(1)

Is-suq tal-inbid tal-Unjoni ilu għal bosta snin jiġi affettwat minn tnaqqis strutturali fil-konsum tal-Unjoni. Barra minn hekk, f’dawn l-aħħar snin, is-settur tal-inbid tal-Unjoni ffaċċja sfidi konsiderevoli. It-telf tal-bejgħ minħabba l-għeluq tas-settur tal-HORECA matul il-pandemija tal-COVID-19 ma ġiex ikkumpensat għalkollox minn żieda fil-konsum domestiku. Wara l-pandemija, il-kriżi tal-għoli tal-ħajja u s-sitwazzjoni internazzjonali instabbli kienu ta’ piż fuq id-domanda għall-inbid, kemm fis-suq tal-Unjoni kif ukoll fis-swieq tal-esportazzjoni l-aktar importanti.

(2)

Barra minn hekk, jidher li hemm bidla fid-domanda tal-konsumaturi madwar id-dinja lejn inbejjed eħfef, speċjalment inbejjed bojod, rożè u frizzanti, għad-detriment tal-inbejjed ħomor tradizzjonali. Il-kombinazzjoni tax-xejriet strutturali u l-bidliet fid-domanda għall-inbid, flimkien mal-kuntest mhux favorevoli f’dawn l-aħħar snin ikkawżaw żbilanċ rikorrenti fis-suq u żieda fl-inċertezza għall-vitikulturi, fir-rigward tad-deċiżjonijiet ta’ investiment tagħhom u l-għażla tal-varjetajiet tad-dwieli.

(3)

Barra minn hekk, il-vitikulturi qed jiġu affettwati b’mod sever minn avvenimenti meteoroloġiċi avversi aktar frekwenti u severi u minn kundizzjonijiet tat-temp aktar estremi, kif ukoll minn żieda fil-kostijiet tal-input, u dan qed jagħmilhielhom aktar diffiċli jsibu ż-żmien it-tajjeb biex iħawlu u jiżguraw l-investiment, u spiss qed tiddewwem id-deċiżjoni li jipproċedu bl-applikazzjoni tagħhom.

(4)

F’dan l-isfond, ħafna vitikulturi jeħtieġ li jwettqu analiżi fil-fond tal-varjetajiet tad-dwieli li jkunu aktar reżistenti għan-nixfa u għall-mard, jew aktar adattati għad-domanda tal-konsumaturi li qed tinbidel biex itejbu l-kompetittività tagħhom u jiddeċiedu meta jkun l-aħjar jerġgħu jħawlu l-vinji wara l-qlugħ tad-dwieli.

(5)

F’konformità mal-Artikolu 9(1), l-ewwel subparagrafu, tar-Regolament ta’ Implimentazzjoni tal-Kummissjoni (UE) 2018/274 (2), il-vitikulturi jistgħu jressqu tali applikazzjoni għat-tħawwil mill-ġdid fi kwalunkwe ħin matul l-istess sena tal-għasra li fiha jsir il-qlugħ tad-dwieli. Madankollu, l-Istati Membri jistgħu jiddeċiedu li l-applikazzjonijiet tal-awtorizzazzjoni għat-tħawwil mill-ġdid jistgħu jitressqu sa tmiem it-tieni sena tal-għasra wara s-sena li fiha jkun sar il-qlugħ tad-dwieli.

(6)

Il-vitikulturi li jaqilgħu d-dwieli jenħtieġ li jingħataw aktar żmien biex janalizzaw is-sitwazzjoni qabel ma jkollhom jiddeċiedu jekk jixtiqux jibdlu l-vinji qodma tagħhom u jekk jagħżlu li jagħmlu dan, liema varjetà ta’ dwieli u metodu ta’ kultivazzjoni huwa l-aktar adattat għat-tibdil fil-klima u għad-domanda tal-konsumaturi.

(7)

Biex il-vitikulturi jkunu jistgħu jieħdu deċiżjoni infurmata, huwa meħtieġ li l-Istati Membri jestendu bi 3 snin il-perjodu ta’ żmien bejn meta jinqalgħu id-dwieli u meta titressaq applikazzjoni għal awtorizzazzjoni għat-tħawwil mill-ġdid.

(8)

Għalhekk jenħtieġ li r-Regolament ta’ Implimentazzjoni (UE) 2018/274 jiġi emendat kif xieraq.

(9)

Il-miżura prevista f’dan ir-Regolament hija f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,