27.3.2010   

MT

Il-Ġurnal Uffiċjali tal-Unjoni Ewropea

C 79/71

1.

Jappoġġja l-azzjoni immedjata tal-Kummissjoni u tal-BEI sabiex jiżguraw li, f’dan iż-żmien ta’ nuqqas ta’ likwidità, ir-riżorsi tal-UE jintużaw b’mod effettiv sabiex jgħinu lin-negozji u jenfasizza li l-kriżi finanzjarja riċenti wasslet għal credit crunch għall-intrapriżi żgħar u ta’ daqs medju u għall-mikrointrapriżi u li din twassal kemm sabiex ir-ritmu ekonomiku jkompli sejjer għall-agħar kif ukoll ixxekkel kull rilanċ sussegwenti;

2.

Jagħraf li l-perspettivi finanzjarji 2007-2013 jillimitaw il-possibilità tal-Kummissjoni li talloka finanzjament ġdid għall-proposta l-ġdida dwar il-Faċilità Finanzjarja “Progress”;

3.

Juri t-tħassib li r-riallokazzjoni ta’ EUR 100 miljun mill-programm PROGRESS għall-faċilità mikrofinanzjarja ta’ progress ġdida tista’ tikkomprometti l-għanijiet, l-impatt u l-effettività ta’ dak il-programm u jitlob lill-Kummissjoni sabiex tikkunsidra alternattivi oħra ta’ finanzjament adatti għall-implimentazzjoni tal-faċilità;

4.

Jiġbed l-attenzjoni tal-Kummissjoni għall-fatt li l-EUR 100 miljun previsti għall-Faċilità Mikrofinanzjarja “Progress” mhux ser ikunu biżżejjed sabiex jipprovdu l-EUR 500 miljun f’fondi addizzjonali li hemm bżonn sabiex jagħmlu tajjeb għal-limitazzjonijiet ta’ self attwali, jixprunaw il-provvista tal-mikrofinanzi kif ukoll ilaħħqu mal-livelli attwali tad-domanda;

5.

Jilqa’ l-konsistenza tal-Faċilità Mikrofinanzjarja “Progress” mal-prinċipju tas-sussidjarjetà, u għaldaqstant tikkumplimenta d-dispożizzjoni ta’ faċilitajiet ta’ mikrokreditu mill-Istati Membri jew mill-awtoritajiet lokali u reġjonali;

6.

Jiġbed l-attenzjoni li aktar minn 90 % tal-intrapriżi fl-UE huma mikrointrapriżi u li l-akbar ostaklu għall-innovazzjoni ta’ dawk l-intrapriżi joħroġ mill-aċċess limitat għall-mikrokreditu;

7.

Jaqbel li l-parti l-kbira tal-mikrokreditu għall-persuni żvantaġġati fl-UE huwa pprovdut minn istituzzjonijiet mikrofinanzjarji mhux kummerċjali u li dawn il-fornituri jeħtieġu sostenn akbar sabiex ilaħħqu mad-domanda attwali;

8.

Jemmen li l-isforz tal-Kummissjoni sabiex ikun żviluppat il-mikrokreditu fl-UE ser ikun strument utli li jippermetti lil dawk li huma esklużi mis-suq tal-kreditu konvenzjonali, sabiex jibdew intrapriżi ġodda u jsostnu l-ħolqien tal-impjiegi;

9.

Jiddispjaċih li r-rwol tal-awtoritajiet lokali u reġjonali u l-impatt fuqhom mhux qed ikun ikkunsidrat b’mod sħiħ mill-evalwazzjoni “ex ante” li qed tagħmel il-Kummissjoni.

10.

Jitlob lill-Kummissjoni sabiex tiffoka fuq il-mikrointrapriżi innovattivi, l-aktar dawk li huma msejsa fuq l-għarfien, sabiex jippromovu l-innovazzjoni u l-produttività fl-UE;

11.

Jitlob lill-Kummissjoi sabiex tissemplifika l-inizjattivi attwali tal-UE kif ukoll sabiex tikkjarifika l-koerenza bejn il-faċilità mikrofinanzjarja ta’ progress u strumenti oħra finanzjarji tal-UE, speċjalment il-PROGRESS, il-FSE, il-JEREMIE u s-CIP (1);

12.

Jirrakkomanda li l-Kummissjoni tiddistingwi b’mod aktar preċiz bejn gruppi speċifiċi mmirati u tikkunsidra l-persuni qiegħda u żvantaġġjati, li jinkludu ż-żgħażagħ, in-nisa, persuni ta’ età aktar avvanzata u l-komunitajiet tal-minoritajiet etniċi bħala gruppi mmirati u tagħti lil dawn il-gruppi pożizzjoni speċifika u adatta fil-programmi u l-inizjattivi marbuta mal-mikrokrediti;

13.

Jitlob lill-Kummissjoni sabiex tenfasizza l-importanza ta’ miżuri wiesa’ ta’ appoġġ kummerċjali flimkien mal-provvediment finanzjarju għall-ħolqien ta’ negozji ġodda u negozji eżistenti. Il-provvista ta’ finanzjament għan-negozji ġodda u eżistenti għandha tkun ikkumplimentata minn mekkaniżmi ta’ appoġġ għan-negozju bħalma huma l-iggwidar, it-taħriġ, il-konsulenza u l-iżvilupp tal-kapaċitajiet flimkien mas-sostenn tar-rata tal-interessi mill-programm tal-FSE sabiex jinkoraġġixxu t-tkabbir sostenibbli tan-negozji u jiżguraw li jkun hemm tnaqqis fir-rata tan-negozji li jfallu;

14.

Jinnota li l-kundizzjonijiet għall-provvista u d-domanda tal-mikrokreditu jvarjaw ħafna madwar l-Ewropa u jitlob lill-Kummissjoni sabiex tiżgura li l-mikrokreditu jkun disponibbli wkoll f’dawk iż-żoni li ma jibbenefikawx mill-fondi strutturali, minħabba li jistgħu jeżistu nħawi deprivati u żvantaġġati anki fiz-zoni l-aktar għonja;

15.

Ifakkar lill-Kummissjoni, lill-Istati Membri u lill-imsieħba lokali u reġjonali, li l-faċilità mikrofinanzjarja ta’ EUR 100 miljun trid tkun ikkunsidrata fil-kuntest ta’ programmi u inizjattivi oħra. Speċifikament, ir-riżorsi limitati tal-faċilità ser ikunu aċċessibbli għas-27 Stat Membru matul l-erba’ snin li ġejjin. Minħabba f’hekk, il-fondi għandhom ikunu allokati skont kriterji li jħallu l-akbar impatt;

16

fakkar fl-opinjoni tal-Kumitat tar-Reġjuni dwar “Pjan Ewropew għall-Irkupru Ekonomiku u r-rwol tal-awtoritajiet lokali u reġjonali” (CdR 12/2009) li talbet lill-Kummissjoni sabiex “tressaq proposta għal regoli dwar l-għoti tal-mikrokreditu fi ħdan l-UE…[u] biex jiġu stabbiliti parametri għall-għoti tal-mikrokreditu.”

17.

Ifakkar lill-Kummissjoni u lill-Grupp tal-BEI li s-suċċess ta’ din il-faċilità jiddependi fuq li l-imsieħba, l-istituzzjonijiet finanzjarji u l-benefiċjarji potenzjali jkunu konxji għal kollox tal-iskema;

18.

Jinsisti li l-Kummissjoni u l-Grupp tal-BEI jkunu proattivi u jikkomunikaw ir-rwol tagħhom u l-metodi għall-aċċess tal-finanzjament taħt il-programmi differenti, bi sħab mal-awtoritajiet lokali u reġjonali;

19.

Jitlob lill-Kummissjoni u l-Grupp tal-BEI sabiex jiċċaraw il-valur miżjud tal-faċilità mikrofinanzjarja ta’ progress u l-komplimentaritajiet tagħha ma’ inizjattivi eżistenti ta’ sostenn lin-negozji fil-livelli Ewropej, nazzjonali, reġjonali u lokali.

20.

Jenfasizza li l-Kumitat kien diġà talab lill-Kummissjoni u l-Grupp tal-BEI sabiex ikunu aktar proattivi fil-komunikazzjoni tar-rwol, il-valur miżjud u l-opportunitajiet li joffru programmi oħra ta’ sostenn lin-negozji, jiġifieri il-JEREMIE, is-SIP (ara l-opinjoni dwar l-Att dwar in-negozji ż-żgħar għall-Ewropa, CdR 2008/246).

21.

Ifakkar lill-Kummissjoni u l-Grupp tal-BEI li l-faċilità mikrofinanzjarja tkun aktar effettiva jekk tkun ikkoordinata u implimentata flimkien mal-istrumenti finanzjarji Ewropej eżistenti kif ukoll programmi lokali u reġjonali fl-Istati Membri;

22.

Ifakkar fl-opinjoni tal-Kumitat tar-Reġjuni dwar “l-Istrateġija ta’ Lisbona għat-Tkabbir u l-Impjiegi” (CdR 245/2008) li saħqet fuq il-ħtieġa ta’ “koordinazzjoni bejn il-Fondi Strutturali u programmi rilevanti Ewropej oħrajn … sabiex jiġi sfruttat il-valur miżjud Ewropew u jiġu involuti l-awtoritajiet reġjonali u lokali”;

23.

Jipproponi li l-Kummissjoni tibni fuq il-flessibilità tal-faċilità li qed titwassal permezz tal-istituzzjonijiet mhux finanzjarji billi, fejn ikun adatt, taħdem mal-awtoritajiet lokali u reġjonali bħala l-fornituri tal-mikrofinanzi;

24.

Jitlob lill-Kummissjoni, l-Istati Membri, l-awtoritajiet lokali u reġjonali u l-korpi fdati bl-implimentazzjoni tal-Faċilità sabiex jagħtu s-sostenn lill-benefiċjarji potenzjali matul l-applikazzjoni għall-fondi ta’ self, jimminimizzaw il-burokrazija meħtieġa għall-applikazzjoni, l-ipproċessar u l-ġbid tal-fondi u joffru aktar sostenn sabiex titnaqqas il-burokrazija li tirriżulta wara li jirċievu l-fondi.

25.

Jipproponi li l-Kummissjoni għandha tagħmel valutazzjonijiet interim u finali fuq inizjattiva proprja, permezz ta’ kooperazzjoni mill-qrib mal-istituzzjonijiet finanzjarji internazzjonali u konsultazzjoni mal-awtoritajiet lokali u reġjonali kif ukoll il-benefiċjarji finali. Il-valutazzjoni finali għandha, b’mod partikulari, teżamina safejn il-faċilità b’mod sħiħ tkun laħqet l-għanijiet tagħha u kkumplimentat strumenti finanzjarji eżistenti tal-UE, pereżempju il-PROGRESS, l-FSE, il-JASMINE, il-JEREMIE u s-CIP. Il-valutazzjoni finali għandha tinkludi analiżi tad-distribuzzjoni tal-fondi fost is-27 pajjiż tal-UE;

26.

Jipproponi li filwaqt li l-faċilità mikrofinanzjarja hija miżura temporanja fl-istess qafas baġitarju attwali, il-Kummissjoni u l-BEI għandhom jikkunsidraw li jkomplu l-programm lil hinn mill-2013 jekk din tkun suċċess.

i)

Ftit hemm definizzjoni u ftehim komuni tat-terminu “qegħdin fir-riskju li jitilfu l-impjieg tagħhom”. Għaldaqstant huwa meħtieġ li ssir referenza għad-definizzjoni mogħtija fir-Regolament li jistabbilixxi Fond Ewropew ta’ Aġġustament għall-Globalizzazzjoni (Nru 1927/2006) li ġew emendati dan l-aħħar.

ii)

Flimkien maż-żgħażagħ, hemm numru ta’ gruppi żvantaġġati li jeħtieġ li jkunu msemmija speċifikament.

iii)

Ir-referenza lejn iż-żgħażagħ inqatgħet minn paragrafu (c) minħabba li l-gruppi żvantaġġati diġà huma definiti taħt paragrafu (b).

i)

Minħabba l-fondi limitati disponibbli, kif ukoll sabiex ikun żgurat li l-benefiċċji mill-faċilità jkunu massimizzati, huwa mportanti li jkunu stabbiliti kriterji ċari ta’ eliġibilità u li dawn il-kriterji jkunu applikati b’mod konsistenti fis-27 Stat Membru.

ii)

Kriterji ċari ta’ eliġibilità jsostnu l-komunikazzjoni effettiva u jsostnu d-differenzazzjoni bejn, u l-koordinazzjoni ma’ programmi oħra.

i)

Ir-realizzazzjoni tal-Faċilità Mikrofinanzjarja “Progress” għandha ssir bi sħab mal-awtoritajiet lokali u reġjonali. Konsegwentement, kull valutazzjoni għandha ssir wara konsultazzjoni mal-awtoritajiet lokali u reġjonali u l-benefiċjarji finali minħabba li huma jinsabu fl-aħjar pożizzjoni sabiex jagħtu pariri dwar l-impatt ġenerali u l-effettività tal-faċilità mikrofinanzjarja ta’ progress.

ii)

Din il-faċilità tkun effettiva biss jekk tikkumplimenta strumenti finanzjarji eżistenti tal-UE, għaldaqstant il-livell li din tkun laħqet għandu jkun parti mill-qafas ta’ valutazzjoni.