(1)

Fid-19 ta’ Marzu 2014, il-Kummissjoni adottat ir-Regolament ta’ Implimentazzjoni tal-Kummissjoni (UE) Nru 277/2014 (2) li għall-ewwel darba stabbilixxa deroga mill-Artikolu 13(1), l-ewwel subparagrafu, tar-Regolament (KE) Nru 1967/2006 fir-rigward tad-distanza minima mill-kosta u l-fond minimu tal-baħar għall-bastimenti li jużaw ix-xbieki tat-tkarkir “volantina” li jistadu fl-ibħra territorjali tas-Slovenja, li skada fit-23 ta’ Marzu 2017. Ingħataw estensjonijiet ulterjuri ta’ dik id-deroga bir-Regolamenti ta’ Implimentazzjoni tal-Kummissjoni (UE) 2017/2383 (3) u (UE) 2022/511 (4). L-aktar estensjoni reċenti tad-deroga ġiet stabbilita bir-Regolament ta’ Implimentazzjoni tal-Kummissjoni (UE) 2023/974 (5).

(2)

Fid-29 ta’ Ottubru 2025, il-Kummissjoni rċeviet talba mis-Slovenja biex testendi d-deroga mogħtija bir-Regolament ta’ Implimentazzjoni (UE) 2023/974. Is-Slovenja pprovdiet pjan ta’ ġestjoni rivedut, adottat fis-26 ta’ Marzu 2026 (6), u rapport dwar il-monitoraġġ u l-implimentazzjoni tal-pjan ta’ ġestjoni, f’konformità mar-Regolament ta’ Implimentazzjoni (UE) 2023/974, biex jiġġustifikaw l-estensjoni tad-deroga, f’konformità mar-rekwiżiti tar-Regolament (KE) Nru 1967/2006 u tar-Regolament (UE) 2019/1241 tal-Parlament Ewropew u tal-Kunsill (7).

(3)

Matul it-80 sessjoni plenarja tiegħu organizzata f’Novembru 2025, il-Kumitat Xjentifiku, Tekniku u Ekonomiku għas-Sajd (STECF) (8) ivvaluta t-talba li jerġgħu jiġu estiżi d-deroga u r-rapport ta’ implimentazzjoni. L-STECF ikkonkluda li l-pjan ta’ ġestjoni aġġornat huwa komprensiv u jindirizza l-biċċa l-kbira tal-kummenti li tqajmu qabel mill-STECF. Fid-dawl tal-informazzjoni l-ġdida pprovduta mis-Slovenja, l-STECF ikkonkluda li l-kundizzjonijiet għad-deroga għadhom qed jiġu ssodisfati.

(4)

Id-deroga mitluba mis-Slovenja tikkonforma mal-kundizzjonijiet stabbiliti fl-Artikolu 13(5) u (9) tar-Regolament (KE) Nru 1967/2006.

(5)

B’mod partikolari, hemm limitazzjonijiet ġeografiċi speċifiċi, peress li l-ibħra territorjali tas-Slovenja fl-ebda punt ma jilħqu l-fond ta’ 50 metru. Għalhekk, mingħajr deroga, il-bastimenti li jużaw ix-xbieki tat-tkarkir “volantina” jistgħu joperaw biss lil hinn minn 3 mili nawtiċi mill-kosta, fejn il-postijiet għas-sajd huma limitati b’mod sinifikanti minn żona dedikata għal rotot ta’ navigazzjoni kummerċjali.

(6)

Barra minn hekk, il-pjan ta’ ġestjoni Sloven jiggarantixxi li fil-ġejjieni ma jkun hemm l-ebda żieda fl-isforz tas-sajd.

(7)

It-talba tikkonċerna attivitajiet tas-sajd diġà awtorizzati mis-Slovenja u 11-il bastiment diġà awtorizzati mis-Slovenja biex jistadu, li ġew inklużi f’lista kkomunikata lill-Kummissjoni.

(8)

Dawk il-bastimenti għandhom esperjenza fis-sajd ta’ aktar minn 5 snin.

(9)

L-attivitajiet tas-sajd ikkonċernati jissodisfaw ir-rekwiżiti tal-Artikolu 4(1) tar-Regolament (KE) Nru 1967/2006 peress li s-sajd ma joperax fuq qigħan tal-algi, b’mod partikolari, ta’ Posidonia oceanica jew fanerogami tal-baħar oħrajn.

(10)

Fir-rigward tar-rekwiżit li jikkonformaw mal-qisien minimi tal-malji, id-deroga mitluba tikkonforma mal-Artikolu 8(1)(h) tar-Regolament (KE) Nru 1967/2006, kif sostitwit bl-Artikolu 8(1) u t-taqsima 1 tal-Parti B tal-Anness IX tar-Regolament (UE) 2019/1241 peress li ma tintuża l-ebda malja kwadra ta’ inqas minn 40 mm fl-armar tax-xbieki “volantina”.

(11)

Is-sajd bix-xbieki tat-tkarkir “volantina”, tip ta’ sajd imħallat, ma jistax isir bi rkaptu ieħor għajr dak itqal tat-“tartana”, li madankollu jista’ jwassal għal kuntatt ħafna ikbar ma’ qiegħ il-baħar u qabdiet ħafna ikbar ta’ speċijiet demersali u ma jinterferixxix ma’ rkaptu għajr xbieki tat-tkarkir, tartaruni jew xbieki rmunkati simili.

(12)

Minkejja li l-bastimenti li jużaw ix-xbieki tat-tkarkir “volantina” huma rregolati biex jiġi żgurat li l-qabdiet tal-ispeċijiet imsemmija fil-Parti A tal-Anness IX tar-Regolament (UE) 2019/1241 ikunu minimi, l-STECF innota li l-qabdiet irrappurtati ta’ dawn l-ispeċijiet għadhom sostanzjali. Madanakollu kkonkluda li minħabba d-daqs limitat tas-sajd bil-“volantina”, dawn il-qabdiet jammontaw għal volum totali ta’ ftit għaxriet ta’ tunnellati, li jirrappreżentaw biss ammont żgħir ħafna tal-qabdiet totali ta’ dawn l-ispeċijiet fit-Tramuntana tal-Baħar Adrijatiku.

(13)

Il-bastimenti li jużaw ix-xbieki tat-tkarkir “volantina” ma għandhomx fil-mira tagħhom iċ-ċefalopodi. L-STECF ikkonkluda li, għalkemm il-proporzjon tal-qabdiet taċ-ċefalopodi permezz ta’ dan is-sajd huwa relattivament għoli, abbażi tal-aħħar rapport ta’ implimentazzjoni tal-pjan, dan jirrappreżenta frazzjoni żgħira tal-qabdiet totali ta’ dawn l-ispeċijiet fil-Baħar Adrijatiku tat-Tramuntana, filwaqt li jipprovdi sors rilevanti ta’ introjtu għall-flotta tas-sajd Slovena.

(14)

Il-pjan ta’ ġestjoni Sloven jinkludi miżuri għall-monitoraġġ tal-attivitajiet tas-sajd, kif stipulat fl-Artikolu 13(9), it-tielet subparagrafu, tar-Regolament (KE) Nru 1967/2006 u fl-Artikoli 14 u 15 tar-Regolament tal-Kunsill (KE) Nru 1224/2009 (9).

(15)

Għaldaqstant jenħtieġ li l-estensjoni tad-deroga tingħata.

(16)

Jenħtieġ li t-tul taż-żmien tad-deroga jiġi limitat biex ikunu jistgħu jittieħdu fil-pront il-miżuri ta’ ġestjoni korrettivi jekk ir-rapport lill-Kummissjoni juri li l-istokk sfruttat ikun f’qagħda ħażina ta’ konservazzjoni filwaqt li jingħata ambitu biex titjieb il-bażi xjentifika għal pjan ta’ ġestjoni mtejjeb.

(17)

Billi d-deroga li ngħatat bir-Regolament ta’ Implimentazzjoni (UE) 2023/974 skadiet fis-27 ta’ Marzu 2026, sabiex tiġi żgurata l-kontinwità legali, dan ir-Regolament jenħtieġ li japplika mit-28 ta’ Marzu 2026. Għal raġunijiet ta’ ċertezza legali, jenħtieġ li dan ir-Regolament jidħol fis-seħħ b’urġenza.

(18)

Il-miżuri previsti f’dan ir-Regolament huma f’konformità mal-opinjoni tal-Kumitat għas-Sajd u l-Akkwakultura,

(a)

ikollhom numru ta’ reġistrazzjoni msemmi fil-pjan ta’ ġestjoni Sloven adottat mis-Slovenja skont l-Artikolu 19(2) tar-Regolament (KE) Nru 1967/2006;

(b)

ikollhom aktar minn 5 snin ta’ rekord ippruvat fis-sajd u fil-ġejjieni ma jkunu jinvolvu l-ebda żieda fl-isforz tas-sajd ipprovdut;

(c)

ikollhom awtorizzazzjoni għas-sajd u li joperaw skont il-pjan ta’ ġestjoni adottat mis-Slovenja f’konformità mal-Artikolu 19(2) tar-Regolament (KE) Nru 1967/2006.