1.   Mat-tlestija tal-investigazzjonijiet f’konformità mal-Artikolu 33 tar-Regolament (UE) 2024/3005 u qabel ma jissottometti l-fajl lill-Bord tas-Superviżuri tal-ESMA skont l-Artikolu 3(1) ta’ dan ir-Regolament, l-uffiċjal tal-investigazzjoni għandu jistabbilixxi l-fatti li jistgħu jikkostitwixxu l-ksur, inkluż kwalunkwe fattur aggravanti jew mitiganti f’dikjarazzjoni tas-sejbiet.

L-uffiċjal tal-investigazzjoni għandu jinforma dwar is-sejbiet lill-persuna soġġetta għall-investigazzjoni fid-dikjarazzjoni bil-miktub tas-sejbiet u għandu jistieden lil dik il-persuna tagħmel sottomissjonijiet bil-miktub skont il-paragrafu 3 ta’ dan l-Artikolu.

2.   L-uffiċjal tal-investigazzjoni għandu jistabbilixxi limitu ta’ żmien raġonevoli fl-abbozz tad-dikjarazzjoni li matulu l-persuna soġġetta għall-investigazzjoni tista’ tagħmel is-sottomissjonijiet bil-miktub tagħha. Jista’ jagħti l-każ li l-uffiċjal tal-investigazzjoni jqis is-sottomissjonijiet bil-miktub li jaslu wara l-iskadenza ta’ dak il-limitu ta’ żmien.

3.   Fis-sottomissjonijiet bil-miktub tagħha, il-persuna soġġetta għall-investigazzjoni tista’ tistabbilixxi l-fatti kollha rilevanti għad-difiża tagħha. Il-persuna soġġetta għall-investigazzjoni għandha tehmeż kwalunkwe dokument rilevanti bħala prova tal-fatti stabbiliti. Il-persuna soġġetta għall-investigazzjoni tista’ tipproponi li l-uffiċjal tal-investigazzjoni jisma’ persuni oħrajn li jistgħu jikkorroboraw il-fatti stabbiliti fis-sottomissjonijiet. Il-persuna soġġetta għall-investigazzjoni tista’ tkun assistita minn avukat tal-għażla tagħha fit-tħejjija tas-sottomissjonijiet bil-miktub tagħha.

4.   L-uffiċjal tal-investigazzjoni jista’ jistieden persuna soġġetta għall-investigazzjoni li tkun ġiet indirizzata b’dikjarazzjoni tas-sejbiet biex tattendi seduta orali. Il-persuni soġġetti għall-investigazzjoni jistgħu jiġu assistiti minn avukat tal-għażla tagħhom. Is-seduti orali ma għandhomx isiru fil-pubbliku.

5.   L-uffiċjal tal-investigazzjoni għandu jibgħat id-dikjarazzjoni ffinalizzata tas-sejbiet lill-persuna soġġetta għall-investigazzjoni.

1.   L-uffiċjal tal-investigazzjoni għandu jissottometti d-dokumenti li ġejjin lill-Bord tas-Superviżuri tal-ESMA:

2.   Meta l-Bord ta’ Superviżuri tal-ESMA jqis li l-fajl imressaq mill-uffiċjal tal-investigazzjoni ma jkunx komplut, għandu jibgħat il-fajl lura lill-uffiċjal tal-investigazzjoni b’talba motivata għal dokumenti addizzjonali.

3.   Meta l-Bord tas-Superviżuri tal-ESMA jqis, fuq il-bażi ta’ fajl komplut, li l-fatti, deskritti fid-dikjarazzjoni tas-sejbiet, jidhru li ma jiddivulgaw l-ebda ksur possibbli, għandu jieħu deċiżjoni li tiddikjara dan u jinnotifika tali deċiżjoni lill-persuni soġġetti għall-investigazzjoni.

4.   Meta l-Bord tas-Superviżuri tal-ESMA jaqbel mas-sejbiet tal-uffiċjal tal-investigazzjoni, għandu jinforma b’dan lill-persuni soġġetti għall-investigazzjoni. Tali komunikazzjoni għandha tistabbilixxi limitu ta’ żmien raġonevoli li matulu l-persuna soġġetta għall-investigazzjoni tista’ tagħmel sottomissjonijiet bil-miktub. Il-Bord tas-Superviżuri tal-ESMA jista’ jikkunsidra sottomissjonijiet bil-miktub li jaslu wara l-iskadenza ta’ dak il-limitu ta’ żmien biex jadotta deċiżjoni dwar l-eżistenza ta’ ksur u dwar miżuri superviżorji u l-impożizzjoni ta’ multa f’konformità mal-Artikoli 35 u 36 tar-Regolament (UE) 2024/3005.

Il-Bord tas-Superviżuri tal-ESMA jista’ jistieden ukoll lill-persuni soġġetti għall-investigazzjoni indirizzati b’dikjarazzjoni tas-sejbiet biex jattendu seduta orali. Il-persuni soġġetti għall-investigazzjoni jistgħu jiġu assistiti minn avukat tal-għażla tagħhom. Is-seduti orali ma għandhomx isiru fil-pubbliku.

5.   Meta l-Bord tas-Superviżuri tal-ESMA jkun iddeċieda li sar ksur minn persuna soġġetta għall-investigazzjoni u jkun adotta deċiżjoni li timponi multa f’konformità mal-Artikolu 36 tar-Regolament (UE) 2024/3005, għandu jinnotifika minnufih tali deċiżjoni lill-persuna soġġetta għall-investigazzjoni.

1.   Qabel ma jimponi pagament perjodiku ta’ penali skont l-Artikolu 37 tar-Regolament (UE) 2024/3005, il-Bord tas-Superviżuri għandu jissottometti dikjarazzjoni tas-sejbiet lill-persuna soġġetta għall-proċedimenti filwaqt li jistabbilixxi r-raġunijiet li jiġġustifikaw l-impożizzjoni ta’ pagament ta’ penali u l-ammont tal-pagament ta’ penali għal kull jum ta’ nuqqas ta’ konformità. Id-dikjarazzjoni tas-sejbiet għandha tistabbilixxi limitu ta’ żmien li matulu l-persuna kkonċernata tista’ tagħmel sottomissjonijiet bil-miktub. Jista’ jagħti l-każ li l-Bord tas-Superviżuri jqis is-sottomissjonijiet bil-miktub li jaslu wara l-iskadenza ta’ dak il-limitu ta’ żmien sabiex jiddeċiedi dwar il-pagament perjodiku ta’ penali.

2.   Il-Bord tas-Superviżuri tal-ESMA ma għandux jibqa’ jimponi pagament perjodiku ta’ penali ladarba l-fornitur tal-klassifikazzjonijiet ESG jew il-persuna kkonċernata tkun ikkonformat mad-deċiżjoni rilevanti msemmija fl-Artikolu 37(1), il-punti (a) u (b), tar-Regolament (UE) 2024/3005.

3.   Il-Bord tas-Superviżuri tal-ESMA jista’ jistieden lill-persuna soġġetta għall-proċedimenti biex tattendi seduta orali. Il-persuna soġġetta għall-proċedimenti tista’ tiġi assistita minn avukat tal-għażla tagħha. Is-seduti orali ma għandhomx isiru fil-pubbliku.

1.   L-ESMA għandha, f’każ li ssirilha talba, tagħti aċċess għall-fajl lill-partijiet li l-uffiċjal tal-investigazzjoni jew il-Bord tas-Superviżuri jkun bagħtilhom dikjarazzjoni tas-sejbiet. L-aċċess għandu jingħata wara n-notifika ta’ kwalunkwe dikjarazzjoni tas-sejbiet.

2.   Id-dokumenti tal-fajl aċċessati skont dan l-Artikolu għandhom jintużaw mill-persuna msemmija fil-paragrafu 1 biss għall-finijiet ta’ proċedimenti ġudizzjarji jew amministrattivi li jikkonċernaw l-applikazzjoni tar-Regolament (UE) 2024/3005.

1.   L-ESMA ma għandhiex timponi multi u pagamenti perjodiċi ta’ penali fuq il-fornituri ta’ klassifikazzjonijiet ESG wara l-iskadenza tal-perjodu ta’ limitazzjoni ta’ 5 snin.

2.   Il-perjodu ta’ żmien ta’ limitazzjoni msemmi fil-paragrafu 1 għandu jibda jiddekorri fil-jum ta’ wara dak li fih isir il-ksur. Madankollu, fil-każ ta’ ksur kontinwu u ripetut, iż-żmien għandu jibda jiddekorri minn dakinhar meta jieqaf il-ksur.

3.   Kwalunkwe azzjoni meħuda mill-ESMA għall-finijiet tal-investigazzjoni jew tal-proċedimenti fir-rigward ta’ ksur tar-Regolament (UE) 2024/3005 għandha tinterrompi l-perjodu ta’ limitazzjoni għall-impożizzjoni ta’ multi u pagamenti perjodiċi ta’ penali. Il-perjodu ta’ limitazzjoni għandu jiġi interrott b’effett mid-data li fiha l-azzjoni tiġi notifikata lill-fornitur tal-klassifikazzjonijiet ESG jew lill-persuna soġġetta għall-investigazzjoni jew għall-proċedimenti.

4.   Kull interruzzjoni kif imsemmi fil-paragrafu 3 għandha tagħti bidu għal perjodu ta’ limitazzjoni ġdid kif imsemmi fil-paragrafu 1. Dan il-perjodu ta’ limitazzjoni ġdid għandu jiskadi mhux aktar tard mill-jum li fih ikun għadda perjodu ugwali għad-doppju tal-perjodu ta’ limitazzjoni oriġinali mingħajr ma l-ESMA tkun imponiet multa jew pagament perjodiku ta’ penali. Dan il-perjodu għandu jiġi estiż biż-żmien li matulu l-perjodu ta’ limitazzjoni jkun ġie sospiż skont il-paragrafu 5.

5.   Il-perjodu ta’ limitazzjoni għall-impożizzjoni ta’ multi għandu jkun sospiż sakemm id-deċiżjoni tal-ESMA tkun soġġetta għall-proċedimenti pendenti quddiem il-Bord tal-Appell, f’konformità mal-Artikolu 60 tar-Regolament (UE) Nru 1095/2010 tal-Parlament Ewropew u tal-Kunsill (2), u quddiem il-Qorti tal-Ġustizzja tal-Unjoni Ewropea, f’konformità mal-Artikolu 41 tar-Regolament (UE) 2024/3005.

1.   L-ESMA ma għandhiex tinforza deċiżjonijiet meħuda skont l-Artikoli 36 u 37 tar-Regolament (UE) 2024/3005 wara l-iskadenza tal-perjodu ta’ limitazzjoni ta’ 5 snin.

2.   Il-perjodu ta’ limitazzjoni msemmi fil-paragrafu 1 għandu jibda jiddekorri fil-jum ta’ wara dak li fih id-deċiżjoni ssir finali.

3.   Il-perjodu ta’ limitazzjoni għall-infurzar tal-penali għandu jiġi interrott minn kwalunkwe azzjoni tal-ESMA maħsuba biex tinforza pagament jew termini u kundizzjonijiet għall-pagament tal-multa jew tal-pagament perjodiku ta’ penali.

4.   Meta sseħħ l-interruzzjoni msemmija fil-paragrafu 3, il-perjodu ta’ limitazzjoni msemmi fil-paragrafu 1 għandu jibda mill-ġdid.

5.   Il-perjodu ta’ limitazzjoni msemmi fil-paragrafu 1 għandu jiġi sospiż sakemm:

1.   L-ESMA għandha tiddepożita l-ammonti ta’ multi u ta’ pagamenti perjodiċi ta’ penali f’kont bl-imgħax li jinfetaħ mill-ESMA sakemm dawn il-multi u l-pagamenti ta’ penali jsiru finali. F’każ ta’ diversi multi jew pagamenti perjodiċi ta’ penali miġbura mill-ESMA b’mod parallel, l-ESMA għandha tiżgura li dawn il-multi u l-pagamenti ta’ penali jiġu ddepożitati f’kontijiet jew f’subkontijiet differenti. Il-multi u l-pagamenti perjodiċi ta’ penali mħallsa ma għandhomx jiddaħħlu fil-baġit tal-ESMA u ma għandhomx jiġu rreġistrati bħala ammonti baġitarji.

2.   Meta l-ESMA tistabbilixxi li l-multi jew il-pagamenti perjodiċi ta’ penali jkunu saru finali wara li jkunu ġew eżawriti d-drittijiet kollha ta’ appell, l-ESMA għandha tittrasferixxi dawn l-ammonti u l-imgħax potenzjali dovut lill-Kummissjoni. Dawk l-ammonti għandhom imbagħad jiddaħħlu fil-baġit ġenerali tal-Unjoni.

3.   L-ESMA għandha tirrapporta fuq bażi regolari lill-Kummissjoni dwar l-ammonti ta’ multi u pagamenti perjodiċi ta’ penali imposti u l-istatus tagħhom.