(1)

Ir-Regolament (UE) 2015/2283 jipprevedi li l-ikel il-ġdid awtorizzat u inkluż fil-lista tal-Unjoni tal-ikel ġdid biss jista’ jiġi introdott fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni tal-ikel ġdid.

(3)

Fit-30 ta’ Lulju 2019, il-kumpanija Nutri’ Earth (“l-applikant”) ressqet applikazzjoni lill-Kummissjoni għal awtorizzazzjoni f’konformità mal-Artikolu 10(1) tar-Regolament (UE) 2015/2283 biex tintroduċi t-trab ittrattat bir-raġġi UV tal-larvi tat-Tenebrio molitor sħaħ (dudu tad-dqiq) bħala ikel ġdid fis-suq tal-Unjoni. L-applikant talab li t-trab ittrattat bir-raġġi UV miksub mil-larvi tat-Tenebrio molitor sħaħ jintuża fil-ħobż u fil-bziezen, fil-kejkijiet, fil-prodotti b’bażi ta’ għaġin, fil-prodotti tal-patata pproċessati, fil-ġobon u fil-prodotti tal-ġobon u fiz-zlazi tal-frott u tal-ħxejjex, maħsuba għall-popolazzjoni ġenerali.

(4)

Fit-30 ta’ Lulju 2019, l-applikant għamel ukoll talba lill-Kummissjoni għall-protezzjoni tal-istudji u d-data xjentifiċi proprjetarji mressqa b’appoġġ għall-applikazzjoni, jiġifieri, id-deskrizzjoni dettaljata tal-proċess tal-produzzjoni (3) u r-riżultati dettaljati tal-analiżijiet tal-kompożizzjoni (4).

(5)

Fis-17 ta’ Mejju 2020, il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) biex twettaq valutazzjoni tat-trab ittrattat bir-raġġi UV tal-larvi tat-Tenebrio molitor sħaħ bħala ikel ġdid.

(6)

Fit-28 ta’ Marzu 2023, l-Awtorità adottat l-opinjoni xjentifika tagħha bit-titolu “Safety of UV-treated powder of whole yellow mealworm (Tenebrio molitor larvae) as a novel food pursuant to Regulation (EU) 2015/2283” (5) f’konformità mal-Artikolu 11 tar-Regolament (UE) 2015/2283.

(7)

Fl-opinjoni xjentifika tagħha, l-Awtorità kkonkludiet li t-trab ittrattat bir-raġġi UV tal-larvi tat-Tenebrio molitor sħaħ huwa sikur bil-kundizzjonijiet tal-użu proposti u fil-livelli tal-użu proposti. Għalhekk, dik l-opinjoni xjentifika tipprovdi bażi suffiċjenti biex jiġi stabbilit li t-trab ittrattat bir-raġġi UV tal-larvi tat-Tenebrio molitor sħaħ, meta jintuża fil-ħobż u fil-bziezen, fil-kejkijiet, fil-prodotti b’bażi ta’ għaġin, fil-prodotti tal-patata pproċessati, fil-ġobon u fil-prodotti tal-ġobon u fiz-zlazi tal-frott u tal-ħxejjex, maħsuba għall-popolazzjoni ġenerali, jissodisfa l-kundizzjonijiet għall-introduzzjoni fis-suq tiegħu f’konformità mal-Artikolu 12(1) tar-Regolament (UE) 2015/2283.

(8)

F’dik l-opinjoni, l-Awtorità osservat ukoll li minkejja li t-trattament bir-raġġi UV tat-trab miksub mil-larvi tat-Tenebrio molitor sħaħ iżid il-kontenut tal-vitamina D3 tiegħu, l-ikel ġdid mhuwiex kontributur dijetetiku sinifikanti tal-vitamina D3. Madankollu, meta jitqies li l-ikel li fih l-ikel ġdid jista’ jispiċċa b’ammont ta’ vitamina D li jitqies sinifikanti skont l-Anness XIII, il-Parti, il-Punt 2 tar-Regolament (UE) Nru 1169/2011 tal-Parlament Ewropew u tal-Kunsill (6), il-Kummissjoni tqis li huwa xieraq li l-konsumaturi jiġu infurmati dwar dak il-fatt. F’dawn il-każijiet, id-denominazzjoni tal-ikel ġdid għandha tkun akkumpanjata bid-dikjarazzjoni “fih il-vitamina D prodotta mit-trattament bir-raġġi UV” u d-dikjarazzjoni dwar in-nutrizzjoni għandu jkun fiha l-ammont tal-vitamina D.

(9)

Abbażi tal-evidenza ppubblikata limitata tal-allerġiji tal-ikel marbuta mal-konsum tal-larvi tat-Tenebrio molitor u tal-evidenza li turi li l-ispeċijiet tal-filu Arthropoda li għalih jappartjeni t-Tenebrio molitor, fihom għadd ta’ proteini potenzjalment allerġeniċi, l-Awtorità kkonkludiet, fl-opinjoni tagħha, li l-konsum tal-ikel ġdid jista’ jwassal ukoll għas-sensitizzazzjoni għall-proteini tal-larvi tat-Tenebrio molitor. Għalhekk, l-Awtorità rrakkomandat li ssir aktar riċerka dwar l-allerġeniċità tal-larvi tat-Tenebrio molitor.

(10)

Sabiex tindirizza r-rakkomandazzjoni tal-Awtorità, il-Kummissjoni bħalissa qed tesplora l-modi biex twettaq ir-riċerka meħtieġa dwar l-allerġeniċità tal-larvi tat-Tenebrio molitor. Sakemm id-data ta’ din ir-riċerka tiġi vvalutata mill-Awtorità, u meta jitqies li, sal-lum il-ġurnata, l-evidenza li torbot direttament il-konsum tal-larvi tat-Tenebrio molitor mal-każijiet ta’ sensitizzazzjoni primarja u allerġiji hija limitata, il-Kummissjoni tqis li ma jenħtieġx jiġi inkluż l-ebda rekwiżit ta’ tikkettar speċifiku fil-lista tal-Unjoni ta’ ikel ġdid awtorizzat li jikkonċerna l-potenzjal tat-trab ittrattat bir-raġġi UV miksub mil-larvi tat-Tenebrio molitor sħaħ li jikkawża sensitizzazzjoni primarja.

(11)

Fl-opinjoni tagħha, l-Awtorità qieset ukoll li l-konsum tat-trab ittrattat bir-raġġi UV miksub mil-larvi tat-Tenebrio molitor sħaħ jista’ jikkawża reazzjonijiet allerġiċi fil-persuni li huma allerġiċi għall-krustaċji u għall-akari tat-trab. Barra minn hekk, l-Awtorità osservat li jista’ jkun hemm allerġeni addizzjonali li jispiċċaw fl-ikel ġdid, jekk dawk l-allerġeni jkunu preżenti fis-substrat mitmugħ lill-insetti. Għalhekk, jixraq li l-ikel li fih it-trab ittrattat bir-raġġi UV miksub mil-larvi tat-Tenebrio molitor sħaħ jiġi ttikkettat kif xieraq f’konformità mal-Artikolu 9 tar-Regolament (UE) 2015/2283.

(12)

Fl-opinjoni xjentifika tagħha, l-Awtorità osservat ukoll li l-konklużjoni tagħha dwar is-sikurezza tat-trab ittrattat bir-raġġi UV miksub mil-larvi tat-Tenebrio molitor sħaħ kienet ibbażata fuq l-istudji u d-data xjentifiċi dwar id-deskrizzjoni dettaljata tal-proċess tal-produzzjoni u fuq ir-riżultati dettaljati tal-analiżijiet tal-kompożizzjoni, li mingħajrhom ma setgħetx tivvaluta l-ikel ġdid u tasal għall-konklużjoni tagħha.

(13)

Il-Kummissjoni talbet lill-applikant jiċċara aktar il-ġustifikazzjoni pprovduta fir-rigward tal-pretensjoni proprjetarja tiegħu fuq dawk l-istudji u d-data xjentifiċi u biex jiċċara t-talba tiegħu għal dritt esklużiv ta’ referenza għalihom f’konformità mal-Artikolu 26(2)(b) tar-Regolament (UE) 2015/2283.

(14)

L-applikant iddikjara li kellu d-drittijiet proprjetarji u esklużivi ta’ referenza għall-istudji u d-data xjentifiċi dwar id-deskrizzjoni dettaljata tal-proċess tal-produzzjoni u għar-riżultati dettaljati tal-analiżi tal-kompożizzjoni, skont id-dritt nazzjonali fiż-żmien meta ressaq l-applikazzjoni, u li l-partijiet terzi ma jistgħux jaċċessaw, jużaw jew jirreferu għal dik id-data u għal dawk l-istudji b’mod legali.

(15)

Il-Kummissjoni vvalutat l-informazzjoni kollha pprovduta mill-applikant u qieset li dan kien ta biżżejjed provi li kien issodisfa r-rekwiżiti stabbiliti fl-Artikolu 26(2) tar-Regolament (UE) 2015/2283. Għalhekk, jenħtieġ li l-istudji u d-data xjentifiċi dwar id-deskrizzjoni dettaljata tal-proċess tal-produzzjoni u r-riżultati dettaljati tal-analiżijiet tal-kompożizzjoni jiġu protetti f’konformità mal-Artikolu 27(1) tar-Regolament (UE) 2015/2283. Għaldaqstant, jenħtieġ li l-applikant biss ikun awtorizzat jintroduċi t-trab ittrattat bir-raġġi UV miksub mil-larvi tat-Tenebrio molitor sħaħ fis-suq fl-Unjoni fil-5 snin mid-dħul fis-seħħ ta’ dan ir-Regolament.

(16)

Madankollu, ir-restrizzjoni tal-awtorizzazzjoni tat-trab ittrattat bir-raġġi UV miksub mil-larvi tat-Tenebrio molitor sħaħ u tar-referenza għall-istudji u d-data xjentifiċi li jinsabu fil-fajl tal-applikant għall-użu tiegħu biss ma twaqqafx lil applikanti sussegwenti milli japplikaw għal awtorizzazzjoni għall-introduzzjoni fis-suq tal-istess ikel ġdid, dment li l-applikazzjoni tagħhom tissejjes fuq informazzjoni miksuba legalment li tappoġġa din l-awtorizzazzjoni.

(17)

Jenħtieġ li t-trab ittrattat bir-raġġi UV miksub mil-larvi tat-Tenebrio molitor sħaħ jiġi inkluż fil-lista tal-Unjoni tal-ikel ġdid stabbilita fir-Regolament ta’ Implimentazzjoni (UE) 2017/2470. Għalhekk, jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat kif xieraq.

(18)

Il-miżuri previsti f’dan ir-Regolament jikkonformaw mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,