni f'dan il-qasam. - Twettiq ta' djalogi ma' atturi globali ewlenin u partijiet interessati: L-UE għandha tkompli taħdem fi sħubiji mal-aġenziji tan-NU u l-IFIs kkonċernati bis-saħħa globali. L-UE għandha tinkludi l-isfidi tas-saħħa globali fid-djalogi tagħha ma' atturi oħra globali ewlenin. Is-summit li jmiss bejn l-UE u l-Afrika fl-aħħar tal-2010 se jkun mument ieħor ewlieni għaż-żewġ kontinenti biex jaġixxu flimkien dwar l-MDGs tas-saħħa. [1] L-Artikolu 35 ĠU C 303/7, 14.12.2007, p.1. [2] FCTC, WHO, 21 ta' Mejju 2003. [3] UNAIDS, Aġġornament dwar l-epidemija tal-AIDS, 2009. [4] Il-Komunikazzjoni hija akkumpanjata minn tliet Dokumenti ta' Ħidma tal-Persunal li jitrattaw rispettivament: "Il-Kontribuzzjoni lejn Kopertura Universali tas-Servizzi tas-Saħħa permezz ta' Politika ta' Żvilupp"; "Saħħa globali: tweġiba għall-isfidi tal-globalizzazzjoni" u "Riċerka Ewropea u Għarfien għas-saħħa globali" fejn huma spjegati fid-detall il-kwistjonijiet ta' politika. [5] Konformità mal-Konvenzjoni tan-NU dwar id-Drittijiet tat-Tfal, Artikolu 24 dwar it-tgawdija tat-tfal mill-ogħla standard ta' saħħa li jista' jintlaħaq. [6] L-Artikolu 3 tat-Trattat tal-Unjoni Ewropea. [7] Konklużjonijiet tal-Kunsill (2006/C 146/01). [8] COM (2009) 567, 20 ta’ Ottubru 2009. [9] L-Artikolu 168 tat-Trattat dwar il-funzjonament tal-Unjoni Ewropea. [10] COM (2006) 46, 24 ta’ Frar 2006. [11] COM (2002) 129, , 22 ta’ Marzu 2002. [12] COM(2006) 870. [13] COM(2005) 179. [14] Konklużjonijiet tal-Kunsill: Aġenda tal-UE għall-Azzjoni dwar l-MDGs, 11096/08, 24 ta' Ġunju 2008. [15] WHA 2008 61.14. [16] Riżoluzzjoni WHA61.21, 2008. [17] COM(2007) 498. [18] Dikjarazzjoni u Pjan ta' Azzjoni dwar l-HIV u l-AIDS, Tuberculosis u Mard Ieħor li Jittieħed (ORID) tal-2001 tal-Kapijiet tal-Istat u l-Gvern tal-Unjoni Afrikana li saru f'Abuja u d-dikjarazzjoni ta' Brussell. ACP/83/016/07, 26 ta' Ottubru 2007. [19] Kif previst mil-linji gwida tal-Valutazzjoni tal-Impatt (SEC (2009) 92 , COM(2005)172 tas-27.4.2005 u COM(2009) 205 finali tad-29.4.2009. [20] Koerenza ta' Politika għall-Iżvilupp – l-aċċelerazzjoni tal-progress lejn il-kisba tal-Għanijiet tal-Iżvilupp għall-Millenju, COM(2005) 134, 12 ta' April 2005 u rapporti biannwali, tal-aħħar COM(2009) 461. [21] WTO, Ġinevra, 30 ta' Awwissu 2003. [22] COM (2009) 351 tat-08.07.2009. [23] COM(2008) 666, 10.12.2008. [24] COM(2007) 643. [25] Ara: http://www.oneworldonehealth.org/ [26] WHO EB126/9, 19 ta' Novembru 2009. [27] Ġabra konġunta tad-dejta mill- Eurostat /OECD/WHO dwar il-kura tas-saħħa. [28] COM (2007) 72, 28 ta’ Frar 2007.