(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti u għat-tiġdid ta’ tali awtorizzazzjoni.

(2)

Preparat ta’ endo-1,4-beta-ksilanażi u endo-1,3(4)-beta-glukanażi prodott minn Talaromyces versatilis IMI 378536 u Talaromyces versatilis DSM 26702 ġie awtorizzat għal perjodu ta’ 10 snin bħala addittiv tal-għalf għat-tiġieġ tas-simna, għat-tiġieġ imrobbi għall-bajd u għall-ispeċijiet minuri ta’ pollam tas-simna u mrobbija għall-bajd bir-Regolament ta’ Implimentazzjoni tal-Kummissjoni (UE) 2015/661 (2), għad-dundjani tas-simna u mrobbija għat-tnissil bir-Regolament ta’ Implimentazzjoni tal-Kummissjoni (UE) 2015/2304 (3) u għat-tiġieġ tal-bajd bir-Regolament ta’ Implimentazzjoni tal-Kummissjoni (UE) 2017/210 (4).

(3)

F’konformità mal-Artikolu 14(1) tar-Regolament (KE) Nru 1831/2003, tressqet applikazzjoni għat-tiġdid tal-awtorizzazzjoni ta’ preparat ta’ endo-1,4-beta-ksilanażi u endo-1,3(4)-beta-glukanażi prodotti minn Talaromyces versatilis IMI 378536 u Talaromyces versatilis DSM 26702 bħala addittiv tal-għalf għat-tiġieġ tas-simna u mrobbi għall-bajd, għat-tiġieġ tal-bajd, għad-dundjani tas-simna u mrobbija għat-tnissil, u għal speċijiet minuri ta’ pollam tas-simna u mrobbija għall-bajd, u titlob li dak l-addittiv jiġi kklassifikat fil-kategorija tal-addittivi “addittivi żootekniċi” u fil-grupp funzjonali “sustanzi li jsaħħu d-diġestibbiltà”. F’konformità mal-Artikolu 7 tar-Regolament (KE) Nru 1831/2003, dik l-applikazzjoni kienet tikkonċerna wkoll l-awtorizzazzjoni ta’ użu ġdid tal-istess preparat bħala addittiv tal-għalf għat-tiġieġ imrobbi għat-tnissil, għat-tiġieġ tat-tnissil, għad-dundjani tat-tnissil, għal speċijiet minuri ta’ pollam imrobbija għall-bajd u għat-tnissil bit-talba li l-addittiv jiġi kklassifikat fil-kategorija tal-addittivi “addittivi żootekniċi” u fil-grupp funzjonali “sustanzi li jsaħħu d-diġestibbiltà”. Mal-applikazzjoni ntbagħtu d-dettalji u d-dokumenti meħtieġa skont l-Artikolu 14(2) u l-Artikolu 7(3) tar-Regolament (KE) Nru 1831/2003.

(4)

Fl-opinjoni tagħha tal-25 ta’ Ġunju 2025 (5), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li, skont il-kundizzjonijiet tal-użu awtorizzati attwali u meta jitqies il-fatt li l-manifattura u l-kompożizzjoni tal-addittiv ma ġewx modifikati b’mod sostanzjali, il-preparat ta’ endo-1,4-beta-ksilanażi u endo-1,3(4)-beta-glukanażi prodott minn Talaromyces versatilis IMI 378536 u Talaromyces versatilis DSM 26702 jibqa’ sikur għall-ispeċijiet fil-mira, għall-konsumaturi u għall-ambjent. Barra minn hekk, l-Awtorità kkonkludiet li, fir-rigward tat-twessigħ tal-użu għall-ispeċijiet kollha tal-pollam, l-addittiv huwa sikur għall-ispeċijiet fil-mira, għall-konsumaturi u għall-ambjent. Ikkonkludiet ukoll li l-preparat mhuwiex irritant tal-ġilda jew tal-għajnejn iżda jenħtieġ li jitqies bħala sensitizzatur potenzjali tal-ġilda u respiratorju, u l-esponiment min-nifs jitqies bħala riskju. L-Awtorità ddikjarat ukoll li l-applikazzjoni għat-tiġdid tal-awtorizzazzjoni ma tinkludix proposta biex jiġu emendati jew issupplimentati l-kundizzjonijiet tal-awtorizzazzjoni oriġinali li jkollhom impatt fuq l-effikaċja tal-addittiv. Għalhekk, hija kkonkludiet li ma hemmx bżonn tiġi vvalutata l-effikaċja tal-addittiv fil-kuntest tat-tiġdid tal-awtorizzazzjoni. Qieset ukoll li l-konklużjonijiet milħuqa fl-awtorizzazzjoni oriġinali jistgħu jiġu estiżi għal speċijiet oħra u għalhekk ikkonkludiet li l-addittiv għandu l-potenzjal li jkun effikaċi fl-ispeċijiet kollha tal-pollam f’livell minimu ta’ inklużjoni ta’ 1100 VU endo-1,4-beta-ksilanażi u 760 VU endo-1,3(4)-beta-glukanażi/kg ta’ għalf komplet. L-Awtorità ma qisitx li hemm il-ħtieġa għal rekwiżiti speċifiċi ta’ monitoraġġ ta’ wara l-introduzzjoni fis-suq.

(5)

Il-Laboratorju ta’ Referenza stabbilit bir-Regolament (KE) Nru 1831/2003 kien tal-fehma li l-konklużjonijiet u r-rakkomandazzjonijiet li ntlaħqu f’valutazzjoni preċedenti dwar applikazzjoni oħra għall-awtorizzazzjoni tal-istess addittiv u vverifikati mill-Awtorità fl-opinjoni tagħha tat-2 ta’ Lulju 2014 (6) huma validi u applikabbli għall-applikazzjoni attwali. Għalhekk, f’konformità mal-Artikolu 5(4), il-punti (a) u (c), tar-Regolament tal-Kummissjoni (KE) Nru 378/2005 (7), mhux meħtieġ rapport ta’ evalwazzjoni tal-Laboratorju ta’ Referenza.

(6)

Fid-dawl ta’ dan ta’ hawn fuq, il-Kummissjoni tqis li l-preparat ta’ endo-1,4-beta-ksilanażi u endo-1,3(4)-beta-glukanażi prodott minn Talaromyces versatilis IMI 378536 u Talaromyces versatilis DSM 26702 jissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-awtorizzazzjoni ta’ dak l-addittiv tiġġedded għat-tiġieġ tas-simna u mrobbi għall-bajd, għat-tiġieġ tal-bajd, għad-dundjani tas-simna u mrobbija għat-tnissil, u għal speċijiet minuri ta’ pollam tas-simna u mrobbija għall-bajd. Barra minn hekk, jenħtieġ li l-użu ta’ dan il-preparat jiġi awtorizzat għat-tiġieġ imrobbi għat-tnissil, għat-tiġieġ tat-tnissil, għad-dundjani tat-tnissil, għal speċijiet minuri ta’ pollam imrobbija għall-bajd u għat-tnissil. Barra minn hekk, il-Kummissjoni tqis li jenħtieġ li jittieħdu miżuri protettivi xierqa biex jiġu evitati l-effetti negattivi fuq is-saħħa tal-utenti tal-addittiv. Jenħtieġ li dawk il-miżuri protettivi jkunu mingħajr preġudizzju għal rekwiżiti oħra tas-sikurezza tal-ħaddiema skont id-dritt tal-Unjoni.

(7)

B’konsegwenza tat-tiġdid tal-awtorizzazzjoni ta’ preparat ta’ endo-1,4-beta-ksilanażi u endo-1,3(4)-beta-glukanażi prodott minn Talaromyces versatilis IMI 378536 u Talaromyces versatilis DSM 26702 bħala addittiv tal-għalf għat-tiġieġ tas-simna u mrobbi għall-bajd, għat-tiġieġ tal-bajd, għad-dundjani tas-simna u mrobbija għat-tnissil, u għal speċijiet minuri ta’ pollam tas-simna u mrobbija għall-bajd, jenħtieġ li r-Regolamenti ta’ Implimentazzjoni (UE) 2015/661, (UE) 2015/2304 u (UE) 2017/210 jitħassru.

(8)

Billi r-raġunijiet ta’ sikurezza ma jeħtiġux l-applikazzjoni immedjata tal-modifiki tal-kundizzjonijiet tal-awtorizzazzjoni tal-preparat ta’ endo-1,4-beta-ksilanażi u endo-1,3(4)-beta-glukanażi prodott minn Talaromyces versatilis IMI 378536 u Talaromyces versatilis DSM 26702 għat-tiġieġ tas-simna u mrobbi għall-bajd, għat-tiġieġ tal-bajd, għad-dundjani tas-simna u mrobbija għat-tnissil, u għal speċijiet minuri ta’ pollam tas-simna u mrobbija għall-bajd, jixraq li jiġi previst perjodu tranżitorju għall-partijiet interessati biex iħejju ruħhom ħalli jissodisfaw ir-rekwiżiti l-ġodda li jirriżultaw mit-tiġdid tal-awtorizzazzjoni.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,