(1)

L-Anness I tar-Regolament (KE) Nru 1334/2008 jistabbilixxi lista tal-Unjoni ta’ aromatizzanti u ta’ materjali tas-sors approvati għall-użu fl-ikel u fuqu, u l-kundizzjonijiet tal-użu tagħhom.

(2)

Ir-Regolament ta’ Implimentazzjoni tal-Kummissjoni (UE) Nru 872/2012 (3) adotta l-lista tal-Unjoni ta’ sustanzi aromatizzanti u introduċieha fl-Anness I, il-Parti A, tar-Regolament (KE) Nru 1334/2008.

(3)

Dik il-lista tista’ tiġi aġġornata f’konformità mal-proċedura komuni msemmija fl-Artikolu 3(1) tar-Regolament (KE) Nru 1331/2008, fuq inizjattiva tal-Kummissjoni jew wara li Stat Membru jew parti interessata jressqu applikazzjoni.

(4)

Il-lista tal-Unjoni tal-aromatizzanti u tal-materjali tas-sors stabbilita fl-Anness I tar-Regolament (KE) Nru 1334/2008 fiha, fost l-oħrajn, għadd ta’ sustanzi aromatizzanti li għalihom, fil-mument tal-adozzjoni tal-lista bir-Regolament (UE) Nru 872/2012, l-Awtorità Ewropea dwar is-Sigurtà fl-Ikel (“l-Awtorità”) ma kinitx kapaċi teskludi riskju ta’ sikurezza għas-saħħa tal-konsumatur abbażi tad-data disponibbli u għalhekk, dehrilha li kienet meħtieġa data addizzjonali biex titlesta l-evalwazzjoni tagħhom. Dawk is-sustanzi kienu inklużi fil-lista tal-Unjoni ta’ sustanzi aromatizzanti iżda bil-kundizzjoni li d-data dwar is-sikurezza li tindirizza t-tħassib imlissen mill-Awtorità tressqet qabel ma skadew l-iskadenzi speċifiċi stabbiliti fl-Anness I, il-Parti A, tar-Regolament (KE) Nru 1334/2008. Dawk is-sustanzi ġew identifikati permezz ta’ referenza ta’ nota f’qiegħ il-paġna li tirrikjedi li l-Awtorità tlesti l-evalwazzjoni.

(5)

Fost is-sustanzi inklużi fil-lista tal-Unjoni ta’ aromatizzanti u materjali sors iżda identifikati permezz ta’ referenza ta’ nota f’qiegħ il-paġna li tirrikjedi li l-Awtorità tlesti l-evalwazzjoni, hemm is-sustanza tal-Evalwazzjoni tal-Grupp ta’ Aromatizzanti 216 (FGE.216) 4-Metil-2-fenilpent-2-enal (FL Nru 05.100). Għal din is-sustanza l-operaturi tan-negozji tal-ikel interessati ressqu d-data xjentifika addizzjonali mitluba mill-Awtorità.

(6)

Fl-opinjoni xjentifika tagħha tad-29 ta’ Ġunju 2022 (4), l-Awtorità evalwat id-data mressqa u kkonkludiet li s-sustanza rappreżentattiva tal-FGE.216 reviżjoni 2 (FGE.216Rev2), 2-Fenilkrotonaldeid (Nru tal-FL 05.062), wasslet għal mod ta’ azzjoni tal-anewġeniċità. Peress li l-istudji tal-mikronukleu in vivo disponibbli ma kinux konklużivi, ma tistax tiġi eskluża anewġeniċità potenzjali in vivo għal kwalunkwe sustanza fi ħdan FGE.216Rev2 u, għalhekk, għas-sustanza 4-Metil-2-fenilpent-2-enal (FL Nru 05.100). Għaldaqstant, l-Awtorità indikat li kienet meħtieġa aktar data biex tiġi konkluża l-valutazzjoni.

(7)

Sakemm titressaq aktar data mill-operaturi tan-negozji tal-ikel interessati, ir-Regolament tal-Kummissjoni (UE) 2024/238 (5) introduċa restrizzjonijiet fuq l-użu ta’ 4-Metil-2-fenilpent-2-enal (FL Nru 05.100).

(8)

Madankollu, l-operaturi tan-negozji tal-ikel interessati ma ressqux id-data meħtieġa u indikaw li ma hemm l-ebda użu ulterjuri ta’ din is-sustanza aromatizzanti.

(9)

Peress li t-tħassib dwar l-anewġeniċità ma jistax jiġi eskluż, l-4-Metil-2-fenilpent-2-enal (Nru FL 05.100) jenħtieġ li jitneħħa mil-lista tal-Unjoni ta’ sustanzi aromatizzanti.

(10)

Għalhekk, jenħtieġ li r-Regolament (KE) Nru 1334/2008 jiġi emendat.

(11)

Jenħtieġ li l-ikel li miegħu ġie miżjud bil-4-Metil-2-fenilpent-2-enal (FL Nru 05.100) u li introdott fis-suq fl-Unjoni jew li kien fi tranżitu lejn l-Unjoni minn pajjiżi terzi qabel id-dħul fis-seħħ ta’ dan ir-Regolament jitħalla jiġi kkummerċjalizzat fl-Unjoni sad-data tad-durabbiltà minima tiegħu jew sad-data sa meta jrid jintuża. Jenħtieġ li l-miżura tranżizzjonali ma tapplikax għas-sustanza stess u għall-preparati li ġew miżjuda b’din is-sustanza u li mhumiex maħsuba biex jiġu kkunsmati kif inhuma, peress li l-manifatturi tal-prodotti tal-ikel li jużaw dawk il-preparati bħala ingredjenti jkunu jafu minn xiex ikunu komposti meta jużawhom.

(12)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,