(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ tali awtorizzazzjoni.

(2)

F’konformità mal-Artikolu 7 tar-Regolament (KE) Nru 1831/2003, tressqet applikazzjoni għall-awtorizzazzjoni tal-L-arġinina prodotta b’Corynebacterium glutamicum KCCM 80393. Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(3)

L-applikazzjoni tikkonċerna l-awtorizzazzjoni tal-L-arġinina prodotta b’Corynebacterium glutamicum KCCM 80393 bħala addittiv tal-għalf għall-użu fl-għalf u fl-ilma tax-xorb għall-ispeċijiet kollha tal-annimali, bit-talba li dak l-addittiv jiġi kklassifikat fil-kategorija tal-addittivi “addittivi nutrittivi” u fil-grupp funzjonali “aċidi amminiċi, l-imlieħ u l-analogi tagħhom”.

(4)

Fl-opinjoni tagħha tat-18 ta’ Marzu 2025 (2), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-L-arġinina prodotta b’Corynebacterium glutamicum KCCM 80393 hija sikura għall-ispeċijiet fil-mira meta tiġi ssupplimentata f’ammonti xierqa għad-dieta skont il-ħtiġijiet nutrizzjonali tagħhom. Madankollu, minħabba r-riskju ta’ żbilanċi nutrizzjonali u raġunijiet iġeniċi, l-Awtorità għandha tħassib dwar l-użu tal-L-arġinina fl-ilma tax-xorb. L-Awtorità kkonkludiet li l-użu tal-L-arġinina prodotta b’Corynebacterium glutamicum KCCM 80393 fin-nutrizzjoni tal-annimali huwa sikur għall-konsumaturi u għall-ambjent. Fin-nuqqas ta’ data, ma setgħetx tikkonkludi dwar il-potenzjal tas-sustanza li tkun irritanti għall-ġilda u/jew għall-għajnejn, jew li tkun sensitizzatur dermali jew respiratorju. L-Awtorità kkonkludiet ukoll li s-sustanza titqies bħala sors effikaċi tal-aċidu amminiku L-arġinina għan-nutrizzjoni ta’ annimali mhux ruminanti. Biex is-supplimentazzjoni tal-L-arġinina tkun effikaċi fir-ruminanti daqskemm hi fl-ispeċijiet mhux ruminanti, teħtieġ il-protezzjoni mid-degradazzjoni fil-kirxa. L-Awtorità ma qisitx li hemm ħtieġa għal rekwiżiti speċifiċi ta’ monitoraġġ ta’ wara l-introduzzjoni fis-suq. Ivverifikat ukoll ir-rapport dwar il-metodu ta’ analiżi tal-addittiv tal-għalf fl-għalf, li tressaq mil-Laboratorju ta’ Referenza stabbilit bir-Regolament (KE) Nru 1831/2003.

(5)

Fid-dawl ta’ dan ta’ hawn fuq, il-Kummissjoni tqis li l-L-arġinina prodotta b’Corynebacterium glutamicum KCCM 80393 tissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, l-użu ta’ dik is-sustanza bħala addittiv tal-għalf jenħtieġ li jiġi awtorizzat. Il-Kummissjoni tqis li l-użu sikur ta’ dan l-aċidu amminiku fl-ilma tax-xorb, fir-rigward tar-riskji iġeniċi possibbli, għandu jitqies fl-ambitu tar-Regolament (KE) Nru 183/2005 li jistipula r-rekwiżiti għall-iġene tal-għalf (3). Meta tiġi mitmugħa lir-ruminanti, l-L-arġinina prodotta b’Corynebacterium glutamicum KCCM 80393 jenħtieġ li tiġi protetta mid-degradazzjoni fil-kirxa. Jixraq li l-utent jiġi mwissi biex iqis il-provvista djetetika bl-aċidi amminiċi essenzjali u kundizzjonalment essenzjali kollha, b’mod partikolari fil-każ tas-supplimentazzjoni bl-L-arġinina permezz tal-ilma tax-xorb. Barra minn hekk, il-Kummissjoni hija tal-fehma li jenħtieġ li jittieħdu miżuri protettivi xierqa biex jiġu evitati effetti avversi fuq saħħet l-utenti tal-addittiv.

(6)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,