(1)

Skont l-Artikolu 15 tad-Direttiva 2009/125/KE, il-Kummissjoni għandha tistabbilixxi rekwiżiti tal-ekodisinn għall-prodotti relatati mal-enerġija li jirrappreżentaw volumi sinifikanti ta’ bejgħ u kummerċ fl-Unjoni u li għandhom impatt ambjentali sinifikanti u li jippreżentaw potenzjal sinifikanti għal titjib permezz tad-disinn f’termini tal-impatt ambjentali tagħhom, mingħajr ma jġibu magħhom kostijiet eċċessivi.

(2)

Il-Pjan ta’ Ħidma dwar l-Ekodisinn u t-Tikkettar tal-Enerġija 2022–2024 (2), li tfassal mill-Kummissjoni f’konformità mal-Artikolu 16(1) tad-Direttiva 2009/125/KE, jistabbilixxi l-prijoritajiet ta’ ħidma skont il-qafas tal-ekodisinn u tat-tikkettar tal-enerġija għas-snin mill-2022 sal-2024. Il-Provvisti tal-Elettriku Esterni (EPS, External Power Supplies) huma wieħed mill-gruppi ta’ prodotti prijoritizzati elenkati fil-Pjan ta’ Ħidma dwar l-Ekodisinn u t-Tikkettar tal-Enerġija 2022–2024.

(3)

Il-miżuri previsti mill-Pjan ta’ Ħidma dwar l-Ekodisinn u t-Tikkettar tal-Enerġija 2022–2024 għandhom il-potenzjal li jwasslu għal iffrankar fl-enerġija finali annwali ta’ aktar minn 170 TWh fl-2030. Dan huwa ekwivalenti għat-tnaqqis tal-emissjonijiet tal-gassijiet serra b’madwar 24 miljun tunnellata fis-sena fl-2030.

(4)

Ir-Regolament tal-Kummissjoni (UE) 2019/1782 (3) stabbilixxa rekwiżiti tal-ekodisinn għall-EPS. L-Artikolu 7 tiegħu jirrikjedi li l-Kummissjoni tirrevedi r-Regolament fid-dawl tal-progress teknoloġiku.

(5)

Skont l-Artikolu 79, il-punt 1(a)(i), tar-Regolament (UE) 2024/1781 tal-Parlament Ewropew u tal-Kunsill (4), ir-rieżami tar-Regolament (UE) 2019/1782 għandu jitlesta skont il-qafas tad-Direttiva 2009/125/KE.

(6)

Il-Kummissjoni wettqet rieżami u analizzat l-aspetti tekniċi, ambjentali u ekonomiċi tal-EPS. Ir-rieżami sar b’kooperazzjoni mill-qrib mal-partijiet ikkonċernati u mal-partijiet interessati mill-Unjoni u l-pajjiżi terzi. Ir-riżultati tar-rieżami ġew ippubblikati u ppreżentati lill-Forum Konsultattiv stabbilit f’konformità mal-Artikolu 18 tad-Direttiva 2009/125/KE.

(7)

Ir-rieżami jikkonferma li l-EPS huma mistennija li jkomplu jinbiegħu f’numri kbar. L-aspetti ambjentali tal-EPS identifikati bħala sinifikanti għall-finijiet tal-Artikolu 15 tad-Direttiva 2009/125/KE, huma l-konsum tal-enerġija matul il-fażi tal-użu, il-ġenerazzjoni tal-iskart fi tmiem il-ħajja, u l-emissjonijiet fl-arja matul il-fażijiet tal-produzzjoni u tal-użu.

(8)

Il-konsum annwali tal-enerġija gross mill-EPS soġġett għar-Regolament (UE) 2019/1782 kien stmat għal 69 PJ/sena fl-2020. F’xenarju ta’ żamma tal-istatus quo, dak il-konsum huwa mistenni li jiżdied għal 75 PJ/sena fl-2030 u 84 PJ/sena fl-2040 bħala riżultat ta’ żieda fl-għadd ta’ EPS.

(9)

Il-pjan ta’ azzjoni tal-Unjoni għal ekonomija ċirkolari (5) u l-Pjan ta’ Ħidma dwar l-Ekodisinn u t-Tikkettar tal-Enerġija 2022–2024 jenfasizzaw l-importanza li jintuża l-qafas tal-ekodisinn biex tiġi appoġġjata l-bidla lejn ekonomija aktar effiċjenti fir-riżorsi u ċirkolari. Huwa stmat li l-ħajja tas-servizz tal-EPS hija limitata mill-ħajja iqsar tal-prodotti ta’ użu finali li jħaddmu. Għalhekk, jenħtieġ li dan ir-Regolament jistabbilixxi rekwiżiti xierqa li jikkontribwixxu għall-kisba tal-objettivi tal-ekonomija ċirkolari, b’mod partikolari li jagħmlu kemm jista’ jkun EPS, użati ma’ prodott tal-konsumatur separat wieħed jew aktar, interoperabbli.

(10)

Ir-rieżami msemmi fil-premessa 5 jindika li hemm medda ta’ madwar ħames punti perċentwali fl-effiċjenza tal-modalità attiva tal-EPS. Hemm ukoll medda ta’ effiċjenza b’tagħbija ta’ 10 %. Dawk il-meded ifissru li l-limitu minimu għall-effiċjenza enerġetika jista’ jiżdied u li tista’ tiġi introdotta effiċjenza minima b’tagħbija ta’ 10 %, filwaqt li titqies l-ispiża taċ-ċiklu tal-ħajja. Jekk ir-rekwiżiti eżistenti tal-ekodisinn jiġu aġġornati biex l-EPS bi prestazzjoni baxxa fl-effiċjenza enerġetika jitneħħew mis-suq, l-iffrankar tal-elettriku ta’ madwar 0,7 TWh/sena jista’ potenzjalment jinkiseb sal-2035.

(11)

Huwa xieraq li fil-kamp ta’ applikazzjoni ta’ dan ir-Regolament jiġu inklużi ċarġers mingħajr fili, pads tal-iċċarġjar mingħajr fili u ċarġers tal-batteriji għall-batteriji portabbli ta’ użu ġenerali kif definit fir-Regolament (UE) 2023/1542 tal-Parlament Ewropew u tal-Kunsill (6), sabiex il-komponent tal-provvista tal-elettriku tagħhom normalment jiġi esternalizzat u għalhekk ikun kopert mir-rekwiżiti tal-effiċjenza u tal-interoperabbiltà. Iċ-ċarġers mingħajr fili u l-pads tal-iċċarġjar mingħajr fili jenħtieġ li jkunu soġġetti wkoll għal limiti ta’ konsum fil-modalità standby. Barra minn hekk, il-kejbils USB tat-Tip C jenħtieġ li jkunu soġġetti għal rekwiżiti tal-ekodisinn biex jiġi żgurat li t-telf tal-enerġija tagħhom jibqa’ fil-limiti stabbiliti mill-istandards rilevanti tal-USB u li jkunu mmarkati fuq il-konnetturi tagħhom biex jinfurmaw lill-konsumaturi dwar il-potenza massima appoġġjata.

(12)

Jenħtieġ li d-definizzjoni tal-EPS ma tibqax ristretta għal dawk l-apparati b’potenza tal-output ta’ inqas minn 250 W li jintużaw b’subsett limitat ta’ prodotti tad-dar u tal-uffiċċju. Minflok, jenħtieġ li tkun allinjata mal-istandards u r-regolamenti internazzjonali, filwaqt li twessa’ l-kamp ta’ applikazzjoni tar-Regolament pereżempju fir-rigward tal-EPS li jħaddmu firxa usa’ ta’ prodotti domestiċi u tal-uffiċċju, inklużi dawk b’potenza ogħla. Jenħtieġ li tiċċara wkoll li l-EPS mibjugħa bħala prodotti awtonomi huma soġġetti għar-rekwiżiti tal-ekodisinn.

(13)

Id-Direttiva 2014/53/UE tal-Parlament Ewropew u tal-Kunsill (7) tirrikjedi l-USB tat-Tip C bħala r-reċipjent komuni tal-iċċarġjar għal kategoriji speċifiċi ta’ tagħmir tar-radju inklużi smartphones, tablets jew laptops. Dan iddetermina li l-EPS li jħaddmu dawn il-prodotti “de facto” jsiru EPS tal-USB tat-Tip C. Huwa xieraq li jiġi stabbilit rekwiżit dirett u espliċitu li jirfed din ir-relazzjoni, u wkoll li dan ir-rekwiżit jiġi estiż għall-EPS li tħaddem firxa usa’ ta’ prodotti, lil hinn minn dawk koperti mid-Direttiva 2014/53/UE sabiex tiġi massimizzata l-interoperabbiltà.

(14)

L-informazzjoni dwar l-ispeċifikazzjonijiet rilevanti tal-interoperabbiltà jenħtieġ li tiġi pprovduta permezz ta’ logo ta’ “Ċarġer Komuni”. Dan jenħtieġ li jitwaħħal mal-EPS korrispondenti biex jinforma lill-konsumaturi li huma interoperabbli u li l-istess EPS jistgħu jintużaw għal għadd ta’ apparati differenti jew ġenerazzjonijiet differenti tal-istess apparat. Dan inaqqas in-numru ta’ EPS meħtieġa u jiffaċilita s-sostituzzjoni tagħhom, u b’hekk itejjeb l-aspetti ambjentali tal-prodott. Jenħtieġ li l-logo “Ċarġer Komuni” fuq l-EPS jikkomplementa t-tikketta meħtieġa għall-prodotti motorizzati skont id-Direttiva 2014/53/UE li tipprovdi lill-utent finali bl-informazzjoni meħtieġa biex jagħżel EPS xierqa.

(15)

Jenħtieġ li l-EPS interoperabbli jiġu mmarkati wkoll fil-portijiet tal-output tagħhom b’indikazzjoni tal-potenza massima appoġġjata u jenħtieġ li ma jiġux mgħammra b’kejbils tat-Tip C mqabbda b’mod permanenti biex jiġi evitat ir-rimi prematur tal-EPS minħabba ħsara fil-kejbils.

(16)

L-EPS użati għal applikazzjonijiet tat-telekomunikazzjoni, bħal routers mingħajr fili, normalment ikunu ddisinjati biex ikollhom livell għoli ta’ protezzjoni mis-surges li tippermettilhom jiffunzjonaw anki wara, pereżempju, avveniment ta’ sajjetti. L-EPS interoperabbli jenħtieġ li jkunu mgħammra b’tali protezzjoni biex ikunu jistgħu jintużaw ma’ dawk l-applikazzjonijiet u biex b’mod ġenerali jkun hemm reżistenza mtejba għall-avvenimenti ta’ surges.

(17)

Jenħtieġ li ċerti EPS jiġu esklużi mill-aspetti tal-interoperabbiltà ta’ dan ir-Regolament – b’mod partikolari għal raġunijiet ta’ sikurezza – fejn jeżistu rekwiżiti speċifiċi bbażati fuq leġiżlazzjoni settorjali (pereżempju għall-EPS użati f’kundizzjonijiet imxarrba, l-EPS għal prodotti koperti minn rekwiżiti speċifiċi oħra bħall-ġugarelli, u l-EPS soġġetti għal kundizzjonijiet ta’ tħaddim speċifiċi bħal livelli għoljin ta’ skariki elettrostatiċi). Barra minn hekk, l-EPS għal prodotti installati b’mod permanenti f’postijiet ta’ bini fiss, bħal pereżempju roller blinds elettriċi, punti ta’ aċċess għall-Internet mingħajr fili fuq ħitan jew soqfa, jew pannelli ta’ kontroll immuntati mal-ħajt, jenħtieġ li jkunu eżentati wkoll mir-rekwiżiti tal-interoperabbiltà minħabba restrizzjonijiet possibbli fir-rigward tal-installazzjoni tal-kejbils tal-provvista tal-elettriku tagħhom.

(18)

Prodotti li huma funzjonalment integrati u ddisinjati biex jintużaw biss ma’ mezzi ta’ trasport għal persuni jew oġġetti huma esklużi mill-kamp ta’ applikazzjoni tal-leġiżlazzjoni qafas dwar l-ekodisinn. Għalhekk, huwa rilevanti li jissemma b’mod espliċitu li r-rekwiżiti tal-ekodisinn stabbiliti skont dan ir-Regolament jenħtieġ li ma japplikawx għall-EPS imfassla biex jintużaw biss ma’ mezzi tat-trasport għall-persuni jew għall-oġġetti. Madankollu, meta jiġi rieżaminat dan ir-Regolament skont il-qafas tar-Regolament (UE) 2024/1781, jenħtieġ li tiġi vvalutata l-adegwatezza li jiġu stabbiliti rekwiżiti wkoll għall-EPS użati ma’ mezzi tat-trasport ħfief bħar-roti elettriċi u l-iscooters elettriċi.

(19)

Jenħtieġ li l-parametri rilevanti tal-prodotti jitkejlu b’metodi affidabbli, preċiżi u riproduċibbli. Jenħtieġ li dawn il-metodi jiġu aġġornati, filwaqt li jitqiesu l-metodi ta’ kejl rikonoxxuti tal-ogħa livell, inkluż, fejn disponibbli, standards armonizzati adottati mill-organizzazzjonijiet Ewropej tal-istandardizzazzjoni elenkati fl-Anness I tar-Regolament (UE) Nru 1025/2012 tal-Parlament Ewropew u tal-Kunsill (8).

(20)

L-EPS huma soġġetti għal kumplessità dejjem akbar, b’mod partikolari fir-rigward ta’ apparati adattivi b’vultaġġi multipli disponibbli fl-istess port, u apparati b’portijiet multipli bħal dawn. Jenħtieġ li l-proċeduri tal-ittestjar jiġu aġġornati kif xieraq u allinjati mal-metodi internazzjonali tal-ogħla livell, b’mod partikolari u sa fejn ikun fattibbli mal-proċedura tat-test tad-Dipartiment tal-Enerġija tal-Istati Uniti tal-Amerika, stabbilita fl-Appendiċi Z tas-Subparti B tal-Parti 430 tat-Titolu 10, il-Kapitolu II, is-Subkapitolu D tal-Kodiċi tar-Regolamenti Federali, 87 FR 51221, fil-verżjoni tagħha applikabbli fid-19 ta’ Awwissu 2022. Għalhekk, jenħtieġ li din il-proċedura tat-test tiġi inkluża f’dan ir-Regolament bħala metodu ta’ ttestjar tranżizzjonali li għandu jintuża sakemm isiru disponibbli l-istandards armonizzati korrispondenti.

(21)

L-EPS tal-USB tat-Tip C huma interoperabbli u jistgħu jintużaw ma’ kejbils USB bi proprjetajiet differenti li jaffettwaw l-effiċjenza enerġetika globali tagħhom sa punt li jvarja. Għalhekk huwa importanti li jiġu żgurati kundizzjonijiet ekwi għal dawn l-EPS billi jitqies kejbil tat-test standardizzat u użat b’mod komuni b’parametri fissi. L-applikazzjoni ta’ fattur ta’ korrezzjoni għar-riżultati tal-ittestjar imwettaq mingħajr kejbil telimina l-ħtieġa għal kejbil fiżiku tal-USB bħal dan fit-test u tnaqqas l-inċertezza tal-kejl.

(22)

Sabiex tiġi pprovduta informazzjoni affidabbli dwar l-utent u ma jiġix affettwat it-tħaddim tal-prodott motorizzat tal-konsumatur, jenħtieġ li EPS fil-modalità attiva tkun tista’ tipprovdi kontinwament il-kurrent tal-output tan-nameplate speċifikat mingħajr waqgħa sinifikanti fil-vultaġġ tal-output tan-nameplate korrispondenti.

(23)

Ċerti EPS indikati bħala “provvisti tal-elettriku dinamiċi” jistgħu jkunu ddisinjati sabiex ikunu jistgħu jipprovdu potenza massima biss għal perjodu ta’ żmien qasir fl-ordni ta’ diversi minuti, segwit minn potenza kontinwa iktar baxxa, indikata wkoll bħala potenza garantita. Jenħtieġ li tali EPS tiġi ttestjata f’kundizzjonijiet ibbażati biss fuq il-potenza garantita u jenħtieġ li r-rekwiżiti ta’ informazzjoni jirreferu għall-potenza garantita, b’mod partikolari peress li l-EPS tista’ tintuża wkoll kontinwament.

(24)

Jenħtieġ li r-rekwiżiti tal-interoperabbiltà jqisu l-konvenzjonijiet industrijali stabbiliti u t-terminoloġija użata fil-familji ta’ standards li ġejjin: Speċifikazzjoni tal-USB-PD, Speċifikazzjoni tal-Kejbil u tal-Konnettur tal-USB, Rakkomandazzjonijiet ITU-T K.21 u K.44, EN IEC 55035, IEC 60335-1, IEC 61140 u EN 50160.

(25)

F’konformità mal-Artikolu 8(2) tad-Direttiva 2009/125/KE, jenħtieġ li dan ir-Regolament jispeċifika l-proċeduri applikabbli għall-valutazzjoni tal-konformità.

(26)

Biex jiġu ffaċilitati l-kontrolli tal-konformità, jenħtieġ li l-manifatturi, l-importaturi jew ir-rappreżentanti awtorizzati jipprovdu informazzjoni fid-dokumentazzjoni teknika msemmija fl-Annessi IV u V tad-Direttiva 2009/125/KE sa fejn dik l-informazzjoni tkun relatata mar-rekwiżiti stabbiliti f’dan ir-Regolament.

(27)

F’konformità mal-Parti 3, il-punt 2, tal-Anness I tad-Direttiva 2009/125/KE, jenħtieġ li jiġu identifikati parametri referenzjarji indikattivi għall-aħjar teknoloġiji disponibbli sabiex l-informazzjoni dwar il-prestazzjoni ambjentali taċ-ċiklu tal-ħajja tal-prodotti soġġetti għal dan ir-Regolament tkun disponibbli b’mod wiesa’ u aċċessibbli faċilment.

(28)

Jenħtieġ li dan ir-Regolament jiġi rieżaminat sabiex jiġu vvalutati l-adegwatezza u l-effettività tad-dispożizzjonijiet tiegħu għall-ilħuq tal-għanijiet tiegħu. Jenħtieġ li t-twaqqit tar-rieżami jkun biżżejjed biex jippermetti li d-dispożizzjonijiet kollha jiġu implimentati u jipproduċu effett fuq is-suq filwaqt li titqies l-evoluzzjoni tat-teknoloġija rilevanti.

(29)

Jenħtieġ li r-Regolament (UE) 2019/1782 jitħassar b’effett mill-14 ta’ Diċembru 2028, bl-eċċezzjoni tal-Annessi I, II u III tiegħu li jenħtieġ li jibqgħu japplikaw għal ħames snin wara d-data tal-applikazzjoni ta’ dan ir-Regolament. Dan jippermetti temporanjament l-introduzzjoni fis-suq ta’ spare part EPS li tippermetti li l-apparat motorizzat introdott fis-suq qabel id-dħul fis-seħħ ta’ dan ir-Regolament ikompli jintuża. F’dan il-każ, jenħtieġ li l-ispare part EPS tikkonforma mar-rekwiżiti tal-ekodisinn applikabbli fiż-żmien tal-introduzzjoni fis-suq tal-EPS oriġinali. Barra minn hekk, għal raġunijiet ta’ novità teknoloġika, l-introduzzjoni fis-suq ta’ USB-PD EPS b’medda tal-potenza estiża ogħla minn 100 W, li tikkonforma mar-rekwiżiti tal-effiċjenza enerġetika tar-Regolament (UE) 2019/1782 minflok mar-rekwiżiti tal-effiċjenza enerġetika ta’ dan ir-Regolament, jenħtieġ li jkun possibbli wkoll għal perjodu ta’ sentejn wara d-data tal-applikazzjoni ta’ dan ir-Regolament.

(30)

Sabiex tiġi ffaċilitata implimentazzjoni aktar bikrija tal-miżuri ta’ dan ir-Regolament u jitnaqqas il-piż amministrattiv tal-adottant prekoċi, EPS konformi mar-rekwiżiti ta’ dan ir-Regolament u introdotti fis-suq wara d-data tal-applikazzjoni tiegħu u qabel id-dħul fis-seħħ tiegħu jenħtieġ li awtomatikament jitqiesu konformi mar-Regolament (UE) 2019/1782.

(31)

Il-miżuri pprovduti f’dan ir-Regolament huma f’konformità mal-opinjoni tal-Kumitat stabbilit skont l-Artikolu 19(1) tad-Direttiva 2009/125/KE,

(1)

“provvista tal-elettriku esterna” (EPS, external power supply) tfisser prodott li la huwa ċarġer tal-batterija u lanqas ċarġer mingħajr fili u li jissodisfa l-kriterji kollha li ġejjin:

(2)

“batterija” tfisser batterija kif definita fl-Artikolu 3(1), il-punt (1), tar-Regolament (UE) 2023/1542;

(3)

“ċarġer tal-batterija” tfisser prodott tal-konsumatur li jintuża primarjament biex jiċċarġja l-batteriji ta’ prodotti tal-konsumatur, u li fih ċirkwiterija ddedikata biex tirregola l-kurrent u l-vultaġġ tal-iċċarġjar;

(4)

“batterija portabbli ta’ użu ġenerali” tfisser tip ta’ batterija kif definit fl-Artikolu 3(1), il-punt (10) tar-Regolament (UE) 2023/1542;

(5)

“ċarġer mingħajr fili” tfisser prodott tal-konsumatur li jissodisfa l-kriterji kollha li ġejjin:

(6)

“pad tal-iċċarġjar mingħajr fili” tfisser prodott tal-konsumatur li jissodisfa l-kriterji stabbiliti taħt l-ittri (a), (c), (d) u (e) tal-punt (5) u li ma fihx provvista tal-elettriku integrata fl-istess unità;

(7)

“Kejbil tal-USB tat-Tip C” tfisser assemblaġġ ta’ kejbil bi plaggs u sovraforom tal-USB tat-Tip C fiż-żewġ truf, b’potenza nominali ta’ 60 W jew 240 W, li tissodisfa r-rekwiżiti stabbiliti fil-“Universal Serial Bus Type-C® Cable and Connector Specification, Ħarġa 2.4, Ottubru 2024”, maħruġa mill-USB 3.0 Promoter Group u l-Universal Serial Bus Implementers Forum (USB-IF);

(8)

“Plagg tal-USB tat-Tip C” tfisser plagg li jissodisfa r-rekwiżiti stabbiliti fil-“Universal Serial Bus Type-C ® Cable and Connector Specification, Ħarġa 2.4, Ottubru 2024”, maħruġa mill-USB 3.0 Promoter Group u l-USB-IF;

(9)

“tagħmir ta’ kontroll separat għal sorsi tad-dawl bi fluss luminuż baxx” tfisser tagħmir ta’ kontroll separat kif definit fl-Artikolu 2, l-ewwel paragrafu, il-punt (3) tar-Regolament (UE) 2019/2020 li s-sors tad-dawl tiegħu ma jissodisfax ir-rekwiżit stabbilit fil-punt (1)(c) tal-istess paragrafu, u minflok ikollu fluss luminuż ta’ inqas minn 60 lumen;

(10)

“mejns” tfisser il-provvista tal-elettriku standard tal-UE kif speċifikat fl-istandard EN 50160: 2022 “Karatteristiċi tal-vultaġġ tal-elettriku fornut minn networks pubbliċi tal-elettriku”;

(11)

“output” tfisser żbokk fiżiku tal-EPS li permezz tiegħu tiġi pprovduta l-potenza elettrika jew id-data lit-tagħbija konnessa miegħu;

(12)

“output tal-potenza” tfisser kwalunkwe output tal-EPS li miegħu tista’ tiġi konnessa tagħbija u li minnu tista’ tinġibed il-potenza, għall-kuntrarju tal-konnessjonijiet tas-sinjali użati għall-komunikazzjoni permezz ta’ output tad-data;

(13)

“prodott tal-konsumatur” tfisser prodott li jopera jew li huwa ddisinjat biex jopera b’enerġija elettrika, u li jitqiegħed fis-suq, inkluż fil-kuntest tal-forniment ta’ servizz, li huwa maħsub tal-konsumaturi jew li x’aktarx, f’kundizzjonijiet raġonevolment prevedibbli, jintuża mill-konsumaturi anke jekk ma jkunx maħsub għalihom;

(14)

“kejbil imqabbad b’mod permanenti” tfisser kejbil imwaħħal direttament ma’ prodott mingħajr konnettur intermedju b’tali mod li ma jkunx iddisinjat jew maħsub biex jinqala’ mill-utenti finali;

(15)

“vultaġġ tal-output tan-nameplate” tfisser kwalunkwe vultaġġ tal-output tal-EPS kif ipprovdut fuq in-nameplate tal-EPS skont il-punt 5(a) tal-Anness II ta’ dan ir-Regolament, jew muri fit-Tabella 7, “Informazzjoni dwar il-prodott”, skont il-punt 5(g) tal-istess Anness;

(16)

“modalità attiva” tfisser kundizzjoni li fiha l-input ta’ EPS ikun imqabbad mas-sors tal-potenza elettrika mill-mejns u l-output tal-potenza jkun imqabbad ma’ tagħbija primarja li tkun qed titħaddem;

(17)

“port” tfisser interfaċċa fiżika, elettrika u diġitali tal-EPS għall-provvista tal-potenza elettrika kif ukoll għall-iskambju tad-data u tas-sinjali ta’ kontroll permezz ta’ reċipjent, u li għandha output tal-potenza wieħed korrispondenti;

(18)

“potenza tal-output tan-nameplate” (Pout) tfisser kwalunkwe potenza tal-output tal-EPS kif ipprovduta fuq in-nameplate tal-EPS skont il-punt 5(a) tal-Anness II ta’ dan ir-Regolament, jew murija fit-Tabella 7, “Informazzjoni dwar il-prodott”, skont il-punt 5(g) tal-istess Anness;

(19)

“EPS ta’ vultaġġ baxx” tfisser EPS b’vultaġġ tal-output tan-nameplate ta’ inqas minn 6 V u kurrent tal-output tan-nameplate ta’ 550 mA jew akbar;

(20)

“identifikatur tal-mudell” tfisser il-kodiċi, ġeneralment alfanumeriku, li jiddistingwi mudell speċifiku ta’ prodott minn mudelli oħrajn bl-istess trademark jew bl-istess isem tal-manifattur, tal-importatur jew tar-rappreżentant awtorizzat;

(21)

“EPS adattiva” tfisser EPS AC-DC li tista’ tbiddel il-vultaġġ tal-output f’wieħed mill-portijiet tagħha, indikat bħala “port adattiv”, matul il-modalità attiva abbażi ta’ protokoll ta’ komunikazzjoni diġitali stabbilit bl-applikazzjoni tal-użu finali mingħajr ebda azzjoni skattata mill-utent;

(22)

“kurrent tal-output tan-nameplate” tfisser kwalunkwe kurrent tal-output tal-EPS kif muri fit-Tabella 7, “Informazzjoni dwar il-prodott” skont il-punt 5(g) tal-Anness II ta’ dan ir-Regolament;

(23)

“effiċjenza tal-modalità attiva” tfisser il-proporzjon tal-potenza fornuta minn EPS fil-modalità attiva għall-potenza tal-input meħtieġa mill-EPS;

(24)

“reċipjent” tfisser komponent tal-EPS b’fetħa fuq in-naħa ta’ barra li tippermetti li jiddaħħal plagg fih u li jipprovdi konnessjoni elettromekkanika bejn il-plagg u l-EPS;

(25)

“potenza tal-output massima totali” tfisser il-potenza massima li tista’ tiġi fornuta minn kwalunkwe kombinazzjoni jew subsett tal-output tal-potenza ta’ EPS imħaddma simultanjament;

(26)

“Port tat-twassil tal-potenza bil-USB (USB-PD)” tfisser port tal-EPS adattiv li jissodisfa r-rekwiżiti stabbiliti fil-“Universal Serial Bus Power Specification, Reviżjoni 3.2, Verżjoni 1.1, 2024-10” u fil-“Universal Serial Bus Type-C® Cable and Connector Specification, Ħarġa 2.4, Ottubru 2024” maħruġa mill-USB 3.0 Promoter Group u l-USB-IF;

(27)

“EPS ta’ vultaġġ uniku” tfisser EPS li kapaċi tikkonverti l-potenza AC biss għal vultaġġ tal-output wieħed wieħed u li jiġi fornut permezz ta’ output tal-potenza wieħed jew aktar;

(28)

“valuri ddikjarati” tfisser il-valuri pprovduti mill-manifattur, mill-importatur jew mir-rappreżentant awtorizzat għall-parametri tekniċi dikjarati, kalkolati jew imkejla f’konformità mal-Artikolu 4, għall-verifika tal-konformità mill-awtoritajiet tal-Istati Membri;

(29)

“Logo taċ-Ċarġer Komuni” tfisser logo li jissodisfa r-rekwiżiti stabbiliti fl-Anness III ta’ dan ir-Regolament;

(30)

“spare part EPS” tfisser EPS li mhijiex EPS interoperabbli u li hija maħsuba biss biex tissostitwixxi EPS introdotta fis-suq qabel l-14 ta’ Diċembru 2028.

(a)

il-kamp ta’ applikazzjoni tar-Regolament u b’mod partikolari l-kamp ta’ applikazzjoni tar-rekwiżiti tal-interoperabbiltà;

(b)

ir-rekwiżiti tal-interoperabbiltà fid-dawl tal-evoluzzjoni tal-provvisti tal-elettriiku adattivi;

(c)

l-użu u l-effettività tal-logo taċ-Ċarġer Komuni;

(d)

il-valuri ta’ limitu tar-rekwiżiti tal-effiċjenza enerġetika;

(e)

it-tolleranzi permessi għall-issettjar tal-kurrenti tat-tagħbija;

(f)

l-adegwatezza tar-rekwiżiti tal-effiċjenza addizzjonali li jqisu l-korrezzjoni tal-fattur tal-potenza;

(g)

L-adegwatezza tal-istabbiliment ta’ bażi tad-data tal-EPS b’informazzjoni teknika;

(h)

l-adegwatezza tar-rekwiżiti tal-effiċjenza enerġetika tal-modalità attiva għaċ-ċarġers mingħajr fili u għall-pads tal-iċċarġjar mingħajr fili;

(i)

jekk l-akkoppjament tal-parts huwiex element ta’ tħassib għall-EPS, iċ-ċarġers mingħajr fili jew il-pads tal-iċċarġjar mingħajr fili;

(j)

l-adegwatezza tar-rekwiżiti tal-effiċjenza fir-riżorsi bħal pereżempju l-possibbiltà ta’ tiswija, żmantellar jew riċiklabbiltà;

(k)

l-adegwatezza tar-rekwiżiti ta’ informazzjoni addizzjonali dwar il-materja prima kritika;

(l)

l-adegwatezza tar-rekwiżiti ta’ durabbiltà u affidabbiltà, pereżempju meta wieħed iqis it-tul tal-ħajja u l-ħin medju bejn falliment u ieħor.