52007PC0268

[pic] | KUMMISSJONI TAL-KOMUNITAJIET EWROPEJ |

Brussel 23.5.2007

KUMM(2007) 268 finali

2007/0095 (CNS)

Proposta għal

REGOLAMENT TAL-KUNSILL

dwar azzjonijiet ta’ informazzjoni u promozzjoni għall-prodotti agrikoli fis-suq intern u fil-pajjiżi terzi

(preżentata mill-Kummissjoni)

MEMORANDUM TA’ SPJEGAZZJONI

Skond ir-Regolament tal-Kunsill (KE) Nru 2702/1999 dwar miżuri sabiex jipprovdu t-tagħrif fuq, u jippromwovu, il-prodotti agrikoli f'pajjiżi terzi u r-Regolament tal-Kunsill (KE) Nru 2826/2000 dwar l-azzjonijiet ta' tagħrif u ta' promozzjoni għall-prodotti agrikoli fis-suq intern, il-Komunità tista' twettaq azzjonijiet ta' promozzjoni fis-suq intern u fis-swieq ta' pajjiżi terzi, għal ċertu numru ta' prodotti agrikoli.

Fid-dawl tal-qagħda tas-swieq sew ġewwa kif ukoll barra l-Komunità, kif ukoll tal-kuntest tal-kummerċ internazzonali, deher f'loku li, permezz tar-Regolamenti msemmija hawn fuq, tiġi żviluppata politika globali u koerenti ta' l-informazzjoni u l-promozzjoni, li madankollu tibqa' sserraħ fuq żewġ assi li jinżammu distinti minn xulxin: is-suq intern u s-swieq ta' pajjiżi terzi.

Din il-politika kienet suppliment u tisħiħ siewi għall-azzjonijiet imwettqa mill-Istati Membri matul is-snin 2000, partikolarment billi ġiebet 'il quddiem l-immaġni ta' dawn il-prodotti fost il-konsumaturi fil-Komunità u fil-pajjiżi terzi, speċjalment f'dak li jirrigwarda l-kwalità, l-aspetti nutrittivi u dawk tas-sikurezza ta' l-oġġetti ta' l-ikel u tal-modi ta' produzzjoni. Attività bħal din, billi tgħin li jinfetħu swieq ġodda, ħalliet ukoll li jkun hemm effett multiplikattiv fuq inizjattivi nazzjonali u privati.

Fid-dawl ta' l-esperjenza miksuba matul l-aħħar snin, u f'perspettiva ta' simplifikazzjoni, jeħtieġ li jiġi adottat qafas ġuridiku wieħed għall-promozzjoni tal-prodotti agrikoli fis-suq intern u fis-swieq ta' pajjiżi terzi, filwaqt li jinżammu l-ispeċifiċitajiet ta' l-azzjonijiet skond fejn jitwettqu. Għal dan il-għan, qed jiġi propost li ż-żewġ Regolamenti (KE) Nru 2701/1999 u (KE) Nru 2826/2000 jitfasslu mill-ġdid u jinġabru f'Regolament wieħed.

Fl-aħħarnett, dan l-iżvilupp isegwi simplifikazzjoni oħra li saret fl-imgħoddi u li welldet iż-żewġ Regolamenti msemmija hawn fuq. Fil-fatt, sa tmiem id-Disgħinijiet, id-dispożizzjonijiet rigward il-miżuri ta' promozzjoni kienu jidhru f'Regolamenti settorjali differenti skond il-modalitajiet ta' l-implimentazzjoni tagħhom, u li kienu għaddew minn bosta bidliet. B'riżultat ta' dan, kienu diffiċili li jiġu applikati. Dak iż-żmien kien tqies xieraq li jiġu armonizzati u ssimplifikati permezz ta' l-adozzjoni tar-Regolamenti msemmija hawn fuq, filwaqt i jitħassru d-dispożizzjonijiet u r-Regolamenti settorjali li qabel kienu fis-seħħ f'dak li jirrigwarda l-promozzjoni.

Qafas ġuridiku wieħed, bħal dak li qiegħed jiġi propost illum, lill-atturi tal-politika ta' promozzjoni jiffaċilitalhom l-aċċess għas-sistema u l-parteċipazzoni fiha. Żvilupp ta' dan it-tip ukoll ikun jista' jnaqqas u jissimplifika konsiderevolment il-proċeduri amministrattivi involuti fl-implimentazzjoni ta' din il-politika.

2007/0095 (CNS)

Proposta għal

REGOLAMENT TAL-KUNSILL

dwar azzjonijiet ta’ informazzjoni u promozzjoni għall-prodotti agrikoli fis-suq intern u fil-pajjiżi terzi

IL-KUNSILL TA’ L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b’mod partikulari l- Artikoli 36 u 37 tiegħu,

Wara li kkunsidra l-proposta tal-Kummissjoni[1],

Wara li kkunsidra l-opinjoni tal-Parlament Ewropew[2],

Billi:

(1) Skond ir-Regolament tal-Kunsill (KE) Nru 2826/2000 dwar l-azzjonijiet ta' tagħrif u ta' promozzjoni għall-prodotti agrikoli fis-suq intern[3] u r-Regolament tal-Kunsill (KE) Nru 2701/1999 dwar miżuri sabiex jipprovdu t-tagħrif fuq, u jippromwovu, il-prodotti agrikoli f'pajjiżi terzi[4], il-Komunità tista' twettaq azzjonijiet ta' informazzjoni u ta' promozzjoni fis-suq intern u fis-swieq ta' pajjiżi terzi, għal ċertu numru ta' prodotti agrikoli. Ir-riżultati sa issa kienu inkoraġġanti ħafna.

(2) Fid-dawl ta' l-esperjenza miksuba, il-prospettivi ta' l-iżvilupp tas-swieq sew ġewwa kif ukoll barra l-Komunità, kif ukoll tal-kuntest tal-kummerċ internazzjonali, huwa f'loku li tiġi żviluppata politika globali u koerenti ta' l-informazzjoni u l-promozzjoni dwar il-prodotti agrikoli u l-modi ta' produzzjoni tagħhom flimkien mal-prodotti ta' l-ikel ibbażati fuq il-prodotti agrikoli, fis-suq intern u fis-swieq ta' pajjiż terzi, madankollu, mingħajr ma tħajjar għall-konsum ta' prodott abbażi ta' l-oriġini partikolari tiegħu. Għal finijiet ta' ċarezza, jeħtieġ li jitħassru r-Regolamenti (KE) Nru 2702/1999 u (KE) Nru 2826/2000, u li jinbidlu b'Regolament wieħed, filwaqt li jinżammu l-ispeċifiċitajiet ta' l-azzjonijiet skond fejn isiru.

(3) Din il-politika tissupplimenta u ssaħħaħ b'mod siewi l-azzjonijiet imwettqa mill-Istati Membri, partikolarment billi ġġib 'il quddiem l-immaġni ta' dawn il-prodotti fost il-konsumaturi fil-Komunità u fil-pajjiżi terzi, speċjalment f'dak li jirrigwarda l-kwalità, l-aspetti nutrittivi u dawk tas-sikurezza ta' l-oġġetti ta' l-ikel u tal-modi ta' produzzjoni. Attività bħal din, billi tgħin li jinfetħu swieq ġodda f'pajjiżi terzi, x'aktarx ukoll li jkollha effett moltiplikattiv fuq l-inizjattivi nazzjonali u privati.

(4) Jeħtieġ li jiġu definiti l-kriterji ta' l-għażla tas-setturi u l-prodotti kkonċernati, kif ukoll it-temi u s-swieq li se jaħdmu fuqhom il-programmi Komunitarji.

(5) Jeħtieġ li l-azzjonijiet ta' informazzjoni u promozzjoni għall-prodotti agrikoli fil-pajjiżi terzi jirrigwardaw sew il-prodotti li jibbenefikaw minn rifużjonijiet ta' l-esportazzjoni kif ukoll oħrajn li ma jibbenefikawx minnhom.

(6) It-twettiq ta' l-azzjonijiet jeħtieġlu jkun żgurat fil-qafas ta' programmi ta' informazzjoni u promozzjoni. Jeħtieġ li, f'dak li jirrigwarda l-azzjonijiet li jridu jsiru fis-suq intern u biex jiġu żgurati l-koerenza u l-effikaċità tal-programmi, jiġi pprovdut dwar l-istabbiliment ta' linji ta' gwida li, għal kull prodott jew settur ikkonċernat, jiddefinixxu l-orjentamenti ġenerali rigward il-fatturi essenzjali tal-programmi kkonċernati.

(7) Fid-dawl tal-karattru tekniku tal-ħidmiet li jridu jsiru, jeħtieġ li l-Kummissjoni tkun tista' tirrikorri għal kumitat ta' esperti fil-komunikazzjoni jew għal assistenti tekniċi.

(8) Jeħtieġ li jiġu definiti l-kriterji tal-finanzjament ta' l-azzjonijiet. B'regola ġenerali, huwa f'loku li l-Komunità tassumi biss parti mill-ispejjeż ta' l-azzjonijiet, sabiex tirresponsabilizza sew lill-organizzazzjonijiet li jkunu qed jipproponuhom kif ukoll lill-Istati Membri kkonċernati. Madankollu, f'xi każijiet eċċezzjonali, jista' jkun f'loku li l-Istat Membru kkonċernat ma jiġix obbligat jieħu sehem finanzjarju. F'dak li jirrigwarda l-informazzjoni dwar is-sistemi Komunitarji dwar l-oriġini, il-produzzjoni organika u t-tikkettar, kif ukoll is-simboli grafiċi li dwarhom jipprovdu r-regolamenti dwar l-agrikoltura, partikolarment għar-reġjuni l-aktar periferiċi, jista' jkun ġustifikat finanzjament bi sħab bejn il-Komunità u l-Istati Membri, minħabba l-ħtieġa ta' tagħrif adegwat dwar dawn il-miżuri li huma relattivament riċenti.

(9) Huwa f'loku li jiġi pprovdut li t-twettiq ta' l-azzjonijiet jiġi fdat, bi proċeduri adegwati, f'idejn organizzazzjonijiet li jkolhom l-istruttura u l-kompetenzi meħtieġa, sabiex jiġi żgurat li l-azzjonijiet magħżula jagħtu l-aħjar riżultat għan-nefqa.

(10) Minħabba l-esperjenza miksuba u r-riżultati milħuqa mill-Kunsill Internazzjonali taż-żejt taż-żebbuġa, huwa f'loku, madankollu, li jiġi pprovdut li l-Komunità tkun tista' tkompli tafda f'idejh it-twettiq ta' azzjonijiet fil-qasam tal-kompetenza tiegħu. Jeħtieġ ukoll li tkun tista' tirrikorri għall-għajnuna ta' organizzazzjonijiet internazzjonali simili li hemm għal prodotti oħra.

(11) Bil-għan li jkun hemm verifika sew tat-twettiq tajjeb tal-programmi kif ukoll ta' l-impatt ta' l-azzjonijiet, jeħtieġ li jkun ipprovdut monitoraġġ effikaċi min-naħa ta' l-Istati Membri, kif ukoll valutazzjoni tar-riżultati min-naħa ta' organizzazzjoni indipendenti.

(12) Jeħtieġ li l-infiq relatat mal-finanzjament ta' l-azzjonijiet li dwarhom jipprovdi dan ir-Regolament jiġi ttrattat, skond il-każ, f'konformità ma' l-Artikolu 3(1)(d), jew l-Artikolu 3(2)(b), tar-Regolament tal-Kunsill (KE) Nru 1290/2005 tal-21 ta' Ġunju 2005 dwar il-finanzjament tal-politika agrikola komuni[5].

(13) Jeħtieġ li jiġu deċiżi l-miżuri meħtieġa għall-implimentazzjoni ta' dan ir-Regolament preżenti, f'konformità mad-Deċiżjoni tal-Kunsill 1999/468/KE tat-28 ta' Ġunju 1999 li tipprovdi l-proċeduri għall-eżerċizzju tas-setgħat ta' l-implimentazzjoni konferiti fuq il-Kummissjoni[6],

ADOTTA DAN IR-REGOLAMENT:

Artikolu 1 Is-suġġett u l-ambitu

1. L-azzjonijiet ta' informazzjoni u promozzjoni tal-prodotti agrikoli u tal-mod ta' produzzjoni tagħhom kif ukoll tal-prodotti ta' l-ikel ibbażati fuq prodotti agrikoli, li jsiru fis-suq intern jew fil-pajjiżi terzi u li jissemmew fl-Artikolu 2, fil-kundizzjonijiet ipprovduti f'dan ir-Regolament, jistgħu jiġu ffinanzjati mill-baġit tal-Komunità, għal kollox jew parzjalment.

Dawn l-azzjonijiet għandhom ikunu implimentati fil-qafas ta' programm ta' informazzjoni u promozzjoni.

2. L-azzjonijiet imsemmija fil-paragrafu 1 la għandhom ikunu orjentati skond marki kummerċjali u lanqas iħajru għall-konsum ta' prodott skond l-oriġini partikolari tiegħu. L-oriġini ta' prodott li jkun is-suġġett ta' azzjoni madankollu jista' jiġi indikat, meta din id-deżinjazzjoni tkun qiegħda ssir skond ir-regoli tal-Komunità.

Artikolu 2Azzjonijiet ta' informazzjoni u promozzjoni

1. L-azzjonijiet imsemmija fl-Artikolu 1(1) huma dawn li ġejjin:

a) Azzjonijiet ta' relazzjonijiet pubbliċi, ta' promozzjoni pubbliċità, partikolarment bil-għan li jenfasizzaw il-karatteristiċi intrinsiċi u l-vantaġġi tal-prodotti Komunitarji, partikolarment f'dak li jirrigwarda l-kwalità, is-sikurezza ta' l-oġġetti ta' l-ikel, il-metodi tal-produzzjoni speċifiċi, l-aspetti nutrittivi u tas-saħħa, it-tikkettar, il-benessri ta' l-annimali u r-rispett ta' l-ambjent.

b) Kampanji ta' informazzjoni, partikolarment dwar is-sistemi Komunitarji rigward l-denominazzjonijiet ta' l-oriġini protetti (DOP), l-indikazzjonijiet ġeografiċi protetti (IOP), l-ispeċjalitajiet tradizzjonali ggarantiti (STG) u l-produzzjoni organika, kif ukoll rigward sistemi oħra tal-Komunità li jikkonċernaw l-istandards tal-kwalità u t-tikkettar tal-prodotti agrikoli u ta' l-oġġetti ta' l-ikel u dwar is-simboli grafiċi pprovduti bil-leġiżlazzjoni applikabbli tal-Komunità;

c) Azzjonijiet ta' informazzjoni dwar is-sistema Komunitarja ta' l-inbejjed ta' kwalità prodotti f'reġjuni speċifikati (n.k.p.r.s.), inbejjed b'indikazzjoni ġeografika u xarbiet alkoħoliċi b'indikazzjoni ġeografika jew indikazzjoni tradizzjonali riservata;

d) Studji ta' valutazzjoni tar-riżultati ta' azzjonijiet ta' informazzjoni u promozzjoni.

2. Fis-suq intern, l-azzjonijiet imsemmija fl-Artikolu 1(1) jistgħu jieħdu s-sura ta' parteċipazzjoni f'wirjiet, fieri u espożizzjonijiet ta' importanza nazzjonali jew Ewropea, partikolarment bil-ħolqien ta' posti maħsuba biex jivvalorizzaw l-immaġni tal-prodotti Komunitarji.

3. Fil-pajjjiżi terzi, l-azzjonijiet imsemmija fl-Artikolu 1(1) jistgħu wkoll jieħdu s-suriet li ġejjin:

a) azzjonijiet ta' informazzjoni dwar is-sistema Komunitarja ta' l-inbejjed tal-mejda;

b) parteċipazzjoni f'wirjiet, fieri u espożizzjonijiet ta' importanza internazzjoali, partikolarment bil-ħolqien ta' posti maħsuba biex jivvalorizzaw l-immaġni tal-prodotti Komunitarji;

c) studji ta' swieq ġodda, meħtieġa għat-tkabbir tas-swieq;

d) missjonijiet kummerċjali ta' livell għoli.

Artikolu 3Is-setturi u l-prodotti kkonċernati

1. Is-setturi u l-prodotti li jistgħu jiġu koperti bl-azzjonijiet imsemmija fl-Artikolu 1(1) fis-suq intern għandhom jiġu stabbiliti billi jitqiesu l-kriterji li ġejjin:

a) l-opportunità tal-valorizzazzjoni tal-kwalità, tal-karattru tipiku, tal-metodi speċifiċi ta' produzzjoni, ta' l-aspetti nutrittivi u tas-saħħa, tas-sikurezza alimentari, tal-benessri ta' l-annimali jew tar-rispett ta' l-ambjent tal-prodotti kkonċernati, permezz ta' kampanji tematiċi jew indirizzati lejn pubbliku partikolari ta' mira;

b) il-prattika ta' sistema ta' tikkettar li tgħarrraf lill-konsumaturi, u ta' sistemi għat-traċċabbiltà u l-kontroll tal-prodotti;

c) il-ħtieġa li jiġu affrontati problemi speċifiċi jew ekonomiċi f'settur partikolari;

d) l-opportunità li jingħata tagħrif dwar is-sinifikat tas-sistemi Komunitarji rigward id-DOP/IĠP, l-STG u l-prodotti organiċi;

e) l-opportunità li jingħata tagħrif dwar is-sinifikat tas-sistema Komunitarja rigward l-n.k.p.r.s., inbejjed b'indikazzjoni ġeografika u xarbiet alkoħoliċi b'indikazzjoni ġeografika jew indikazzjoni tradizzjonali riservata.

2. Għandhom ikunu eliġibbli għall-azzjonijiet imsemmija fl-Artikolu1(1), li jsiru f'pajjiżi terzi, b'mod partikolari l-prodotti li ġejjin:

a) prodotti maħsuba għall-konsum dirett jew għall-ipproċessar, li għalihom hemm opportunitajiet ta' esportazzjoni jew possibbiltajiet ta' swieq ġodda fil-pajjiżi terzi, partikolarment mingħajr l-għoti ta' rifużjonijiet;

b) prodotti tipiċi jew ta' kwalità b'valur miżjud qawwi.

Artikolu 4Il-listi ta' temi, prodotti u pajiżi li jistgħu jkunu s-suġġetti ta' azzjonijiet

Il-Kummissjoni għandha tiddetermina, skond il-proċedura msemmija fl-Artikolu 16(2), l-elenki ta' temi u prodotti msemmija fl-Artikolu 3, kif ukoll tal-pajjiżi terzi kkonċernati. Dawn l-elenki għandhom jiġu riveduti kull sentejn. Madankollu, fejn meħtieġ, dawn l-elenki jistgħu jiġu emendati fl-intervall, bl-istess proċedura.

Meta jkunu qed jintgħażlu l-pajjiżi terzi, għandhom jitqiesu s-swieq tal-pajjżi li fihom hemm domanda reali jew potenzjali.

Artikolu 5Linji ta’ gwida

1. Għall-promozzjoni fis-suq intern, għal kull settur jew prodott magħżul, il-Kummissjoni għandha tistabbilixxi, skond il-proċedura msemmija fl-Artikolu 16(2), il-linji ta' gwida li jiddefinixxu l-modalitajiet ta' l-istrateġija li għandha tiġi segwita għall-proposti ta' programmi ta' informazzjoni u promozzjoni.

Dawn il-linji ta' gwida għandhom jagħtu indikazzjonijiet ġenerali, b'mod partikolari dwar:

a) l-għanijiet u l-miri li għandhom jintlaħqu;

b) l-indikazzjoni ta' temi jew temi li għandhom ikunu s-suġġett ta' l-azzjonijiet magħżula;

c) it-tipi ta' azzjonijiet li għandhom jittieħdu;

d) it-tul taż-żmien ta' dawn il-programmi;

e) skond is-swieq u t-tipi ta' l-azzjonijiet previsti, it-tqassim indikattiv tas-somma disponibbli għall-parteċipazzjoni finanzjarja tal-Komunità fit-twettiq tal-programmi.

2. Għall-promozzjoni fil-pajjiżi terzi, il-Kummissjoni tista' tistabbilixxi, skond il-proċedura msemmija fl-Artikolu 16(2), linji ta' gwida li jiddefinixxu l-modalitajiet ta' l-istrateġija li għandha tiġi segwita għall-proposti ta' programmi ta' informazzjoni u promozzjoni, għall-prodotti kollha msemmija fl-Artikolu 3(2) jew għal uħud minnhom.

Artikolu 6L-organizzazzjonijiet inkarigati bit-twettiq ta' azzjonijiet ta' informazzjoni u promozzjoni

1. Għat-twettiq ta' l-azzjonijiet imsemmija fl-Artikolu 2(1)(a), (b) u (c), il-paragrafu 2, u l-paragrafu 3(a), (b) u (c), f'konformità mal-linji ta' gwida msemmija fl-Artikolu 5(1), u b'riserva tal-paragrafu 2 ta' l-Artikolu preżenti, l-organizzazzjoni(jiet) professjonali jew interprofessjonali rappreżentattiva/i tas-settur(i) kkonċernat(i) fi Stat Membru jew għadd ta' Stati Membri, jew fuq il-livell Komunitarju, għandha/hom tistabbilixxi/jistabbilixxu proposti għal programmi ta' informazzjoni u promozzjoni ta' tul massimu ta' tliet snin.

2. Meta l-azzjonijiet ta' promozzjoni f'pajjiżi terzi jiġu deċiżi fis-settur taż-żejt taż-żebbuġa u taż-żebbuġ tal-mejda, il-Komunità tista' twettaqhom permezz tal-Kunsill Internazzjonali għaż-żejt taż-żebbuġa.

Għas-setturi l-oħra, il-Komunità tista' tfittex l-għajnuna ta' organizzazzjonijiet internazzjonali li joffru garanziji simili.

Artikolu 7It-tfassil u t-trażmissjoni tal-programmi ta' informazzjoni u promozzjoni

1. L-Istati Membri għandhom jiddefinixxu l-ispeċifikazzjonijiet li jipprovdu dwar il-kundizzjonijiet u l-kriterji għall-valutazzjoni tal-programmi ta' informazzjoni u promozzjoni.

L-Istati(i) Membru/i kkonċernat(i) għandu/hom jeżamina(w) kemm ikunu opportuni l-proposti ta' programmi, u jivverifika(w) il-konformità tagħhom mad-dispożizzjonijiet ta' dan ir-Regolament, flimkien mal-linji ta' gwida mfassla skond l-Artikolu 5 u ma' l-ispeċifikazzjonijiet rispettivi tagħhom. Għandhom ukoll jivverifikaw li l-programmi kkonċernati joffru valur tajjeb għan-nefqa.

Wara li jeżamina(w) il-programmi(i), l-Istati(i) Membru/i għandu/hom jistabbilixxi/u elenku tal-programmi magħżula, fil-limitu tal-krediti disponibbli, u għandu/hom jikkommetti/u nnifsu/nfushom għal sehem fil-finanzjament tagħhom.

2. L-Istati(i) Membru/i għandu/hom jibgħat/jibagħtu lill-Kummissjoni l-elenku tal-programmi msemmija fil-paragrafu 1, it-tielet inċiż, flimkien ma' kopja ta' dawn il-programmi.

Jekk lill-Kummissjoni jirriżultalha li programm li jkun ġie ppreżentat jew inkella wħud minn dawn l-azzjonijiet ma jkunx/ux konformi mad-dispożizzjonijiet Komunitarji, f'dak li jirrigwarda l-azzjonijiet li jsiru fis-suq intern, mal-linji ta' gwida msemmija fl-Artikolu 5, jew li ma joffrux valur tajjeb għall-infiq, fi żmien li għandu jiġi stabbilit skond il-proċedura msemmija fl-Artikolu 16(2), il-Kummissjoni għandha tinforma lill-Istat(i) Membru/i kkonċernat(i) bl-ineliġibbiltà tal-programm kollu jew ta' parti minnu. Fin-nuqqas ta' informazzjoni ta' dan it-tip matul dan il-perjodu, il-programm għandu jitqies eliġibbli.

L-Istati(i) Membru/i għandu/hom jikkunsidra(w) osservazzjonijiet li l-Kummissjoni tista' tagħmlilhom, u jibgħat/jibagħtu lil din ta' l-aħħar il-programmi riveduti bi qbil ma' l-organizzazzjoni(jiet) proponenti msemmija fl-Artikolu 6(1), fi żmien li għandu jiġi stabbilit skond il-proċedura msemmija fl-Artikolu 16(2).

Artikolu 8L-għażla tal-programmi ta' informazzjoni u promozzjoni

1. Il-Kumissjoni, skond il-proċedura msemmija fl-Artikolu 16(2), għandha tiddeċiedi dwar l-għażla tal-programmi u l-baġits korrispondenti. Il-prijorità għandha tingħata għall-programmi proposti minn diversi Stati Membri, jew li jipprevedu azzjonijiet f'diversi Stati Membri jew pajjiżi terzi.

2. F'konformità mal-proċedura msemmija fl-Artikolu 16(2), il-Kummissoni tista' tiddefinixxi limiti aktar baxxi jew ogħla f'dak li jirrigwarda l-ispiża reali tal-programmi magħżula skond il-paragrafu 1 ta' dan l-Artikolu. Dawn il-limiti jistgħu jinbidlu skond in-natura tal-programmi kkonċernati. Il-kriterji applikati jistgħu jiġu ddeterminati f'konformità mal-proċedura msemmija fl-Artikolu 16(2).

Artikolu 9Il-proċedura fin-nuqqas ta' programmi ta' azzjonijiet ta' informazzjoni għas-suq intern

1. Fin-nuqqas ta' programmi li għandhom isiru fis-suq intern, għal waħda jew aktar mill-azzjonijiet ta' informazzjoni msemmija fl-Artikolu 2(1)(b), ippreżentat(i) skond l-Artikolu 6(1), l-Istat(i) Membru/i kkonċernat(i) għandu/hom jiddefinixxi/u, fuq il-bażi tal-linji ta' gwida msemmija fl-Artikolu 5(1), programm u l-ispeċifikazzjoni tiegħu, u jagħżel/jagħżlu permezz ta' sejħa pubblika għall-offerti l-organizzazzjoni nkarigata bit-twettiq tal-programm li jkun(u) qiegħed/qegħdin jikkommetti/u lilu/lilhom nnifsu/nfushom għall-kofinanzjament tiegħu.

2. L-Istat(i) Membru/i għandu/hom iressqu lill-Kummissjoni l-programm magħżul skond il-paragrafu 1, flimkien ma' opinjoni motivata dwar:

a) kemm ikun opportun il-programm;

b) il-konformità tal-programm u ta' l-organizzazzjoni proposti mad-dispożizzjonijiet ta' dan ir-Regolament, u, jekk ikun il-każ, mal-linji ta' gwida applikabbli;

c) il-valutazzjoni tal-valur li l-programm joffri għan-nefqa.

3. Għall-finijiet ta' l-eżami tal-programmi min-naħa tal-Kummissjoni, għandhom japplikaw l-Artikolu 7(2) u l-Artikolu 8(1).

4. F'konformità mal-proċedura msemmija fl-Artikolu 16(2), il-Kummissoni tista' tiddefinixxi limiti aktar baxxi jew ogħla f'dak li jirrigwarda l-ispiża reali tal-programmi magħżula skond il-paragrafu 2 ta' l-Artikolu preżenti. Dawn il-limiti jistgħu jinbidlu skond in-natura tal-programmi kkonċernati. Il-kriterji applikati jistgħu jiġu ddeterminati skond il-proċedura msemmija fl-Artikolu 16(2).

Artikolu 10Azzjonijiet ta' informazzjoni u promozzjoni li għandhom isiru fuq inizjattiva tal-Kummissjoni

Wara l-informazzjoni tal-kumitati msemmija fl-Artikolu 16(1), miġburin f'laqgħa konġunta, jew jekk ikun il-każ, tal-kumitat stabbilit bl-Artikolu 14(1) tar-Regolament tal-Kunsill (KEE) Nru 2092/91[7], tal-kumitat permanenti għall-indikazzjonijiet ġeografiċi u d-denominazzjonijiet ġeografiċi protetti stabbilit bl-Artikolu 15(1) tar-Regolament tal-Kunsill Nru 510/2006[8] jew tal-kumitat permanenti għall-ispeċjalitajiet tradizzjonali ggarantiti stabbilit bl-Artikolu 18(1) tar-Regolement tal-Kunsill (KE) Nru 509/2006[9], il-Kummissjoni tista' tiddeċiedi li twettaq waħda jew aktar mill-azzjonijiet li ġejjin:

a) għal azzjonijiet li jkun għandhom isiru fis-suq intern u fil-pajjiżi terzi:

i) l-azzjonijiiet imsemmija fl-Artikolu 2(1)(d) ta' dan ir-Regolament;

ii) l-azzjonijiiet imsemmija fl-Artikolu 2(1)(b) u (c), u l-paragrafu 2, ta' dan ir-Regolament, meta l-azzjonijiet ikunu ta' interess Komunitarju jew meta ma tkun tressqet l-ebda proposta f'lokha skond l-Artikoli 6 u 9 ta' dan ir-Regolament;

b) għal azzjonijiet li jkun għandhom isiru fil-pajjiżi terzi:

i) l-azzjonijiiet imsemmija fl-Artikolu 2(3)(d) ta' dan ir-Regolament;

ii) l-azzjonijiiet imsemmija fl-Artikolu 2(1)(a), u l-paragrafu 3(a), (b) u (c), ta' dan ir-Regolament, meta l-azzjonijiet ikunu ta' interess Komunitarju jew meta ma tkun tressqet l-ebda proposta f'lokha skond l-Artikoli 6 u 9 ta' dan ir-Regolament;

Artikolu 11L-organizzazzjonijiet inkarigati bit-twettiq ta' dawn l-azzjonijiet

1. Il-Kummissjoni, abbażi ta' sejħa għall-offerti miftuħa jew ristretta, għandha tagħżel:

a) l-assistenti tekniċi li possibbilment ikunu meħtieġa għall-valutazzjoni tal-proposti ta' programmi, pprovduti bl-Artikolu 7(2), inklużi l-organizzazzjonijiet ta' twettiq proposti;

b) l-oragnizzazzjoni(jiet) inkarigata/i bit-twettiq ta' l-azzjonijiet imsemmija fl-Artikolu 10.

2. Wara kompetizzjoni bil-mezzi adegwati, l-organizzazzjoni proponenti għandha tagħżel l-organizzazzjonijiet li jimplimentaw il-programmi magħżula f'konformità ma' l-Artikolu 7(1).

Madankollu, f'ċerti kundizzjonijiet li għandhom jiġu determinati skond il-proċedura msemmija fl-Artikolu 16(2), l-organizzazzzjoni proponenti tista' tkun awtorizzata timplimenta hija stess ċerti partijiet tal-programm.

3. L-organizzazzjonijiet inkarigati bit-twettiq ta' azzjonijiet ta' informazzjoni u promozzjoni jeħtiġilhom ikollhom għarfien espert tal-prodotti u s-swieq ikkonċernati, u jiddisponu mill-mezzi meħtieġa biex jiżguraw it-twettiq l-aktar effikaċi possibbli ta' l-azzjonijiet, filwaqt li jqisu d-dimensjoni Komunitarja tal-programmi kkonċernati.

Artikolu 12 Il-monitoraġġ tal-programmi

1. Grupp tal-monitoraġġ, magħmul minn rappreżentanti tal-Kummissjoni, ta' l-Istati Membri kkonċernati u l-organizzazzjonijiet proponenti, għandu jiżgura l-monitoraġġ tal-programmi magħżula msemmija fl-Artikoli 8 u 9.

2. L-Istati Membri kkonċernati huma responsabbli għat-twettiq tajjeb tal-programmi magħżula msmemija fl-Artikoli 8 u 9, kif ukoll għall-ħlasijiet relatati. L-Istati Membri għandhom jieħdu ħsieb li l-materjal ta' informazzjoni u promozzjoni li jiġi prodott fil-kuntest tal-programmi msemmija jkun konformi mar-regoli Komunitarji.

Artikolu 13Il-Finanzjament

1. Bla ħsara għall-paragrafu 4 ta' dan l-Artikolu, il-Komunità għandha tiffinanzja l-azzjonijiet imsemmija fl-Artikolu 10 għal kollox. Il-Komunità għandha tiffinanzja għal kollox ukoll l-ispiża relatata għall-assitenti tekniċi magħżula skond l-Artikolu 11(1)(a).

2. Is-sehem finanzjarju tal-Komunità fil-programmi magħżula msemmija fl-Artikoli 8 u 9 ma għandux jaqbeż il-50% ta' l-ispiża reali tal-programmi. Fil-każ ta' programmi ta' informazzjoni u promozzjoni ta' tul ta' sentejn jew tliet snin, is-sehem għal kull sena ta' twettiq ma għandux jaqbeż dan il-livell massimu.

3. L-organizzazzjonijiet proponenti għandhom jieħdu sehem fil-finanzjament tal-programmi li jkunu pproponew talanqas għal-livell ta' 20% ta' l-ispiża reali tal-programmi, filwaqt li l-bqija tal-finanzjament għandu jsir mill-Istat(i) Membru/i kkonċernat(i), b'kunsiderazzjoni tas-sehem tal-Komunità msemmi fil-paragrafu 2.

Il-partijiet rispettivi ta' l-Istati Membri u ta' l-organizzazzjonijiet proponenti għandhom ikunu definiti meta l-programm jitressaq lill-Kummissjoni skond l-Artikolu 7(2).

Il-pagamenti li jagħmlu l-Istati Membri jew l-organizzazzjonijiet proponenti jistgħu jkunu ġejjin minn dħul parafiskali jew minn kontributi obbligatorji.

4. Fejn japplika l-Artikolu 6(2), il-Komunità, wara li tapprova l-programm, għandha tagħti kontribut adegwat lill-organizzazzjoni internazzjonali kkonċernata.

5. Għall-programmi msemmija fl-Artikolu 9, l-Istati Membri għandhom ikunu responsabbli minn dik il-parti tal-finanzjament mhux ipprovduta mill-Komunità.

Il-finanzjament min-naħa ta' l-Istati Membri jista' jkun ġej minn dħul parafiskali.

6. L-Artikoli 87, 88 u 89 tat-Trattat ma għandhomx japplikaw għas-sehem finanzjarju ta' l-Istati Membri, u lanqas għas-sehem finanzjarju li jkun ġej minn dħul parafiskali jew minn kontributi obbligatorji ta' l-Istati Membri jew ta' l-organizzazzjonijiet proponenti fil-każ tal-programmi li jistgħu jibbenefikaw minn appoġġ Komunitarju skond l-Artikolu 36 tat-Trattat, li l-Kummissjoni tkun għażlithom skond l-Artikolu 8(1) ta' dan ir-Regolament.

Artikolu 14L-infiq Komunitarju

Il-finanzjament Komunitarju ta' l-azzjonjiet imsemmija fl-Artikolu 1(1) ta' dan ir-Regolament għandu jsir, skond il-każ, f'konformità ma' l-Artikolu 3(1)(d), jew ma' l-Artikolu 3(2)(b), tar-Regolament (KE) Nru 1290/2005.

Artikolu 15Il-proċeduri ta' l-implimentazzjoni

Ir-regoli dettaljati għall-implimentazzjoni ta' dan ir-Regolament għandhom jiġu adottati skond il-proċedura msemmija fl-Artikolu 16(2).

Artikolu 16Kumitat

1. Il-Kummissjoni għandha tiġi megħjuna mill-Kumitat ta' Ġestjoni taż-żejt taż-żebbuġa u ż-żebbuġ tal-mejda stabbilit bl-Artikolu 18(1) tar-Regolament tal-Kunsill (KE) Nru 865/2004[10], u mill-Kumitati ta' Ġestjoni stabbiliti bl-Artikoli korrispondenti tar-Regolamenti l-oħra dwar l-organizzazzjoni komuni tas-swieq agrikoli (minn hawn 'il quddiem "il-Kumitati"). Il-Kumitati għandhom jaġixxu b'mod konġunt.

2. Meta ssir referenza għal dan il-paragrafu, għandhom japplikaw l-Artikoli 4 u 7 tad-Deċiżjoni 1999/468/KE.

Il-perjodu taż-żmien stabbilit fl-Artikolu 4(3) tad-Deċiżjoni 1999/468/KE għandu jiġi definit għal xahar.

3. Il-Kumitati għandhom jadottaw ir-regoli ta' proċedura tagħhom.

Artikolu 17Konsultazzjoni

Qabel ma l-Kummissjoni tistabbilixxi l-elenki pprovduti fl-Artikolu 4, tiddefinixxi l-linji ta' gwida pprovduti fl-Artikolu 5, tapprova l-programmi msemmija fl-Artikoli 6 u 9, tiddeċiedi dwar azzjonijiet skond l-Artikolu 10 jew tadotta l-proċeduri ta' applikazzjoni msemmija fl-Artikolu 15, tista' tikkonsulta:

a) il-grupp konsultattiv "promozzjoni tal-prodotti agrikoli" stabbilit bid-Deċiżjoni tal-Kummissjoni 2004/391/KE[11];

b) gruppi tekniċi ad hoc ta' ħidma, magħmula minn membri tal-Kumitati ta' Ġestjoni jew minn esperti fil-qasam tal-promozzjoni u tal-pubbliċità.

Artikolu 18Rapport

Qabel il-31 ta' Diċembru 2012, il-Kummissjoni għandha tippreżenta lill-Parlament Ewropew u lill-Kunsill rapport dwar l-applikazzjoni ta' dan ir-Regolament, kif ukoll kwakunkwe proposta li tkun f'lokha, jekk ikun il-każ.

Artikolu 19Revoka

Ir-Regolamenti (KE) Nru 2702/1999 u (KE) Nru 2826/2000 b'dan huma mħassra.

Ir-referenzi li jsiru għar-Regolamenti mħassra għandhom jiġu mifhuma li jkunu qed isiru għal dan ir-Regolament, u għandhom jinqraw skond it-tabella ta' korrispondenza li tingħata fl-Anness.

Artikolu 20Id-Dħul fis-seħħ

Dan ir-Regolament għandu jidħol fis-seħħ fis-seba' jum wara dak tal-pubblikazzjoni tiegħu fil- Ġurnal Uffiċjali ta' l-Unjoni Ewropea .

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, …

Għall-Kunsill

Il-President

ANNESS

TABELLA TA' KORRISPONDENZA msemmija fl-Artikolu 19

1. Ir-Regolament (KE) Nru 2702/1999

Ir-Regolament (KE) Nru 2702/1999 | Dan ir-Regolament |

Artikolu 1 | Artikolu 1 |

Artikolu 2 | Artikolu 2 |

Artikolu 3 | Artikolu 3(2) |

Artikolu 4 | l-Artikolu 3(2), l-aħħar subparagrafu |

Artikolu 5(1) | Artikolu 4 |

Artikolu 5(2) | Artikolu 5(2) |

Artikolu 6 | Artikolu 5(3) |

l-Artikolu 7(1), l-ewwel subparagrafu | Artikolu 6 |

Artikolu 7(1), it-tieni subparagrafu, u l-paragrafu 2 | Artikolu 7(1) |

Artikolu 7(3) | Artikolu 7(2) |

Artikolu 7(4), (5) u (6) | Artikolu 8 |

--- | Artikolu 9 |

Artikolu 7(a) | Artikolu 10 |

Artikolu 8(1) u (2) | Artikolu 11 |

Artikolu 8(3) u (4) | Artikolu 12 |

Artikolu 9(1) sa (4) | Artikolu 13(1) sa (4) |

--- | Artikolu 13(5) |

Artikolu 9(5) | Artikolu 13(6) |

Artikolu 10 | Artikolu 14 |

Artikolu 11 | Artikolu 15 |

Artikolu 12 | Artikolu 16 |

Artikolu 12(a) | Artikolu 17 |

Artikolu 13 | Artikolu 18 |

Artikolu 14 | Artikolu 19 |

Artikolu 15 | Artikolu 20 |

2. Ir-Regolament (KE) Nru 2826/2000

Ir-Regolament (KE) Nru 2826/2000 | Dan ir-Regolament |

Artikolu 1 | Artikolu 1 |

Artikolu 2 | Artikolu 2 |

Artikolu 3 | Artikolu 3(1) |

Artikolu 4 | Artikolu 4 |

Artikolu 5 | Artikolu 5(1) |

l-Artikolu 6(1), l-ewwel subparagrafu | Artikolu 6 |

Artikolu 6(1), it-tieni subparagrafu, u l-paragrafu 2 | Artikolu 7(1) |

Artikolu 6(3) | Artikolu 7(2) |

Artikolu 6(4) sa (6) | Artikolu 8 |

Artikolu 7 | Artikolu 9 |

Artikolu 7(a) | Artikolu 10 |

Artikolu 8 | Artikolu 11(1) |

Artikolu 9 | Artikolu 13 |

Artikolu 10(1) | Artikolu 11(2) |

Artikolu 10(2) u (3) | Artikolu 12 |

Artikolu 11 | Artikolu 14 |

Artikolu 12 | Artikolu 15 |

Artikolu 13 | Artikolu 16 |

Artikolu 13(a) | Artikolu 17 |

Artikolu 14 | Artikolu 18 |

Artikolu 15 | Artikolu 19 |

Artikolu 16 | --- |

Artikolu 17 | Artikolu 20 |

[pic][pic][pic]

[1] ĠU C ..., ..., p. .....

[2] ĠU C ..., ..., p. .....

[3] ĠU L 328, 23.12.2000, p. 2. Ir-Regolament kif emendat bir-Regolament (KE) Nru 2060/2004 (ĠU L 357, 2.12.2004, p. 3).

[4] ĠU L 327, 21.12.1999, p. 7. Ir-Regolament kif emendat bir-Regolament (KE) Nru 2060/2004.

[5] ĠU L 209, 11.8.2005, p. 1. Ir-Regolament kif emendat bir-Regolament (KE) Nru 320/2006 (ĠU L 58, 28.2.2006, p. 42).

[6] ĠU L 184, 17.7.1999, p. 23. Id-Deċiżjoni kif emendata bid-Deċiżjoni 2006/512/KE (ĠU L 200, 22.7.2006, p. 11).

[7] ĠU L 198, 22.7.1991, p. 1.

[8] ĠU L 93, 31.3.2006, p. 12.

[9] ĠU L 93, 31.3.2006, p. 1.

[10] ĠU L 161, 30.4.2004, p. 97. Il-verżjoni kkoreġuta fil-ĠU L 206, 9.6.2004, p. 37.

[11] ĠU L 120, 24.4.2004, p. 50.