This document is an excerpt from the EUR-Lex website
Document 52006AG0004
Common Position (EC) No 4/2006 of 23 January 2006 adopted by the Council, acting in accordance with the procedure referred to in Article 251 of the Treaty establishing the European Community, with a view to adopting a Directive of the European Parliament and of the Council on the protection of groundwater against pollution
Pożizzjoni Komuni (KE) Nru 4/2006, tat- 23 ta' Jannar 2006 , adottata mill-Kunsill, bi qbil mal-proċedura ta' l-Artikolu 251 tat-Trattat li jistabbilixxi l-Komunità Europea, bil-ħsieb ta' l-adozzjoni tad-Direttiva tal-Parlament Ewropew u tal-Kunsill dwar il-protezzjoni ta' l-ilma ta' taħt l-art kontra t-tniġġiż
Pożizzjoni Komuni (KE) Nru 4/2006, tat- 23 ta' Jannar 2006 , adottata mill-Kunsill, bi qbil mal-proċedura ta' l-Artikolu 251 tat-Trattat li jistabbilixxi l-Komunità Europea, bil-ħsieb ta' l-adozzjoni tad-Direttiva tal-Parlament Ewropew u tal-Kunsill dwar il-protezzjoni ta' l-ilma ta' taħt l-art kontra t-tniġġiż
ĠU C 126E, 30.5.2006, p. 1–15
(ES, CS, DA, DE, ET, EL, EN, FR, IT, LV, LT, HU, MT, NL, PL, PT, SK, SL, FI, SV)
30.5.2006 |
MT |
Il-Ġurnal Uffiċjali ta’ l-Unjoni Ewropea |
C NaN/1 |
POŻIZZJONI KOMUNI (KE) Nru 4/2006
adottata mill-Kunsill fit-23 ta' Jannar 2006
bil-ħsieb ta' l-adozzjoni tad-Direttiva (KE) Nru …/2006 tal-Parlament Ewropew u tal-Kunsill tal- …dwar il-protezzjoni ta' l-ilma ta' taħt l-art kontra t-tniġġiż
(2006/C 126 E/01)
IL-PARLAMENT EWROPEW U L-KUNSILL TA' L-UNJONI EWROPEA,
Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 175(1) tiegħu,
Wara li kkunsidraw il-proposta mill-Kummissjoni,
Wara li kkunsidraw l-Opinjoni tal-Kumitat Ekonomiku u Soċjali Ewropew (1),
Wara li kkunsidraw l-Opinjoni tal-Kumitat tar-Reġjuni (2),
Waqt li jaġixxu skond il-proċedura stabbilita fl-Artikolu 251 tat-Trattat (3),
Billi:
(1) |
L-ilma ta' taħt l-art huwa riżorsa naturali prezzjuża li għandha tiġi protetta mit-tniġġiż kimiku. Dan hu partikolarment importanti għall-ekosistemi li jiddependu mill-ilma ta' taħt l-art u għall-użu ta' l-ilma ta' taħt l-art fil-provvista ta' l-ilma għall-konsum mill-bniedem. |
(2) |
Id-Deċiżjoni Nru.1600/2002/KE tal-Parlament Ewropew u tal-Kunsill tat-22 ta' Lulju 2002 li tistabbilixxi s-Sitt Programm ta' Azzjoni tal-Komunità għall-Ambjent (4) tinkludi l-għan li jintlaħqu livelli fil-kwalità ta' l-ilma li ma jagħtux lok għall-impatti sinifikanti fuq is-saħħa tal-bniedem u l-ambjent u riskji għalihom. |
(3) |
Sabiex jiġi protett l-ambjent fit-totalità tiegħu, u b'mod partikolari s-saħħa tal-bniedem, il-konċentrazzjonijiet dannużi ta' tniġġiż li jagħmel il-ħsara fl-ilma ta' taħt l-art għandhom jiġu evitati, impeduti jew imnaqqsa. |
(4) |
Id-Direttiva 2000/60/KE tal-Parlament Ewropew u tal-Kunsill tat-23 ta' Ottubru 2000 li tistabbilixxi qafas ta' azzjoni tal-Komunità fil-qasam tal-politika ta' l-ilma (5) tistabbilixxi dispożizzjonijiet ġenerali għall-protezzjoni u l-konservazzjoni ta' l-ilma ta' taħt l-art. Kif previst fl-Artikolu 17 ta' dik id-Direttiva, għandhom jiġu adottati miżuri li jimpedixxu u jikkontrollaw it-tniġġiż ta' l-ilma ta' taħt l-art, inklużi kriterji biex jiġi vvalutat l-istat kimiku tajjeb ta' l-ilma ta' taħt l-art u kriterji għall-identifikazzjoni ta' tendenzi 'l fuq sinifikanti u sostnuti u biex jiġu ddefiniti punti tal-bidu għall-inverżjoni ta' tendenzi. |
(5) |
Tenut kont tal-ħtieġa li jintlaħqu livelli konsistenti ta' protezzjoni ta' l-ilma ta' taħt l-art, għandhom jiġu stabbiliti standards ta' kwalità u valuri ta' limitu, u għandhom jiġu żviluppati metodoloġiji bbażati fuq approċċ komuni, sabiex jiġu pprovduti kriterji għall-valutazzjoni ta' l-istat kimiku ta' mases ta' ilma ta' taħt l-art. |
(6) |
Standards ta' kwalità għal nitrati, prodotti għall-protezzjoni tal-pjanti u bijoċidi għandhom jiġu stabbiliti bħala l-kriterji tal-Komunità għall-valutazzjoni ta' l-istat kimiku ta' mases ta' ilma ta' taħt l-art, u għandha tiġi assigurata konsistenza mad-Direttiva tal-Kunsill 91/676/KEE tat-12 ta' Diċembru 1991 dwar il-protezzjoni ta' l-ilmijiet mit-tniġġiż ikkawżat min-nitrati minn sorsi agrikoli (6), id-Direttiva tal-Kunsill 91/414/KEE tal-15 ta' Lulju 1991 dwar it-tqegħid fis-suq ta' prodotti għall-protezzjoni tal-pjanti (7) u d-Direttiva 98/8/KE tal-Parlament Ewropew u tal-Kunsill tas-16 ta' Frar 1998 dwar it-tqegħid fis-suq ta' prodotti bijoċidi (8), rispettivament. |
(7) |
Dispożizzjonijiet dwar l-istat kimiku ta' l-ilma ta' taħt l-art ma japplikawx għal konċentrazzjonijiet għoljin ta' sustanzi jew joni jew indikaturi tagħhom li jinstabu b'mod naturali f'massa ta' ilma ta' taħt l-art jew f'mases ta' ilma fil-wiċċ assoċjati magħha, minħabba kondizzjonijiet idro-ġeoloġiċi speċifiċi li mhumiex koperti mid-definizzjoni ta' tniġġiż. Bl-istess mod ma japplikawx għal bidliet fid-direzzjoni ta' l-ilma u fil-komposizzjoni kimika, temporanji u spazjalment limitati, li mhumiex meqjusa bħala intrużjonijiet. |
(8) |
Għandhom jiġu stabbiliti kriterji biex jiġu identifikati tendenzi 'l fuq sinifikanti u sostnuti fil-konċentrazzjonijiet tal-pollutanti u biex jiġi definit il-punt tal-bidu għall-inverżjoni tat-tendenza, filwaqt li jitqies il-probabilità ta' effetti negattivi fuq ekosistemi akkwatiċi assoċjati jew ekosistemi terrestri dipendenti minnhom. |
(9) |
Fejn hu possibbli l-Istati Membri għandhom jużaw proċeduri statistiċi sakemm dawn ikunu konformi ma' l-istandards internazzjonali u jikkontribwixxu għat-tqabbil fuq perijodi fit-tul tar-riżultati tal-monitoraġġ bejn l-Istati Membri. |
(10) |
Bi qbil mat-tielet inċiż ta' l-Artikolu 22(2) tad-Direttiva 2000/60/KE, id-Direttiva tal-Kunsill 80/68/KEE tas-17 ta' Diċembru 1979 dwar il-protezzjoni ta' l-ilma ta' taħt l-art mit-tniġġiż ikkawżat minn ċerti sustanzi perikolużi (9) se tkun revokata b'effett mit-22 ta' Diċembru 2013. Jeħtieġ għalhekk li tiġi assigurata l-kontinwità tal-protezzjoni prevista fid-Direttiva 80/68/KEE fir-rigward ta' miżuri mmirati sabiex jevitaw jew jillimitaw id-dħul kemm dirett kif ukoll indirett ta' pollutanti fl-ilma ta' taħt l-art. |
(11) |
Jeħtieġ li ssir distinzjoni bejn sustanzi perikolużi, li d-dħul tagħhom għandu jiġi evitat, u pollutanti oħra, li d-dħul tagħhom għandu jiġi llimitat. Jeħtieġ li l-Anness VIII tad-Direttiva 2000/60/KE, li jelenka l-pollutanti prinċipali rilevanti għall-ambjent ta' l-ilma, jiġi użat biex jiġu identifikati sustanzi perikolużi u dawk li mhumiex perikolużi li juru riskju ta' tniġġiż eżistenti jew potenzjali. |
(12) |
Sabiex tiġi assigurata protezzjoni koerenti ta' l-ilma ta' taħt l-art, l-Istati Membri li jaqsmu bejniethom mases ta' ilma ta' taħt l-art għandhom jikkordinaw l-attivitajiet tagħhom fir-rigward tal-monitoraġġ, id-determinazzjoni tal-valuri ta' limitu u l-identifikazzjoni ta' sustanzi perikolużi rilevanti. |
(13) |
Taħt ċerti ċirkustanzi, l-Istati Membri għandhom ikunu awtorizzati li jagħtu eżenzjonijiet minn miżuri biex jiġi evitat jew limitat id-dħul tal-pollutanti fl-ilma ta' taħt l-art. |
(14) |
Jeħtieġ li jsir provvediment għal miżuri transitorji fir-rigward tal-perijodu bejn id-data ta' l-implimentazzjoni ta' din id-Direttiva u d-data minn meta d-Direttiva 80/68/KEE tiġi rrevokata. |
(15) |
Il-miżuri neċessarji għall-implimentazzjoni ta' din id-Direttiva għandhom jiġu adottati skond id-Deciżjoni tal-Kunsill 1999/468/KE tat-28 ta' Ġunju 1999 li tistabbilixxi l-proċeduri għall-eżerċizzju tas-setgħat ta' implimentazzjoni mogħtija lill-Kummissjoni (10). |
ADOTTAW DIN ID-DIRETTIVA:
Artikolu 1
Skop
1. Din id-Direttiva tistabbilixxi miżuri speċifiċi kif previst fl-Artikolu 17(1) u (2) tad-Direttiva 2000/60/KE sabiex jiġi impedut u kontrollat it-tniġġiż ta' l-ilma ta' taħt l-art. Dawn il-miżuri jinkludu b'mod partikolari:
(a) |
kriterji għall-valutazzjoni ta' l-istat kimiku tajjeb ta' l-ilma ta' taħt l-art; u |
(b) |
kriterji għall-identifikazzjoni u t-treġġigħ lura ta' tendenzi 'l fuq sinifikanti u sostnuti għad-definizzjoni ta' punti tal-bidu għal treġġigħ lura tat-tendenzi. |
2. Din id-Direttiva tikkumplimenta wkoll id-dispożizzjonijiet li jevitaw jew jillimitaw id-dħul ta' pollutanti fl-ilma ta' taħt l-art li diġà jeżistu fid-Direttiva 2000/60/KE, u timmira li tevita d-deterjorament ta' l-istat tal-mases kollha ta' l-ilma ta' taħt l-art.
Artikolu 2
Definizzjonijiet
Għall-finijiet ta' din id-Direttiva, id-definizzjonijiet li ġejjin għandhom japplikaw flimkien ma' dawk stabbiliti fl-Artikolu 2 tad-Direttiva 2000/60/KE:
(1) |
“standard tal-kwalità ta' l-ilma ta' taħt l-art” tfisser standard tal-kwalità ambjentali espress bħala l-konċentrazzjoni ta' pollutant partikolari, grupp ta' pollutanti jew indikatur ta' tniġġiż fl-ilma ta' taħt l-art, li ma jistax jinqabeż sabiex ikunu protetti s-saħħa tal-bniedem u l-ambjent; |
(2) |
“valur ta' limitu” tfisser standard tal-kwalità ta' l-ilma ta' taħt l-art stabbilit mill-Istati Membri skond l-Artikolu 3; |
(3) |
“tendenzi 'l fuq sinifikanti u sostnuti” tfisser kwalunkwe żieda statistikament sinifikanti fil-konċentrazzjoni ta' pollutant, grupp ta' pollutanti jew indikatur tat-tniġġiż, li jippreżenta riskju ambjentali li għalih it-treġġigħ lura tat-tendenza hu identifikat li hu meħtieġ skond l-Artikolu 5. |
(4) |
“dħul ta' pollutant fl-ilma ta' taħt l-art” tfisser l-introduzzjoni diretta jew indiretta ta' pollutanti fl-ilma ta' taħt l-art bħala riżultat ta' attività umana. |
Artikolu 3
Kriterji għall-valutazzjoni ta' l-istat kimiku ta' l-ilma ta' taħt l-art
1. Għall-finijiet tal-valutazzjoni ta' l-istat kimiku ta' massa ta' l-ilma ta' taħt l-art jew grupp ta' mases ta' l-ilma ta' taħt l-art skond is-Sezzjoni 2.3 ta' l-Anness V tad-Direttiva 2000/60/KE, l-Istati Membri għandhom jużaw il-kriterja li ġejjin:
(a) |
standards tal-kwalità ta' l-ilma ta' taħt l-art kif imsemmija fl-Anness I; |
(b) |
valuri ta' limitu li jridu jiġu stabbiliti mill-Istati Membri skond il-proċedura deskritta fil-Parti A ta' l-Anness II għall-pollutanti, gruppi ta' pollutanti u indikaturi tat-tniġġiż li, fit-territorju ta' Stat Membru, ġew identifikati bħala li jikkontribwixxu għall-karatterizzazzjoni ta' mases, jew gruppi ta' mases ta' l-ilma ta' taħt l-art, bħala li jkunu f'riskju, b'kont meħud ta' mill-inqas il-listi li jinsabu fil-Parti B ta' l-Anness II. |
2. Il-valuri ta' limitu jistgħu jiġu stabbiliti fil-livell nazzjonali, fil-livell tad-distrett tal-baċir tax-xmara jew il-parti tad-distrett tal-baċir internazzjonali tax-xmara li taqa' fit-territorju ta' Stat Membru, jew fil-livell ta' massa jew grupp ta' mases ta' l-ilma ta' taħt l-art.
3. L-Istati Membri għandhom jiżguraw li, għal mases ta' l-ilma ta' taħt l-art li huma maqsuma bejn żewġ Stati Membri jew aktar u għal mases ta' l-ilma ta' taħt l-art li fihom l-ilma ta' taħt l-art jaqsam il-konfini ta' Stat Membru, l-istabbiliment ta' valuri ta' limitu huwa soġġett għall-kordinazzjoni bejn l-Istati Membri konċernati, skond l-Artikolu 3(4) tad-Direttiva 2000/60/KE.
4. Fejn massa jew grupp ta' mases ta' l-ilma ta' taħt l-art jestendi lil hinn mit-territorju tal-Komunità, l-Istat(i) Membru(i) konċernat(i) għandhom jippruvaw jistabbilixxu valuri ta' limitu, f'kordinazzjoni ma' l-Istat(i) li mhux Membru(i) konċernat(i), skond l-Artikolu 3(5) tad-Direttiva 2000/60/KE.
5. L-Istati Membri għandhom jistabbilixxu valuri ta' limitu skond il-paragrafu 1(b) għall-ewwel darba sa mhux aktar tard mit-22 ta' Diċembru 2008.
Il-valuri ta' limitu kollha stabbiliti għandhom jiġu ppubblikati fil-pjanijiet ta' ġestjoni tal-baċiri tax-xmajjar sottomessi skond l-Artikolu 13 tad-Direttiva 2000/60/KE, inkluż sinteżi ta' l-informazzjoni mniżżla fil-Parti Ċ ta' l-Anness II.
6. L-Istati Membri għandhom jemendaw il-lista tal-valuri ta' limitu kull meta informazzjoni ġdida dwar pollutanti, gruppi ta' pollutanti jew indikaturi tat-tniġġiż tindika li valur ta' limitu għandu jiġi stabbilit għal sustanza oħra, li valur ta' limitu eżistenti għandu jiġi emendat, jew li valur ta' limitu li qabel ġie mneħħi mil-lista għandu jerġa jiddaħħal, sabiex jiġu protetti s-saħħa tal-bniedem u l-ambjent.
Il-valuri ta' limitu jistgħu jitneħħew mil-lista meta l-massa ta' l-ilma ta' taħt l-art konċernat m'għadux aktar f'riskju mill-pollutanti, il-gruppi ta' pollutanti jew indikaturi tat-tniġġiż korrispondenti.
Kwalunkwe tali bidla fil-lista tal-valuri ta' limitu għandha tiġi rappurtata fil-kuntest tar-reviżjoni perijodika tal-pjanijiet ta' ġestjoni tal-baċiri tax-xmajjar.
7. Abbażi ta' l-informazzjoni provduta mill-Istati Membri skond il-paragrafu 5, il-Kummissjoni għanda tippubblika rapport sa mhux aktar tard mit-22 ta' Diċembru 2009.
Artikolu 4
Proċedura għall-valutazzjoni ta' l-istat kimiku ta' l-ilma ta' taħt l-art
1. L-Istati Membri għandhom jużaw il-proċedura deskritta fil-paragrafu 2 biex jivvalutaw l-istat kimiku ta' massa ta' l-ilma ta' taħt l-art. Fejn xieraq, meta jwettqu din il-proċedura l-Istati Membri jistgħu jgħaqqdu fi gruppi mases ta' l-ilma ta' taħt l-art skond l-Anness V għad-Direttiva 2000/60/KE.
2. Massa jew grupp ta' mases ta' l-ilma ta' taħt l-art għandu jkun ikkunsidrat li jkun fi stat kimiku tajjeb meta:
(a) |
il-valuri ta' l-istandards tal-kwalità ta' l-ilma ta' taħt l-art imniżżla fl-Anness I u l-valuri ta' limitu rilevanti stabbiliti skond l-Artikolu 3 u l-Anness II ma jinqabżux fi kwalunkwe punt ta' monitoraġġ f'dak il-massa, jew grupp ta' mases ta' l-ilma ta' taht l-art; jew |
(b) |
il-valur għal standard tal-kwalità ta' l-ilma ta' taħt l-art jew valur ta' limitu jinqabeż f'punt ta' monitoraġġ wieħed jew aktar iżda investigazzjoni xierqa skond l-Anness III tikkonferma li:
|
3. L-Istati Membri għandhom jippubblikaw sintesi tal-valutazzjoni ta' l-istat kimiku ta' l-ilma ta' taħt l-art fil-pjanijiet ta' ġestjoni tal-baċiri tax-xmajjar skond l-Artikolu 13 tad-Direttiva 2000/60/KE.
Din is-sintesi, stabbilita fil-livell tad-distrett tal-baċir tax-xmara jew il-parti tad-distrett tal-baċir internazzjonali tax-xmara li jaqa' fit-territorju ta' Stat Membru, għandha tinkludi wkoll spjegazzjoni ta' kif ġie meħud kont ta' qbiż ta' l-istandards tal-kwalità ta' l-ilma ta' taħt l-art jew valuri ta' limitu f'punti ta' monitoraġġ individwali fil-valutazzjoni finali.
4. Jekk massa ta' l-ilma ta' taħt l-art huwa klassifikat li qiegħed fi stat kimiku tajjeb skond il-paragrafu 2(b), l-Istati Membri għandhom jieħdu tali miżuri kif ikun meħtieġ, skond l-Artikolu 11 tad-Direttiva 2000/60/KE, biex jiġu protetti l-ekosistemi akkwatiċi, ekosistemi terrestri u l-użu mill-bniedem ta' l-ilma ta' taħt l-art dipendenti fuq il-parti tal-massa rrappreżentata mill-punt jew punti ta' monitoraġġ li fih il-valur ta' l-istandard tal-kwalità ta' l-ilma ta' taħt l-art jew valur ta' limitu ġie maqbuż.
Artikolu 5
L-identifikazzjoni ta' tendenzi 'l fuq sinifikanti u sostnuti u d-definizzjoni ta' punti ta' tluq għat-treġġigħ lura ta' tendenzi
1. L-Istati Membri għandhom jidentifikaw kwalunkwe tendenzi li qed jiżdiedu sinifikanti u sostnuti f'konċentrazzjonijiet ta' pollutanti, gruppi ta' pollutanti u indikaturi ta' tniġġiż misjuba f'mases, jew gruppi ta' mases ta' l-ilma ta' taħt l-art, identifikati bħala li qegħdin f'riskju u jiddefinixxu l-punt ta' tluq għat-treġġigħ lura ta' dik it-tendenza, skond l-Anness IV.
2. L-Istati Membri għandhom ireġġħu lura t-tendenzi li jippreżentaw riskju ta' ħsara sinifikanti għall-kwalità ta' l-ekosistemi akkwatiċi jew terrestri, għas-saħħa tal-bniedem, jew għall-użi leġittimi attwali jew potenzjali ta' l-ambjent ta' l-ilma, permezz tal-programm ta' miżuri imsemmija fl-Artikolu 11 tad-Direttiva 2000/60/KE, sabiex jitnaqqas b'mod progressiv it-tniġġiż ta' l-ilma ta' taħt l-art.
3. L-Istati Membri għandhom jiddefinixxu l-punt ta' tluq minn meta ireġgħu lura t-tendenzi bħala persentaġġ tal-livell ta' l-istandards tal-kwalità ta' l-ilma ta' taħt l-art imniżżla fl-Anness I u tal-valuri ta' limitu stabbiliti skond l-Artikolu 3, abbażi tat-tendenza identifikata u r-riskju ambjentali assoċjat magħha, skond il-paragrafu 1 tal-Parti B ta' l-Anness IV.
4. Fil-pjanijiet ta' ġestjoni tal-baċiri tax-xmajjar sottomessi skond l-Artikolu 13 tad-Direttiva 2000/60/KE, l-Istati Membri għandhom jagħtu sintesi:
(a) |
tal-mod kif il-valutazzjoni tat-tendenza minn punti ta' monitoraġġ individwali f'massa jew grupp ta' mases ta' l-ilma ta' taħt l-art ikkontribwiet għall-identifikazzjoni skond is-Sezzjoni 2.5 ta' l-Anness V ta' dik id-Direttiva, li dawk il-mases huma soġġetti għal tendenza 'l fuq sinifikanti u sostnut f'konċentrazzjoni ta' kwalunkwe pollutant jew treġġigħ lura ta' dik it-tendenza; u |
(b) |
ir-raġunijiet għall-punti ta' tluq definiti skond il-paragrafu 3. |
5. Fejn meħtieġ biex jiġi valutat l-impatt ta' traċċi eżistenti ta' tniġġiż f'mases ta' ilma ta' taħt l-art li jistgħu jheddu l-ksib ta' l-objettivi fl-Artikolu 4 tad-Direttiva 2000/60/KE, u b'mod partikolari dawk it-traċċi li jirriżultaw minn punti ta' sorsi u art kontaminata, l-Istati Membri għandhom jagħmlu aktar stimi tat-tendenzi għall-pollutanti identifikati sabiex jiġi verifikat li traċċi minn siti kontaminati ma jinfirxux, ma jiddeterjorawx l-istat kimiku tal-massa jew grupp ta' mases ta' l-ilma ta' taħt l-art, u mhumiex ta' riskju għas-saħħa tal-bniedem u għall-ambjent. Ir-riżultati ta' dawn il-valutazzjonijiet għandhom jinkitbu f'sommarju fil-pjanijiet ta' ġestjoni tal-baċiri tax-xmajjar sottomessi skond l-Artikolu 13 tad-Direttiva 2000/60/KE:
Artikolu 6
Miżuri biex jipprevjenu jew jillimitaw id-dħul ta' pollutanti fl-ilma ta' taħt l-art
1. Sabiex jintlaħaq l-objettiv li jkunu evitati jew limitati dħul ta' pollutanti fl-ilma ta' taħt l-art stabbilit skond l-Artikolu 4(1) (b) (i) tad-Direttiva 2000/60/KE, l-Istati Membri għandhom jiżguraw li l-programm ta' miżuri stabbiliti skond l-Arikolu 11 ta' dik id-Direttiva, jinkludi:
(a) |
il-miżuri kollha meħtieġa li jimmiraw li jevitaw dħul fl-ilma ta' taħt l-art ta' kwalunkwe sustanza perikoluża. Fl-identifikazzjoni ta' tali materjali, l-Istati Membri għandhom b'mod partikolari jieħdu kont ta' sustanzi perikolużi li jagħmlu parti mill-familji jew gruppi ta' pollutanti imsemmija fil-punti 1 sa 6 ta' l-Anness VIII għad-Direttiva 2000/60/KE, kif ukoll ta' sustanzi li huma parti mill-familji jew gruppi ta' pollutanti msemmija fil-punti 7 sa 9 ta' l-imsemmi Anness, fejn dawn huma kkunsidrati bħala perikolużi; |
(b) |
għal pollutanti mniżżla fl-Anness VIII għad-Direttiva 2000/60/KE li mhumiex ikkunsidrati bħala perikolużi, u pollutanti oħrajn li mhumiex perikolużi u li mhumiex elenkati f'dik il-lista li huma kkunsidrati mill-Istati Membri li jippreżentaw riskju ta' tniġġiż eżistenti jew potenzjali, il-miżuri kollha meħtieġa biex jillimitaw id-dħul fl-ilma ta' taħt l-art sabiex jiġi żgurat li tali dħul ma jikkawżax deterjorament ta' l-istat kimiku tajjeb ta' l-ilma ta' taħt l-art, ma jikkawżax xi tendenza 'l fuq sinifikanti u sostnuta fil-konċentrazzjonijiet ta' pollutanti fl-ilma ta' taħt l-art u ma jikkawżax b'mod ieħor tniġġiż ta' l-ilma ta' taħt l-art. Tali miżuri għandhom jieħdu kont ta' l-aħjar prattika stabbilita, inklużi l-Aħjar Prattika Ambjentali u l-Aħjar Tekniki Disponibbli speċifikati fil-leġislazzjoni Komunitarja rilevanti. |
Sabiex jiġu stabbiliti l-miżuri msemmija fil-punti (a) jew (b), l-Istati Membri jistgħu, bħala l-ewwel pass, jidentifikaw iċ-ċirkostanzi li taħthom il-pollutanti imniżżla fl-Anness VIII għad-Direttiva 2000/60/KE, b'mod partikolari metalli essenzjali u l-komposti tagħhom imsemmija f'dak l-Anness taħt il-punt 7, għandhom jiġu kkunsidrati bħala perikolużi jew mhux perikolużi.
2. Kull meta jkun teknikament possibbli għandu jittieħed kont tad-dħul ta' pollutanti minn sorsi diffużi ta' tniġġiż li jkollhom impatt fuq l-istat kimiku ta' l-ilma ta' taħt l-art.
3. Mingħajr preġudizzju għal kondizzjoniet iktar stretti f'leġislazzjoni Komunitarja oħra, l-Istati Membri jistgħu jeżentaw mill-miżuri meħtieġa mill-paragrafu 1 dħul ta' pollutanti li huma:
(a) |
ir-riżultat ta' skariku dirett awtorizzat skond l-Artikolu 11(3)(j) tad-Direttiva 2000/60/KE; |
(b) |
meqjus mill-awtoritajiet kompetenti li huwa ta' kwantità u konċentrazzjoni tant żgħira li ma joħloq l-ebda periklu fil-preżent jew fil-futur ta' deterjorament fil-kwalità ta' l-ilma ta' taħt l-art li jilqagħhom; |
(ċ) |
il-konsegwenzi ta' inċidenti jew ċirkostanzi eċċezzjonali ta' kawża naturali li ma setgħux jiġu raġonevolment previsti, evitati jew mitigati; |
(d) |
ir-riżultat ta' ċċarġjar mill-ġdid jew żieda artifiċjali ta' mases ta' l-ilma ta' taħt l-art awtorizzati skond l-Artikolu 11(3)(f) tad-Direttiva 2000/60/KE; |
(e) |
meqjus mill-awtoritajiet kompetenti li mhuwiex teknikament vijabbli li jiġi evitat jew limitat mingħajr l-użu ta':
|
(f) |
ir-riżultat ta' interventi fl-ilmijiet tal-wiċċ sabiex, fost l-oħrajn, jiġu mitigati l-effetti ta' għargħar u nixfiet, u għall-ġestjoni ta' l-ilmijiet u passaġġi fuq l-ilma, inkluż f'livell internazzjonali. Tali attivitajiet, inklużi l-qtugħ, it-tindif mill-ħama, ir-rilokazzjoni u d-depożitu ta' sedimenti fl-ilmijiet tal-wiċċ, għandhom jitwettqu skond ir-regoli ġenerali li jorbtu, u, fejn applikabbli, b'permessi u awtorizzazzjonijiet maħruġa abbażi ta' dawk ir-regoli, żviluppati mill-Istati Membri f'dak ir-rigward, bil-kondizzjoni li dħul ma jikkompromettix il-kisba ta' l-objettivi ambjentali stabbiliti għall-mases ta' ilma rilevanti skond l-Artikolu 4(1)(b)(ii) tad-Direttiva 2000/60/KE. |
4. L-awtoritajiet kompetenti ta' l-Istati Membri għandhom iżommu inventarju ta' l-eżenzjonijiet imsemmija fil-paragrafu 3, għall-fini ta' notifika lill-Kummissjoni jekk jiġu mitluba.
Artikolu 7
Arranġamenti Transitorji
Fil-perijodu ta' bejn … (11) u t-22 ta' Diċembru 2013, kwalunkwe proċedura ġdida ta' awtorizzazzjoni skond l-Artikoli 4 u 5 tad-Direttiva 80/68/KEE għandha tieħu kont tal-ħtiġiet imniżżla fl-Artikoli 3, 4 u 5 ta' din id-Direttiva.
Artikolu 8
Adattamenti tekniċi
L-Annessi II, III u IV jistgħu jiġu adattati għall-progress xjentifiku u tekniku skond il-proċedura msemmija fl-Artikolu 21(2) tad-Direttiva 2000/60/KE, waqt li jiġi kkunsidrat il-perijodu għar- reviżjoni u l-aġġornar tal-pjan ta' ġestjoni tal-baċiri tax-xmajjar, kif imsemmi fl-Artikolu 13(7) ta' dik id-Direttiva.
Artikolu 9
Implimentazzjoni
L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa biex ikunu konformi ma' din id-Direttiva qabel … (11). Huma għandhom jinfurmaw minnufih lill-Kummissjoni dwar dan.
Meta l-Istati Membri jadottaw dawk id-dispożizzjonijiet, dawn għandu jkun fihom referenza għal din id-Direttiva jew ikunu akkumpanjati minn tali referenza fl-okkażjoni tal-pubblikazzjoni uffiċjali tagħhom. L-Istati Membri għandhom jiddeterminaw kif għandha ssir tali referenza.
Artikolu 10
Dħul fis-seħħ
Din id-Direttiva għandha tidħol fis-seħħ fl-għoxrin jum wara dik tal-pubblikazzjoni tagħha fil-Ġurnal Uffiċjali ta' l-Unjoni Ewropea.
Artikolu 11
Indirizzati
Din id-Direttiva hija indirizzata lill-Istati Membri.
Magħmula fi,
Għall-Parlament Ewropew
Il-President
…
Għall-Kunsill
Il-President
…
(1) ĠU C 112, 30.4.2004, p. 40.
(2) ĠU C 109, 30.4.2004, p. 29.
(3) Opinjoni tal-Parlament Ewropew tat-28 ta' April 2005 (ĠU C 45E, 23.2.2006, p. 71), Pożizzjoni Komuni tal-Kunsill ta-23 ta' Jannar 2006 u Deċiżjoni tal-Parlament Ewropew ta' … (għadha mhix ippubblikata fil-Ġurnal Uffiċjali).
(4) ĠU L 242, 10.9.2002, p. 1.
(5) ĠU L 327, 22.12.2000, p. 1. Direttiva kif emendata bid-Deċiżjoni Nru 2455/2001/KE (ĠU L 331, 15.12.2001, p. 1).
(6) ĠU L 375, 31.12.1991, p. 1. Direttiva kif emendata bir-Regolament (KE) Nru 1882/2003 tal-Parlament Ewropew u tal-Kunsill (ĠU L 284, 31.10.2003, p. 1).
(7) ĠU L 230, 19.8.1991, p. 1. Direttiva kif emendata l-aħħar bid-Direttiva tal-Kummissjoni 2006/19/KE (ĠU L 44, 15.2.2006, p. 15).
(8) ĠU L 123, 24.4.1998, p. 1. Direttiva kif emendata bir-Regolament (KE) Nru 1882/2003 (ĠU L 284, 31.10.2003, p.1).
(9) ĠU L 20, 26.1.1980, p.43. Direttiva kif emendata bid-Direttiva 91/692/KEE (ĠU L 377, 31.12.1991, p. 48).
(10) ĠU L 184, 17.7.1999, p. 23.
(11) ĠU: Sentejn wara d-dħul fis-seħħ ta' din id-Direttiva.
ANNESS I
STANDARDS TA' KWALITÀ GĦALL-ILMA TA' TAĦT L-ART
1 |
Sabiex jiġi stmat l-istat kimiku ta' l-ilma ta' taħt l-art skond l-Artikolu 4, l-istandards ta' kwalità għall-ilma ta' taħt l-art li ġejjin huma l-istandards ta' kwalità msemmija fit-Tabella 2.3.2 fl-Anness V għad-Direttiva 2000/60/KE u stabbiliti skond l-Artikolu 17 ta' dik id-Direttiva.
|
2 |
Ir-riżultati ta' l-applikazzjoni ta' l-istandards ta' kwalità għall-pestiċidi bil-mod speċifikat għall-iskopijiet ta' din id-Direttiva huma mingħajr preġudizzju għar-riżultati tal-proċeduri ta' valutazzjoni tar-riskju meħtieġa mid-Direttiva 91/414/KEE jew id-Direttiva 98/8/KE. |
3 |
Meta għal massa determinat ta' ilma ta' taħt l-art, ikun kkunsidrat li l-istandards ta' kwalità ta' l-ilma ta' taħt l-art jistgħu jwasslu għan-nuqqas ta' kisba ta' l-objettivi ambjentali speċifikati fl-Artikolu 4 tad-Direttiva 2000/60/KE għall-mases ta' ilma tal-wiċċ assoċjati, jew iwasslu għal kwalunkwe tnaqqis sinifikanti tal-kwalità ekoloġika jew kimika ta' tali mases, jew kwalunkwe ħsara sinifikanti għall-ekosistemi terrestri li jiddependu direttament mill-massa ta' ilma ta' taħt l-art, valuri iżjed stretti ta' limitu huma stabbiliti skond l-Artikolu 3 u l-Anness II tad-Direttiva. Programmi u miżuri meħtieġa fir-rigward ta' tali valur ta' limitu japplikaw ukoll għal attivitajiet li jaqgħu fil-kamp ta' applikazzjoni tad-Direttiva 91/676/KEE. |
(1) Attivitajiet barra l-kamp ta' applikazzjoni tad-Direttiva 91/676/KEE mhumiex koperti minn din id-dispożizzjoni.
(2) “Pestiċidi” tfisser prodotti għall-protezzjoni tal-pjanti u prodotti bijoċidali kif definiti fl-Artikolu 2 tad-Direttiva 91/414/KEE u fl-Artikolu 2 tad-Direttiva 98/8/KE, rispettivament.
(3) “Total” tfisser is-somma tal-pestiċidi individwali kollha misjuba u kwantifikati fil-proċedura ta' monitoraġġ.
ANNESS II
VALURI TA' LIMITU GĦAL POLLUTANTI TA' L-ILMA TA' TAĦT L-ART U INDIKATURI TAT-TNIĠĠIŻ
PARTI A: LINJI GWIDA GĦALL-ISTABBILIMENT TA' VALURI TA' LIMITU MILL-ISTATI MEMBRI SKOND L-ARTIKOLU 3
L-Istati Membri jistabbilixxu valuri ta' limitu għal pollutanti kollha u indikaturi tat-tniġġiż li, skond il-karatterizzazzjoni mwettqa skond l-Artikolu 5 tad-Direttiva 2000/60/KE, jikkaratterizzaw il-mases jew gruppi ta' mases ta' l-ilma taħt l-art li huma f'riskju li jonqsu milli jiksbu stat kimiku tajjeb ta' l-ilma ta' taħt l-art.
Il-valuri ta' limitu jkunu stabbiliti b'tali mod li, jekk ir-riżultati tal-monitoraġġ f'punt ta' monitoraġġ rappreżentattiv jaqbżu l-limiti, dan ikun jindika riskju li kondizzjoni waħda jew iżjed għall-istat kimiku tajjeb ta' l-ilma ta' taħt l-art imsemmija fl-Artikolu 4 (2) (b) (ii), (iii) u (iv) mhux qed tiġi sodisfatta.
Meta jiġu biex jistabbilixxu l-valuri ta' limitu, l-Istati Membri jikkunsidraw il-linji gwida li ġejjin:
1. |
Id-deċiżjoni biex jiġu stabbiliti valuri ta' limitu għandha tkun ibbażata fuq:
|
2. |
Id-determinazzjoni tal-valuri ta' limitu għandha tieħu wkoll kont ta' l-oriġini tal-pollutanti, il-possibbiltà ta' l-okkorrezza naturali tagħhom, it-tossikoloġija u t-tendenza għat-tifrix tagħhom, il-persistenza tagħhom u l-potenzjal tagħhom ta' bijo-akkumulazzjoni. |
3. |
Id-determinazzjoni tal-valuri ta' limitu għandha tiġi sostnuta minn mekkaniżmu ta' kontroll għad-data miġbura, ibbażat fuq valutazzjoni tal-kwalità tad-data, fuq konsiderazzjonijiet analitiċi, u fuq livelli ta' l-isfond għas-sustanzi li jistgħu jokkorru kemm b'mod naturali kif ukoll bħala riżultat ta' attivitajiet tal-bniedem. |
PARTI B: LISTI MINIMI TA' POLLUTANTI U L-INDIKATURI TAGĦHOM LI GĦALIHOM L-ISTATI MEMBRI GĦANDHOM JIKKUNSIDRAW L-ISTABBILIMENT TA' VALURI TA' LIMITU SKOND L-ARTIKOLU 3
1. Sustanzi jew joni, li jistgħu jokkorru kemm b'mod naturali kif ukoll bħala riżultat ta' attivitajiet tal-bniedem
|
Arseniku |
|
Kadmju |
|
Ċomb |
|
Merkurju |
|
Ammonju |
|
Kloru |
|
Sulfat |
2. Sustanzi sintetiċi magħmula mill-bniedem
|
Trikloroetilene |
|
Tetrakloroetilene |
3. Parametri indikattivi ta' dħul ta' mluħ jew dħul ieħor (1)
Konduttività
PARTI Ċ: INFORMAZZJONI LI GĦANDHA TINGĦATA MILL-ISTATI MEMBRI FIR-RIGWARD TAL-POLLUTANTI U L-INDIKATURI TAGĦHOM LI GĦALIHOM ĠEW STABBILITI VALURI TA' LIMITU
L-Istati Membri jagħmlu sintesi fil-Pjan ta' Ġestjoni tal-Baċiri tax-Xmajjar li għandu jkun sottomess skond l-Artikolu 13 tad-Direttiva 2000/60/KE, dwar il-mod kif il-proċedura stabbilita fil-Parti A ta' dan l-Anness ġiet segwita.
B'mod partikolari, l-Istati Membri jipprovdu, fejn vijabbli:
(a) |
informazzjoni dwar in-numru ta' mases jew gruppi ta' mases ta' l-ilma ta' taħt l-art karatterizzati bħala li huma f'riskju u dwar il-pollutanti u l-indikaturi tat-tniġġiż li jikkontribwixxu għal din il-klassifikazzjoni, inklużi l-konċentrazzjonijiet/valuri osservati; |
(b) |
informazzjoni dwar kull wieħed mill-mases ta' ilma ta' taħt l-art karatterizzati bħala li huma f'riskju, b'mod partikolari id-daqs tal-mases, ir-relazzjoni bejn il-mases ta' ilma ta' taħt l-art u l-ilmijiet assoċjati tal-wiċċ u l-ekosistemi terrestri dipendenti direttament u, f'każ ta' sustanzi li jokkorru b'mod naturali, il-livelli naturali ta' l-isfond fil-mases ta' ilma ta' taħt l-art; |
(ċ) |
il-valuri ta' limitu, kemm jekk japplikaw fil-livell nazzjonali, fil-livell tad-distrett tal-baċir tax-xmara jew fil-parti tad-distrett tal-baċir internazzjonali tax-xmara li taqa' fit-territorju ta' l-Istat Membru, kif ukoll fil-livell ta' massa jew grupp ta' mases ta' ilma ta' taħt l-art; |
(d) |
ir-relazzjoni bejn il-valuri ta' limitu u:
|
(1) Fir-rigward ta-konċentrazzjonijiet ta' mluħ li jirriżultaw minn attivitajiet tal-bniedem, l-Istati Membri jistgħu jiddeċiedu li jistabbilixxu valuri ta' limitu jew għas-sulfat u l-kloridu jew għall-konduttività.
ANNESS III
STIMA TA' L-ISTAT KIMIKU TA' L-ILMA TA' TAĦT L-ART
1. |
Il-proċedura ta' valutazzjoni biex jiġi determinat l-istat kimiku ta' massa jew grupp ta' mases ta' ilma ta' taħt l-art għandha titwettaq f'relazzjoni mal-mases jew gruppi ta' mases kollha ta' l-ilma ta' taħt l-art karatterizzati bħala li huma f'riskju u fir-rigward ta' kull wieħed mill-pollutanti li jikkontribwixxu għall-massa jew grupp ta' mases ta' l-ilma ta' taħt l-art li huma karatterizzati hekk. |
2. |
Fit-twettiq ta' kwalunkwe investigazzjonijiet msemmija fl-Artikolu 4(2)(b), l-Istati Membri għandhom jieħdu kont ta':
|
3. |
Għall-iskopijiet ta' l-investigazzjonijiet dwar jekk intlaħqux il-kondizzjonijiet għal stat kimiku tajjeb ta' l-ilma ta' taħt l-art imsemmija fl-Artikolu 4(2)(b)(i) u (iv), l-Istati Membri, għandhom fejn ikun rilevanti u meħtieġ, u abbażi ta' aggregazzjonijiet xierqa tar-riżultati tal-monitoraġġ, sostnuti fejn meħtieġ bi stimi ta' konċentrazzjoni bbażati fuq mudell konċettwali tal-massa jew grupp ta' mases ta' l-ilma ta' taħt l-art, jistmaw kemm il-massa ta' ilma ta' taħt l-art għandha konċentrazzjoni aritmetika medja annwali ta' pollutant ogħla minn standard ta' kwalità ta' l-ilma ta' taħt l-art jew minn valur ta' limitu. |
4. |
Għall-iskopijiet ta' l-investigazzjoni dwar jekk il-kondizzjonijiet għal stat kimiku tajjeb ta' l-ilma ta' taħt l-art imsemmija fl-Artikolu 4(2)(b)(ii) u (iii) humiex sodisfatti, l-Istati Membri għandhom, fejn ikun rilevanti u meħtieġ, u abbażi tar-riżultati rilevanti ta' monitoraġġ u ta' mudell konċettwali adatt tal-massa ta' ilma ta' taħt l-art, jivvalutaw:
|
5. |
L-Istati Membri għandhom jippreżentaw l-istat kimiku ta' l-ilma ta' taħt l-art ta' massa jew grupp ta' mases ta' l-ilma ta' taħt l-art fuq mapep skond is-Sezzjonijiet 2.4.5 u 2.5 ta' l-Anness V tad-Direttiva 2000/60/KE. Barra minn hekk, l-Istati Membri għandhom jindikaw fuq dawn il-mapep il-punti kollha ta' monitoraġġ fejn l-istandards tal-kwalità ta' l-ilma ta' taħt l-art u/jew il-valuri ta' limitu nqabżu, fejn ikun rilevanti u vijabbli. |
ANNESS IV
IDENTIFIKAZZJONI U TREĠĠIGĦ LURA TA' TENDENZI 'L FUQ SINIFIKANTI U SOSTNUTI
PARTI A: IDENTIFIKAZZJONI U TREĠĠIGĦ LURA TA' TENDENZI 'L FUQ SINIFIKANTI U SOSTNUTI
L-Istati Membri jidentifikaw tendenzi 'l fuq sinifikanti u sostnuti fil-mases jew gruppi ta' mases kollha ta' ilma ta' taħt l-art li huma karatterizzati bħala li huma f'riskju skond l-Anness II tad-Direttiva 2000/60/KE, b'kont meħud tal-ħtiġiet li ġejjin:
1. |
skond is-Sezzjoni 2.4 ta' l-Anness V tad-Direttiva 2000/60/KE, il-programm ta' monitoraġġ se jkun infassal b'mod li josserva tendenzi 'l fuq sinifikanti u sostnuti f'konċentrazzjonijiet tal-pollutanti identifikati skond l-Artikolu 3 ta' din id-Direttiva; |
2. |
il-proċedura għall-identifikazzjoni ta' tendenzi 'l fuq sinifikanti u sostnuti tkun bbażata fuq l-elementi li ġejjin:
|
3. |
l-identifikazzjoni ta' tendenzi 'l fuq sinifikanti u sostnuti fil-konċentrazzjonijiet ta' sustanzi li jokkorru kemm b'mod naturali kif ukoll bħala riżultat ta' attivitajiet tal-bniedem se tikkunsidra id-data miġbura qabel il-bidu tal-programm ta' monitoraġġ sabiex tirrappurta dwar l-identifikazzjoni ta' tendenza fl-ewwel pjan ta' ġestjoni tal-baċiri tax-xmajjar stabbilit fl-Artikolu 13 tad-Direttiva 2000/60/KE, fejn tali data tkun disponibbli. |
PARTI B: PUNT TAT-TLUQ GHAT-TREĠĠIEGH
Skond l-Artikolu 5, l-Istati Membri se jreġġgħu lura tendenzi identifikati 'l fuq sinifikanti u sostnuti fejn dawn it-tendenzi jippreżentaw riskju ta' ħsara għal ekosistemi akkwatiċi assoċjati, għal ekosistemi terrestri direttament dipendenti, għas-saħħa tal-bniedem jew għall-użu leġittimu attwali jew potenzjali ta' l-ambjent ta' l-ilma, b'kont meħud tal-ħtiġiet li ġejjin:
1. |
il-punt tat-tluq għall-implimentazzjoni tal-miżuri biex ireġġgħu lura tendenzi 'l fuq sinifikanti u sostnuti se jkun meta l-konċentrazzjoni tal-pollutant tilħaq il-75 % tal-valuri parametriċi ta' l-istandards tal-kwalità ta' l-ilma ta' taħt l-art stabbiliti fl-Anness I u tal-valuri ta' limitu stabbiliti skond l-Artikolu 3, ħlief jekk:
Għal attivitajiet li jaqgħu fil-kamp ta' applikazzjoni tad-Direttiva 91/676/KEE, il-punt tat-tluq għall-implimentazzjoni ta' miżuri biex ireġġgħu lura tendenzi 'l fuq sinifikanti u sostnuti se jiġi stabbilit skond dik id-Direttiva u d-Direttiva 2000/60/KE; |
2. |
ladarba jkun ġie stabbilit punt ta' tluq għal massa ta' l-ilma ta' taħt l-art karatterizzat bħala li huwa f'riskju skond is-Sezzjoni 2.4.4 ta' l-Anness V tad-Direttiva 2000/60/KE u skond il-paragrafu 1 tal-Parti B dan l-Anness, dan ma jinbidilx matul iċ-ċiklu ta' sitt snin tal-pjan ta' ġestjoni tal-baċiri tax-xmajjar meħtieġ skond l-Artikolu 13 tad-Direttiva 2000/60/KE. |
3. |
it-treġġigħ lura ta' tendenzi se jintwera, b'kont meħud tad-dispożizzjonijiet rilevanti ta' monitoraġġ li jinsabu fil-paragrafu 2 tal-Parti A. |
DIKJARAZZJONI TAR-RAĠUNIJIET TAL-KUNSILL
I. INTRODUZZJONI
Il-Kummissjoni adottat il-proposta tagħha għal Direttiva tal-Parlament Ewropew u tal-Kunsill dwar il-protezzjoni ta' l-ilma ta' taħt l-art kontra t-tniġġis fit-28 ta' Ottubru 2003.
Il-Parlament Ewropew adotta l-Opinjoni ta' l-ewwel qari tiegħu fit-28 ta' April 2005. (1)
Il-Kumitat tar-Reġjuni adotta l-Opinjoni tiegħu fit-12 ta' Frar 2004. (2)
Il-Kumitat Ekonomiku u Soċjali adotta l-Opinjoni tiegħu fil-31 ta' Marzu 2004. (3)
Il-Kunsill adotta l-pożizzjoni komuni tiegħu fit-23 ta' Jannar 2006.
II. OBJETTIV
L-ilma ta' taħt l-art huwa riżorsa naturali importanti li tipprovdi l-ilma għall-konsum tal-bniedem kif ukoll għall-agrikoltura u l-industrija. Huwa għandu wkoll rwol ewlieni, speċjalment tul il-perijodi ta' nixfa, fil-preservazzjoni ta' ekosistemi akwatiċi u terrestri. Il-protezzjoni ta' l-ilma ta' taħt l-art kontra t-tniġġis hija għalhekk essenzjali, b'enfasi partikolari fuq il-prevenzjoni billi l-kwalità ta' l-ilma ta' taħt l-art ġeneralment tieħu fit-tul u hija diffiċli biex terġa' tinkiseb, anke meta s-sors ta' tniġġis ikun tneħħa.
Attwalment il-protezzjoni ta' l-ilma ta' taħt l-art kontra t-tniġġiż hija rregolata taħt id-Direttiva 80/68/KEE, (4) li għandha tkun revokata fl-2013, u d-Direttiva 2000/60/KE: id-Direttiva Kwadru dwar l-Ilma (WFD) (5).
Din il-proposta tipprova tissodisfa l-ħtieġa ġenerali li tinsab fl-Artikolu 17 tad-WFD li, abbażi ta' proposta mill-Kummissjoni, il-Parlament Ewropew u l-Kunsill għandhom jadottaw miżuri speċifiċi biex jipprevjenu u jikkontrollaw it-tniġġis ta' l-ilma ta' taħt l-art, sabiex jiġi żgurat it-twettiq ta' l-objettivi ambjentali tad-Direttiva kwadru li huma relatati ma' l-ilma ta' taħt l-art.
III. ANALIŻI TAL-POŻIZZJONI KOMUNI
Ġenerali
Il-pożizzjoni komuni tinkorpora numru ta' emendi mill-ewwel qari tal-Parlament Ewropew, kemm verbatim, parzjali jew fl-ispirtu. Dawn itejbu jew jikkjarifikaw it-test tad-Direttiva proposta.
Madankollu, emendi oħrajn m'humiex riflessi fil-pożizzjoni komuni għax il-Kunsill qabel li ma kinux meħtieġa jew aċċettabbli jew, f'diversi każijiet, għax dispożizzjonijiet mill-proposta oriġinali tal-Kummissjoni tħassru jew ġew abbozzati mill-ġdid b'mod eżawrenti. Dan japplika b'mod partikolari għall-annessi, li l-Kunsill immira li jissemplifika u jikkjarifika kemm jista' jkun sabiex jiżgura implimentazzjoni effettiva.
Diversi emendi ma kinux inklużi fil-pożizzjoni komuni għax il-Kunsill ikkunsidra li ma kinux konformi mal-gwida għall-abbozzar tal-leġislazzjoni Komunitarja, għax huma rrepetew, interpretaw jew ikkontradixxew dispożizzjonijiet li jinsabu fid-Direttiva 2000/60/KE, id-Direttiva Kwadru dwar l-Ilma.
Diversi emendi ġew irrifjutati għax kien ikkunsidrat li dawn ippruvaw jintroduċu dispożizzjonijiet li jaqgħu barra l-kamp ta' applikazzjoni tal-proposta kif determinat mid-Direttiva Kwadru jew koperta minn leġislazzjoni stabbilita oħra.
Il-pożizzjoni komuni tinkludi wkoll bidliet li m'humiex dawk maħsuba fl-opinjoni ta' l-ewwel qari tal-Parlament Ewropew. B'mod partikolari, il-Kunsill ipprova jorganizza l-istruttura ta' l-att propost bl-aktar mod razzjonali possibbli sabiex jgħin il-ftehim, minn awtoritajiet kompetenti u ċittadini, tal-ħtiiet imposti fuq l-Istati Membri. Barra minn hekk, numru ta' bidliet abbozzati ġew introdotti biex jiġi ċċarat it-test jew biex tiġi żgurata l-koerenza ġenerali tad-Direttiva.
Speċifiku
B'mod partikolari, il-Kunsill qabel li:
— |
L-emenda 1 u l-ewwel parti ta' l-emenda 2 ma kinux ċari fir-rigward tad-differenza bejn “tniġġiż” u “deterjorazzjoni”. Referenza għall-ħtieġa tal-prevenzjoni tad-deterjorazzjoni ta' l-istatus ta' korpi ta' l-ilma ta' taħt l-art, konsistenti mad-WFD, ġiet miżjuda ma' l-Artikolu 1. |
— |
L-emenda 3 kienet timponi fuq il-korpi kollha ta' l-ilma ta' taħt l-art l-istandards applikati għall-korpi użati għall-estrazzjoni ta' l-ilma tax-xorb, li ma kinux ikunu vijabbli b'mod realistiku. L-istess japplika għall-ewwel parti ta' l-emenda 62 (li t-tieni parti tagħha kienet aċċettata mill-Kunsill), għall-punt 2 (b) ta' l-emenda 65 u għall-emenda 68. |
— |
L-għanijiet imniżżla fl-emendi 95 u 100 kienu segwiti l-aħjar permezz tal-Programmi Kwadru Komunitarji dwar ir-Riċerka. |
— |
L-emenda 4 ma kinitx tikkonforma mad-WFD, li tiddistingwi b'mod ċar bejn il-livelli ta' protezzjoni għall-ilma ta' taħt l-art u l-ilma tal-wiċċ. |
— |
L-emendi 7, 10 u 80, kif ukoll il-punt (aa) ta' l-emenda 15, indirizzaw l-istatus kwantitattiv ta' l-ilma ta' taħt l-art. Dan kien barra l-kamp ta' applikazzjoni ta' din id-Direttiva segwenti, li hija esklussivament dwar l-istatus kwalitattiv, kif definit fl-Artikolu 17 tad-WFD. |
— |
L-emendi 8 u 9, li jirreferu għal setturi oħra ta' politika, ma kinux konformi mal-gwida għall-abbozzar tal-leġislazzjoni Komunitarja, bħall-emenda 13, li kienet ikkunsidrata li tinterpreta d-WFD aktar milli tiġġustifika d-Direttiva ta' l-Ilma ta' Taħt l-Art. |
— |
L-emenda 11 ma kinitx meħtieġa għax it-test tal-pożizzjoni komuni stabbilixxa, taħt l-Artikolu 6, ordni ekwivalenti għal dik li tinsab fid-Direttiva 80/68/KEE. |
— |
L-emenda 16 irdoppjat id-dispożizzjonijiet mill-Artikolu 5 tad-WFD li jistabbilixxi b'mod ċar ir-responsabbiltajiet rigward karatterizzazzjoni. |
— |
L-emenda 17 ma kinitx aċċettabbli għax il-Kunsill ikkunsidra li distinzjoni ċara, kemm rigward il-kunċett kif ukoll rigward it-terminoloġija, bejn l-istandards tal-kwalità stabbiliti fuq livell Komunitarju u l-valuri ta' limitu li jiġu ddeterminati mill-Istati Membri skond l-ispeċifikazzjonijiet idroġeoloġiċi nazzjonali, kien element essenzjali tad-Direttiva proposta. L-indeboliment jew ir-rifjutar ta' dan l-approċċ jagħmel l-implimentazzjoni aktar komplikata u inqas effettiva f'termini ta' riżultati. L-istess japplika tul it-test, għall-emendi 30, 31, 34, 36, 65, 66, 67, 69, 70, 71, 89 u 90 kollha, jew partijiet minnhom. |
— |
L-emenda 18 kienet aċċettabbli fil-prinċipju, imma l-formulazzjoni tal-kliem ġiet ikkjarifikata biex tindirizza aħjar in-nozzjoni tax-xejriet li potenzjalment iwasslu għal riskju ambjentali. |
— |
L-emendi 19 u 20 kienu aċċettabbli parzjalment imma kienu inkonsistenti mad-WFD kif abbozzata. Elementi meħuda mit-tnejn kienu kkombinati fl-Artikolu 2 (4). |
— |
L-emenda 21 iddefiniet mill-ġdid terminu eżistenti fid-WFD u setgħet wasslet għal konfużjoni. Id-WFD teħtieġ “l-ebda deterjorazzjoni ta' l-istatus tal-korpi ta' l-ilma ta' taħt l-art”, mhux tal-kwalità. |
— |
L-emendi 22 u 24, kif ukoll l-ewwel parti ta' l-emenda 38, irreferew għal kunċetti li ma jintużawx fis-sens strett tal-kelma fil-pożizzjoni komuni, u ppreżentaw diffikultajiet prattiċi serji. Madankollu, il-kwistjoni ta' konċentrazzjonijiet li jseħħu b'mod naturali (li hi aċċennata wkoll fl-emenda 91) hija indirizzata fil-premessa 7. |
— |
L-emendi 23, 49 u 93 introduċew terminu ġdid, kumpless u mhux meħtieġ li seta' wassal għal interpretazzjoni ħażina mifruxa. Kontaminazzjoni storika hija koperta b'mod adegwat minn dispożizzjonijiet aktar ġenerali fil-pożizzjoni komuni u fid-WFD. |
— |
L-emenda 56 ma kinitx rilevanti meta wieħed jikkunsidra l-kamp ta' applikazzjoni tad-direttiva proposta. |
— |
L-emenda 27 kienet inkompatibbli mal-fehma tal-Kunsill li l-istandards tal-kwalità u l-valuri tal-limiti għandhom ikunu stabbiliti fuq livelli rilevanti għar-riskju ta' korpi ta' l-ilma ta' taħt l-art. |
— |
L-emendi 57 u 59 ma kinux meħtieġa billi l-pożizzjoni komuni tindirizza t-tifsira ta' l-istatus kimiku tajjeb u dgħajjef. |
— |
L-emenda 37 ma kinitx meħtieġa fir-rigward tad-definizzjonijiet tad-WFD tal-pollutant u t-tniġġis. |
— |
L-emenda 40 ma kinitx aċċettabbli għax l-Istati Membri huma responsabbli għall-implimentazzjoni tal-programm ta' miżuri. |
— |
Il-kwistjonijiet indirizzati fl-emendi 41 u 58 kienu koperti rispettivament fl-Anness IV u fl-Anness III tal-pożizzjoni komuni. |
— |
L-emenda 46 ma kinitx aċċettabbli għax użat dispożizzjoni li ġejja mid-Direttiva 80/68/KEE f'kuntest differenti ħafna, li jagħmilha impossibbli li tiffunzjona. |
— |
L-emendi 51, 52 u 54 irdoppjaw dispożizzjonijiet tad-WFD. Safejn jikkonċerna l-emenda 50, il-Kunsill introduċa lingwa spirata mid-Direttiva 80/68/KEE (l-Artikolu 15) fl-Artikolu 6 (4), meta wieħed jiftakar fil-ħtieġa li jkun minimizzat il-piż burokratiku. |
— |
L-emenda 55 eskludiet bla ma kien meħtieġ l-Anness III minn adattament tekniku possibbli. |
— |
It-tneħħija proposta fl-emenda 60 kienet twassal għal inkompatibbiltà bejn din id-Direttiva dwar l-Ilma ta' Taħt l-Art u d-Direttiva 91/676/KEE. Il-pożizzjoni komuni tikkjarifika r-relazzjoni bejn dawn iż-żewġ direttivi. |
— |
L-emenda 64 ma kinitx aktar rilevanti fis-sens strett tal-kelma, għax il-pożizzjoni komuni tindirizza l-kwistjoni ta' konformità b'mod differenti, bil-għan li tevita sitwazzjoni fejn nuqqas ta' konformità f'punt ta' monitoraġġ wieħed ikun ifisser nuqqas ta' konformità għall-korp kollu jew il-grupp tal-korpi ta' l-ilma ta' taħt l-art (ara l-Artikolu 4 u l-Anness III). |
— |
L-emendi 73, 76, 77, 78, 79 (l-ewwel parti), 83, 84 u 85 ma kinux rilevanti aktar. B'mod partikolari, il-Kunsill ħass li l-approċċ ta' serje ta' żmien fiss fil-proposta oriġinali ma kienx applikabbli meta wieħed jikkunsidra d-diversità tal-kondizzjonijiet idroġeoloġiċi madwar l-UE u li kriterji komuni għandhom jiġu definiti biss għall-identifikazzjoni ta' xejriet u għall-punt ta' tluq għal tneħħija ta' xejra (l-Anness IV). It-tieni parti ta' l-emenda 79 (simili għall-emenda 89) ġiet inkorporata fl-ispirtu fl-Anness IV, il-punt 1.3. |
— |
L-emenda 81 kienet konfondenti u inkonsistenti mad-WFD. Madankollu, l-Artikolu 5 (2) tal-pożizzjoni komuni tikkjarifika x'għandu jiġi protett. |
IV. KONKLUŻJONI
Il-Kunsill jemmen li l-pożizzjoni komuni tirrappreżenta pakkett bilanċjat tal-miżuri li jikkontribwixxu għall-insegwiment ta' l-objettivi tal-politika ambjentali Komunitarja mniżżla fl-Artikolu 174(1) tat-Trattat KE u tavvanza l-protezzjoni ta' l-ilma ta' taħt l-art kontra t-tniġġis, filwaqt li tiżgura konformità mal-ħtiġiet relatati ma' l-ilma ta' taħt l-art li jinsabu fid-Direttiva 2000/60/KE u tippermetti implimentazzjoni effettiva mill-Istati Membri, b'kont debitu meħud taċ-ċirkostanzi idroġeoloġiċi speċifiċi fuq livell nazzjonali.
Huwa jistenna bil-ħerqa diskussjonijiet kostruttivi mal-Parlament Ewropew bil-ħsieb ta' l-adozzjoni bikrija tad-Direttiva.
(1) ĠU C 45E, 23.2.2006, p. 75.
(2) ĠU C 109, 30.4.2004, p. 29.
(3) ĠU C 112, 30.4.2004, p. 40.