26.11.2010

MT

Il-Ġurnal Uffiċjali tal-Unjoni Ewropea

L 310/18

---

Huma biss it-testi UN/ECE oriġinali li għandhom effett ġuridiku skont id-dritt pubbliku internazzjonali. L-istatus u d-data tad-dħul fis-seħħ ta’ dan ir-Regolament għandhom jiġu vverifikati fl-aħħar verżjoni tad-dokument tal-istatus UN/ECE TRANS/WP.29/343, disponibbli fis-sit:

http://www.unece.org/trans/main/wp29/wp29wgs/wp29gen/wp29fdocstts.html

Ir-Regolament Nru 64 tal-Kummissjoni Ekonomika għall-Ewropa tan-Nazzjonijiet Uniti (UN/ECE) – Dispożizzjonijiet uniformi li jikkonċernaw l-approvazzjoni tal-vetturi fir-rigward tat-tagħmir tagħhom li jista’ jinkludi: stepni għall-użu temporanju, tajers run-flat u/jew sistema run-flat u/jew sistema ta’ monitoraġġ tal-pressjoni tat-tajers

Li jinkorpora t-test validu kollu sa:

serje ta’ emendi 02 – Data tad-dħul fis-seħħ: 19 ta’ Awwissu 2010

Rettifika 1 għas-sensiela ta’ emendi 02 – Data tad-dħul fis-seħħ: 19 ta’ Awwissu 2010

WERREJ

REGOLAMENT

1.

Ambitu

2.

Definizzjonijiet

3.

Applikazzjoni għall-approvazzjoni

4.

Approvazzjoni

5.

Speċifikazzjonijiet u testijiet

6.

Tagħrif supplementari

7.

Modifiki u estensjoni tal-approvazzjoni tat-tip ta’ vettura

8.

Konformità tal-produzzjoni

9.

Penali għan-nuqqas tal-konformità tal-produzzjoni

10.

Produzzjoni definittivament imwaqqfa

11.

Ismijiet u indirizzi tad-dipartimenti tekniċi responsabbli għat-twettiq ta’ testijiet tal-approvazzjoni, u tad-dipartimenti amministrattivi

12.

Dispożizzjonijiet tranżitorji

ANNESSI

Anness 1 –

Komunikazzjoni li tikkonċerna l-approvazzjoni (jew iċ-ċaħda jew l-estensjoni jew l-irtirar ta’ approvazzjoni jew produzzjoni definittivament imwaqqfa) ta’ tip ta’ vettura fir-rigward tat-tagħmir tagħha, b’konformità mar-Regolament Nru 64

Anness 2 –

Arranġamenti tal-marki ta’ approvazzjoni

Anness 3 –

Test tal-ibbrejkjar u tad-devjazzjoni għal vetturi mgħammra b’apparat ta’ riżerva għal użu temporanju

Anness 4 –

Rekwiżiti għat-test għal Sistema ta’ Twissija ta’ Run-Flat (RFWS)

Anness 5 –

Testijiet għal Sistemi ta’ Monitoraġġ tal-Pressjoni tat-Tajers TPMS

1.   AMBITU

Dan ir-Regolament japplika għall-approvazzjoni tal-vetturi tal-kategorija M1 u N1  (1) meta jkun mgħammar bi

(a)	unità ta’ stepni għal użu temporanju, u/jew

(b)	tajers run-flat u/jew sistema run-flat, u/jew

(c)	sistema ta’ monitoraġġ tal-pressjoni tat-tajers (2)

Għall-finijiet ta’ dan ir-Regolament, unitajiet ta’ stepnis sostituti fil-forma ta’ tajers run-flat jew sistema run-flat f’kundizzjoni ta’ tajer imniżżel kompletament, għandhom jitqiesu qishom unitajiet ta’ stepnis għall-użu temporanju kif definit fil-paragrafu 2.10 tar-Regolament.

2.   DEFINIZZJONIJIET

Għall-finijiet ta’ dan ir-Regolament.

2.1.	“Approvazzjoni ta’ vettura” tfisser l-approvazzjoni ta’ tip ta’ vettura fir-rigward tal-protezzjoni tagħha kontra użu mhux awtorizzat;

2.2.

“Tip ta’ vettura” tfisser kategorija ta’ vetturi li mhumiex differenti fir-rigward ta’ aspetti essenzjali bħalma huma: 2.2.1. “Tip ta’ vettura fir-rigward tal-unità ta’ stepni għall-użu temporanju”: 2.2.1.1. it-tagħbijiet massimi tal-assi tal-vettura, kif definit mill-paragrafu 2.12, 2.2.1.2. il-karatteristiċi tal-unità tal-istepni għal użu temporanju, 2.2.1.3. il-metodu ta’ sewqan (roti ta’ quddiem, roti ta’ wara, erba’ roti), 2.2.1.4. is-sospensjoni, 2.2.1.5. is-sistema tal-ibbrejkjar, 2.2.1.6. id-daqs tar-rota/daqs tat-tajer; 2.2.1.7. l-offset tar-rota. 2.2.2. “Tip ta’ vettura fir-rigward tas-sistema ta’ monitoraġġ tal-pressjoni tat-tajers tagħha”: 2.2.2.1. l-isem jew il-marka kummerċjali tal-manifattur, 2.2.2.2. karatteristiċi tal-vettura li jinfluwenzaw b’mod sinifikanti r-rendimenti tas-sistema ta’ monitoraġġ tal-pressjoni tat-tajers, 2.2.2.3. it-tip u d-disinn tas-sistema ta’ monitoraġġ tal-pressjoni tat-tajers

2.3.

“Rota” tfisser rota kompluta magħmula minn rim u diska tar-rota; 2.3.1. “Id-denominazzjoni tad-daqs tar-rota” tfisser denominazzjoni li tinkludi tal-inqas id-dijametru tar-rimm nominali, il-wisgħa tar-rimm nominali u l-profil tar-rimm; 2.3.2. “L-offset tar-rota” tfisser id-distanza mill-wiċċ tal-appoġġ tal-buttun sal-linja taċ-ċentru tar-rimm.

2.4.

“Tajer” tfisser tajer pnewmatiku, li huwa kopertura flessibbli rinforzata li tkun mgħammra bi, jew flimkien mar-rota li tkun mqabbda magħha, tifforma kamra magħluqa li jkun fiha gass (normalment arja) jew gass u likwidu, kontinwu u essenzjalment torojdali, li normalment ikun maħsub li jintuża fi pressjoni iktar qawwija mill-pressjoni atmosferika. Dan jista’ jkun: 2.4.1. “Tajer normali” li huwa tajer li jkun adatt għall-kundizzjonijiet ta’ użu normali kollha fit-triq; 2.4.2. “Stepni għall-użu temporanju” li huwa tajer li huwa maħsub speċifikatament li jkun differenti minn tajer normali u maħsub biss għal użu temporanju taħt kundizzjonijiet ta’ sewqan ristretti; 2.4.3. “Tajer run flat’ jew”“Tajer li jżomm waħdu” jiddeskrivi struttura ta’ tajer pnewmatiku mgħammar bi kwalunkwe soluzzjonijiet tekniċi (pereżempju, ġnub imsaħħa, eċċ.) li jippermettu lit-tajer pnewmatiku, imqabbad mar-rota kif suppost u fin-nuqqas ta’ kwalunkwe komponent supplimentari, li jforni lill-vettura bil-funzjonijiet bażiċi ta’ tajer, tal-inqas, f’veloċità ta’ 80 km/h (50 mph) u distanza ta’ 80 km meta jopera f’modalità ta’ sewqan b’panċer; 2.4.4. “Sistema run flat” jew “Sistema ta’ mobilità estiża” tiddeskrivi assemblaġġ ta’ komponenti dipendenti b’funzjonalità speċifikata, inkluż tajer, li flimkien jipprovdu rendiment speċifikat li jagħti lill-vettura l-funzjonijiet ta’ tajer bażiku, tal-inqas, b’veloċità ta’ 80 km/h (50 mph) u distanza ta’ 80 km meta tkun qed topera f’modalità ta’ sewqan b’panċer.

2.5.	“Modalità ta’ sewqan b’panċer” tiddeskrivi stat ta’ tajer, li essenzjalment iżomm l-integrità strutturali tiegħu, filwaqt li jopera bi pressjoni ta’ inflazzjoni bejn 0 u 70 kPa.

2.6.	“Funzjoni bażika ta’ tajer” tfisser il-kapaċità normali ta’ tajer minfuħ biex jiflaħ tagħbija partikolari sa veloċità partikolari u jittrażmetti s-sewqan, l-istering u l-forzi tal-ibbrejkjar sal-art li tkun miexja fuqha.

2.7.

“Denominazzjoni tad-daqs tat-tajer” tfisser kumbinazzjoni ta’ ċifri li jidentifikaw unikament id-daqs ġeometriku tat-tajer, li jinkludi il-wisgħa tas-sezzjoni nominali, il-proporzjon tal-aspett nominali u d-dijametru nominali. Definizzjonijiet preċiżi ta’ dawn il-fatturi jistgħu jinstabu fir-Regolament Nru 30.

2.8.	“Struttura ta’ tajer” tfisser il-karatteristiċi tekniċi ta’ karkassa tat-tajer. Din l-istruttura tista’ tkun djagonali jew imsallba, djagonali ċinturata, radjali jew run flat, kif speċifikat ulterjorment fir-Regolament Nru 30.

2.9.

“Unità ta’ stepni standard” tfisser assemblaġġ ta’ rota u tajer identiċi f’termini ta’ denominazzjoni jiet ta’ daqs tar-rota u t-tajer, offset tar-rota u struttura tat-tajer għal dak mgħammar fl-istess pożizzjoni tal-assi u l-mudell jew il-verżjoni partikulari tal-vettura għal tħaddim normali. Dan jinkludi l-każ ta’ rota li tkun prodotta minn materjal differenti, pereżempju, liega tal-azzar flok tal-aluminju, li tista’ tuża disinji differenti ta’ skorfini u firrolli li jorbtu r-rota imma li minbarra dan huma identiċi għar-rota maħsuba għal tħaddim normali.

2.10.

“Unità ta’ stepni għal użu temporanju” tfisser assemblaġġ ta’ kwalunkwe rota u tajer li ma tidħolx fl-ambitu tat-tifsira ta’ “Unità ta’ stepni standard” fil-paragrafu 2.9. Unitajiet ta’ stepni għal użu temporanju jistgħu jkunu tat-tipi li ġejjin: 2.10.1. Tip 1 Assemblaġġ fejn it-tajer ikun stepni għal użu temporanju kif definit fil-paragrafu 2.4.2; 2.10.2. Tip 2 Assemblaġġ fejn ir-rota jkollha offset differenti minn dak tar-rota mwaħħla fl-istess pożizzjoni tal-fus għal operat normali tal-vettura; 2.10.3. Tip 3 Assemblaġġ fejn it-tajer ikun ta’ struttura differenti minn dak imwaħħal fl-istess pożizzjoni tal-fus għal operat normali tal-vettura; 2.10.4. Tip 4 Assemblaġġ fejn tajer ikun tajer normali kif definit fil-paragrafu 2.4.1 imma fejn id-denominazzjoni tad-daqs tar-rota jew tat-tajer jew it-tnejn, ivarjaw minn dawk tar-rota jew tat-tajer imwaħħla fl-istess pożizzjoni tal-fus għall-operat normali tal-vettura; 2.10.5. Tip 5 Assemblaġġ fejn unità ta’ rota u tajer kif definita fil-paragrafu 2.4.3 jew 2.4.4 ikun imwaħħal mal-vettura għal użu normali u fit-tul fit-triq, imma f’każ ta’ emerġenza jintuża f’kundizzjoni kompletament imniżżel;

2.11.

“Massa massima” tfisser il-valur massimu tal-vettura ddikjarat mill-manifattur li hija teknikament permissibbli (din il-massa tista’ tkun ogħla mill-“massa massima permissibbli” stipulata mill-amministrazzjoni nazzjonali);

2.12.

“Tagħbija massima tal-fus” tfisser il-valur massimu, kif indikat mill-manifattur, tal-forza vertikali totali bejn l-uċuħ ta’ kuntatt tat-tajers jew tracks ta’ fus wieħed u l-art u li jirriżulta mill-parti tal-massa tal-vettura appoġġjata minn dak il-fus; din it-tagħbija tista’ tkun ogħla mit-“tagħbija awtorizzata tal-fus” stipulata mill-amministrazzjoni nazzjonali. Is-somma tat-tagħbijiet tal-fus tista’ tkun ogħla mill-valur li jikkorrispondi għall-massa totali tal-vettura;

2.13.

“Sistema ta’ Twissija ta’ Run-Flat” - tiddeskrivi sistema li twassal l-informazzjoni lis-sewwieq li tajer qiegħed jopera fil-modalità ta’ fejn jibqa’ għaddej minkejja panċer.

2.14.

“Sistema għal Monitoraġġ tal-Pressjoni tat-Tajers (TPMS)” tfisser sistema mgħammra f’vettura, li tkun tista’ tikkalkula l-pressjoni tal-inflazzjoni tat-tajers jew il-varjazzjoni ta’ din il-pressjoni tal-inflazzjoni matul il-ħin u li tittrażmetti informazzjoni korrispondenti lill-utent waqt li l-vettura tkun għaddejja.

2.15.

“Pressjoni tal-inflazzjoni tat-tajer kiesaħ” tfisser il-pressjoni tat-tajer f’temperatura ambjentali, fin-nuqqas ta’ kwalunkwe akkumulazzjoni ta’ pressjoni mill-użu tat-tajer.

2.16.

“Pressjoni ta’ inflazzjoni kiesħa rakkomandata (Prec)” tfisser il-pressjoni rakkomandata għal kull pożizzjoni tat-tajer mill-manifattur tal-vettura, għall-kundizzjonijiet ta’ servizz intenzjonati (eż. veloċità u tagħbija) tal-vettura kkonċernata, kif definit fil-plakard tal-vettura u/jew fil-manwal tal-proprjetarju tal-vettura.

2.17.

“Pressjoni operattiva waqt l-użu (Pwarm)” tfisser il-pressjoni tal-inflazzjoni għal kull pożizzjoni tat-tajer elevata mill-pressjoni kiesħa (Prec) b’effetti tat-temperatura matul l-użu tal-vettura.

2.18.

“Pressjoni tat-test (Ptest)” tfisser il-pressjoni reali tat-tajer(s) magħżula għal kull pożizzjoni tat-tajer wara li jitniżżel matul il-proċedura tat-test.

2.19.

“Tip ta’ Sistema ta’ Monitoraġġ tal-Pressjoni tat-Tajers” tfisser sistemi li ma jvarjawx b’mod sinifikanti f’aspetti essenzjali bħal: (a) il-prinċipju ta’ operazzjoni; (b) kull komponent li x’aktarx li jkollu influwenza sinifikanti fuq ir-rendiment tas-sistema kif speċifikat skont il-paragrafu 5.3 ta’ dan ir-Regolament.

3.   APPLIKAZZJONI GĦAL APPROVAZZJONI

3.1.   L-applikazzjoni għall-approvazzjoni ta’ tip ta’ vettura fir-rigward tat-tagħmir tiegħu b’:

(a)	unità ta’ stepni għal użu temporanju (inkluż, fejn applikabbli, sistema ta’ twissija ta’ run-flat), u/jew

(b)	sistema tal-monitoraġġ tal-pressjoni tat-tajers

għandha tintbagħat mill-manifattur tal-vettura jew mir-rappreżentant debitament akkreditat tiegħu;

3.2.   Din għandha tkun akkumpanjata, fi triplikati, minn deskrizzjoni tat-tip tal-vettura fir-rigward tal-affarijiet speċifikati fl-Anness 1 ma’ dan ir-Regolament:

3.3.   Vettura rappreżentattiva tat-tip tal-vettura li trid tiġi approvata għandha tkun ippreżentata lill-Awtorità ta’ Approvazzjoni tat-tip jew lis-servizz tekniku responsabbli għat-twettiq tat-testijiet tal-approvazzjoni.

3.4.   Id-Dipartiment Amministrattiv għandu jivverifika l-eżistenza ta’ arranġamenti sodisfaċenti sabiex jiġu żgurati kontrolli effettivi fuq il-konformità tal-produzzjoni qabel ma tingħata l-approvazzjoni tat-tip.

4.   APPROVAZZJONI

4.1.   Jekk il-vettura mressqa għall-approvazzjoni skont dan ir-Regolament tissodisfa r-rekwiżiti kollha tal-paragrafu 5 ta’ hawn taħt, l-approvazzjoni ta’ dak it-tip ta’ vettura għandha tingħata.

4.1.1.   Approvazzjoni tal-vettura fir-rigward tad-dispożizzjonijiet relatati biss ma’ unità ta’ stepni għal użu temporanju għandha tingħata jekk il-vettura tissodisfa r-rekwiżiti tal-paragrafi 5.1 u 5.2.

4.1.2.   Approvazzjoni tal-vettura fir-rigward unikament tad-dispożizzjonijiet relatati biss ma’ sistemi ta’ monitoraġġ tal-pressjoni tat-tajers għandha tingħata jekk il-vettura tissodisfa r-rekwiżiti tal-paragrafu 5.3.

4.2.   Għandu jiġi assenjat numru tal-approvazzjoni lil kull tip approvat. L-ewwel żewġ ċifri tiegħu (fil-mument 02 li jikkorrispondi mas-serje ta’ emendi 02) għandhom jindikaw is-serje tal-emendi li jinkorporaw l-emendi tekniċi ewlenin l-iktar reċenti li saru lir-Regolament fiż-żmien li nħarġet l-approvazzjoni. L-istess Parti Kontraenti ma tistax tassenja l-istess numru lil tip ieħor ta’ vettura. Madankollu, varjanti tal-firxa tal-mudell li huma f’kategoriji separati fir-rigward tal-kriterji tal-paragrafu 2.2 jistgħu jkunu koperti mill-istess approvazzjoni tat-tip, sakemm ir-riżultati tat-testijiet deskritti fil-paragrafi 5.2 u 5.3 ma jurux differenzi ewlenin.

4.3.   Avviż dwar l-approvazzjoni jew l-estensjoni jew iċ-ċaħda tal-approvazzjoni ta’ tip ta’ vettura skont dan ir-Regolament għandu jiġi kkomunikat lill-Partijiet fil-Ftehim li japplikaw dan ir-Regolament, permezz ta’ formola li taqbel mal-mudell fl-Anness 1 ta’ dan ir-Regolament.

4.4.   Għandu jkun hemm imwaħħal, f’post fejn jidher u li hu aċċessibbli malajr speċifikat fuq il-formola tal-approvazzjoni, ma’ kull vettura li tikkonforma ma’ tip ta’ vettura approvata skont dan ir-Regolament marka ta’ approvazzjoni internazzjonali magħmula minn:

4.4.1.   ċirku li jdur mal-ittra “E” segwit min-numru li jiddistingwi l-pajjiż li tal-approvazzjoni (3);

4.4.2.   in-numru ta’ dan ir-Regolament, segwit minn:

4.4.2.1.

l-ittra “R” fil-każ ta’ vetturi approvati skont il-paragrafu 4.1.1 biss.

4.4.2.2.

l-ittra “P” fil-każ ta’ vetturi approvati skont il-paragrafu 4.1.2 biss.

4.4.2.3.

l-ittra “RP” fil-każ ta’ vetturi approvati skont il-paragrafi 4.1.1 u 4.1.2.

4.4.3.   sing u n-numru tal-approvazzjoni dwar id-dritt tal-markamenti preskritti fil-paragrafi 4.4.1 u 4.4.2.

4.5.   Jekk il-vettura tkun konformi mat-tip ta’ vettura approvata, skont wieħed jew aktar Regolamenti annessi ma’ dan il-Ftehim, fil-pajjiż li jkun ħareġ l-approvazzjoni skont dan ir-Regolament, is-simbolu msemmi fil-paragrafu 4.4.1 m’għandux għalfejn ikun ripetut; f’dak il-każ, ir-Regolament u n-numri tal-approvazzjoni u s-simboli addizzjonali għar-Regolamenti kollha li ngħatat l-approvazzjoni skonthom fil-pajjiż li ta l-approvazzjoni skont dan ir-Regolament, għandhom jitqiegħdu f’kolonni wieqfa fuq in-naħa tal-lemin tas-simbolu preskritt fil-paragrafu 4.4.1.

4.6.   Il-marka tal-approvazzjoni trid tkun tista’ tinqara b’mod ċar u ma tkunx tista’ titħassar.

4.7.   Il-marka tal-approvazzjoni għandha titqiegħed qrib ta’ jew fuq il-pjanċa tad-data tal-vettura mwaħħla mill-manifattur.

4.8.   L-Anness 2 ta’ dan ir-Regolament jagħti eżempji ta’ marki tal-approvazzjoni.

5.   SPEĊIFIKAZZJONIJIET U TESTIJIET

5.1.   Ġenerali

5.1.1.   Tajers inklużi għall-użu bħala parti mill-unità ta’ stepni għal użu temporanju kif definit fil-paragrafu 2.10, għandu jkun approvat b’konformità mar-Regolament Nru 30.

5.1.2.   Għall-vetturi li għandhom tal-inqas erba’ roti, il-kapaċità ta’ tagħbija tal-unità ta’ stepni għal użu temporanju għandha tkun tal-inqas daqs nofs l-ogħla fost it-tagħbijiet massimi tal-fus tal-vettura; jekk l-użu tiegħu jkun ristrett għal fus speċifiku msemmi fl-istruzzjonijiet fil-paragrafu 6 hawn taħt, il-kapaċità tat-tagħbija tiegħu għandha tkun tal-inqas daqs nofs it-tagħbija massima ta’ dak il-fus.

5.1.3.   Il-veloċità tad-disinn tal-unità ta’ stepni għall-użu temporanju għandha tkun ta’ tal-inqas 120 km/h għat-tipi 1, 2 u 3.

5.1.4.   Unità ta’ stepni għal użu temporanju għandha turi l-karatteristiċi li ġejjin:

5.1.4.1.

B’mod permanenti għandu jintwera simbolu ta’ twissija ta’ veloċità massima ta’ 80 km/h b’konformità mad-dijagramma ta’ hawn taħt fuq il-wiċċ ta’ barra tar-rota f’post prominenti. Fil-każ ta’ vetturi maħsuba għall-bejgħ f’pajjiżi li jużaw unitajiet ta’ kejl imperjali, għandu jintwera b’mod permanenti simbolu ta’ twissija addizzjonali, identiku għal dak deskritt hawn fuq, ħlief li ċ-ċifra “80” għandha tinbidel b’“50” u l-kliem “km/h” jinbidel b’“mph”, fuq il-wiċċ ta’ barra tar-rota f’post prominenti. Inkella għandu jintwera b’mod permanenti simbolu ta’ twissija uniku konformi mad-dijagramma ta’ hawn taħt fuq il-wiċċ ta’ barra tar-rota f’post prominenti. L-ittri kapitali għandhom ikunu għoljin tal-inqas 5 mm u n-numri “80” u “50” għandhom ikunu għoljin tal-inqas 20 mm bl-elementi li jiffurmaw kull karattru tan-numru jkunu magħmulin minn linji ta’ ħxuna ta’ tal-inqas 3 mm. It-test f’ittri żgħar għandu jkollu linji ta’ tal-inqas 5 mm. It-test kollu għandu jkun magħluq ġo kaxxa u jkun fi sfond ta’ kulur kontrastanti. Ir-rekwiżiti ta’ dan il-paragrafu għandhom japplikaw għat-tipi 1, 2 u 3 ta’ unitajiet ta’ stepni għal użu temporanju kif definiti fil-paragrafi 2.10.1, 2.10.2 u 2.10.3.

5.1.4.1.1.

B’mod permanenti għandu jintwera simbolu ta’ twissija ta’ veloċità massima ta’ 120 km/h b’konformità mad-dijagramma ta’ hawn taħt fuq il-wiċċ ta’ barra tar-rota f’post prominenti. Fil-każ ta’ vetturi maħsuba għall-bejgħ f’pajjiżi li jużaw unitajiet ta’ kejl imperjali, għandu jintwera b’mod permanenti simbolu ta’ twissija addizzjonali, identiku għal dak deskritt hawn fuq, ħlief li ċ-ċifra “120” għandha tinbidel b’“75” u l-kliem “km/h” jinbidel b’“mph”, fuq il-wiċċ ta’ barra tar-rota f’post prominenti. Inkella għandu jintwera b’mod permanenti simbolu ta’ twissija uniku konformi mad-dijagramma ta’ hawn taħt fuq il-wiċċ ta’ barra tar-rota f’post prominenti. L-ittri kapitali għandhom ikunu għoljin tal-inqas 5 mm u n-numri “120” u “75” għandhom ikunu għoljin tal-inqas 20 mm bl-elementi li jiffurmaw kull karattru tan-numru jkunu magħmulin minn linji ta’ ħxuna ta’ tal-inqas 3 mm. It-test f’ittri żgħar għandu jkollu linji ta’ tal-inqas 5 mm. It-test kollu għandu jkun magħluq ġo kaxxa u jkun fi sfond ta’ kulur kontrastanti. Ir-rekwiżiti ta’ dan il-paragrafu għandhom japplikaw għat-tip 4 tal-unitajiet ta’ stepni għal użu temporanju kif definit fil-paragrafu 2.10.4 li jkun fornut għall-użu fuq vettura tal-kategorija M1.

5.1.4.2.

Meta jitwaħħal mal-vettura għal użu temporanju l-wiċċ ta’ barra tar-rota u/jew tajer għandu juri kulur jew arranġament ta’ kuluri distint li huwa kjarament differenti mill-kulur(i) tal-unitajiet standard. Jekk ikun possibbli li tgħatti l-unità ta’ stepni għal użu temporanju b’kopertura tar-roti, il-kulur jew arranġament ta’ kuluri distint m’għandux jitgħatta minn din il-kopertura tar-roti.

5.1.5.   Ħlief fil-każ ta’ tajers run-flat/li jżommu waħedhom jew sistema run-flat/ ta’ mobilità estiża, huwa permess li tkun fornuta unità ta’ stepni għal użu temporanju mal-vettura.

5.1.6.   Fil-każ tal-vetturi mgħammra b’tajers run-flat/li jżommu waħedhom jew sistema run-flat/ta’ mobilità estiża, il-vettura għandha tkun mgħammra wkoll b’Sistema ta’ Twissija ta’ Run-Flat (definita fil-paragrafu 2.13) li kapaċi joperaw f’firxa ta’ veloċità minn 40 km/h sal-veloċità massima ddisinjata għall-vettura u jissodisfaw ir-rekwiżiti tal-paragrafi 5.1.6.1 sal-5.1.6.6. Madankollu, jekk il-vettura tkun mgħammra b’sistema ta’ monitoraġġ għall-pressjoni tat-tajers li tissodisfa r-rekwiżiti tal-paragrafu 5.3, ma jkunx hemm bżonn li tkun mgħammra wkoll b’sistema ta’ twissija ta’ run-flat.

5.1.6.1.

L-indikazzjoni tat-twissija għandha tkun permezz ta’ sinjal ottiku ta’ twissija isfar.

5.1.6.2.

Is-sinjal ta’ twissija għandu jkun attivat meta l-iswiċċ tal-ignixin (start) ikun fil-pożizzjoni “on” (run) (kontroll tal-bozza).

5.1.6.3.

Għandu jkun hemm twissija indikata lis-sewwieq bit-tħaddim tas-sinjal ta’ twissija msemmi fil-paragrafu 5.1.6.1 mhux aktar tard minn meta jinstab li tajer wieħed qiegħed fil-modalità ta’ sewqan b’panċer.

5.1.6.4.

Ħsara elettrika jew anomalija fis-sensuri li taffettwa s-Sistema ta’ Twissija Run-Flat, inkluża ħsara tas-sors elettriku, il-provvista jew it-trażmissjoni tal-output signal, għandha tkun indikata lis-sewwieq b’sinjal ta’ ħsara ottiku isfar tar-run flat. Jekk is-sinjal ta’ twissija deskritt fil-paragrafu 5.1.6.1 jintuża biex jindika kemm tajer baxx kif ukoll malfunzjoni tas-SMPT, għandu japplika dan li ġej: meta l-iswiċċ tal-ignixin (start) ikun fil-pożizzjoni “on” (run) is-sinjal ta’ twissija għandu jteptep biex jindika ħsara fis-sistema. Wara ftit żmien is-sinjal ta’ twissija għandu jibqa’ mixgħul il-ħin kollu sakemm iddum il-ħsara u sakemm l-iswiċċ tal-ignixin (start) ikun fil-pożizzjoni “on” (run). Is-sekwenza tat-teptip u tal-illuminazzjoni għandha tiġi ripetuta kull darba li l-iswiċċ tal-ignixin (start) ikun fil-pożizzjoni “on” (run) sakemm titranġa l-ħsara.

5.1.6.5.

Meta s-sistema tkun qiegħda tiġi rrisettjata manwalment b’konformità mal-istruzzjonijiet tal-manifattur tal-vettura, id-dispożizzjonijiet fil-paragrafi 5.1.6.3 u 5.1.6.4 ma japplikawx.

5.1.6.6.

It-tħaddim tas-sinjal ta’ twissija speċifikat fil-paragrafi 5.1.6.2 sa 5.1.6.4 għandu jissodisfa r-rekwiżiti tal-Anness 4.

5.1.7.   Jekk il-vettura tkun mgħammra b’unità ta’ stepni għal użu teporanju f’kundizzjoni ta’ tajer imniżżel, għandu jkun ipprovdut strument fuq il-vettura li jippermetti lit-tajer biex tintefaħ għall-pressjoni speċifikata għal użu temporanju f’mhux iktar minn 10 minuti.

5.2.   Test tal-ibbrejkjar

5.2.1.   Vetturi maħsubin li jkunu mgħammra b’unitajiet ta’ stepni għal użu temporanju jissodisfaw ir-rekwiżiti tal-Anness 3 ta’ dan ir-Regolament.

5.3.   Sistemi ta’ Monitoraġġ tal-Pressjoni tat-Tajers (TPMS)

5.3.1.   Rekwiżiti Ġenerali

5.3.1.1.

Bla ħsara għar-rekwiżiti tal-paragrafu 12, kwalunkwe vettura tal-kategoriji M1 sa massa massima ta’ 3 500 kg u N1 fiż-żewġ każijiet bil-fusijiet kollha mgħammra ma’ tajers singoli u mgħammra b’sistema ta’ monitoraġġ tal-pressjoni tat-tajers li jikkonformaw mad-definizzjoni tal-paragrafu 2.14 għandha tissodisfa r-rekwiżiti ta’ rendiment li jinsabu fil-paragrafi 5.3.1.2 sa 5.3.5.5 hawn taħt u għandha tkun ittestjata b’konformità mal-Anness 5.

5.3.1.2.

Kwalunkwe sistema ta’ monitoraġġ tal-pressjoni tat-tajers mgħammra fuq vettura għandha tikkonforma mar-rekwiżiti tar-Regolament Nru 10.

5.3.1.3.

Is-sistema għandha taħdem minn veloċità ta’ 40 km/h jew inqas, sal-veloċità massima pproġettata tal-vettura.

5.3.2.   Detezzjoni tal-pressjoni tat-tajer għal telfien ta’ pressjoni relatata ma’ inċident (test tal-panċer)

5.3.2.1.

It-TPMS għandha tkun ittestjata skont il-proċedura tat-test stabbilita fil-paragrafu 2.6.1 tal-Anness 5. Meta jkunu ttestjati skont din il-proċedura, it-TPMS għandha tillumina s-sinjal ta’ twissija deskritt fil-paragrafu 5.3.5 mhux iktar minn 10 minuti wara li l-pressjoni operattiva waqt l-użu f’waħda mit-tajers tal-vettura tkun tnaqqset b’20 fil-mija jew tkun qiegħda f’pressjoni minima ta’ 150 kPa, skont liema minnhom tkun l-ogħla.

5.3.3.   Detezzjoni għal livell tal-pressjoni tat-tajers sinifikantement iktar baxx mill-pressjoni rakkomandata għal rendiment ottimali inkluż is-sikurezza u l-konsum tal-fjuwil (test ta’ diffużjoni)

5.3.3.1.

It-TPMS għandha tkun ittestjata skont il-proċedura tat-test stabbilita fil-paragrafu 2.6.2 tal-Anness 5. Meta jkunu ttestjati skont din il-proċedura, it-TPMS għandha tixgħel is-sinjal ta’ twissija deskritt fil-paragrafu 5.3.5 f’mhux iktar minn 60 minuti ta’ ħin kumulattiv ta’ sewqan wara li l-pressjoni operattiva waqt l-użu f’waħda mit-tajers tal-vettura, sa total massimu ta’ erba’ tajers, tkun tnaqqset b’20 fil-mija.

5.3.4.   Test għas-sejbien ta’ ħsara

5.3.4.1.

It-TPMS għandha tkun ittestjata skont il-proċedura tat-test stabbilita fil-paragrafu 3 tal-Anness 5. Meta tkun ittestjata għal din il-proċedura t-TPMS għandha tillumina s-sinjal ta’ twissija deskritt fil-paragrafu 5.3.5 mhux iktar minn 10 minuti wara li sseħħ il-ħsara li taffettwa l-ġenerazzjoni jew it-trażmissjoni tas-sinjali tal-kontroll u r-reazzjoni fis-sistema ta’ monitoraġġ tal-pressjoni tat-tajers tal-vettura. Jekk is-sistema titwaqqaf minn influwenza esterna (eż. ħoss tal-frekwenza tar-radju), il-ħin għas-sejba tal-ħsara jista’ jiġi estiż.

5.3.5.   Indikazzjoni ta’ twissija.

5.3.5.1.

L-indikazzjoni tat-twissija għandha tkun permezz ta’ sinjal ottiku ta’ twissija li jikkonforma mar-Regolament Nru 121.

5.3.5.2.

Is-sinjal ta’ twissija għandu jkun attivat meta l-iswiċċ tal-ignixin (start) ikun fil-pożizzjoni “on” (run) (kontroll tal-bozza). [Dan ir-rekwiżit ma japplikax għal indikaturi murija fi spazju komuni].

5.3.5.3.

Is-sinjal tat-twissija jrid ikun viżibbli anke fid-dawl tal-ġurnata; il-kondizzjoni sodisfaċenti tas-sinjal trid tkun verifikabbli faċilment mis-sewwieq minn fuq is-sedil tiegħu.

5.3.5.4

L-indikazzjoni ta’ ħsara tista’ tkun l-istess sinjal ta’ twissija bħal dak li jindika tajer baxx. Jekk is-sinjal ta’ twissija deskritt fil-paragrafu 5.3.5.1 jintuża biex jindika kemm tajer baxx kif ukoll ħsara tat-TPMS, għandu japplika dan li ġej: meta l-iswiċċ tal-ignixin (start) ikun fil-pożizzjoni “on” (run) is-sinjal ta’ twissija għandu jteptep biex jindika ħsara. Wara ftit żmien is-sinjal ta’ twissija għandu jibqa’ mixgħul il-ħin kollu sakemm iddum il-ħsara u sakemm l-iswiċċ tal-ignixin (start) ikun fil-pożizzjoni “on” (run). Is-sekwenza tat-teptip u tal-illuminazzjoni għandha tiġi ripetuta kull darba li l-iswiċċ tal-ignixin (start) ikun fil-pożizzjoni “on” (run) sakemm jitranġa n-nuqqas.

5.3.5.5.

L-indikatur tat-twissija deskritta fil-paragrafu 5.3.5.1 jista’ jintuża bit-teptip sabiex jipprovdi l-informazzjoni dwar l-istatus ta’ rrisettjar tas-sistema ta’ monitoraġġ tal-pressjoni tat-tajers b’konformità mal-manwal ta’ sid il-vettura.

6.   TAGĦRIF SUPPLIMENTARI

6.1.   Jekk il-vettura tkun mgħammra b’unità ta’ stepni għal użu temporanju, il-manwal ta’ sid il-vettura għandu jkun fih tal-inqas l-informazzjoni li ġejja:

6.1.1.   Stqarrija tar-riskju li jiġi min-nuqqas ta’ konformità mar-restrizzjonijiet fuq l-użu ta’ unità ta’ stepni għal użu temporanju inkluż, kif xieraq, stqarrija relatata mal-użu ristrett ta’ fus speċifiku.

6.1.2.   Istruzzjoni għal sewqan bir-reqqa f’mhux iktar mill-veloċità massima permessa ta’ 80 km/h (50 mph) meta jkun twaħħal tip 1, 2 jew 3 ta’ unità ta’ stepni għal użu temporanju kif definit fil-paragrafi 2.10.1, 2.10.2 or 2.10.3, u biex tiġi installata mill-ġdid unità standard kemm jista’ jkun malajr. Għandu jkun ċar li din l-istruzzjoni tapplika wkoll għal unità ta’ stepni għal użu temporanju tat-tip 5 kif definit fil-paragrafu 2.10.5 li qed jintuża fil-modalità ta’ sewqan b’panċer.

6.1.2.1.

Istruzzjoni għal sewqan bir-reqqa f’mhux iktar mill-veloċità massima permessa ta’ 120 km/h (75 mph), meta jkun twaħħal unità ta’ stepni għal użu temporanju tat-tip 4 kif definit fil-paragrafu 2.10.4, u biex tiġi installata mill-ġdid unità standard kemm jista’ jkun malajr.

6.1.3.   Stqarrija li l-operat tal-vettura ma jkunx permess li jkunu twaħħlulha iktar minn unità waħda ta’ stepni għal użu temporanju fl-istess ħin. Ir-rekwiżiti ta’ dan il-paragrafu għandhom japplikaw għat-tipi 1, 2 u 3 ta’ unitajiet ta’ stepni għal użu temporanju kif definiti fil-paragrafi 2.10.1, 2.10.2 u 2.10.3.

6.1.4.   Indikazzjoni ċara tal-pressjoni tal-inflazzjoni speċifikata mill-manifattur tal-vettura għat-tajer tal-unità ta’ stepni għal użu temporanju.

6.1.5.   Għal vetturi mgħammra b’unità ta’ stepni għal użu temporanju maħżun mhux minfuħ, deskrizzjoni tal-proċedura biex jintefaħ it-tajer għall-pressjoni speċifikata għal użu temporanju permezz tat-tagħmir imsemmi fil-paragrafu 5.1.7 hawn fuq.

6.2.   Jekk il-vettura tkun mgħammra b’Sistema ta’ Monitoraġġ tal-Pressjoni tat-Tajers jew Sistema ta’ Twissija ta’ Run-Flat, il-manwal ta’ sid il-vettura għandu jkun fih tal-inqas l-informazzjoni li ġejja:

6.2.1.   Stqarrija li l-vettura hija mgħammra b’sistema ta’ dan it-tip (u informazzjoni dwar kif tiġi rrisettjata s-sistema, jekk is-sistema attwali tinkludi din il-karatteristika).

6.2.2.   Stampa tas-simbolu li javżak bil-problema deskritt fil-paragrafu 5.1.6.1 jew 5.3.5.1 kif xieraq (u stampa tas-simbolu li javżak bi ħsara, jekk hemm sinjal li javżak apposta għal din il-funzjoni).

6.2.3.   Informazzjoni addizzjonali dwar is-sinifikat ta’ meta jixgħel is-sinjal ta’ twissija tal-pressjoni baxxa tat-tajers u deskrizzjoni tal-azzjoni korrettiva li trid tittieħed jekk dan jiġri.

6.3.   Jekk mal-vettura ma jingħatax manwal għal sidha, l-informazzjoni meħtieġa mill-paragrafu 6.1 u/jew 6.2 hawn fuq għandha tintwera f’post prominenti fil-vettura.

7.   MODIFIKI U ESTENSJONI TAL-APPROVAZZJONI TAT-TIP TA’ VETTURA

7.1.   Kull modifika tat-tip ta’ vettura għandha tkun innotifikata lid-Dipartiment Amministrattiv li jkun ta l-approvavazzjoni tat-tip. Id-dipartiment jista’ mbagħad jew:

7.1.1.

Jikkunsidra li l-modifiki magħmula x’aktarx li ma jkollhomx effetti negattivi notevoli u li fi kwalunwe każ il-vettura xorta tissodisfa r-rekwiżiti; jew

7.1.2.

Jitlob rapport tal-ittestjar addizzjonali mis-Servizz Tekniku responsabbli għat-twettiq tat-testijiet.

7.2.   Il-konferma jew iċ-ċaħda tal-approvazzjoni, li tispeċifika l-alterazzjonijiet, għandha tkun innotifikata skont il-proċedura speċifikata fil-paragrafu 4.3 hawn fuq lill-Partijiet għall-Ftehim li japplikaw dan ir-Regolament.

7.3.   Id-Dipartiment Amministrattiv li joħroġ l-estensjoni tal-approvazzjoni għandu jagħti numru tas-serje lil kull formola ta’ komunikazzjoni li titfassal għal estensjoni bħal din.

8.   KONFORMITÀ TA’ PRODUZZJONI

8.1.   Il-proċeduri ta’ Konformità tal-Produzzjoni għandhom jikkonformaw ma’ dawk stabbiliti fl-Appendiċi 2 tal-Ftehim (E/ECE/324 – E/ECE/TRANS/505/Rev.2) bir-rekwiżiti li ġejjin:

8.2.   Id-Dipartiment Amministrattiv li jkun ta l-approvazzjoni tat-tip fi kwalunkwe ħin jista’ jivverifika l-konformità tal-produzzjoni f’kull faċilità ta’ produzzjoni. Il-frekwenza normali ta’ dawn il-verifiki għandha tkun tal-inqas darba kull sena.

9.   PENALI GĦAL NUQQAS TA’ KONFORMITÀ TAL-PRODUZZJONI

9.1.   L-approvazzjoni mogħtija fil-każ ta’ tip ta’ vettura skont dan ir-Regolament tista’ tiġi rtirata jekk ma jkunux sodisfatti r-rekwiżiti stipulati fil-paragrafu 8.

9.2.   Jekk Parti għall-Ftehim li tapplika dan ir-Regolament tirtira approvazzjoni li tkun tat qabel, għandha tavża b’dan minnufih lill-Partijiet Kontraenti l-oħra li japplikaw dan ir-Regolament, permezz ta’ kopja tal-formola tal-approvazzjoni li fl-aħħar ikollha, f’ittri kbar, l-annotazzjoni ffirmata u datata “APPROVAZZJONI RTIRATA”.

10.   IL-PRODUZZJONI MWAQQFA GĦAL KOLLOX

Jekk id-detentur tal-approvazzjoni jieqaf għal kollox jimmanifattura tip ta’ vettura approvat skont dan ir-Regolament, għandu jinforma b’dan lill-awtorità li tat l-approvazzjoni. Meta tirċievi l-komunikazzjoni rilevanti, dik l-awtorità għandha tgħarraf b’dan lill-Partijiet l-oħra fil-Ftehim li japplikaw dan ir-Regolament, u dan permezz ta’ kopja tal-formola tal-approvazzjoni li jkollha miktub fl-aħħar, b’ittri kbar, l-annotament iffirmat u datat “PRODUZZJONI MWAQQFA GĦAL KOLLOX”.

11.   L-ISMIJIET U L-INDIRIZZI TAS-SERVIZZI TEKNIĊI RESPONSABBLI BIEX JAGĦMLU T-TESTIJIET TAL-APPROVAZZJONI, U TAD-DIPARTIMENTI AMMINISTRATTIVI

Il-Partijiet fil-Ftehim li japplikaw dan ir-Regolament għandhom jikkomunikaw lis-Segretarjat tan-Nazzjonijiet Uniti l-ismijiet u l-indirizzi tas-Servizzi Tekniċi responsabbli li jagħmlu t-testijiet tal-approvazzjoni u tad-Dipartimenti Amministrattivi li taw l-approvazzjoni u li lilhom għandhom jintbagħtu formoli li jiċċertifikaw l-approvazzjoni jew l-estensjoni jew iċ-ċaħda jew l-irtirar ta’ approvazzjoni, maħruġa f’pajjiżi oħra.

12.   DISPOŻIZZJONIJIET TRANŻITORJI

12.1.   Mid-data uffiċjali tad-dħul fis-seħħ tas-serje 01 ta’ emendi, l-ebda Parti Kontraenti li tapplika dan ir-Regolament m’għandha tirrifjuta li tagħti approvazzjoni skont dan ir-Regolament kif emendat mis-serje 01 ta’ emendi.

12.2.   Minn 36 xahar wara d-data tad-dħul fis-seħħ tas-serje 01 ta’ emendi, il-Partijiet Kontraenti li japplikaw dan ir-Regolament fir-rigward ta’ stepnis għal użu temporanju, tajers tun flat jew sistemi run flat għandhom jagħtu approvazzjonijiet biss jekk it-tip ta’ vettura li għandu jkun approvat jissodisfa r-rekwiżiti ta’ dan ir-Regolament kif emendat mis-serje 01 ta’ emendi.

12.3.   Il-Partijiet Kontraenti li japplikaw dan ir-Regolament m’għandhomx jirrifjutaw li jagħtu estensjonijiet ta’ approvazzjoni skont is-serje preċedenti ta’ emendi għal dan ir-Regolament.

12.4.   Il-Partijiet Kontraenti li japplikaw dan ir-Regolament għandhom ikomplu jagħtu approvazzjonijiet lil dawk it-tipi ta’ vetturi li jikkonformaw mar-rekwiżiti ta’ dan ir-Regolament kif emendat mis-serje preċedenti matul il-perjodu ta’ 36 xahar li jsegwi d-data tad-dħul fis-seħħ tas-serje 01 ta’ emendi.

12.5.   Sa mid-data uffiċjali tad-dħul fis-seħħ tas-serje 02 ta’ emendi għal dan ir-Regolamenti, l-ebda Parti Kontraenti li tapplika dan ir-Regolament m’għandha tirrifjuta li tagħti approvazzjoni skont dan ir-Regolament kif emendat mis-serje 02 ta’ emendi.

12.6.   Sa mill-1 ta’ Novembru 2012, il-Partijiet Kontraenti li japplikaw dan ir-Regolament jistgħu jirrifjutaw li jingħataw approvazzjoni nazzjonali jew reġjonali għal tip ta’ vettura tal-kategoriji M1 u sa massa massima ta’ 3 500 kg u N1, fiż-żewġ każijiet bil-fusijiet kollha mgħammra ma’ tajers singoli, jekk it-tip ta’ vettura ma tissodisfax ir-rekwiżiti tas-serje 02 ta’ emendi għal dan ir-Regolament.

12.7.   Sa mill-1 ta’ Novembru 2014, il-Partijiet Kontraenti li japplikaw dan ir-Regolament jistgħu jirrifjutaw l-ewwel reġistrazzjoni nazzjonali jew reġjonali (l-ewwel dħul fis-servizz) ta’ vettura tal-kategoriji M1 u sa massa massima ta’ 3 500 kg u N1, fiż-żewġ każijiet bil-fusijiet kollha mgħammra ma’ tajers singoli, jekk it-tip ta’ vettura ma jissodisfax ir-rekwiżiti tas-serje 02 ta’ emendi għal dan ir-Regolament.

12.8.   Minkejja d-dispożizzjonijiet tranżitorji t’aktar ’il fuq, il-Partijiet Kontraenti li l-applikazzjoni ta’ dan ir-Regolament tagħhom tidħol fis-seħħ wara d-data tad-dħul fis-seħħ tal-aktar serje ta’ emendi reċenti mhumiex obbligati li jaċċettaw approvazzjonijiet li ngħataw skont kwalunkwe serje preċedenti ta’ emendi għal dan ir-Regolament.

---

(1)  Kif definit fl-Anness 7 tar-Riżoluzzjoni Konsolidata dwar il-Kostruzzjoni tal-Vetturi (R.E.3) (TRANS/WP.29/78/Rev.1/Amend.2 kif emendat l-aħħar bl-Emenda 4).

(2)  Fil-każ ta’ vetturi tal-kategoriji M1 sal-massa massima ta’ 3 500 kg u N1, fiż-żewġ każijiet li huma bil-fusijiet kollha mgħammra ma’ tajers singoli.

(3)  1 għall-Ġermanja, 2 għal Franza, 3 għall-Italja, 4 għall-Pajjiżi l-Baxxi, 5 għall-Isvezja, 6 għall-Belġju, 7 għall-Ungerija, 8 għar-Repubblika Ċeka, 9 għal Spanja, 10 għas-Serbja, 11 għar-Renju Unit, 12 għall-Awstrija, 13 għal-Lussemburgu, 14 għall-Isvizzera, 15 (vakanti), 16 għan-Norveġja, 17 għall-Finlandja, 18 għad-Danimarka, 19 għar-Rumanija, 20 għall-Polonja, 21 għall-Portugall, 22 għall-Federazzjoni Russa, 23 għall-Greċja, 24 għall-Irlanda, 25 għall-Kroazja, 26 għas-Slovenja, 27 għas-Slovakkja, 28 għall-Bjelorussja, 29 għall-Estonja, 30 (vakanti), 31 għall-Bosnja-Ħerzegovina, 32 għal-Latvja, 33 (vakanti), 34 għall-Bulgarija, 35 (vakanti), 36 għal-Litwanja, 37 għat-Turkija, 38 (vakanti), 39 għall-Ażerbajġan, 40 għal dik li kienet ir-Repubblika Jugoslava tal-Maċedonja, 41 (vakanti), 42 għall-Komunità Ewropea (L-approvazzjonijiet jingħataw mill-Istati Membri tagħha li jużaw is-simbolu ECE rispettiv tagħhom), 43 għall-Ġappun, 44 (vakanti), 45 għall-Awstralja, 46 għall-Ukraina, 47 għar-Repubblika tal-Afrika t’Isfel, 48 għal New Zealand, 49 għal Ċipru, 50 għal Malta, 51 għar-Repubblika tal-Korea, 52 għall-Malasja, 53 għat-Tajlandja, 54 u 55 (vakanti), 56 għall-Montenegro, 57 (vakanti) u 58 għat-Tuneżija. Numri sussegwenti għandhom jingħataw lill-pajjiżi oħra fl-ordni kronoloġika li fiha jirratifikaw jew jaċċedu mal-Ftehim dwar l-Adozzjoni ta’ Preskrizzjonijiet Tekniċi Uniformi għall-Vetturi bir-Roti, Tagħmir u Parts li jistgħu Jitwaħħlu u/jew Jintu żaw fuq Vetturi bir-Roti u l-Kundizzjonijiet dwar l-Għarfien Reċiproku tal-Approvazzjonijiet Mogħtija Abba żi ta’ dawn il-Preskrizzjonijiet, u n-numri hekk mogħtija għandhom ikunu kkomunikati mis-Segretarju-Ġenerali tan-Nazzjonijiet Uniti lill-Partijiet Kontraenti għall-Ftehim.

---

---

---

---

---

---