Deskrizzjoni tal-oġġetti

Klassifikazzjoni (Kodiċi NM)

Raġunijiet

(1)

(2)

(3)

Oġġett ta’ daqs universali, twil madwar 26 cm, li jikkonsisti minn żewġ qxur tal-ġenb tal-plastik riġidi u b’għamla anatomika li jgħattu l-ġog tal-għaksa u parti mill-pexxun.

Kuxxinett li jista’ jitneħħa, li jikkonsisti minn fowm ċellulari artab miksi bi drappijiet tessili minsuġin, jitwaħħal man-naħa ta’ ġewwa ta’ kull waħda mill-qxur permezz ta’ strixxa vertikali tat-tip Velcro.

Il-qxur tal-ġnub huma kkollegati ma’ xulxin fiż-żona tal-għarqub tal-qiegħ tas-sieq permezz ta’ pont magħmul minn drapp tessili. It-tul tal-pont jista’ jiġi aġġustat.

L-oġġett jitwaħħal mar-riġel u jiġi ssikkat b’żewġ ċineg inelastiċi tat-tip Velcro li jinsabu fl-għoli tal-pexxun. Ma hemm l-ebda mezz biex l-oġġett jiġi ssikkat fl-għoli tal-għaksa.

L-oġġett huwa maħsub biex jistabbilizza l-ġog tal-għaksa ħalli jipprevjeni, pereżempju, il-liwi laġenba. Waqt l-importazzjoni jiġi ppreżentat biex jintlibes ġewwa żarbuna u biex jintuża bħala faxxa tal-għaksa f’każ ta’ ħsara fil-ġog tal-għaksa u/jew fil-ligamenti.

(Ara l-istampa) (*1)

6307 90 98

Il-klassifikazzjoni hija ddeterminata bir-regoli ġenerali 1, 3(c) u 6 għall-interpretazzjoni tan-Nomenklatura Magħquda, in-Nota 7(d) tat-Taqsima XI, u bil-kliem tal-kodiċijiet NM 6307, 6307 90 u 6307 90 98.

Il-klassifikazzjoni taħt il-kodiċi NM 9021 10 10 bħala apparati ortopediċi hija eskluża, minħabba li l-oġġett ma jistax jiġi aġġustat għall-ħtiġijiet ta’ utent speċifiku. Minħabba li l-oġġett huwa wieħed ta’ daqs universali u ż-żewġ qxur tal-ġenb huma riġidi u għandhom għamla anatomika universali, la huwa aġġustat u lanqas aġġustabbli għall-għamla tal-għaksa tal-utent speċifiku. Barra minn hekk, l-oġġett jista’ jiġi ssikkat biss fl-għoli tal-pexxun, mingħajr l-ebda mezz ta’ aġġustament permezz ta’ ssikkar mal-ġog tal-għaksa. Konsegwentement, l-oġġett ma jistax jiġi aġġustat għal żvantaġġ speċifiku ta’ pazjent skont it-tifsira tas-sentenza tal-Qorti tal-Ġustizzja tas-7 ta’ Novembru 2002, Lohmann u Medi Bayreuth, il-Kawżi Magħquda C-260/00 sa C-263/00, ECLI:EU:C:2002:637 (ara l-punti 38, 41, 42 u 45).

Barra minn hekk, in-nuqqas ta’ aġġustabbiltà għall-għamla speċifika tal-għaksa tal-utent iwassal biex l-oġġett ma jkunx jista’ jipprevjeni kompletament, u fiċ-ċirkostanzi kollha, movimenti speċifiċi mhux mixtieqa (pereżempju, l-inklinazzjoni laġenba) tal-ġog tal-għaksa sabiex jiġi eskluż tidrib ulterjuri (Nota 6 tal-Kapitolu 90), kif meħtieġ għal apparati ortopediċi tal-intestatura 9021, skont it-tieni paragrafu tan-Nota addizzjonali 2 tal-Kapitolu 90.

Il-klassifikazzjoni taħt il-kodiċi NM 9021 10 90 bħala qassaba u apparati oħra għall-fratturi hija eskluża wkoll, minħabba li l-oġġett ma jistax jimmobilizza ġog tal-għaksa fratturat għar-raġunijiet imsemmija hawn fuq (ara wkoll in-Noti ta’ Spjegazzjoni tas-Sistema Armonizzata tal-intestatura 9021, (II) Qassaba u Apparati Oħra għall-Fratturi, l-ewwel paragrafu).

Konsegwentement, l-oġġett irid jiġi kklassifikat skont il-materjal kostitwenti tiegħu.

L-oġġett huwa oġġett kompożitu li jikkonsisti minn materjali differenti (tessuti u plastik) skont it-tifsira tar-regola ġenerali 3(b) għall-interpretazzjoni tan-Nomenklatura Magħquda. Sa fejn għandu x’jaqsam l-effett mixtieq, il-qxur tal-plastik kif ukoll iċ-ċineg tessili huma importanti b’mod ugwali. Konsegwentement, iż-żewġ materjali huma essenzjali b’mod ugwali skont it-tifsira tar-regola ġenerali 3(b) għall-interpretazzjoni tan-Nomenklatura Magħquda u l-oġġett irid jiġi kklassifikat taħt l-intestatura li tiġi l-aħħar f’ordni numeriku fost dawk li b’mod ugwali jistħoqqilhom kunsiderazzjoni (intestaturi 3926 u 6307) skont it-tifsira tar-regola ġenerali 3(c) għall-interpretazzjoni tan-Nomenklatura Magħquda.

Għalhekk, l-oġġett irid jiġi kklassifikat taħt il-kodiċi NM 6307 90 98 bħala oġġetti manifatturati oħra ta’ kwalunkwe drapp tessili.