(1)

Ir-Regolament (UE) 2016/429 jipprevedi li l-konsenji tal-annimali, tal-prodotti ġerminali u tal-prodotti li joriġinaw mill-annimali minn pajjiżi terzi jew territorji jitħallew jidħlu fl-Unjoni biss jekk il-pajjiżi terzi jew it-territorji kkonċernati jkunu elenkati f’konformità mal-Artikolu 230(1) ta’ dak ir-Regolament.

(2)

Ir-Regolament Delegat tal-Kummissjoni (UE) 2020/692 (2) jistabbilixxi r-rekwiżiti tas-saħħa tal-annimali li l-konsenji ta’ ċerti speċijiet u kategoriji tal-annimali, tal-prodotti ġerminali u tal-prodotti li joriġinaw mill-annimali, li jkunu ġejjin minn pajjiżi terzi, territorji, jew żoni tagħhom, jew minn kompartimenti tagħhom fil-każ tal-annimali tal-akkwakultura, iridu jkunu konformi magħhom biex jidħlu fl-Unjoni.

(3)

Ir-Regolament ta’ Implimentazzjoni tal-Kummissjoni (UE) 2021/404 (3) jistabbilixxi l-listi tal-pajjiżi terzi, tat-territorji, jew taż-żoni tagħhom, li minnhom hu permess id-dħul fl-Unjoni tal-ispeċijiet u l-kategoriji tal-annimali, tal-prodotti ġerminali u tal-prodotti li joriġinaw mill-annimali, li jaqgħu fil-kamp ta’ applikazzjoni tar-Regolament Delegat (UE) 2020/692. Dawk il-listi u ċerti regoli ġenerali li jikkonċernaw dawk il-listi huma stabbiliti fl-Annessi I sa XXII ta’ dak ir-Regolament ta’ Implimentazzjoni.

(4)

B’mod aktar partikolari, l-Annessi XIV u XV tar-Regolament ta’ Implimentazzjoni (UE) 2021/404 jistabbilixxu l-listi tal-pajjiżi terzi, territorji, jew żoni tagħhom awtorizzati għad-dħul fl-Unjoni, b’mod rispettiv, tal-konsenji tal-laħam frisk tal-pollam u tal-għasafar tal-kaċċa, u tal-prodotti tal-laħam tal-ungulati, tal-pollam u tal-għasafar tal-kaċċa.

(5)

Bħala segwitu tat-tifqigħa tal-influwenza avjarja b’patoġeniċità għolja (HPAI, highly pathogenic avian influenza) fil-pollam fil-provinċja ta’ Buenos Aires fl-Arġentina, li ġiet ikkonfermata fid-19 ta’ Awwissu 2025, ir-Regolament ta’ Implimentazzjoni tal-Kummissjoni (UE) 2025/1772 (4) emenda, inter alia, l-entrati għal dak il-pajjiż terz fit-tabella fit-Taqsima B tal-Parti 1 tal-Anness XIV tar-Regolament ta’ Implimentazzjoni (UE) 2021/404, billi ssospenda d-dħul tal-konsenji tal-laħam frisk tal-pollam u tal-għasafar tal-kaċċa fl-Unjoni. Ir-Regolament ta’ Implimentazzjoni (UE) 2025/1772 emenda wkoll l-entrati għall-Arġentina fit-tabella fit-Taqsima A tal-Parti 1 tal-Anness XV, billi żied ir-rekwiżit li l-konsenji tal-prodotti tal-laħam mill-pollam u mir-ratiti jridu jitħallew jidħlu fl-Unjoni biss jekk dawk il-prodotti tal-laħam ikunu għaddew minn trattament speċifiku għall-mitigazzjoni tar-riskju “D” f’konformità mal-Anness XXVI tar-Regolament Delegat (UE) 2020/692.

(6)

Fl-1 ta’ Ottubru 2025 u fit-22 ta’ Ottubru 2025, l-Arġentina ressqet informazzjoni aġġornata lill-Kummissjoni dwar is-sitwazzjoni epidemjoloġika fit-territorju tagħha b’rabta mat-tifqigħa tal-HPAI fil-pollam ikkonfermata fid-19 ta’ Awwissu 2025, u dwar il-miżuri li ħadet biex tipprevjeni aktar tixrid ta’ dik il-marda. B’mod partikolari, bħala segwitu ta’ dik it-tifqigħa tal-HPAI, l-Arġentina implimentat politika ta’ qerda biex tikkontrolla u tillimita t-tixrid ta’ dik il-marda, it-tindif u d-diżinfezzjoni wara l-implimentazzjoni tal-politika ta’ qerda fl-istabbilimenti affettwati, u programm ta’ sorveljanza li juri n-nuqqas ta’ infezzjoni fil-popolazzjonijiet f’riskju.

(7)

Il-Kummissjoni evalwat l-informazzjoni mressqa mill-Arġentina u kkonkludiet li pprovdiet garanziji xierqa li s-sitwazzjoni tas-saħħa tal-annimali li kienet wasslet għas-sospensjoni tad-dħul fl-Unjoni tal-konsenji tal-laħam frisk tal-pollam u tal-għasafar tal-kaċċa, kif stabbilit fit-tabella tat-Taqsima B tal-Part 1 tal-Anness XIV tar-Regolament ta’ Implimentazzjoni (UE) 2021/404, ma għadhiex toħloq theddida għas-saħħa tal-annimali jew għas-saħħa pubblika fl-Unjoni u li, għaldaqstant, jenħtieġ li jiġi awtorizzat mill-ġdid id-dħul fl-Unjoni ta’ dawk il-konsenji mill-Arġentina. Barra minn hekk, jenħtieġ li l-Arġentina terġa’ tiġi elenkata għad-dħul fl-Unjoni tal-konsenji tal-prodotti tal-laħam tal-pollam u tar-ratiti bi trattament mhux speċifiku assenjat “A” fil-kolonni 10 u 11 tat-tabella stabbilita fil-Parti 1, it-Taqsima A tal-Anness XV tar-Regolament ta’ Implimentazzjoni (UE) 2021/404.

(8)

Barra minn hekk, ir-Regolament ta’ Implimentazzjoni (UE) 2021/404 ġie emendat bir-Regolament ta’ Implimentazzjoni tal-Kummissjoni (UE) 2024/1170 (5) fir-rigward tal-Moldova, wara informazzjoni mressqa minn dak il-pajjiż terz lill-Kummissjoni dwar is-sitwazzjoni epidemjoloġika fit-territorju tiegħu fir-rigward tal-HPAI, u l-miżuri li ħadet biex tipprevjeni aktar tixrid ta’ dik il-marda. B’mod aktar partikolari, ir-Regolament ta’ Implimentazzjoni (UE) 2024/1170 emenda r-Regolament ta’ Implimentazzjoni (UE) 2021/404 billi żied, inter alia, iż-żona “MD-1” fil-Moldova fit-tabella stabbilita fit-Taqsima B tal-Parti 1 tal-Anness XIV tar-Regolament ta’ Implimentazzjoni (UE) 2021/404, sabiex jawtorizza dik iż-żona fil-Moldova għad-dħul fl-Unjoni tal-konsenji tal-laħam frisk tal-pollam. Dawk il-partijiet tat-territorju tal-Moldova, li mhumiex inklużi f’dik iż-żona MD-1, ma setgħux jiġu awtorizzati f’dak iż-żmien, peress li ma ssodisfawx il-kriterji stabbiliti fl-Artikolu 38(1), il-punt (b), tar-Regolament Delegat (UE) 2020/692 li jirrikjedi li ma tkun seħħet l-ebda tifqigħa tal-HPAI fil-pollam fit-12-il xahar preċedenti.

(9)

Barra minn hekk, wara talba mill-Moldova, ir-Regolament ta’ Implimentazzjoni (UE) 2021/404 ġie emendat bir-Regolament ta’ Implimentazzjoni tal-Kummissjoni (UE) 2024/3145 (6) sabiex, inter alia, iż-żona MD-1 fil-Moldova tiżdied fit-tabella stabbilita fit-Taqsima A tal-Parti 1 tal-Anness XV, kif awtorizzata għad-dħul fl-Unjoni tal-konsenji tal-prodotti tal-laħam mill-pollam li mhumiex meħtieġa jgħaddu minn trattament speċifiku għall-mitigazzjoni tar-riskju f’konformità mal-Anness XXVI tar-Regolament Delegat (UE) 2020/692.

(10)

Fit-3 ta’ Ottubru 2025, il-Moldova ressqet informazzjoni aġġornata lill-Kummissjoni dwar is-sitwazzjoni epidemjoloġika fit-territorju tagħha b’rabta mal-HPAI. B’mod partikolari, ingħatat informazzjoni dwar ir-riżultati tas-sorveljanza mwettqa fiż-żoni li mhumiex inklużi fiż-żona MD-1 fil-Moldova, li turi n-nuqqas ta’ tifqigħat tal-HPAI fil-pollam f’dawk iż-żoni għat-12-il xahar preċedenti.

(11)

Il-Kummissjoni evalwat l-informazzjoni mressqa mill-Moldova u kkonkludiet li pprovdiet garanziji xierqa li jissostanzjaw l-issodisfar minn dak il-pajjiż terz tal-kriterji stabbiliti fl-Artikolu 38(1), il-punt (b), tar-Regolament Delegat (UE) 2020/692 u li d-dħul fl-Unjoni tal-konsenji tal-laħam frisk tal-pollam miż-żoni li mhumiex inklużi fiż-żona MD-1 fil-Moldova ma jirrappreżentax theddida għas-saħħa tal-annimali jew għas-saħħa pubblika fl-Unjoni. Għalhekk, jenħtieġ li t-territorju kollu tal-Moldova issa jiġi elenkat fit-tabella fit-Taqsima B tal-Parti 1 tal-Anness XIV tar-Regolament ta’ Implimentazzjoni (UE) 2021/404. Barra minn hekk, jenħtieġ li t-territorju kollu tal-Moldova jiġi elenkat ukoll għad-dħul fl-Unjoni tal-konsenji tal-prodotti tal-laħam tal-pollam bi trattament mhux speċifiku assenjat “A” fil-kolonna 10 tat-tabella stabbilita fil-Parti 1, it-Taqsima A tal-Anness XV tar-Regolament ta’ Implimentazzjoni (UE) 2021/404.

(12)

Għalhekk jenħtieġ li l-Annessi XIV u XV tar-Regolament ta’ Implimentazzjoni (UE) 2021/404 jiġu emendati kif xieraq.

(13)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,