52006PC0469

[pic] | KUMMISSJONI TAL-KOMUNITAJIET EWROPEJ |

Brussel 29.8.2006

KUMM(2006) 469 finali

2006/0160 (ACC)

Proposta għal

DEĊIŻJONI TAL-KUNSILL

rigward il-pożizzjoni li għandha tieħu l-Komunità fil-Kunsill Internazzjonali dwar l-Injam Tropikali fir-rigward ta’ l-estensjoni tal-Ftehim Internazzjonali dwar l-Injam Tropikali, 1994

(preżentata mill-Kummissjoni)

MEMORANDUM TA’ SPJEGAZZJONI

Il-Ftehim Internazzjonali dwar l-Injam Tropikali ta’ l-1994 daħal fis-seħħ fl-1 ta’ Jannar 1996. Dan jiskadi fil-31 ta’ Diċembru 2006, wara żewġ perjodi ta’ estensjoni.

F’Jannar 2006 ġie negozjat b’suċċess u konkluż fi ħdan il-UNCTAD Ftehim suċċessur tal-Ftehim Internazzjonali dwar l-Injam Tropikali ta’ l-1994.

Fl-erbgħin sessjoni tal-Kunsill Internazzjonali dwar l-Injam Tropikali, miżmuma bejn d-29 ta’ Mejju u t-3 ta’ Ġunju 2006 f’ Mérida (il-Messiku), saret proposta taħt id-dispożizzjonijiet ta’ l-Artikolu 46 tal-Ftehim Internazzjonali dwar l-Injam Tropikali ta’ l-1994 sabiex il-Ftehim jiġi estiż sa meta jidħol fis-seħħ il-Ftehim suċċessur ta’ l-2006.

Taħt il-bażi legali, id-deċiżjoni proposta ma teffettwax il-kontribuzzjoni tal-Komunità Ewropea għall-baġit amministrattiv ta’ l-Organizzazzjoni Internazzjonali dwar l-Injam Tropikali (ITTO), li għadha żero.

L-iskop ta’ din il-proposta huwa li l-Komunità tiġi awtorizzata tivvota favur l-estensjoni tal-Ftehim.

Il-Kummissjoni għalhekk tissuġġerixxi li l-Kunsill jadotta d-deċiżjoni annessa.

2006/0160 (ACC)

Proposta għal

DEĊIŻJONI TAL-KUNSILL

rigward il-pożizzjoni li għandha tieħu l-Komunità fil-Kunsill Internazzjonali dwar l-Injam Tropikali fir-rigward ta’ l-estensjoni tal-Ftehim Internazzjonali dwar l-Injam Tropikali, 1994

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u partikolarment l-Artikolu 133 flimkien ma’ l-Artikolu 300(2) tiegħu,

Wara li kkunsidra l-proposta mill-Kummissjoni[1],

Billi:

(1) Il-Ftehim Internazzjonali dwar l-Injam Tropikali ta’ l-1994 ġie ffirmat u applikat proviżorjament mill-Komunità permezz tad-Deċiżjoni tal-Kunsill 96/493/KE[2].

(2) F’Jannar 2006 ġie negozjat b’suċċess u konkluż fi ħdan il-UNCTAD Ftehim suċċessur tal-Ftehim Internazzjonali dwar l-Injam Tropikali ta’ l-1994.

(3) Il-Ftehim Internazzjonali dwar l-Injam Tropikali ta’ l-1994 jibqa’ fis-seħħ sal-31 ta’ Diċembru 2006 sakemm, skond id-dispożizzjonijiet ta’ l-Artikolu 46(3), ma jiġix estiż lilhinn minn dik id-data b’deċiżjoni tal-Kunsill Internazzjonali dwar l-Injam Tropikali sa meta jidħol fis-seħħ il-Ftehim suċċessur.

(4) L-estensjoni ta’ dak il-Ftehim hija fl-interess tal-Komunità.

(5) Il-pożizzjoni tal-Komunità Ewropea fil-Kunsill Internazzjonali dwar l-Injam Tropikali għandha tiġi determinata,

IDDEĊIEDA KIF ĠEJ:

Artikolu Uniku

Il-pożizzjoni tal-Komunità Ewropea fi ħdan il-Kunsill Internazzjonali Tropikali għandha tkun vot favur l-estensjoni tal-Ftehim Internazzjonali dwar l-Injam Tropikali, 1994, sa meta jidħol fis-seħħ b’mod proviżorju jew definittiv il-Ftehim suċċessur ta’ l-2006.

Magħmula fi Brussell, [...]

Għall-Kunsill

Il-President

[1] ĠU Cxxx p.xx

[2] ĠU L 208, tas-17.08.1996, p.1