(1)

Ir-Regolament ta’ Implimentazzjoni tal-Kummissjoni (UE) 2020/1988 (2) jistabbilixxi r-regoli għall-amministrazzjoni ta’ kwoti tariffarji tal-importazzjoni msejsa fuq l-ordni kronoloġika tad-dati ta’ aċċettazzjoni tad-dikjarazzjonijiet doganali (il-prinċipju “min jiġi l-ewwel, jinqeda l-ewwel”).

(2)

Il-Ftehim ta’ Assoċjazzjoni bejn l-Unjoni Ewropeau l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Moldova, min-naħa l-oħra (3) (il-“Ftehim ta’ Assoċjazzjoni”) jistabbilixxi, skont iż-Żona ta’ Kummerċ Ħieles Approfondita u Komprensiva (“DCFTA”, Deep and Comprehensive Free Trade Area), ċerti kwoti tariffarji għall-prodotti tal-Moldova importati fl-Unjoni. Ir-Regolament (UE) 2024/1501 tal-Parlament Ewropew u tal-Kunsill (4) stabbilixxa miżuri temporanji ta’ liberalizzazzjoni tal-kummerċ li jissupplimentaw il-konċessjonijiet kummerċjali għall-prodotti tal-Moldova. Dan ir-Regolament issospenda l-kwoti tariffarji kollha stabbiliti skont il-Ftehim ta’ Assoċjazzjoni sal-24 ta’ Lulju 2025. Wara din id-data, il-kummerċ bejn l-Unjoni u l-Moldova reġa’ lura għar-regoli tariffarji stabbiliti skont il-Ftehim ta’ Assoċjazzjoni.

(3)

Id-Deċiżjoni Nru 1/2025 tal-Kumitat ta’ Assoċjazzjoni UE-Moldova fil-Konfigurazzjoni tal-Kummerċ tad-19 ta’ Settembru 2025 dwar it-tnaqqis u l-eliminazzjoni tad-dazji doganali skont l-Artikolu 147(4) tal-Ftehim ta’ Assoċjazzjoni (id-“Deċiżjoni”) (5) temenda l-Ftehim ta’ Assoċjazzjoni billi timmodifika diversi kwoti tariffarji li jaqgħu fil-kamp ta’ applikazzjoni tad-DCFTA. B’mod partikolari, din id-Deċiżjoni żżid il-kwantitajiet ta’ prodotti li joriġinaw fil-Moldova li għandhom jiġu importati fl-UE skont ċerti kwoti tariffarji. Hija tilliberalizza wkoll l-importazzjonijiet ta’ diversi prodotti mill-Moldova, li jirriżulta fit-tneħħija ta’ ċerti kwoti tariffarji.

(4)

Il-modifiki introdotti bid-Deċiżjoni huma relatati mal-kwoti tariffarji stabbiliti fir-Regolament ta’ Implimentazzjoni (UE) 2020/1988. Għalhekk, jenħtieġ li dawn il-modifiki jiġu riflessi fl-Anness I tar-Regolament ta’ Implimentazzjoni (UE) 2020/1988.

(5)

Għaldaqstant, jenħtieġ li r-Regolament ta’ Implimentazzjoni (UE) 2020/1988 jiġi emendat kif xieraq.

(6)

Jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu sabiex jiġu implimentati fil-ħin il-modifiki introdotti bid-Deċiżjoni.

(7)

Sabiex tiġi żgurata l-konformità mal-Ftehim ta’ Assoċjazzjoni kif emendat bid-Deċiżjoni, dan ir-Regolament jenħtieġ li japplika mill-istess data bħal dik tad-Deċiżjoni.

(8)

Billi ċerti emendi magħmula b’dan ir-Regolament japplikaw għall-perjodi tal-kwota tariffarja li jkunu għaddejjin fid-data tal-applikazzjoni ta’ dan ir-Regolament, b’mod partikolari għall-prodotti maħsuda u disponibbli għall-esportazzjoni l-aktar lejn tmiem is-sajf u fil-ħarifa, huwa xieraq li jiġu stabbiliti dispożizzjonijiet tranżizzjonali dwar il-kwantitajiet allokati bejn il-25 ta’ Lulju 2025 u d-data tal-applikazzjoni ta’ dan ir-Regolament.

(9)

Il-miżuri previsti f’dan ir-Regolament huma f’konformita mal-opinjoni tal-Kumitat għall-Organizzazzjoni Komuni tas-Swieq Agrikoli,