32026R0481

This document is an excerpt from the EUR-Lex website

EUROPA
EUR-Lex home
Regolament implimentattiv - UE - 2026/481 - EN - EUR-Lex

Help

Search tips

Need more search options? Use the Advanced search

Document 32026R0481

Help

Regolament ta’ Implimentazzjoni tal-Kummissjoni (UE) 2026/481 tat-3 ta’ Marzu 2026 li jemenda r-Regolament ta’ Implimentazzjoni (UE) 2022/1426 li jistabbilixxi r-regoli għall-applikazzjoni tar-Regolament (UE) 2019/2144 tal-Parlament Ewropew u tal-Kunsill fir-rigward ta’ proċeduri uniformi u speċifikazzjonijiet tekniċi għall-approvazzjoni tat-tip tas-sistema tas-sewqan awtomatizzat ta’ vetturi awtomatizzati kompletament

C/2026/1310

ĠU L, 2026/481, 4.3.2026, ELI: http://data.europa.eu/eli/reg_impl/2026/481/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document Date of entry into force unknown (pending notification) or not yet in force., Date of effect: 24/03/2026

ELI: http://data.europa.eu/eli/reg_impl/2026/481/oj

HTML

PDF - authentic OJ

e-signature

How to verify the authenticity of the Official Journal

Il-Ġurnal Uffiċjali
ta'l-Unjoni Ewropea

Is-serje L

2026/481

4.3.2026

REGOLAMENT TA’ IMPLIMENTAZZJONI TAL-KUMMISSJONI (UE) 2026/481

tat-3 ta’ Marzu 2026

li jemenda r-Regolament ta’ Implimentazzjoni (UE) 2022/1426 li jistabbilixxi r-regoli għall-applikazzjoni tar-Regolament (UE) 2019/2144 tal-Parlament Ewropew u tal-Kunsill fir-rigward ta’ proċeduri uniformi u speċifikazzjonijiet tekniċi għall-approvazzjoni tat-tip tas-sistema tas-sewqan awtomatizzat ta’ vetturi awtomatizzati kompletament

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2019/2144 tal-Parlament Ewropew u tal-Kunsill tas-27 ta’ Novembru 2019 dwar rekwiżiti tal-approvazzjoni tat-tip għall-vetturi bil-mutur u t-trejlers tagħhom, kif ukoll għas-sistemi, għall-komponenti u għall-unitajiet tekniċi separati maħsubin għat-tali vetturi, fir-rigward tas-sikurezza ġenerali tagħhom u tal-protezzjoni tal-okkupanti tal-vetturi u l-utenti vulnerabbli tat-triq, li jemenda r-Regolament (UE) 2018/858 tal-Parlament Ewropew u tal-Kunsill u li jħassar ir-Regolamenti (KE) Nru 78/2009, (KE) Nru 79/2009 u (KE) Nru 661/2009 tal-Parlament Ewropew u tal-Kunsill u tar-Regolamenti tal-Kummissjoni (KE) Nru 631/2009, (UE) Nru 406/2010, (UE) Nru 672/2010, (UE) Nru 1003/2010, (UE) Nru 1005/2010, (UE) Nru 1008/2010, (UE) Nru 1009/2010, (UE) Nru 19/2011, (UE) Nru 109/2011, (UE) Nru 458/2011, (UE) Nru 65/2012, (UE) Nru 130/2012, (UE) Nru 347/2012, (UE) Nru 351/2012, (UE) Nru 1230/2012 u (UE) 2015/166 (1), u b’mod partikolari l-Artikolu 11(2) tiegħu,

Billi:

(1)

Il-leġiżlazzjoni tal-Unjoni dwar l-approvazzjoni tat-tip ilha mill-2022 tippermetti l-introduzzjoni fis-suq ta’ vetturi mingħajr sewwieq għal każijiet speċifiċi ta’ użu, permezz ta’ skema ta’ serje żgħira, li tippermetti eżenzjonijiet minn ċerti regolamenti dwar l-approvazzjoni tat-tip għal vetturi awtomatizzati kompletament. Id-derogi taħt din l-iskema ta’ serje żgħira japplikaw bil-kundizzjoni li l-għadd ta’ reġistrazzjonijiet ta’ tip ta’ vettura fl-Unjoni fis-sena ma jaqbiżx 1 500 reġistrazzjoni.

(2)

Mill-2022 seħħew żviluppi teknoloġiċi u regolatorji sostanzjali li għamlu possibbli l-varar fuq skala kbira ta’ vetturi awtomatizzati kompletament. Is-soluzzjonijiet għall-produzzjoni u l-varar fuq skala kbira tal-parkeġġ valet awtomatizzat (AVP, automated valet parking) diġà huma disponibbli u l-adozzjoni ta’ rekwiżiti għad-dawrien u l-ibbrejkjar ta’ vetturi b’modalità doppja fin-NUKEE, b’mod partikolari r-Regolamenti tan-NU Nru 79 (2) u Nru 13/13-H (3) rispettivament, tippermetti l-konformità tas-sistemi tal-AVP mal-qafas tal-approvazzjoni tat-tip tal-UE ta’ vettura sħiħa. Għalhekk, sar possibbli u xieraq li titneħħa l-limitazzjoni tas-serje żgħira, l-ewwel nett il-każ tal-użu (“AVP”).

(3)

Madankollu, qabel ma tiġi permessa l-approvazzjoni tat-tip ta’ vettura sħiħa tal-vetturi mgħammra b’sistemi tal-AVP f’numri illimitati, jeħtieġ li jiġu stabbiliti rekwiżiti tekniċi addizzjonali dwar il-prestazzjoni tas-sikurezza u l-validazzjoni tas-sikurezza permezz ta’ xenarji magħżula, minħabba l-ispeċifiċitajiet tal-każ tal-użu tal-AVP, jiġifieri t-tħaddim fiż-żoni ta’ parkeġġ b’veloċità baxxa ħafna.

(4)

L-estensjoni tal-kamp ta’ applikazzjoni tal-leġiżlazzjoni eżistenti tal-Unjoni lil hinn mill-vetturi b’modalità doppja u l-allinjament tagħha mal-qafas li qed jevolvi tal-Kummissjoni Ekonomika għall-Ewropa tan-Nazzjonijiet Uniti (NUKEE), meħtieġa biex tippermetti l-interpretazzjoni u l-applikazzjoni armonizzati fil-livell internazzjonali, jeħtieġu l-adattament ta’ diversi definizzjonijiet inklużi f’din il-leġiżlazzjoni.

(5)	Għalhekk, jenħtieġ li r-Regolament ta’ Implimentazzjoni tal-Kummissjoni (UE) 2022/1426 (4) jiġi emendat kif xieraq.

(6)	Il-miżuri previsti f’dan ir-Regolament huma f’konformità mal-opinjoni tal-Kumitat Tekniku – Vetturi bil-Mutur (TCMV),

ADOTTAT DAN IR-REGOLAMENT:

Artikolu 1

Ir-Regolament (UE) 2022/1426 huwa emendat kif ġej:

(1)

fl-Artikolu 1, l-ewwel subparagrafu, il-punt (c) huwa sostitwit b’dan li ġej:

“(c)

“Parkeġġ valet awtomatizzat” (“AVP”, Automated valet parking): il-vetturi b’karatteristika ta’ sistema tas-sewqan awtomatizzat (“ADS”, automated driving system) għall-applikazzjonijiet tal-parkeġġ f’dominju tad-disinn operattiv (“ODD”, operational design domain). Is-sistema tista’ tuża jew ma tużax infrastruttura esterna (inkluż, fejn rilevanti, markaturi tal-lokalizzazzjoni u sensuri tal-perċezzjoni) biex twettaq il-kompitu tas-sewqan dinamiku.”;

(2)

l-Artikolu 2 huwa emendat kif ġej:

(1)

il-punt 2 huwa sostitwit b’dan li ġej:

“2.	“karatteristika tal-ADS” tfisser applikazzjoni ta’ ADS iddisinjata speċifikament għall-użu f’ODD.”;

(2)

il-punt 5 huwa sostitwit b’dan li ġej:

“5.

“funzjoni operattiva” tfisser il-kapaċità li jiġi kkontrollat il-moviment fil-ħin reali tal-vettura, li tinvolvi t-twettiq ta’ bidliet mikro fid-dawrien, fl-ibbrejkjar u fl-aċċellerazzjoni biex tinżamm il-pożizzjoni fil-karreġġata jew is-separazzjoni xierqa tal-vetturi u azzjonijiet ta’ rispons immedjati sabiex jiġu evitati l-ħabtiet f’sitwazzjonijiet kritiċi ta’ sewqan.”;

(3)

il-punt 6 huwa sostitwit b’dan li ġej:

“6.

“funzjoni tattika” tfisser il-kapaċità li tipperċepixxi l-ambjent tal-vettura u tikkontrolla l-ippjanar, id-deċiżjoni u l-eżekuzzjoni tal-manuvri fil-ħin reali, inkluża l-viżibbiltà tal-vettura u l-moviment tagħha u li tinkludi d-deċiżjoni dwar jekk taqbiżx vettura jew tbiddel il-karreġġata, is-sinjalar tal-manuvri maħsuba, id-deċiżjoni ta’ meta tinbeda l-manuvra, l-għażla tal-veloċità xierqa, u l-eżekuzzjoni tal-manuvra.”;

(3)

fl-Artikolu 3, il-paragrafu 2 huwa sostitwit b’dan li ġej:

“2. L-approvazzjoni tat-tip tal-ADS ta’ vetturi awtomatizzati kompletament għandha tkun soġġetta għall-ispeċifikazzjonijiet tekniċi stabbiliti fl-Anness II. Dawk l-ispeċifikazzjonijiet għandhom jiġu vvalutati mill-awtoritajiet tal-approvazzjoni jew mis-servizzi tekniċi tagħhom f’konformità mal-Anness III.

Minbarra r-rekwiżiti stabbiliti fl-ewwel subparagrafu, l-approvazzjoni tat-tip tal-karatteristiċi tal-AVP tal-ADS għandha tkun soġġetta għall-ispeċifikazzjonijiet tekniċi stabbiliti fl-Anness V. Dawk l-ispeċifikazzjonijiet għandhom jiġu vvalutati mill-awtoritajiet tal-approvazzjoni jew mis-servizzi tekniċi tagħhom f’konformità mal-Anness V.”

;

(4)	l-Anness III huwa emendat f’konformità mal-Anness I ta’ dan ir-Regolament;

(5)	it-test fl-Anness II ta’ dan ir-Regolament jiżdied bħala l-Anness V.

Artikolu 2

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-3 ta’ Marzu 2026.

Għall-Kummissjoni

Il-President

Ursula VON DER LEYEN

(1) ĠU L 325, 16.12.2019, p. 1, ELI: http://data.europa.eu/eli/reg/2019/2144/oj.

(2) Ir-Regolament tan-NU Nru 79 – Dispożizzjonijiet uniformi dwar l-approvazzjoni ta’ vetturi fir-rigward tat-tagħmir tal-istering [2025/3] (ĠU L 2025/3, 10.1.2025, ELI: http://data.europa.eu/eli/reg/2025/3/oj).

(3) Ir-Regolament tan-NU Nru 13-H – Dispożizzjonijiet uniformi rigward l-approvazzjoni ta’ karozzi tal-passiġġieri fir-rigward tal-ibbrejkjar [2023/401] (ĠU L 60, 24.2.2023, p. 1, ELI: http://data.europa.eu/eli/reg/2023/401/oj).

(4) Ir-Regolament ta’ Implimentazzjoni tal-Kummissjoni (UE) 2022/1426 tal-5 ta’ Awwissu 2022 li jistabbilixxi r-regoli għall-applikazzjoni tar-Regolament (UE) 2019/2144 tal-Parlament Ewropew u tal-Kunsill fir-rigward ta’ proċeduri uniformi u speċifikazzjonijiet tekniċi għall-approvazzjoni tat-tip tas-sistema tas-sewqan awtomatizzat (ADS) ta’ vetturi awtomatizzati kompletament (ĠU L 221, 26.8.2022, p. 1, ELI: http://data.europa.eu/eli/reg_impl/2022/1426/oj).

ANNESS I

L-Anness III tar-Regolament ta’ Implimentazzjoni (UE) 2022/1426 huwa emendat kif ġej:

(1)	fil-Parti 1, il-punt 1.3.3, l-Illustrazzjoni 1 hija sostitwita b’dan li ġej: “ Illustrazzjoni 1: Il-viżwalizzazzjoni tad-distanzi waqt it-tidwir u l-qsim.”;

(2)

fil-Parti 2, il-punt 5.7. huwa sostitwit b’dan li ġej:

“5.7.

Il-manifattur għandu jiżgura li s-sistema ta’ ġestjoni tas-sikurezza tal-organizzazzjoni tikkonforma mar-rekwiżiti tal-punti 5.1. (ħlief għall-aspetti relatati mal-vettura bħat-“tħaddim” u d-“dekummissjonar”), 5.2, 5.3 u 5.6 permezz ta’ arranġamenti ma’ kwalunkwe organizzazzjoni involuta fl-iżvilupp, il-manifattura, jew il-varar waqt l-użu tal-ADS tagħha u l-karatteristiċi tagħha (inklużi, fejn rilevanti, fornituri kuntrattati, fornituri ta’ servizzi, jew suborganizzazzjonijiet tal-manifatturi). Tali arranġamenti jistgħu jinkludu, fejn xieraq, arranġamenti kuntrattwali, interfaċċi ċari jew sistema ta’ ġestjoni tal-kwalità.”.

ANNESS II

It-test li ġej jiżdied bħala l-Anness V tar-Regolament ta’ Implimentazzjoni (UE) 2022/1426:

“ANNESS V

Speċifikazzjonijiet tekniċi għall-AVP kif imsemmija fl-Artikolu 3(2)

PARTI 1: DEFINIZZJONIJIET

1. Definizzjonijiet

Għall-finijiet ta’ dan l-Anness, japplikaw id-definizzjonijiet li ġejjin:

1.1.

“Vjaġġ AVP” tfisser il-verifika tal-kundizzjonijiet kollha relatati mas-sikurezza fil-karatteristika tal-AVP għall-attivazzjoni tal-AVP, l-eżekuzzjoni sussegwenti tad-DDT u d-diżattivazzjoni tal-AVP.

1.2.

“Post ta’ tranżizzjoni” tfisser żona deżinjata li tinsab fi ħdan l-ODD, li hija xierqa biex tattiva jew tiddiżattiva l-karatteristika tal-AVP.

1.3.

“L-iżgħar oġġett rilevanti” tfisser l-iżgħar utent vulnerabbli tat-triq li l-karatteristika tal-AVP tista’ tidentifika u tirreaġixxi għalih waqt li twettaq id-DDT.

1.4.

“Distanza ta’ sikurezza” tfisser id-distanza ta’ oġġett li għalih il-karatteristika tal-AVP għandha tirreaġixxi b’mod xieraq, fejn ir-reazzjoni għall-oġġetti ta’ quddiem, tal-ġenb jew ta’ wara tista’ tvarja abbażi tad-distanza tagħhom.

1.5.

“Oġġett permanenti” tfisser oġġett mhux mobbli fi ħdan l-ODD.

1.6.

“Oġġett statiku” tfisser oġġett mobbli fi ħdan l-ODD, li ma jiċċaqlaqx fil-perjodu rilevanti.

1.7.

“Oġġett dinamiku” tfisser oġġett fi ħdan l-ODD li jkun qiegħed jiċċaqlaq fit-traffiku lonġitudinali u trażversali u li jista’ b’mod partikolari jkun utent vulnerabbli tat-triq jew vettura oħra misjuqa manwalment jew kompletament awtomatizzata.

PARTI 2: REKWIŻITI TAL-PRESTAZZJONI

2. Rekwiżiti ġenerali

2.1.

Il-karatteristika tal-AVP għandha tkun kapaċi twettaq id-DDT kif speċifikat għal-limiti tal-ODD ristrett tagħha u fi ħdanhom.

2.2.

Il-karatteristika tal-AVP għandha tkun iddisinjata biex tevita kwalunkwe effett negattiv fuq is-sikurezza u l-fluss tat-traffiku tal-ODD waqt it-tħaddim.

2.3.

Il-veloċità massima tal-vettura bil-karatteristika tal-AVP li tkun attiva ma għandhiex tkun aktar minn 30 km/h u għandha tiġi speċifikata mill-manifattur abbażi tal-partikolaritajiet tal-ODD (inklużi l-limiti tal-veloċità disponibbli u d-djuqija taż-żona ta’ parkeġġ).

2.6.

Il-manifattur jibqa’ unikament responsabbli għall-konformità mar-rekwiżiti ta’ dan l-Anness irrispettivament minn kwalunkwe parti terza involuta fil-varar waqt l-użu jew fit-tħaddim tal-karatteristika tal-AVP.

2.7.

Meta l-karatteristika tal-AVP tiddependi fuq l-informazzjoni esterna tal-vettura, id-disponibbiltà, il-kompatibbiltà u s-sigurtà ta’ tali informazzjoni għandhom jiġu żgurati matul it-tħaddim tal-karatteristika tal-AVP.

2.8.

Jekk il-vettura tkun mgħammra b’karatteristiċi oħra tal-ADS, għandha tiġi żgurata interazzjoni sikura bejn il-karatteristika tal-AVP u karatteristiċi oħra tal-ADS.

2.9.

F’każ li jkunu permessi okkupanti tal-vettura waqt li l-karatteristika tal-AVP tkun attiva, f’konformità mad-deskrizzjoni tal-ODD tal-karatteristika tal-AVP, għandhom jittieħdu miżuri xierqa kontra l-użu ħażin prevedibbli mill-okkupanti tal-vettura.

2.10.

F’każ li ma jkunux permessi okkupanti tal-vettura waqt li l-karatteristika tal-AVP tkun attiva, f’konformità mad-deskrizzjoni tal-ODD tal-karatteristika tal-AVP, il-karatteristika tal-AVP għandha tkun iddisinjata biex tiżgura li l-karatteristika tal-AVP tkun tista’ taħdem biss meta ma jkun hemm l-ebda persuna jew annimal fil-vettura.

2.11.

It-tagħmir tal-istering tal-vettura b’modalità doppja mgħammar bil-karatteristika tal-AVP għandu jikkonforma mas-serje ta’ emendi 04 jew aktar reċenti tar-Regolament tan-NU Nru 79 (*1).

Is-sistema tal-ibbrejkjar tal-vettura b’modalità doppja mgħammra bil-karatteristika tal-AVP għandha tikkonforma mas-serje ta’ emendi 13 jew aktar reċenti tar-Regolament tan-NU Nru 13 (*2), jew mas-serje ta’ emendi 01 jew aktar reċenti tar-Regolament tan-NU Nru 13H (*3), kif applikabbli.

3. Rekwiżiti għall-attivazzjoni u d-diżattivazzjoni tal-karatteristika tal-AVP

3.1.

L-attivazzjoni u d-diżattivazzjoni tal-karatteristika tal-AVP f’xenarji nominali għandhom ikunu possibbli biss f’postijiet ta’ tranżizzjoni jew fi spazji ta’ parkeġġ.

3.2.

Il-kundizzjonijiet kollha għall-attivazzjoni u għad-diżattivazzjoni tal-karatteristika tal-AVP għandhom jiġu vverifikati mal-kundizzjonijiet tal-ODD definit (inkluż, fejn rilevanti, il-preżenza jew l-assenza ta’ okkupanti tal-vettura, spazju ta’ parkeġġ jew post ta’ tranżizzjoni xieraq għad-dħul jew il-ħruġ mill-vettura).

3.3.

Diżattivazzjoni tal-karatteristika tal-AVP

3.3.1.

Wara li l-karatteristika tal-AVP tkun lestiet b’suċċess il-vjaġġ AVP billi jintlaħaq post ta’ tranżizzjoni jew spazju ta’ parkeġġ fl-ODD, il-karatteristika tal-AVP għandha awtomatikament twaqqaf il-vettura, iżżommha wieqfa u tiddiżattiva l-karatteristika tal-AVP.

3.3.2.

Il-karatteristika tal-AVP għandha tibqa’ attiva sakemm jitlesta l-proċess ta’ diżattivazzjoni mibdi mis-sistema jew mill-utent jew sakemm il-vettura tilħaq MRC.

3.3.3.

Jekk applikabbli mad-diżattivazzjoni tal-karatteristika tal-AVP, il-kontrolli, l-indikaturi, it-twissijiet u l-indikaturi operatorji tal-vettura għandhom jiġu ssettjati awtomatikament għal stat xieraq għas-sewqan manwali u l-kontroll laterali u lonġitudinali għandu jingħata lura lis-sewwieq mingħajr ebda assistenza ta’ kontroll kontinwu attiva.

4. DDT f’xenarji nominali

4.1.

L-ippjanar tat-trajettorja u l-veloċità

4.1.1.

Il-partikolaritajiet tal-ODD (inklużi, fejn rilevanti, raġġi tal-kurvi stretti, rampi u meta l-vettura tingħaqad mat-traffiku) għandhom jiġu ġestiti permezz ta’ ppjanar u għażla xierqa tat-trajettorja.

4.1.2.

Il-karatteristika tal-AVP għandha timminimizza l-impatt ambjentali billi tippjana trajettorja effettiva u effiċjenti biex jintlaħqu l-postijiet ta’ tranżizzjoni.

4.1.3.

Il-karatteristika tal-AVP għandha dejjem iżżomm distanza sikura minn utenti oħra tat-triq jew oġġetti abbażi tal-iżgħar oġġett rilevanti u għandha dejjem tadatta l-veloċità tagħha b’mod antiċipatorju. Id-distanza ta’ sikurezza, il-veloċità massima rispettiva f’konformità mal-punt 6.1., u l-iżgħar oġġett rilevanti għandhom jiġu speċifikati mill-manifattur.

5. DDT f’xenarji kritiċi (tħaddim ta’ emerġenza)

5.1.

B’deroga mill-Parti 1, il-punti 1.4.1, 1.4.2 u 1.4.3 tal-Anness III, il-karatteristika tal-AVP għandha tevita l-kolliżjonijiet kollha mal-utenti tat-triq jew mal-ostakli li jidħlu, jaqsmu jew li jkunu fit-trajettorja tal-vettura fid-direzzjoni tas-sewqan.

6. DDT fil-konfini tal-ODD

6.1.

Fil-każ ta’ użu ħażin rikonoxxut u ta’ ħsara rikonoxxuta fil-vettura, għandu jsir trasferiment dirett għall-MRC.

6.2.

Jekk il-vettura mgħammra bil-karatteristika tal-AVP tidher biss li qiegħda titlaq mill-ODD (eż. minħabba ineżattezza temporanja fil-lokalizzazzjoni ġeografika tal-vettura) u sussegwentement tiġi kkonfermata mill-ġdid li tinsab fil-konfini tal-ODD, dan ma jitqiesx bħala li qiegħed jagħti lok għal MRC u hija possibbli kontinwazzjoni immedjata tal-vjaġġ AVP.

6.3.

Il-vettura tista’ tħalli l-MRC jekk tinqaleb għal modalità tas-sewqan manwali u tinstaq minn sewwieq.

7. Manwal operattiv

L-aspetti li ġejjin għandhom jiġu indirizzati u implimentati fil-manwal operattiv:

7.1.

Għandhom jiġu definiti r-rwoli kollha neċessarji għat-tħaddim sikur tal-karatteristika tal-AVP, inkluża d-deżinjazzjoni tal-persuni responsabbli rilevanti u l-allokazzjoni tal-kompiti organizzattivi u tekniċi.

7.2.

L-assenjazzjonijiet tar-rwoli kollha għandhom jiġu ddokumentati fil-manwal operattiv.

7.3.

Il-manwal operattiv għandu jinkludi strateġiji f’każ ta’ inċidenti mhux mistennija.

7.4.

Il-manwal operattiv għandu jinkludi kunsiderazzjonijiet dwar il-bidliet fl-ODD matul it-tħaddim tal-karatteristika tal-AVP. Għandu jiġi stabbilit u inkluż proċess biex tiġi żgurata l-valutazzjoni tal-bidliet ippjanati.

PARTI 3: VALUTAZZJONI TAL-KONFORMITÀ

8. Testijiet

8.1.

Dispożizzjonijiet ġenerali

8.1.1.

Il-każijiet tat-test għall-verifika tal-karatteristika tal-AVP għandhom jinkludu l-funzjonijiet kollha tal-AVP.

8.1.2.

Għandhom jintużaw ix-xenarji deskritti fil-punt 8.2 ta’ dan l-Anness. Il-manifattur għandu jagħżel xenarji rilevanti abbażi tal-ODD tal-karatteristika tal-AVP.

8.1.3.

Il-kriterji ta’ suċċess u ta’ falliment biex tiġi vvalutata s-sikurezza tal-karatteristika tal-AVP għandhom jiġu stabbiliti mill-awtorità tal-approvazzjoni, abbażi tar-rekwiżiti stabbiliti fl-Anness II, fuq ix-xenarji stabbiliti fil-Parti 1 tal-Anness III, u fuq dan l-Anness.

8.2.

Xenarji tat-testijiet biex tiġi vvalutata l-prestazzjoni tal-karatteristika tal-AVP

Din il-lista ta’ xenarji stabbilita fil-punti 8.2.1. sa 8.2.7. fiha każijiet tat-test bażiċi li għandhom jintgħażlu abbażi tal-ODD u adattati għalih, u għandhom jintużaw biex tiġi ttestjata l-konformità tal-karatteristika tal-AVP tal-ADS.

Fuq talba tal-awtorità tal-approvazzjoni, għandhom jiġu eżegwiti xenarji addizzjonali li huma parti mill-ODD.

Ix-xenarji elenkati fil-punti 8.2.1. sa 8.2.7. jinkludu diversi passi tat-test individwali konsekuttivi. Dawk il-passi tat-test individwali jistgħu jitwettqu b’mod sekwenzjali mingħajr ma jiġi kkanċellat il-vjaġġ AVP jew tinħareġ talba ġdida għal vjaġġ AVP għal kull wieħed mill-passi tat-test.

8.2.1.

Trasferiment tal-kontroll u teħid tal-kontroll mill-AVP

8.2.1.1.

Manuvra tal-parkeġġ (trasferiment u parkeġġ)

It-test għandu juri li l-karatteristika tal-AVP tista’ twettaq vjaġġ AVP mill-post ta’ tranżizzjoni sal-ispazju ta’ parkeġġ maħsub.

Prekundizzjonijiet: vettura mgħammra bil-karatteristika tal-AVP tkun ipparkjata fil-post ta’ tranżizzjoni.

Ix-xenarju għandu jiġi eżegwit fil-passi li ġejjin:

Pass 1: Ikkonfigura talba għal vjaġġ AVP.

Pass 2: Wettaq il-vjaġġ AVP.

Pass 3: Stenna sakemm jitlesta l-vjaġġ AVP.

8.2.1.2.

Ir-ritorn għand l-utent (teħid ta’ kontroll)

It-test għandu juri li l-karatteristika tal-AVP tista’ twettaq vjaġġ AVP mill-ispazju ta’ parkeġġ għal post ta’ tranżizzjoni.

Prekundizzjoni: vettura mgħammra bil-karatteristika tal-AVP wieqfa fi spazju ta’ parkeġġ.

Ix-xenarju għandu jiġi eżegwit fil-passi li ġejjin:

Pass 1: Ikkonfigura talba għal vjaġġ AVP.

Pass 2: Wettaq il-vjaġġ AVP.

Pass 3: Stenna sakemm jitlesta l-vjaġġ AVP.

8.2.2.

Twaqqif awtomatiku u diżattivazzjoni tas-sistema

8.2.2.1.

Diżattivazzjoni barra mill-vettura

It-test għandu juri l-possibbiltà ta’ twaqqif awtomatiku jew diżattivazzjoni tas-sistema barra mill-vettura mgħammra bil-karatteristika tal-AVP.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit fil-passi li ġejjin:

Pass 1: Wettaq l-azzjoni ta’ twaqqif awtomatiku.

Pass 2: Ħalli l-MRC.

8.2.2.2.

Twaqqif awtomatiku jew diżattivazzjoni minn ġewwa l-vettura

It-test għandu juri l-possibbiltà ta’ twaqqif awtomatiku jew diżattivazzjoni tas-sistema minħabba interventi fit-tagħmir jew il-kontrolli tas-sewqan minn persuna fil-vettura.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit fil-passi li ġejjin:

Pass 1: L-intervent għandu jsir b’tagħmir jew b’kontrolli tas-sewqan korrispondenti.

Pass 2: Id-DDT għandu jitkompla skont l-istrateġija ddikjarata tal-manifattur.

8.2.3.

Evitar ta’ kolliżjonijiet

8.2.3.1.

Il-bidu tat-vjaġġ AVP

It-test għandu juri li l-karatteristika tal-AVP tista’ tidentifika u tirreaġixxi għal oġġetti qrib ħafna tal-vettura sabiex il-vettura ma tkunx tista’ tibda l-vjaġġ AVP.

Prekundizzjoni: Il-vettura tinsab f’post ta’ tranżizzjoni jew fi spazju ta’ parkeġġ u l-karatteristika tal-AVP hija attivata.

Ix-xenarju għandu jiġi eżegwit fil-passi li ġejjin:

Pass 1: L-iżgħar oġġett rilevanti għandu jitqiegħed madwar il-vettura.

Pass 2: L-iżgħar oġġett rilevanti għandu jitneħħa.

8.2.3.2.

L-iżgħar oġġett rilevanti fit-trajettorja tal-vettura mgħammra bil-karatteristika tal-AVP

It-test għandu juri li l-karatteristika tal-AVP tista’ tidentifika u tieqaf quddiem l-iżgħar oġġett rilevanti tul il-mogħdija tas-sewqan u tkompli f’każ li ma jerġa’ jkun hemm xejn fit-trajettorja maħsuba.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit fil-passi li ġejjin:

Pass 1: L-iżgħar oġġett rilevanti għandu jitqiegħed fit-trajettorja maħsuba tal-vettura fil-postijiet kollha li ġejjin. L-awtorità tal-approvazzjoni tista’ tagħżel li tirrikjedi testijiet b’kundizzjonijiet addizzjonali.

(a)

Il-Pass 1 għandu jitwettaq bl-iżgħar oġġett rilevanti mqiegħed (jekk applikabbli):

(i)	b’mod ċentrali fit-trajettorja maħsuba, f’distanza ta’ mill-inqas tul ta’ vettura waħda lil hinn mill-ispazju ta’ parkeġġ;

(ii)	b’mod ċentrali fit-trajettorja maħsuba, wara kurva;

(iii)

fuq il-parti ta’ fuq (bejn 0 u 1 m wara li r-rampa tkun laħqet inklinazzjoni kostanti) ta’ rampa ’l isfel;

(iv)	fiż-żona ċatta wara rampa ta’ parkeġġ ’l isfel (bejn 0 u 1 m wara li ż-żona tas-sewqan tkun saret ċatta);

(v)	fiċ-ċentru ta’ spazju ta’ parkeġġ;

(vi)	fuq il-parti ta’ isfel (bejn 0 u 1 m wara li r-rampa tkun laħqet inklinazzjoni kostanti) ta’ rampa ’l fuq;

(vii)

fiż-żona ċatta wara rampa ta’ parkeġġ ’il fuq (bejn 0 u 1 m wara li ż-żona tas-sewqan tkun saret ċatta);

(viii)

ċentralment fit-trajettorja maħsuba, wara kurva, fuq rampa.

Pass 2: L-iżgħar oġġett rilevanti għandu jitneħħa.

8.2.3.3.

Oġġetti statiċi jew dinamiċi maġenb it-trajettorja maħsuba tal-vettura mgħammra bil-karatteristika tal-AVP

It-test għandu juri li l-karatteristika tal-AVP tista’ tidentifika u tirreaġixxi b’mod proporzjonali għal oġġett li jinsab maġenb il-mogħdija tas-sewqan u tadatta b’mod korrispondenti l-veloċità tal-vettura.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit kemm għall-oġġetti statiċi kif ukoll għal dawk dinamiċi, fil-passi li ġejjin:

L-Ewwel Pass għal oġġett statiku: L-oġġett statiku għandu jitqiegħed f’distanza iżgħar mid-distanza ta’ sikurezza permessa mal-ġenb tal-kuritur tas-sewqan qabel ma toqrob il-vettura mgħammra bil-karatteristika tal-AVP.

L-Ewwel Pass għal oġġett dinamiku: L-oġġett dinamiku għandu jiġi mċaqlaq b’mod parallel mal-vettura mgħammra bil-karatteristika tal-AVP, f’distanza laterali iżgħar mid-distanza ta’ reazzjoni laterali waqt li l-vettura tkun qiegħda toqrob.

It-Tieni Pass kemm għal oġġett statiku kif ukoll għal oġġett dinamiku: F’każ li l-karatteristika tal-AVP tkun waqqfet il-vettura minħabba l-oġġett statiku u/jew dinamiku, l-oġġett għandu jitneħħa.

8.2.3.4.

Oġġetti dinamiċi

It-test għandu juri li l-karatteristika tal-AVP tista’ tevita kolliżjoni ma’ oġġetti dinamiċi ostakolati u mhux ostakolati.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit għal qsim, għal ċaqliq lejn il-ġenb tal-vettura jew għal ċaqliq kontra d-direzzjoni tal-vettura, fil-passi li ġejjin:

L-Ewwel Pass għall-qsim: Oġġett dinamiku għandu jaqsam il-mogħdija tas-sewqan tal-vettura mgħammra bil-karatteristika tal-AVP minn barra l-mogħdija tas-sewqan quddiem il-vettura miexja, li jirriżulta f’riskju għoli ta’ kolliżjoni.

L-Ewwel Pass għal ċaqliq lejn il-ġenb: Oġġett dinamiku għandu jiċċaqlaq minn barra l-mogħdija tas-sewqan lejn in-naħa laterali tal-vettura mgħammra bil-karatteristika tal-AVP, li jirriżulta f’riskju għoli ta’ kolliżjoni.

L-Ewwel Pass għal ċaqliq kontra d-direzzjoni: Oġġett dinamiku għandu jiċċaqlaq lejn il-vettura mgħammra bil-karatteristika tal-AVP, kontra d-direzzjoni tal-ivvjaġġar.

It-Tieni Pass: L-oġġett dinamiku għandu jitneħħa.

8.2.4.

Konformità mar-regoli tat-traffiku

8.2.4.1.

Il-ħruġ minn spazju ta’ parkeġġ

It-test għandu juri li l-karatteristika tal-AVP iċċedi meta l-vettura toħroġ ’il barra mill-ispazju ta’ parkeġġ.

Prekundizzjoni: il-vettura mgħammra bil-karatteristika tal-AVP tiġi pparkjata fuq il-post ta’ tranżizzjoni jew fi spazju ta’ parkeġġ, filwaqt li vettura oħra tkun lesta biex tieħu d-dritta.

Ix-xenarju għandu jiġi eżegwit fil-passi li ġejjin:

Pass 1: għandha tintbagħat talba għal vjaġġ AVP u għandha tiġi attivata l-karatteristika tal-AVP.

Pass 2: il-vettura l-oħra għandha tinstaq b’tali mod li taqbeż il-vettura mgħammra bil-karatteristika tal-AVP f’dak il-ħin li fih tibda toħroġ mill-ispazju ta’ parkeġġ.

Pass 3: il-vettura l-oħra għandha tinstaq sakemm taqbeż u tkun ’il bogħod mill-vettura mgħammra bil-karatteristika tal-AVP.

8.2.4.2.

Waqfien u dritta tat-triq

It-test għandu juri li l-karatteristika tal-AVP tieqaf jew iċċedi f’ġunzjonijiet, intersezzjonijiet jew f’żoni fejn jingħaqad it-traffiku, tirrispetta r-regoli tad-dritta tat-triq u tikkunsidra vetturi oħra li jkunu qegħdin joqorbu lejn dawn iż-żoni.

Prekundizzjoni: il-vettura tkun qiegħda tinstaq bil-karatteristika tal-AVP attivata u toqrob lejn ġunzjoni, punt ta’ qsim jew żona fejn jingħaqad it-traffiku; vettura oħra hija lesta li tieħu d-dritta tat-triq.

Ix-xenarju għandu jiġi eżegwit fil-passi li ġejjin:

Pass 1: Il-vettura l-oħra għandha tilħaq il-ġunzjoni, il-punti ta’ qsim jew iż-żona fejn jingħaqad it-traffiku bejn wieħed u ieħor fl-istess ħin bħall-vettura mgħammra bil-karatteristika tal-AVP.

Pass 2: Il-vettura l-oħra għandha tkompli tinstaq tul il-ġunzjoni, il-punt ta’ qsim jew iż-żona fejn jingħaqad it-traffiku.

8.2.5.

Attivazzjoni tal-karatteristika tal-AVP

8.2.5.1.

Għoti ta’ informazzjoni dwar l-infrastruttura esterna mhux xieraq għall-karatteristika tal-AVP

It-test għandu juri li l-karatteristika tal-AVP mhijiex se tiġi attivata f’każ ta’ għoti ta’ informazzjoni dwar l-infrastruttura esterna mhux xieraq.

Prekundizzjoni: vettura mgħammra bil-karatteristika tal-AVP ipparkjata fil-post ta’ tranżizzjoni li tingħatalha informazzjoni dwar l-infrastruttura esterna mhux xierqa.

Ix-xenarju għandu jiġi eżegwit fil-pass li ġej:

Pass 1: għandu jsir tentattiv biex jintalab vjaġġ AVP.

8.2.6.

Sistema ta’ perċezzjoni

8.2.6.1.

Okklużjoni tas-sensur

It-test għandu juri li l-karatteristika tal-AVP tirreaġixxi b’mod sikur għall-okklużjoni fil-kamp viżiv.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit fil-passi li ġejjin:

Pass 1: għandu/għandhom jitgħatta/jitgħattew is-sensur(i) li jissorvelja(w) il-parti tal-mogħdija tas-sewqan reali tal-vettura.

Pass 2: L-okklużjoni tas-sensur għandha titneħħa.

8.2.6.2.

Oġġetti speċjali

It-test għandu juri li l-limitazzjonijiet tas-sensuri użati għall-OEDR fil-karatteristika tal-AVP huma kkumpensati kif xieraq sabiex tiġi żgurata l-eżekuzzjoni sikura tad-DDT.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit fil-passi li ġejjin:

Pass 1: L-oġġetti rilevanti għall-ittestjar tal-limitazzjonijiet tas-sensuri tal-AVP (eż. b’superfiċe omoġena ħafna, b’kuntrast batut mal-isfond, riflettività, eċċ.) għandhom jitqiegħdu b’mod aleatorju fit-trajettorja tas-sewqan tal-vettura.

Pass 2: F’każ li l-vettura tkun waqfet, l-oġġett rilevanti għandu jitneħħa.

8.2.7.

Xenarji ta’ ħsara

8.2.7.1.

Ħsara kritika fil-konnessjoni bla fili bejn il-karatteristika tal-AVP u l-infrastruttura esterna

It-test għandu juri li ħsara fil-konnessjoni bla fili tiġi ġestita b’mod sikur.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit fil-passi li ġejjin:

Pass 1: Is-sinjal mingħajr fili għandu jiġi interrott.

Pass 2: Jekk ikun neċessarju, stenna sakemm il-karatteristika tal-AVP tinterpreta l-interruzzjoni tal-konnessjoni tar-radju bħala telf permanenti tal-konnessjoni bla fili.

8.2.7.2.

Ħsara f’sensur tal-perċezzjoni

It-test għandu juri li l-karatteristika tal-AVP tidentifika ħsarat fis-sensuri meħtieġa għall-OEDR (sensuri fil-vettura u/jew fl-infrastruttura esterna) u tirreaġixxi kif xieraq.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit fil-pass li ġej:

Pass 1: Il-konnessjoni tad-data ta’ sensur li hija rilevanti għall-OEDR fit-trajettorja tas-sewqan reali tal-vettura għandha tiġi interrotta.

8.2.7.3.

Ħsara fl-infrastruttura esterna

It-test għandu juri li l-karatteristika tal-AVP tidentifika żbalji fl-infrastruttura esterna u tirreaġixxi kif xieraq.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit fil-pass li ġej:

Pass 1: Għandha tiġi indotta b’mod artifiċjali ħsara kritika fl-infrastruttura esterna.

8.2.7.4.

Ħsara fil-vettura

It-test għandu juri li l-karatteristika tal-AVP tidentifika ħsarat fil-vettura u tirreaġixxi kif xieraq.

Prekundizzjoni: sewqan tal-vettura bil-karatteristika tal-AVP attivata.

Ix-xenarju għandu jiġi eżegwit fil-pass li ġej:

Pass 1: Għandha tiġi indotta manipulazzjoni artifiċjali li tiddiżattiva jew tikkawża ħsara f’sistema tal-vettura rilevanti għall-karatteristika tal-AVP.

(*1) Ir-Regolament Nru 79 tal-Kummissjoni Ekonomika għall-Ewropa tan-Nazzjonijiet Uniti (NU/KEE) — Dispożizzjonijiet uniformi li jikkonċernaw l-approvazzjoni tal-vetturi fir-rigward tat-tagħmir tal-istering [2025/3] (ĠU L, 2025/3, 10.1.2025, ELI: http://data.europa.eu/eli/reg/2025/3/oj).

(*2) Ir-Regolament Nru 13 tal-Kummissjoni Ekonomika għall-Ewropa tan-Nazzjonijiet Uniti (NU/KEE) — Dispożizzjonijiet uniformi rigward l-approvazzjoni ta’ vetturi tal-kategorija M, N, u O fir-rigward tal-ibbrejkjar [2016/194] (ĠU L 42, 18.2.2016, p. 1, ELI: http://data.europa.eu/eli/reg/2016/194/oj).

(*3) Ir-Regolament Nru 13-H tal-Kummissjoni Ekonomika għall-Ewropa tan-Nazzjonijiet Uniti (NU/KEE) — Dispożizzjonijiet uniformi rigward l-approvazzjoni ta’ karozzi tal-passiġġieri fir-rigward tal-ibbrejkjar [2015/2364] (ĠU L 335, 22.12.2015, p. 1, ELI: http://data.europa.eu/eli/reg/2015/2364/oj).”

ELI: http://data.europa.eu/eli/reg_impl/2026/481/oj

ISSN 1977-074X (electronic edition)

Top

Choose the experimental features you want to try