This document is an excerpt from the EUR-Lex website
Document 52008PC0211
Proposal for a Directive of the European Parliament and of the Council on amending Directive 2006/66/EC of the European Parliament and the Council on batteries and accumulators and waste batteries and accumulators as regards Article 6(2) on placing batteries and accumulators on the market
Proposta għal direttiva tal-Parlament Ewropew u tal-Kunsill li temenda d-Direttiva 2006/66/KE tal-Parlament Ewropew u tal-Kunsill dwar batteriji u akkumulaturi u skart ta' batteriji u akkumulaturi fir-rigward ta' l-Artikolu 6(2) dwar it-tqegħid fis-suq ta’ batteriji u akkumulaturi
Proposta għal direttiva tal-Parlament Ewropew u tal-Kunsill li temenda d-Direttiva 2006/66/KE tal-Parlament Ewropew u tal-Kunsill dwar batteriji u akkumulaturi u skart ta' batteriji u akkumulaturi fir-rigward ta' l-Artikolu 6(2) dwar it-tqegħid fis-suq ta’ batteriji u akkumulaturi
/* KUMM/2008/0211 finali - COD 2008/0081 */
Proposta għal direttiva tal-Parlament Ewropew u tal-Kunsill li temenda d-Direttiva 2006/66/KE tal-Parlament Ewropew u tal-Kunsill dwar batteriji u akkumulaturi u skart ta' batteriji u akkumulaturi fir-rigward ta' l-Artikolu 6(2) dwar it-tqegħid fis-suq ta’ batteriji u akkumulaturi /* KUMM/2008/0211 finali - COD 2008/0081 */
[pic] | KUMMISSJONI TAL-KOMUNITAJIET EWROPEJ | Brussel 16.4.2008 KUMM(2008) 211 finali 2008/0081 (COD) Proposta għal DIRETTIVA TAL-PARLAMENT EWROPEW U TAL-KUNSILL li temenda d-Direttiva 2006/66/KE tal-Parlament Ewropew u tal-Kunsill dwar batteriji u akkumulaturi u skart ta' batteriji u akkumulaturi fir-rigward ta' l-Artikolu 6(2) dwar it-tqegħid fis-suq ta’ batteriji u akkumulaturi (preżentata mill-Kummissjoni) MEMORANDUM TA’ SPJEGAZZJONI 1) Il-kuntest tal-proposta - Ir-raġunijiet u l-għanijiet tal-proposta L-għan ta’ din il-proposta huwa li jiċċara l-Artikolu 6(2) tad-Direttiva 2006/66/KE. - Il-kuntest ġenerali L-Artikolu 6(2) jistipula li batteriji u akkumulaturi li ma jissodisfawx ir-rekwiżiti tad-Direttiva 2006/66/KE ma għandhomx jitqiegħdu fis-suq jew għandhom jiġu rtirati minnu. Din id-dispożizzjoni tista’ tinftiehem li titlob li l-batteriji li jkunu tqiegħdu b’mod legali fis-suq qabel is-26 ta’ Settembru 2008, li jkunu għadhom fis-suq wara din id-data, u li ma jissodisfawx ir-rekwiżiti ta’ din id-Direttiva, għandhom jiġu rtirati mis-suq ukoll. Jekk id-dispożizzjoni tad-Direttiva tiġi interpretata f’dan is-sens, dan ifisser li kwantità konsiderevoli ta’ batteriji li tqiegħdu b’mod legali fis-suq isiru skart qabel iż-żmien. Dan imur kontra l-prinċipju tal-minimizzazzjoni ta’ l-iskart. Dan jista’ jwassal ukoll biex ċertu tagħmir isir skart qabel iż-żmien. L-irtirar ta’ dawn il-batteriji mis-suq jew li jsiru konformi mad-Direttiva jista’ wkoll joħloq piż amministrattiv akbar kemm fuq l-Istati Membri kif ukoll fuq l-industrija. Jekk l-Artikolu 6(2) jibqa’ ma jinbidilx, il-batteriji li għadhom fis-suq u li mhumiex ittikkettjati bis-simbolu grafiku li jindika li huma skart u bis-simboli kimiċi jkollhom jiġu ttikkettjati jew irtirati mis-suq. Dan jimplika wkoll l-irtirar mis-suq ta' batteriji speċifiċi li jistgħu jinġarru u li jkollhom kontenut ta’ kadmju ogħla minn dak permess mill-Artikolu 4 tad-Direttiva 2006/66/KE, u ta’ tagħmir li ma jissodisfax ir-rekwiżit li jkollu batteriji li jinqalgħu, kif stipulat fl-Artikolu 11 ta’ din id-Direttiva. Il-kontenut ta’ l-Artikolu 6(2) diġà kien inkluż fil-proposta oriġinali tal-Kummissjoni[1] għad-Direttiva 2006/66/KE. L-intenzjoni tal-Kummissjoni ma kinetx li wara s-26 ta’ Settembru 2008 jiġu rtirati mis-suq dawk il-batteriji li jkunu tqiegħdu b’mod legali fis-suq qabel din id-data. Għaldaqstant, il-Kummissjoni tipproponi li tiġi ċċarata din id-dispożizzjoni u b’hekk tingħata ċ-ċertezza legali f’dan l-ambitu sabiex ma jinqalgħux diverġenzi bejn is-sistemi legali ta’ l-Istati Membri li jwasslu għal problemi ta’ rikonoxximent reċiproku u ta’ diżordni fis-suq intern. Peress li din il-kjarifika għandha ssir qabel is-26 ta’ Settembru 2008, din il-proposta titqies bħala “azzjoni ta’ proċedura rapida” biex tnaqqas il-piż amministrattiv imsemmi hawn fuq. - Dispożizzjonijiet eżistenti fil-qasam tal-proposta Din il-proposta għandha l-għan li timmodifika l-Artikolu 6(2) tad-Direttiva 2006/66/KE. - Konsistenza ma’ politiki u ma’ għanijiet oħra ta’ l-Unjoni Il-proposta hija meqjusa bħala azzjoni ta’ proċedura rapida skond il-“Komunikazzjoni tal-Kummissjoni ta’ l-2008 dwar l-Azzjonijiet ta’ Proċedura Rapida biex jitnaqqsu l-piżijiet amministrattivi fl-Unjoni Ewropea”. [2] Il-proposta hija konsistenti mal-Komunikazzjoni tal-Kummissjoni “Navvanzaw l-użu sostenibbli tar-riżorsi: Strateġija Tematika dwar il-prevenzjoni u r-riċiklaġġ ta’ l-iskart"[3], fejn wieħed mill-għanijiet prinċipali huwa l-prevenzjoni ta’ l-iskart biex tiżdied l-effiċjenza fl-użu tar-riżorsi. 2) Il-konsultazzjoni mal-partijiet interessati u l-valutazzjoni ta’ l-impatt - Il-konsultazzjoni mal-partijiet interessati Il-partijiet interessati ma ġewx ikkonsultati b'mod formali, minħabba l-urġenza tal-proposta u għaliex din il-proposta hija maħsuba biss biex tiċċara dispożizzjoni waħda tad-Direttiva 2006/66/KE. - Il-ġbir u l-użu ta' għarfien espert Ma kien hemm l-ebda ħtieġa ta’ għarfien espert estern. - Il-valutazzjoni ta’ l-impatt Għal din il-proposta, ma nħassitx il-ħtieġa għal tħejjija ta’ valutazzjoni ta’ l-impatt sħiħa, peress li l-proposta tiċċara biss dispożizzjoni waħda tad-Direttiva 2006/66/KE biex tagħti ċertezza legali dwar din il-miżura. Diġà saret valutazzjoni ta’ l-impatt bħala tħejjija għad-Direttiva 2006/66/KE[4] dwar il-batteriji. Jekk il-batteriji li jkunu tqiegħdu b’mod legali fis-suq qabel is-26 ta’ Settembru 2008 jkollhom jiġu rtirati mis-suq wara din id-data minħabba nuqqas ta’ konformità mad-Direttiva 2006/66/KE, dan iħalli impatt negattiv fuq l-ambjent, minħabba l-iskart addizzjonali li jinħoloq, flimkien mar-riżorsi ġodda u t-trasport addizzjonali li jsiru meħtieġa. L-ittikkettjar mill-ġdid u l-irtirar tal-batteriji mis-suq iħallu effett negattiv fuq l-ekonomija minħabba l-piż amministrattiv li joħolqu. Pereżempju, xi stimi jindikaw li jekk jitqiesu biss batteriji primarji li mhumiex konformi mar-rekwiżiti ta’ l-ittikkettjar u li jkollhom jiġu rtirati mis-suq, dawn waħidhom jiġġeneraw 123000 tunnellata ta’ skart qabel iż-żmien, fuq il-livell ta’ l-UE. L-istimi jindikaw li l-ittikkettjar mill-ġdid ta’ parti waħda biss mill-batteriji fl-UE li jistgħu jiġu ċċarġjati mill-ġdid, batteriji li jintużaw fil-laptops, għodda mħaddma bl-enerġija mingħajr fil u mowbajls, biex isiru konformi mar-rekwiżiti ta’ l-ittikkettjar tad-Direttiva 2006/66/KE jiswa 400 miljun ewro[5]. Il-miżura proposta ma taffettwax ħażin l-għan ta' protezzjoni ta’ l-ambjent tad-Direttiva 2006/66/KE, peress li kull ma tagħmel hu li tiċċara l-intenzjoni oriġinali tagħha. 3) L-elementi ġuridiċi tal-proposta - Sommarju ta’ l-azzjoni proposta Din il-proposta tiċċara l-Artikolu 6(2) tad-Direttiva 2006/66/KE. Tiċċara li wara s-26 ta’ Settembru 2008, dawk il-batteriji li ma jkunux konformi mad-Direttiva 2006/66/KE ma għandhomx jitqiegħdu fis-suq. Jekk jitqiegħdu fis-suq wara din id-data, ikollhom jiġu rtirati mis-suq. B’hekk, il-proposta tiċċara li l-batteriji li jitqiegħdu b'mod legali fis-suq qabel is-26 ta' Settembru 2008 u li jkunu fis-suq wara din id-data iżda s’issa għadhom mhumiex konformi mad-Direttiva 2006/66/KE, ma għandhomx għalfejn jiġu rtirati mis-suq jew ittikkettjati mill-ġdid wara din id-data. Permezz tal-kjarifika ta’ din id-dispożizzjoni, il-proposta tagħti ċertezza legali dwar din il-kwistjoni. - Bażi ġuridika Il-proposta hija bbażata fuq l-Artikolu 95 tat-Trattat tal-KE, peress li l-Artikolu 6 tad-Direttiva 2006/66/KE huwa bbażat fuq dan l-Artikolu. - Il-prinċipju tas-sussidjarjetà Il-prinċipju tas-sussidjaretà japplika sakemm il-proposta ma taqax taħt il-kompetenza esklussiva tal-Komunità. L-għan ta’ l-azzjoni proposta ma jistax jintlaħaq sew mill-Istati Membri, minħabba li huma meħtieġa sforzi armonizzati biex jiġi żgurat il-funzjonament bla xkiel tas-suq intern. - Il-prinċipju tal-proporzjonalità L-azzjoni proposta ma tmurx lil hinn min-neċessarju, peress li tillimita ruħha biss għall-Artikolu 6(2) tad-Direttiva 2006/66/KE. Għalhekk, il-proposta tirrispetta l-prinċipju tal-proporzjonalità. - L-għażla ta’ l-istrumenti Peress li l-proposta tindirizza l-modifika ta’ Artikolu ta’ Direttiva, l-istrument magħżul huwa Direttiva wkoll. 4) L-implikazzjonijiet għall-baġit Il-proposta m’għandha l-ebda implikazzjoni għall-baġit Komunitarju. 5) Informazzjoni addizzjonali - Simplifikazzjoni Din il-proposta tiċċara u tissimplifika l-proċeduri amministrattivi kemm għall-awtoritajiet pubbliċi kif ukoll għall-industrija. Tnaqqas il-piż amministrattiv meħtieġ għall-ittikkettjar mill-ġdid, bis-simbolu grafiku li jindika li huma skart u bis-simboli kimiċi, ta’ batteriji li jitqiegħdu b’mod legali fis-suq qabel is-26 ta’ Settembru 2008 u li jkunu għadhom fis-suq wara din id-data. Għall-awtoritajiet pubbliċi, din il-proposta tissimplifika l-infurzar tad-Direttiva dwar il-batteriji. - Iż-Żona Ekonomika Ewropea Il-proposta tikkonċerna kwistjoni taż-ŻEE u għalhekk għandha tkun estiża għaż-Żona Ekonomika Ewropea. 2008/0081 (COD) Proposta għal DIRETTIVA TAL-PARLAMENT EWROPEW U TAL-KUNSILL li temenda d-Direttiva 2006/66/KE tal-Parlament Ewropew u tal-Kunsill dwar batteriji u akkumulaturi u skart ta' batteriji u akkumulaturi fir-rigward ta' l-Artikolu 6(2) dwar it-tqegħid fis-suq ta’ batteriji u akkumulaturi (Test b’rilevanza għaż-ŻEE) IL-PARLAMENT EWROPEW U L-KUNSILL TA’ L-UNJONI EWROPEA, Wara li kkunsidra it-Trattat li jistabbilixxi l-Komunità Ewropea, u b'mod partikolari l-Artikolu 95 (1) tiegħu, Wara li kkunsidraw il-proposta mill-Kummissjoni[6], Wara li kkunsidraw l-opinjoni tal-Kumitat Ekonomiku u Soċjali Ewropew[7], Wara li kkunsidraw l-opinjoni tal-Kumitat tar-Reġjuni[8], Filwaqt li jaġixxu skond il-proċedura stipulata fl-Artikolu 251 tat-Trattat[9] Billi: (1) L-Artikolu 6(2) tad-Direttiva 2006/66/KE tal-Parlament Ewropew u tal-Kunsill[10] jeħtieġ li jiġi ċċarat sabiex il-batteriji u l-akkumulaturi li jitqiegħdu b’mod legali fis-suq fi kwalunkwe parti tal-Komunità qabel is-26 ta’ Settembru 2008 u li mhumiex konformi mad-Direttiva 2006/66/KE jkunu jistgħu jibqgħu fis-suq Komunitarju wara din id-data. Din il-kjarifika tagħti ċ-ċertezza legali fir-rigward ta’ batteriji li jkunu tqiegħdu fis-suq fi Stati Membri ta' l-UE u tiżgura l-funzjonament bla xkiel tas-suq intern. Il-kjarifika hija konsistenti mal-prinċipju tal-minimizzazzjoni ta’ l-iskart u għandha tnaqqas il-piż amministrattiv. (2) Id-Direttiva 2006/66/KE għalhekk għandha tiġi emendata skond dan. ADOTTAW DIN ID-DIRETTIVA: Artikolu 1 Emenda għad-Direttiva 2006/66/KE L-Artikolu 6(2) tad-Direttiva 2006/66/KE jinbidel b’dan li ġej: "2. L-Istati Membri għandhom jieħdu l-miżuri neċessarji biex jiżguraw li, wara s-26 ta’ Settembru 2008, ma jitqiegħdux fis-suq batteriji jew akkumulaturi li ma jissodisfawx ir-rekwiżiti ta' din id-Direttiva. Jekk batteriji u akkumulaturi li ma jissodisfawx ir-rekwiżiti ta' din id-Direttiva jitqiegħdu fis-suq wara din id-data għandhom jiġu rtirati." Artikolu 2 Traspożizzjoni 1. L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa sabiex jiġu konformi ma' din id-Direttiva sas-26 ta' Settembru 2008. Għandhom jikkomunikaw minnufih lill-Kummissjoni t-test ta’ dawk id-dispożizzjonijiet u t-tabella ta’ korrelazzjoni bejn dawk id-dispożizzjonijiet u din id-Direttiva. Meta l-Istati Membri jadottaw dawk id-dispożizzjonijiet, dawn għandhom ikollhom referenza għal din id-Direttiva jew għandhom ikunu akkumpanjati b’tali referenza dakinhar tal-pubblikazzjoni uffiċjali tagħhom. L-Istati Membri għandhom jistabbilixxu kif għandha ssir it-tali referenza. 2. L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li huma jadottaw fil-qasam kopert b’din id-Direttiva. Artikolu 3 Dħul fis-seħħ Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha fil- Ġurnal Uffiċjali ta' l-Unjoni Ewropea . Artikolu 4 Destinatarji Din id-Direttiva hija indirizzata lill-Istati Membri. Magħmul fi Brussell, Għall-Parlament Ewropew Għall-Kunsill Il-President Il-President [1] COM(2003) 723 finali [2] COM(2008)141 [3] COM(2005) 666 finali [4] COM(2003) 723 finali [5] Dejta: Dokument ta’ pożizzjoni ta’ l-industrija (Recharge, Eicta, EPBA, EPTA AeA) tas-7 ta’ Marzu 2008 dwar il-Konformità mad-Direttiva 2006/66/KE dwar il-batteriji [6] ĠU C , , p. . [7] ĠU C , , p. . [8] ĠU C , , p. . [9] ĠU C , , p. . [10] ĠU L 266, 26.09.2006, p. 1. Direttiva kif emendata bid-Direttiva 2008/12/KE (ĠU L 76, 19.03.2008, p. 39).