(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali, kif ukoll ir-raġunijiet u l-proċeduri għall-għoti u għat-tiġdid ta’ tali awtorizzazzjoni.

(2)

L-aċidu propjoniku, il-propjonat tas-sodju u l-propjonat tal-ammonju ġew awtorizzati għal perjodu ta’ 10 snin bħala addittivi tal-għalf għar-ruminanti, il-ħnieżer u l-pollam bir-Regolament ta’ Implimentazzjoni tal-Kummissjoni (UE) Nru 1222/2013 (2) u għall-ispeċijiet kollha tal-annimali għajr ir-ruminanti, il-ħnieżer u l-pollam bir-Regolament ta’ Implimentazzjoni tal-Kummissjoni (UE) Nru 305/2014 (3).

(3)

F’konformità mal-Artikolu 14(1) tar-Regolament (KE) Nru 1831/2003, tressqu applikazzjonijiet għat-tiġdid tal-awtorizzazzjoni tal-aċidu propjoniku, tal-propjonat tas-sodju u tal-propjonat tal-ammonju bħala addittivi tal-għalf għall-ispeċijiet kollha tal-annimali, bit-talba li l-addittivi jiġu kklassifikati fil-kategorija tal-addittivi “addittivi teknoloġiċi” u fil-grupp funzjonali “addittivi tas-silaġġ”. Ma’ dawk l-applikazzjonijiet ntbagħtu d-dettalji u d-dokumenti meħtieġa skont l-Artikolu 14(2) ta’ dak ir-Regolament.

(4)

Fl-opinjonijiet tagħha tat-3 ta’ Lulju 2024 (4) u tas-17 ta’ Settembru 2024 (5), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-aċidu propjoniku, il-propjonat tas-sodju u l-propjonat tal-ammonju għadhom sikuri għall-ispeċijiet kollha tal-annimali terrestri, għall-konsumaturi u għall-ambjent fil-kundizzjonijiet awtorizzati. Fir-rigward tas-sikurezza tal-utenti, ikkonkludiet li l-aċidu propjoniku huwa korrużiv għall-ġilda filwaqt li l-propjonat tas-sodju u l-propjonat tal-ammonju huma korrużivi wkoll għall-għajnejn u għas-sistema respiratorja. Il-propjonat tas-sodju mhuwiex sensitizzatur tal-ġilda. Kwalunkwe esponiment tal-utenti għal dawn l-addittivi jitqies bħala riskju. L-Awtorità qieset li ma kienx hemm bżonn li tiġi vvalutata l-effikaċja tal-aċidu propjoniku, tal-propjonat tas-sodju u tal-propjonat tal-ammonju fil-kuntest tat-tiġdid tal-awtorizzazzjoni, peress li l-applikazzjonijiet għat-tiġdid tal-awtorizzazzjonijiet ma jinkludux proposti biex jiġu emendati jew issupplimentati l-kundizzjonijiet tal-awtorizzazzjonijiet oriġinali li jkollhom impatt fuq l-effikaċja tal-addittivi.

(5)

Permezz ta’ ittra tal-11 ta’ Settembru 2024, l-applikant irtira l-applikazzjoni għat-tiġdid tal-awtorizzazzjoni fir-rigward tal-użu tal-aċidu propjoniku, tal-propjonat tas-sodju u tal-propjonat tal-ammonju għall-annimali akkwatiċi.

(6)

Il-Laboratorju ta’ Referenza stabbilit bir-Regolament (KE) Nru 1831/2003 kien tal-fehma li l-konklużjonijiet u r-rakkomandazzjonijiet milħuqa fil-valutazzjonijiet preċedenti mwettqa fir-rigward tal-metodi tal-analiżi tal-aċidu propjoniku, tal-propjonat tas-sodju u tal-propjonat tal-ammonju bħala addittivi tal-għalf huma validi u applikabbli għall-applikazzjonijiet attwali. Dawk il-valutazzjonijiet preċedenti saru fil-kuntest ta’ evalwazzjoni ġdida tal-metodi tal-analiżi kkonċernati mwettqa mil-Laboratorju ta’ Referenza, li tissemma fl-opinjonijiet tal-Awtorità tat-3 ta’ Lulju 2024 u tas-17 ta’ Settembru 2024, sabiex jitqiesu l-iżviluppi xjentifiċi u teknoloġiċi u biex tiġi żgurata adegwatezza aħjar tal-metodi tal-analiżi għall-kontrolli uffiċjali.

(7)

Fid-dawl ta’ dan ta’ hawn fuq, il-Kummissjoni tqis li l-aċidu propjoniku, il-propjonat tas-sodju u l-propjonat tal-ammonju jissodisfaw il-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-awtorizzazzjoni ta’ dawn l-addittivi tiġġedded. Barra minn hekk, il-Kummissjoni hija tal-fehma li jenħtieġ li jittieħdu miżuri protettivi xierqa biex jiġu evitati effetti avversi fuq saħħet l-utenti tal-addittivi.

(8)

B’konsegwenza tat-tiġdid tal-awtorizzazzjoni tal-aċidu propjoniku, tal-propjonat tas-sodju u tal-propjonat tal-ammonju bħala addittivi tal-għalf, jenħtieġ li r-Regolamenti ta’ Implimentazzjoni (UE) Nru 1222/2013 u (UE) Nru 305/2014 jitħassru kif xieraq.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,