(1)

Ir-Regolament (UE) 2019/876 tal-Parlament Ewropew u tal-Kunsill (4) introduċa fir-Regolament (UE) Nru 575/2013 tal-Parlament Ewropew u tal-Kunsill (5) ir-rekwiżit tal-proporzjon ta’ finanzjament stabbli nett (NSFR) għall-istituzzjonijiet ta’ kreditu. Dak ir-rekwiżit irrifletta parti mill-istandards ta’ Basel III miftiehma mill-Kumitat ta’ Basel dwar is-Superviżjoni Bankarja (BCBS), li ġew żviluppati biex jiġi żgurat li l-istituzzjonijiet ta’ kreditu jkollhom finanzjament stabbli suffiċjenti fuq perjodu ta’ sena, u b’hekk tiġi evitata diskrepanza eċċessiva fil-maturità bejn l-assi u l-obbligazzjonijiet u dipendenza żejda fuq finanzjament bl-ingrossa fuq terminu qasir. Ir-rekwiżit tal-NSFR ilu applikabbli mit-28 ta’ Ġunju 2021.

(2)

L-Artikolu 428r(1), il-punt (g), l-Artikolu 428s(1), il-punt (b), u l-Artikolu 428v, il-punt (a), tar-Regolament (UE) Nru 575/2013 bħalissa jipprevedu l-fatturi ta’ finanzjament stabbli għall-flejjes dovuti minn tranżazzjonijiet ta’ finanzjament ma’ klijenti finanzjarji, meta dawk it-tranżazzjonijiet ikollhom maturità residwa ta’ inqas minn sitt xhur. Dawk il-fatturi ta’ finanzjament huma, skont it-tranżazzjoni ta’ finanzjament ikkonċernata, 0 %, 5 % jew 10 %. Madankollu, l-Artikolu 510(8) tar-Regolament (UE) Nru 575/2013 jipprevedi li, sat-28 ta’ Ġunju 2025, dawk il-fatturi ta’ finanzjament għandhom jiżdiedu għal 10 %, 15 % u 15 %, rispettivament. Dik iż-żieda differita kellhal-għan li tagħti lill-istituzzjonijiet ta’ kreditu biżżejjed żmien biex jadattaw gradwalment għal kalibrazzjoni aktar konservattiva u biex jivvalutaw jekk dik il-kalibrazzjoni kinitx xierqa. Minbarra dik iż-żieda differita, ġew adottati aġġustamenti oħra biex jiġi żgurat li l-introduzzjoni tar-rekwiżit tal-NSFR ma tfixkilx il-likwidità tas-swieq kollaterali relatati, inklużi s-swieq tal-bonds sovrani.

(3)

Skont l-Artikolu 510(6) tar-Regolament (UE) Nru 575/2013, l-Awtorità Superviżorja Ewropea (l-Awtorità Bankarja Ewropea) (EBA) stabbilita mir-Regolament (UE) Nru 1093/2010 tal-Parlament Ewropew u tal-Kunsill (6), ingħatat il-mandat li tivvaluta l-adegwatezza tat-trattament tal-finanzjament stabbli meħtieġ biex ikopri r-riskju ta’ finanzjament marbut ma’ tranżazzjonijiet ta’ finanzjament tat-titoli (SFTs) u ma’ tranżazzjonijiet mhux garantiti ma’ klijenti finanzjarji fejn dawk l-SFTs jew it-tranżazzjonijiet mhux garantiti jkollhom maturità residwa ta’ inqas minn sitt xhur. F’konformità ma’ dak il-mandat, l-EBA ppreżentat rapport dwar aspetti speċifiċi tal-qafas tal-NSFR fis-16 ta’ Jannar 2024. Dak ir-rapport ikkonkluda li ż-żieda fil-fatturi ta’ finanzjament stabbli meħtieġ li japplikaw għat-tranżazzjonijiet imsemmija fl-Artikolu 428r(1), il-punt (g), l-Artikolu 428(s), il-punt (b) u l-Artikolu 428v, il-punt (a), tar-Regolament (UE) Nru 575/2013, ikollha impatt negliġibbli fuq il-livelli tal-NSFRs tal-istituzzjonijiet ta’ kreditu. Madankollu, dak ir-rapport ma vvalutax id-dimensjoni usa’ jew l-effetti konsegwenzjali rigward il-likwidità tas-swieq tad-dejn sovran u l-effetti fuq is-swieq tal-bonds sovrani. Għalhekk, il-kunsiderazzjonijiet li jiġġustifikaw id-differiment taż-żieda fil-fatturi ta’ finanzjament stabbli meħtieġ, kif previst fl-Artikolu 510(8) tar-Regolament (UE) Nru 575/2013, ikomplu jipprevalu. B’mod partikolari, peress li l-biċċa l-kbira tal-SFTs huma kollateralizzati minn strumenti ta’ dejn sovran, żieda fil-finanzjament stabbli meħtieġ relatat tista’ tnaqqas il-likwidità fis-swieq ikkonċernati. Dan jista’, min-naħa tiegħu, jirriskja li joħloq kostijiet ta’ finanzjament addizzjonali għall-Istati Membri u jbiddel il-mekkaniżmi ta’ trażmissjoni tal-politika monetarja.

(4)

Barra minn hekk, ġuriżdizzjonijiet oħra membri tal-BCBS stabbilew livelli ta’ fatturi ta’ finanzjament stabbli meħtieġ għal SFTs li huma identiċi għal dawk li huma applikabbli bħalissa skont ir-Regolament (UE) Nru 575/2013. F’dak il-kuntest, minħabba l-kompetizzjoni internazzjonali intensa fis-suq tal-SFT, iż-żieda fil-fatturi ta’ finanzjament stabbli meħtieġ sat-28 ta’ Ġunju 2025 toħloq kundizzjonijiet internazzjonali mhux ekwi li jkunu ta’ detriment għas-swieq finanzjarji tal-Unjoni.

(5)

Sabiex jiġu evitati dawk il-konsegwenzi mhux intenzjonati, il-fatturi ta’ finanzjament stabbli attwali għal SFTs u għal tranżazzjonijiet mhux garantiti ma’ klijenti finanzjarji, fejn tali tranżazzjonijiet ikollhom maturità residwa ta’ inqas minn sitt xhur, jenħtieġ li jsiru permanenti.

(6)

Sabiex jiġi żgurat monitoraġġ suffiċjenti tal-interazzjonijiet bejn ir-rekwiżiti ta’ finanzjament stabbli u l-likwidità tas-suq tal-assi riċevuti bħala kollateral f’SFTs u ta’ tranżazzjonijiet mhux garantiti ma’ klijenti finanzjarji, fejn tali tranżazzjonijiet ikollhom maturità residwa ta’ inqas minn sitt xhur, inkluż meta jkunu kollateralizzati minn dejn sovran, ir-riskju ta’ finanzjament għall-istituzzjonijiet ta’ kreditu, u żviluppi internazzjonali possibbli f’dak il-qasam, jenħtieġ li l-EBA tibgħat rapport lill-Kummissjoni kull ħames snin dwar l-adegwatezza ta’ dawk ir-rekwiżiti ta’ finanzjament stabbli.

(7)

It-twaqqif temporanju tat-trattament prudenzjali għall-flejjes dovuti minn SFTs u għal tranżazzjonijiet mhux garantiti ma’ klijenti finanzjarji, b’maturità residwa ta’ inqas minn sitt xhur, joħloq inċertezza legali għall-parteċipanti fis-suq u piż amministrattiv u finanzjarju żejjed għas-settur bankarju tal-Unjoni b’mod ġenerali li jista’ jittaffa billi tiġi stabbilita b’mod ċar id-data mistennija tal-applikazzjoni tad-dispożizzjonijiet ikkonċernati. Għalhekk, biex tiġi żgurata l-kontinwità ta’ dak it-trattament prudenzjali, jenħtieġ li dan ir-Regolament emendatorju jibda japplika mid-29 ta’ Ġunju 2025.

(8)

Għalhekk, jenħtieġ li r-Regolament (UE) Nru 575/2013 jiġi emendat skont dan,

(1)

il-paragrafu 6 huwa emendat kif ġej:

(2)

il-paragrafi 7 u 8 jitħassru.