(1)

Matul l-istaġun tat-tkabbir tal-2025, il-Bulgarija esperjenzat kundizzjonijiet tat-temp estremament avversi. B’mod partikolari, mit-tieni nofs ta’ Ġunju sal-aħħar ta’ Awwissu, il-Bulgarija esperjenzat deterjorament gravi fil-kundizzjonijiet agrometeoroloġiċi, ikkaratterizzat minn nixfiet u mewġiet ta’ sħana intensi. It-temp sħun u xott għal żmien twil ħalla impatt detrimentali fuq il-produzzjoni tal-ġirasol u tal-qamħirrum.

(2)

Matul l-istaġun tat-tkabbir tal-2025, il-kundizzjonijiet fl-Estonja, li bdew bil-ġlata fir-rebbiegħa li ħalliet impatt fuq diversi żoni, kienu partikolarment diffiċli,. It-temp kiesaħ kompla jippersisti matul l-istaġun tat-tkabbir, akkumpanjat minn preċipitazzjoni għolja aktar mis-soltu u minn perjodi ta’ kesħa alternanti segwiti minn temperaturi għoljin mhux mistennija. Dawn il-kundizzjonijiet avversi ħallew impatt detrimentali fuq il-produzzjoni tal-qamħ tar-rebbiegħa, tax-xgħir, tal-piżelli tal-magħlef, tal-lift tar-rebbiegħa, tal-patata u tal-għelejjel li jaqgħu fil-kamp ta’ applikazzjoni tas-settur tal-frott u l-ħxejjex.

(3)

Matul l-istaġun tat-tkabbir tal-2025, l-Ungerija esperjenzat kundizzjonijiet avversi tat-temp estremi. Kien hemm temperaturi għoljin ħafna u nuqqas ta’ ilma minn Ġunju sa Awwissu, u dan irriżulta fi stress termiku qawwi għall-għelejjel. Dan affettwa b’mod negattiv il-produzzjoni tal-qamħirrum ħelu, tal-bettieħ, tas-sorgu, tar-ravanell żejtni, tal-qamħirrum u tal-qamħirrum għall-popcorn.

(4)

Filwaqt li hemm indikazzjonijiet li madwar l-UE jseħħu eventi klimatiċi avversi simili, fil-kuntest kumplessiv taż-żieda fir-riskji għall-agrikoltura kawża tat-tibdil fil-klima, l-intensità ta’ dawn l-eventi fil-Bulgarija, fl-Estonja u fl-Ungerija kienet waħda straordinarja, b’effetti fuq żona kkultivata sinifikanti u fuq il-kwantitajiet prodotti.

(5)

Id-danni sinifikanti għall-agrikoltura kkawżati minn dawn l-eventi klimatiċi avversi u t-telf ta’ introjtu li jirriżulta għall-produtturi affettwati fil-Bulgarija, fl-Estonja u fl-Ungerija jipperikolaw il-vijabbiltà ekonomika tal-azjendi agrikoli.

(6)

Għalhekk, jenħtieġ li tiġi adottata miżura eċċezzjonali biex jiġu indirizzati l-problemi speċifiċi kawża ta’ dawn l-eventi klimatiċi avversi u d-diżastri naturali fil-Bulgarija, fl-Estonja u fl-Ungerija.

(7)

Id-danni sinifikanti u t-telf ekonomiku mġarrba mill-produtturi agrikoli minħabba l-eventi klimatiċi avversi jikkostitwixxu problema speċifika skont it-tifsira tal-Artikolu 221 tar-Regolament (UE) Nru 1308/2013 li ma tistax tiġi indirizzata faċilment mill-miżuri meħuda skont l-Artikoli 219 jew 220 ta’ dak ir-Regolament. Is-sitwazzjoni mhijiex marbuta speċifikament ma’ disturb uniku identifikat fis-suq jew ma’ theddida preċiża assoċjata miegħu. Lanqas ma hi marbuta ma’ miżuri li jikkombattu t-tixrid tal-mard tal-annimali jew it-telf fil-fiduċja tal-konsumaturi minħabba r-riskji għas-saħħa pubblika, tal-annimali jew tal-pjanti.

(8)

Jenħtieġ li l-ammonti għad-dispożizzjoni tal-Bulgarija, tal-Estonja u tal-Ungerija jiġu ddeterminati, filwaqt li jitqies, b’mod partikolari, il-piż rispettiv ta’ dawk l-Istati Membri fis-settur agrikolu tal-Unjoni, abbażi tal-limiti massimi netti għall-pagamenti diretti stabbiliti fl-Anness V tar-Regolament (UE) 2021/2115 tal-Parlament Ewropew u tal-Kunsill (2), kif ukoll l-impatt tal-eventi klimatiċi avversi f’dawk l-Istati Membri.

(9)

Jenħtieġ li l-Bulgarija, l-Estonja u l-Ungerija jqassmu l-għajnuna permezz tal-aktar mezzi effettivi abbażi ta’ kriterji oġġettivi u mhux diskriminatorji li jqisu l-livell tad-diffikultajiet u d-danni ekonomiċi reali mġarrba mill-bdiewa affettwati. Jenħtieġ li jiżguraw li l-bdiewa affettwati jkunu l-benefiċjarji aħħarin tal-għajnuna u jevitaw kwalunkwe distorsjoni tas-suq jew tal-kompetizzjoni.

(10)

Billi l-ammonti allokati lill-Bulgarija, lill-Estonja u lill-Ungerija jindirizzaw biss parti mid-diffikultajiet ekonomiċi mġarrba mill-bdiewa affettwati, jenħtieġ li dawn l-Istati Membri jitħallew jagħtu appoġġ nazzjonali addizzjonali lill-bdiewa affettwati, skont il-kundizzjonijiet stabbiliti b’dan ir-Regolament.

(11)

Sabiex il-Bulgarija, l-Estonja u l-Ungerija jingħataw il-flessibbiltà li jqassmu l-għajnuna skont iċ-ċirkostanzi tal-bdiewa affettwati, jenħtieġ li l-Istat Membru jkun jista’ jakkumula dik l-għajnuna ma’ appoġġ ieħor iffinanzjat mill-Fond Agrikolu Ewropew ta’ Garanzija u mill-Fond Agrikolu Ewropew għall-Iżvilupp Rurali, mingħajr ma jagħti kumpens żejjed lill-bdiewa affettwati.

(12)

Sabiex jiġi evitat il-kumpens żejjed, jenħtieġ li l-Bulgarija, l-Estonja u l-Ungerija jqisu l-appoġġ mogħti fil-qafas ta’ strumenti oħra ta’ appoġġ nazzjonali jew tal-Unjoni jew ta’ skemi privati b’rispons għat-telf ekonomiku mġarrab.

(13)

Peress li l-għajnuna mill-Unjoni hija stabbilita f’euro, biex tiġi żgurata applikazzjoni uniformi u simultanja jeħtieġ tiġi ffissata data għall-konverżjoni tal-ammont allokat lil Stat Membru li ma adottax l-euro bħala l-munita nazzjonali tiegħu, kif ġara fl-Ungerija. Billi dan ir-Regolament ma jipprevedix skadenza għas-sottomissjoni tal-applikazzjonijiet għall-għajnuna, jixraq li, għall-finijiet tal-Artikolu 30(3) tar-Regolament Delegat tal-Kummissjoni (UE) 2022/127 (3), titqies id-data tad-dħul fis-seħħ ta’ dan ir-Regolament bħala l-event operattiv għar-rata tal-kambju fir-rigward tal-ammonti stabbiliti f’dan ir-Regolament.

(14)

Sabiex tiġi żgurata l-effettività ta’ din il-miżura eċċezzjonali, jenħtieġ li l-benefiċjarji jirċievu malajr l-appoġġ finanzjarju ta’ emerġenza. Barra minn hekk, jenħtieġ li jiġu żgurati monitoraġġ f’waqtu tal-baġit kif ukoll segwitu aġġornat u użu effiċjenti tar-riżerva għall-agrikoltura, biex b’hekk tiġi massimizzata d-disponibbiltà tagħha u tissaħħaħ il-kapaċità ta’ rispons fil-pront għall-kriżijiet emerġenti. Għalhekk, jixraq li tiġi definita data ta’ eliġibbiltà biex l-Istati Membri jħallsu dan l-appoġġ lill-benefiċjarji. Kull pagament li jsir wara din id-data jenħtieġ li jitqies ineliġibbli għall-finanzjament tal-Unjoni.

(15)

Għalhekk, jenħtieġ li l-Unjoni tiffinanzja n-nefqa mġarrba mill-Bulgarija, mill-Estonja u mill-Ungerija skont din il-miżura eċċezzjonali biss meta nefqa bħal din issir sa ċerta data ta’ eliġibbiltà. Għalhekk, jenħtieġ li l-appoġġ għal din il-miżura eċċezzjonali jitħallas sat-30 ta’ Settembru 2026.

(16)

Peress li l-pagamenti li jsiru wara t-30 ta’ Settembru 2026 ma għandhom jitqiesu eliġibbli fl-ebda ċirkostanza, ma għandux japplika l-Artikolu 5(2) tar-Regolament Delegat (UE) 2022/127, li jipprevedi tnaqqis proporzjonali tal-pagamenti ta’ kull xahar li jsiru wara l-iskadenza.

(17)

Jenħtieġ li l-Bulgarija, l-Estonja u l-Ungerija jikkomunikaw lill-Kummissjoni informazzjoni dettaljata dwar l-implimentazzjoni ta’ dan ir-Regolament, sabiex l-Unjoni tkun tista’ timmonitorja l-effiċjenza tal-miżura introdotta b’dan ir-Regolament.

(18)

Sabiex jiżguraw li l-bdiewa jirċievu appoġġ malajr kemm jista’ jkun, jenħtieġ li l-Bulgarija, l-Estonja u l-Ungerija jimplimentaw dan ir-Regolament mingħajr dewmien. Għalhekk, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(19)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,